Oʻzbekiston Respublikasining “Elektron toʻlovlar toʻgʻrisida”gi Qonuni va Oʻzbekiston Respublikasi Vazirlar Mahkamasining “Oʻzbekiston Respublikasi Vazirlar Mahkamasining “Naqd pul muomalasini mustahkamlash va tijorat banklarining masʼuliyatini oshirishga doir qoʻshimcha chora-tadbirlar toʻgʻrisida” 2001-yil 22-iyundagi 264-son qaroriga qoʻshimcha kiritish haqida” 2006-yil 7-fevraldagi 18-sonli qaroriga muvofiq Markaziy bank Boshqaruvi qaror qiladi:

1. Mijozlarga hisobvaraqlar ochish, ularning hisobvaraqlariga pul mablagʻlarini hisobga kiritish va hisobdan chiqarish, ish haqi va qonun hujjatlarida belgilab qoʻyilgan boshqa ehtiyojlar uchun naqd pul mablagʻlarini berishning oʻrnatilgan tartiblarini buzganliklari uchun tijorat banklariga jarima sanksiyalarini qoʻllash tartibi toʻgʻrisida nizomga (2001-yil 30-iyun, roʻyxat raqami 1044 — Meʼyoriy hujjatlar axborotnomasi, 2001-yil, 12-son) ilovaga muvofiq oʻzgartirishlar kiritilsin.

2. Ushbu qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiritilsin.

1. Nizomning 1-bandi quyidagi tahrirda bayon etilsin:

“1. Mazkur Nizom Oʻzbekiston Respublikasining “Elektron toʻlovlar toʻgʻrisida”gi Qonuni, Oʻzbekiston Respublikasi Vazirlar Mahkamasining “Naqd pul muomalasini mustahkamlash va tijorat banklarining masʼuliyatini oshirishga doir qoʻshimcha chora-tadbirlar toʻgʻrisida” 2001-yil 22-iyundagi 264-sonli hamda Oʻzbekiston Respublikasi Vazirlar Mahkamasining “Oʻzbekiston Respublikasi Vazirlar Mahkamasining “Naqd pul muomalasini mustahkamlash va tijorat banklarining masʼuliyatini oshirishga doir qoʻshimcha chora-tadbirlar toʻgʻrisida” 2001-yil 22-iyundagi 264-son qaroriga qoʻshimcha kiritish haqida” 2006-yil 7-fevraldagi 18-sonli qarorining ijrosini taʼminlash maqsadida ishlab chiqilgan”.

2. 6-band quyidagi tahrirda bayon etilsin:

“6. Qonunchilikda oʻrnatilgan mijozlar hisobvaraqlariga pullarni hisobga kiritish va hisobdan chiqarish tartibini buzganlik uchun, elektron toʻlovlarni amalga oshirishning va xato amalga oshirilgan elektron toʻlovlarni qaytarishning oʻrnatilgan muddatlarini buzishni istisno etgan holda, bank ustav kapitalining eng kam miqdorining 0,1 foizi miqdorida jarima toʻlaydi.

Elektron toʻlovlarni amalga oshirishning qonun hujjatlarida oʻrnatilgan muddatlari bank tomonidan buzilgan taqdirda, u mijozga kechiktirilgan har bir kun uchun kechiktirilgan elektron toʻlov summasining 0,1 foizi miqdorida, lekin kechiktirilgan elektron toʻlov summasining 10 foizidan koʻp boʻlmagan miqdorda penya toʻlashi shart.

Bankning aybi bilan elektron toʻlov notoʻgʻri amalga oshirilgan taqdirda, u mablagʻni xatolik aniqlangan kundan keyingi ish kunidan kechiktirmasdan oluvchining hisobvaragʻiga oʻtkazishi shart. Aks holda, mijoz bankdan mablagʻlarni qaytarishni, shuningdek, kechiktirilgan har bir kun uchun notoʻgʻri amalga oshirilgan elektron toʻlov summasining 0,1 foizi miqdorida, lekin notoʻgʻri amalga oshirilgan elektron toʻlov summaning 10 foizidan koʻp boʻlmagan miqdorda penya toʻlashni qonunda belgilangan tartibda talab qilish huquqiga ega”.