Respublika chorvachiligi va parrandachiligini balanslangan yuqori sifatli omixta yem bilan taʼminlashni yaxshilash hamda ularni ishlab chiqarishni koʻpaytirish uchun qulay shart-sharoitlar yaratish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, “Oʻzdonmahsulot” aksiyadorlik kompaniyasi, Qishloq va suv xoʻjaligi vazirligi, Tashqi iqtisodiy faoliyat milliy bankining korxonalarning oʻz mablagʻlari va tijorat banklarining kreditlari hisobiga “Wynveen International” Niderlandiya kompaniyasining 2 komplekt omixta yem ishlab chiqarish uskunalarini xarid qilish va keyinchalik ularni “Toshkentdonmahsulotlari” (Toshkent shahri) aksiyadorlik jamiyatida hamda “Dunyo M” (Qashqadaryo viloyati) aksiyadorlik jamiyatida oʻrnatish;

“Oʻzdonmahsulot” aksiyadorlik kompaniyasining 1-ilovaga* muvofiq Qoraqalpogʻiston Respublikasi, Buxoro, Jizzax, Qashqadaryo, Navoiy, Namangan, Samarqand, Fargʻona, Toshkent viloyatlari va Toshkent shahridagi korxonalarning ishlab turgan omixta yem sexlarini 2007 — 2010-yillar davrida modernizatsiya qilish va texnik jihatdan qayta jihozlash toʻgʻrisidagi takliflari maʼqullansin.

2. “Oʻzdonmahsulot” aksiyadorlik kompaniyasi (Qudratov):

ikki hafta muddatda — “Oʻzsanoatmashimpeks” davlat-aksiyadorlik kompaniyasi bilan birgalikda 2 komplekt omixta yem ishlab chiqarish uskunalarini yetkazib berish yuzasidan belgilangan tartibda tegishli shartnomalar tuzilishini hamda ularning Oʻzbekiston Respublikasi Tashqi iqtisodiy aloqalar, investitsiyalar va savdo vazirligida ekspertizadan oʻtkazilishini taʼminlasin;

bir oy muddatda — 2 komplekt omixta yem ishlab chiqarish uskunalarini oʻrnatish boʻyicha loyiha-smeta hujjatlari ishlab chiqilishini hamda joriy yilning 1-iyuligacha ularni montaj qilish va sozlash ishlari tugallanishini taʼminlasin;

Oʻzbekiston Respublikasi Qishloq va suv xoʻjaligi vazirligi bilan birgalikda joriy yilning 10-martigacha 160 tonna hajmida makkajoʻxori hamda 2007-yil 1-iyulgacha 940 tonna hajmida arpa navli urugʻligi olib kelinishini tashkil etsin.

3. Qashqadaryo va Toshkent viloyatlari hokimliklari:

Oʻzbekiston Respublikasi “Yergeodezkadastr” davlat qoʻmitasi, Qishloq va suv xoʻjaligi vazirligi bilan birgalikda modernizatsiya qilinadigan ikkita zavodni zarur xomashyo bilan kafolatli taʼminlashni nazarda tutgan holda asosiy ekin maydonlarida arpa va makkajoʻxori yetishtirish uchun bir oy muddatda 2-ilovaga* muvofiq sugʻoriladigan yerlar ajratsinlar;

“Oʻzdonmahsulot” aksiyadorlik kompaniyasi hamda Oʻzbekiston Respublikasi Qishloq va suv xoʻjaligi vazirligi bilan birgalikda don mahsulotlari korxonalari bilan fermer xoʻjaliklari oʻrtasida makkajoʻxori va arpa doni xarid qilish yuzasidan joriy yilning 15-apreligacha fyuchers shartnomalari tuzilishini taʼminlasinlar.

4. “Oʻzdonmahsulot” aksiyadorlik kompaniyasi korxonalari:

Niderlandiyaning “Wynveen International” kompaniyasi bilan tuziladigan shartnoma doirasida olib kelinadigan omixta yem ishlab chiqarish uskunalariga;

2011-yil 1-yanvargacha — makkajoʻxori va arpa urugʻligi uchun, shuningdek “Oʻzdonmahsulot” aksiyadorlik kompaniyasining 3-ilovaga* muvofiq roʻyxat boʻyicha omixta yem sexlarini modernizatsiya qilish hamda texnik jihatdan qayta jihozlash uchun texnologiya asbob-uskunalari va ehtiyot qismlarga bojxona toʻlovlari (bojxonada rasmiylashtirish uchun yigʻimlar bundan mustasno) toʻlashdan ozod qilinsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.