Paxta tolasining yuqori likvidli resurslaridan oqilona va samarali foydalanish, shuningdek sifatli, eksportga yoʻnaltirilgan, xalqaro standartlarga javob beradigan toʻqimachilik mahsulotlari ishlab chiqarishni taʼminlash maqsadida:

1. 2008-yilning 1-yanvaridan boshlab, mulkchilik shaklidan qatʼi nazar, respublikaning paxta tolasini qayta ishlaydigan barcha korxonalari uchun paxta tolasini Oʻzbekiston Respublikasi Prezidentining 2006-yil 29-avgustdagi PQ-456-sonli qarorida nazarda tutilgan shartlar asosida erkin ayirboshlanadigan valyutada Oʻzbekiston Respublikasi Tashqi iqtisodiy aloqalar, investitsiyalar va savdo vazirligining tashqi savdo kompaniyalari hamda Oʻzbekiston Respublikasi tovar-xomashyo birjasi orqali xarid qilishning yagona tartibi oʻrnatilsin.

2. Oʻzbekiston Respublikasi Vazirlar Mahkamasining 2004-yil 25-martdagi 141-sonli qarori 5-bandida nazarda tutilgan, “Oʻzbekyengilsanoat” DAK korxonalariga ichki bozorda yarim tayyor toʻqimachilik mahsulotlarini (kalava, gazmol, trikotaj polotno va paxtani yigirish chiqindilarini) shartnoma tuzish paytida tarkib topgan jahon narxlaridan past boʻlmagan narxlarda erkin muomaladagi valyutaga (qoʻshilgan qiymat soligʻi nulinchi stavka boʻyicha qoʻshib hisoblangan holda) sotib olishga ruxsat berish boʻyicha imtiyozlar muddati 2011-yilning 1-yanvarigacha uzaytirilsin, bunda ushbu yarim tayyor mahsulotlardan ishlab chiqariladigan mahsulotlarning kamida 80 foizi eksportga yoʻnaltirilishi nazarda tutilsin.

3. Belgilansinki, oʻz mahsuloti hajmining 80 va undan koʻproq foizini, shu jumladan, yarim tayyor toʻqimachilik mahsulotlari (kalava, gazmol, trikotaj polotno va paxtani yigirish chiqindilari)ni erkin ayirboshlanadigan valyutada sotuvchi respublika toʻqimachilik sanoati korxonalari 2011-yilning 1-yanvarigacha boʻlgan davrda mulk soligʻi toʻlashdan ozod etiladi.

4. Oʻzbekiston Respublikasi Adliya vazirligi manfaatdor vazirlik va idoralar bilan birgalikda bir oy muddatda qonunchilikka ushbu qarordan kelib chiqadigan oʻzgartishlar toʻgʻrisida Vazirlar Mahkamasiga takliflar kiritsin.

5. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.