Fargʻona neftni qayta ishlash zavodining faoliyat koʻrsatib turgan ishlab chiqarish quvvatlarini ishga qoʻshishni taʼminlash, ichki bozorni neft mahsulotlari bilan toʻldirish va neft mahsulotlarini sotishda birja savdolarida raqobat muhitini yaratish maqsadida Vazirlar Mahkamasi qaror qiladi:

1. “Oʻzbekneftgaz” milliy xolding kompaniyasining “ZEROMAX LLC” (AQSH) kompaniyasi va Fargʻona neftni qayta ishlash zavodi oʻrtasida 2004-yilda va 2005-yilning birinchi choragida 400 ming tonna neftni ulushli xom ashyo tarzida qayta ishlash yuzasidan kontrakt tuzish toʻgʻrisidagi taklifiga rozilik berilsin.

“ZEROMAX LLC” (AQSH) kompaniyasi Fargʻona neftni qayta ishlash zavodiga 1 tonna neftni qayta ishlash boʻyicha koʻrsatiladigan xizmatlar uchun kamida 15 AQSH dollari miqdorida, lekin qaror topgan xarajatlardan kam boʻlmagan miqdorda haq toʻlashi maʼlumot uchun qabul qilinsin.

2. “Oʻzbekneftgaz” milliy xolding kompaniyasi (Azizov) “Oʻzdavneftgazinspeksiya”, “Oʻzstandart” agentligi va Oʻzbekiston Respublikasi Davlat bojxona qoʻmitasi bilan birgalikda:

ikki hafta muddatda “ZEROMAX LLC” AQSH kompaniyasi tomonidan keltiriladigan neftdan neft mahsulotlari ayrim turlari chiqishi normalarini tasdiqlasin;

qayta ishlanayotgan neftdan neft mahsulotlari chiqishi amaldagi koʻrsatkichlarining tasdiqlangan normalarga muvofiqligi ustidan qatiy nazoratni taʼminlasin.

3. Belgilab qoʻyilsinki, Fargʻona neftni qayta ishlash zavodida ulushli xom ashyo tarzida qayta ishlangan neftdan olingan avtomobil benzini va yoqilgʻi mazuti “ZEROMAX LLC” AQSH kompaniyasining “Oʻzgazoyl” (Oʻzbekiston) shuʼba korxonasi tomonidan sotib olinadi hamda tegishli soliqlar va majburiy toʻlovlar toʻliq hajmda toʻlangan holda respublika ichida qonun hujjatlarida belgilangan tartibda:

avtomobil benzini — ulgurji isteʼmolchilarga sisternalarda toʻgʻridan toʻgʻri yetkazib berilgan holda, shuningdek oʻzining yoki ijaraga olingan avtoyoqilgʻi quyish shaxobchalari orqali aholiga (belgilangan narxlarga rioya qilgan holda);

yoqilgi mazuti — “Oʻzbekiston respublika tovar-xom ashyo birjasi” AJ va “Toshkent tovar xomashyo birjasi” AJ orqali sotiladi.

4. Quyidagilar:

Fargʻona neftni qayta ishlash zavodi — ushbu qarorning 1-bandiga muvofiq ulushli xom ashyodan ishlab chiqarilgan tovarlar uchun aksiz soligʻi toʻlashdan;

“ZEROMAX LLC” (AQSH) kompaniyasining “Oʻzgazoyl” (Oʻzbekiston) shuʼba korxonasi — avtomobil benzini va yoqilgʻi mazuti uchun bojxona boji va aksiz soligʻi, shuningdek ushbu qarorning 3-bandiga muvofiq erkin muomalaga chiqarish rejimida bojxonada rasmiylashtirishda yoqilgʻi mazuti uchun qoʻshilgan qiymat soligʻi toʻlashdan ozod qilinsin.

5. Oʻzbekiston Respublikasi Tashqi iqtisodiy aloqalar agentligi Fargʻona neftni qayta ishlash zavodi va “ZEROMAX LLC” (AQSH) kompaniyasi oʻrtasidagi kontrakt boʻyicha ulushli xom ashyo tarzidagi neftni qayta ishlash jarayonining texnik-iqtisodiy asoslari belgilangan tartibda kelishib olinishini, shuningdek mazkur kontraktning roʻyxatdan oʻtkazilishini taʼminlasin.

6. Oʻzbekiston Respublikasi Davlat bojxona qoʻmitasi belgilangan tartibda:

Fargʻona neftni qayta ishlash zavodi va “ZEROMAX LLC” (AQSH) kompaniyasi oʻrtasida ulushli xom ashyo tarzidagi neftni qayta ishlash yuzasidan tuzilgan kontraktning hisobga qoʻyilishini;

respublikaga keltirilayotgan neft va uning tashqarisiga chiqarilayotgan neft mahsulotlarining toʻgʻri tashilishi ustidan tegishli nazoratni taʼminlasin.

7. Oʻzbekiston Respublikasi Davlat soliq qoʻmitasi Fargʻona neftni qayta ishlash zavodi va “ZEROMAX LLC” (AQSH) kompaniyasining “Oʻzgazoyl” (Oʻzbekiston) shuʼba korxonasi tomonidan ushbu qarorga muvofiq neft va neft mahsulotlari bilan operatsiyalarni amalga oshirishda qonun hujjatlariga rioya qilinishi ustidan nazoratni taʼminlasin.

8. “Oʻzdavneftgazinspeksiya” neftni qayta ishlashda hamda ushbu qarorga muvofiq neft mahsulotlarini sotishda qonun hujjatlarida belgilangan texnologik va boshqa normalarga rioya qilinishi ustidan nazoratni taʼminlasin.

9. “Oʻzbekiston temir yoʻllari” davlat-aksiyadorlik kompaniyasi “ZEROMAX LLC” (AQSH) kompaniyasining “ZEROMAX Logisitics I№c” shuʼba kompaniyasiga 2004-yilda va 2005-yilning birinchi choragida ulushli xom ashyo shartlarida Fargʻona neftni qayta ishlash zavodida qayta ishlash uchun Sariagach-Bekobod, Konibodom-Oxunboboyev yoʻnalishi boʻyicha 400 ming tonna neftni tashish uchun (YET MDH 201005 pozitsiyasi) Oʻzbekiston Respublikasi temir yoʻllari xalqaro yoʻllarda yuk tashish boʻyicha tarif siyosati stavkalariga 30 foiz miqdorida chegirma bersin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Oʻ.T. Sultonov zimmasiga yuklansin.