Xorijiy avtomobilda yuk tashuvchilar transport vositalarining O‘zbekiston Respublikasi hududi bo‘yicha harakatlanishi ustidan nazoratni yanada takomillashtirish, eksport yuklarni tashish uchun ulardan oqilona va samarali foydalanish maqsadida Vazirlar Mahkamasi qaror qiladi:
1. O‘zbekiston Respublikasi Hukumatining ilovaga muvofiq ayrim qarorlariga o‘zgartirish va qo‘shimchalar kiritilsin.
2. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R.S. Azimov zimmasiga yuklansin.
O‘zbekiston Respublikasi Hukumatining ayrim qarorlariga kiritilayotgan o‘zgartirish va qo‘shimchalar
1. Vazirlar Mahkamasining “Avtomobilda xorijiy yuk tashuvchilarning O‘zbekiston Respublikasi hududiga kirishlari, bo‘lishlari, yuk olib o‘tishlari va undan chiqib ketishlari tartibi to‘g‘risida” 1995-yil 11-yanvardagi 11-son qarorining 4-bandiga quyidagi mazmundagi xatboshi qo‘shilsin:
“Avtomobilda xorijiy yuk tashuvchilarning tranzit orqali o‘tuvchi transport vositalarining harakat yo‘nalishi O‘zbekiston Respublikasi bojxona organlari tomonidan o‘zgartirilgan taqdirda ularning chiqib ketish muddati O‘zbekiston Respublikasi hududiga kirgan kundan boshlab 10 kundan oshmasligi kerak”.
Oldingi tahrirga qarang.
(2-band O‘zbekiston Respublikasi Vazirlar Mahkamasining 2018-yil 18-iyuldagi 553-sonli qaroriga asosan o‘z kuchini yo‘qotgan — Qonun hujjatlari ma’lumotlari milliy bazasi, 19.07.2018-y., 09/18/553/1538-son)