Oʻzbekiston Respublikasi Soliq kodeksi, Oʻzbekiston Respublikasi “Davlat soliq xizmati toʻgʻrisi”gi Qonunining 7-moddasi va Oʻzbekiston Respublikasi Prezidentining 2007-yil 14-martdagi “Ishlab chiqarishni modernizatsiyalash, texnik va texnologik qayta jihozlashni ragʻbatlantirishga oid qoʻshimcha chora-tadbirlar toʻgʻrisida” PF-3860-son Farmoniga muvofiq qaror qilamiz:

1. Ilova qilinayotgan Ishlab chiqarishni modernizatsiyalash, texnik va texnologik qayta jihozlashni amalga oshiruvchi xoʻjalik yurituvchi subyektlar tomonidan imtiyozlarni qoʻllash tartibi toʻgʻrisidagi nizom tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatiga olingan kundan boshlab oʻn kun oʻtgach kuchga kiradi.

Mazkur Nizom Oʻzbekiston Respublikasi Soliq kodeksi va Oʻzbekiston Respublikasi Prezidentining “Ishlab chiqarishni modernizatsiyalash, texnik va texnologik qayta jihozlashni ragʻbatlantirishga oid qoʻshimcha chora-tadbirlar toʻgʻrisida” 2007-yil 14-martdagi PF-3860-son Farmoniga muvofiq, ishlab chiqarishni modernizatsiyalash, texnik va texnologik qayta jihozlashni amalga oshiruvchi xoʻjalik yurituvchi subyektlar tomonidan imtiyozlarni qoʻllash tartibini belgilaydi.

1. Mazkur Nizom maqsadlari uchun quyidagi asosiy tushunchalardan foydalaniladi:

yangi texnologik jihoz – chiqarilgan sanadan boshlab uch yildan oshmagan texnologik jihoz;

modernizatsiyalash — asosiy vositalar obyektini texnologik yoki xizmat maqsadini oʻzgartirish, ularning unumdorligini oshirish yoki boshqa sifat koʻrsatkichlarini yaxshilashga yoʻnaltirilgan ishlar;

texnik va texnologik qayta jihozlash — ilgʻor texnika va texnologiyalarni joriy etish, ishlab chiqarishni mexanizatsiyalash va avtomatlashtirish, maʼnan va jismonan eskirgan uskunalarni unumdorligi yanada yuqori boʻlganlari bilan yangilash asosida asosiy vositalar yoki ularning ayrim qismlarining texnik-iqtisodiy koʻrsatkichlarini oshirish boʻyicha chora-tadbirlar majmui. Texnik va texnologik qayta jihozlash yangi ishlab chiqarishni tashkil etish hamda ishlab turgan ishlab chiqarishlarni kengaytirishni ham oʻz ichiga oladi.

2. Yangi texnologik jihozni sotib oluvchi, ishlab chiqarishni modernizatsiyalash, texnik va texnologik qayta jihozlashni amalga oshiruvchi xoʻjalik yurituvchi subyektlariga daromad soligʻi, yagona soliq toʻlovi va mol-mulk soligʻi boʻyicha imtiyozlar taqdim etiladi.

Oʻzbekiston Respublikasi hududiga olib kirilayotgan texnologik jihozlarga bojxona toʻlovlari boʻyicha (qoʻshilgan qiymat soligʻi, import boj toʻlovlari) imtiyozlar Oʻzbekiston Respublikasi Soliq kodeksining 211-moddasi va “Boj tarifi toʻgʻrisida”gi Qonunining 33-moddasiga muvofiq taqdim etiladi.

3. Lizing obyektini qoʻshimcha lizingga berishda, ushbu Nizomda belgilangan imtiyozlar (bojxona toʻlovlari boʻyicha imtiyozlardan tashqari) qoʻshimcha lizingni oluvchiga taalluqli boʻladi. Bu holda lizing obyektini qoʻshimcha lizingga beruvchi lizing oluvchiga ushbu Nizomda nazarda tutilgan imtiyozlar tatbiq etilmaydi.

4. Soliq imtiyozlari (mol-mulk soligʻi boʻyicha imtiyozlar bundan mustasno) yangi jihoz ishlab chiqarishga joriy etilgan yoki oʻz ishlab chiqarishini modernizatsiyalash, texnik va texnologik qayta jihozlash amalga oshirilgan navbatdagi soliq davridan boshlab qoʻllaniladi.

Mol-mulk soligʻi boʻyicha imtiyozlar mazkur Nizomning 15-bandida nazarda tutilgan tartibda taqdim etiladi.

Yangi kiritilayotgan texnologik jihoz boʻyicha imtiyozlarni qoʻllash uchun daromad soligʻi, yagona soliq toʻlovi va mol-mulk soligʻi boʻyicha hisob-kitoblarga qayta kiritilayotgan yangi texnologik jihozni foydalanishga topshirish sanasi koʻrsatilgan, korxona rahbari yoki u tomonidan vakil qilingan shaxs tomonidan tasdiqlangan ixtiyoriy shakldagi Maʼlumotnoma ilova qilinadi.

5. Mazkur Nizomni qoʻllash maqsadlarida hisobot soliq davri deganda chorak, yarim yil, 9 oy va yil tushuniladi.

6. Yuridik shaxslarning soliq solinadigan foydasi ishlab chiqarishni modernizatsiyalashga, texnik va texnologik jihatdan qayta jihozlashga, yangi texnologik jihozlar xarid qilishga, ushbu maqsadlar uchun berilgan kreditlarni uzishga, lizing obyekti qiymatining oʻrnini qoplashga, tegishli soliq davrida hisoblangan amortizatsiyani chegirgan holda yoʻnaltiriladigan mablagʻlar summasiga kamaytiriladi.

7. Kreditni (lizingni) toʻlashda soliq solish bazasidan asosiy qarz summasini (lizing obyekti qiymatini) toʻlashga sarflangan summa chiqarib tashlanadi.

8. Soliq solish bazasini hisoblashda jihozlarni sotib olish uchun foydalanilgan mablagʻlar faqat bir marta chegirib tashlanadi. Masalan, agarda soliq solish bazasi kredit (lizing) hisobiga olingan jihoz qiymatiga kamaytirilgan boʻlsa, u holda ushbu kreditni (lizing obyekti qiymatini) toʻlashga sarflangan mablagʻlar soliq solish bazasidan chegirib tashlanmaydi.

9. Soliq solinadigan bazani ushbu Nizomning 6-bandida koʻrsatilgan maqsadlarga yoʻnaltiriladigan mablagʻlar summasiga kamaytirish xarajatlar amalga oshirilgan soliq davridan eʼtiboran, texnologik jihozlar boʻyicha esa u foydalanishga topshirilgan paytdan eʼtiboran uch yil ichida amalga oshiriladi. Agar joriy soliq davrida yuqorida taʼkidlab oʻtilgan maqsadlar uchun yoʻnaltiriladigan mablagʻlar summasi soliq bazasidan oshsa, qolgan summa kelgusi soliq davrlarida oʻrnatilgan muddatda chegirilib borishi mumkin.

Bunda, soliq solish bazasining kamaytirilishi har hisobot davrida oʻsib boruvchi yakun bilan amalga oshiriladi.

10. Agar hisobot soliq davrida hisoblangan amortizatsiya summasi ishlab chiqarishini modernizatsiyalash, texnik va texnologik qayta jihozlashga, ushbu maqsadlar uchun berilgan kreditlarni qaytarishga, lizing obyekti qiymatini toʻlashga yoʻnaltirilgan mablagʻlar summasidan yuqori boʻlsa, ushbu hisobot soliq davri uchun daromad soligʻi boʻyicha soliq solish bazasini kamaytirilishi amalga oshirilmaydi.

12. Yagona soliq toʻlovi boʻyicha soliq solinadigan baza yangi texnologik asbob-uskunalar olishga yoʻnaltirilgan mablagʻlar summasiga, lekin soliq solinadigan bazaning koʻpi bilan 25 foiziga kamaytiriladi. Soliq solinadigan bazani kamaytirish texnologik asbob-uskunalarni foydalanishga joriy etilgan soliq davridan boshlab besh yil mobaynida amalga oshiriladi.

Yagona soliq toʻlovi boʻyicha imtiyoz texnologik jihozga uning xarid qilish manbaidan (oʻz mablagʻlari, yoki qarzga olingan mablagʻlar, shu jumladan lizing) qatʼi nazar, beriladi.

13. Soliq solish bazasining kamaytirilishi texnologik jihoz ishlab chiqarishga kiritilgan hisobot soliq davridan boshlab amalga oshiriladi. Bunda, har bir hisobot soliq davrida soliq solish bazasidan chegirilishi lozim boʻlgan mablagʻ summasi soliq solish bazasining 25 foizidan oshmasligi lozim.

Agar qayta kiritilayotgan jihozning qiymati joriy soliq davrda soliq solish bazasining 25 foizidan oshib ketsa, u holda ortgan summa kelgusi soliq davrlarida oʻrnatilgan muddat doirasida, belgilangan cheklashlarni hisobga olib chegirilishi mumkin.

15. Mol-mulk soligʻi boʻyicha imtiyoz qayta kiritilayotgan yangi texnologik jihoz ishlab chiqarishga kiritilgan paytdan boshlab besh yil muddatga ozod etish koʻrinishida beriladi.

16. Mol-mulk soligʻi hisob-kitobiga ilova qilinadigan soliq solinmaydigan mol-mulk roʻyxatida alohida satrda ishlab chiqarishga qayta kiritilayotgan yangi texnologik jihozning qoldiq qiymati belgilangan imtiyoz davri davomida koʻrsatilishi lozim.

17. Bojxona toʻlovlari boʻyicha imtiyoz texnologik jihoz va unga tegishli butlovchi va ehtiyot qismlarning qoʻshilgan qiymat soligʻi va import bojxona bojlaridan ozod qilish koʻrinishida beriladi.

18. Texnologik jihozni qoʻshilgan qiymat soligʻi va import bojxona bojlaridan ozod etish Oʻzbekiston Respublikasi Iqtisodiyot vazirligi, Moliya vazirligi, Tashqi iqtisodiy aloqalar, investitsiyalar va savdo vazirligi va Davlat bojxona qoʻmitasi tomonidan tasdiqlanadigan texnologik jihozlar roʻyxatiga muvofiq qoʻllaniladi.

19. Olib kirilayotgan texnologik jihozga tegishli boʻlgan butlovchi va ehtiyot qismlar qoʻshilgan qiymat soligʻi va import bojxona bojlaridan texnologik jihozlarni yetkazib berish boʻyicha shartnoma shartlarida butlovchi va ehtiyot qismlar texnologik jihoz bilan bir toʻplamda yetkazib berish koʻzda tutilgan hollarda ozod etiladi.

20. Bojxona toʻlovlari boʻyicha imtiyozlar tatbiq etiladigan texnologik jihoz olib kirilayotganda, bojxona yuk deklaratsiyasining (BYuD) “Preferensiylar” nomli 36-ustunida bojxona toʻlovlaridan ozod qilinishining tegishli kodlari koʻrsatiladi.

21. Texnologik jihozlar xarid (import) qilingan paytdan boshlab uch yil ichida sotib yuborilgan yoki tekinga berilgan boʻlsa, foyda soligʻi, yagona soliq toʻlovi va mol-mulk soligʻi boʻyicha imtiyozlar bekor qilinadi va qonunchilikda belgilangan tartibda ularni toʻlash boʻyicha majburiyatlar tiklanadi.

22. Bojxona toʻlovlari boʻyicha imtiyozlar faqatgina import qilingan texnologik jihoz olib kirilgan paytdan eʼtiboran uch yil ichida eksportga realizatsiya qilingan yoki bepul berilgan taqdirda bekor qilinadi. Bunda toʻlanishi lozim boʻlgan toʻlovlarni toʻlash boʻyicha majburiyat texnologik jihozni eksport qiluvchiga yuklatiladi.

Import qilingan texnologik jihoz eksport qilinganda eksportyor bojxona organlariga texnologik jihozni import qilishda bojxona rasmiylashtiruvi amalga oshirilgan BYuDning nusxasini taqdim etishi lozim.

23. Import qilingan texnologik jihoz Oʻzbekiston Respublikasi hududida realizatsiya qilingan yoki bepul berilgan taqdirda bojxona toʻlovlarni toʻlash boʻyicha majburiyatlar yuzaga kelmaydi.

Bunda import qilingan texnologik jihozni berayotgan tomon (importyor, sotuvchi, egasi) xaridorga texnologik jihozni import qilishda bojxona rasmiylashtiruvi amalga oshirilgan BYuDning nusxasini taqdim etishi lozim.

24. Mazkur Nizomda belgilangan imtiyozlarning toʻgʻri qoʻllanishi ustidan nazorat davlat soliq xizmati organlari tomonidan Oʻzbekiston Respublikasi Soliq kodeksi, Oʻzbekiston Respublikasining “Davlat soliq xizmati toʻgʻrisida”gi Qonuni va Oʻzbekiston Respublikasining boshqa qonun hujjatlariga muvofiq amalga oshiriladi.