Oʻzbekiston Respublikasi Vazirlar Mahkamasining 2002-yil 5-iyuldagi 242-son qarori bilan tasdiqlangan Oilada tibbiy madaniyatni oshirish, ayollarning sogʻligini mustahkamlash, sogʻlom avlod tugʻilishi va uni tarbiyalashning ustuvor yoʻnalishlarini amalga oshirish chora-tadbirlarining maqsadli dasturi bajarilishini taʼminlash, shuningdek “Ona va bola skriningi” chaqaloqlar va homilador ayollardagi tugʻma va avloddan avlodga oʻtuvchi patologiyani erta aniqlash davlat tizimini yanada rivojlantirish va mustahkamlash maqsadida Vazirlar Mahkamasi qaror qiladi:

1. Oʻzbekiston Respublikasi Sogʻliqni saqlash vazirligi va “Sogʻlom avlod uchun” jamgʻarmasining “Pribori oy” firmasidan (Finlyandiya) skrining tadqiqotlari uchun diagnostika toʻplamlarini sotib olish toʻgʻrisidagi taklifiga rozilik berilsin.

2. Quyidagilar:

1998—2001-yillar davrida “Ona va bola skriningi” dasturi doirasida tashkil etilgan skrining markazlari “Wallas Oy” kompaniyasining (Finlyandiya) diagnostika apparatlari, tashkiliy texnika va kommunikatsiya vositalari bilan jihozlanganligi;

2004-yilda “Wallas Oy” kompaniyasining (Finlyandiya) rasmiy eksklyuziv vakili hisoblanadigan “Pribori oy” firmasi (Finlyandiya) bilan “Sogʻlom avlod uchun” jamgʻarmasi oʻrtasida skrining tadqiqotlari oʻtkazish uchun reaktivlar yetkazib berish yuzasidan kontrakt tuzilganligi;

“Pribori oy” firmasi bilan tuzilgan 1,1 mln. AQSH dollari summasi miqdoridagi kontraktni moliyalashtirish “Pribori oy” firmasi tomonidan 1 yil muddatga beriladigan foizsiz tovar krediti hisobiga amalga oshirilishi maʼlumot uchun qabul qilinsin.

3. Oʻzbekiston Respublikasi Tashqi iqtisodiy aloqalar agentligi yuqorida koʻrsatilgan kontraktni belgilangan tartibda ekspertizadan oʻtkazsin.

4. Oʻzbekiston Respublikasi Moliya vaziri “Sogʻlom avlod uchun” jamgʻarmasining koʻrsatib oʻtilgan tovar krediti boʻyicha “Pribori oy” firmasi oldidagi majburiyatlari yuzasidan kafolatni Oʻzbekiston Respublikasi Hukumati nomidan imzolashga vakil qilinsin.

5. Oʻzbekiston Respublikasi Adliya vazirligi Oʻzbekiston Respublikasi Hukumati kafolati boʻyicha belgilangan tartibda yuridik xulosa bersin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari S.T. Inomova zimmasiga yuklansin.