Koreya Respublikasida ishlab kelgan Oʻzbekiston Respublikasi fuqarolariga Koreya Respublikasi Milliy pensiya xizmatidan pensiya ajratmalarini olishda davlat tomonidan yordam koʻrsatish maqsadida:

1. Maʼlumot uchun qabul qilinsinki, Koreya Respublikasida ishlagan xorijiy fuqarolarning pensiya ajratmalari, Koreya Respublikasi qonun hujjatlariga muvofiq, Koreya Respublikasi Milliy pensiya xizmatida tuziladigan roʻyxatlarga kiritilgan fuqarolarning bankdagi shaxsiy hisobvaragʻiga qaytariladi.

2. Oʻzbekiston Respublikasi fuqarolariga ularning Koreya Respublikasida ishlagan davrida toʻlangan pensiya ajratmalarini qaytarish tartibi toʻgʻrisidagi nizom ilovaga muvofiq tasdiqlansin.

3. Oʻzbekiston Respublikasi Mehnat va aholini ijtimoiy muhofaza qilish vazirligi Koreya Respublikasining Milliy pensiya xizmati tomonidan taqdim etilgan fuqarolar roʻyxati asosida Oʻzbekiston Respublikasi fuqarolariga qaytariladigan mablagʻlarni olish tartibini koʻrsatgan holda ularga pensiya ajratmalari qaytarilishi toʻgʻrisidagi shaxsiy bildirishnomalarni yoʻllasin.

4. Davlat-aksiyadorlik Xalq banki mazkur roʻyxatga kiritilgan Oʻzbekiston Respublikasi fuqarolari uchun boshlangʻich mablagʻlar qoʻyilmagan va toʻlovlar undirilmagan holda valyuta hisobvaraqlari ochilishini taʼminlasin.

5. Oʻzbekiston Respublikasi Tashqi ishlar vazirligi Oʻzbekiston Respublikasi Mehnat va aholini ijtimoiy muhofaza qilish vazirligi tomonidan Oʻzbekiston Respublikasi fuqarolariga Koreya Respublikasi Milliy pensiya xizmatidan pensiya ajratmalari qaytarilishini rasmiylashtirish uchun yuboriladigan zarur hujjatlarni diplomatik kanallar orqali uzatishga koʻmaklashsin.

6. Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining ijro etuvchi direksiyasi bilan Xalq banki Koreya Respublikasi Milliy pensiya xizmatidan pensiya ajratmalari oladigan Oʻzbekiston Respublikasi fuqarolari oʻrtasida Koreya Respublikasidagi ish davrlarini davlat pensiya taʼminoti huquqini beruvchi mehnat stajiga qoʻshish uchun majburiy sugʻurta badallarini Oʻzbekiston Respublikasi budjetdan tashqari Pensiya jamgʻarmasiga toʻlash maqsadga muvofiqligi toʻgʻrisida tushuntirish ishlarini olib borsin.

7. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

1. Ushbu Nizom Oʻzbekiston Respublikasi fuqarolarining Koreya Respublikasida ishlagan davrida toʻlangan pensiya ajratmalarini Koreya Respublikasi Milliy pensiya xizmatidan olishda ularga davlat tomonidan yordam koʻrsatish mexanizmini belgilaydi.

2. Koreya Respublikasi qonun hujjatlariga muvofiq Oʻzbekiston Respublikasi fuqarolari Koreya Respublikasi korxonalarida ishlagan davrda toʻlangan pensiya ajratmalari ularga qaytarilishi kerak.

3. Oʻzbekiston Respublikasi Mehnat va aholini ijtimoiy muhofaza qilish vazirligi Koreya Respublikasi Milliy pensiya xizmatidan Koreya Respublikasida ishlagan va qaytariladigan pensiya ajratmalarini olish huquqiga ega boʻlgan fuqarolar (keyingi oʻrinlarda “fuqarolar” deb yuritiladi) roʻyxatini oladi.

4. Oʻzbekiston Respublikasi Mehnat va aholini ijtimoiy muhofaza qilish vazirligi huzuridagi Tashqi mehnat migratsiyasi masalalari agentligi (keyingi oʻrinlarda “Agentlik” deb yuritiladi) fuqarolarning roʻyxatlari asosida Mehnat va aholini ijtimoiy muhofaza qilish vazirligi Koreya Respublikasi Milliy pensiya xizmatidan fuqarolar roʻyxatini olgan paytdan boshlab ikki haftada fuqarolar pensiya ajratmalari olishi tartibini tushuntirgan holda ularga shaxsiy yozma bildirishnomalar yuboradi.

5. Fuqarolarning roʻyxatlari, shuningdek Koreya Respublikasi Milliy pensiya xizmati tomonidan belgilangan soʻrovnoma-ariza blankasi shakllari hamda valyuta hisobvaragʻi mavjudligi toʻgʻrisidagi hujjat ular olingan paytdan boshlab ikki ish kuni mobaynida Agentlik tomonidan Xalq bankining hududiy boʻlimlari eʼtiboriga yetkaziladi. Mazkur boʻlimlar koʻrsatib oʻtilgan roʻyxatlarni ikki ish kuni mobaynida Xalq bankining tuman va shahar filiallariga yetkazadi.

6. Koreya Respublikasi Milliy pensiya xizmati roʻyxatlariga kiritilgan fuqarolarning shaxsiy arizalari asosida ushbu fuqarolarning doimiy yashash joyi boʻyicha Xalq bankining tuman, shahar filiallari belgilangan tartibda fuqarolarga depozit valyuta hisobvaraqlari ochadi.

Fuqarolarga depozit valyuta hisobvaraqlari ochish uchun ushbu hisobvaraqlariga oldindan pul mablagʻlari qoʻyish, shuningdek hisobvaragʻi ochilgani uchun haq toʻlash talab qilinmaydi.

7. Xalq bankining tuman, shahar filiallari fuqaroga depozit valyuta hisobvaragʻi ochilgandan keyin unga:

Koreya Respublikasi Milliy pensiya xizmati tomonidan belgilangan shakl boʻyicha soʻrovnoma-ariza blankasini;

Koreya Respublikasi Milliy pensiya xizmati tomonidan belgilangan shakl boʻyicha valyuta hisobvaragʻi mavjudligi toʻgʻrisidagi hujjatni topshiradi.

8. Soʻrovnoma-ariza blankasi va valyuta hisobvaragʻi mavjudligi toʻgʻrisidagi hujjat fuqaroning oʻz qoʻli bilan toʻldiriladi va imzolanadi. Fuqaroning imzolari belgilangan tartibda notarius orqali tasdiqlanishi kerak.

9. Ushbu Nizomning 7-bandida koʻrsatilgan hujjatlarning asl nusxalari, fuqaroning notarial tartibda tasdiqlangan imzolari bilan, shuningdek fuqaro pasportining nusxasi (2 va 3-sahifalar) fuqaro tomonidan depozit valyuta hisobvaragʻi ochilgan joy boʻyicha Xalq bankining tegishli filialiga qaytariladi.

10. Xalq bankining tegishli tuman, shahar filiallari:

fuqarolardan olingan hujjatlarni maxsus reyestrda roʻyxatdan oʻtkazadi;

fuqarolarga hujjatlar olinganligi toʻgʻrisida yozma tasdiqnoma beradi;

bir hafta muddatda Agentlikka reyestrning nusxasi ilova qilingan holda fuqarolardan tushgan hujjatlarni yuboradi.

11. Agentlik Xalq bankining filialidan hujjatlar olingandan keyin ikki hafta mobaynida Koreya Respublikasi Milliy pensiya xizmati talablariga muvofiq har bir fuqaro boʻyicha hujjatlarning toʻgʻri rasmiylashtirilishini tekshiradi va har oyda ushbu hujjatlar komplektlarini diplomatik kanallar orqali Koreya Respublikasi Milliy pensiya xizmatiga joʻnatish uchun Oʻzbekiston Respublikasi Tashqi ishlar vazirligiga yuboradi.

12. Koreya Respublikasi Milliy pensiya xizmatining tegishli hujjatlari olingandan keyin fuqarolarga pensiya ajratmalarini qaytarish Koreya Respublikasi qonun hujjatlariga muvofiq amalga oshiriladi.

Fuqarolar depozit valyuta hisobvaragʻiga tushgan pul mablagʻlarini Oʻzbekiston Respublikasi qonun hujjatlariga muvofiq oʻz xohishlariga koʻra tasarruf etish huquqiga egadir.

13. Xalq bankining filiali:

uch kun muddatda fuqaroni uning depozit valyuta hisobvaragʻiga Koreya Respublikasi Milliy pensiya xizmatidan mablagʻ tushganligi toʻgʻrisida xabardor qilishi;

Koreya Respublikasi Milliy pensiya xizmatidan fuqaroning depozit valyuta hisobvaragʻiga tushgan naqd chet el valyutasi uning birinchi talabi bilan berilishini taʼminlashi shart.

14. Fuqarolarning Koreya Respublikasida ishlagan davri Oʻzbekiston Respublikasi qonun hujjatlarida belgilangan tartibda davlat pensiya taʼminotiga boʻlgan huquqni beradigan stajga qoʻshiladi.

15. Fuqarolar zarur hujjatlarni shaxsan rasmiylashtirish va depozit valyuta hisobvaragʻini ochish imkoniga ega boʻlmagan hollarda, ushbu saʼy-harakatlar mazkur Nizomga va qonun hujjatlari talablariga muvofiq:

fuqaroni muomalaga layoqatsiz deb eʼtirof etish toʻgʻrisida sudning qarori qonuniy kuchga kirgan taqdirda — vasiylar tomonidan;

tegishli muassasalarning boshliqlari tomonidan tasdiqlangan ishonchnomalar mavjud boʻlgan taqdirda, — ozodlikdan mahrum etish joylarida jazoni oʻtayotgan yoki qamoqda saqlanayotgan shaxslarning vakillari tomonidan amalga oshiriladi.

Fuqaro vafot etgan hollarda hujjatlarni rasmiylashtirish uning merosxoʻrlari tomonidan meros huquqi toʻgʻrisidagi guvohnoma taqdim etilgan taqdirda amalga oshiriladi.

Qaytarilayotgan pensiya ajratmalarini ushbu bandda koʻrsatilgan shaxslar toifasi boʻyicha oʻtkazish uchun depozit valyuta hisobvaraqlari ochish chogʻida Xalq bankining filiallariga vasiylar va merosxoʻrlarning, ozodlikdan mahrum etish joylarida jazoni oʻtayotgan yoki qamoqda saqlanayotgan shaxslar vakillarining tegishli huquqlarini tasdiqlaydigan hujjatlar qoʻshimcha ravishda taqdim etiladi. Xalq banki filiallari qoʻshimcha ravishda taqdim etilgan hujjatlarni Agentlikka boshqa hujjatlar bilan birga joʻnatadi.

16. Koreya Respublikasi Milliy pensiya xizmati tomonidan taqdim etilgan roʻyxatlarga kiritilgan, biroq hozirgi vaqtda Oʻzbekiston Respublikasi fuqarolari hisoblanmagan shaxslar oʻzlariga pensiya ajratmalarini qaytarish masalasi boʻyicha Koreya Respublikasi Milliy pensiya xizmatiga mustaqil ravishda murojaat qiladilar.