Oʻzbekiston Respublikasi Vazirlar Mahkamasining 2003-yil 28-iyundagi 290-sonli “Oʻzbekiston Respublikasi Qishloq va suv xoʻjaligi vazirligi faoliyatini tashkil etishni takomillashtirish toʻgʻrisida”gi qaroriga asosan hamda 2007-yil hosili uchun tuzilgan kontraktatsiya shartnomasini bajargan qishloq xoʻjaligi korxonalarining paxta yigʻim-terimidan keyin dalalarda qolgan paxta xomashyosini nobud qilmaslik maqsadida buyuraman:

1. “2007-yilda etishtirilgan paxta xomashyosini oxirigacha toʻliq yigʻib-terib olishni qoʻshimcha ragʻbatlantirish toʻgʻrisidagi vaqtinchalik nizom” ilovaga muvofiq tasdiqlansin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kundan keyin kuchga kiradi.

Mazkur Nizom 2007-yil paxta yigʻim-terimidan keyingi qolgan paxtani yigʻib-terib olish tartibini belgilaydi.

1. 2007-yil paxta yigʻim-terimidan keyin paxta dalalarida qolgan paxtani nobud qilmaslik maqsadida, “Oʻzpaxtasanoat” uyushmasi korxonalari (keyingi oʻrinlarda paxta tozalash korxonasi deb yuritiladi) bilan tuzilgan shartnoma shartlarini toʻliq bajargan qishloq xoʻjaligi korxonalarining (keyingi oʻrinlarda fermer xoʻjaligi deb yuritiladi) paxta dalasida qolgan paxta qoldigʻi (keyingi oʻrinlarda paxta deb yuritiladi) “Yogʻ-moy va oziq-ovqat sanoati” uyushmasining yogʻ-moy korxonalari (keyingi oʻrinlarda yogʻ-moy korxonalari deb yuritiladi) tomonidan fermer xoʻjaliklari bilan ixtiyoriy tuzilgan shartnomalarga muvofiq terib olinadi.

2. Qishloq va suv xoʻjaligi vazirligining hududiy tuman qishloq va suv xoʻjaligi boʻlimlari paxta tozalash korxonalari bilan shartnoma shartlarini toʻliq bajargan fermer xoʻjaliklari haqida maʼlumotni tegishli hududdagi yogʻ-moy korxonalariga yetkazib beradi.

3. Yogʻ-moy korxonalari viloyat hokimlarining ruxsati bilan fermer xoʻjaliklari va paxta tozalash korxonalari oʻrtasida tuzilgan shartnoma shartlarini toʻliq bajargan fermer xoʻjaliklari bilan “2007-yil paxta yigʻim-terimidan keyingi qolgan paxtani yigʻib-terib olish toʻgʻrisida” bir hafta muddatda ixtiyoriy shartnoma tuzishi mumkin.

4. Yogʻ-moy korxonalari va tuman fermer xoʻjaliklari uyushmasi paxtani terib olish ishlarini tashkil qiladi va terilgan paxtani paxta tozalash korxonalariga yetkazib beradi.

5. Yogʻ-moy korxonalari fermer xoʻjaliklari bilan “2007-yil paxta yigʻim-terimidan keyingi qolgan paxtani yigʻib-terib olish toʻgʻrisida” tuzilgan ixtiyoriy shartnomaga asosan fermer xoʻjaliklariga terilgan 2 (ikki) kilogramm paxta uchun 1 (bir) kilogramm shrot qaytarish haqida kunlik hisob-kitob olib boradilar.

6. Yogʻ-moy va paxta tozalash korxonalari yigʻib olingan paxtani qabul qilishdan qayta ishlashgacha boʻlgan davrda olingan mahsulotlarni alohida hisobda olib boradi.

7. Paxta tozalash korxonalari terib olingan paxtani qabul qilib olishda paxta tozalash korxonalari, yogʻ-moy korxonalari, fermer xoʻjaliklari va “Sifat” Markazi vakillari bilan birgalikda solishtiruv-dalolatnomasi tuzadilar.

8. Solishtiruv-dalolatnomasiga asosan qabul qilingan paxta paxta tozalash korxonalari tomonidan belgilangan tartibda alohida joylarda saqlanishi taʼminlanadi va uni tez kunlarda qayta ishlash ishlari amalga oshiriladi.

9. Paxta tozalash korxonalari ishlab chiqarilgan texnik chigitni tegishli yogʻ-moy korxonasiga topshiradi va bunda ishlab chiqarilgan paxta tolasi va momigʻi paxta tozalash korxonalari tomonidan qonun hujjatlarida belgilangan tartibda sotiladi.

10. Topshirilgan texnik chigit yogʻ-moy korxonalari tomonidan qayta ishlanadi.

11. Texnik chigitni qayta ishlash jarayonida olingan yogʻ va sheluxa mahsulotlari qayta ishlashda ketgan xarajatlarni qoplash maqsadida yogʻ-moy korxonalari tomonidan qonun hujjatlarida belgilangan tartibda sotiladi.

12. Paxta tozalash va yogʻ-moy korxonalarida paxta chigitini ishlab chiqarish, saqlash hamda qayta ishlashdagi xarajatini dastlabki hisobga olishni tashkil etish Oʻzbekiston Respublikasi Vazirlar Mahkamasining 2006-yil 18-sentabrdagi 199-son qaroriga (Oʻzbekiston Respublikasi qonun hujjatlari toʻplami, 2006-yil, 37-38-son, 381-modda) asosan amalga oshiriladi.

13. Yogʻ-moy korxonalari paxtani terib olish bilan bogʻliq boʻlgan xususan, paxtani terish, uni paxta tozalash korxonalariga yetkazish va yogʻ-moy mahsulotlarini ishlab chiqarish xarajatlari yogʻ-moy korxonalari hisobidan qoplanadi.

14. Paxta tozalash korxonalarining paxtani qayta ishlash jarayonida sarflagan xarajatlari qayta ishlangan mahsulotni (paxta tolasi va momigʻi) qonun hujjatlarida belgilangan tartibda sotilishidan olgan mablagʻi hisobidan qoplanadi.

15. Paxta tozalash korxonalari mahsulotlarni (paxta tolasi va momigʻi) sotishdan olingan mablagʻ, mahsulot ishlab chiqarishga sarflangan xarajat miqdoridan ortigʻini tegishincha yogʻ-moy korxonalariga qaytaradi.

16. Korxonalarda qayta ishlanayotgan va ishlab chiqarilayotgan paxta chigiti, paxta yogʻi, paxta tolasi va momigʻining sifat koʻrsatkichlari davlat standartlari va texnik shartlar talablariga mos boʻlishi lozim. Bunda 5-navli paxtadan chiqadigan texnik chigitning yogʻdorligi hamda qayta ishlashdan isteʼmol yogʻi chiqish miqdori belgilangan normalar asosida amalga oshiriladi.

17. Mazkur Nizom Oʻzbekiston Respublikasi Davlat soliq qoʻmitasi, “Yogʻ-moy va oziq-ovqat sanoati” uyushmasi, “Oʻzpaxtasanoat” uyushmasi, “Sifat” markazi va Dehqon va fermer xoʻjaliklari uyushmasi bilan kelishiladi.