“Oʻzbekiston Respublikasining davlat mustaqilligi asoslari toʻgʻrisida”gi Qonunga muvofiq va Oʻzbekiston SSR Prezidentining Oʻzbekiston SSR Ichki ishlar vazirligini jumhuriyat huquqiy tasarrufiga oʻtkazish haqida 1991-yil 25-avgustdagi Farmonini bajarish yuzasidan Vazirlar Mahkamasi qaror qiladi:

1. Oʻzbekiston SSR ittifoq — respublika Ichki ishlar vazirligi Oʻzbekiston Respublikasi Ichki ishlar vazirligiga aylantirilsin.

2. Oʻzbekiston Respublikasi Ichki ishlar vazirligi haqidagi Nizom va uning markaziy apparati strukturasi amaldagi xodimlar soni va 1991-yil uchun ajratilgan mablagʻlar doirasida 1, 2-ilovalarga muvofiq tasdiqlansin.

3. Oʻzbekiston Respublikasi Ichki ishlar vazirligi Moliya vazirligi, Iqtisodiyot qoʻmitasi bilan birgalikda bir oy muddat ichida respublika ichki ishlar organlarining strukturasini qayta tuzish, 1992-yilda moliyaviy va moddiy-texnik taʼminlash yuzasidan takliflar ishlab chiqsin va Vazirlar Mahkamasiga kiritsin.

1. Oʻzbekiston Respublikasi Ichki ishlar vazirligi* Respublika Konstitutsiyasi va Respublika suvereniteti haqidagi Deklaratsiyaga muvofiq Oʻzbekiston Respublikasining davlat boshqaruv organi hisoblanadi.

Vazirlik oʻz huquqi doirasida fuqarolarning huquqlari va qonuniy manfaatlarini, jamoat tartibini, jamoat xavfsizligini muhofaza qilishni va jinoyatchilikka qarshi kurashni taʼminlaydi.

2. Vazirlik oʻz faoliyatida Oʻzbekiston Respublikasi Prezidentiga va Hukumatiga boʻysunadi.

3. Vazirlik Oʻzbekiston Respublikasi Prezidenti tomonidan tuziladi va tugatiladi, soʻngra Oʻzbekiston Respublikasi Oliy Kengashi tomonidan tasdiqlanadi hamda Oʻzbekiston Respublikasi Prezidenti, Oliy Kengashi va Vazirlar Mahkamasi oldida oʻz zimmasidagi vazifalarning hal etilishi uchun javob beradi.

Vazirlik oʻz faoliyatida siyosiy partiyalar, jamoat tashkilotlari va harakatlaridan mustaqildir.

4. Oʻzbekiston Respublikasi Ichki ishlar vazirligining asosiy vazifalari quyidagilardan iboratdir:

respublika ichki ishlar organlari ishining strategik yoʻnalishlarini belgilash**;

ichki ishlar organlari faoliyatiga umumiy rahbarlik qilish, uni muvofiqlashtirish, ularga tashkiliy-metodik yordam berish va ular faoliyatining samaradorligini taʼminlash;

ichki ishlar organlari, ichki ishlar vazirligi korxonalari, muassasalari va tashkilotlari tizimining faoliyatida qonuniylikni, fuqarolarning huquqlari, erkinliklari va qonuniy manfaatlarini taʼminlash;

ichki qoʻshinlarning jangovar va safarbarlik tayyorgarligini taʼminlash;

jamoat xavfsizligini taʼminlash va jamoat tartibini saqlash, jinoyatchilikka qarshi kurash ishlarini tashkil etish;

fan va texnika yutuqlarini, ijobiy tajribani, boshqaruvning progressiv shakllari va ish usullarini joriy etish;

ichki ishlar organlari faoliyatining huquqiy asoslarini ishlab chiqish;

ichki ishlar organlarida kadrlar bilan ishlashning yuqori saviyada boʻlishini taʼminlash;

ichki ishlar organlari xodimlarini ijtimoiy kafolatlashni taʼminlash;

uyushgan jinoyatchilik va poraxoʻrlikka qarshi kurash ishlarini taʼminlash.

5. Vazirlik rahbarlikni Qoraqalpogʻiston Respublikasi Ichki ishlar vazirligi, xalq deputatlari viloyat va Toshkent shahar Kengashlari ijroiya qoʻmitalari ichki ishlar boshqarmalari, Oʻrta Osiyo transport ichki ishlar boshqarmasi bilan bevosita amalga oshiradi, ular bilan oʻzaro hamkorlikda respublika ichki ishlar organlari faoliyatining asosiy yoʻnalishlariga oid ishlarni olib boradi.

6. Vazirlik oʻz vazifalari va funksiyalarini amalga oshirishda quyidagi prinsiplarga amal qiladi:

— kollegiallikni yakkaboshchilik bilan uygʻunlashtirish;

— qonunchilik, shaxsni hurmat qilish, baynalmilalchilik;

— oshkoralik;

— davlat organlari, jamoatchilik birlashmalari, mehnat jamoalari va aholi bilan birgalikda ish olib borish, jamoatchilik fikrini hisobga olish;

— ichki ishlar organlari xodimlarining milliy mansublik, til, oʻtroqlik belgilari boʻyicha huquqlarini cheklashga yoʻl qoʻymaslik.

7. Vazirlik SSR Ittifoqi va respublikalarning, chet davlatlarning ichki ishlar organlari, davlat va jamoatchilik institutlari hamda xalqaro tashkilotlar bilan ikki tomonlama va koʻp tomonlama bitimlar asosida professional aloqalar bogʻlaydi.

8. Vazirlik faoliyatining huquqiy asoslarini quyidagilar tashkil etadi:

— Oʻzbekiston Respublikasining Konstitutsiyasi;

— Oʻzbekiston Respublikasining qonunlari;

— Oʻzbekiston Respublikasi Prezidentining farmonlari;

— Oʻzbekiston Respublikasi Prezidenti huzuridagi Vazirlar Mahkamasining normativ aktlari;

— Davlat hokimiyati va boshqaruvining markaziy va respublika organlari bilan ichki ishlar organlarining faoliyati sohasidagi oʻzaro hamkorlik haqidagi bitimlar;

— Oʻzbekiston Respublikasi Ichki ishlar vazirligining idoraviy normativ aktlari.

Vazirlik xodimlari Oʻzbekiston Respublikasi hududidan tashqarida xizmat vazifalarini bajarayotganda oʻz huquqi doirasida harakat qiladilar va tegishli ittifoqdosh respublika qonunchiligiga muvofiq javobgardirlar.

9. Vazirlik oʻz huquqi doirasida koʻrsatilgan huquqiy aktlar asosida va ularni bajarish uchun buyruqlar, koʻrsatmalar, yoʻriqnomalar chiqaradi va qoidalar oʻrnatadi.

Vazirlikning oʻz qaramogʻiga kiritilgan masalalar boʻyicha normativ aktlari Oʻzbekiston Respublikasi hududida joylashgan ichki ishlar organlari va ichki qoʻshinlar tomonidan bajarilishi majburiydir.

Zarur hollarda Oʻzbekiston Respublikasi Ichki ishlar vazirligi boshqa vazirliklar va idoralar bilan birgalikda normativ aktlar chiqaradi.

10. Oʻzbekiston Respublikasi Ichki ishlar vazirligi va SSSR Ichki ishlar vazirligining oʻzaro munosabatlari respublika Hukumati va SSSR Ichki ishlar vazirligi oʻrtasida tuzilgan bitimlar asosida oʻrnatiladi.

11. Kundalik aloqalarni taʼminlash maqsadida Oʻzbekiston Respublikasi Ichki ishlar vazirligi huzuridagi SSSR Ichki ishlar vazirligining vakolatxonasi, shuningdek, SSSR Ichki ishlar vazirligi huzurida Oʻzbekiston Respublikasi Ichki ishlar vazirligining vakolatxonasi tuzilishi mumkin.

Vakolatxonalarni tuzish va uning faoliyat koʻrsatish tartibi Oʻzbekiston Respublikasi Hukumati va Oʻzbekiston Respublikasi Ichki ishlar vazirligi bilan kelishilgan holda SSSR Ichki ishlar vazirligi tomonidan belgilanadi.

12. SSSR Ichki ishlar vazirligi va Oʻzbekiston Respublikasi Ichki ishlar vazirligi oʻrtasidagi kelishmovchiliklar oʻzaro kelishuv yoʻli bilan hal etiladi.

13. Oʻzbekiston Respublikasi Ichki ishlar vazirligi davlat organlarini, jamoat birlashmalarini, mehnat jamoalarini, aholini va ommaviy axborot vositalarini respublikadagi huquq-tartibotning ahvolidan hamda ichki ishlar organlarining uni mustahkamlashga, shuningdek, vazirlik zimmasiga yuklatilgan vazifalarni bajarishga oid faoliyatidan xabardor qilib turadi.

Oʻzbekiston Respublikasi Ichki ishlar vazirligi davlat organlaridan, jamoat tashkilotlaridan, mansabdor shaxslar va fuqarolardan vazirlik vazifalarini bajarish uchun zarur boʻlgan axborotlarni talab qilib olishga haqlidir.

Vazirlik oʻz faoliyatini boshqa respublika huquqni muhofaza qilish organlari bilan oʻzaro hamkorlik qilish va muvofiqlashtirish asosida amalga oshiradi.

14. Vazirlik oʻz zimmasiga yuklatilgan vazifalarga muvofiq:

ichki ishlar organlarining jinoyatchilikka qarshi kurash, jamoat tartibini saqlash, huquqbuzarlikning oldini olish, kadrlar bilan ishlash va qonuniylikni mustahkamlash borasidagi ishlariga umumiy rahbarlik qiladi va bu ishlarni muvofiqlashtiradi, metodik jihatdan taʼminlaydi;

jinoyatchilikka qarshi kurash, jamoat tartibini saqlash va jamoat xavfsizligini taʼminlash respublika dasturini tayyorlaydi va amalga oshiradi, mazkur yoʻnalishlar boʻyicha umumittifoq dasturini ishlab chiqish va amalga oshirishda ishtirok etadi;

huquq-tartibot masalalari yuzasidan respublika qonunchiligini ishlab chiqishda takliflar kiritadi va qatnashadi;

oʻz huquqi doirasida ichki ishlar organlari faoliyatini huquqiy jihatdan taʼminlaydi;

jinoyatchilikka qarshi kurash va jamoat tartibini saqlash boʻyicha respublika tadbirlarini oʻtkazishni kuchlar va vositalar bilan boshqaradi;

ichki ishlar organlarida rejalashtirish, nazorat qilish va axborot-analitik faoliyatning yagona tizimini belgilaydi, tashkil etadi va taʼminlaydi;

respublika maʼlumotnoma-axborot fondlarini, operativ-qidiruv va kadrlarni hisobga olishni shakllantiradi, respublika kriminalistik hisobot-axborot tizimini tuzadi, ichki ishlar organlari faoliyati masalalari yuzasidan davlat statistika hisobotini olib boradi;

Oʻzbekiston Respublikasi hududida joylashgan transport ichki ishlar organlariga, ichki ishlar organlari oʻquv yurtlariga rahbarlikni amalga oshiradi;

jinoyatlar hamda jamiyatga qarshi boshqa xatti-harakatlarning oʻz vaqtida oldini olish tadbirlarini ishlab chiqadi va amalga oshiradi, vazirlik, idoralar, muassasalar va tashkilotlarga jinoyatchilikni keltirib chiqaruvchi va boshqa huquq-tartibotni buzish hollarining sabablarini hamda ana shu xatti-harakatlarni sodir qilishga sabab boʻluvchi shart-sharoitlarni bartaraf etish yuzasidan takliflar kiritadi;

fuqarolar, davlat, jamoat, kollektiv, qoʻshma, kooperativ hamda boshqa korxonalar, tashkilotlar va muassasalarning iqtisodiy manfaatlarini gʻarazli jinoiy xurujlardan himoya qilishni hamda ular tufayli yetkazilgan zararning oʻrni qoplanishini, jinoiy jazo beriladigan chayqovchilikka, poraxoʻrlikka, soxta pul yasashga va valyuta operatsiyalari qoidalarining buzilishiga qarshi kurashni taʼminlaydi;

operativ-qidiruv ishlarini tashkil etadi va amalga oshiradi;

qonunchilik tomonidan ichki ishlar organlari zimmasiga yuklatilgan jinoyatlar haqidagi dastlabki soʻroq va tergovni taʼminlaydi;

tergov va suddan yashirinib yurgan ayblanuvchi, hukmni ijro etish va jazoni oʻtashdan boʻyin tovlab yurgan jazoga tortilgan shaxslarni, bedarak yoʻqolgan va qonunda nazarda tutilgan hollarda boshqa shaxslarni qidirish ishlarini tashkil etadi;

Oʻzbekiston Respublikasi hududida SSSR Ichki ishlar vazirligi va respublika ichki ishlar organlari tashabbusi bilan butunittifoq boʻyicha qidiruv eʼlon qilingan jinoyatchilarni va boshqa shaxslarni qidirishda ishtirok etadi;

SSSR Ichki ishlar vazirligining harbiy va maxsus temir yoʻl yuk tashishlarini, hukm qilinganlarni havo, temir yoʻl tarmoqlari orqali tashishda soqchilik qilishni va etapdan etapga yetkazishni tashkil etishni amalga oshiradi.

boshqa davlat va jamoat tashkilotlari bilan birgalikda bolalarning nazoratsiz qolishining oldini olish hamda balogʻatga yetmaganlar tomonidan huquq buzishlarga qarshi kurash ishlarini olib boradi;

sudlarning ajrimlari, prokurorlarning qarorlari va tergovchilar va dastlabki tergovni olib borgan shaxslarning prokuror tomonidan qamoqqa olish xulosasi toʻgʻrisida sanksiya berilgan qarorlarining, shuningdek, qonunchilik tomonidan ichki ishlar organlari zimmasiga ijro etish yuklatilgan majbur etishning boshqa choralarini qoʻllanishi haqidagi boshqa qarorlarning ijrosini taʼminlaydi;

hibsga olinganlar va ushlanganlarni qoʻriqlab va kuzatib borishni tashkil etishni taʼminlaydi;

ozodlikdan mahrum etishga, surgun, badargʻa qilishga hamda qonunchilik tomonidan ichki ishlar organlarining zimmasiga ijro etish yuklatilgan jazoning boshqa turlari boʻyicha hukm qilingan shaxslarga nisbatan sud hukmlarining ijro etilishini tashkil etishni taʼminlaydi;

jazoga hukm etilganlar axloqini tuzatish va ularni qayta tarbiyalash ishlarini belgilangan tartibda tashkil etadi, qonun tomonidan belgilangan jazoni oʻtash rejimiga qatʼiy rioya qilinishini, jazoga hukm etilganlarni ijtimoiy foydali mehnatga jalb etish, ular bilan siyosiy-tarbiyaviy ishlar olib borishni tashkil etadi, manfaatdor vazirliklar va muassasalar bilan birgalikda jazoga hukm etilganlarga umumiy taʼlim va hunar-texnika taʼlimi berishni tashkil etadi va amalga oshiradi, sodir etilgan jinoyatning xarakteri va ijtimoiy xavfliligini, jazoga hukm etilganning shaxsiyati, shuningdek, uning xulq-atvori va mehnatga munosabatini hisobga olgan holda jazoga hukm etilganlar axloqini tuzatish va ularni qayta tarbiyalash vositalarini tanlashda yakka tartibda ish olib borishni taʼminlaydi, bunda pedagogika, psixologiya va boshqa fanlar sohasida erishilgan yutuqlardan keng foydalanadi;

ozodlikdan mahrum etilgan joylardan boʻshatilgan shaxslarning ishga joylashishiga va turmushda oʻz oʻrnini topishiga koʻmaklashadi;

ozodlikdan mahrum etilgan joylardan boʻshatilgan shaxslarni qonunchilikka muvofiq maʼmuriy nazorat qilib turadi, shuningdek, qonun tomonidan belgilangan hollarda shartli ravishda jazoga hukm etilgan va shartli ravishda jazoni oʻtashdan ozod etilgan shaxslarni nazorat qilib boradi;

respublika hududida pasport tizimi talablarining bajarilishini taʼminlaydi, chegara qoʻshinlari bilan birgalikda fuqarolarning chegara rejimi qoidalariga rioya qilishlarini nazorat qiladi, qonunchilikda nazarda tutilgan hollarda chet elga chiqish va SSSRga kelish uchun ruxsatnoma beradi, chet ellik va fuqaroligi boʻlmagan shaxslarning Oʻzbekiston Respublikasi hududida ular uchun belgilangan yashash va koʻchish qoidalariga rioya qilishlarini nazorat qilib boradi;

qonunchilikka muvofiq oʻt sochar qurollar, oʻq-dorilar, portlovchi moddalarni sotib olish, saqlash, narkotik va radioaktiv moddalarni tashish, oʻq otish tirlari va otishma joylarini, qurol-yarogʻlarni tuzatish va pirotexnika korxonalari, ov va sport qurollari bilan savdo qiluvchi doʻkonlarni ochishni va ularning ishlashini nazorat qilib boradi;

belgilangan tartibda poligrafiya hamda shtempel-gravyura korxonalarining ishini hamda muhr va shtamplarni tayyorlashni nazorat qilib boradi, tadbirkorlik subyektlarining muhrlari va shtamplari bundan mustasno;

respublikada davlat yongʻin nazoratini amalga oshiradi, aholi yashaydigan joylar va xalq xoʻjaligi obyektlarini yongʻindan saqlashni taʼminlaydi, boshqa vazirliklar va idoralarning yongʻindan saqlash boʻlinmalari ishini nazorat qiladi va boshqaradi, respublika yongʻindan saqlash tashkilotlarining birgalikda ish olib borish tartibini belgilaydi;

tabiiy ofatlar va boshqa favqulodda holatlar roʻy berganda odamlarni va mol-mulkni qutqarishda qatnashadi, bunda jamoat tartibi saqlanishini taʼminlaydi, mol-mulkni muhofaza qilishni tashkil etadi, bunday ishlarga aholini, shuningdek, transport hamda korxonalar, tashkilotlar, muassasalar va fuqarolarga tegishli vositalarni qutqaruv ishlarini va kechiktirib boʻlmaydigan avariya — qayta tiklash ishlarini oʻtkazishga jalb qilishga koʻmaklashadi;

huquqbuzarlikdan va baxtsiz hodisalardan zarar koʻrgan hamda jamoat joylarida ogʻir ahvolda qolgan shaxslarga shoshilinch yordam koʻrsatishni tashkil etadi;

shaharlarda va aholi yashaydigan boshqa joylarda yoʻl harakatini va avtomobil yoʻllarida qatnovni boshqarishni tashkil etadi, vazirliklar, idoralar va transport tashkilotlarining avtomototransport hamda shahar elektr transporti avariyalarining oldini olish chora-tadbirlarini oʻtkazishlarini nazorat qiladi;

korxonalar, tashkilotlar, muassasalar va fuqarolarga tegishli avtomototransport vositalarini roʻyxatga oladi va hisobga olib boradi, shuningdek, ana shu transport vositalarining texnika ahvolini nazorat qilib turadi;

koʻchalar, avtomobil yoʻllari va ulardagi yoʻl inshootlarining bexatar harakat qilishni taʼminlaydigan ahvolda boʻlishini nazorat qilib boradi, ulardan foydalanish sharoitlarini yaxshilash tadbirlarini koʻradi, avtotransportdan foydalanish harakat xavfsizligiga tahdid solgan hollarda koʻchalar va avtomobil yoʻllarining ayrim uchastkalarida avtotransport hamda piyodalar qatnovini belgilangan tartibda cheklaydi va taqiqlaydi;

korxonalar, tashkilotlar, muassasalar va boshqa obyektlarni, shuningdek, fuqarolarning uylarini belgilangan tartibda muhofaza qilishni tashkil etadi va amalga oshiradi, idoraviy qoʻriqlashni inspeksiya qiladi, qoʻriqlashning ishonchliligini va bu ishlarga xarajatlarni kamaytirish choralarini koʻradi;

oʻta xavfli davlat jinoyatchiligiga qarshi kurashda hamda davlat xavfsizligini saqlashga doir boshqa tadbirlarni oʻtkazishda yordam beradi;

respublika va mahalliy budjetdan ajratiladigan mablagʻlar hisobiga Vazirlik tizimi organlari, boʻlinmalari, muassasalari va tashkilotlarini belgilangan tartibda mablagʻ bilan taʼminlaydi;

ichki ishlar organlari shaxsiy sostavining kasb malakasini oshirish va intizomini mustahkamlash tadbirlarini amalga oshiradi, shaxsiy sostav tomonidan ichki ishlar organlari faoliyatini reglamentlovchi xizmatni oʻtash haqidagi nizomlar, ustavlar va yoʻriqnomalar talablarining bajarilishini taʼminlaydi;

belgilangan tartibda va oʻz huquqlari doirasida ichki ishlar organlari shaxsiy sostaviga maxsus unvonlar beradi;

ichki ishlar organlariga ular zimmasiga yuklatilgan vazifalarni bajarishda faol koʻmaklashgan Vazirlik tizimining alohida oʻrnak koʻrsatgan xodimlarini va fuqarolarni belgilangan tartibda koʻkrakka taqiladigan nishonlar va faxriy yorliqlar bilan taqdirlaydi, shuningdek, ragʻbatlantirishning boshqa turlarini qoʻllaydi;

Oʻzbekiston Respublikasi Sogʻliqni saqlash vazirligi bilan birgalikda koʻchalar, hovlilar va aholi yashaydigan boshqa joylar hududini, shuningdek, mehnatkashlar dam oladigan shahardan tashqari joylar va choʻmiladigan joylarda sanitariya qoidalariga rioya qilinishini nazorat qilib boradi;

epidemiyalar va epizootiyalarga qarshi kurashda, shuningdek, tabiatni muhofaza qilish chora-tadbirlarini amalga oshirishda, brakonyerlikka hamda ov va baliqchilik qoidalarining buzilishiga qarshi kurashda karantin tadbirlari va choralarini amalga oshirishda tegishli idoralarga yordam beradi;

Oʻzbekiston Respublikasi Ichki ishlar vazirligi tizimida sanitariya nazoratini tashkil etadi, ittifoqqa boʻysunuvchi davolash-profilaktika va sanatoriya-kurort muassasalarida ichki ishlar organlari shaxsiy sostaviga tibbiy va sanatoriya-kurort xizmati koʻrsatishni taʼminlaydi;

ichki ishlar organlari tizimida bugʻ qozonlari nazorati inspeksiyasi ishini tashkil etadi;

Oʻzbekiston Respublikasi Ichki ishlar vazirligi oʻz huquqi doirasiga taalluqli masalalar boʻyicha xalqaro tashkilotlar va boshqa davlatlarning huquqni muhofaza qilish organlari bilan hamkorlik qiladi;

jamoat birlashmalari, tashkilotlari va ommaviy axborot vositalari bilan birgalikda ish olib boradi;

“Postda” “Na postu” gazetalarini nashr etadi;

oʻz huquqi doirasida harbiy-safarbarlik ishlarini va fuqarolar mudofaasi tadbirlarini amalga oshiradi;

fuqarolardan tushgan takliflar va arizalarning oʻz vaqtida va sifatli koʻrib chiqilishini taʼminlaydi;

SSSR Ichki ishlar vazirligi va respublikalarning ichki ishlar organlari bilan millatlararo muomala tilida (rus tilida) yozma va boshqa aloqalar oʻrnatadi;

ikki tomonlama va koʻp tomonlama bitimlarning shartlarida nazarda tutilgan boshqa tadbirlarni amalga oshiradi;

xavfli yuklar, qurol-yarogʻlar, harbiy texnika, harbiy mol-mulklar, portlovchi moddalar va buyumlar, shuningdek, harbiy tarkiblar tranziti chogʻida qonunchilikka muvofiq xulosalar beradi va nazoratni amalga oshiradi;

qonun hujjatlarida nazarda tutilgan boshqa funksiyalarni amalga oshiradi.

15. Vazirlikka Oʻzbekiston Respublikasi Prezidenti tomonidan lavozimga tasdiqlanadigan va lavozimdan ozod etiladigan Vazir boshchilik qiladi.

16. Oʻzbekiston Respublikasi Ichki ishlar vaziri:

respublika ichki ishlar organlari va muassasalari tizimiga umumiy rahbarlikni taʼminlaydi;

Oʻzbekiston Respublikasi Hukumati tasdigʻiga Vazirlikning markaziy apparati va uning joylardagi organlari strukturasi, xodimlari soni normativlari, ularni mablagʻ, moddiy-texnika bilan taʼminlash, zarur komplekslar, binolar qurish va yangidan tuziladigan stroyevoy boʻlinmalarni joylashtirish yuzasidan takliflar kiritadi;

ajratilgan pul mablagʻi doirasida Vazirlik apparati va ichki ishlar organlarining tashkiliy-shtat tuzilishini tasdiqlaydi;

ichki tuzilish boʻlinmalari haqidagi nizomlarni tasdiqlaydi;

davlat hokimiyati va boshqaruvi organlarida, tashkilotlarda, muassasalar, korxonalar, jamoat birlashmalarida, mehnat jamoalari, aholi bilan oʻzaro munosabatlarda, shuningdek, xalqaro tashkilotlarda Vazirlik nomidan vakillik qiladi;

Ichki ishlar vazirligi tizimining Oʻzbekiston Respublikasi hududida joylashgan oʻquv yurtlariga rahbarlik qiladi;

ichki qoʻshinlar va oʻquv yurtlarini moddiy-texnika jihatidan taʼminlashni tashkil etadi;

militsiya, ichki qoʻshinlarning soqchilik va maxsus motorlashtirilgan qismlariga nisbatan (Oʻzbekiston Respublikasi hududida joylashgan) katta operativ boshliq hisoblanadi;

axloq tuzatish mehnat muassasalarida ommaviy tartibsizliklar va boshqa favqulodda vaziyatlarning oldini olish uchun soqchi qismlarining kuchlari va vositalaridan foydalanadi, jamoat tartibini saqlash va tasarrufidagi hududda favqulodda vaziyatlarda oʻz vazifalarini bajarish uchun militsiyaning maxsus motorlashtirilgan qismlarini jalb etadi;

Vazirlikka berilgan huquqlar doirasida buyruqlar, yoʻriqnomalar, koʻrsatmalar va boshqa aktlar chiqaradi, ularning bajarilishini tekshirishni tashkil etadi;

vazir oʻrinbosarlari oʻrtasida vazifalarni taqsimlaydi, ularning bajarilishini nazorat qiladi;

Oʻzbekiston Respublikasi Prezidentiga ichki ishlar organlari yuqori boshliqlar sostaviga unvonlar berish haqida taqdimnoma kiritadi;

militsiya polkovnigi, ichki ishlar polkovnigigacha boʻlgan ichki ishlar organlari boshliqlari sostaviga kiruvchi shaxslarga dastlabki va navbatdagi maxsus unvonlarni beradi;

ichki ishlar organlarining polkovnikkacha boʻlgan boshliqlar sostaviga kiruvchi shaxslar tomonidan egallanadigan lavozimlar roʻyxatini belgilaydi;

Oʻzbekiston Respublikasi Prezidenti huzuridagi Vazirlar Mahkamasiga Vazirlikning markaziy apparati va uning organlaridagi generallar tomonidan egallanadigan lavozimlar roʻyxatini kiritadi;

Oʻzbekiston Respublikasi Prezidentiga ichki ishlar organlari xodimlarini va ichki qoʻshinlar harbiy xizmatchilarini SSSR ordenlari va medallari bilan mukofotlash va Oʻzbekiston Respublikasining faxriy unvonlarini berish, Oʻzbekiston Respublikasining Faxriy yorligʻi bilan mukofotlash haqida takliflar kiritadi, belgilangan tartibda ichki ishlar organlarining oʻzini koʻrsatgan xodimlarini va ular zimmasiga yuklatilgan vazifalarni bajarishda ichki ishlar organlariga faol koʻmaklashgan fuqarolarni faxriy yorliqlar va ragʻbatlantirishning boshqa turlari bilan mukofotlaydi;

qonunchilik tomonidan uning huquq doirasiga kiritilgan boshqa masalalar yuzasidan qarorlar qabul qiladi;

Vazirlik zimmasiga yuklatilgan vazifalarning bajarilishi va oʻz funksiyalarining amalga oshirilishi uchun shaxsan javob beradi.

Vazir boʻlmagan hollarda uning vazifalarini Oʻzbekiston Respublikasi Ichki ishlar vazirining birinchi oʻrinbosari bajaradi.

17. Oʻzbekiston Respublikasi Ichki ishlar vazirining oʻrinbosarlari Oʻzbekiston Respublikasi Prezidenti tomonidan lavozimga tayinlanadilar va lavozimdan ozod etiladilar.

Vazifalarning taqsimlanishiga muvofiq Vazir oʻrinbosarlari Vazirlik faoliyatining konkret yoʻnalishlariga rahbarlikni amalga oshiradilar.

Vazirning topshirigʻiga koʻra uning oʻrinbosarlari oʻz huquq doirasida buyruqlar va koʻrsatmalar chiqaradilar.

18. Vazirlikda Vazir (hayʼat raisi), uning oʻrinbosarlari (lavozimiga koʻra), shuningdek Vazirlik faoliyatining asosiy yoʻnalishlarini muvofiqlashtiruvchi tarkibiy boʻlinmalari rahbarlaridan iborat tarkibda hayʼat tashkil etiladi.

Hayʼatning aʼzolari soni va shaxsiy tarkibi Vazirning taqdimnomasiga binoan Oʻzbekiston Respublikasi Vazirlar Mahkamasi tomonidan tasdiqlanadi.

Hayʼat quyidagilar bilan bogʻliq masalalarni koʻrib chiqadi:

Vazirlik faoliyatining ichki ishlar organlari faoliyatida qonuniylikni yanada taʼminlash, fuqarolarning huquqlari, erkinliklari va qonuniy manfaatlarini, jamoat xavfsizligini muhofaza qilish va jamoat tartibini saqlash, uyushgan jinoyatchilik va korrupsiyaga qarshi kurashni tashkil etish boʻyicha ushbu Nizomda belgilangan asosiy yoʻnalishlarini tayyorlash va amalga oshirish;

Vazirlik nomenklaturasiga kiradigan lavozimlarga kadrlarni tanlash, joy-joyiga qoʻyish, tayyorlash va qayta tayyorlash;

Oʻzbekiston Respublikasi Prezidentining farmonlari, qarorlari va farmoyishlarida, Oʻzbekiston Respublikasi Vazirlar Mahkamasi qarorlari va farmoyishlarida belgilangan vazifalarni amalga oshirish boʻyicha ijro intizomini mustahkamlash, ularning oʻz vaqtida va sifatli amalga oshirilishini taʼminlash uchun Vazirlik rahbarlari va xodimlarining shaxsiy javobgarligini oshirish.

Hayʼat Vazirlik vakolatiga taalluqli boshqa masalalarni ham koʻrib chiqish huquqiga ega.

Hayʼat majlisiga Vazirlik vakolatiga kiradigan masalalar boʻyicha boshqa vazirliklar, davlat qoʻmitalari, idoralar, mahalliy davlat hokimiyati organlari, korxonalar, muassasalar, tashkilotlar rahbarlari taklif etilishi mumkin.

Hayʼat uning majlisida tarkibining yarmidan koʻpi qatnashgan taqdirda vakolatli boʻladi. Koʻrib chiqilayotgan masalalar boʻyicha qarorlar oddiy koʻpchilik ovoz bilan qabul qilinadi.

Hayʼat qarorlari Vazirning buyruqlari bilan amalga oshiriladi.

Hayʼat faoliyati tartibi uning hayʼat tasdiqlaydigan reglamentida belgilanadi.

19. Ichki ishlar organlari faoliyatini takomillashtirish masalalarini, ularni ilmiy, ijtimoiy va moddiy-texnik rivojlantirish, kadrlar bilan taʼminlash, boshqaruv qarorlari va tavsiyalarni kelishilgan holda ishlab chiqish masalalarini kompleks hal etish uchun Vazirlikda kengashlar va komissiyalar tuziladi.

Kengashlar va komissiyalarning aʼzoligiga Qoraqalpogʻiston Respublikasi Ichki ishlar vazirligining, viloyat ijroiya qoʻmitalari ichki ishlar boshqarmalarining, Oʻrta Osiyo transport ichki ishlar boshqarmalarining, hokimiyat va boshqaruv organlarining, davlat va jamoat tashkilotlari va birlashmalarining vakillari tayinlanishi mumkin.

Kengashlar va komissiyalarning tarkibi, shuningdek, ular haqidagi nizomlar Oʻzbekiston Respublikasi Ichki ishlar vaziri tomonidan tasdiqlanadi.

20. Oʻzbekiston Respublikasi Ichki ishlar vazirligining markaziy apparati va ichki ishlar organlari xodimlarining soni, shuningdek, ularni saqlashga ajratiladigan mablagʻlar miqdori Oʻzbekiston Respublikasi Vazirlar Mahkamasi tomonidan tasdiqlanadi.

Vazirlik markaziy apparatining strukturasi, shtatlari, xodimlarining moddiy-texnik va ijtimoiy-maishiy taʼminoti, shuningdek, ichki ishlar organlarining strukturasi va shtatlari Oʻzbekiston Respublikasi Ichki ishlar vaziri tomonidan ularning soni va ularni saqlashga ajratilgan mablagʻlar doirasida belgilanadi. Ichki ishlar organlarining moddiy-texnik va ijtimoiy-maishiy taʼminoti Ichki ishlar vaziri tomonidan Oʻzbekiston Respublikasi Vazirlar Mahkamasi bilan kelishilgan holda belgilanadi.

Mehnatga haq toʻlash shartlari Oʻzbekiston Respublikasi Prezidenti huzuridagi Vazirlar Mahkamasi tomonidan belgilanadi.

Vazirlikning markaziy apparati va ichki ishlar organlari boshliqlar sostaviga kiruvchi shaxslar hamda oʻzining shaxsiy, maʼnaviy va kasb fazilatlariga koʻra Oʻzbekiston Respublikasi Ichki ishlar vazirligi zimmasiga yuklatilgan vazifalarni bajarishga qodir boʻlgan xizmatchilar bilan toʻldiriladi.

Vazirlik markaziy apparati va ichki ishlar organlari xodimlarining xizmatni oʻtash tartibi va shartlari ichki ishlar organlari oddiy va boshliqlar sostavining xizmatni oʻtash haqidagi tasdiqlangan nizom bilan belgilanadi.

21. Vazirlik Oʻzbekiston Respublikasi Davlat gerbi tasvirlangan hamda oʻz nomi respublikaning davlat tilida va millatlararo muomala tilida (rus tilida) yozilgan muhrga ega boʻladi.

— Tashkiliy-inspektorlik boshqarmasi

— Huquqiy taʼminlash boʻlimi

— 2-maxsus boʻlim

— Tashkiliy-shtat boʻlimi

— Kotibiyat

— Oʻz xavfsizligi boʻlimi

— Jinoyat-qidiruv boshqarmasi

— Iqtisodiyot sohasidagi jinoyatchilikka qarshi kurash boshqarmasi

— Ettinchi boshqarma

— Uyushgan jinoyatchilik va poraxoʻrlikka qarshi kurash boshqarmasi

— Profilaktika xizmati boshqarmasi

— Jamoat tartibini saqlash boshqarmasi

— Davlat avtomobil nazorati Bosh boshqarmasi

Tergov boshqarmasi

— Axloq tuzatish ishlari boshqarmasi

— Ozodlikdan mahrum etish bilan bogʻliq boʻlmagan jazolarni ijro etish boʻlimi

— Moliya-iqtisodiyot boshqarmasi

— Xoʻjalik boshqarmasi

— Tibbiyot boshqarmasi

— Kapital qurilish boʻlimi

— Bugʻ qozonlar nazorati inspeksiyasi

Respublika “Soqchilik” birlashmasi

Yongʻindan saqlash boshqarmasi

— Shaxsiy sostav bilan ishlash boshqarmasi

— Shaxsiy sostavni ijtimoiy-huquqiy himoya qilish boʻlimi

— Oʻquv yurtlari faoliyatini muvofiqlashtirish boʻlimi

— Oʻquv yurtlari

— “Postda”, “Na postu” roʻznomalari muharririyati