Vazirlar Mahkamasining 1999-yil 7-dekabrdagi 520-sonli qarori bilan tasdiqlangan 2000—2005-yillarda yolg‘iz keksalar, pensioner va nogironlarni aniq ijtimoiy muhofaza qilishni kuchaytirish chora-tadbirlari dasturi doirasida jamiyatning ushbu muammoga e’tiborini oshirishga qaratilgan chora-tadbirlar ro‘yobga chiqarildi, yolg‘iz keksa fuqarolarni aniq ijtimoiy muhofaza qilish va qo‘llab-quvvatlash bo‘yicha tizimli ishlarni olib borishda davlat muassasalari bilan jamoat tashkilotlari o‘rtasida ijtimoiy sheriklik mustahkamlandi va kengaydi. 8 ming nafarga yaqin yolg‘iz pensioner va nogironlar yashab turgan 33 ta “Sahovat” va “Muruvvat” uylarining moddiy-texnika bazasi yaxshilandi.

“Homiylar va shifokorlar yili” Dasturini bajarish yuzasidan aholining ijtimoiy nochor, shu jumladan yolg‘iz keksa kishilarga yordam ko‘rsatish bo‘yicha ishlar olib borilmoqda. Xususan, 1,9 ming nafar yolg‘iz fuqarolarning uy va xonadonlari ta’mirdan chiqarildi, kam ta’minlangan oilalar va keksalarga 5 mlrd. so‘mlik moddiy yordam ko‘rsatildi. Umuman olganda yolg‘iz keksalar, pensionyerlar, nogironlarga, shuningdek ko‘p bolali oilalarga berilgan ijtimoiy yordam hajmi 47 mlrd. so‘mdan ko‘proqni tashkil etdi.

Yolg‘iz keksalar, pensioner va nogironlarni aniq ijtimoiy muhofaza qilishni yanada kuchaytirish, ularning turmush darajasini oshirish, ijtimoiy xizmat ko‘rsatish tizimini takomillashtirish va yangi ijtimoiy texnologiyalarni joriy etish asosida ularning ijtimoiy ta’minotga bo‘lgan ehtiyojlarini yana ham to‘liqroq qondirish maqsadida:

1. 2007—2010-yillarda yolg‘iz keksalar, pensioner va nogironlarni aniq ijtimoiy muhofaza qilish va ularga ijtimoiy xizmat ko‘rsatishni yanada kuchaytirish chora-tadbirlari dasturi ilovaga* muvofiq tasdiqlansin. Unda quyidagilar nazarda tutiladi:

yolg‘iz nogironlar va keksa fuqarolarga ijtimoiy xizmat ko‘rsatish tizimini yanada takomillashtirish;

yolg‘iz keksalar, pensioner va nogironlarni davolash-profilaktika xizmati bilan qamrab olishni kengaytirish, gerontologiya va geriatriya sohasida ko‘rsatilayotgan yordam sifatini, shuningdek uy-joy — maishiy sharoitlarini yaxshilash;

“Sahovat” va “Muruvvat” uylari, sanatoriylarning moddiy-texnika bazasini mustahkamlash;

ijtimoiy xizmat ko‘rsatishning yangi shakllari, usul va texnologiyalarini tatbiq etish.

2. Vazirliklar, idoralar, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari:

bir oy muddatda tasdiqlangan Dasturni amalga oshirishda mas’ul ijrochilar, fuqarolarning o‘zini-o‘zi boshqarish organlari, korxona va tashkilotlarning bahamjihat faoliyatini ta’minlash bo‘yicha aniq tadbirlar ishlab chiqilishini ta’minlasin;

Dasturning ijro etilishini va yolg‘iz keksalar, pensioner va nogironlarga ijtimoiy xizmat ko‘rsatish darajasini muntazam ravishda ko‘rib chiqqan holda uni yaxshilash bo‘yicha tegishli qo‘shimcha chora-tadbirlarni ishlab chiqsin. Har chorak yakunlari bo‘yicha hisobot choragidan keyingi oyning 10 kunigacha Dasturni amalga oshirish yakunlari va borishi to‘g‘risida Vazirlar Mahkamasiga tahliliy axborot berib borsin.

3. O‘zbekiston Respublikasi Iqtisodiyot vazirligi, Moliya vazirligi, Mehnat va aholini ijtimoiy muhofaza qilish vazirligi Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda har yili investitsiya dasturi va budjetni shakllantirishda, yolg‘iz fuqarolarga ijtimoiy xizmat ko‘rsatish tizimini rivojlantirishga, ijtimoiy ta’minot tizimidagi obyektlarni kapital ta’mirlash va rekonstruksiya qilish ishlarini amalga oshirishga, keksalar va nogironlarning uy-internatlarini jihozlashga, shuningdek Dasturga kiritilgan boshqa tadbirlarni amalga oshirishga mo‘ljallangan zarur kapital qo‘yilmalar limiti va mablag‘larni nazarda tutsin. Bunda mazkur maqsadlarga homiylar mablag‘larini keng jalb etish nazarda tutilsin.

4. O‘zbekiston Respublikasi Vazirlar Mahkamasi respublika va hududiy davlat boshqaruvi organlari hamda jamoat tashkilotlari darajasida ishlarning muvofiqlashtirilishini tashkil etsin, Dasturda nazarda tutilgan barcha tadbirlarning to‘liq va so‘zsiz bajarilishi bo‘yicha aniq chora-tadbirlar qabul qilsin.

5. Mazkur qarorning ijrosini nazorat qilish O‘zbekiston Respublikasi Bosh vazirining o‘rinbosarlari R.S. Azimov va R.S. Qosimov zimmalariga yuklansin.