O‘zbekiston Respublikasi Prezidentining “O‘zbekistonda futbolni rivojlantirishga doir qo‘shimcha chora-tadbirlar to‘g‘risida” 2006-yil 1-maydagi PQ-338-sonli Qarorining ijrosi yuzasidan va “Paxtakor” futbol klubi” qo‘shma korxonasi futbol bo‘yicha O‘zbekistonning milliy terma va yoshlar olimpiya jamoalarini o‘yinchilar bilan to‘ldiruvchi asosiy baza ekanligini inobatga olgan holda, shuningdek “Paxtakor” sport-mashg‘ulot o‘quv majmuasini xalqaro standartlarga muvofiqlashtirish maqsadida:

1. O‘zbekiston Respublikasi Madaniyat va sport ishlari vazirligi, Davlat mulki qo‘mitasi va Toshkent shahar hokimligining:

“Paxtakor” OAJ” sport-mashg‘ulot o‘quv markazi (“Paxtakor” SMO‘M” OAJ) aksiyalari davlat ulushining 51 foizi Toshkent shahar hokimligi hisobida saqlanib qolishi;

muddati ikki yil bo‘lgan, “Paxtakor” majmuasi sport inshootlarini rekonstruksiya qilish va ta’mirlashga yo‘naltirilgan 5 mln. AQSh dollariga teng investitsiya majburiyatlarini olgan holda “Paxtakor” SMO‘M” OAJ aksiyalari paketining 49 foizini “Paxtakor” futbol klubi” qo‘shma korxonasiga tekinga berish to‘g‘risidagi takliflariga rozilik berilsin.

2. Belgilansinki:

tekinga berilgan aksiyalar paketining 49 foizini tasarruf etish huquqi “Paxtakor” futbol klubi” qo‘shma korxonasiga, uning tomonidan qabul qilingan investitsiya majburiyatlari to‘liq hajmda va belgilangan muddatlarda bajarganidan so‘ng beriladi;

“Paxtakor” futbol klubi” qo‘shma korxonasi tomonidan qabul qilingan majburiyatlar bajarilmay qolganda, davlat aktivlarining oldi-sotdi bo‘yicha tuzilgan shartnomasi belgilangan tartibda bekor qilinadi va keyinchalik ular Toshkent shahar hokimligiga topshiriladi.

3. Toshkent shahar hokimligi O‘zbekiston Futbol federatsiyasi, “Paxtakor” SMO‘M” OAJ, “Paxtakor” futbol klubi” qo‘shma korxonasi bilan birgalikda uch oy muddatda “Paxtakor” majmuasi sport inshootlarini rekonstruksiya qilish va ta’mirlash bo‘yicha biznes-reja, loyiha hujjatlarini belgilangan tartibda ishlab chiqsin hamda tasdiqlasin.

O‘zbekiston Respublikasi “Davarxitektqurilish” qo‘mitasi “Paxtakor” majmuasi sport inshootlarini rekonstruksiya qilish va ta’mirlash bo‘yicha loyiha-smeta hujjatlarining o‘z vaqtida ekspertiza qilinishini ta’minlasin.

4. O‘zbekiston Respublikasi Moliya vazirligi, Tashqi iqtisodiy aloqalar, investitsiyalar va savdo vazirligi, “Davarxitektqurilish” qo‘mitasi, Davlat mulki qo‘mitasi investor tomonidan qabul qilingan majburiyatlarning o‘z vaqtida va sifatli bajarilishi, shuningdek, qurilishda ishlatiladigan materiallar, import qilinadigan jihozlar hamda bajariladigan ishlar qiymatining asosliligi ustidan nazorat o‘rnatsin.

5. Mazkur Qarorning ijrosini nazorat qilish O‘zbekiston Respublikasi Bosh vazirining o‘rinbosarlari R.S. Azimov va R.S. Qosimov zimmalariga yuklansin.