Aholi daromadlari va farovonligi darajasini oʻstirishning gʻoyat muhim omili sifatida uning bandligini oshirish uchun zarur shart-sharoitlar yaratish, mehnat bozori infratuzilmasini yanada rivojlantirish, odamlarni ijtimoiy himoya qilish tizimini mustahkamlash, ushbu masalalarni hal etishda mehnat va aholini ijtimoiy muhofaza qilish organlarining rolini faollashtirish hamda javobgarligini kuchaytirish, shuningdek ular faoliyatini tashkil qilishni takomillashtirish maqsadida:

1. Oʻzbekiston Respublikasi Prezidentining 2007-yil 12-yanvardagi F-2654-sonli Farmoyishiga muvofiq tashkil etilgan Ishchi guruhi tomonidan Oʻzbekiston Respublikasi Iqtisodiyot vazirligi, Mehnat va aholini ijtimoiy muhofaza qilish vazirligi, Moliya vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda ishlab chiqilgan Aholi bandligini oshirish hamda mehnat va aholini ijtimoiy muhofaza qilish organlari faoliyatini takomillashtirish chora-tadbirlari dasturi 1-ilovaga muvofiq maʼqullansin.

Ishchi guruhi Dastur topshiriqlari bajarilishi ustidan qatʼiy monitoring oʻrnatsin va uning ijrosi toʻgʻrisida har chorakda Vazirlar Mahkamasiga axborot berib borsin.

2. Respublika sharoitida aholi bandligi va daromadlarini oshirishning samarali shakllaridan biri sifatida aholini xoʻjalik yurituvchi subyektlar bilan kooperatsiyalashgan holda kasanachilik mehnatiga keng jalb etishni ragʻbatlantirish maqsadida Oʻzbekiston Respublikasi Prezidentining “Yirik sanoat korxonalari bilan kasanachilikni rivojlantirish asosidagi ishlab chiqarish va xizmatlar oʻrtasida kooperatsiyani kengaytirishni ragʻbatlantirish chora-tadbirlari toʻgʻrisida” 2006-yil 5-yanvardagi PF-3706-sonli Farmonining amal qilishi iqtisodiyotning boshqa tarmoqlari, birinchi galda transport, aloqa, qurilish va qurilish industriyasining yirik korxonalariga, shuningdek tayyor mahsulot ishlab chiqarishga ixtisoslashgan kichik sanoat korxonalariga nisbatan ham joriy etilsin.

3. Quyidagilar Oʻzbekiston Respublikasi Mehnat va aholini ijtimoiy muhofaza qilish vazirligining eng muhim vazifalari deb hisoblansin:

mintaqalar boʻyicha mehnat bozorini shakllantirishda samarali siyosatni amalga oshirish, demografik omillarni, iqtisodiyot tarmoqlarini rivojlantirish va tarkibiy qayta tashkil etishning istiqbolli yoʻnalishlarini eʼtiborga olgan holda bandlikning yangi shakllarini keng tatbiq etish hisobiga aholi bandligining oʻsishini taʼminlash;

demografik oʻzgarishlar va kadrlarning kasbiy tayyorgarligi bilan bogʻliq oʻzgarib borayotgan talablarni hisobga olgan holda mehnat, ish bilan bandlik va aholini ijtimoiy qoʻllab-quvvatlash sohasidagi qonun hujjatlarini ishlab chiqish va yanada takomillashtirish boʻyicha takliflar kiritish;

ishga joylashishga muhtoj, ish bilan band boʻlmagan aholiga kasbiy qayta tayyorlash va ishga joylashtirish boʻyicha sifatli xizmatlar koʻrsatish;

aholining ehtiyojmand toifalarini ijtimoiy himoya qilish boʻyicha amaliy chora-tadbirlarning amalga oshirilishini taʼminlash, kamxarj oilalar, nogironlar va yolgʻiz keksalarga yordam koʻrsatishda tabaqalashtirilgan tarzda va aniq yondoshuvni kuchaytirish;

mehnat, bandlik va aholini ijtimoiy muhofaza qilish sohasidagi qonun hujjatlari talablariga rioya etilishi ustidan qattiq nazoratni amalga oshirish, mehnat munosabatlarini moddiy ragʻbatlantirish va mehnatni muhofaza qilish mexanizmlarini takomillashtirish chora-tadbirlarini ishlab chiqish.

4. Oʻzbekiston Respublikasi Mehnat va aholini ijtimoiy muhofaza qilish vazirligi Iqtisodiyot vazirligi, Oliy va oʻrta maxsus taʼlim vazirligi bilan birgalikda, mehnat bozorida vujudga kelayotgan tendensiyalarni va muayyan ixtisosliklar boʻyicha kadrlarga nisbatan talab-ehtiyojni hisobga olgan holda kadrlarni kasbiy tayyorlash va qayta tayyorlash boʻyicha yoʻnalishlardagi oʻzgarishlarga oid takliflarni tizimli asosda Vazirlar Mahkamasiga kiritsin.

5. Oʻzbekiston Respublikasi Mehnat va aholini ijtimoiy muhofaza qilish vazirligi, Iqtisodiyot vazirligi, Moliya vazirligining tuman (shahar) mehnat, bandlik va aholini ijtimoiy muhofaza qilish boʻlimlari negizida yirik qishloq fuqarolar yigʻinlari (mahallalar)da mehnat va aholini ijtimoiy muhofaza qilish boʻyicha muqim punktlari boʻlgan Bandlikka koʻmaklashuvchi tuman (shahar) markazlarini tashkil etish toʻgʻrisidagi taklifi qabul qilinsin.

Quyidagilar Bandlikka koʻmaklashuvchi markazlarning asosiy vazifalari etib belgilansin:

ish bilan band boʻlmagan aholi hisobi metodikasiga muvofiq, ishsizlar tizimli ravishda hisobga olib borilishini, ishga joylashishga muhtojlar, shuningdek mavjud boʻsh ish joylari toʻgʻrisida maʼlumotlar banki shakllantirilishini taʼminlash;

ishsizlar, birinchi navbatda yoshlar, xotin-qizlar va aholining boshqa ijtimoiy ehtiyojmand toifalarini ishga joylashtirishga koʻmaklashish;

aholi bandligining samarali shakllarini rivojlantirish, jumladan kasanachilik mehnatini joriy etish, mustaqil ish bilan bandlik, shu jumladan shaxsiy yordamchi va dehqon xoʻjaliklarida qoramol boqish hamda boshqa turdagi ish bilan bandlikni ragʻbatlantirish;

ishsizlarni kasbga oʻqitish va qayta oʻqitishni tashkil qilish, ularni ijtimoiy qoʻllab-quvvatlash boʻyicha qonun hujjatlarida nazarda tutilgan chora-tadbirlarni amalga oshirish, haq toʻlanadigan jamoat ishlarini kengaytirish;

ish beruvchilar tomonidan mehnatga oid qonun hujjatlariga, shuningdek mehnatni muhofaza qilish sohasidagi normativ-huquqiy hujjatlarga rioya etilishini nazorat qilish;

ehtiyojmand oilalarni ijtimoiy qoʻllab-quvvatlash chora-tadbirlarini amalga oshirishda fuqarolarning oʻzini oʻzi boshqarish organlariga amaliy yordam koʻrsatish, kamxarj oilalarga nafaqalar hamda moddiy yordam tayinlash va toʻlashda oʻrnatilgan tartibga rioya etilishi monitoringini amalga oshirish.

6. Quyidagilar:

Oʻzbekiston Respublikasi Mehnat va aholini ijtimoiy muhofaza qilish vazirligining tashkiliy tuzilmasi 2-ilovaga muvofiq;

Oʻzbekiston Respublikasi Mehnat va aholini ijtimoiy muhofaza qilish vazirligining xodimlar umumiy cheklangan soni 89 kishi, shulardan boshqaruv xodimlari soni 61 kishidan iborat boʻlgan markaziy apparati tuzilmasi 3-ilovaga muvofiq;

Qoraqalpogʻiston Respublikasi Mehnat va aholini ijtimoiy muhofaza qilish vazirligi tuzilmasi hamda viloyatlar va Toshkent shahar mehnat va aholini ijtimoiy muhofaza qilish hududiy bosh boshqarmalarining namunaviy tuzilmasi 4 va 4a-ilovalarga muvofiq;

tuman (shahar) ijtimoiy taʼminot boʻlimi hamda Bandlikka koʻmaklashuvchi tuman (shahar) markazining namunaviy tuzilmalari 5 va 6-ilovalarga muvofiq tasdiqlansin.

Mehnat va aholini ijtimoiy muhofaza qilish vaziriga Vazirlik markaziy apparatining tasdiqlangan tuzilmasiga belgilangan xodimlar soni va mehnat haqi fondi doirasida oʻzgartirishlar kiritish huquqi berilsin.

Oʻzbekiston Respublikasi Vazirlar Mahkamasi ikki hafta muddatda Oʻzbekiston Respublikasi Mehnat va aholini ijtimoiy muhofaza qilish vazirligi toʻgʻrisidagi nizomni tasdiqlasin.

7. Oʻzbekiston Respublikasi Mehnat va aholini ijtimoiy muhofaza qilish vazirligi markaziy apparati boʻlinmalari rahbarlarini, hududiy bosh boshqarmalar, shuningdek vazirlikka boʻysunuvchi tashkilotlar rahbarlarini attestatsiyadan oʻtkazish boʻyicha Respublika komissiyasi 7-ilovaga muvofiq tarkibda tuzilsin.

Respublika komissiyasi ikki oy muddatda mazkur toifalardagi xodimlarni ularning malaka va kasb darajalariga nisbatan talablarni eʼtiborga olgan holda attestatsiyadan oʻtkazsin.

8. Oʻzbekiston Respublikasi Mehnat va aholini ijtimoiy muhofaza qilish vazirligi 2007-yilning 1-iyuliga qadar:

hududiy bosh boshqarmalar tarkibiy boʻlinmalari, shuningdek, Bandlikka koʻmaklashuvchi tuman (shahar) markazlari va tuman (shahar) ijtimoiy taʼminot boʻlinmalari rahbarlarini ularning malaka va kasbiy saviya-darajasiga nisbatan qattiq talablar qoʻygan holda attestatsiyadan oʻtkazsin;

Oʻzbekiston Respublikasi Oliy va oʻrta maxsus taʼlim vazirligi bilan birgalikda ishsizlar kasbga tayyorlanadigan, qayta tayyorlanadigan va malakasi oshiriladigan bazaviy kasb-hunar kollejlarini hududlar boʻyicha belgilasin, shuningdek, ish beruvchilar va mehnat bozorining malakali kadrlarga boʻlgan talab-ehtiyojlarini hisobga oladigan tegishli taʼlim dasturlarini ishlab chiqsin.

9. Oʻzbekiston Respublikasi Mehnat va aholini ijtimoiy muhofaza qilish vazirligi, Iqtisodiyot vazirligi, Moliya vazirligi, Davlat statistika qoʻmitasi bir oy muddatda Xalqaro mehnat tashkiloti tomonidan respublikaning oʻziga xos xususiyatlarini hisobga olib belgilangan normalardan kelib chiqqan holda, hududlar boʻyicha Ishga joylashishga muhtoj, ish bilan band boʻlmagan aholi hisobi metodikasini ishlab chiqsin hamda tasdiqlash uchun Vazirlar Mahkamasiga kiritsin.

10. Oʻzbekiston Respublikasi Moliya vazirligi, Mehnat va aholini ijtimoiy muhofaza qilish vazirligining mehnat va aholini ijtimoiy muhofaza qilish organlari xodimlarining mehnatini ragʻbatlantirish hamda moddiy-texnika bazasini mustahkamlash jamgʻarmasini tashkil etish toʻgʻrisidagi taklifi qabul qilinsin.

Mehnat va aholini ijtimoiy muhofaza qilish organlari xodimlarining mehnatini ragʻbatlantirish hamda moddiy-texnika bazasini mustahkamlash jamgʻarmasi toʻgʻrisidagi nizom 8-ilovaga muvofiq tasdiqlansin.

11. Adliya vazirligi bir oy muddatda qonun hujjatlariga mazkur qarordan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

12. Ushbu qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.

1. Mazkur Nizom Mehnat va aholini ijtimoiy muhofaza qilish organlari xodimlarining mehnatini ragʻbatlantirish hamda moddiy-texnika bazasini mustahkamlash jamgʻarmasi (bundan keyin matnda — Jamgʻarma)ni tashkil etish va uning mablagʻlaridan foydalanish tartibini belgilab beradi.

2. Jamgʻarma mablagʻlaridan xodimlarning bajarilayotgan ish samaradorligi va sifatini oshirishdan moddiy manfaatdorligini kuchaytirish, shuningdek mehnat va aholini ijtimoiy muhofaza qilish organlarining moddiy-texnika bazasini mustahkamlash uchun foydalaniladi.

3. Quyidagilar Jamgʻarma mablagʻlarini shakllantirish manbalari hisoblanadi:

— Bandlikka koʻmaklashuvchi jamgʻarma tushumlari mablagʻlarining 5 foizi;

— mehnatda mayib boʻlganligi yoki kasb kasalligidan nogironlik boʻyicha Oʻzbekiston Respublikasining “Fuqarolarning davlat pensiya taʼminoti toʻgʻrisida”gi Qonuni 15-moddasiga muvofiq tayinlangan pensiyalarni toʻlash xarajatlarini qoplash uchun ish beruvchilar tomonidan regressiv talablar (daʼvolar) undiriladigan, mehnat va aholini ijtimoiy muhofaza qilish organlari hisob raqamlariga kelib tushadigan mablagʻlarning 15 foizi.

4. Jamgʻarma mablagʻlari Oʻzbekiston Respublikasi Mehnat va aholini ijtimoiy muhofaza qilish vazirligi, Qoraqalpogʻiston Respublikasi Mehnat va aholini ijtimoiy muhofaza qilish vazirligi, viloyatlar va Toshkent shahri mehnat va aholini ijtimoiy muhofaza qilish hududiy bosh boshqarmalarining budjetdan tashqari maxsus hisob raqamlaridan jamlanadi hamda mehnat va aholini ijtimoiy muhofaza qilish organlari oʻrtasida Oʻzbekiston Respublikasi Mehnat va aholini ijtimoiy muhofaza qilish vazirligi tomonidan oʻrnatilgan tartibda taqsimlanadi.

5. Jamgʻarmaning kelgusi yilgi daromadlari miqdorlarini belgilashda Jamgʻarmaning avvalgi yil oxiridagi mablagʻlari qoldigʻi hamda keyingi ikki yil ichida qonun hujjatlaridagi oʻzgarishlarni eʼtiborga olib, tushumlar dinamikasini nazarda tutgan holda hisoblab chiqilgan prognoz tushumlari hajmi inobatga olinadi.

6. Smetaning xarajatlar qismi Oʻzbekiston Respublikasi Moliya vazirligi tomonidan tasdiqlangan davlat budjeti xarajatlari tasnifiga muvofiq xarajatlarni moddalar boʻyicha aniq koʻrsatgan holda xarajat guruhlari boʻyicha tuziladi.

7. Jamgʻarmaning daromad va xarajatlari smetasi tegishli ravishda:

Oʻzbekiston Respublikasi mehnat va aholini ijtimoiy muhofaza qilish vaziri;

Qoraqalpogʻiston Respublikasi mehnat va aholini ijtimoiy muhofaza qilish vaziri, viloyatlar va Toshkent shahri mehnat va aholini ijtimoiy muhofaza qilish hududiy bosh boshqarmalarining boshliqlari tomonidan tuman (shahar) boʻlinmalari xarajatlar smetalarini ilova qilgan holda tasdiqlanadi.

8. Jamgʻarma daromadlari va xarajatlari smetasini roʻyxatga olish budjet tashkilotlarining xarajatlar smetalari va shtat jadvallarini Moliya vazirligi va moliya organlarida hisobga olishning Oʻzbekiston Respublikasi Moliya vazirligi tomonidan 1999-yil 9-dekabrda 93-son (1999-yil 13-dekabrdagi 849-roʻyxat raqami) tasdiqlangan Tartib bilan belgilangan tartib va muddatlarda amalga oshiriladi.

9. Oʻzbekiston Respublikasi mehnat va aholini ijtimoiy muhofaza qilish vaziri, Qoraqalpogʻiston Respublikasi mehnat va aholini ijtimoiy muhofaza qilish vaziri, viloyatlar va Toshkent shahri mehnat va aholini ijtimoiy muhofaza qilish hududiy bosh boshqarmalarining boshliqlari Jamgʻarma tushumlarining hajmlaridan kelib chiqib, belgilangan tartibda roʻyxatga olgan holda Jamgʻarmaning daromad va xarajatlari smetasiga har chorakda oʻzgartish kiritishlari mumkin.

10. Jamgʻarma mablagʻlarini sarflash Oʻzbekiston Respublikasi Mehnat va aholini ijtimoiy muhofaza qilish vazirligi, Qoraqalpogʻiston Respublikasi Mehnat va aholini ijtimoiy muhofaza qilish vazirligi, viloyatlar va Toshkent shahri mehnat va aholini ijtimoiy muhofaza qilish hududiy bosh boshqarmalarining, Bandlikka koʻmaklashuvchi tuman (shahar) markazlari hamda tuman (shahar) ijtimoiy taʼminot boʻlimlarining budjetdan tashqari maxsus hisob raqamlaridan, tasdiqlangan daromadlar va xarajatlar smetalariga muvofiq amalga oshiriladi.

Oʻzbekiston Respublikasi mehnat va aholini ijtimoiy muhofaza qilish vaziri, Qoraqalpogʻiston Respublikasi mehnat va aholini ijtimoiy muhofaza qilish vaziri, viloyatlar va Toshkent shahri mehnat va aholini ijtimoiy muhofaza qilish hududiy bosh boshqarmalarining boshliqlari, Bandlikka koʻmaklashuvchi tuman (shahar) markazlarining direktorlari hamda tuman (shahar) ijtimoiy taʼminot boʻlimlarining boshliqlari, ular boʻlmagan hollarda esa — ularning oʻrnini bosadigan shaxslar tegishli ravishda Jamgʻarma mablagʻlarini tasarruf etuvchilar hisoblanadi.

11. Jamgʻarma mablagʻlari quyidagi maqsadlarga yoʻnaltiriladi:

a) Jamgʻarma mablagʻlarining kamida 50 foizi miqdorida — mehnat va aholini ijtimoiy muhofaza qilish organlari xodimlarini moddiy ragʻbatlantirishga;

b) Jamgʻarma mablagʻlarining 50 foizigacha miqdorda — mehnat va aholini ijtimoiy muhofaza qilish organlarining moddiy-texnika bazasini mustahkamlashga, shuningdek kadrlar tayyorlash va xodimlarning malakasini oshirish boʻyicha sarf-xarajatlarga, shu jumladan:

vazirlik, uning hududiy boshqarmalari hamda tuman (shahar) boʻlimlari va Markazlari binolari hamda xonalarini qurish, sotib olish, taʼmirlash va jihozlar;

avtotransport, aloqa vositalari, hisoblash, kompyuter va tashkiliy texnikalarni sotib olish, taʼmirlash, texnik xizmat koʻrsatish, inventar va xoʻjalik jihozlarini saqlash hamda ekspluatatsiya qilish, dasturiy taʼminot vositalarini xarid qilish;

davriy matbuot nashrlarini, maxsus adabiyotlar, kitob mahsuloti, idoraviy ashyolarni sotib olish;

kadrlar tayyorlash va xodimlar malakasini oshirish boʻyicha xarajatlar;

mehnat va aholini ijtimoiy muhofaza qilish organlari faoliyatini yaxshilashga qaratilgan boshqa tadbirlar.

Jamgʻarmaning joriy yilda foydalanilmagan mablagʻlari qoldigʻi navbatdagi moliya yiliga oʻtadi va olib qoʻyilmaydi.

12. Xodimlarga yuqori kasbiy malakasi uchun har oylik shaxsiy ustama haq, ishdagi muvaffaqiyatlari va muhim topshiriqlarni bajargani uchun ayrim xodimlarni mukofotlash, yubiley sanalari munosabati bilan bir marotabalik pul mukofotlari berish, Oʻzbekiston Respublikasining qonun hujjatlarida belgilangan bayram kunlari munosabati bilan mukofotlar toʻlash, mansab maoshlariga har oylik qoʻshimcha haq belgilash (ovqat va boshqa maqsadlarga), moddiy yordam koʻrsatish Oʻzbekiston Respublikasi mehnat va aholini ijtimoiy muhofaza qilish vaziri tomonidan tasdiqlanadigan Xodimlarni moddiy ragʻbatlantirish va ijtimoiy muhofaza qilish toʻgʻrisidagi nizomga muvofiq hamda ushbu Nizomning 10-bandida koʻrsatilgan Jamgʻarma mablagʻlarini tasarruf etuvchilarning buyruqlari asosida, tegishli Jamgʻarmalarning mablagʻlari hisobidan amalga oshiriladi.

13. Jamgʻarmadan xodimlarga ustama haq, mukofotlar belgilash va moddiy yordam koʻrsatish toʻgʻrisidagi qaror har bir mehnat va aholini ijtimoiy muhofaza qilish organida tashkil etiladigan maxsus komissiya tomonidan qabul qilinadi.

14. Oʻzbekiston Respublikasi mehnat va aholini ijtimoiy muhofaza qilish vaziri, Qoraqalpogʻiston Respublikasi mehnat va aholini ijtimoiy muhofaza qilish vaziri, viloyatlar va Toshkent shahri mehnat va aholini ijtimoiy muhofaza qilish hududiy bosh boshqarmalarining boshliqlari zarur hollarda Jamgʻarma mablagʻlarini Jamgʻarmaning daromad va xarajatlar smetasiga belgilangan tartibda tegishli oʻzgartishlarni kiritgan holda mehnat va aholini ijtimoiy himoya qilish quyi organlariga qaytadan taqsimlashlari mumkin.

15. Jamgʻarma mablagʻlari hisobidan qoʻshimcha xodimlarni saqlash man etiladi.

16. Jamgʻarma mablagʻlarining tushumi va xarajatlari hisobi budjetdan tashqari boshqa mablagʻlardan, shu jumladan budjet tashkilotlarini rivojlantirish jamgʻarmasidan alohida yuritiladi.

17. Jamgʻarma mablagʻlari tushumi va xarajatlari toʻgʻrisidagi budjet mablagʻlari uchun belgilangan tartib va muddatlarda Oʻzbekiston Respublikasi Moliya vazirligiga taqdim etiladi.

18. Jamgʻarma mablagʻlarining maqsadli sarflanishi hamda ushbu mablagʻlarni shakllantirish va ulardan foydalanish toʻgʻrisida taqdim etiladigan maʼlumotlarning haqqoniyligi uchun mehnat va aholini ijtimoiy muhofaza qilish organlarining rahbarlari shaxsan javobgar boʻladilar.

Jamgʻarma mablagʻlaridan maqsadga nomuvofiq foydalanish faktlari aniqlangan hollarda maqsadga nomuvofiq foydalanilgan summaning hammasi aybdor shaxslarga nisbatan qonun hujjatlarida belgilangan tartibda tegishli javobgarlik choralari qoʻllangan holda davlat budjeti daromadiga olib qoʻyiladi.

19. Jamgʻarma mablagʻlaridan toʻgʻri va maqsadli foydalanilishi ustidan nazorat Oʻzbekiston Respublikasi Mehnat va aholini ijtimoiy muhofaza qilish vazirligi va Moliya vazirligining Nazorat-taftish bosh boshqarmasi hamda uning hududiy organlari tomonidan amalga oshiriladi.