Qadimiy va boy tarixi, betakror madaniyati, buyuk siymolari bilan jahon sivilizatsiyasi taraqqiyotiga ulkan hissa qoʻshgan, milliy davlatchiligimiz va maʼnaviyatimizning koʻhna beshiklaridan biri boʻlgan, noyob tarixiy-meʼmoriy obidalar, muqaddas qadamjolarni oʻz bagʻrida asrab-avaylab kelayotgan Samarqand shahrining 2750 yillik qutlugʻ sanasini 2007-yilda Mustaqillik umumxalq bayrami bilan bogʻliq tantanalar kunlarida keng miqyosda nishonlash hamda yurtdoshlarimiz, xususan, yosh avlodni milliy gʻurur va iftixor, Vatanga muhabbat va sadoqat ruhida tarbiyalash maqsadida:

1. YUNESKO Bosh konferensiyasining 2005-yil 20-oktabrdagi 33-sessiyasida Samarqand shahrining 2750 yilligini nishonlash va unda YUNESKOning ishtirok etishi haqidagi qarori maʼlumot uchun qabul qilinsin.

Oʻzbekiston Respublikasi Fanlar akademiyasi, Madaniyat va sport ishlari vazirligi, Respublika “Maʼnaviyat va maʼrifat” markazi, Samarqand viloyati hokimligi hamda keng jamoatchilikning Samarqand shahrining 2750 yilligini nishonlash haqidagi taklifi maʼqullansin.

2. Samarqand shahrining 2750 yilligini nishonlashga tayyorgarlik koʻrish va uni oʻtkazish boʻyicha respublika tashkiliy qoʻmitasi tarkibi, tadbirlar dasturi 1 va 2-ilovaga* muvofiq tasdiqlansin.

3. Oʻzbekiston Respublikasi Madaniyat va sport ishlari vazirligi Samarqand viloyati hokimligi, boshqa manfaatdor vazirlik va idoralar bilan birgalikda 2006-2007-yillarda Samarqand shahridagi tarixiy obidalarni taʼmirlash, ijtimoiy hamda kommunal sohasida xizmat koʻrsatishni rivojlantirish va obodonlashtirishga doir tadbirlar dasturini 3-ilovaga* muvofiq amalga oshirsin.

4. Oʻzbekiston Fanlar akademiyasi, Samarqand davlat universiteti, Madaniyat va sport ishlari vazirligi, Samarqand viloyati hokimligi tegishli vazirliklar va idoralar bilan birgalikda Samarqand shahrida 2007-yil may oyida “Samarqand shahrining umumbashariy madaniy taraqqiyot tarixida tutgan oʻrni” mavzusida xalqaro ilmiy konferensiya tashkil etish, mazkur anjuman ishiga mamlakatimiz va chet ellardagi taniqli olim va mutaxassislarni jalb etgan holda, uni har tomonlama yuksak saviyada oʻtkazish, shu mavzu bilan bogʻliq badiiy-tarixiy koʻrgazmalar uyushtirish, konferensiya materiallarini chop etish va keng yoritish boʻyicha aniq chora-tadbirlarni ishlab chiqsin va amalga oshirsin.

Belgilab qoʻyilsinki, xalqaro ilmiy konferensiyani oʻtkazish bilan bogʻliq xarajatlar respublika budjeti hisobidan qoplanadi.

5. Samarqand shahrining 2750 yilligini nishonlashga tayyorgarlik koʻrish va uni oʻtkazish boʻyicha respublika tashkiliy qoʻmitasi yilning har choragida oʻtkaziladigan majlislarida tadbirlar dasturining ijrosini taʼminlash toʻgʻrisida Oʻzbekiston Respublikasi Vazirlar Mahkamasiga axborot berib borsin.

6. Samarqand shahrining 2750 yilligini nishonlashga doir tadbirlar dasturini amalga oshirishda homiy sifatida qatnashish istagini bildirgan nodavlat va jamoat tashkilotlari, xorijiy va xalqaro tuzilmalarning tashabbuslari qoʻllab-quvvatlansin.

7. Oʻzbekiston Milliy teleradiokompaniyasi, Oʻzbekiston Milliy axborot agentligi va boshqa ommaviy axborot vositalariga Samarqand shahrining 2750 yilligiga bagʻishlangan yubiley tantanalariga tayyorgarlik koʻrish va ularni oʻtkazish bilan bogʻliq tadbirlarni keng yoritish tavsiya etilsin.

8. Belgilab qoʻyilsinki, Samarqand shahrining 2750 yilligini nishonlashga tayyorgarlik koʻrish va uni oʻtkazish tadbirlari hamda 2006-2007-yillarda tarixiy obidalarni taʼmirlash ishlari bilan bogʻliq barcha xarajatlar ushbu tadbirlarni bajarishga masʼul vazirliklar, hokimliklar va idoralarning 2006-yilda shu maqsadlar uchun koʻzda tutilgan, shuningdek, 2007-yildagi budjet parametrlarida rejalashtirilgan mablagʻlari doirasida va homiylar mablagʻlari hisobidan amalga oshiriladi.

9. Mazkur Qarorning bajarilishini nazorat qilish Oʻzbekiston Respublikasining Bosh vaziri Sh. Mirziyoyev zimmasiga yuklansin.