“Axborotlashtirish toʻgʻrisida”gi Oʻzbekiston Respublikasi Qonunini, Oʻzbekiston Respublikasi Prezidentining “Axborot-kommunikatsiya texnologiyalarini yanada rivojlantirishga oid qoʻshimcha chora-tadbirlar toʻgʻrisida” 2005-yil 8-iyuldagi PQ-117-son qarorini bajarish yuzasidan hamda Internet tarmogʻida Oʻzbekiston Respublikasining Hukumat portalini yanada rivojlantirish maqsadida Vazirlar Mahkamasi qaror qiladi:

1. Internet tarmogʻida Oʻzbekiston Respublikasining Hukumat portali toʻgʻrisidagi nizom 1-ilovaga muvofiq tasdiqlansin.

2. Oʻzbekiston aloqa va axborotlashtirish agentligi:

bir oy muddatda Oʻzbekiston aloqa va axborotlashtirish agentligining “Oʻzinfokom” kompyuter va axborot texnologiyalarini rivojlantirish hamda joriy etish markazi tarkibida xodimlarining umumiy soni 2-ilovaga muvofiq 12 nafar boʻlgan Internet tarmogʻida Oʻzbekiston Respublikasining Hukumat portalini axborot bilan taʼminlash va rivojlantirish guruhini (keyingi oʻrinlarda Guruh deb ataladi) tashkil etsin;

Oʻzbekiston Respublikasi Elektron Hukumati yaratilishi va yanada rivojlantirilishini hisobga olgan holda Guruhni zamonaviy moddiy-texnika bazasi bilan taʼminlasin;

Oʻzbekiston Respublikasi Vazirlar Mahkamasiga Internet tarmogʻida Oʻzbekiston Respublikasining Hukumat portalida joylashtirish uchun vazirliklar va idoralar tomonidan taqdim etilayotgan axborotlar, ularning davriyligi va muntazamliligi toʻgʻrisida yilning har choragida hisobot taqdim etsin.

3. Belgilab qoʻyilsinki, Internet tarmogʻida Oʻzbekiston Respublikasining Hukumat portali xarajatlarini moliyalashtirish, moddiy-texnik taʼminlash va unga xizmat koʻrsatish tasdiqlangan smeta doirasida Oʻzbekiston aloqa va axborotlashtirish agentligining Axborot-kommunikatsiya texnologiyalarini rivojlantirish jamgʻarmasi mablagʻlari, shuningdek qonun hujjatlarida taqiqlanmagan boshqa manbalar hisobiga amalga oshiriladi.

4. Vazirliklar, idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

bir oy muddatda axborot roʻyxatlari va taqdim etish muddatlari, shuningdek axborot materiallarini joylashtirishga ruxsat berish va axborot xizmatlari tomonidan Guruhga keyinchalik Internet tarmogʻida Oʻzbekiston Respublikasining Hukumat portalida joylashtirish uchun axborot taqdim etish uchun masʼul shaxslarni tayinlash boʻyicha tadbirlar rejasini ishlab chiqsinlar va tasdiqlasinlar;

axborot xizmatlari tomonidan Guruhga idora faoliyati, amalga oshirilayotgan ishlar, tarkibiy va kadrlarga oid oʻzgarishlar, qabul qilingan qarorlar, shuningdek koʻrsatilayotgan interaktiv xizmatlar toʻgʻrisida haftada kamida bir marta axborot taqdim etilishini taʼminlasinlar;

oʻz rasmiy axborot resurslarining qonun hujjatlari talablariga muvofiqligini bir yilda kamida ikki marta ekspertizadan oʻtkazsinlar.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N. Aripov zimmasiga yuklansin.

1. Mazkur Nizom Oʻzbekistonning ijtimoiy-siyosiy va ijtimoiy-iqtisodiy hayoti toʻgʻrisidagi axborotlarni tarqatish, Oʻzbekiston Respublikasi Hukumati, davlat va xoʻjalik boshqaruvi, mahalliy davlat hokimiyati organlari (keyingi oʻrinlarda tashkilotlar deb ataladi) faoliyatini keng yoritish, shuningdek tashkilotlar tomonidan axborot-kommunikatsiya texnologiyalaridan foydalangan holda interaktiv davlat xizmatlari koʻrsatish maqsadida Internet tarmogʻida Oʻzbekiston Respublikasining Hukumat portalini tashkil etish, rivojlantirish, tizimli qoʻllab-quvvatlash va axborotlar bilan taʼminlash yuzasidan umumiy talablarni belgilaydi.

2. Internet tarmogʻidagi Oʻzbekiston Respublikasining Hukumat portali (keyingi oʻrinlarda Portal deb ataladi) Internet tarmogʻida Oʻzbekiston Respublikasi Hukumatining rasmiy davlat axborot resursi hisoblanadi.

3. Portal tashkilotlarning elektron-axborot oʻzaro hamkorligi infratuzilmasining, shuningdek yuridik va jismoniy shaxslar oʻrtasidagi tizim yaratuvchi elementi hisoblanadi.

4. Quyidagilar Portalning asosiy maqsadlari hisoblanadi:

davlat axborot resurslarini shakllantirish va rivojlantirish, tashkilotlar tomonidan yuridik va jismoniy shaxslarga interaktiv davlat xizmatlari koʻrsatish uchun moʻljallangan ixtisoslashtirilgan axborotlar tizimini yaratish;

tegishli axborot resurslarini tashkil etish va joylashtirish yoʻli bilan respublika aholisi hamda xalqaro jamoatchilikning Oʻzbekiston Respublikasi Hukumati faoliyati toʻgʻrisida, respublikaning ijtimoiy-siyosiy va ijtimoiy-iqtisodiy hayotida amalga oshirilayotgan islohotlardan xabardorligini taʼminlash;

tashkilotlarning yuridik va jismoniy shaxslar bilan oʻzaro hamkorligi samaradorligini oshirishga koʻmaklashish;

aholining tegishli tashkilotlar bilan oʻzaro hamkorlik qilish imkoniyatlari va tartibotlari toʻgʻrisida ularni xabardor qilish;

axborotlarni ayirboshlash va tarqatish tezligi darajasi, tashkilotlarning xabardorligi darajasi oʻsishi hisobiga tashkilotlar faoliyatining sifati va samaradorligini oshirishga koʻmaklashish;

axborotlarni idoralararo elektron ayirboshlashni birxillashtirish.

5. Quyidagi maʼlumotlarning mavjud boʻlishi va ularning ishonchliligi Portaldagi axborotlar mazmuniga qoʻyiladigan asosiy talablar hisoblanadi:

Oʻzbekistonning ijtimoiy-siyosiy va ijtimoiy-iqtisodiy hayoti toʻgʻrisidagi maʼlumotlar;

respublikaning davlat tuzilishi tarkibi, respublikani boshqarishning davlat, ijtimoiy-siyosiy va iqtisodiy institutlari toʻgʻrisidagi maʼlumotlar;

tashkilotlarning faoliyati, shuningdek tuzilmasi, funksiyalari, vazifalari, vakolatlari va aloqalari toʻgʻrisidagi maʼlumotlar;

yuridik va jismoniy shaxslar uchun ruxsat beruvchi hujjatlarni rasmiylashtirish yoki olish shartlari, shakllari, blankalari, tartibi va tartibotlari toʻgʻrisidagi maʼlumotlar;

axborot-kommunikatsiya texnologiyalaridan foydalangan holda koʻrsatiladigan interaktiv davlat xizmatlari toʻgʻrisidagi maʼlumotlar;

tashkilotlarda va davlat axborotlashtirishi sohasida axborot-kommunikatsiya texnologiyalarining joriy etilishi toʻgʻrisidagi maʼlumotlar;

mamlakatdagi muhim voqealar toʻgʻrisidagi maʼlumotlar, fotoarxiv, tashkilotlarning turli tuzilmalaridan va davlat hokimiyati organlaridan olingan tadbirlar haqidagi maʼlumotlarning qisqacha mazmuni;

boshqa umumiy foydalaniladigan maʼlumotlar.

6. Quyidagilar Portalga joylashtirish uchun axborot manbalari hisoblanadi:

tashkilotlarning faoliyati, amalga oshirilayotgan ishlar, tarkibiy va kadrlarga oid oʻzgarishlar, qabul qilingan qarorlar va hokazolar toʻgʻrisida Oʻzbekiston Respublikasi Bosh vazirining matbuot kotibi, tashkilotlarning axborot xizmatlari tomonidan har haftada kamida bir marta taqdim etiladigan axborotlar;

ommaviy axborot vositalaridan, shu jumladan elektron ommaviy axborot vositalaridan olinadigan axborotlar;

Oʻzbekiston Respublikasining qonun hujjatlariga zid boʻlmagan boshqa manbalar.

7. Portalga joylashtirish uchun taqdim etilayotgan axborotda Oʻzbekiston Respublikasining davlat siri boʻlgan maʼlumotlar yoxud qonun hujjatlariga muvofiq foydalanilishi cheklangan boshqa maʼlumotlar boʻlmasligi kerak.

Tashkilotlarning axborot materiallarini Hukumat portalida joylashtirishga ruxsatnomani rahbar yoki rahbar tomonidan belgilangan tartibda belgilanadigan boshqa shaxs beradi.

8. Portalga joylashtirish uchun taqdim etilayotgan axborotlar mavzulari boʻyicha dolzarb, ishonchli, yaxlit, aniq tuzilgan va taqsimlangan boʻlishi kerak.

9. Portalga axborotlar Oʻzbekiston Respublikasining davlat tilida taqdim etilishi kerak. Shu bilan birga, Portalda axborotlarning rus va ingliz tillaridagi, shuningdek boshqa tillardagi mazmuni bir xil yoxud qisqartirilgan versiyalari boʻlishi mumkin.

10. Portalga “Oʻzinfokom” kompyuter va axborot texnologiyalarini rivojlantirish hamda joriy etish markazi huzuridagi Internet tarmogʻida Oʻzbekiston Respublikasining Hukumat portalini axborot bilan taʼminlash va rivojlantirish guruhi tomonidan, ushbu Nizomga ilovadagi sxemaga muvofiq xizmat koʻrsatiladi.

11. Quyidagilar Guruhning asosiy funksiyalari va vazifalari hisoblanadi:

Oʻzbekiston Respublikasi Bosh vazirining matbuot kotibi, tashkilotlarning ular faoliyatini yorituvchi axborot xizmatlari, davlat roʻyxatidan oʻtkazilgan ommaviy axborot vositalari tomonidan muntazam ravishda taqdim etiladigan respublikaning ijtimoiy-siyosiy va ijtimoiy-iqtisodiy sohalarida amalga oshirilayotgan islohotlar toʻgʻrisidagi axborot materiallari roʻyxatini aniqlash va Portalda eʼlon qilish, shuningdek Oʻzbekiston Respublikasining qonun hujjatlariga zid boʻlmagan boshqa manbalarni aniqlash;

“Oʻzinfokom” markazining boshqa boʻlinmalari bilan oʻzaro uzviy hamkorlikda Portalning axborot xavfsizligini va uzluksiz faoliyat koʻrsatishini taʼminlash;

tashkilotlarga ular oʻrtasida, shuningdek yuridik va jismoniy shaxslar oʻrtasida elektron-axborot oʻzaro hamkorlikni rivojlantirish masalalari boʻyicha koʻmaklashish;

tashkilotlar axborot resurslarining amaldagi qonun hujjatlari talablariga muvofiqligi yuzasidan doimiy monitoring olib borish;

Portal faoliyatini rivojlantirish va takomillashtirish, Portal vositasida koʻrsatiladigan interaktiv xizmatlar roʻyxatini kengaytirish va sifatini oshirish, shuningdek aholi hamda tadbirkorlik tuzilmalarining axborotlarga boʻlgan ehtiyojini qondirish maqsadida tashkilotlarning axborot resurslari holatini yaxshilash boʻyicha takliflar ishlab chiqish va kiritish;

Portal, tashkilotlarning axborot resurslari, Portalni rivojlantirish va takomillashtirish istiqbollari toʻgʻrisida bosma materiallarni tayyorlash va ommaviy axborot vositalarida eʼlon qilish, bu haqda telekoʻrsatuvlar va radioeshittirishlar tashkil etish;

Portal faoliyati, koʻrsatilayotgan interaktiv davlat xizmatlari toʻgʻrisida jamoatchilik, tadbirkorlik tuzilmalari vakillari va boshqa Internetdan foydalanuvchilarning fikr-mulohazalarini oʻrganish boʻyicha tahliliy ishlar olib borish;

tashkilotlar, shuningdek ommaviy axborot vositalari bilan axborot-maʼlumotnoma ishlarini olib borish uchun Guruh faoliyatining asosiy yoʻnalishlari boʻyicha tahliliy, statistik va boshqa materiallar maʼlumotlarining tizimlashtirilgan bankini yaratish.

12. Guruh:

Oʻzbekistonning ijtimoiy-siyosiy va ijtimoiy-iqtisodiy hayoti, Oʻzbekiston Respublikasi Hukumatining faoliyati toʻgʻrisidagi axborotlarni yigʻishi, tahlil qilishi va yagona shaklda umumlashtirishi;

Oʻzbekiston Respublikasi Bosh vazirining matbuot kotibi, tashkilotlarning axborot xizmatlari tomonidan taqdim etilgan axborotlarni davlat tilida, shuningdek mazmunan bir xil yoki qisqartirilgan versiyalarini rus, ingliz tillarida va boshqa tillarda bir kun muddatdan kechiktirmay Portalda joylashtirishi;

taqdim etilgan va shakllantirilgan axborotlarni uzatish, qayta ishlash, eʼlon qilish va saqlash jarayonida ularning toʻliqligini taʼminlashi;

Internet tarmogʻidan foydalanuvchilar uchun Portaldan uzluksiz foydalanish imkoniyatini taʼminlashi;

Portalni yanada rivojlantirish va takomillashtirish boʻyicha ushbu Nizomga zid boʻlmagan tadbirlarni, shu jumladan texnik tusdagi tadbirlarni amalga oshirishi;

Internet tarmogʻidan foydalanuvchilar tomonidan Portalning zarurligi va samaradorligi toʻgʻrisida jamoatchilik fikr-mulohazalarini oʻrganish asosida koʻrsatilayotgan interaktiv xizmatlarni yaxshilash boʻyicha takliflarni shakllantirishi;

Portal faoliyatini va koʻrsatilayotgan interaktiv xizmatlarni har chorakda kamida bir marta ommaviy axborot vositalarida yoritishi shart.

13. Guruh axborotlarning Portalda oʻz vaqtida joylashtirilishi, shuningdek ushbu Nizomda nazarda tutilgan vazifalarning bajarilishi uchun javob beradi.

14. Qonun hujjatlariga muvofiq Portalda joylashtiriladigan axborotlarning ishonchliligi, mazmuni va oʻz vaqtida taqdim etilishi uchun tegishli tashkilotlar javob beradi.