“V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyati tuzilmasini yanada takomillashtirish va faoliyatini maqbullashtirish, birlashmaning moliyaviy holatini mustahkamlash maqsadida Vazirlar Mahkamasi qaror qiladi:

1. “V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyati, Oʻzbekiston Respublikasi Moliya vazirligi, Iqtisodiyot vazirligi, Davlat mulki qoʻmitasi, Tashqi iqtisodiy faoliyat milliy bankining:

“V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyatining Toshkent shahar Mirzo Ulugʻbek tumanida joylashgan “V” hududini mulkiy komplekslar shaklida va Toshkent viloyatining Boʻstonliq tumanidagi “Guliston” bolalar sogʻlomlashtirish oromgohini, shuningdek aviatsiya birlashmasining ixtisosli boʻlmagan 1-ilovaga* muvofiq ijtimoiy obyektlarini ochiq savdoda sotish;

Toshkent shahridagi “B” hududidagi 110 kV quvvatli yordamchi stansiya joylashgan 1 ga maydonli yer uchastkasini va Fargʻona shahridagi “A” hududidagi 110 kV quvvatli yordamchi stansiyani joylashgan yer uchastkasi bilan birgalikda “V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyati balansidan “Oʻzbekenergo” davlat-aksiyadorlik kompaniyasi balansiga berish;

Fargʻona shahridagi “V” hududidagi 10,0 ga maydonli yer uchastkasini “V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyati balansidan Oʻzbekiston Respublikasi Mudofaa vazirligi balansiga berish;

birlashmaning umumiy maydoni 113,2 ga boʻlgan 2-ilovaga* muvofiq boshqa hududlarini, ularda joylashgan inshootlar bilan birgalikda Toshkent shahar, Toshkent va Fargʻona viloyatlari hokimliklari balansiga berish va keyinchalik ularni belgilangan tartibda ochiq savdoga qoʻyish;

Andijon va Fargʻona mexanika zavodlarini 2009-yil 1-yanvardan boshlab “V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyatining tugallangan balansga ega boʻlgan shuʼba korxonalariga aylantirish haqidagi takliflariga rozilik berilsin.

Koʻrsatib oʻtilgan chora-tadbirlarni amalga oshirish uchun 3-ilovaga* muvofiq tarkibda ishchi guruh tashkil etilsin.

2. Birlashma xodimlarining umumiy sonini 2,2 ming nafarga, shu jumladan boshqaruv xodimlarini — 365 nafarga qisqartirishni nazarda tutadigan “V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyatining yangilangan tashkiliy tuzilmasi, uning ijro etuvchi apparati va ishlab chiqarish tuzilmasi 4, 5 va 6-ilovalarga* muvofiq maʼqullansin.

“V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyati bosh direktoriga Kuzatuvchi kengashning roziligi bilan xodimlarning shtatdagi belgilangan soni doirasida birlashmaning ijro etuvchi apparati tashkiliy tuzilmasiga va uning ishlab chiqarish tuzilmasiga oʻzgartirishlar kiritish huquqi berilsin.

3. Belgilansinki:

mazkur qarorga muvofiq “Oʻzbekenergo” davlat-aksiyadorlik kompaniyasi balansiga berilayotgan aktivlar qiymati topshirayotgan va qabul qilayotgan tomonlar uchun daromad (foyda) soligʻini hisoblab chiqishda soliq solish obyekti hisoblanmaydi;

Toshkent shahridagi “V” hududni, “Guliston” bolalar sogʻlomlashtirish oromgohini va 1-ilovaga muvofiq obyektlarni sotishdan tushgan tushum “V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyatining “Oʻzsanoatqurilishbank”dagi maxsus hisob raqamiga oʻtkaziladi;

2-ilovaga muvofiq obyektlarni sotishdan tushgan tushum, Davlat mulki qoʻmitasi tasarrufida qoladigan 3 foizdan va Vazirlar Mahkamasining 1998-yil 22-avgustdagi 362-son qaroriga muvofiq hokimliklarning tasarrufiga tushadigan 25 foizdan tashqari, “V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyatining koʻrsatib oʻtilgan maxsus hisob raqamiga oʻtkaziladi;

koʻrsatib oʻtilgan maxsus hisob raqamining mablagʻlaridan faqat Oʻzbekiston Respublikasi Moliya vazirligi bilan kelishgan holda ishlab chiqarish quvvatlarini qayta joylashtirish va “V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyati va Fargʻona mexanika zavodining tashqi toʻsiqlari yangi uchastkalarini qurish xarajatlarini qoplashga, shuningdek “V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyatini zamonaviy kompyuter texnikasi va texnologiyalari, foydalanishni nazorat qilish tizimlari bilan jihozlash chora-tadbirlarini moliyalashtirishga sarflanadi;

“V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyatining bankdagi hisob raqamiga tushadigan 10 mln soʻmdan ortiq milliy va xorijiy valyutadagi (ekvivalentda) boshqa pul mablagʻlarini sarflash faqat Oʻzbekiston Respublikasi Moliya vazirligi bilan kelishgan holda amalga oshiriladi, mehnatga haq toʻlash fondidan yagona ijtimoiy toʻlovlar bilan birgalikda ish haqi toʻlash, budjetga, davlat maqsadli jamgʻarmalariga, shuningdek yoqilgʻi-energetika resurslari uchun toʻlovlar bundan mustasno;

mablagʻlarni sarflash boʻyicha belgilangan talablarga rioya qilinishi uchun shaxsiy javobgarlik “V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyatining bosh direktoriga, bosh direktorning iqtisodiyot boʻyicha oʻrinbosariga va bosh buxgalterga yuklanadi.

4. “V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyati (Sultonov):

2007-yil 1-iyuldan boshlab samolyot mahsulotlari ishlab chiqarishga xarajatlarning buxgalteriya hisobini har bir mahsulot boʻyicha alohida subhisob raqamlarida amalga oshirsin;

ikki oy muddatda “Yergeodezkadastr” davlat qoʻmitasi bilan birgalikda belgilangan tartibda “V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyatining hududlari va obyektlarining, birinchi navbatda mazkur qarorga muvofiq oʻzgaga berilayotgan hududlar va obyektlarning, ularga kadastr hujjatlarini rasmiylashtirgan holda, kadastr suratga olinishini taʼminlasin;

2007-yil 1-avgustgacha “Xobas-TAPO” qoʻshma korxonasining boshqa muassislari bilan “V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyatining qoʻshma korxona sarmoyasidagi ulushini Davlat mulki qoʻmitasiga berish yuzasidan muzokaralar olib borsin va koʻrsatib oʻtilgan ulushni belgilangan tartibda bersin;

2007-yil 1-sentabrgacha ushbu qarorda koʻrsatilgan hududlar va obyektlarni Oʻzbekiston Respublikasi Mudofaa vazirligi, “Oʻzbekenergo” davlat-aksiyadorlik kompaniyasi, Toshkent shahar va Fargʻona viloyati hokimliklari balansiga bersin;

2007-yil oxirigacha birlashma boʻlinmalarini 5 va 6-ilovalarga muvofiq qayta tashkil etsin va xodimlar sonini belgilangan parametrlarga muvofiq qisqartirsin;

2008-yil oxirigacha manfaatdor vazirliklar va idoralar bilan birgalikda, Andijon va Fargʻona mexanika zavodlari yuridik shaxs etib qayta tashkil qilingandan keyin ular tomonidan aviatsiya mahsulotlari ishlab chiqarishni davom ettirish hamda ushbu sohada xizmatlar koʻrsatish uchun zarur boʻlgan sertifikatlar va ruxsat beruvchi hujjatlar olinishini taʼminlasin.

5. Toshkent shahar (Toʻxtayev) Toshkent viloyati (Niyozov) va Fargʻona viloyati (Abdullayev) hokimliklari “V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyatining 2-ilovaga muvofiq hududlarini ularda joylashgan inshootlar bilan birgalikda qabul qilib olgandan keyin ikki oy muddatda:

koʻrsatib oʻtilgan hududlar ochiq savdoga qoʻyiladigan yer uchastkalari boʻyicha planga tushirilishini hamda tegishli yer uchastkalari va inshootlar baholanishini taʼminlasinlar;

tegishli yer uchastkalarini ularda joylashgan inshootlar bilan birgalikda, shuningdek imoratlar qurilmagan yer uchastkalarini belgilangan tartibda ochiq savdoga qoʻysinlar.

6. Oʻzbekiston Respublikasi Davlat mulki qoʻmitasi 2007-yil oxirigacha “V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyatining ustav kapitaliga, unda davlatning ulushi kamida 51 foiz boʻlishini saqlab qolgan holda, ushbu qarorga muvofiq birlashma aktivlarining bir qismi oʻzgaga berilishi bilan bogʻliq boʻlgan davlatga tegishli aksiyalar ulushi yuzasidan tuzatish kiritilishini taʼminlasin.

“V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyati ushbu qarorga muvofiq uning ustav kapitaliga tuzatish kiritishda aksiyalar emissiyasi prospekti qayta roʻyxatdan oʻtkazilganligi uchun istisno tariqasida yigʻimlardan ozod qilinsin.

7. Toshkent shahar hokimligi (Toʻxtayev) “V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyatining Toshkent shahridagi obyektlari va hududlari kadastr suratga olingandan keyin bir oy muddatda jamiyatining ishlab chiqarish boʻlinmalari egallab turgan yer uchastkalarini (mazkur qarorga muvofiq oʻzgaga berilayotgan yer uchastkalaridan tashqari) shahar hududiga, ikkinchi zonaga kiritish toʻgʻrisidagi masalani koʻrib chiqsin;

Toshkent viloyati hokimligi (Niyozov) bir oy muddatda “V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyatining uchish sinov-transport kompleksi hududini (ushbu qarorga muvofiq oʻzgaga berilayotgan uchastkalar bundan mustasno) lalmi yerlarga kiritish toʻgʻrisidagi masalani koʻrib chiqsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari R.S. Azimov va Q.S. Sanaqulov zimmasiga yuklansin.