So‘nggi yillarda respublikada fosforit xomashyosining mahalliy bazasini shakllantirish bo‘yicha amaliy ishlar olib borildi. Bu o‘z navbatida uni import qilishdan voz kechish imkonini berdi. Jeroy-Sardara koni fosforit xomashyosidan fosforli o‘g‘itlar ishlab chiqarishning muqobil texnologiyasi yaratildi.

Shu bilan birga, Jeroy-Sardara koni negizida tarkibida fosfor bo‘lgan o‘g‘itlar ishlab chiqarishni ko‘paytirish masalalari bo‘yicha tegishli qarorlar qabul qilinishiga qaramay, hozirgi kungacha Qizilqum fosforit kombinatida fosfor rudasidan xloridlarni yuvish qurilmasini foydalanishga topshirish ta’minlanmagan, buning natijasida fosforli o‘gitlar ishlab chiqaruvchi korxonalarda uskunalar va kommunikatsiyalarning eskirish darajasi yuqoriligicha qolmoqda.

Ishlab chiqariladigan mahsulot tannarxi va energiya sarfini kamaytirishni ta’minlaydigan texnologik jarayonlarni takomillashtirishga, ishlab turgan quvvatlarni modernizatsiyalash va rekonstruksiya qilishga, mashina- uskunalarni yangilashga, shuningdek konsentratlangan fosforli o‘g‘itlar (fosfogips) ishlab chiqarish chiqindilarini kamaytirish, ularning yig‘ilib qolgan uyumlarini qayta ishlashning sanoat usullarini tadbiq etishga yetarli e’tibor berilmayapti. Tarkibida fosfor bo‘lgan mineral o‘g‘itlarni eksportga yetkazib berish hajmlarini o‘stirish sur’atlari yetarli darajada emas.

Jeroy-Sardara koni zaxiralari negizida tarkibida fosfor bo‘lgan mineral o‘g‘itlar ishlab chiqarish hajmlarini yanada oshirish va eksport potensialini o‘stirish, shuningdek fosfor ishlab chiqarishidagi texnogen chiqindilarni qayta ishlashga jalb etish maqsadida:

1. O‘zbekiston Respublikasi Bosh vaziri Sh.M.Mirziyoyevga, Navoiy KMK Bosh direktori N.I.Kucherskiyga Qizilqum fosforit kombinatida fosfor rudasidan xloridlarni yuvish qurilmasini o‘z vaqtida foydalanishga topshirishni ta’minlash bo‘yicha zarur chora-tadbirlar qabul qilinmaganligi ko‘rsatib o‘tilsin.

O‘zbekiston Respublikasi Bosh vaziri bir hafta muddatda vazirliklar, xo‘jalik birlashmalari va korxonalar rahbarlarining Jeroy-Sardara koni negizida tarkibida fosfor bo‘lgan o‘g‘itlar ishlab chiqarishni ko‘paytirish masalalari bo‘yicha qabul qilingan qarorlarning ijrosiga mas’uliyatsizlarcha yuzaki munosabatda bo‘lish faktlarini ko‘rib chiqsin va prinsipial baho bersin. Zarurat tug‘ilganda ularga nisbatan egallab turgan lavozimidan ozod etishgacha bo‘lgan qat’iy choralarni qo‘llash bo‘yicha takliflar kiritsin.

2. Quyidagilar ma’lumot uchun qabul qilinsin:

Navoiy KMK tomonidan 2006-yilning VI choragida:

tarkibida 30 foizgacha R₂O₅ bo‘lgan yiliga 400 ming tonna yuvilgan kuydirilgan fosfor konsentrati;

tarkibida 18-19 foiz R₂O₅ bo‘lgan yiliga 200 ming tonna yuvilgan fosfor konsentrati;

tarkibida 16-18 foiz R₂O₅ bo‘lgan yiliga 200 ming tonna fosfor uni hajmida fosforit mahsulotlari ishlab chiqarish bo‘yicha quvvatlar ishga tushiriladi.

3. O‘zbekiston Respublikasi Iqtisodiyot vazirligi hamda “O‘zkimyosanoat” DAKning “Samarqandkimyo” OAJda boyitilmagan Jeroy fosforitlarini azot kislota usuli bilan qayta ishlash orqali tarkibida azot-fosfor-kalsiy bo‘lgan yangi o‘git (nitrokalsiyfosfat) sanoat miqyosida ishlab chiqariladigan yiliga 250 ming tonna quvvatga ega korxonani tashkil etish to‘g‘risidagi taklifiga rozilik berilsin.

“O‘zkimyosanoat” DAK, O‘zbekiston Respublikasi Iqtisodiyot vazirligi, Moliya vazirligi 250 ming tonna nitrokalsiy fosfat o‘g‘iti (NKFO‘) ishlab chiqarish quvvatiga ega bo‘lgan yangi korxona 2008-yil oxirida ishga tushirilishini ta’minlash yuzasidan barcha zarur chora-tadbirlarni qabul qilsin.

4. 2010-yilgacha davrda Jeroy-Sardara koni negizida tarkibida fosfor bo‘lgan o‘g‘itlar ishlab chiqarish va eksportga yetkazib berishni ko‘paytirish chora-tadbirlari Dasturining asosiy yo‘nalishlari hamda 2006—2010-yillarda fosforli o‘g‘itlar ishlab chiqarish va eksport qilishning maqsadli parametrlari 1—3-ilovalarga muvofiq* ma’qullansin.

“O‘zkimyosanoat” DAK rahbariyati zimmasiga Dasturda belgilangan asosiy tashkiliy-texnikaviy tadbirlarni amalga oshirishda shaxsiy javobgarlik yuklansin.

8. O‘zbekiston Respublikasi Vazirlar Mahkamasi Dastur amalga oshirilishining tizimli monitoringini ta’minlasin hamda Dasturning amalga oshirilishi uchun mas’ul bo‘lgan vazirliklar, idoralar va xo‘jalik birlashmalari rahbarlarining hisobotlarini mamlakatning ijtimoiy-iqtisodiy rivojlanishi yakunlariga bag‘ishlangan Vazirlar Mahkamasining har chorakdagi majlislarida muntazam tinglab borishni amaliyotga tadbiq qilsin.

9. “O‘zbekiston temir yo‘llari” davlat-aksiyadorlik kompaniyasi:

“O‘zkimyosanoat” DAKning fosforli o‘g‘itlar ishlab chiqaruvchi korxonalar manziliga fosforit xomashyosi ortilgan yo‘nalishlarda harakatlanish, shuningdek tarmoq korxonalaridan boshqa xomashyo va mineral o‘g‘itlarni belgilangan tartibda yetkazib berishning normativ muddatlariga rioya etilishini;

“Qo‘qon superfosfat zavodi” OAJga fosforit xomashyosini yetkazib berish uchun Tojikiston temir yo‘lining So‘g‘d uchastkasini kesib o‘tish kodlari Navoiy KMKga zarur miqdorda milliy valyutaga sotilishini ta’minlasin.

10. Vazirlar Mahkamasining “O‘zbekiston Respublikasi hududida atrof tabiiy muhit ifloslantirilganligi va chiqindilar joylashtirilganligi uchun to‘lovlar tizimini takomillashtirish to‘g‘risida” 2003-yil 1-maydagi 199-sonli qarori bilan tasdiqlangan O‘zbekiston Respublikasi hududida atrof tabiiy muhit ifloslantirilganligi va chiqindilar joylashtirilganligi uchun kompensatsiya to‘lovlarini qo‘llash tartibi to‘g‘risidagi Nizomning 7-bandi quyidagi mazmundagi kichik band bilan to‘ldirilsin:

“j) mineral o‘g‘itlar va iqtisodiyot tarmoqlari uchun mahsulotlar ishlab chiqarish uchun xomashyo resurslari sifatida keyinchalik yana qayta ishlanadigan hamda maxsus jihozlangan saqlash joylari (uyumlar)da joylashtiriladigan fosforli o‘g‘itlar (fosfogips) ishlab chiqarish chiqindilari”.

11. O‘zbekiston Respublikasi Adliya vazirligi “O‘zkimyosanoat” DAK hamda Navoiy kon-metallurgiya kombinati bilan birgalikda ikki hafta muddatda amaldagi hukumat qarorlariga ushbu qarordan kelib chiqadigan o‘zgartish va qo‘shimchalar bo‘yicha takliflar kiritsin.

12. Mazkur qarorning ijrosini nazorat qilish O‘zbekiston Respublikasi Bosh vaziri Sh.M.Mirziyoyev zimmasiga yuklansin.