LexUZ sharhi
Mazkur qaror O‘zbekiston Respublikasi Prezidentining 2020-yil 27-sentabrdagi PF-6075-sonli “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida”gi Farmoniga asosan o‘z kuchini yo‘qotgan.
O‘zbekiston Respublikasining “Ta’lim to‘g‘risida”gi Qonuniga muvofiq hamda o‘n ikki yillik ta’limga to‘liq o‘tish, buning uchun yuqori talablarga javob beradigan moddiy-texnika bazasiga ega bo‘lgan, zamonaviy kompyuter texnikasi, o‘quv va laboratoriya uskunalari bilan jihozlangan, yuqori malakali pedagogik kadrlar bilan ta’minlangan o‘rta maxsus, kasb-hunar o‘quv muassasalarining rivojlangan tarmog‘ini yaratish maqsadida:
1. Qayd etib o‘tilsinki, hozirgi vaqtda Toshkent shahrida 66937 o‘quvchi o‘rinlariga ega bo‘lgan 85 ta kasb-hunar kollejlari va oliy ta’lim muassasalari qoshidagi 14100 o‘quvchi o‘rinlariga ega bo‘lgan 31 ta akademik litseylar faoliyat yuritmoqda, jumladan, yangi qurilganlari va rekonstruksiya qilinganlari hisobiga 30524 o‘quvchi o‘rinlariga ega bo‘lgan 38 ta kasb-hunar kollejlari hamda 10735 o‘quvchi o‘rinlariga ega bo‘lgan 22 ta akademik litseylar ishga tushirilgan.
2007-yilda tasdiqlangan Investitsiya dasturiga muvofiq, 5340 o‘quvchi o‘rinlariga ega 6 ta kasb-hunar kollejlari va 3330 o‘quvchi o‘rinlariga ega 5 ta akademik litseylar qurilishi va rekonstruksiya qilinishini yakunlash nazarda tutilmoqda. Yangi ishga tushiriladigan kasb-hunar kollejlarida 76 yo‘nalish va 140 ixtisos bo‘yicha mutaxassislar tayyorlanadi.
Amalda barcha kasb-hunar kollejlari zamonaviy moddiy-texnika bazasiga ega, yangi o‘quv va laboratoriya jihozlari bilan ta’minlangan, malakali kadrlar bilan to‘ldirilgan.
Tekshiruvlarning ko‘rsatishicha, kasb-hunar kollejlari va akademik litseylar o‘quv jarayonlarini yangi ta’lim standartlariga qat’iyan muvofiq ravishda yangitdan ishlab chiqilgan zamonaviy o‘quv dasturlari bo‘yicha amalga oshirmoqdalar. Kasb-hunar kollejlari va akademik litseylarning mutlaq ko‘pchiligida o‘qitish bir smenada olib borilmoqda.
Agar 2007-yilda Toshkent shahrida to‘qqizinchi sinflardagi o‘qishni 36688 nafar o‘quvchi tamomlayotgani hisobga olinsa, hisob-kitoblarning ko‘rsatishicha, shahardagi mavjud hamda joriy yilda ishga tushiriladigan kasb-hunar kollejlari va akademik litseylar quvvatlari maktab bitiruvchilarini o‘rta maxsus va kasb-hunar o‘quv muassasalarida o‘qishni davom ettirish uchun qabul qilinishini to‘liq ta’minlash imkonini beradi, bu yerda yoshlar umumiy o‘rta ma’lumot olish bilan bir qatorda, aniq bir kasbni egallaydilar, shuningdek oliy ta’lim muassasalariga kirish imkoniyatiga ega bo‘ladilar.
Ayni vaqtda mamlakatimizda olib borilayotgan islohotlar real iqtisodiyot tarmoqlari va ijtimoiy hayot ehtiyojlaridan kelib chiqqan holda, alohida yo‘nalishlar va ixtisoslar bo‘yicha malakali kadrlarni tayyorlash jarayoniga tuzatishlar kiritishni talab qilmoqda. Shu bilan birga, 9-sinf o‘quvchilari orasida o‘tkazilgan sotsiologik tadqiqotlar tahlili shuni ko‘rsatmoqdaki, oliy o‘quv muassasalari qoshidagi akademik litseylarda o‘quvchi o‘rinlari sonini oshirish va yangi akademik litseylar ochishga qo‘shimcha ehtiyoj borligi aniqlandi.
2. O‘zbekiston Respublikasi Oliy va o‘rta maxsus ta’lim vazirligi, O‘rta maxsus, kasb-hunar ta’limi markazi, Toshkent shahar hokimligi, tegishli pudratchi qurilish tashkilotlari, 1-ilovaga* muvofiq, 2007-yilgi Investitsiya dasturiga kiritilgan Toshkent shahridagi kasb-hunar kollejlari va akademik litseylarning sifatli qurilishi va rekonstruksiya qilinishini 2007/2008 o‘quv yili boshlanishigacha yakunlasin, ularning o‘z vaqtida ishga tushirilishini, mebel, zamonaviy o‘quv va laboratoriya uskunalari bilan jihozlanishini ta’minlasin.
* 1-ilova rus tilidagi matnda berilgan.
O‘zbekiston Respublikasi Iqtisodiyot vazirligi, Moliya vazirligi, “Davarxitektqurilish” qo‘mitasi 2007-yilgi Investitsiya dasturida nazarda tutilgan kasb-hunar kollejlari va akademik litseylarning tasdiqlangan namunaviy loyihalarga qat’iy muvofiq ravishda sifatli qurilishi va o‘z vaqtida foydalanishga topshirilishi ustidan qat’iy nazorat o‘rnatsin.
3. O‘zbekiston Respublikasi Oliy va o‘rta maxsus ta’lim vazirligi, Iqtisodiyot vazirligi va Toshkent shahar hokimligining 2007-yilda Toshkent shahridagi oliy ta’lim muassasalari qoshida 2-ilovaga* muvofiq qo‘shimcha akademik litseylarni ochish to‘g‘risidagi taklifi qabul qilinsin.
* 2-ilova rus tilidagi matnda berilgan.
O‘zbekiston Respublikasi Iqtisodiyot vazirligi, Moliya vazirligi, Oliy va o‘rta maxsus ta’lim vazirligi, “Davarxitektqurilish” qo‘mitasi 2-ilovada ko‘rsatilgan akademik litseylarning moddiy-texnika bazasini sinchiklab xatlovdan o‘tkazsin va zarur hollarda ularni rekonstruksiya qilish uchun 2008-yilgi Investitsiya dasturiga kiritish to‘g‘risidagi taklifni ikki oy muddatda Vazirlar Mahkamasiga taqdim etsin.
4. O‘zbekiston Respublikasi Oliy va o‘rta maxsus ta’lim vazirligining O‘rta maxsus, kasb-hunar ta’limi markazi Toshkent shahar hokimligi bilan birgalikda 2007-yilning 20-mayigacha bo‘lgan muddatda O‘zbekiston Respublikasining ta’lim muassasalariga qabul qilish Davlat komissiyasiga, ushbu qarorda nazarda tutilganidek, ularning tarmog‘i kengaytirilishi va yo‘nalishi o‘zgartirilishini hisobga olgan holda, 2007-2008 o‘quv yilida o‘quvchilarni o‘rta maxsus, kasb-hunar ta’limi muassasalariga qabul qilish to‘g‘risida asosli takliflar kiritsin.
Bunda o‘rta maxsus, kasb-hunar o‘quv yurtlaridagi rus tilida o‘qitiladigan guruhlarining 1-kursiga kamida 10,5 ming o‘quvchini qabul qilish uchun barcha shart-sharoitlar yaratilsin.
5. O‘zbekiston Respublikasi Oliy va o‘rta maxsus ta’lim vazirligi, O‘rta maxsus, kasb-hunar ta’limi markazi O‘zbekiston Respublikasi Xalq ta’limi vazirligi hamda “Iste’dod” jamg‘armasi bilan birgalikda:
akademik litseylar va kasb-hunar kollejlariga oliy ta’lim muassasalaridagi yetakchi o‘qituvchilardan yuqori malakali pedagog kadrlar hamda mutaxassis-amaliyotchilar, shuningdek umumta’lim maktablari 10-11-sinflarining bo‘shaydigan yuqori malakali o‘qituvchilari jalb etilishini ta’minlasin;
umumta’lim maktablarining bo‘shaydigan yuqori sinf o‘qituvchilarini keyinchalik o‘rta maxsus, kasb-hunar ta’limi tizimida ishlashlari uchun ularni ixtisoslashgan maqsadli kurslarda qayta tayyorlash va qayta yo‘naltirishni tashkil etsin;
Mehnat va aholini ijtimoiy muhofaza qilish vazirligi bilan birgalikda umumta’lim maktablaridagi yuqori sinflarning tugatilishi munosabati bilan bo‘shaydigan o‘qituvchilarni ish bilan ta’minlash masalalarini hal etsin.
6. O‘zbekiston Respublikasi Moliya vazirligi mazkur qarorda nazarda tutilgan Toshkent shahrida kasb-hunar kollejlari va akademik litseylarni qurish, rekonstruksiya qilish va 2007-yilda ishga tushirish bo‘yicha topshiriqlarni hisobga olgan holda:
Iqtisodiyot vazirligi, Oliy va o‘rta maxsus ta’lim vazirligi, Toshkent shahar hokimligi bilan birgalikda O‘rta maxsus, kasb-hunar ta’limi markazi hamda Toshkent shahar hokimligining 2007-yildagi qurilishlar manzilli ro‘yxatiga ular uchun tasdiqlangan budjet mablag‘lari limitlari doirasida tuzatishlar kiritsin;
2007-yilda yangi tashkil etiladigan akademik litseylar bo‘yicha 2007/2008 o‘quv yilida joriy xarajatlarni moliyalashtirish bo‘yicha tuzatishlar kiritsin.
7. O‘zbekiston Respublikasi Oliy va o‘rta maxsus ta’lim vazirligi, Xalq ta’limi vazirligi, Toshkent shahar hokimligi jamoat tashkilotlari bilan birgalikda:
umumta’lim maktablari 9-sinf bitiruvchilari va ularning ota-onalari o‘rtasida akademik litseylar va kasb-hunar kollejlarida o‘qishning afzalliklari va keng imkoniyatlari, ularning jihozlanish darajasi hamda qo‘llanilayotgan zamonaviy pedagogik texnologiyalar to‘g‘risida keng ko‘lamdagi tushuntirish ishlarini olib borsin;
akademik litseylar va kasb-hunar kollejlaridagi ta’lim yo‘nalishlarining taqdimotini, shuningdek ta’lim muassasalarida “ochiq eshiklar kuni”ni tashkil etsin.
8. Ushbu qarorning ijrosini nazorat qilish O‘zbekiston Respublikasi Bosh vazirining o‘rinbosarlari R.S.Qosimov va R.S.Azimov zimmalariga yuklansin.