Oʻzbekiston Respublikasi Vazirlar Mahkamasining 1994-yil 11 maydagi 249-son Qarori bilan tasdiqlangan “Pensiyalar tayinlash uchun zarur boʻlgan hujjatlarni taqdim etish va rasmiylashtirish tartibi toʻgʻrisida”gi nizomga asosan pensiya va nafaqa tayinlash, qayta hisoblash, toʻlash boʻyicha qabul qilingan har kunlik hujjatlarning ijrosini sifatli va qonun hujjatlari bilan belgilangan muddatlarda taʼminlashning tartibini belgilash maqsadida buyuraman:

1. “Pensiya hujjatlarining shakllari va ularni toʻldirish qoidalari hamda pensionerlar yigʻma jildini rasmiylashtirish va yuritish tartibi haqida”gi yoʻriqnoma ilovaga muvofiq tasdiqlansin.

2. Ushbu Yoʻriqnoma Oʻzbekiston Respublikasi Adliya vazirligida davlat roʻyxatiga olinganidan soʻng oʻn kundan keyin amalga kiritilsin.

Mazkur Yoʻriqnoma Oʻzbekiston Respublikasi Vazirlar Mahkamasining 1994-yil 11 maydagi 249-son Qarori bilan tasdiqlangan “Pensiyalar tayinlash uchun zarur boʻlgan hujjatlarni taqdim etish va rasmiylashtirish tartibi toʻgʻrisida”gi nizomga muvofiq Pensiya hujjatlarining shakllari va ularni toʻldirish qoidalari hamda pensionerlar yigʻma jildini rasmiylashtirish va yuritish tartibini belgilaydi.

1. Ushbu Yoʻriqnoma tuman (shahar) ijtimoiy taʼminot boʻlimlarida (keyingi oʻrinlarda — boʻlim) pensiya tayinlash uchun hujjatlarni qabul qilish, pensiya hujjatlarining shakllari, toʻldirilish qoidalari, pensiya ishi yigʻma jildini rasmiylashtirish, pensiya tayinlash boʻyicha barcha zarur hujjatlar va roʻyxatga olish kitoblarini bir xil tartibda yuritilishini tashkil etilishini taʼminlaydi.

2. Boʻlimlarda pensiya tayinlash ishlari mazkur Yoʻriqnomaga muvofiq rasmiylashtiriladi.

3. Boʻlimlarda pensiya tayinlash, qayta hisoblash ishlarini rasmiylashtirish uchun mazkur Yoʻriqnomaning 1-ilovasida koʻrsatilgan kitoblar yuritiladi.

Bu kitoblardagi roʻyxat yil boshida birinchi raqam bilan ochiladi, yil mobaynida yangi ochilsa raqam davom ettiriladi, yil yakunida daftar oxirgi raqam bilan yopiladi va boʻlim boshligʻi hamda pensiya va ijtimoiy nafaqa tayinlash guruhi rahbari (keyingi oʻrinlarda tayinlash guruhi rahbari) tomonidan imzolanib, muhr qoʻyiladi va doimiy saqlash uchun boʻlimning arxiviga topshiriladi.

4. Pensiya tayinlash ishlarini rasmiylashtirish vazifasi boʻlimning tayinlash guruhi zimmasiga, hamda bu ishlarni tashkil qilish va ularni rasmiylashtirish yuzasidan belgilangan yagona tartibga rioya qilinishi ustidan nazorat oʻrnatish boʻlim boshligʻining birinchi oʻrinbosari vazifasi boʻlib, umumiy nazorat boʻlim boshligʻiga yuklatiladi.

Boʻlimning har bir xodimi oʻz hududiga taalluqli ishlarni bajarish, hujjatlarni toʻgʻri rasmiylashtirish, yuritish va oʻz vaqtida ijrosini taʼminlash uchun masʼuldir.

5. Boʻlimning pensiya va ijtimoiy nafaqa tayinlash guruhi inspektori (keyingi oʻrinlarda — tayinlash guruhi inspektori) lavozimidan ozod etilganda, boshqa lavozimga tayinlanganda yoki qonun hujjatlarida nazarda tutilgan boshqa hollarda boʻlim boshligʻining buyrugʻi asosida pensiya ishlari, hamda boshqa hujjatlarni topshirish va qabul qilib olish ishlari tayinlash guruhi rahbari, inspektori va huquqshunosdan iborat ishchi guruhi tomonidan amalga oshiriladi.

Pensiya ishlari va boshqa hujjatlarni topshirilishi va qabul qilinishi, ishchi guruhi tomonidan tasdiqlangan dalolatnoma bilan rasmiylashtiriladi.

6. Boʻlimga ishga yangi qabul qilingan xodimlar mazkur Yoʻriqnoma bilan tanishtirilishi shart va ular sinov muddati davomida uni toʻliq oʻzlashtirishi, sinov muddatidan oʻtganligini belgilovchi asosiy mezonlardan biri boʻlishi lozim.

7. Pensiya tayinlash toʻgʻrisida yozilgan ariza, murojaat etuvchi fuqaroning (vasiyning) doimiy yashash (roʻyxatdan oʻtgan) joyidagi boʻlimga topshiriladi.

8. Pensiya tayinlash toʻgʻrisidagi arizalar, ishlamaydigan fuqarolarning oʻzlaridan, agarda ishlasa u ishlayotgan korxona, muassasa yoki tashkilot vakilidan qabul qilinadi. Fuqarolar pensiya olish huquqi paydo boʻlganidan soʻng istalgan paytda pensiya tayinlashni soʻrab murojaat etishlari mumkin.

9. Yoshga doir pensiya tayinlanishini soʻrab pensiya yoshiga toʻlmasdan avval ham murojaat etish mumkin, lekin bu mazkur pensiyani olish huquqi paydo boʻlishidan bir oydan oldin boʻlmasligi kerak.

10. Pensiya tayinlash uchun hujjatlarni qabul qilishda boʻlimning tayinlash guruhi rahbari va inspektori quyidagilarga eʼtibor qaratishlari kerak:

a) ariza taqdimnoma va ish haqi toʻgʻrisidagi maʼlumotnomalar toʻgʻri rasmiylashtirilganligi, shuningdek ulardagi maʼlumotlarni pasport va murojaat etuvchining boshqa hujjatlaridagi maʼlumotlarga mos kelishini tekshirishi;

b) taqdim qilingan hujjatlarning mazmuni va toʻgʻri rasmiylashtirilganligi, ularni birlamchi hujjatlarga mosligini tekshirish lozim. Bunda, fuqaroning pensiyaga boʻlgan huquqini, talab etilgan ish stajining mavjudligini, taqdim etilayotgan hujjatlarni toʻgʻri va toʻliq rasmiylashtirilganligini hamda pensiya tayinlash uchun asos boʻluvchi hujjatlarning mavjudligini koʻrib chiqadi;

v) qabul qilinayotgan hujjatni boʻlim boshligʻi yoki birinchi oʻrinbosari koʻrib chiqib, arizaga rahbar koʻrsatmasini yozib, hujjatlarni asliga solishtirgan holda nusxalariga imzo va muhr qoʻyib tasdiqlaydi;

g) tayinlash guruhi rahbari arizani maxsus kitobga roʻyxatga oladi va tayinlash guruhi inspektoriga rasmiylashtirish uchun topshiradi.

11. Tayinlash guruhi inspektori hujjatlarning aslini (mehnat daftarchasi va arxiv maʼlumotnomalaridan tashqari) qaytaradi va hujjatlarni qabul qilib olganligi toʻgʻrisida murojaat etuvchiga tilxat beradi, tilxatning nusxasi boʻlimga taqdim etilgan hujjatlar bilan birga saqlanadi.

12. Pensiya tayinlash uchun talab qilingan hujjatlar toʻliq topshirilmagan boʻlsa, arizachiga yoki korxona, muassasa, tashkilot vakiliga bu haqda qachon bildirilganligi koʻrsatilgan yozma xabarnoma beriladi. Xabarnoma nusxasi arizaga qoʻshib qoʻyiladi va barcha hujjatlar bilan saqlanadi.

Etishmayotgan hujjatlar taqdim etilgandan keyin boʻlimning tayinlash guruhi inspektori tomonidan qabul qilib olinganligi toʻgʻrisida tilxat beriladi va xabarnoma nusxasiga hamda taqdim qilingan hujjatga uning qachon topshirilganligi yoziladi.

13. Agar ular qoʻshimcha hujjatlar taqdim etilishi lozimligi toʻgʻrisida xabarnoma olingan kundan eʼtiboran uch oy ichida taqdim etilsa pensiya tayinlash toʻgʻrisidagi ariza qabul qilingan kun yoki ariza yuborilgan joydagi pochta shtemplida koʻrsatilgan sana pensiya tayinlash toʻgʻrisidagi ariza qabul qilingan kun hisoblanadi.

14. Pensiya tayinlash masalasida murojaat etuvchi fuqaroning, yoshini va yashash manzilini tasdiqlovchi hujjat, yaʼni pasportini koʻrsatishi shart va boʻlimning tayinlash guruhi inspektori uning pasportidan kerakli maʼlumotlarni koʻchirib oladi. Zarurat tugʻilsa pasportdan nusxa oladi.

15. Oʻzbekiston Respublikasida doimiy yashaydigan chet el fuqarolari va fuqaroligi boʻlmagan shaxslarning va ularning oila aʼzolarining pensiya tayinlash toʻgʻrisidagi arizalari yuqorida koʻrsatib oʻtilgan tartibda qabul qilinadi va rasmiylashtiriladi.

16. Agar tugʻilgan vaqtini koʻrsatuvchi hujjatda aniq kun koʻrsatilmay oy koʻrsatilgan boʻlsa, tegishli oyning 15-kuni tugʻilgan kun hisoblanadi.

Agar taqdim etilgan hujjatda faqat tugʻilgan yili koʻrsatilib tugʻilgan oyi koʻrsatilmagan boʻlsa, shu yilning 1-iyuli tugʻilgan kun hisoblanadi

17. Yoshga doir, nogironlik, boquvchisini yoʻqotganlik pensiyalarini tayinlash toʻgʻrisidagi arizaga Oʻzbekiston Respublikasi Vazirlar Mahkamasining 1994-yil 11 maydagi 249-sonli qarorining 13-ilovasi bilan tasdiqlangan “Pensiya tayinlash uchun hujjatlarni taqdim etish va rasmiylashtirish tartibi toʻgʻrisida”gi nizomda koʻrsatilgan hujjatlar taqdim qilinadi.

18. Pensiya tayinlashda inobatga olish uchun mehnat stajini tasdiqlovchi hujjatlar Oʻzbekiston Respublikasi Vazirlar Mahkamasining 1994-yil 11 maydagi 249-sonli qarori bilan tasdiqlangan “Pensiya tayinlash uchun mehnat stajini tasdiqlash tartibi toʻgʻrisida nizom”ga muvofiq qabul qilinadi.

19. Harbiy xizmatchilarning nogironlik va boquvchisini yoʻqotganlik pensiyasini tayinlash toʻgʻrisidagi arizalariga Oʻzbekiston Respublikasi Vazirlar Mahkamasining 1994-yil 11 maydagi 249-sonli qarorining 12 va 13-ilovalarida koʻrsatilgan hujjatlar ilova qilinadi.

20. Pensiya tayinlash uchun tegishli hujjatlar notarial idora yoki boʻlim tomonidan tasdiqlanishi mumkin.

21. Pensiya tayinlashga doir hujjatlarni boʻlim rasmiylashtiradi. Pensiya tayinlashni (bir turdan ikkinchi turga oʻtkazishni) soʻrab yozilgan ariza bilan birga tegishli hujjatlar topshirilgan kundan keyin Oʻzbekiston Respublikasi “Fuqarolarning davlat pensiya taʼminoti toʻgʻrisida”gi Qonunining 45-moddasiga muvofiq pensiya tayinlash toʻgʻrisidagi hujjatlar, ular kelib tushgan kundan eʼtiboran 10 kundan kechiktirmasdan koʻrib chiqiladi.

22. Pensiya tayinlash rad etilgan hollarda, boʻlim tomonidan tegishli qaror chiqarilgandan keyin 5 kun ichida pensiya tayinlashni rad etish sababi va shikoyat qilish tartibini tushuntirib, pensiya tayinlash boʻyicha murojaat etgan fuqaroga yoki korxona, muassasa, tashkilotga xabarnoma yuboradi va taqdim etilgan hujjatlarni aslini qaytaradi.

23. Boʻlimga kichik biznes, fermer xoʻjaliklari va boshqa tashkilotlar tomonidan pensiya tayinlash uchun taqdim etilgan hujjatlarda, ularning asosli berilishi boʻyicha shubha tugʻdirgan, ish staji va ish haqi toʻgʻrisidagi maʼlumotlarni pensiya tayinlangunga qadar tekshirishi mumkin.

24. Pensiya tayinlash yuzasidan murojaat tegishli hujjatlar bilan kelib tushgandan soʻng, pensiya va ijtimoiy nafaqalar tayinlash Komissiyasi (keyingi oʻrinlarda — Komissiya ) 10 kunlik muddatda qaror (pensiya tayinlash, pensiya tayinlashni rad etish, taqdim etilgan hujjatlarni qayta tekshirish va boshq.) qabul qiladi.

25. Boʻlim tomonidan pensiya tayinlash uchun taqdim etilgan hujjatlar yuzasidan tekshiruv oʻtkazilganidan soʻng, Komissiya pensiya tayinlash toʻgʻrisidagi hujjatlarni qaytadan koʻrib chiqadi.

Bunda, pensiya tayinlash uchun taqdim etilgan hujjatlarning asosli berilganligi tasdiqlansa, u holda Komissiya pensiyani, pensiya tayinlash uchun birinchi marotaba murojaat etgan kundan tayinlash toʻgʻrisida qaror qabul qiladi.

26. Agar tekshirilishi kerak boʻlgan hujjatlarsiz ham fuqaroning pensiya olishga huquqi boʻlsa, uning yozma roziligiga asosan, Komissiya tomonidan qonun hujjatlarida belgilangan tartibda eng kam miqdorda pensiya tayinlanishi mumkin.

Agar fuqaro eng kam miqdordagi pensiya tayinlanishiga rozi boʻlmasa, Komissiya pensiya tayinlash boʻyicha qarorni, hujjatlar yuzasidan oʻtkazilayotgan tekshiruv ishlari tugallangandan keyin qabul qiladi.

27. Pensiya tayinlash yoki qayta hisoblash uchun taqdim etilgan hujjatlar yuzasidan qonun hujjatlarida belgilangan tartibda oʻtkaziladigan tekshirishlar, tekshirish oʻtkazilgan sana koʻrsatilgan dalolatnoma bilan rasmiylashtiriladi.

28. Tekshirish korxona, muassasa yoki tashkilot vakili ishtirokida oʻtkazilib, dalolatnoma boʻlim xodimi, korxona, muassasa yoki tashkilot vakili imzolari va tekshirilgan korxona, muassasa, tashkilot va arxiv muhri bilan tasdiqlanishi lozim.

29. Tayinlash guruhi inspektori pensiya tayinlash uchun topshirilgan hujjatlarga asosan maʼlumotlarni kompyuter bazasiga kiritadi, mehnat stajini, oʻrtacha ish haqini, pensiya miqdorini hisoblab, hisob-kitoblarni chop etadi hamda Komissiyaning pensiya tayinlash yoki pensiya tayinlashni rad etish yuzasidan qaror loyihasini tayyorlaydi.

Hujjatlarni tartib boʻyicha tikib, tayinlash guruhi rahbariga tekshirish uchun beradi. Pensiya tayinlash muddatini nazorat qilish uchun mazkur Yoʻriqnomaning 2-ilovasida keltirilgan maxsus nazorat varaqasi toʻldiriladi. Pensiya tayinlash ishlaridagi hujjatlar mazkur Yoʻriqnomaning 3-ilovasida koʻrsatilgan tartibda tikiladi.

30. Boʻlimning tayinlash guruhi rahbari ish staji, oʻrtacha ish haqi va pensiya miqdorini toʻgʻri hisoblanganligini, pensiya tayinlash muddati toʻgʻriligini tekshirib imzo qoʻyadi.

31. Komissiya haftada kamida bir marotaba yigʻilish oʻtkazib, taqdim etilgan hujjatlar yuzasidan pensiya tayinlash yoki uni tayinlashni rad etish, pensiyadan ushlab qolish, pensiya toʻlovini toʻxtatish, zarur hollarda pensiya tayinlash yoki qayta hisoblash uchun taqdim etilgan hujjatlarni tekshirish, guvohlar koʻrsatmasiga asosan ish stajini tasdiqlash va boshqa kollegial hal qilinishi zarur boʻlgan masalalar yuzasidan qarorlar qabul qiladi.

32. Komissiya qarorlari bayonnoma bilan rasmiylashtiriladi. Bayonnomada barcha koʻrilgan pensiya ishlari umumiy roʻyxat qilinib va unda koʻrib chiqilgan holatlar toʻliq koʻrsatib oʻtiladi.

Bayonnoma Komissiya aʼzolari tomonidan imzolanadi va muhr bilan tasdiqlanadi.

33. Pensioner vafot etgandan keyin uning yopilgan pensiya ishi oila aʼzolariga tayinlangan boquvchisini yoʻqotganlik pensiya ishiga qoʻshib tikiladi.

34. Boquvchisini yoʻqotganlik pensiyasidan ulush ajratishni soʻrab yozilgan ariza quyidagi tartibda hal etiladi:

a) asosiy boquvchisini yoʻqotganlik pensiyasini oluvchi yashab turgan joydagi boʻlimga pensiyadan ulush ajratish toʻgʻrisida xatga ariza va tegishli hujjatlarni ilova qilgan holda murojaat etadi;

b) ushbu murojaatga asosan uni olgan boʻlim, bu oila aʼzolarining pensiya olishga boʻlgan huquqini tasdiqlaydigan hujjatlar asosiy pensiya ishiga tikib qoʻyiladi, pensiyadan ulush ajratish toʻgʻrisida qaror chiqaradi va qarordan koʻchirmani oila aʼzolaridan alohida yashab turgan joydagi boʻlimiga yuboradi;

v) pensiyadan ulush ajratilganligi toʻgʻrisida qarordan koʻchirmani olgan boʻlim, qarorni “pensiya ishiga” tikadi hamda uni pensiya va nafaqalar toʻlovi boʻyicha monitoring guruhiga beradi, ushbu guruh tomonidan alohida shaxsiy hisobvaraqasi ochiladi, shu hisobvaraqasidagi raqam ulush oluvchining “pensiya ishi”ga ham qoʻyiladi;

g) pensiyadan ulush oluvchilarning “pensiya ish”lari alohida saqlanadi.

Boʻlim pensiyadan ulush oluvchi oila aʼzolarining tarkibida boʻlgan va pensiyaning miqdorini oʻzgartirish yoki pensiya toʻlovini toʻxtatishga sabab boʻladigan barcha oʻzgarishlar toʻgʻrisida tegishli boʻlimga xabar qilishi shart;

d) boquvchisini yoʻqotganlik pensiyasini olayotgan oilaning bir tumanda (shaharda) yashab turgan aʼzolariga pensiyadan ulush ajratish va hujjatlarni rasmiylashtirish yuqorida koʻrsatib oʻtilgan tartibda amalga oshiriladi;

e) pensiya ishi saqlanayotgan boʻlim oila tarkibida oʻzgarishlar boʻlganligi munosabati bilan yoki Oʻzbekiston Respublikasi Prezidentining “Ish haqi, pensiyalar, stipendiyalar va ijtimoiy nafaqalar miqdorini oshirish toʻgʻrisida”gi farmonlariga asosan pensiya miqdorini qaytadan koʻrib chiqqanida, boshqa tumanda (shaharda) yashab turgan oila aʼzolari uchun pensiyadan ajratilgan ulushning yangi miqdori toʻgʻrisidagi farmoyishni yangidan rasmiylashtirib pensiya toʻlovi amalga oshirilayotgan tegishli boʻlimga yuborishi shart.

35. Pensiya tayinlash toʻgʻrisidagi qaror Komissiya tomonidan tasdiqlanganidan keyin pensiya ishi pensiya va ijtimoiy nafaqalar toʻlovi boʻyicha monitoring guruhiga maxsus kitobga qayd etilib beriladi (maxsus kitob namunasi mazkur Yoʻriqnomaning 4-ilovasida keltirilgan). Ushbu kitob boʻyicha toʻlov hujjatlarini rasmiylashtirilishi, pensiya ishlarining qaytarilish muddatlari nazorat qilinadi.

36. Shaxsiy hisobvaraqasi ochilgandan keyin pensiya oluvchining ishiga shaxsiy hisobvaraqasi raqami bilan bir xil raqam qoʻyiladi, toʻlov hujjati rasmiylashtirilib, tayinlash guruhi inspektoriga qaytariladi.

37. Tayinlash guruhi inspektori pensiya ishiga asosan pensiya guvohnomasini yozadi. Pensiya guvohnomasi blankasi qatʼiy hisobi yuritiladigan hujjat hisoblanadi va boʻlim boshligʻi tomonidan masʼul etib belgilangan xodimda saqlanadi.

38. Pensiya guvohnomasi oluvchi fuqaro boʻlimga 2 ta rasm taqdim etadi (bittasi guvohnomaga, ikkinchisi guvohnomalarni roʻyxatga olish kitobiga yopishtirib qoʻyish uchun).

39. Pensiya guvohnomasi, guvohnomalar berilishini hisobga olib borish mazkur Yoʻriqnomaning 5-ilovasida keltirilgan kitobga yozilib, pensionerga uni olganligi toʻgʻrisida imzo chektirilib beriladi.

40. Pensiya guvohnomasi yoʻqolgan taqdirda guvohnomaning “dublikati” beriladi. “Dublikatga” yoʻqotilgan guvohnomaning raqami beriladi va guvohnomalarni hisobga olib borish kitobiga qaysi raqam bilan qayd etilganligi yozib qoʻyiladi.

41. Pensiya olish toʻgʻrisidagi maʼlumotnoma mazkur Yoʻriqnomaning 6-ilovasida keltirilgan kitobga, arizachiga uni olganligi toʻgʻrisida imzo qoʻydirib beriladi.

42. Oʻzbekiston Respublikasi hududida doimiy yashaydigan chet el fuqarolariga ham (fuqaroligi boʻlmagan shaxslarga) ham shaxsiy hisobvaraqasi ochish va pensiya guvohnomasi yuqorida koʻrsatilgan tartibda beriladi.

43. Harakatdagi pensiya ishlari boʻlimning tayinlash inspektorlarida saqlanadi va ularning toʻliq saqlanishiga ushbu shaxslar masʼul hisoblanadilar.

44. Pensiyani qayta hisoblashni, bir turdagi pensiyadan boshqa turdagi pensiyaga oʻtkazishni, avval tayinlangan pensiyani tiklashni soʻrab yozilgan ariza, tegishli hujjatlar bilan birga boʻlimga topshiriladi. Pensiyalarni qayta hisoblash bir turdagi pensiyadan boshqa turdagi pensiyaga oʻtkazish, avval tayinlangan pensiyani tiklash toʻgʻrisidagi arizalar 5 kun ichida koʻrib chiqiladi.

45. Fuqaro qayta hisoblash uchun qoʻshimcha hujjatlar bilan murojaat etganda tayinlash guruhi rahbari va inspektori:

a) taqdim qilinayotgan hujjatlar va qayta hisoblash boʻyicha arizani boʻlim boshligʻi yoki birinchi oʻrinbosarga kiritadi;

b) boʻlim boshligʻi yoki birinchi oʻrinbosar arizaga tegishli koʻrsatma qoʻyadi;

v) tayinlash guruhi inspektori arizani qabul qilib olganligi toʻgʻrisida murojaat etuvchiga tilxat yozib beradi va qayd etish kitobiga roʻyxatga oladi.

46. Ariza roʻyxatga olingandan keyin, tegishli hujjatlar bilan birga tayinlash guruhi inspektori tomonidan qayta hisoblanadi va tekshirish uchun tayinlash guruh rahbariga beriladi va tasdiqlash uchun Komissiyaga taqdim etiladi. Pensiyalarni qayta hisoblashdagi hujjatlar mazkur Yoʻriqnomaning 7-ilovasida koʻrsatilgan tartibda tikiladi.

47. Pensiyani qayta hisoblashda, bir turdagi pensiyadan boshqa turdagi pensiyaga oʻtkazishda, avval tayinlangan pensiyani tiklashni rad etilgan holda, Komissiyaning tegishli qarori chiqarilgan kundan boshlab 5 kun ichida rad etish sababi va arz qilish tartibi tushuntirilib, arizachiga yoki korxona, muassasa, tashkilotga xabarnoma yuboradi va taqdim etilgan hujjatlarning aslini qaytaradi.

48. Pensiya notoʻgʻri tayinlanganligi aniqlangan hollarda, pensiya toʻlovini toʻxtatish masalasi Komissiya tomonidan koʻrib chiqiladi va bayonnoma bilan rasmiylashtirilib, 5 kun ichida fuqaroga yoki korxona, muassasa, tashkilotga bayonnomadan koʻchirma beriladi (yuboriladi).

49. Pensiya toʻlovi qonun hujjatlarida belgilangan tartibda toʻxtatilganda, (masalan pensiya toʻlash muddati tugaganda, pensioner vafot etganda yoki pensiya toʻlovi vaqtincha toʻxtatilganda, tibbiy mehnat ekspert komissiyasidan (TMEK) koʻrigidan oʻtish muddati oʻtkazib yuborilganda, pensioner ozodlikdan mahrum etish jazosiga hukm qilinganda va boshqa hollarda), pensiya toʻlashni toʻxtatish yoki vaqtincha toʻxtatib turish pensiya va nafaqalar toʻlovi boʻyicha monitoring guruhi tomonidan pensiya ishining maxsus grafasiga toʻlov qachondan toʻxtatilganligi va toʻxtatilish sababini koʻrsatilib, rasmiylashtiriladi.

50. TMEK koʻrigidan oʻz vaqtida oʻtmasdan keyinchalik oʻtib, unga Oʻzbekiston Respublikasining “Fuqarolarning davlat pensiya taʼminoti toʻgʻrisida”gi Qonuni 55-moddasiga asosan pensiyani toʻlash Komissiya qaroriga asosan rasmiylashtiriladi.

51. Pensiyani tiklash Komissiya qarori bilan rasmiylashtiriladi. Pensiyani tiklash rad etilgan hollarda, bu haqda arizachi 5 kunlik muddatda yozma ravishda xabardor qilinadi.

52. Pensioner doimiy yashash uchun boshqa tumanga (shaharga) koʻchib ketayotganda pensiya ishini hisobdan chiqarish toʻgʻrisidagi ariza (yoki koʻchib ketayotgan joydagi boʻlimdan soʻrovnoma) beradi.

53. Koʻchib ketayotgan pensionerga avval roʻyxatda turgan boʻlim tomonidan roʻyxatdan chiqqan oyning pensiyasi toʻlab beriladi (agar pensiya toʻlovi oldindan toʻxtatilmagan boʻlsa, yaʼni muddati tugagan, uzoq vaqtdan buyon pensiya olishga murojaat etmagan boʻlsa).

54. Qaysi muddatgacha pensiya toʻlanganligi pensiya ishiga va shaxsiy hisobvaraqasiga yozib qoʻyiladi.

55. Pensionerni hisobdan chiqarish boʻlimning pensiya va ijtimoiy nafaqalar toʻlovi boʻyicha monitoring guruhi tomonidan rasmiylashtiriladi. Bu haqda pensiya ishiga va shaxsiy varaqaga tegishli ravishda yozib qoʻyiladi.

56. Pensionerning yashash joyi oʻzgarganligi munosabati bilan pensiya ishini hisobga olishni soʻrab yozgan arizasiga asosan, uning yangi yashash joyidagi boʻlim mazkur tumanda yashayotganligini tasdiqlovchi hujjat, yaʼni yangi yashash joyida roʻyxatga olinganligi toʻgʻrisida belgi qoʻyilgan pasport asosida hisobga oladi va 3 kunlik muddatda pensiya ishini yuborish toʻgʻrisida avval hisobda turgan boʻlimga soʻrovnoma yuboradi.

57. Soʻrovnomani olgan boʻlim 5 kunlik muddatda pensiya ishini soʻrovnoma bergan boʻlimga yuboradi.

58. Pensiyadan chegirma ushlanib kelingan hollarda, mablagʻ ushlab qolish uchun asos boʻladigan ijro hujjatlari tegishli sudga qaytariladi. Sudga qaytarish jarayonida, qaytarilish sabablari va pensionerning yangi manzili toʻgʻrisida maʼlumot koʻrsatiladi.

59. Pensiya ishi faqatgina fuqaro yashash joyini respublika hududida oʻzgartirgan taqdirda yangi yashash joyiga beriladi.

Doimiy yashash uchun chet davlatga koʻchib ketgan fuqaroning pensiya ishi berilmaydi.

60. MDH davlatlariga koʻchib ketayotgan pensionerlarning pensiya ishlarini berish (yuborish) qonun hujjatlarida belgilangan tartibda amalga oshiriladi.

61. Pensionerning yangi yashash joyidagi boʻlim pensiya ishini olgandan soʻng, pensioner toʻgʻrisidagi maʼlumotlarni kompyuter bazasiga kiritadi. Nazorat tariqasida qayta tayinlash boʻyicha kompyuter hisoblarini (pensiya miqdori, oʻrtacha oylik ish haqi, stajining hisobi) chop etib, belgilangan tartibda rasmiylashtirilgan farmoyish asosida pensionerning ilgari yashab turgan joyida qaysi vaqtgacha pensiya toʻlangan boʻlsa, shu vaqtdan boshlab (qonun asosida) pensiya toʻlovi davom ettiriladi.

62. Pensiyadan ulush olib kelayotgan oila aʼzosi doimiy yashash uchun boshqa tumanga (shaharga) koʻchib borganida yangi joydagi boʻlim pensiyadan ulush ajratish toʻgʻrisidagi qarorning koʻchirmasini yuborish toʻgʻrisida, shu ulush oluvchi ilgari yashab turgan joydagi boʻlimga soʻrovnoma yuboradi.

63. Pensiya ulushini toʻlab turgan boʻlim, shu xatni olganidan keyin 3 kunlik muddat ichida qarordan koʻchirmani va pensiya ulushi qachongacha toʻlanganligi koʻrsatib yozilgan maʼlumotnomani pensiyadan ulush oluvchining yangi yashash joyidagi boʻlimga yuboradi. Bir vaqtning oʻzida pensiyadan ulush oluvchi oila aʼzosining yashash manzili oʻzgarganligi haqida, asosiy pensiya ishi saqlanayotgan boʻlimga ham xabar beriladi.

64. Pensiya ishlarini yuborish toʻgʻrisida yozilgan xatlar va kelgan pensiya ishlar boʻlimda alohida yuritilgan kitoblarda qayd etiladi.

Pensiya ishlarini yuborishni soʻrab yozgan soʻrovnomalar va ishlarni joʻnatishga doir barcha yozishma alohida yigʻmajildga tikib qoʻyiladi.

65. Pensiya ishlari maxsus jihozlangan xonada saqlanadi.

Harakatdagi pensiya ishlarini saqlash boʻyicha javobgar, tayinlash guruhi rahbarlari va inspektorlari hisoblanadi.

66. “Saxovat” va “Muruvvat” uylarida yashab turgan pensionerning pensiya ishi shu muassasa joylashgan boʻlimda saqlanadi. Pensionerga pensiya belgilangan tartibda mazkur boʻlim tomonidan toʻlanadi.

Ruhiy kasalliklar shifoxonasiga joylashtirilgan va vasiy tayinlangan pensionerning pensiya ishi vasiyning yashab turgan joyidagi boʻlimda saqlanadi.

67. Pensiya toʻlash toʻxtatilgan fuqarolarning pensiya ishlari, harakatdagi pensiya ishlaridan alohida ajratilgan holda boʻlim arxivida saqlanadi.

68. Boʻlimning arxividagi pensiya ishlari alfavit kitobiga qayd etiladi va kitobga qaysi raqam bilan yozilgan boʻlsa, pensiya ishiga ham shu raqam qoʻyiladi. Har bir alfavit harfi boʻyicha birdan boshlab alohida tartib raqam qoʻyib boriladi.

69. Alfavit kitobiga pensionerning familiyasi, ismi, otasining ismi, pensiya turi, arxivdagi ish boshqa joyga joʻnatilganligi toʻgʻrisidagi yozuv kabi maʼlumotlar kiritilishi lozim.

70. Boʻlimning arxivida pensiya ishlarining saqlanishiga arxivchi (arxivarius shtati yoʻq joylarda boʻlim boshligʻining buyrugʻi bilan masʼul etib tayinlangan xodim) zimmasiga yuklatiladi.

71. Pensiya tayinlash rad etilgan fuqarolarning ishlari arxivda alohida saqlanadi. Bu ishda quyidagi hujjatlar boʻlishi lozim:

a) pensiya tayinlashni soʻrab yozilgan ariza;

b) ariza va taqdim qilingan hujjatlarni qabul qilganlik toʻgʻrisidagi tilxat nusxasi;

v) ish staji va ish haqi hisobi;

g) arizachi tomonidan topshirilgan yoki boʻlim tomonidan rasmiylashtirilgan hujjatlarning nusxalari yoki koʻchirmalari;

d) Komissiya bayonnomasidan koʻchirma va pensiya tayinlash rad qilinganligi toʻgʻrisida yozilgan xabarnomaning nusxasi. Xabarnoma ariza egasiga topshirilgan boʻlsa uning nusxasida ariza egasining hujjatlarni qaytarib olganligi toʻgʻrisida, olgan sanasini koʻrsatgan holda qoʻygan imzosi boʻlishi shart.

Agar hujjatlar pochta orqali yuborilgan boʻlsa, buyurtma bilan yuborilganligi haqida pochtadan berilgan kvitansiyaning raqami va sanasi koʻrsatiladi.

Yuqorida koʻrsatib oʻtilgan hujjatlar ishning muqovasiga tikib qoʻyiladi va alfavit tartibida saqlanadi. Ishning muqovasiga ariza egasining familiyasi, ismi, otasining ismi va yashash manzili yoziladi.

Yuqorida koʻrsatib oʻtilgan barcha kitoblar: