Oʻzbekiston Respublikasi Prezidentining “Tadbirkorlik subyektlarini davlat roʻyxatiga olish va hisobga qoʻyishning xabardor qilish tartibini joriy etish toʻgʻrisida” 2006-yil 24-maydagi PQ-357-son qaroriga muvofiq Vazirlar Mahkamasi qaror qiladi:

Vazirlar Mahkamasining “Tadbirkorlik faoliyatini tashkil etish uchun roʻyxatdan oʻtkazish tartibotlari tizimini tubdan takomillashtirish toʻgʻrisida” 2003-yil 20-avgustdagi 357-son qaroriga (Oʻzbekiston Respublikasi QT, 2003-y., 8-son, 72-modda) ilovaga muvofiq oʻzgartirish va qoʻshimchalar kiritilsin.

1. 3-bandning ikkinchi xatboshi quyidagi tahrirda bayon qilinsin:

“tadbirkorlik faoliyati bilan shugʻullanishni moʻljallayotgan ariza beruvchining hujjatlarini qabul qilish hamda qonun hujjatlarida nazarda tutilgan hollarda hujjatlarni va zarur boʻlgan asoslarni ekspertizadan oʻtkazish”;

4-band quyidagi tahrirda bayon qilinsin:

“4. Belgilab qoʻyilsinki, ushbu qarorga muvofiq davlat roʻyxatidan oʻtkazilishi lozim boʻlgan tadbirkorlik subyektini ariza berilgan sanadan boshlab ruxsat beruvchi hujjatlarni bergan holda davlat roʻyxatidan oʻtkazishgacha boʻlgan muddat texnik shartlar va boshqa ruxsat beruvchi hujjatlarni rasmiylashtirishning murakkabligini va hajmini hisobga olib 7 ish kunidan bir oygacha belgilanadi”.

2. Tadbirkorlik subyektlarini davlat roʻyxatidan oʻtkazish, hisobga qoʻyish va ruxsat beruvchi hujjatlarni rasmiylashtirish tartibi toʻgʻrisidagi Nizomda:

a) 1-bandga quyidagi mazmundagi toʻrtinchi—yettinchi xatboshi qoʻshilsin:

“Mazkur Nizomning davlat roʻyxatidan oʻtkazish va hisobga qoʻyishga oid qismi:

davlat roʻyxatidan oʻtkazish toʻgʻrisidagi ariza bilan bir vaqtda tuman (shahar) hokimining yer uchastkasiga boʻlgan huquqni roʻyxatdan oʻtkazish va obyekt qurilishiga ruxsat beruvchi hujjatlarni rasmiylashtirish uchun yangi qurilishga yer uchastkasi ajratish toʻgʻrisidagi qarori nusxasini taqdim etgan tadbirkorlik subyektlariga;

davlat roʻyxatidan oʻtkazish toʻgʻrisidagi ariza bilan bir vaqtda tuman (shahar) hokimining gaz va elektr tarmoqlariga ulanish uchun texnik shartlar olish uchun yangi qurilishga yer uchastkasi ajratish toʻgʻrisidagi qarori nusxasini taqdim etgan tadbirkorlik subyektlariga;

davlat roʻyxatidan oʻtkazish toʻgʻrisidagi arizada faoliyatning asosiy turi sifatida faoliyatning litsenziyalanadigan turini koʻrsatgan tadbirkorlik subyektlariga tatbiq etiladi;

toʻrtinchi xatboshi sakkizinchi xatboshi hisoblansin;

b) 2-bandning ikkinchi xatboshi quyidagi tahrirda bayon qilinsin:

“auditorlik va sugʻurta tashkilotlari, birjalar, Oʻzbekiston Respublikasi Prezidenti va Hukumatining tegishli qarorlari bilan aksiyadorlik kompaniyalari (shu jumladan davlat-aksiyadorlik kompaniyalar va xoldinglar) shaklida tashkil etilayotgan xoʻjalik boshqaruvi organlari, shuningdek xorijiy investitsiyalar ishtirokidagi korxonalar va Toshkent shahrida tashkil etiladigan bozorlar va qonun hujjatlarida nazarda tutilgan hollarda boshqa tashkilotlar — Oʻzbekiston Respublikasi Adliya vazirligi tomonidan”;

v) 5-band quyidagi tahrirda bayon qilinsin:

“5. Tadbirkorlik subyekti davlat roʻyxatidan oʻtkazilganligi uchun davlat boji yoki roʻyxatdan oʻtkazish yigʻimi toʻlanadi.

Oʻzbekiston Respublikasi Adliya vazirligida, Qoraqalpogʻiston Respublikasi Adliya vazirligida va viloyatlar adliya boshqarmalarida davlat roʻyxatidan oʻtkazilganlik uchun:

xorijiy investitsiyalar ishtirokidagi korxonalar uchun — eng kam oylik ish haqining besh baravari, shuningdek 500 AQSh dollari;

sugʻurta va auditorlik tashkilotlari, birjalar, Oʻzbekiston Respublikasi Prezidenti va Hukumatining tegishli qarorlari bilan aksiyadorlik kompaniyalari (shu jumladan davlat-aksiyadorlik kompaniyalar va xoldinglar) shaklida tashkil etilayotgan xoʻjalik boshqaruvi organlari va bozorlar uchun — eng kam oylik ish haqining toʻrt baravari miqdorida davlat boji toʻlanadi.

Davlat bojining 20 foizi Sudlar va adliya organlarini rivojlantirish jamgʻarmasiga, qolgan summa tegishli ravishda respublika budjetiga, Qoraqalpogʻiston Respublikasi budjetiga va mahalliy budjetlarga oʻtkaziladi.

Tadbirkorlik subyektlari davlat roʻyxatidan oʻtkazilganligi uchun Inspeksiyalarda roʻyxatdan oʻtkazish yigʻimi undiriladi, ularning stavkalari Qoraqalpogʻiston Respublikasi, viloyatlar va Toshkent shahar davlat hokimiyati vakillik organlari tomonidan belgilanadi. Roʻyxatdan oʻtkazish yigʻimlarining cheklangan stavkalari har yili Oʻzbekiston Respublikasi Vazirlar Mahkamasining qarori bilan belgilanadi. Roʻyxatdan oʻtkazish yigʻimlaridan kelib tushgan mablagʻlar faqat roʻyxatdan oʻtkazuvchi organlarning moddiy-texnika bazasini mustahkamlash va xodimlarini ragʻbatlantirishga yoʻnaltiriladi.

Davlat roʻyxatidan oʻtkazilganlik uchun:

dehqon xoʻjaliklari, shuningdek davlat korxonalari negizida tashkil qilinadigan aksiyadorlik jamiyatlaridan roʻyxatdan oʻtkazish yigʻimi olinmaydi;

borish qiyin boʻlgan va togʻli tumanlarda tashkil etiladigan tadbirkorlik subyektlaridan roʻyxatdan oʻtkazish yigʻimi belggilangan stavkaning 20 foizi miqdorida olinadi;

borish qiyin boʻlgan va togʻli tumanlarda tashkil etiladigan savdo korxonalaridan roʻyxatdan oʻtkazish yigʻimi eng kam oylik ish haqining bir baravari miqdorida olinadi”;

g) 7-bandning toʻrtinchi xatboshi quyidagi tahrirda bayon qilinsin:

“Ruxsat beruvchi hujjatlarni rasmiylashtirish uchun Inspeksiyaga ilgari roʻyxatdan oʻtkazilgan (ruxsat beruvchi hujjatlarni rasmiylashtirgan holda yoki rasmiylashtirmasdan), xabardor qilish tartibida roʻyxatdan oʻtkazilgan, shuningdek Oʻzbekiston Respublikasi Adliya vazirligida, Qoraqalpogʻiston Respublikasi Adliya vazirligi, viloyatlar adliya boshqarmalarida, tumanlar (shaharlar) davlat soliq inspeksiyalarida roʻyxatdan oʻtkazilgan tadbirkorlik subyektlari ham murojaat qilishlari mumkin. Bunda roʻyxatdan oʻtkazish yigʻimi (davlat boji) undirilmaydi”.

d) 11-band quyidagi tahrirda bayon qilinsin:

“11. Tadbirkorlik subyektlarini yuridik shaxs sifatida roʻyxatdan oʻtkazish uchun roʻyxatdan oʻtkazuvchi organga (shaxsan kelib yoki pochta orqali) mazkur Nizomga 1-ilovaga muvofiq shakldagi ariza taqdim etiladi. Davlat roʻyxatidan oʻtkazish toʻgʻrisidagi arizaga:

davlat tilidagi taʼsis hujjatlarining belgilangan tartibda notarial tasdiqlangan ikki asl nusxasi, bunda davlat korxonalari negizida tashkil etilgan aksiyadorlik jamiyatlari uchun taʼsis hujjatlarining notarial tasdiqlangan boʻlishi talab etilmaydi (yuridik shaxsni davlat roʻyxatidan oʻtkazuvchi organga taqdim etiladigan taʼsis hujjatlari boʻlib ustav yoki taʼsis shartnomasi va ustav yoki faqat taʼsis shartnomasi, bunda masʼuliyati cheklangan hamda qoʻshimcha masʼuliyatli jamiyatlar uchun — taʼsis shartnomasi va ustav, toʻliq va kommandit shirkatlar uchun esa — faqat taʼsis shartnomasi, aksiyadorlik jamiyatlari, xususiy korxonalar, fermer xoʻjaliklari hamda yuridik shaxs boʻlgan dehqon xoʻjaliklari uchun — faqat ustav);

davlat bojining yoki roʻyxatdan oʻtkazish yigʻimining belgilangan miqdori toʻlanganligi haqidagi bank toʻlov hujjati (dehqon xoʻjaliklari, shuningdek davlat korxonalari negizida tashkil etiladigan aksiyadorlik jamiyatlaridan tashqari);

bir xil yoki adashtirish darajasida oʻxshash boʻlgan firma nomi mavjud emasligi haqidagi maʼlumotnomaning asl nusxasi;

uch nusxada muhr va shtamp eskizlari.”;

e) 12-band quyidagi tahrirda bayon qilinsin:

“12. Davlat roʻyxatidan oʻtkazish uchun mazkur Nizomning 11-bandida koʻrsatilgan hujjatlarga qoʻshimcha ravishda quyidagi hujjatlar taqdim etiladi:

a) bozorlar uchun — bozor tashkil qilishga yer uchastkasi ajratib berish toʻgʻrisidagi Qoraqalpogʻiston Respublikasi Vazirlar Kengashining, viloyatlar va Toshkent shahar hokimliklarining qarori hamda bozorning ustav fondiga taʼsis hujjatlarida koʻrsatilgan miqdorning kamida 30 foizi kiritilganligini tasdiqlovchi hujjat;

b) xorijiy investitsiyalar ishtirokidagi korxonalar va xorijiy sarmoya ishtirokidagi boshqa korxonalar uchun:

xorijiy muassis toʻgʻrisida yuridik shaxs roʻyxatdan oʻtkazilgan joydagi savdo reyestridan olingan, agar Oʻzbekiston Respublikasining xalqaro shartnomalarida boshqacha qoida nazarda tutilgan boʻlmasa, Oʻzbekiston Respublikasining konsullik muassasasi tomonidan belgilangan tartibda legalizatsiya qilingan, bular mavjud boʻlmagan taqdirda, muassis roʻyxatdan oʻtkazilgan davlat Tashqi ishlar vazirligida mazkur mamlakatning Oʻzbekiston Respublikasidagi konsullik muassasasida yoki diplomatik vakolatxonasida legalizatsiya qilinib, keyinchalik Oʻzbekiston Respublikasi Tashqi ishlar vazirligining Konsullik boshqarmasida tasdiqlangan koʻchirma taqdim etiladi. Xorijiy muassis toʻgʻrisida savdo reyestridan koʻchirmada xorijiy yuridik shaxsning nomi, uning joylashgan manzili, ustav fondi miqdori, tashkiliy-huquqiy shakli, roʻyxatdan oʻtkazilgan sanasi, faoliyat koʻrsatish muddati hamda xorijiy yuridik shaxs nomidan imzo qoʻyish huquqiga ega boʻlgan shaxs haqida maʼlumotlar koʻrsatilishi kerak. Ushbu koʻchirma berilgan paytdan boshlab 1 yil muddat ichida haqiqiy hisoblanadi. Jismoniy shaxs — norezident oʻz pasportining nusxasi taqdim etadi. Ushbu hujjatlar davlat tiliga tarjima qilingan, tarjima belgilangan tartibda notarial tasdiqlangan holda taqdim etilishi kerak. Agar xorijiy muassisning korxona (tashkilot) ustav fondiga ulushi intelektual mulk boʻlsa, u holda ariza beruvchi qonun hujjatlarida belgilangan tartibda baholovchi tomonidan tuzilgan baholash toʻgʻrisidagi hisobotni taqdim etishi kerak;

har bir taʼsischi tomonidan korxona ustav fondidagi oʻz ulushining 30 foizini kiritilganligini tasdiqlovchi hujjatlar (vaqtinchalik soʻmlardagi va valyutadagi jamlovchi hisob raqamlariga pul mablagʻlari kiritilganligi haqida bank maʼlumotnomasi, mol-mulkni Oʻzbekiston Respublikasi hududiga olib kirilganligini tasdiqlovchi bojxona hujjati, mol-mulkni topshirish-qabul qilish dalolatnomasi, kiritilayotgan mol-mulkka egalik huquqini tasdiqlovchi hujjat va boshqalar);

v) dehqon xoʻjaliklari (yuridik shaxslar) hamda fermer xoʻjaliklari uchun — tuman hokimining yer uchastkasi ajratib berish toʻgʻrisidagi qarori nusxasi;

g) yuridik shaxslarni qoʻshib yuborish, boʻlish, ajratib chiqarish yoki oʻzgartirish yoʻli bilan qayta tashkil etiladigan tadbirkorlik subyektlari uchun;

qayta tashkil qilinayotgan yuridik shaxsga maʼlum boʻlgan barcha kreditorlar yozma ravishda xabardor etilganligini va ommaviy axborot vositalarida qayta tashkil etish haqida axborot eʼlon qilinganligini tasdiqlovchi hujjat;

qayta tashkil etilayotgan yuridik shaxslarning ularning barcha kreditorlari va qarzdorlariga, shu jumladan tomonlar daʼvolashayotgan majburiyatlarga nisbatan barcha majburiyatlari boʻyicha huquqiy vorislik toʻgʻrisidagi qoidalar koʻrsatilgan topshirish dalolatnomasi (qoʻshib yuborishda va oʻzgartirishda) yoki boʻlish balansi (boʻlishda va ajratib chiqarishda);

qayta tashkil qilinayotgan yuridik shaxsning roʻyxatdan oʻtkazish toʻgʻrisidagi guvohnomasining asl nusxasi, muhri va shtampi (yuridik shaxsni qoʻshib yuborish, boʻlish va oʻzgartirish yoʻli bilan tashkil etilayotgan tadbirkorlik subyektini roʻyxatdan oʻtkazishda taqdim etiladi)”;

j) 13 va 14-bandlar oʻz kuchini yoʻqotgan deb hisoblansin;

z) 15-band quyidagi tahrirda bayon qilinsin:

“15. Bir xil yoki adashtirish darajasida oʻxshash boʻlgan firma nomi mavjud emasligi haqidagi maʼlumotnoma tadbirkorlik subyekti davlat roʻyxatidan oʻtkazilgunga qadar tumanlar (shaharlar) davlat statistika organlarida rasmiylashtiriladi.

Bir xil yoki adashtirish darajasida oʻxshash boʻlgan firma nomi mavjud emasligi haqida maʼlumotnoma olish uchun ariza beruvchi shaxsan oʻzi kelib, pochta aloqasi, elektron pochta aloqasi yoki faksimil aloqa orqali tuman (shahar) davlat statistika organiga soʻralayotgan firma nomi, shuningdek firma nomining 5 tagacha muqobil varianti koʻrsatilgan ariza bilan murojaat qiladi.

Tuman (shahar) davlat statistika organi arizani olganidan keyin Qoraqalpogʻiston Respublikasi, viloyatlar va Toshkent shahar davlat statistika organlariga elektron pochta aloqasi yoki faksimil aloqa orqali tegishli soʻrovnoma yuboradi.

Qoraqalpogʻiston Respublikasi, viloyatlar va Toshkent shahar davlat statistika organi, tuman (shahar) davlat statistika organining soʻrovnomasini olgach, Oʻzbekiston Respublikasi Davlat statistika qoʻmitasiga elektron pochta aloqasi yoki faksimil aloqa orqali tegishli soʻrovnoma yuboradi.

Oʻzbekiston Respublikasi Davlat statistika qoʻmitasining masʼul xodimi soʻralayotgan va qabul qilinishi mumkin boʻlgan firma nomini firma nomlarining markazlashtirilgan maʼlumotlar bazasiga tegishli yozuvni kiritish yoʻli bilan zaxiraga qoʻyish boʻyicha zarur harakatlarni amalga oshirishi shart.

Bir xil yoki adashtirish darajasida oʻxshash boʻlgan va roʻyxatdan oʻtkazilgan tegishli yuridik shaxs bilan roʻyxatdan oʻtkaziladigan yuridik shaxsni adashtirilishiga olib kelishi mumkin boʻlgan firma nomini zaxiraga qoʻyish mumkin emas.

Zaxiraga olingan firma nomi yoxud bir xil yoki adashtirish darajasida oʻxshash boʻlgan firma nomi mavjudligi haqida maʼlumot Oʻzbekiston Respublikasi Davlat statistika qoʻmitasining masʼul xodimi tomonidan Qoraqalpogʻiston Respublikasi, viloyatlar va Toshkent shahar statistika organlariga elektron pochta aloqasi yoki faksimil aloqa orqali yuboriladi.

Qoraqalpogʻiston Respublikasi, viloyatlar va Toshkent shahar davlat statistika organi olingan maʼlumotni uni soʻragan tuman (shahar) davlat statistika organiga elektron pochta aloqasi yoki faksimil aloqa orqali yuboradi.

Tuman (shahar) davlat statistika organi zaxiraga olingan firma nomini yoxud bir xil yoki adashtirish dajarasida oʻxshash boʻlgan firma nomi KTYADRda mavjud ekanligi haqidagi maʼlumotnomani olgach tegishli maʼlumotnomani rasmiylashtiradi va beradi.

Bir xil yoki adashtirish darajasida oʻxshash boʻlgan firma nomi mavjud ekanligi haqidagi maʼlumotnomani olgan ariza beruvchi, qaytadan ariza bilan boshqa firma nomlarini koʻrsatgan holda bir xil yoki adashtirish darajasida oʻxshash boʻlgan firma nomi mavjud emasligi haqida maʼlumotnoma berishni soʻrab murojaat qilishga haqli.

Arizani koʻrib chiqish va tegishli maʼlumotnomani berish muddati 2 ish kunini tashkil etadi.

Bir xil yoki adashtirish darajasida oʻxshash boʻlgan firma nomi mavjud ekanligi (mavjud emasligi) haqida maʼlumotnoma berganlik uchun toʻlov olinmaydi.

Bir xil yoki adashtirish darajasida oʻxshash boʻlgan firma nomi mavjud emasligi haqida maʼlumotnomaning amal qilish muddati 2 oy”;

i) 16-band quyidagi tahrirda bayon qilinsin:

“16. Yakka tadbirkorni davlat roʻyxatidan oʻtkazish uchun jismoniy shaxs tomonidan oʻz yashash joyidagi Inspeksiyaga kelgan holda yoki pochta aloqasi orqali mazkur Nizomga 1a-ilovada koʻrsatilgan shaklda davlat roʻyxatidan oʻtkazish toʻgʻrisida ariza taqdim etiladi.

Davlat roʻyxatidan oʻtkazish toʻgʻrisidagi arizaga quyidagilar ilova qilinadi: 3x4 sm oʻlchamdagi ikkita fotosurat; roʻyxatdan oʻtkazish yigʻimining belgilangan miqdori toʻlanganligi haqidagi bank toʻlov hujjati; uch nusxada muhr va shtamp eskizlari (yakka tadbirkor xohishiga koʻra); pasport nusxasi”;

k) 17-band quyidagi tahrirda bayon qilinsin:

“17. Yuridik shaxs boʻlmagan dehqon xoʻjaliklarini davlat roʻyxatidan oʻtkazish uchun Inspeksiyaga dehqon xoʻjaligi rahbari tomonidan shaxsan oʻzi kelib yoki pochta aloqasi orqali mazkur Nizomga 1a-ilovada koʻrsatilgan shaklda davlat roʻyxatidan oʻtkazish toʻgʻrisida ariza taqdim etiladi. Arizaga quyidagilar ilova qilinadi:

tuman hokimining yer uchastkasi ajratib berish toʻgʻrisidagi qarori;

muhr va shtamp eskizlari (arizachining xohishiga koʻra);

pasport nusxasi”;

l) 72-band quyidagi tahrirda bayon qilinsin:

“72. Tadbirkorlik subyektlari — yuridik shaxslarning taʼsis hujjatlariga oʻzgartirish va qoʻshimchalar kiritilgan taqdirda tadbirkorlik subyektining vakolatli boshqaruv organi tomonidan tegishli qaror qabul qilingan paytdan boshlab 7 ish kuni mobaynida ularni roʻyxatdan oʻtkazgan organga oʻzlari kelib yoki pochta aloqasi orqali quyidagi hujjatlarni taqdim etadilar:

ariza;

tadbirkorlik subyektining vakolatli boshqaruv organining taʼsis hujjatlariga oʻzgartirish va qoʻshimchalar kiritish toʻgʻrisidagi qarori;

oʻzgartirish va qoʻshimchalar matnining tadbirkorlik subyekti muhri bilan tasdiqlangan ikki nusxasi;

nomi oʻzgargan taqdirda — davlat roʻyxatidan oʻtkazilganlik haqidagi guvohnomaning asl nusxasi va yangi firma nomiga bir xil yoki adashtirish darajasida oʻxshash boʻlgan firma nomi mavjud emasligi haqidagi maʼlumotnoma, almashtiriladigan muhr va shtamp, shuningdek yangi muhr va shtampning uch nusxadagi eskizi;

davlat boji yoki roʻyxatdan oʻtkazish yigʻimining belgilangan miqdori toʻlanganligi haqida bank toʻlovi hujjati;

ustav fondining miqdori koʻpaytirilgan taqdirda — tadbirkorlik subyekti vakolatli organining taʼsis hujjatlarida eʼlon qilingan ustav fondi miqdorining shakllantirilganligi haqidagi hujjat, shuningdek masʼuliyati cheklangan hamda qoʻshimcha masʼuliyati cheklangan hamda qoʻshimcha masʼuliyatli jamiyatlar uchun-ishtirokchi hissasining toʻliq kiritilganligi haqida jamiyat tomonidan jamiyat ishtirokchisiga berilgan guvohnoma nusxasi hamda jamiyat ishtirokchilari tomonidan qoʻshimcha hissalar va uchinchi shaxslar tomonidan hissalar toʻliq miqdorda qoʻshilganligini tasdiqlovchi hujjatlar;

ustav fondi kamaytirilgan taqdirda — ularga maʼlum boʻlgan barcha kreditorlar ustav fondi miqdori kamaytirilishi va uning yangi miqdori haqida yozma ravishda xabardor etilganligini va ommaviy axborot vositalarida qabul qilingan qaror haqida axborot eʼlon qilinganligining tasdigʻi (ularga maʼlum barcha kreditorlar ustav fondi miqdori kamaytirilishi va uning yangi miqdori haqida yozma ravishda xabardor etilgan va ommaviy axborot vositalarida qabul qilingandan keyin bir hafta muddatda taqdim qilinadi);

tadbirkorlik subyekti ajratib chiqarish va qoʻshib olish shaklida qayta tashkil etilgan taqdirda — qayta tashkil etilayotgan yuridik shaxsga maʼlum boʻlgan barcha kreditorlar qayta tashkil qilish haqida yozma ravishda xabardor etilganligining va ommaviy axborot vositalarida axborot eʼlon qilinganligining tasdigʻi, qayta tashkil etilayotgan yuridik shaxslarning ularning barcha kreditorlar va qarzdorlariga, shu jumladan tomonlar daʼvolashayotgan majburiyatlarga nisbatan barcha majburiyatlari boʻyicha huquqiy vorislik toʻgʻrisidagi qoidalar koʻrsatilgan boʻlish balansi yoki topshirish dalolatnomasi, shuningdek davlat roʻyxatidan oʻtkazilganlik haqidagi guvohnomaning asl nusxasi, qoʻshib olinayotgan yuridik shaxsning muhr va shtampi.

Taʼsis hujjatlariga muassislar tarkibiga xorijiy shaxs kirishi bilan bogʻliq oʻzgartirish va qoʻshimchalar kiritishda roʻyxatdan oʻtkazgan organga ushbu Nizomning 12-bandi “b” kichik bandida koʻrsatilgan hujjatlar ham taqdim etiladi.

Tadbirkorlik subyektlarining taʼsis hujjatlariga oʻzgartirish va qoʻshimchalar davlat roʻyxatidan oʻtkazishni rad etish uchun quyidagilar asos boʻladi:

tegishli boʻlmagan roʻyxatga olish organiga murojaat qilish;

mazkur Nizomda koʻrsatilgan hujjatlarning toʻliq taqdim etilmaganligi;

taqdim etilgan hujjatlarning Oʻzbekiston Respublikasi qonunchiligi talablariga mos kelmasligi.

Taʼsis hujjatlariga tadbirkorlik subyektlarini tegishli organlarda hisobga qoʻyish bilan bogʻliq oʻzgartirish va qoʻshimchalar kiritish, bir xil yoki adashtirish darajasida oʻxshash boʻlgan firma nomi mavjud emasligi haqida maʼlumotnoma olish, yangi namunadagi muhr va shtamplarni tayyorlashga ruxsatnomalarni rasmiylashtirish mazkur Nizomda belgilangan tartibga muvofiq amalga oshiriladi”;

m) 73-band quyidagi tahrirda bayon qilinsin:

“73. Taʼsis hujjatlariga kiritilgan oʻzgartirish va qoʻshimchalar davlat roʻyxatidan oʻtkazilganligi uchun belgilangan davlat boji yoki roʻyxatdan oʻtkazish yigʻimining 50 foizi miqdorida toʻlov olinadi”;

n) 74-band quyidagi tahrirda bayon qilinsin:

“74. Tadbirkorlik subyektlari oʻz pochta manzili yoki yuridik manzili oʻzgargan taqdirda oʻn kun muddatda bu haqda roʻyxatdan oʻtkazuvchi organlarni yozma ravishda xabardor qilishlari shart. Bunda davlat boji yoki roʻyxatdan oʻtkazish yigʻimi olinmaydi. Roʻyxatdan oʻtkazuvchi organlar xabarnomani olgandan boshlab ikki kun muddatda ushbu oʻzgarish haqida davlat soliq xizmati va davlat statistika organlarini xabardor qiladi.

Korxonalar va tashkilotlarning yagona davlat reyestriga oʻzgartirish kiritishni taqazo etuvchi tadbirkorlik subyekti — yuridik shaxsning faoliyati turi va unda ishlovchilarning oʻrtacha yillik soni oʻzgarsa davlat statistika organlari tadbirkorlik subyektini jalb qilmagan holda qonunchilikka muvofiq holda taqdim qilinadigan yillik statistik hisobotlar asosida tegishli oʻzgartirishlar kiritadi va bu haqda roʻyxatdan oʻtkazuvchi organlar, davlat soliq xizmati organlari hamda tadbirkorlik subyektini xabardor qiladi”;

o) 75-band quyidagi tahrirda bayon qilinsin:

“75. Yakka tartibdagi tadbirkor unga berilgan davlat roʻyxatidan oʻtkazilganlik haqidagi guvohnomada koʻrsatilgan faoliyat joyi oʻzgargan taqdirda, oʻn kun muddatda bu haqda roʻyxatdan oʻtkazuvchi organlarni yozma ravishda xabardor qilishi shart. Roʻyxatdan oʻtkazuvchi organlar xabarnomani olgan paytdan boshlab ikki kun muddatda ushbu oʻzgarish haqida davlat soliq xizmati organlarini xabardor qiladi. Roʻyxatdan oʻtkazuvchi va davlat soliq xizmati organlari koʻrsatib oʻtilgan axborotni olganlaridan keyin uch kun muddatda yakka tartibdagi tadbirkorni roʻyxatdan oʻtkazish va hisobga qoʻyish hujjatlariga kiritilgan oʻzgartirishlar haqida yozma ravishda xabar berishlari shart”;

p) 76-band quyidagi tahrirda bayon qilinsin:

“76.Tadbirkorlik subyektining taʼsis hujjatlariga tadbirkorlik subyektini davlat roʻyxatidan oʻtkazgan organning oʻzgarishiga olib keluvchi oʻzgartirish va qoʻshimchalar kiritilganda roʻyxatdan oʻtkazuvchi organga mazkur Nizomda koʻrsatilgan hujjatlardan tashqari, roʻyxatdan oʻtkazgan organning reyestridan koʻchirma ham taqdim qilinadi.

Yuridik shaxslarning qoʻshib yuborilishi oqibatida roʻyxatdan oʻtkazuvchi organ oʻzgarsa, boshqa roʻyxatdan oʻtkazuvchi organning reyestridan koʻchirma boshqa roʻyxatdan oʻtkazuvchi organning davlat reyestrida turgan yuridik shaxs tomonidan taqdim qilinadi.

Yuridik shaxsning qoʻshib olinishi oqibatida roʻyxatdan oʻtkazuvchi organ oʻzgarsa, boshqa roʻyxatdan oʻtkazuvchi organning reyestridan koʻchirma boshqa roʻyxatdan oʻtkazuvchi organning davlat reyestrida turgan qoʻshib olinayotgan yuridik shaxs tomonidan taqdim qilinadi.

Yuridik shaxsning oʻzgartirilishi oqibatida roʻyxatdan oʻtkazuvchi organ oʻzgarsa, boshqa roʻyxatdan oʻtkazuvchi organning reyestridan koʻchirma boshqa roʻyxatdan oʻtkazuvchi organning davlat reyestrida oʻzgartirilayotgan yuridik shaxs tomonidan taqdim qilinadi.

Koʻchirma tadbirkorlik subyekti yuridik shaxslarning davlat reyestrida turgan roʻyxatdan oʻtkazuvchi organ tomonidan tadbirkorlik subyektining murojaati olingan paytdan boshlab bir kun mobaynida beriladi.

Bunday hollarda tadbirkorlik subyektiga ilgari u davlat roʻyxatidan oʻtkazilgan sana hamda roʻyxatdan oʻtkazgan organ haqidagi maʼlumot koʻrsatilgan davlat roʻyxatidan oʻtkazilganligi haqidagi guvohnoma beriladi.

Tegishli roʻyxatdan oʻtkazuvchi organ ikki kun mobaynida ushbu tadbirkorlik subyekti yuridik shaxslar davlat reyestrida turgan organga tadbirkorlik subyektini davlat roʻyxatidan oʻtkazganlik toʻgʻrisidagi guvohnomaning nusxasini yoki roʻyxatdan oʻtkazish hujjatlarini taqdim etish haqida soʻrovnoma yuboradi. Ushbu tadbirkorlik subyekti yuridik shaxslar oʻtkazilganligi haqidagi guvohnomaning nusxasi yoki tegishli soʻrovnomani olganidan keyin, uning roʻyxatdan oʻtkazish hujjatlarini tadbirkorlik subyektini yangi roʻyxatdan oʻtkazgan organga yuboradi va bu haqida davlat reyestriga tegishli yozuv kiritadi hamda soliq va statistika organlariga bu haqida maʼlum qiladi”.