“V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyati tomonidan aviatsiya texnikasi eksportga yetkazib berilishini kuchaytirish uchun qo‘shimcha sharoitlar yaratish maqsadida Vazirlar Mahkamasi qaror qiladi:

1. “V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyati, O‘zbekiston Respublikasi Davlat mulki qo‘mitasi, Tashqi iqtisodiy aloqalar vazirligi va “Asaka” aksiyadorlik-tijorat bankining “Sibaviatrans” (Rossiya, Krasnoyarsk shahri), “Uralekoresurs” yopiq turdagi aksiyadorlik jamiyati (Rossiya, Yekaterinburg shahri), “Kedr” tijorat banki (Rossiya, Krasnoyarsk shahri), “Sverdlsotsbank” Sverdlov viloyati hududini ijtimoiy rivojlantirish tijorat banki (Rossiya, Yekaterinburg shahri) bilan birgalikda dastlabki ustav sarmoyasi tayyor mahsulot, mol-mulk va pul ulushi tarzida 24,5 mln. AQSH dollari bo‘lgan ochiq turdagi aksiyadorlik jamiyati shaklidagi “O‘zavializing” aksiyadorlik-lizing kompaniyasini tashkil etish to‘g‘risidagi taklifi ma’qullansin.

2. “O‘zavializing” aksiyadorlik-lizing kompaniyasi aksiyalarini dastlabki joylashtirish 1-ilovaga muvofiq nisbatlarda nazarda tutilsin. Qayd etilsinki, lizing kompaniyasi boshqa qatnashchilarning, shu jumladan, xorijiy qatnashchilarning unga kirishi uchun ochiqdir.

3. Quyidagilar “O‘zavializing” aksiyadorlik-lizing kompaniyasi faoliyatining asosiy yo‘nalishlari deb hisoblansin:

respublikada ishlab chiqarilgan aviatsiya texnikasini keyinchalik moliyaviy va operativ lizingga berish uchun milliy va xorijiy valyutada o‘z mablag‘lari va qarz olingan mablag‘lar hisobiga xarid qilish;

aviatsiya texnikasi bozorlari marketing tadqiqotlarini amalga oshirish.

4. Aksiyadorlik-lizing kompaniyasi boshqaruvi tuzilmasiga 2-ilovaga muvofiq rozilik berilsin.

5. Lizing operatsiyalari o‘tkazish sxemasi 3-ilovaga muvofiq ma’qullansin.

10. “O‘zbekinvest” eksport-import milliy sug‘urta kompaniyasi lizingga berilgan mol-mulk, tashiladigan yuklar sug‘urta qilinishini, lizing kompaniyaning chet eldagi iqtisodiy manfaatlari siyosiy, tijorat va tadbirkorlik tavakkalchiliklaridan kompleks sug‘urtaviy himoya qilinishini, lizing operatsiyalarini mablag‘ bilan ta’minlash uchun eksport kreditlari ajratuvchi O‘zbekiston Respublikasi rezidentlari bo‘lgan tijorat banklariga sug‘urta qoplamalari berilishini ta’minlasin.

11. “O‘zavializing” aksiyadorlik-lizing kompaniyasi hammuassislari O‘zbekiston Respublikasi Moliya vazirligi, Davlat soliq qo‘mitasi bilan birgalikda, Markaziy bank va Adliya vazirligi mutaxassislari ishtirokida yangidan tashkil etilayotgan aksiyadorlik-lizing kompaniyasi ustavini o‘n kun muddatda ishlab chiqsin, tasdiqlasin va ro‘yxatdan o‘tkazish uchun O‘zbekiston Respublikasi Adliya vazirligiga taqdim etsin.

12. “V.P. Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyati “O‘zavializing” aksiyadorlik-lizing kompaniyasini Toshkent shahar, M.Hasanova ko‘chasidagi 1-uyga joylashtirsin.

13. O‘zbekiston Respublikasi Davlat bojxona qo‘mitasi Adliya vazirligi, Tashqi iqtisodiy aloqalar vazirligi, Moliya vazirligi bilan birgalikda eksport va import lizing operatsiyalarini o‘tkazishda bojxona hujjatlarini rasmiylashtirish tartibini bir oy muddatda ishlab chiqsin va Vazirlar Mahkamasiga kiritsin.

14. O‘zbekiston Respublikasi Moliya vazirligi lizing operatsiyalarini buxgalteriya hisobida aks ettirish va lizingga berilgan mol-mulk amortizatsiyasini nazarda tutuvchi hisobot tartibini bir oy muddatda ishlab chiqsin va tasdiqlash uchun Vazirlar Mahkamasiga taqdim etsin.

15. O‘zbekiston Respublikasi Tashqi ishlar vazirligi va Tashqi iqtisodiy aloqalar vazirligi O‘zbekiston Respublikasi qabul qilgan xalqaro majburiyatlarga muvofiq bir oy muddatda:

O‘zbekiston Respublikasining Xalqaro moliyaviy lizing to‘g‘risida 1988-yilgi Ottava konvensiyasiga qo‘shilishi;

respublikaning tashkil etilayotgan lizing kompaniyalarining Yevropa lizing kompaniyalari uyushmasi bilan uzoq muddatli hamkorligini tashkil etish masalalari bo‘yicha takliflarni tayyorlasinlar va Vazirlar Mahkamasiga taqdim etsinlar.

16. Mazkur qarorning bajarilishini nazorat qilish O‘zbekiston Respublikasining Bosh vaziri O‘.T. Sultonov zimmasiga yuklansin.