Oʻzbekiston Respublikasi Hukumati bilan Qozogʻiston Respublikasi Hukumati, bundan keyin “Tomonlar” deb ataluvchilar,

ilmiy-texnikaviy hamkorlik butun ikki tomonlama munosabatlar kompleksining muhim tarkibiy qismi ekaniga ishonch hosil qilib,

ilmiy tadqiqotlar va ishlamalarning internatsionallashtirish sharoitlarida birgalikda harakat qilish zaruratini eʼtirof etib,

Tomonlar davlatlarining mavjud ilmiy-texnikaviy aloqalarini hisobga olib,

bunday hamkorlik Tomonlar davlatlari xalqlari oʻrtasida ikki tomonlama munosabatlarni mustahkamlashga, va shuningdek oʻzaro foydali savdo-iqtisodiy aloqalarni yanada rivojlantirishga yordam berishini eʼtiborga olib,

Tomonlar Tomonlar davlatlari fan va texnikasini rivojlantirish manfaatlarini koʻzlab, teng huquqlilik va oʻzaro manfaat tamoyillari asosida ilmiy-texnikaviy hamkorlikka koʻmaklashadilar.

Ushbu Bitim doirasidagi ikki tomonlama hamkorlik yoʻnalishlari Tomonlar davlatlari manfaatlari bilan belgilanadi.

Ilmiy-texnikaviy hamkorlik ikki mamlakatning vazirliklari, idoralari, fanlar akademiyalari, ilmiy tashkilotlari (milliy ilmiy markazlar, ilmiy-ishlab chiqarish markazlari, ilmiy-tadqiqot institutlari), oliy oʻquv yurtlari, ayrim olimlari va mutaxassislari tomonidan, ularning vakolatlari doirasida, Tomonlar davlatlari milliy qonun hujjatlariga muvofiq boʻladigan shartnomalar va kontraktlar asosida amalga oshiriladi.

Hamkorlikka umumiy rahbarlik va muvofiqlashtirishni Oʻzbekiston tomonidan — Oʻzbekiston Respublikasi Vazirlar Mahkamasi huzuridagi fan va texnologiyalar markazi, Qozogʻiston tomonidan — Qozogʻiston Respublikasi Taʼlim va fan vazirligi amalga oshiradi.

Mazkur vakolatli organlarning nomlari yoki vazifalari oʻzgarganda Tomonlar diplomatik kanallar orqali oʻz vaqtida xabardor boʻladilar.

Shartnomalar va kontraktlar hamkorlikni amalga oshirish masalalarini, uning iqtisodiy va tashkiliy shartlarini, chunonchi:

— hamkorlikning maqsadlari va mazmuni, vazifalari va undan kutilayotgan natijalar, ularning muddatlari va amalga oshirish shartlari;

— oʻzaro moliyaviy majburiyatlar;

— ilmiy-texnik obyektlardan birgalikda foydalanish tartibi, shuningdek birgalikdagi tadqiqotlar natijalaridan foydalanish va birgalikdagi ilmiy faoliyat davomida olingan intellektual mulk huquqlarini taqsimlash masalalari;

— nizoli masalalarni hal qilish tartibi va hamkorlikni amalga oshirishda ishtirok etayotgan shaxslar hamkorlik doirasida zimmalaridagi majburiyatlarini bevosita bajarayotgan vaqtda sheriklarga keltirishi mumkin boʻlgan zararlarning oʻrnini qoplash tartibi;

— hamkorlikda uchinchi davlatlar yoki xalqaro tashkilotlar shaxslarining ishtirok etishi, bunday ishtirokni moliyaviy taʼminlash va hamkorlik natijalaridan foydalanish tartibi;

— axborotning ishonchliligi va hamkorlik jarayonida bir-biriga beriladigan materiallar va uskunaning sifati uchun masʼuliyatni aniqlab berishi kerak.

Ushbu Bitim doirasidagi hamkorlik quyidagi shakllarda amalga oshirilishi mumkin:

— chuqur ilm talab qiladigan va resurslarni tejaydigan texnologiyalarni yaratish va oʻzlashtirish boʻyicha qoʻshma ilmiy-tadqiqot dasturlarini, loyihalarini amalga oshirish;

— Tomonlar davlatlarining ilmiy-tadqiqot tashkilotlarida, oliy oʻquv yurtlarida, texnoparklarida, arxiv, kutubxona va muzeylarida ilmiy ishlar, shu jumladan qoʻshma dala tadqiqotlari va ekspeditsiyalar oʻtkazish;

— Tomonlar davlatlari qonun hujjatlari belgilagan tartibda fan-texnika axboroti, hujjatlarini almashish, adabiy va bibliografik nashrlar oʻrtasida kontraktlar tuzish;

— qoʻshma seminarlar, ilmiy konferensiyalar va xizmat uchrashuvlarini oʻtkazish;

— olimlar va mutaxassislarning malakalarini oshirish, stajirovkalar tashkil qilish;

— ilmiy va ilmiy-texnikaviy dasturlar va loyihalarning ekspertizasini oʻtkazish.

Hamkorlik ushbu Bitimning bajarilishini taʼminlovchi boshqa kelishilgan shakllarda ham amalga oshirilishi mumkin.

Muayyan qoʻshma tadqiqotlar shakllarini tanlashda va aniqlashda Tomonlar Tomonlar davlatlarining ilmiy-texnikaviy siyosati ustuvorligiga amal qiladilar.

Tomonlar davlatlari olimlari va mutaxassislarining ish sharoitlari hamkorlik qiluvchi tashkilotlar oʻrtasida ushbu Bitimning 3 va 4-moddalarida koʻzda tutilgan shartnoma va kontraktlar asosida kelishiladi.

Tomonlar ushbu Bitim doirasidagi hamkorlik natijasida yuzaga kelishi mumkin boʻlgan intellektual mulk huquqlarini, Tomonlar davlatlari milliy qonun hujjatlariga muvofiq, himoya qilishga koʻmaklashadilar. Intellektual mulk huquqlarini himoya qilishning aniq masalalari ushbu Bitimning 4-moddasida koʻzda tutilgan shartnomalar va kontraktlardan kelib chiqadi.

Ikkala Tomonning hamkorlik qiluvchi tashkilotlari oʻrtasida kelishilgan holda, ushbu Bitim doirasida amalga oshirilayotgan ilmiy va ilmiy-texnikaviy dastur va loyihalarni bajarishda ishtirok etish uchun uchinchi tomonlarning olimlari, texnika ekspertlari, davlat tashkilotlari va korxonalari, va shuningdek xalqaro tashkilotlar mutaxassislari taklif qilinishi mumkin.

Ushbu Bitim Tomonlarning oʻzlari ishtirok etayotib tuzgan boshqa xalqaro shartnomalardan kelib chiqadigan huquq va majburiyatlariga daxl qilmaydi.

Tomonlarning oʻzaro roziligi boʻyicha ushbu Bitimga alohida bayonnomalar bilan rasmiylashtiriladigan ushbu Bitimning ajralmas qismlari hisoblanadigan oʻzgartish va qoʻshimchalar kiritilishi mumkin.

Ushbu Bitimning qoidalarini talqin qilishda bahs va kelishmovchiliklar paydo boʻlsa, Tomonlar ularni maslahatlashuv va muzokaralar yoʻli bilan hal qiladilar.

Ushbu Bitim noaniq muddatga tuziladi va Tomonlardan biri boshqa Tomonni Bitimning amalini toʻxtatish niyati toʻgʻrisida yozma ravishda xabardor qilgan sanadan eʼtiboran olti oy oʻtgunga qadar oʻz kuchida qolaveradi.

Ushbu Bitim uning kuchga kirishi uchun zarur boʻlgan davlat ichki protseduralarini Tomonlar bajargani toʻgʻrisida oxirgi yozma xabar olingan sanadan eʼtiboran kuchga kiradi.

Ushbu Bitimning qoidalari oʻzgarishi yoki toʻxtatilishi ushbu Bitim doirasida tuzilgan va Tomonlar oxiriga yetkazmagan, bevosita shartnomalar bajarilishiga daxl qilmaydi.

Toshkent shahrida 2006-yil 20-martda ikki asl nusxada, har biri oʻzbek, qozoq va rus tillarida tuzildi, bunda barcha matnlar bir xil kuchga ega.

Ushbu Bitim qoidalarini talqin qilishda kelishmovchiliklar paydo boʻlsa, Tomonlar rus tilidagi matnga murojaat qiladilar.