Oʻzbekiston Respublikasi Hukumati bilan Bolgariya Respublikasi Hukumati, bundan keyin “Ahdlashuvchi Tomonlar” deb ataluvchilar,

Oʻzbekiston Respublikasi bilan Bolgariya Respublikasi oʻrtasida yoʻlovchi va yuklarni tashish, shuningdek ularning hududlari boʻylab tranzit tashish muhimligini tan olib,

oʻzaro manfaatli shartlar asosida temir yoʻl transporti sohasidagi hamkorlikni birgalikda rivojlantirish istagida,

Oʻzbekiston Respublikasi Hukumati bilan Bolgariya Respublikasi Hukumati oʻrtasida transport sohasida hamkorlik toʻgʻrisida 1998-yil 24-iyunda imzolangan Memorandumning ahamiyatini eʼtirof etib,

davlatlararo aloqalarni mustahkamlash maqsadida, mavjud va yangi qurilayotgan temir yoʻllaridan oʻzaro manfaat asosida foydalanish zarurligini tasdiqlab, shuningdek transport sohasida, shu jumladan aralash tashishlarni amalga oshirish orqali har tomonlama hamkorlikni yanada chuqurlashtirishga intilib,

ikkala davlat uchun kuchga kirgan xalqaro koʻp tomonlama bitimlarni ham nazarda tutib,

Har bir Ahdlashuvchi Tomon oʻz davlati hududida yoʻlovchi va yuklarni temir yoʻllarda xalqaro tashishni amalga oshirish uchun oʻzarolik asosida eng qulay sharoitlarni taʼminlaydi.

Oʻzbekiston Respublikasi bilan Bolgariya Respublikasining temir yoʻl maʼmuriyatlari temir yoʻl transportiga yoʻlovchi va yuklarning hajmini qoʻshimcha jalb etish maqsadida, shu jumladan imtiyozli tariflarni qoʻllash hamda temir yoʻl parom aloqasidan foydalanish siyosatini oʻtkazish orqali hamkorlik qiladilar.

Ahdlashuvchi Tomonlar, ikki tomonlama va koʻp tomonlama asosda erishilgan ahdlashuvlarga muvofiq ekspeditorlik xizmatlarini amalga oshirishga koʻmaklashadilar.

Ahdlashuvchi Tomonlar oʻz davlatlarining amaldagi qonunlari doirasida ularning hududlarida mavjud temir yoʻl tarmogʻi orqali harakatlanuvchi sostavni qarshiliksiz oʻtkazish, yuklarni tashishni, shu jumladan uchinchi davlatlarga/dan tranzitini taʼminlaydilar.

Ahdlashuvchi Tomonlar tuziladigan ikki tomonlama shartnomalarda belgilangan hajmlarda temir yoʻl transporti ehtiyojlari uchun texnika, uskunalar, ehtiyot qismlar, moddiy, yoqilgʻi-energetika manbalari va moylarni oʻzaro yetkazib berishni taʼminlovchi Oʻzbekiston Respublikasi bilan Bolgariya Respublikasining moddiy-texnika taʼminoti tashkilotlari hamda muassasalari va boshqa xoʻjalik yurituvchi subyektlarga koʻmaklashadilar.

Ahdlashuvchi Tomonlar oʻzining milliy qonunlarga muvofiq oʻz davlatlari hududida yoʻlovchi va yuklarni temir yoʻl transportida tashishni amalga oshirish xavfsizligini taʼminlaydilar.

Ahdlashuvchi Tomonlardan birining transport vositalari, xodimlari, yoʻlovchilari yoki yuklari ishtirokida avariya yoki baxtsiz hodisalar yuz berganda boshqa Ahdlashuvchi Tomon, tegishli transport vositasini roʻyxatdan oʻtkazgan Ahdlashuvchi Tomonni bu toʻgʻrida xabardor qiladi va uning tergov natijalari toʻgʻrisida axborot beradi.

U yoki bu Ahdlashuvchi Tomonning zararini, bu masalalarni belgilab beruvchi, Ahdlashuvchi Tomonlar uchun kuchga kirgan xalqaro hujjatlar asosida aybdor deb topilgan Ahdlashuvchi Tomon qoplaydi.

Ahdlashuvchi Tomonlar poyezd brigadalarining xizmat koʻrsatuvchi xodimlar va ishlari poyezdlar yoʻnalishi boʻyicha oʻtadigan shaxslarning mehnat shart-sharoitlari xavfsizligini taʼminlaydilar; boshqa Ahdlashuvchi Tomon davlatining hududida turgan temir yoʻl xodimlariga ularning xizmat majburiyatlarini bajarishda, shartnoma asosida ovqat va dam olishni tashkil etishda koʻmaklashadilar.

Ahdlashuvchi Tomonlarning har biri boshqa Ahdlashuvchi Tomonning xizmat koʻrsatuvchi xodimlariga oʻz mamlakatiga xavfsiz yetib olishi uchun zarur hajmda shoshilinch bepul tibbiy yordam beradilar.

Ahdlashuvchi Tomonlar oʻzining milliy qonunlariga muvofiq oʻz davlatlarining hududlarida boshqa Ahdlashuvchi Tomonning temir yoʻl transport korxonalari va hissadorlik jamiyatlari faoliyat olib borishlari uchun shart-sharoitlar yaratishga koʻmaklashadilar.

Ahdlashuvchi Tomonlar temir yoʻl transporti mutaxassislarini tayyorlash sohasida hamkorlik qiladilar.

Tegishli oʻquv muassasasini tamomlagandan soʻng berilgan ixtisoslik hujjatlari ikkala Ahdlashuvchi Tomon davlatining hududlarida ularning qonunlariga muvofiq tegishli protseduralar oʻtkazilgach, bir xil yuridik kuchga ega boʻladi.

Ahdlashuvchi Tomonlar ushbu Bitimning alohida qoidalarini amalga oshirish maqsadida temir yoʻl transportini boshqarish vakolatli organlariga yoki temir yoʻl maʼmuriyatlariga zarur hollarda tegishli hujjatlar tuzish huquqini beradilar.

Ahdlashuvchi Tomonlar temir yoʻl tashuvlari sohasida boshqa Ahdlashuvchi Tomonning manfaatlariga daxldor qabul qilingan yoki tayyorlanayotgan qarorlar toʻgʻrisida bir-birlarini xabardor qiladilar.

Ikkala Ahdlashuvchi Tomon davlatlarining hududi boʻylab tashuvlar, shuningdek ular davlatlarining hududi orqali harbiy maqsaddagi yuklar yoki boshqa xavfli yuklarning tranzit oʻtishi Ahdlashuvchi Tomonlarning milliy qonunlariga koʻra tartibga solinadi.

Ushbu Bitim maqsadlarida quyidagilar Ahdlashuvchi Tomonlarning vakolatli organlari deb hisoblanadilar:

Oʻzbekiston Respublikasi uchun: “Oʻzbekiston temir yoʻllari” Davlat-hissadorlik temir yoʻllari kompaniyasi;

Bolgariya Respublikasi uchun: Transport va kommunikatsiya vazirligi.

Ushbu Bitimni talqin qilish yoki qoʻllashda yuzaga keladigan barcha bahsli masalalarni Ahdlashuvchi Tomonlar muzokaralar orqali hal qiladilar.

Ushbu Bitimga oʻzgartish va toʻldirishlar uning ajralmas qismi hisoblanadigan hamda 14-moddada belgilangan tartibga muvofiq kuchga kiradigan alohida bayonnomalar bilan rasmiylashtiriladi.

Ushbu Bitim Ahdlashuvchi Tomonlar uning kuchga kirishi uchun zarur boʻlgan davlat ichki protseduralarini bajarganliklari toʻgʻrisida oxirgi yozma xabarnoma olingan kundan boshlab kuchga kiradi.

Ushbu Bitim besh yillik muddatga tuziladi. Ahdlashuvchi Tomonlardan biri ushbu Bitimning amal qilishini toʻxtatish niyati toʻgʻrisida tegishli muddat tugashidan kamida olti oy ilgari boshqa Ahdlashuvchi Tomonni yozma ravishda xabardor qilmasa, u keyingi besh yillik muddatlarga oʻz-oʻzidan uzayaveradi.

Ushbu Bitimning amal qilishi toʻxtatilgan holda, uning qoidalari u amal qilgan davrda tuzilgan barcha tegishli hujjatlarga nisbatan ularning toʻla bajarilishiga qadar qoʻllaniladi.

Sofiya shahrida 2003-yil 24-noyabrda ikki asl nusxada, har biri oʻzbek, bolgar va rus tillarida tuzildi, bunda barcha matnlar bir xil yuridik kuchga ega. Ushbu Bitim qoidalarini talqin qilishda qarama-qarshiliklar yuzaga kelgan holda rus tilidagi matndan foydalaniladi.