Oʻzbekiston Respublikasi Vazirlar Mahkamasining 2006-yil 12-apreldagi 64-sonli “Xususiy uy-joy mulkdorlarining shirkatlarini yanada rivojlantirish va turar-joylarga xizmatlar koʻrsatishning aniq bozorini shakllantirish chora-tadbirlari” toʻgʻrisidagi qaroriga muvofiq buyuraman:

1. Xususiy uy-joy mulkdorlarining shirkatlari va kommunal xizmatlar koʻrsatuvchilar oʻrtasida mulkning boʻlinish chegaralari hamda muhandislik kommunikatsiyalarini saqlash uchun javobgarlik toʻgʻrisidagi nizom ilovaga muvofiq tasdiqlansin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgach kuchga kiradi.

3. Mazkur buyruqning bajarilishini nazorat qilish Bosh direktorning oʻrinbosari O.Y. Axmedov zimmasiga yuklansin.

Ushbu Nizom Oʻzbekiston Respublikasi Vazirlar Mahkamasining 2006-yil 12-apreldagi “Xususiy uy-joy mulkdorlarining shirkatlarini yanada rivojlantirish va turar joylarga xizmatlar koʻrsatishning aniq bozorini shakllantirish chora-tadbirlari toʻgʻrisida”gi 64-son qaroriga (Oʻzbekiston Respublikasi qonun hujjatlari toʻplami, 2006-yil 15-son, 127-modda) asosan xususiy uy-joy mulkdorlarining shirkatlari va kommunal xizmatlar koʻrsatuvchilar (sovuq suv va issiq suv taʼminoti, suvoqova (kanalizatsiyalar), issiqlik (issiqlik taʼminoti), elektr taʼminoti va gaz taʼminoti xizmatlarini koʻrsatuvchi korxonalar) oʻrtasida mulkning boʻlinish chegaralari hamda muhandislik kommunikatsiyalarini saqlash uchun javobgarlikni tartibga soladi.

1. Koʻp kvartirali uylarda muhandislik tizimlarini (isteʼmolchilarga kommunal xizmatlar koʻrsatishdagi muhandislik tarmoqlari, qurilma va jihozlarini) saqlash uchun javobgarlik chegaralari biriktirilgan tarmoqlar orqali kommunal xizmatlarini koʻrsatuvchilar bilan xususiy uy-joy mulkdorlarining shirkatlari oʻrtasida mulkchilik yoki egalik huquqi asosida qonunchilikka muvofiq belgilanadi.

2. Kommunal xizmatlar koʻrsatuvchi (keyingi oʻrinlarda matnda yetkazib beruvchi deb yuritiladi) muhandislik tizimlariga, jumladan munitsipal mulk hisoblangan magistral tarmoqlariga, xoʻjalik yuritish yoki operativ boshqarish huquqi asosida egalik qiladi.

3. Joylashuvi boʻyicha uylarning tashqarisida yoki ichkarisida va bittadan ortiq xonadonga xizmat koʻrsatayotgan uylarning ichki muhandislik tarmoqlari va kommunikatsiyalari, mexanik, elektr, sanitar-texnik va boshqa jihoz va qurilmalariga (keyingi oʻrinlarda matnda uylarning umumiy muhandislik tizimlari deb yuritiladi) koʻp kvartirali uylardagi (turar va noturar) xonadon mulkdorlariga umumiy mulkchilik huquqi asosida tegishli.

4. Umumiy muhandislik tizimlarini saqlash ushbu mulkdan foydalanishga zarur boʻlgan sharoitlarni yaratish va uni saqlashga yoʻnaltirilgan boshqarish, texnik va sanitar holatini saqlash (xizmat qilish), taʼmirlash va boshqa faoliyatlarni oʻz ichiga oladi.

5. Etkazib beruvchi oʻzining xoʻjalik yuritish yoki operativ boshqaruvida boʻlgan muhandislik tizimlarining texnik holatini zarur darajada saqlanishi hamda koʻrsatilayotgan kommunal xizmatlarning belgilangan sifatini taʼminlash uchun masʼuldir.

Gaz taʼminoti boʻyicha yetkazib beruvchi koʻp kvartirali uylarda gaz tarmoqlari va gaz xoʻjaliklarining saqlanishi, ularning doimiy ravishda soz holatda boʻlishi va texnik jihatdan yuqori tayyorgarlikka ega boʻlishida masʼul, shuningdek gazdan foydalanishda xavfsizlikni taʼminlaydi.

6. Uylarning umumiy muhandislik tizimlarining texnik holati ustidan texnik nazorat yetkazib beruvchi tomonidan koʻzdan kechirish yoʻli bilan amalga oshiriladi.

7. Xususiy uy-joy mulkdorlari shirkatlari (keyingi oʻrinlarda matnda XUJMSh deb yuritiladi) xonadon egalari tomonidan uyning umumiy mulkini saqlab turish uchun toʻlanadigan majburiy toʻlovlar hisobidan, belgilangan qoidalar va XUJMSh aʼzolarining umumiy majlisi qarorlariga muvofiq uylarning umumiy muhandislik tizimlariga (gaz taʼminoti tarmoqlar tizimi bundan mustasno) sifatli xizmat koʻrsatilishini taʼminlash uchun masʼuldir.

8. Issiqlik va issiq suv taʼminoti maqsadlaridagi issiqlik energiyasi yetkazib beruvchisiga tegishli boʻlgan koʻp kvartirali uylardagi issiqlik tarmoqlari va issiqlik punktlarini (boshqaruv shoxobchalari) oʻz ichiga olgan markazlashgan issiqlik taʼminoti tizimi va markazlashgan issiqlik taʼminoti umumiy muhandislik tizimlari oʻrtasida muhandislik kommunikatsiyalarining boʻlinish chegaralari issiqlik punkti (boshqaruv shoxobchasi)dan soʻng issiqlik va issiq suv taʼminoti tizimlarining bosh zulfinlari hisoblanadi.

Issiqlik va issiq suv taʼminoti tizimlarining bosh zulfinlari umumiy uy tizimlarining bir qismidir.

9. Sovuq suv taʼminoti yetkazib beruvchisiga tegishli boʻlgan sovuq suv taʼminoti tizimi va sovuq suv taʼminoti tizimining umumiy muhandislik tizimlari oʻrtasidagi boʻlinish chegaralari kirish shoxobchasining chiqish zulfi va yongʻinga qarshi zulfinlari hisoblanadi. Chiqish va yongʻinga qarshi zulfinlar umumiy uy tizimlarining bir qismidir.

10. Kanalizatsiya oqovalarini qaytarish boʻyicha yetkazib beruvchiga tegishli boʻlgan suv qaytarish (kanalizatsiya) tizimi va umumiy muhandislik tizimlari oʻrtasidagi chegara umumiy muhandislik tizimidan uydan birinchi quduqqa chiqarish chiqishi hisoblanadi.

11. Elektr taʼminoti korxonasiga (elektr yetkazib beruvchi) tegishli boʻlgan elektr taʼminoti tizimi va elektr taʼminotining umumiy uy tizimi oʻrtasidagi boʻlinish chegarasi:

a) kabel kiritilgan holda, koʻp kvartirali uyning kirish-taqsimlash qurilmasiga kirayotgan toʻyintirayotgan kabel poynaklari;

b) havoli tarmoqlanish hollarida, bino yoki truba tirgagichida oʻrnatilgan birinchi ajratgichlar.

12. Ushbu Nizom Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi, Davlat arxitektura va qurilish qoʻmitasi, “Oʻzbekenergo” Davlat aksiyadorlik kompaniyasi, “Oʻztransgaz” aksiyadorlik kompaniyasi va Toshkent shahar uy-joy mulkdorlari shirkatlarining uyushmasi bilan kelishilgan.