Oʻzbekiston Respublikasi Oliy Kengashi qaror qiladi.

1. “Doʻstlik” ordeni taʼsis etilsin.

2. “Doʻstlik” ordeni toʻgʻrisidagi Nizom tasdiqlansin (ilova qilinadi).

3. “Doʻstlik” ordenining tavsifi tasdiqlansin (ilova qilinadi).

1. “Doʻstlik” ordeni bilan Oʻzbekiston Respublikasining fuqarolari Oʻzbekistonda yashayotgan barcha millat va elatlarning vakillari oʻrtasida doʻstlik, oʻzaro hamjihatlik va totuvlikni mustahkamlash ishida erishgan katta yutuqlari, Oʻzbekiston xalqining boshqa mamlakatlar xalqlari bilan doʻstlik va har taraflama hamkorligini rivojlantirganliklari uchun mukofotlanadilar.

“Doʻstlik” ordeni bilan Oʻzbekiston Respublikasi fuqarosi boʻlmagan shaxslar ham mukofotlanishi mumkin.

2. “Doʻstlik” ordeni bilan Oʻzbekiston Respublikasi Prezidenti mukofotlaydi. Orden bilan mukofotlash toʻgʻrisidagi Farmon matbuotda va boshqa ommaviy axborot vositalarida eʼlon qilinadi.

Oʻzbekiston Respublikasi Prezidentini “Doʻstlik” ordeni bilan mukofotlash Oʻzbekiston Respublikasi Oliy Majlisi tomonidan amalga oshiriladi.

3. “Doʻstlik” ordeni bilan mukofotlash Oʻzbekiston Respublikasi Vazirlar Mahkamasi, Oʻzbekiston Respublikasi Konstitutsiyaviy sudining Raisi, Oʻzbekiston Respublikasi Oliy sudining Raisi, Oʻzbekiston Respublikasi Oliy xoʻjalik sudining Raisi, Oʻzbekiston Respublikasi Bosh prokurori, Qoraqalpogʻiston Respublikasi Joʻqorgʻi Kengesining Raisi, viloyatlar va Toshkent shahar hokimlari, vazirliklar, davlat qoʻmitalari va idoralar rahbarlarining hamda jamoat birlashmalari respublika organlarining taqdimnomasiga binoan amalga oshiriladi.

4. “Doʻstlik” ordenini va bu mukofotga oid tegishli hujjatni tantanali va keng oshkoralik vaziyatida Oʻzbekiston Respublikasi Prezidenti yoki uning nomidan Oʻzbekiston Respublikasi Oliy Majlisining Raisi, Oʻzbekiston Respublikasi Bosh vaziri topshiradi.

5. “Doʻstlik” ordeni bilan mukofotlangan shaxslar eng kam oylik ish haqining oʻttiz karrasi miqdorida bir yoʻla toʻlanadigan pul mukofoti oladilar.

“Doʻstlik” ordeni bilan mukofotlangan shaxslar qonun hujjatlarida belgilab qoʻyiladigan imtiyozlardan foydalanadilar.

6. “Doʻstlik” ordeni koʻkrakning chap tomoniga taqiladi.

7. “Doʻstlik” ordeni bilan vafotidan keyin mukofotlangan taqdirda orden, mukofotlash toʻgʻrisidagi hujjat va bir yoʻla toʻlanadigan pul mukofoti mukofotlanganning oilasiga topshiriladi.

“Doʻstlik” ordeni dastlab 0,5 mikron qalinlikda nikel, keyin esa 0,25 mikron qalinlikda tilla qoplangan mis qotishmasidan tayyorlanadi. Orden biroz boʻrtma, moviy emal bilan qoplangan sakkiz qirrali yulduz koʻrinishida boʻlib, uning burchaklari orasidan yoyma nurlar taralib turadi.

Sakkiz qirrali yulduzning va tillarang nurlarning qarama-qarshi joylashgan uchlari orasi 48 millimetrdir.

Ordenning markazida, diametri 14 millimetrli doira ichida qoʻl-qoʻlga berib turilgani doʻstlik ramzi sifatida tasvirlangan. Bu doira moviy fondagi oʻn ikkita besh qirrali yulduzlar jo boʻlgan, kengligi 5 millimetrli birinchi aylana bilan hamda yuqori qismiga yoqut rang emal bilan qoplangan “DOSTLIK” degan yozuv, pastki qismiga esa dafna barglari tushirilgan, kengligi 5 millimetrli ikkinchi aylana bilan hoshiyalangan.

Ordenning qalinligi 3 millimetr.

Ordenning orqa tomonida Oʻzbekiston Respublikasining Davlat gerbi tasvirlangan. Pastki qismida ordenning raqami 1 millimetr kattalikdagi botiq shrift bilan yozilgan.

Orden rangli yoʻl-yoʻl shoyi mato (lenta) sirilgan besh qirrali qadagʻich (kolodka)ga halqa va ilmoqcha yordamida ulanadi. Matoning eni 24 millimetr. Qizil, toʻqsariq, yashil, koʻk yoʻllarining eni 5 millimetrdan. Rangdor yoʻllar bir-biridan eni 1,3 millimetrli oq yoʻl bilan ajralib turadi.

Qadagʻichning boʻyi 48 millimetr, eni 45 millimetrdir.

Orden toʻgʻnogʻich bilan taqiladi.