Kadrlar tayyorlash milliy dasturida belgilangan vazifalarni amalga oshirish, ta’lim tizimidagi islohotlarga muvofiq 1999/2000 o‘quv yilida O‘zbekiston Respublikasi oliy ta’lim muassasalarining bakalavriat va magistraturasiga hamda o‘rta maxsus ta’lim muassasalariga qabulni uyushqoqlik va tartibli ravishda tashkil etish, qobiliyatli yoshlarni adolatli tanlov asosida saralashni amalga oshirish, shuningdek test sinovlarining yuqori darajada o‘tkazilishini ta’minlash maqsadida Vazirlar Mahkamasi qaror qiladi:

1. Quyidagilar:

O‘zbekiston Respublikasi o‘rta maxsus ta’lim muassasalariga o‘quvchilarni qabul qilish tartibi va qoidalari to‘g‘risida Nizom 3-ilovaga muvofiq tasdiqlansin.

2. O‘zbekiston Respublikasi Oliy va o‘rta maxsus ta’lim vazirligi, Xalq ta’limi vazirligi, tasarrufida ta’lim muassasalari bo‘lgan vazirliklar, idoralar, Davlat test markazi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tasdiqlangan nizomlarni bajarish bo‘yicha zarur tashkiliy tadbirlarni amalga oshirsinlar.

3. O‘zbekiston Respublikasi Oliy va o‘rta maxsus ta’lim vazirligi, Moliya va Adliya vazirligi bir hafta muddatda “O‘zbekiston Respublikasi ta’lim muassasalarida o‘qitishning to‘lov-kontrakt shakli va tushgan mablag‘larni taqsimlash tartibi to‘g‘risida Nizom”ni ishlab chiqsinlar va belgilangan tartibda tasdiqlash uchun O‘zbekiston Respublikasi ta’lim muassasalariga qabul qilish bo‘yicha Davlat komissiyasiga kiritsinlar.

4. O‘zbekiston Respublikasi Vazirlar Mahkamasining 1998-yil 4-iyuldagi 320-f-son farmoyishi o‘z kuchini yo‘qotgan deb hisoblansin.

5. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari H.S.Karomatov zimmasiga yuklansin.

1. O‘rta maxsus ta’lim muassasalari (texnikumlar, bilim yurtlari) qabulni O‘zbekiston Respublikasi Vazirlar Mahkamasining tegishli farmoyishi bilan tasdiqlangan davlat grantlari va to‘lov-kontrakt asosida qabul kvotalariga muvofiq amalga oshiradilar.

2. O‘zbekiston Respublikasi ta’lim muassasalariga qabul qilish bo‘yicha Davlat komissiyasi (keyingi o‘rinlarda Davlat komissiyasi deb ataladi) Makroiqtisodiyot va statistika vazirligi, vazirlik va idoralarning taqdimnomalariga ko‘ra mutaxassisliklar guruhlari (mutaxassisliklar) bo‘yicha o‘rinlar sonini tasdiqlaydi va bu haqdagi ma’lumotlarning e’lon qilinishini ta’minlaydi.

3. O‘zbekiston Respublikasi o‘rta maxsus ta’lim muassasalariga o‘quvchilar qabul qilish umumiy o‘rta ta’lim (11-sinf) negizida — test sinovlari natijalari asosida to‘plangan ballarning reyting tizimi bo‘yicha; bazaviy ta’lim (9-sinf) negizida — kirish sinovlari natijalariga ko‘ra amalga oshiriladi.

Imkoniyatlari cheklangan shaxslar uchun ixtisoslashtirilgan kasb-hunar kollejiga o‘quvchilar qabul qilish ularning o‘qish yo‘nalishlarini ixtiyoriy tanlashi hisobga olingan holda umumiy o‘rta ta’lim negizida, mehnat va aholini ijtimoiy muhofaza qilish hududiy bosh boshqarmalarining, tuman (shahar) bandlikka ko‘maklashish va aholini ijtimoiy muhofaza qilish markazlarining yo‘llanmalari bo‘yicha, shuningdek imkoniyatlari cheklangan shaxslar uchun ixtisoslar va kasb-hunarlar ro‘yxatiga muvofiq tibbiy tavsiyanomalarni hisobga olgan holda amalga oshiriladi.

O‘rta maxsus ta’lim muassasalariga qabul barcha uchun (ham grantlar, ham to‘lov-kontrakt bo‘yicha) teng huquqlilik, yagona qabul qoidalari va yagona tanlov asosida amalga oshirilib, imtihonlar natijalariga ko‘ra va test sinovlarida eng yuqori ball to‘plagan abituriyentlarning davlat grantlari bo‘yicha birinchi navbatda qabul qilinish huquqi ta’minlanadi. Qolgan abituriyentlar imtihon natijalari va test ballari reytingi asosida belgilangan to‘lov-kontrakt kvotalari doirasida qabul qilinish huquqiga egadirlar.

Tanlov har bir o‘rta maxsus ta’lim muassasalariga mutaxassisliklar guruhlari (mutaxassislik), o‘qitish tillari va shakllari bo‘yicha alohida o‘tkaziladi.

Test sinovlarini O‘zbekiston Respublikasi Vazirlar Mahkamasi huzuridagi Davlat test markazi amalga oshiradi. Test sinovlarini o‘tkazishga mas’ul bo‘lgan Davlat test markazi vakillari Davlat komissiyasi tomonidan tasdiqlanadi.

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari va o‘rta maxsus ta’lim muassasalari direktorlari joylarda test o‘tkazish uchun zarur sharoitlarni ta’minlaydilar.

Ko‘zi ojiz abituriyentlarni o‘rta maxsus ta’lim muassasalariga qabul qilish O‘zbekiston Respublikasi Oliy va o‘rta maxsus ta’lim vazirligi (keyingi o‘rinlarda Oliy ta’lim vazirligi deb ataladi) tomonidan belgilangan tartibda amalga oshiriladi.

Test sinovlarida to‘plash mumkin bo‘lgan ballarning kamida 40 foizini to‘plagan 1 va 2 guruh nogironlari, shu jumladan, bolalikdan 1 va 2 guruh nogironlarini, etim bolalar hamda “Mehribonlik uylari” bolalar internat-uylari tarbiyalanuvchilarini qabul qilish masalasi Davlat komissiyasi tomonidan ko‘rib chiqiladi.

4. Test sinovlari uch tilda o‘zbek, rus va qoraqalpoq tillarida o‘tkaziladi.

O‘rta maxsus ta’lim muassasasida mutaxassisliklar guruhlari (mutaxassislik) bo‘yicha o‘qitish tili O‘zbekiston Respublikasi Vazirlar Mahkamasining tegishli farmoyishi bilan tasdiqlangan qabul ko‘rsatkichlari doirasida hujjatlarni qabul qilish boshlagunga qadar vazirliklar va idoralar tomonidan aniqlanadi va Davlat komissiyasi tomonidan tasdiqlanadi.

Abituriyent test sinovlarini u o‘rta maxsus ta’lim muassasalarida o‘qiydigan tilda topshiradi.

Mutaxassisliklar guruhlari (mutaxassisliklar) bo‘yicha test sinovlari uchun tegishli fanlar majmuasi belgilanadi (1-ilova)*.

O‘rta maxsus ta’limning ayrim mutaxassisliklari bo‘yicha test sinovlari bilan bir qatorda qo‘shimcha kasbiy (ijodiy) imtihonlar o‘tkaziladi (2-ilova)*.

5. Ayrim mutaxassisliklar bo‘yicha o‘qitish tojik tilida (3-ilova) yoki qozoq tilida (4-ilova)* olib boriladigan o‘rta maxsus ta’lim muassasalarida test sinovlari o‘rniga Oliy ta’lim vazirligining alohida Nizomi bilan belgilanadigan mazkur mutaxassislik uchun mo‘ljallangan o‘qitish tilida ko‘p balli baholash tizimi bo‘yicha imtihon sinovlari o‘tkaziladi.

Ushbu mutaxassisliklarga arizalar maktabni tegishlicha faqat tojik yoki qozoq tillarida bitirgan abituriyentlardan qabul qilinadi.

6. Kasbiy (ijodiy) hamda ko‘p balli imtihonlar, shuningdek, bazaviy ma’lumotli abituriyentlar uchun imtihon sinovlari Davlat komissiyasi bilan kelishilgan holda Oliy ta’lim vazirligi tomonidan tasdiqlangan Tartib va dasturlarga muvofiq o‘tkaziladi.

7. Davlat soliq qo‘mitasi tasarrufidagi o‘rta maxsus ta’lim muassasalariga, shuningdek harbiy akademik litseylarga o‘qishga qabul qilish qonun hujjatlariga muvofiq amalga oshiriladi.

8. Xorijiy fuqarolar o‘rta maxsus ta’lim muassasalariga Vazirlar Mahkamasining “O‘zbekiston Respublikasida xorijiy fuqarolarni o‘qitish to‘g‘risida” 1994-yil 24-maydagi 266-son qaroriga ko‘ra hamda hukumatlararo bitimlarga muvofiq yoki Davlat komissiyasi bilan yozma ravishda kelishilgan shartlarda to‘lov kontrakt asosida qabul qilinadilar.

Xorijiy fuqarolarning o‘rta maxsus ta’lim muassasalarida o‘qishlari uchun to‘lov miqdori Oliy ta’lim vazirligi tomonidan tasdiqlanadi.

9. O‘rta maxsus ta’lim muassasalarida o‘z faoliyatini Oliy va o‘rta maxsus ta’lim vazirligi tomonidan tasdiqlanadigan Nizomga muvofiq amalga oshiradigan qabul komissiyalari tashkil qilinadi.

Abituriyentlarning o‘qishga qabul qilish to‘g‘risidagi arizalari qabul komissiyalari tomonidan 20-iyundan 25-iyulgacha (shu kuni ham) qabul qilinadi.

Abituriyent o‘qishga kirish chog‘ida quyidagilarni taqdim etadi:

Mutaxassislik guruhi (mutaxassislik), o‘quv tili va shakli ko‘rsatilgan holdagi ariza;

Ma’lumoti haqidagi hujjatning asl nusxasi;

№ 086-V shakl bo‘yicha tibbiy ma’lumotnoma;

3x4 hajmdagi 6 ta fotosurat;

1 va 2 guruh nogironlari, etim bolalar va “Mehribonlik uylari” bolalar internat-uylarida tarbiyalanganlar asl nusxadagi tegishli tasdiqlovchi hujjatlarni taqdim etadilar.

Tanlovdan tashqari o‘qishga kirish huquqiga ega bo‘lgan xalqaro va respublika olimpiyadalari, tanlovlar va musobaqalar g‘oliblari asl nusxadagi tasdiqlovchi hujjatlarni topshiradilar.

Muddatli harbiy xizmatni o‘tagan va harbiy qismlarning o‘qishga yuborish haqidagi tavsiyanomalariga ega bo‘lgan abituriyentlar ham ularni o‘rta maxsus ta’lim muassasalari qabul komissiyasiga taqdim etadilar. Harbiy qism tavsiyanomasini olish tartibi va uning shakli Mudofaa vazirligi va Oliy ta’lim vazirligining yo‘riq xati bilan belgilanadi.

Abituriyent tomonidan pasport (tug‘ilganligi to‘g‘risida guvohnoma) hamda harbiy xizmatga aloqadorligi haqidagi hujjat ham shaxsan ko‘rsatiladi.

Ko‘rsatib o‘tilgan hujjatlar mavjud bo‘lganda qabul komissiyasi abituriyentning hujjatlarini qabul qilishni rad etishga haqli emas.

Hujjatlar qabul qilishning belgilangan muddatlari tugagandan so‘ng hujjatlarga qo‘shimchalar va o‘zgartirishlar kiritish qat’iyan man qilinadi.

O‘rta maxsus ta’lim muassasalarining qabul komissiyalari 27-iyulga qadar Davlat komissiyasiga va Davlat test markaziga mutaxassislik guruhi (mutaxassislik), o‘quv shakli va tili ko‘rsatilgan holda, abituriyentlarning (shu jumladan, yuqorida qayd etilgan toifalari) soni haqida belgilangan shakldagi ma’lumotni taqdim etadilar.

10. Kasbiy (ijodiy) imtihonlar test sinovlariga qadar 11-iyuldan 27-iyulgacha, test sinovlarida nazarda tutilgan eng ko‘p ballning 0 dan 50 foizigacha bo‘lgan oraliqda yagona ko‘p balli baholash tizimi bo‘yicha, amalga oshiriladi.

Kasbiy (ijodiy) imtihonlar natijalari bo‘yicha tushgan norozolik (apellyatsiya) arizalari o‘rta maxsus ta’lim muassasasining qabul komissiyasi tomonidan, Oliy va o‘rta maxsus ta’lim vazirligi tomonidan belgilangan tartibda, 28-iyulga qadar ko‘rib chiqiladi.

Kasbiy (ijodiy) imtihonlar natijalari haqidagi ma’lumotlar Davlat test markaziga o‘rta maxsus ta’lim muassasalari tomonidan 29-iyulga qadar taqdim etiladi.

11. O‘qitish shaklidan qat’i nazar, barcha o‘rta maxsus ta’lim muassasalari uchun test sinovlarini o‘tkazishning yagona muddati 11-avgust qilib belgilanadi.

12. Abituriyentlar mutaxassisliklar guruhlari (mutaxassislik)ga ko‘ra 1-ilovaga* muvofiq ikki fan majmuasi bo‘yicha test sinovlaridan o‘tadilar.

Test topshiriqlari va imtihon savollari o‘rta va bazaviy umum-ta’lim maktabining o‘quv dasturlariga muvofiq tuziladi.

13. Majmuaning har bir fani 36 topshiriqni o‘z ichiga oladi. Test sinovlari uchun quyidagi vaqt me’yori belgilanadi:

72 savolga 2 soat.

Majmualar quyidagi fanlardan tuziladi:

1. Matematika;

2. Kimyo;

3. Biologiya;

4. Tarix;

5. Ona tili va adabiyot (o‘zbek tili va adabiyoti, rus tili va adabiyoti yoki qoraqalpoq tili va adabiyoti).

Test sinovlari boshlanishiga qadar, 30 daqiqagacha tushuntirish ishlari o‘tkaziladi, bu vaqt test uchun ajratilgan vaqt me’yoriga kirmaydi.

Test sinovlarini tashkil etish va ularni joylarda adolatli o‘tkazish mas’uliyati, test sinovlari qoidalariga qat’iy rioya etilgan holda Davlat test markazi vakillari, qabul komissiyalari raislari, hokimliklar va ular tomonidan tayinlanadigan auditoriyalarning rahbarlariga yuklanadi.

Test sinovi bo‘ladigan xonada sinovning me’yoriy qoidalar talablariga qat’iy rioya etilgan holda halol va adolatli o‘tkazilishini ta’minlash yuzasidan shaxsiy mas’uliyat auditoriya rahbari va kuzatuvchi zimmasiga yuklanadi.

Barcha o‘rta maxsus ta’lim muassasalarida test sinovi ertalab soat 8 dan 30 daqiqa o‘tganda, tushuntirish ishlari bilan boshlanadi. Javoblar varaqasi abituriyent tomonidan havo rang pastali sharikli ruchka bilan to‘ldiriladi.

Javoblar varaqasini to‘ldirishga test sinovi uchun belgilangan vaqt me’yoridan ortiqcha 20 daqiqa ajratiladi.

Javoblar varaqasining to‘g‘ri to‘ldirilishi uchun abituriyent shaxsan javobgardir. Qabul qoidalari bo‘yicha tegishli doirachalarni noto‘g‘ri belgilangan abituriyentlar e’tirozi ko‘rib chiqilmaydi.

Test qoidalarini qo‘pol ravishda buzgan abituriyent sinovlardan chetlatiladi.

Belgilangan vaqtda test sinovlariga kelmagan abituriyentlar uchun qo‘shimcha test sinovlari o‘tkazilmaydi.

14. Abituriyentlarni to‘lov-kontrakt asosida qo‘shimcha qabul qilish Vazirlar Mahkamasi belgilangan o‘rinlar kvotasiga muvofiq yagona qabul qoidalari asosida imtihonlar natijalari va test sinovlarining ballar reytingi bo‘yicha Davlat komissiyasi tomonidan amalga oshiriladi.

Davlat komissiyasi tomonidan abituriyentlarni to‘lov-kontrakt asosida o‘qishga tavsiya etish to‘g‘risidagi qaror qabul qilingandan keyin o‘rta maxsus ta’lim muassasalari bilan yuridik yoki jismoniy shaxslar o‘rtasida belgilangan tartibda kontraktlar rasmiylashtiriladi.

Belgilangan namunadagi kontrakt blanklari o‘rta maxsus ta’lim muassasalari qabul komissiyasi tomonidan test natijalari e’lon qilingan kundan boshlab beriladi va yuridik shaxslar uchun rahbar va bosh buxgalter tomonidan imzolangan holda 3 nusxada, jismoniy shaxslar uchun 2 nusxada rasmiylashtiriladi.

To‘lov-kontrakt asosida Davlat komissiyasi tomonidan o‘qishga tavsiya etilgan abituriyentlar to‘lovni kontraktda ko‘rsatilgan o‘qishga sarflanadigan xarajatlar qiymatini har yili kontrakt shartlarida ko‘rsatilgan muddatlarida amalga oshiradilar.

O‘qish uchun to‘lov-kontrakt asosida o‘rinlar kvotasini ajratish tartibi, kontrakt shartlari va tomonlarning majburiyatlari, ularning amalga oshirilishi Oliy va o‘rta maxsus ta’lim vazirligi, Moliya vazirligi va Adliya vazirligi tomonidan ishlab chiqilgan va Davlat komissiyasida tasdiqlangan tegishli Nizom bilan tartibga solinadi.

15. O‘zbekiston Respublikasi Prezidentining “O‘zbekiston o‘quvchi yoshlarini rag‘batlantirish choralari to‘g‘risida” 1993-yil 5-fevraldagi Farmoniga muvofiq hamda O‘zbekiston respublikasi Vazirlar Mahkamasining 1993-yil 25-martdagi 157-son qarori bilan tasdiqlangan Ta’lim vazirligi, Madaniyat va sport ishlari vazirligi tomonidan o‘tkazilgan Xalqaro va respublika olimpiadalari, tanlovlari va musobaqalari g‘oliblari bo‘lgan maktab va bilim yurtlari o‘quvchilarini rag‘batlantirish tartibi asosida Xalq ta’limi vazirligining guvohnomasini olganlar Davlat komissiyasining qarori bilan tegishli o‘rta maxsus ta’lim muassasalariga tanlovdan tashqari, test sinovlarisiz va kasbiy (ijodiy) imtihonlarsiz qabul qilinadilar.

O‘rta maxsus, kasb-hunar ta’limi muassasalari qabul komissiyalari olimpiadalar, tanlovlar va musobaqalar g‘oliblarining arizalari haqidagi ma’lumotlarni mutaxassisliklar guruhlari (mutaxassisliklar), o‘qitish shakli va tili ko‘rsatilgan holda, Davlat komissiyasi va Davlat test markaziga 27-iyulgacha bo‘lgan muddatda taqdim etadilar.

16. O‘zbekiston respublikasi Vazirlar Mahkamasining “Muddatli xizmat harbiy xizmatchilarga va ularning oila a’zolariga qo‘shimcha imtiyozlar to‘g‘risida” 1994-yil 3-oktabrdagi 496-son qaroriga asosan muddatli harbiy xizmatni o‘tagan va harbiy qismlar tavsiyanomasiga ega bo‘lgan abituriyentlarga o‘rta maxsus ta’lim muassasalariga qabul qilinishida, test sinovlarida ular to‘plagan ballarga eng ko‘p to‘planishi mumkin bo‘lgan ballar miqdorining 10 foizini qo‘shgan holda imtiyozli sharoitlar beriladi.

Harbiy qism tavsiyanomasini olish tartibi va uning shakli Mudofaa vazirligi va Oliy ta’lim vazirligining yo‘riq xati bilan belgilanadi.

Qabul komissiyalari 27-iyulgacha ushbu toifaga kiruvchi abituriyentlardan tushgan arizalarning mavjudligi haqidagi ma’lumotlarni mutaxassisliklar guruhlari (mutaxassisliklar), o‘qitish shakli va tili ko‘rsatilgan holda Davlat komissiyasiga va Davlat shakli va tili ko‘rsatilgan holda Davlat komissiyasiga va Davlat test markaziga taqdim etadilar.

17. Davlat komissiyasining abituriyentlarni o‘rta maxsus ta’lim muassasalariga qabul qilish to‘g‘risidagi qarori 20-avgustdan kechiktirilmay qabul qilinadi va u 25-avgustga qadar abituriyentlarni davlat grantlari bo‘yicha o‘quvchilar safiga qabul qilish haqidagi buyruqlarning rasmiylashtirilishi uchun asos bo‘ladi.

To‘lov-kontrakt asosida o‘qishga kiruvchi abituriyentlarni qabul qilish yuridik yoki jismoniy shaxslar tomonidan o‘qish uchun belgilangan mablag‘ miqdori, belgilangan tartibda o‘tkazilgandan so‘ng, 15-sentabrdan kechiktirilmay o‘rta maxsus, kasb-hunar ta’limi muassasasining buyrug‘i bilan rasmiylashtiriladi.