Respublika aholisi salomatligini muhofaza qilishni ta’minlash, iste’mol bozoriga sifatsiz, sertifikatlanmagan alkogolli mahsulotlar kirib kelishi va sotilishiga yo‘l qo‘ymaslik, savdo tashkilotlari tomonidan alkogolli mahsulotlarni chakana sotishning belgilangan talablariga so‘zsiz rioya qilinishi ustidan nazorat qilishni kuchaytirish maqsadida:

1. 2007-yil 1-maydan boshlab alkogolli mahsulotlar yuridik shaxslar tomonidan Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari huzuridagi maxsus komissiyalar tomonidan berilgan alkogolli mahsulotlar bilan chakana savdo qilish huquqini beruvchi ruxsat guvohnomalari asosida faqat nazorat-kassa mashinalari bilan jihozlangan ixtisoslashtirilgan do‘konlar, alohida savdo zallari (seksiyalar) orqali sotilishi tartibi belgilansin.

2. Quyidagilar:

Alkogolli mahsulotlar bilan chakana savdo qilish huquqini beradigan ruxsat guvohnomasini berish tartibi to‘g‘risidagi nizom 1-ilovaga muvofiq;

Alkogolli mahsulotlar bilan chakana savdo qilish qoidalari 2-ilovaga muvofiq tasdiqlansin.

3. Belgilansinki, mazkur qarorda tasdiqlangan alkogolli mahsulotlar bilan chakana savdo qilish qoidalari buzilganligi uchun yuridik shaxslarga alkogolli mahsulotlar bilan savdo qilish huquqidan marhum etilgan holda bazaviy hisoblash miqdorining 200 baravaridan 300 baravarigacha miqdorda jarima solinadi hamda aybdor xodimlar qonun hujjatlarida belgilangan javobgarlikka tortiladi.

O‘zbekiston Respublikasi Bosh prokuraturasi alkogolli mahsulotlarning chakana savdosi sohasida huquqbuzarlikka yo‘l qo‘ygan shaxslarni javobgarlikka tortish bo‘yicha qonun hujjatlarida belgilangan chora-tadbirlarga rioya qilish ustidan nazoratni kuchaytirsin.

4. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari huzuridagi alkogolli mahsulotlar bilan chakana savdo qilish huquqini beradigan ruxsat guvohnomasini berish bo‘yicha maxsus komissiyalar:

2007-yil 1-maygacha mazkur qarorda belgilangan talablarga va alkogolli mahsulotlar bilan chakana savdo qilish qoidalariga to‘liq javob beradigan yuridik shaxslarga faoliyatning ushbu turini amalga oshirishga ruxsat guvohnomalari berilishini ta’minlasinlar;

savdo qiluvchi korxonalar ushbu qaror bilan belgilangan alkogolli mahsulotlar bilan chakana savdo qilish qoidalariga so‘zsiz rioya qilishi ustidan qat’iy tizimli nazorat o‘rnatsinlar.

5. “Davlat belgisi” davlat-ishlab chiqarish birlashmasi 2007-yilning 15-apreligacha Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining talabnomalariga ko‘ra alkogolli mahsulotlar bilan chakana savdo qilishga belgilangan shakldagi ruxsat guvohnomalari tegishli darajada himoyalangan maxsus blankalarda zarur miqdorda tayyorlanishini ta’minlasin.

Alkogolli mahsulotlar bilan chakana savdo qilish huquqini beradigan ruxsat guvohnomalari qat’iy hisobot beriladigan blankalar deb belgilansin.

6. O‘zbekiston Respublikasi Adliya vazirligi manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan o‘zgartish va qo‘shimchalar to‘g‘risida Vazirlar Mahkamasiga takliflar kiritsin.

7. Mazkur qarorning ijrosini nazorat qilish O‘zbekiston Respublikasining Bosh vaziri Sh.M. Mirziyoyev zimmasiga yuklansin.

1. Mazkur Nizom alkogolli mahsulotlar bilan chakana savdo qilish huquqini beradigan ruxsat guvohnomasini berish tartibini belgilaydi.

2. Alkogolli mahsulotlarning chakana savdosi bilan faqat alkogolli mahsulotlar bilan chakana savdo qilish huquqini beradigan ruxsat guvohnomasini olgan yuridik shaxslar shug‘ullanishlari mumkin.

3. Ruxsat guvohnomasi berish (amal qilish muddatini 10 kun muddatgacha to‘xtatib qo‘yish, shuningdek amal qilishini to‘xtatish, bekor qilish tartib-qoidasi tashabbusi bilan chiqish) to‘g‘risidagi qaror Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari huzuridagi 1-ilovaga* muvofiq tarkibda tashkil etiladigan alkogolli mahsulotlar bilan chakana savdo qilish huquqini beradigan ruxsat guvohnomasini berish bo‘yicha maxsus komissiyalar (keyingi o‘rinlarda “Komissiya” deb yuritiladi) tomonidan qabul qilinadi.

Hujjatlarni qabul qilish, ular bo‘yicha Komissiyaning xulosalari va qarorlari loyihalarini tayyorlash uchun tumanlar (shaharlar) darajasida tuman (shahar) hokimliklari huzurida 2-ilovaga* muvofiq tarkibda alkogolli mahsulotlar bilan chakana savdo qilish huquqini beradigan ruxsat guvohnomasini olish uchun hujjatlarni ko‘rib chiqish bo‘yicha komissiyalar (keyingi o‘rinlarda “ishchi organ” deb yuritiladi) tashkil etiladi.

4. Alkogolli mahsulotlar bilan chakana savdo qilish huquqini beradigan ruxsat guvohnomasi (keyingi o‘rinlarda “ruxsat guvohnomasi” deb yuritiladi) har bir turg‘un chakana savdo shoxobchasiga 3 va 4-ilovalarga muvofiq sxema va shakl bo‘yicha arizada ko‘rsatilgan muddatga, biroq ikki yildan ortiq bo‘lmagan muddatga beriladi.

4¹. Mehmonxonalarga unga tegishli bo‘lgan va uning ichida joylashgan, turuvchilarga alkogol mahsulotlarini sotish bilan shug‘ullanadigan bir necha turg‘un chakana savdo shoxobchasi (bar, mini-bar, kafe, restoran) uchun bitta ruxsat guvohnomasi beriladi.

5. Alkogolli mahsulotlar bilan chakana savdo qilish huquqini beradigan ruxsat guvohnomasini olish uchun yuridik shaxslarga quyidagi talablar qo‘yiladi:

ruxsat guvohnomasini olish uchun ariza berilgan paytda shaharlarda — bazaviy hisoblash miqdorining kamida 100 baravari miqdorida va qishloq joylarda hamda chekka tog‘li tumanlarda bazaviy hisoblash miqdorining 50 baravari miqdorida shakllangan ustav fondi mavjud bo‘lishi;

shaharlarda — alohida kiriladigan va kamida 25 kvadrat metrli, qishloq joylarda kamida 15 kvadrat metrli savdo zali maydoni bo‘lgan (faqat alkogolli mahsulotlar bilan chakana savdo qilishga mo‘ljallangan), chekka tog‘li tumanlarda — alohida savdo seksiyasi bo‘lgan, alkogolli mahsulotlarni saqlash va sotishning sanitariya normalari va qoidalariga (shu jumladan nazorat-kassa mashinalarini va bank plastik kartochkalari orqali to‘lovlarni qabul qilish bo‘yicha hisob-kitob terminallarini qo‘llash shartlariga, moddiy boyliklar to‘liq darajada saqlanishi ta’minlanishiga) muvofiq bo‘lgan ombor binolari va asbob-uskunalari bo‘lgan o‘zining yoki ijaraga olingan turg‘un savdo shoxobchasi mavjudligi;

turg‘un savdo shoxobchasi ta’lim, sport va diniy muassasalardan radiusi kamida besh yuz metr masofada joylashganligi;

savdo shoxobchalari jamoat transporti to‘xtash joylarida, shu jumladan metropoliten bekatlarida, jamoat joylarida va dam olish joylarida, davolash-profilaktika va sport-sog‘lomlashtirish muassasalari hududida, ushbu muassasalar va ishlab chiqarish korxonalarining oshxonalarida, shuningdek aeroportlar, temir yo‘l vokzallari va avtostansiyalarga tutashib ketgan joylarda joylashmaganligi;

yuridik shaxs tomonidan alkogolli mahsulotlar bilan chakana savdo qilish uchun belgilangan tartibda ro‘yxatdan o‘tkazilgan maxsus foydalaniladigan, himoyalangan fiskal xotirali nazorat-kassa mashinasi va bank plastik kartochkalari orqali to‘lovlarni qabul qilish bo‘yicha hisob-kitob terminallari mavjudligi.

6. Ruxsat guvohnomasini olish uchun yuridik shaxslar turg‘un chakana savdo shoxobchasi joylashgan joy bo‘yicha Komissiyaning ishchi organiga quyidagilarni taqdim etadilar:

yuridik shaxsning nomi va tashkiliy-huquqiy shakli, u joylashgan joy (pochta manzili), bank muassasasi nomi va bankdagi hisob raqamining tartib raqami ko‘rsatilgan holda ruxsat guvohnomasi berilishi to‘g‘risida ariza;

yuridik shaxs davlat ro‘yxatidan o‘tkazilganligi to‘g‘risidagi guvohnomaning nusxasi;

shaharlarda — bazaviy hisoblash miqdorining kamida 100 baravari miqdorida va qishloq joylarda hamda chekka tog‘li tumanlarda — bazaviy hisoblash miqdorining 50 baravari miqdorida shakllantirilgan ustav fondi mavjudligini tasdiqlaydigan hujjatning nusxasi. Ustav fondi pul mablag‘larida shakllantirilgan taqdirda tasdiqlovchi hujjat xizmat ko‘rsatuvchi bank tomonidan beriladi. Ustav fondi boshqa mol-mulk bilan shakllantirilgan taqdirda yuridik shaxs ushbu mol-mulkka egalik huquqi, uning qiymati va u ustav fondiga qo‘shilganligi haqidagi tasdiqnomani taqdim etadi;

chakana savdo qilish huquqi uchun mahalliy yig‘im to‘langanligini tasdiqlaydigan bank hujjatining nusxasi.

Ishchi organ ruxsat guvohnomasini berish uchun boshqa vakolatli organlarda mavjud bo‘lgan zarur hujjatlar va axborotni belgilangan tartibda axborot sohasidagi hamkorlik vositasida, shu jumladan elektron ko‘rinishida mustaqil ravishda oladi, mazkur bandda nazarda tutilgan hujjatlar va axborot bundan mustasno.

7. Yuridik shaxsdan mazkur Nizomda nazarda tutilmagan hujjatlarni taqdim etish talab qilinishiga yo‘l qo‘yilmaydi.

8. Hujjatlar yuridik shaxs tomonidan ishchi organga bevosita yoxud olinganligi ma’lum qilingan holda pochta aloqasi vositasi orqali yetkazib beriladi.

Hujjatlar ishchi organning mas’ul shaxsi tomonidan ro‘yxat bo‘yicha qabul qilinadi, ularning nusxasi hujjatlar qabul qilingan sana to‘g‘risidagi belgi qo‘yilgan holda ariza beruvchiga topshiriladi (yuboriladi).

Qonun hujjatlarida belgilangan taqdim etilgan ma’lumotlarning ishonchliligi uchun yuridik shaxs — ariza beruvchi javob beradi.

9. Ishchi organ 5 ish kuni mobaynida taqdim etilgan hujjatlarni o‘rganadi va ularning ishonchliligini hamda alkogolli mahsulotlar bilan chakana savdo qilishning mazkur Nizom bilan belgilangan talablariga muvofiqligini aniqlaydi.

10. Ishchi organning barcha a’zolari bir ovozdan qaror qabul qilgan taqdirda Komissiyaga ruxsat guvohnomasi berish to‘g‘risidagi taklif kiritiladi.

Agar ishchi organ Komissiyaga ijobiy xulosa kiritgan taqdirda, xulosa bilan birgalikda alkogolli mahsulotlar sotish va naqd pul tushumini tijorat banklari kassalariga topshirishning prognoz hajmlari kiritiladi. Komissiya tomonidan ruxsat guvohnomasi berilgan taqdirda prognoz hajmlarga yilning har choragida ishchi organ tomonidan tuzatishlar kiritiladi.

Komissiya raisi va a’zolari mazkur Nizomning 5-bandida nazarda tutilgan talablarga mos kelmaydigan yuridik shaxslarga ruxsat guvohnomasi berilganligi uchun shaxsan javobgar bo‘ladilar.

11. Komissiya 10 ish kuni mobaynida ishchi organ tomonidan taqdim etilgan hujjatlarni o‘rganadi va komissiyaning barcha a’zolari bir ovozdan qaror qabul qilgan taqdirda ruxsat guvohnomasini berish to‘g‘risida qaror qabul qiladi.

Komissiya yuridik shaxsni tegishli qaror qabul qilingandan keyin 3 ish kuni mobaynida qabul qilingan qaror to‘g‘risida xabardor qiladi.

12. Ruxsat guvohnomasi Komissiya raisi tomonidan imzolanadi.

Ruxsat guvohnomasi blankalari qat’iy hisobot beriladigan hujjatlar hisoblanadi, hisobga olish seriyasiga, tartib raqamiga, himoyalanganlik darajasiga ega bo‘ladi.

Komissiya raisi ruxsat guvohnomasi blankalaridan maqsadli foydalanilishi, ularning saqlanishi va hisobga olinishi uchun shaxsan javob beradi.

Ruxsat guvohnomasi blankalari, shu jumladan alkogolli mahsulotlar bilan chakana savdo qilish uchun yuridik shaxslarga berilgan ruxsat guvohnomasi blankalari hisobi Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan berilgan ruxsatnomalarni ro‘yxatdan o‘tkazish daftarida yuritiladi.

13. Quyidagilar ruxsat guvohnomasi berishni rad etish uchun asos hisoblanadi:

ruxsat guvohnomasini berish uchun zarur hujjatlarning to‘liq hajmda taqdim etilmasligi;

buyurtmachining alkogolli mahsulotlar bilan chakana savdo qilish uchun mazkur Nizomning 5-bandida belgilangan talablarga muvofiq emasligi;

taqdim etilgan hujjatlarda ishonchsiz yoki buzilgan ma’lumotlar mavjudligi.

Boshqa asoslar bo‘yicha, shu jumladan maqsadga muvofiq emasligi sababi bilan ruxsat guvohnomasi berish rad etilishiga yo‘l qo‘yilmaydi.

Yuridik shaxs ruxsat guvohnomasi berish rad etilishi to‘g‘risidagi qaror ustidan qonun hujjatlarida belgilangan tartibda shikoyat qilish huquqiga egadir.

14. Rad etishning aniq sabablari ko‘rsatilgan ruxsat guvohnomasi berishni rad etish to‘g‘risidagi asosli qaror yuridik shaxsga komissiya raisining imzosi bilan yozma shaklda topshiriladi (yuboriladi). Ushbu qarorda shuningdek yuridik shaxs ko‘rsatilgan sabablarni bartaraf etib, hujjatlarni takroran ko‘rib chiqish uchun taqdim etishi uchun yetarli bo‘lgan muddat ko‘rsatiladi.

Ruxsat guvohnomasini berish to‘g‘risidagi arizani takroran ko‘rib chiqishda, mazkur guvohnomani berishni rad etish to‘g‘risidagi qarorda avval ko‘rsatilmagan yangi asoslar bo‘yicha ruxsat guvohnomasini berishni rad etishga yo‘l qo‘yilmaydi.

15. Yuridik shaxs qayta o‘zgartirilgan, uning nomi yoki joylashgan joyi (pochta manzili) o‘zgargan taqdirda yuridik shaxs yoki uning huquqiy vorisi qayta ro‘yxatdan o‘tkazilgandan keyin bir hafta muddatda ko‘rsatib o‘tilgan ma’lumotlarni tasdiqlaydigan hujjatlar ilova qilingan holda ishchi organga ruxsat guvohnomasini qayta rasmiylashtirish to‘g‘risida ariza berishi shart.

Yangidan vujudga kelgan yuridik shaxsni davlat ro‘yxatidan o‘tkazish sanasida ruxsat guvohnomasiga ega yuridik shaxslar qo‘shib yuborilgan taqdirda, ruxsat guvohnomasini ushbu bandning birinchi xatboshisida belgilangan tartibda qayta rasmiylashtirishga yo‘l qo‘yiladi.

Ruxsat guvohnomasidagi mavjud ma’lumotlar ushbu bandning birinchi va ikkinchi xatboshilarida nazarda tutilmagan hollarda o‘zgargan taqdirda, ruxsat guvohnomasi yuridik shaxsning tegishli hujjatlar ilova qilingan arizasi bo‘yicha qayta rasmiylashtiriladi.

Ushbu holatda ruxsat guvohnomasi qayta rasmiylashtirilgunga qadar yuridik shaxs ruxsat guvohnomasida ko‘rsatilgan faoliyatni oldin berilgan ruxsat guvohnomasi asosida amalga oshiradi.

16. Ruxsat guvohnomasini qayta rasmiylashtirishda berilgan ruxsatnomalarni ro‘yxatdan o‘tkazish daftariga tegishli o‘zgartirishlar kiritiladi. Ruxsat guvohnomasini qayta rasmiylashtirish ishchi organ tomonidan yuridik shaxsning tegishli hujjatlar ilova qilingan ruxsat guvohnomasini qayta rasmiylashtirish to‘g‘risidagi arizasi olingan kundan boshlab 5 ish kuni mobaynida amalga oshiriladi.

17. Ruxsat guvohnomasining amal qilish muddatini uzaytirish yuridik shaxsning arizasi bo‘yicha amalga oshiriladi.

Ruxsat guvohnomasining amal qilish muddatini uzaytirish to‘g‘risidagi ariza ishchi organga ruxsat guvohnomasining amal qilish muddati tamom bo‘lishidan kamida 15 kun oldin berilishi kerak.

Ruxsat guvohnomasining amal qilish muddatini uzaytirish yoki uzaytirishni rad etish to‘g‘risidagi qaror ruxsat guvohnomasini berish uchun nazarda tutilgan tartibda qabul qilinadi.

18. Amal qilish muddati tamom bo‘lmagan yo‘qotilgan yoki yaroqsiz holga kelib qolgan ruxsat guvohnomasi o‘rniga yuridik shaxsning arizasiga ko‘ra dublikat berilishi mumkin.

19. Davlat soliq xizmati organlarining taqdimnomasi bo‘yicha Komissiya alkogolli mahsulotlar bilan chakana savdo qilish qoidalari, shu jumladan naqd pul tushumini inkassatsiya qilish qoidalari buzilganligi aniqlangan taqdirda ruxsat guvohnomasining amal qilishini 10 kundan ortiq bo‘lmagan muddatga to‘xtab turish to‘g‘risida qaror qabul qilishi mumkin.

20. Ta’mirlash ishlari amalga oshirilishi, shuningdek shunga o‘xshash boshqa holatlar munosabati bilan faoliyat vaqtincha to‘xtatilgan taqdirda yuridik shaxs bu haqda Komissiyaga va davlat soliq xizmatining tegishli organiga yozma ravishda ma’lum qilishi shart.

21. Yuridik shaxs tomonidan alkogolli mahsulotlar bilan chakana savdo qilish qoidalari muntazam ravishda yoxud bir marta qo‘pol ravishda buzilgan taqdirda, shuningdek qonun hujjatlarida belgilangan boshqa holatlarda ruxsat guvohnomasining amal qilishi sud tartibida to‘xtatilishi mumkin.

22. Qalbaki hujjatlardan foydalanilgan holda ruxsat guvohnomasi olinishi holati tasdiqlangan taqdirda, shuningdek qonun hujjatlarida belgilangan boshqa holatlarda ruxsat guvohnomasining amal qilishi qonun hujjatlarida belgilangan tartibda bekor qilinishi mumkin.

23. Mazkur Nizomni buzishda aybdor bo‘lgan shaxslar qonun hujjatlarida belgilangan tartibda javob beradilar.

1. Ushbu Qoidalar alkogolli mahsulotlar bilan chakana savdo qilish tartibi va shartlarini belgilaydi.

Alkogolli mahsulotlar bilan chakana savdo qiladigan yuridik shaxslar mazkur Qoidalar bilan tartibga solinmaydigan masalalar yuzasidan boshqa normativ-huquqiy hujjatlar bilan belgilangan O‘zbekiston Respublikasida chakana savdo qilish qoidalariga amal qiladi.

2. Alkogolli mahsulotlarning chakana savdosi bilan faqat Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari huzuridagi Alkogolli mahsulotlar bilan chakana savdo qilish huquqini beradigan ruxsat guvohnomalarini berish bo‘yicha Maxsus komissiya (keyingi o‘rinlarda matnda “Komissiya” deb yuritiladi) tomonidan berilgan alkogolli mahsulotlar bilan chakana savdo qilish huquqini beradigan ruxsat guvohnomasini (keyingi o‘rinlarda matnda “ruxsat guvohnomasi” deb yuritiladi) olgan yuridik shaxslar shug‘ullanishi mumkin.

3. Alkogolli mahsulotlar bilan chakana savdo qiladigan yuridik shaxslardan qonun hujjatlarida belgilangan tartibda soliq undiriladi.

4. Alkogolli mahsulotlar bilan faqat shaharlarda — alohida kiriladigan va kamida 25 kvadrat metrli, qishloq joylarda kamida 15 kvadrat metrli savdo zali maydoni bo‘lgan (faqat alkogolli mahsulotlar bilan chakana savdo qilishga mo‘ljallangan), chekka tog‘li tumanlarda — alohida savdo seksiyasi bo‘lgan, alkogolli mahsulotlarni saqlash va sotishning sanitariya normalari va qoidalariga (shu jumladan nazorat-kassa mashinalarini va bank plastik kartochkalari orqali to‘lovlarni qabul qilish bo‘yicha hisob-kitob terminallarini qo‘llash shartlariga, moddiy boyliklar to‘liq darajada saqlanishi ta’minlanishiga) muvofiq bo‘lgan ombor binolari va asbob-uskunalari bo‘lgan turg‘un savdo shoxobchasida chakana savdo qilish mumkin.

Turg‘un savdo shoxobchasi:

ta’lim, sport va diniy muassasalardan radiusi kamida besh yuz metr masofada bo‘lishi;

jamoat transporti to‘xtash joylarida, shu jumladan metropoliten bekatlari yonida, jamoat joylarida va dam olish joylarida, davolash-profilaktika va sport-sog‘lomlashtirish muassasalari hududlarida, ushbu muassasalar va ishlab chiqarish korxonalarning oshxonalarida, shuningdek aeroportlar, temir yo‘l vokzallari va avtostansiyalarga tutashib ketgan hududlarda joylashmasligi kerak.

Alkogolli mahsulotlar sotiladigan joylarda uni yigirma yoshga to‘lmagan shaxslarga sotilishiga yo‘l qo‘yilmasligi, shuningdek alkogolli mahsulotlarning inson sog‘lig‘iga zararli ta’siri to‘g‘risida ogohlantiruvchi yozuvlar joylashtirilgan bo‘lishi shart.

5. Yuridik shaxslar alkogolli mahsulotlar bilan faqat ruxsat guvohnomasini berishda Komissiya tomonidan belgilangan vaqt mobaynida chakana savdo qiladilar.

6. Alkogolli mahsulotlar bilan chakana savdo qilish faqat yuridik shaxs tomonidan ushbu maqsadlar uchun himoyalangan fiskal xotirali maxsus nazorat-kassa mashinalaridan va bank plastik kartochkalari orqali to‘lovlarni qabul qilish bo‘yicha hisob-kitob terminallaridan foydalangan holda amalga oshiriladi.

7. Alkogolli mahsulotlar bilan chakana savdo qiladigan yuridik shaxslar tumanlar har chorakda (shaharlar) hokimliklari huzuridagi alkogolli mahsulotlar bilan chakana savdo qilish huquqini beradigan ruxsat guvohnomalari olish uchun hujjatlarni ko‘rib chiqish bo‘yicha komissiya tomonidan belgilangan alkogolli mahsulotlar sotish hamda naqd tushumni tijorat banklari kassalariga topshirishning prognoz hajmlarini bajarishi kerak.

8. Alkogolli mahsulotlar bilan chakana savdo qiladigan yuridik shaxslar alkogolli mahsulotlar va tovarlarning boshqa turlarini sotishdan tushadigan mablag‘lar bo‘yicha alohida hisob olib borishlari shart.

9. Sifatiga ko‘ra standartlarning majburiy talablariga va texnik shartlarga muvofiq bo‘lgan, belgilangan namunadagi aksiz markasi bilan markalangan alkogolli mahsulotlar sotilishi kerak.

10. Muvofiqlik sertifikati xaridorning birinchi talabi bo‘yicha sotuvchi tomonidan taqdim etilishi kerak.

11. Alkogolli mahsulotlarni, shu jumladan import alkogolli mahsulotlarni sotuvchi mahsulotlarning har bir nomi bo‘yicha tayyorlovchi yoki yetkazib beruvchining imzosi va muhri bilan tasdiqlangan hamda sertifikatning hisobga olish va ro‘yxatdan o‘tkazish raqamlari, amal qilish muddati va uni bergan organ ko‘rsatilgan holda mahsulotning har bir nomi bo‘yicha muvofiqlik sertifikati mavjudligi to‘g‘risidagi ma’lumotlar mavjud bo‘lgan tovar-transport hujjatlariga ega bo‘lishi kerak.

12. Alkogolli mahsulotlar mahsulotning tegishli turiga qo‘yiladigan normativ hujjatlar talablariga muvofiq holda saqlanishi kerak.

Og‘zi po‘stloq tiqin bilan mahkamlangan alkogolli mahsulot solingan shishalar tiqinning qurib qolmasligi va havo kirmasligi uchun omborxonalarda yotiq holatda, boshqacha tarzda tiqinlangan shishalar esa tik holatda saqlanadi.

13. Alkogolli ichimliklar savdo zaliga qo‘yilishidan oldin sotuvchi (xodim) tashqi belgilariga qarab ularning sifatini tekshirib ko‘rishi shart.

14. Xaridor tomonidan kamchiliklari bo‘lgan alkogolli mahsulotlar xarid qilingan taqdirda sotuvchi xaridor talabiga ko‘ra ularni zarur sifatga ega bo‘lgan tovarga almashtirib berishga yoki, agar mazkur kamchiliklar tovarning yaroqlilik muddati doirasida aniqlangan bo‘lsa, xaridor to‘lagan summani unga qaytarib berishga majburdir.

15. Alkogolli mahsulotlarni sotish taqiqlanadi:

savdo avtomatlari orqali;

bolalar o‘yinchoqlari, konfetlar yoki bolalar assortimentiga kiruvchi boshqa tovarlarni imitatsiya qiluvchi (shularga o‘xshatib ishlangan bo‘lsa);

savdo qilinayotgan joylarda yigirma yoshga to‘lmagan shaxslarga uni sotishga yo‘l qo‘yilmasligi, shuningdek alkogolli mahsulotlarning inson sog‘lig‘iga zararli ta’siri to‘g‘risidagi ogohlantiruvchi yozuvlar bo‘lmagan hollarda;

alkogolli mahsulotlarning tarasida alkogolli mahsulotlarni iste’mol qilish inson sog‘lig‘iga zararli ta’sir qilishi to‘g‘risida matn va (yoki) rasm shaklidagi tibbiy ogohlantirish mavjud bo‘lmagan hollarda.

yigirma yoshga to‘lmagan shaxslarga;

muvofiqlik sertifikatisiz;

yaroqlilik muddati o‘tib ketgan holda;

aksiz markalari bilan markalanmagan (pivodan tashqari) yoki qalbaki aksiz markalari bilan markalangan holda;

ishlab chiqargan korxonani aniqlash imkonini beradigan darajada aniq markalanmagan holda;

uni ishlab chiqarishga litsenziyasi bo‘lmagan mamlakatimiz ishlab chiqaruvchisi tomonidan ishlab chiqarilganda;

alkogolli mahsulotni yetkazib berish huquqiga ega bo‘lmagan yoki bojxona orqali tartibga solish, qoidalarni, savdo belgilaridan va firma nomlaridan foydalanish sohasidagi qonun hujjatlari bilan belgilangan qoidalarni, boshqa normativ-huquqiy hujjatlarni buzgan holda uni amalga oshirgan yetkazib beruvchidan sotib olinganda;

sanitariya normalariga va alkogolli mahsulotlarni saqlash va sotish qoidalariga muvofiq bo‘lmagan xona va joylarda;

ta’lim, sport va diniy muassasalardan radiusi kamida besh yuz metr masofada joylashgan savdo korxonalarida;

jamoat transporti to‘xtash joylarida, shu jumladan metropoliten bekatlari yonida, jamoat joylarida va dam olish joylarida, davolash-profilaktika va sport-sog‘lomlashtirish muassasalari hududlarida, ushbu muassasalar va ishlab chiqarish korxonalarning oshxonalarida, shuningdek aeroportlar, temir yo‘l vokzallari va avtostansiyalarga tutashib ketgan hududlarda joylashgan savdo korxonalarida;

etiketkalarsiz, iflos (ichki yoki tashqi tomoni), singan (og‘zi uchgan, yorilgan), tiqini shikastlangan, umumiy ko‘rinishi tiniq bo‘lmagan, chet narsalar aralashgan, cho‘kindili shishalarda (vinolar to‘plamidan tashqari) sotish taqiqlanadi.

alkogolli mahsulotlarga (pivodan tashqari) qonun hujjatlarida belgilangan eng kam chakana narxdan past narxlar bo‘yicha.

15¹. Alkogolli mahsulotlar bilan savdo qilayotgan sotuvchi yigirma yoshdan kichikroq ko‘ringan xaridordan uning yoshini tasdiqlovchi hujjatni ko‘rsatishni talab qilishi, hujjat mavjud bo‘lmagan taqdirda esa alkogolli mahsulot sotishni rad etishi shart.

16. Alkogolli mahsulotlar bilan chakana savdo qilishning belgilangan qoidalari buzilganligi uchun yuridik shaxslarga alkogolli mahsulotlar bilan savdo qilish huquqidan mahrum qilingan holda bazaviy hisoblash miqdorining ikki yuz baravaridan uch yuz baravarigacha miqdorda jarima solinadi, ushbu yuridik shaxslarning tegishli xodimlari esa belgilangan tartibda ma’muriy va jinoiy javobgarlikka tortiladilar.

Boshqa normativ-huquqiy hujjatlar bilan belgilangan savdo qilish qoidalari buzilishida aybdor bo‘lgan shaxslar qonun hujjatlarida belgilangan tartibda javob beradilar.

Belgilangan yaroqlilik muddati doirasida kamchiliklari bo‘lgan alkogolli ichimliklar sotish oqibatida iste’molchining hayoti va sog‘lig‘iga yetkazilgan zarar qonun hujjatlariga muvofiq qoplanishi kerak.