ПФ-223-сон 21.11.2025. Қишлоқ хўжалиги таваккалчиликларини суғурта қилиш механизмини самарали ташкил этиш тўғрисида

Ўзбекистон Республикаси Президентининг

Фармони

Қишлоқ хўжалиги таваккалчиликларини суғурта қилиш механизмини самарали ташкил этиш тўғрисида

Қишлоқ хўжалиги маҳсулотларини етиштириш жараёнида табиий офатлар натижасидаги зарарларни қоплашнинг янги механизмларини жорий этиш орқали соҳадаги тадбиркорлик субъектлари иқтисодий барқарор фаолият юритиши учун имкониятлар яратиш, шунингдек, Ўзбекистон Республикасининг «Қишлоқ хўжалиги таваккалчиликларини суғурта қилиш тўғрисида»ги Қонуни (кейинги ўринларда — Қонун) ижросини таъминлаш мақсадида қарор қиламан:

I. Мақсадлар

1. Қуйидагилар қишлоқ хўжалиги суғуртаси тизимини жорий этишнинг асосий мақсадлари этиб белгилансин:

(а) қишлоқ хўжалиги таваккалчиликларини суғурта қилишнинг самарали тизимини жорий этиш орқали табиий ва техноген офатлар, ёнғин, зараркунанда ва касалликлар таъсирида ўсимлик ҳамда ҳайвонларга етказилган зарарларни қоплаб бериш;

(б) қишлоқ хўжалиги маҳсулотлари ишлаб чиқариш ҳажмини 2030 йилга қадар босқичма-босқич 20 фоизга ошириш ва қишлоқ хўжалиги маҳсулоти ишлаб чиқарувчиларнинг хавфларини камайтириш;

(в) суғурталаш харажатларининг (суғурта мукофоти) 50 фоизини бюджет маблағлари ҳисобидан қоплаш орқали 2030 йилга қадар қишлоқ хўжалиги таваккалчиликларини суғурталаш қамровини 50 фоизга етказиш.

II. Қишлоқ хўжалиги суғуртаси тизимини самарали йўлга қўйиш

2. Қишлоқ хўжалиги вазирлиги ҳузурида Қишлоқ хўжалиги суғуртаси жамғармаси (кейинги ўринларда — Жамғарма) ташкил этилсин. Белгилансинки, Жамғарма:

(а) Қонунда белгиланган вазифа ва функцияларни ҳамда суғурталовчи вазифасини лицензиясиз амалга оширади;

(б) суғурта (қайта суғурта) фаолиятини амалга оширишда лицензия талаблари ва шартларига риоя қилади (календарь бадал тўлаш мажбурияти бундан мустасно).

3. Белгилансинки:

(а) 2026 йилдан бошлаб қишлоқ хўжалиги маҳсулоти ишлаб чиқарувчилари маҳсулот етиштириш учун давлатнинг имтиёзли кредитларидан фойдаланганда ишлаб чиқариладиган маҳсулотнинг йўқотилиши (нобуд бўлиши) хавфини олдиндан суғурта қилиш босқичма-босқич амалга оширилади;

(б) кластер, фермер хўжаликлари ва бошқа қишлоқ хўжалиги корхоналарининг имтиёзли кредитлар бўйича қарздорликлари қишлоқ хўжалиги таваккалчиликлари суғуртаси шартномаси бўйича қопланмайди.

4. Қишлоқ хўжалиги вазирлиги:

(а) 2025 йил якунига қадар қишлоқ хўжалиги суғуртаси шартномасини расмийлаштириш, суғурта мукофоти учун бюджет субсидиясини олиш, суғурта товонини олишга доир аризаларни кўриб чиқиш бўйича хизматларни кўрсатиш жараёнларини ўз ичига оладиган лицензия талаб ва шартларига мувофиқ бўлган Қишлоқ хўжалиги суғуртаси ахборот тизимини (кейинги ўринларда — Ахборот тизими) ишлаб чиқсин ва ишга туширсин;

(б) Ахборот тизимини суғурта фаолиятини тартибга солувчи ваколатли давлат органи томонидан белгиланган Ягона автоматлаштирилган ахборот тизимига фойдаланиш талаблари ва шартларига риоя қилган ҳолда интеграция қилсин. Бунда Ягона автоматлаштирилган ахборот тизимидан фойдаланганлик учун тўлов ундирилмайди;

(в) Ахборот тизимини бошқа вазирлик ва идораларнинг ахборот тизимлари билан интеграция қилсин. Бунда вазирлик ва идораларнинг ахборот тизимлари ва ресурсларидаги маълумотлар доимий равишда қонунчиликка мувофиқ беғараз асосда тақдим этиб борилади;

(г) мамлакатда қишлоқ хўжалиги суғуртаси тизимини халқаро тажриба асосида такомиллаштириш, таваккалчиликларни бошқариш ва мустақил экспертлар фаолиятини самарали ташкил этиш учун Жамғармага малакали хорижий маслаҳатчиларни жалб этсин.

5. Қишлоқ хўжалиги таваккалчиликларини суғурта қилишни амалга оширишни мувофиқлаштирувчи давлат органи фаолиятини самарали ташкил этиш мақсадида Ўзбекистон Республикаси Президентининг 2025 йил 4 октябрдаги «Республика ижро этувчи ҳокимият органларининг фаолиятига рақамлаштиришни кенг жорий этиш ҳисобига бошқарув штат бирликлари сонини мақбуллаштириш чора-тадбирлари тўғрисида»ги ПФ-178-сон Фармони билан Қишлоқ хўжалиги вазирлиги тизимидаги ташкилотлардан қисқартирилган штат бирликлари ҳисобидан Қишлоқ хўжалиги вазирлиги марказий аппарати бошқарув ходимларининг умумий чекланган сони қўшимча 7 та штат бирлигига оширилсин.

6. Қишлоқ хўжалиги суғуртаси жамғармасининг ижро этувчи органи — Дирекция тузилмаси 1-иловага мувофиқ тасдиқлансин.

7. Иқтисодиёт ва молия вазирлиги:

(а) Жамғарма ўз фаолиятини бошлагунига қадар унинг устав капиталини 35 млрд сўм миқдорида шакллантириш;

(б) Жамғарма устав капитали суғурталовчилар устав капиталининг қонунчиликда белгиланган энг кам миқдорларини шакллантириш учун Давлат бюджетидан зарур маблағларни ажратиб борсин.

8. Қишлоқ хўжалиги вазирлиги Тошкент давлат аграр университети билан биргаликда 2026 йил 1 февралга қадар юқори малакали хорижий экспертларни жалб қилган ҳолда ҳар бир ҳудуддан камида 5 нафардан, 2027 йил 1 мартга қадар қўшимча 600 нафар қишлоқ хўжалиги суғуртаси шартномаси бўйича суғурта ҳодисаси мавжудлиги ва зарар миқдорини аниқлаш учун зарур малакага эга бўлган мустақил экспертларни тайёрласин.

III. Фармон ижросини ташкил этиш, таъминлаш ва назорат

9. Вазирлар Маҳкамаси бир ҳафта муддатда Жамғарма фаолиятини йўлга қўйиш мақсадида қуйидагиларни тасдиқлашни назарда тутувчи қарорни қабул қилсин:

(а) Жамғарма фаолиятини ташкил этиш тўғрисидаги ҳамда суғурта ҳодисаси ва унинг юз бериш эҳтимолини ўрганадиган мустақил экспертлар фаолиятини тартибга солиш тўғрисидаги низомлар;

(б) Ахборот тизимига интеграция қилиниши лозим бўлган бошқа ахборот тизимларининг рўйхати;

(в) суғурта қилинадиган қишлоқ хўжалиги маҳсулотларининг ва таваккалчиликларнинг турлари;

(г) Жамғарма бошқарув кенгаши аъзолари таркиби.

10. Марказий банк Иқтисодиёт ва молия вазирлиги, Қишлоқ хўжалиги вазирлиги ҳамда Истиқболли лойиҳалар миллий агентлиги билан биргаликда 2026 йил 1 декабрга қадар қишлоқ хўжалиги маҳсулоти ишлаб чиқарувчиларга қўшимча юкламаларнинг олдини олиш, жумладан, кредитни қайтармаслик хатарини тижорат банки фойдасига суғурта қилиш амалиётини қисқартириш бўйича таклифларни Вазирлар Маҳкамасига киритсин.

11. Савдо-саноат палатаси Қишлоқ хўжалиги вазирлиги билан биргаликда Жамғармани Тошкент шаҳри Яккасарой тумани Ш. Руставели кўчаси 8-уй манзилида ижара ҳуқуқи асосида жойлаштирсин.

12. Ўзбекистон Республикаси Президентининг ва Ўзбекистон Республикаси Ҳукуматининг айрим ҳужжатларига 2-иловага мувофиқ ўзгартириш ва қўшимчалар киритилсин.

13. Қишлоқ хўжалиги вазирлиги:

(а) Иқтисодиёт ва молия вазирлиги билан биргаликда бир ой муддатда Жамғарма фаолиятини ташкил этиш учун зарур бўлган жиҳозлар, моддий-техник воситалар ва алоқа турлари билан таъминлаш чораларини кўрсин;

(б) бошқа манфаатдор вазирлик ва идоралар билан биргаликда икки ой муддатда қонунчилик ҳужжатларига ушбу Фармондан келиб чиқадиган ўзгартириш ва қўшимчалар тўғрисида Вазирлар Маҳкамасига таклифлар киритсин.

14. Мазкур Фармоннинг ижросини самарали ташкил қилишга масъул ва шахсий жавобгар этиб Бош вазир ўринбосарлари Ж.А. Қўчқоров ва Ж.А. Ходжаев, қишлоқ хўжалиги вазири И.Ю. Абдурахмонов белгилансин.

15. Фармон ижросини муҳокама қилиб бориш, ижро учун масъул идоралар фаолиятини мувофиқлаштириш ва назорат қилиш Ўзбекистон Республикаси Президентининг аграр ривожланиш масалалари бўйича маслаҳатчиси Ш.М. Ғаниев зиммасига юклансин.

Ўзбекистон Республикаси Президенти Ш. МИРЗИЁЕВ

Тошкент ш.,

2025 йил 21 ноябрь,

ПФ-223-сон

Ўзбекистон Республикаси Президентининг 2025 йил 21 ноябрдаги ПФ-223-сон Фармонига
1-ИЛОВА

Қишлоқ хўжалиги суғуртаси жамғармасининг ижро этувчи органи — Дирекция

ТУЗИЛМАСИ

Жамғарма бошқарув кенгаши

Директор

Директорнинг биринчи ўринбосари

Директор ўринбосари

Ички аудит хизмати

Суғурталаш бошқармаси

Молия бошқармаси

Ижро интизоми ва девонхона

Қишлоқ хўжалиги экинларини суғурталаш бўлими

Бухгалтерия

Ходимлар билан ишлаш бўлими

Суғурта захираларини бошқариш ва инвестициявий фаолият бўлими

Юридик бўлим

Қишлоқ хўжалигида ҳайвонларни суғурталаш бўлими

Ишлар бошқармаси

Ахборот технологияларини жорий этиш бўлими

Қайта суғурталаш ва халқаро муносабатлар бўлими

Суғурта тўловлари бўлими

Суғурта воситачилари ва мустақил экспертлар билан ишлаш бўлими

Дирекция ходимларининг умумий чекланган сони — 25 штат бирлиги.

Жамғарманинг кузатув кенгаши, зарур ҳолларда, Иқтисодиёт ва молия вазирлиги билан келишилган ҳолда Дирекция тузилмаси ва ходимларнинг умумий чекланган сонига ўзгартириш киритиши мумкин.

Ўзбекистон Республикаси Президентининг 2025 йил 21 ноябрдаги ПФ-223-сон Фармонига
2-ИЛОВА

Ўзбекистон Республикаси Президентининг ва Ўзбекистон Республикаси Ҳукуматининг айрим ҳужжатларига киритилаётган ўзгартириш ва қўшимчалар

1. Ўзбекистон Республикаси Президентининг 2021 йил 30 апрелдаги «Миллий қонунчилик базасини комплекс тизимлаштириш чора-тадбирлари тўғрисида»ги ПФ-6218-сон Фармонига 5-илованинг 43-позициясида:

(а) «Амалга ошириш муддатлари» устунидаги «2025 йил III чорак» сўзлари «2026 йил IV чорак» сўзлари билан алмаштирилсин;

(б) «Масъул давлат органлари» устунидаги «Иқтисодий тараққиёт ва камбағалликни қисқартириш вазирлиги» сўзлари «Иқтисодиёт ва молия вазирлиги» сўзлари билан алмаштирилсин.

2. Ўзбекистон Республикаси Президентининг 2023 йил 12 июндаги «Камбағалликни қисқартиришда тадбиркорлик субъектлари билан ўзаро манфаатли ҳамкорлик ўрнатишга қаратилган чора-тадбирлар тўғрисида»ги ПФ-93-сон Фармонида:

(а) 7-банд «б» кичик бандининг тўртинчи хатбошисидаги «ерга бўлган ҳуқуқлар» сўзларидан кейин «(қишлоқ хўжалигига мўлжалланган ер участкаларига бўлган ҳуқуқлар бундан мустасно)» сўзлари билан тўлдирилсин;

(б) 1-илованинг 3-позицияси «в» кичик банди «Имтиёз ва преференциялар» устуни «ерга бўлган ҳуқуқларни» сўзларидан кейин «(қишлоқ хўжалигига мўлжалланган ер участкаларига бўлган ҳуқуқлар бундан мустасно)» сўзлари билан тўлдирилсин.

3. Ўзбекистон Республикаси Президентининг 2023 йил 14 июндаги «Маъмурий ислоҳотлар доирасида транспорт соҳасида давлат бошқарувини самарали ташкил қилиш чора-тадбирлари тўғрисида»ги ПФ-94-сон Фармонига 8-илованинг 6-позицияси «Маълумотни тақдим қилувчи идоралар» устунидаги «Ўзбекистон Республикаси Президенти ҳузуридаги Статистика агентлиги» сўзлари «Ўзбекистон Республикаси Миллий статистика қўмитаси» сўзлари билан алмаштирилсин.

4. Ўзбекистон Республикаси Президентининг 2023 йил 8 ноябрдаги «Ўзбекистон Республикаси Президенти ҳузуридаги стратегик ислоҳотлар агентлиги фаолиятини янада такомиллаштириш чора-тадбирлари тўғрисида»ги ПФ-190-сон Фармонига 1-илованинг 3-позицияси «Стратегик ислоҳотлар агентлиги билан фаол ҳамкорлик қиладиган ташкилотлар» устунидаги «Статистика агентлиги» сўзлари «Миллий статистика қўмитаси» сўзлари билан алмаштирилсин.

5. Ўзбекистон Республикаси Президентининг 2023 йил 10 ноябрдаги «Кичик ва ўрта бизнесни молиявий қўллаб-қувватлаш тизимини такомиллаштириш чора-тадбирлари тўғрисида»ги ПФ-193-сон Фармонига 2-илованинг 16-позицияси «Масъул ижрочилар» устунидаги «Статистика агентлиги (Бегалов)» сўзлари «Миллий статистика қўмитаси (Ҳамраев)» сўзлари билан алмаштирилсин.

6. Ўзбекистон Республикаси Президентининг 2024 йил 16 февралдаги «Республикада озиқ-овқат хавфсизлигини таъминлашнинг қўшимча чора-тадбирлари тўғрисида»ги ПФ-36-сон Фармонида:

(а) 9-банднинг биринчи хатбошисидаги «Статистика агентлиги» сўзлари «Миллий статистика қўмитаси» сўзлари билан алмаштирилсин;

(б) 2-илованинг 20 ва 31-позициялари «Масъул ижрочилар» устунидаги «Статистика агентлиги» сўзлари «Миллий статистика қўмитаси» сўзлари билан алмаштирилсин.

7. Ўзбекистон Республикаси Президентининг 2024 йил 13 мартдаги «Республика ва маҳаллий ижро этувчи ҳокимият органлари ҳамда хўжалик бирлашмалари фаолияти самарадорлигини баҳолаш тизимини такомиллаштириш чора-тадбирлари тўғрисида»ги ПФ-49-сон Фармонининг 2-банди учинчи хатбошиси ҳамда 7-банди иккинчи хатбошисидаги «Статистика агентлиги» сўзлари «Миллий статистика қўмитаси» сўзлари билан алмаштирилсин.

8. Ўзбекистон Республикаси Президентининг 2024 йил 19 июндаги «Халқаро рейтинг ва индекслар билан ишлаш тизимини такомиллаштириш ҳамда ушбу соҳада парламент назоратини кучайтириш бўйича қўшимча чора-тадбирлар тўғрисида»ги ПФ-91-сон Фармонига 1-илованинг 25-бандидаги «Б.А. Бегалов — Статистика агентлиги директори» сўзлари «Б.С. Ҳамраев — Миллий статистика қўмитаси раиси» сўзлари билан алмаштирилсин.

9. Ўзбекистон Республикаси Президентининг 2024 йил 10 июлдаги «Бюджет маблағларидан фойдаланиш устидан молиявий назоратни кучайтириш бўйича қўшимча чора-тадбирлар тўғрисида»ги ПФ-100-сон Фармонига 3-илованинг 27-бандидаги «Статистика агентлиги» сўзлари «Миллий статистика қўмитаси» сўзлари билан алмаштирилсин.

10. Ўзбекистон Республикаси Президентининг 2024 йил 23 июлдаги «Заргарлик буюмларини ишлаб чиқариш соҳасини янада ривожлантириш ва уларнинг рақобатбардошлигини таъминлаш чора-тадбирлари тўғрисида»ги ПФ-104-сон Фармонига 4-илованинг 6-позицияси «Амалга ошириш механизми» устуни 4-бандидаги «Статистика агентлигига» сўзлари «Миллий статистика қўмитасига» сўзлари билан, «Ижро учун масъуллар» устунидаги «Статистика агентлиги (Б. Бегалов)» сўзлари «Миллий статистика қўмитаси (Б. Ҳамраев)» сўзлари билан алмаштирилсин.

11. Ўзбекистон Республикаси Президентининг 2024 йил 23 июлдаги «Ўзбекистон Республикаси Президенти ҳузурида Иқлим кенгашини ташкил этиш тўғрисида»ги ПФ-106-сон Фармонига 1-илованинг 22-бандидаги «Б.А. Бегалов — Ўзбекистон Республикаси Президенти ҳузуридаги Статистика агентлиги директори» сўзлари «Б.С. Ҳамраев — Ўзбекистон Республикаси Миллий статистика қўмитаси раиси» сўзлари билан алмаштирилсин.

12. Ўзбекистон Республикаси Президентининг 2024 йил 6 сентябрдаги «Тадбиркорлик ва шаҳарсозлик фаолиятини амалга оширишда ер ресурсларининг инвестициявий имкониятларидан самарали фойдаланиш чора-тадбирлари тўғрисида»ги ПФ-135-сон Фармони 1-бандининг «б» кичик бандида «барча турдаги ер участкаларининг» сўзларидан кейин «(қишлоқ хўжалигига мўлжалланган ер участкалари бундан мустасно)» сўзлари билан тўлдирилсин.

13. Ўзбекистон Республикаси Президентининг 2025 йил 3 февралдаги «Қишлоқ хўжалиги экин майдонлари унумдорлигини ошириш, тармоққа инвестициялар жалб қилиш учун қулай шарт-шароит яратиш бўйича навбатдаги чора-тадбирлар тўғрисида»ги ПФ-18-сон Фармонида:

(а) 9-банднинг учинчи хатбошисидаги «давлат корхоналари» сўзлари «масъулияти чекланган жамиятлари» сўзлари билан алмаштирилсин;

(б) 1-илованинг 1-банди олтинчи хатбошисидаги «давлат корхонасига» сўзлари «масъулияти чекланган жамиятига» сўзлари билан алмаштирилсин.

14. Ўзбекистон Республикаси Президентининг 2025 йил 24 февралдаги «Статистика ишларини ташкил этиш ва юритиш тизимини янги босқичга олиб чиқиш бўйича қўшимча чора-тадбирлар тўғрисида»ги ПФ-27-сон Фармонининг 12-бандида:

(а) биринчи хатбошидаги «2025 йил якунига қадар» сўзлари «2026 йил 1 июнга қадар» сўзлари билан алмаштирилсин;

(б) «в» кичик банд қуйидаги мазмундаги еттинчи хатбоши билан тўлдирилсин:

«(vi) аҳоли ва қишлоқ хўжалигини рўйхатга олиш натижалари асосида аҳоли жон бошига нисбатан шакллантириладиган кўрсаткичларни қайта ҳисоблашни амалга ошириш».

15. Ўзбекистон Республикаси Президентининг 2019 йил 8 майдаги ПҚ-4312-сон қарори билан тасдиқланган Ўзбекистон Республикаси мактабгача таълим тизимини 2030 йилгача ривожлантириш концепциясига илованинг 1 — 4, 10-позициялари «Ахборот манбалари» устунидаги «Статистика агентлиги» сўзлари «Миллий статистика қўмитаси» сўзлари билан алмаштирилсин.

16. Ўзбекистон Республикаси Президентининг 2020 йил 3 августдаги «Ўзбекистон Республикасининг миллий статистика тизимини янада такомиллаштириш ва ривожлантириш чора-тадбирлари тўғрисида»ги ПҚ-4796-сон қарорига 2-илованинг 6-позициясида:

(а) «Амалга ошириш механизми» устуни 4 ва 5-бандлари қуйидаги таҳрирда баён этилсин:

«4. Харажатларни мақбуллаштириш ва маълумот алмашиш самарадорлигини ошириш мақсадида бизнесни рўйхатга олишни ташкил этиш бўйича Статистик регистрларнинг рақамли базаси ахборот тизимини ишлаб чиқиш.

5. Статистик регистрларнинг рақамли базаси ёрдамида бизнес-регистр модулини ишга тушириш»;

(б) «Бажариш муддати» устунидаги «2023-2024 йилларда» ҳамда «2025 йил июль» сўзлари тегишинча «2025 йил ноябрь» ва «2025 йил декабрь» сўзлари билан алмаштирилсин.

17. Ўзбекистон Республикаси Президентининг 2021 йил 9 августдаги «Етим болалар ва ота-она қарамоғидан маҳрум бўлган болаларни давлат томонидан қўллаб-қувватлашнинг янги тизимини жорий этиш чора-тадбирлари тўғрисида»ги ПҚ-5216-сон қарорининг 4-банди тўртинчи хатбошисидаги «Статистика агентлиги» сўзлари «Миллий статистика қўмитаси» сўзлари билан алмаштирилсин.

18. Ўзбекистон Республикаси Президентининг 2021 йил 5 ноябрдаги «Юриш, югуриш, мини-футбол, бадминтон, стритбол ва «Workоut» спорт турларини янада ривожлантириш чора-тадбирлари тўғрисида»ги ПҚ-5282-сон қарорига 1-илованинг 7-позицияси «Масъул ижрочилар» устунидаги «Статистика агентлиги» сўзлари «Миллий статистика қўмитаси» сўзлари билан алмаштирилсин.

19. Ўзбекистон Республикаси Президентининг 2022 йил 2 декабрдаги «2030 йилгача Ўзбекистон Республикасининг «яшил» иқтисодиётга ўтишига қаратилган ислоҳотлар самарадорлигини ошириш бўйича чора-тадбирлар тўғрисида»ги ПҚ-436-сон қарорига 5-илованинг 12-бандидаги «Б.А. Бегалов — Статистика агентлиги директори» сўзлари «Б.С. Ҳамраев — Миллий статистика қўмитаси раиси» сўзлари билан алмаштирилсин.

20. Ўзбекистон Республикаси Президентининг 2023 йил 24 мартдаги «Давлат активларини бошқариш агентлиги фаолиятини самарали ташкил этиш чора-тадбирлари тўғрисида»ги ПҚ-101-сон қарорига 5-илованинг 4-позицияси «Вазирлик ва идоралар номи» устунидаги «Ўзбекистон Республикаси Президенти ҳузуридаги Статистика агентлиги» сўзлари «Ўзбекистон Республикаси Миллий статистика қўмитаси» сўзлари билан алмаштирилсин.

21. Ўзбекистон Республикаси Президентининг 2023 йил 2 июндаги «Ўзбекистон Республикасининг Жаҳон савдо ташкилотига аъзо бўлиш жараёнини жадаллаштиришга доир қўшимча чора-тадбирлар тўғрисида»ги ПҚ-181-сон қарорига 1-илованинг 16-бандидаги «А.А. Икрамов — Статистика агентлиги директорининг ўринбосари» сўзлари «Р.Д. Махаммадиев — Миллий статистика қўмитаси раисининг ўринбосари» сўзлари билан алмаштирилсин.

22. Ўзбекистон Республикаси Президентининг 2023 йил 11 сентябрдаги «Шаҳарсозлик фаолияти соҳасида давлат бошқаруви тизимини янада такомиллаштириш ҳамда 2023 — 2027 йилларда аҳоли пунктларининг шаҳарсозлик ҳужжатларини ишлаб чиқиш дастурларини тасдиқлаш чора-тадбирлари тўғрисида»ги ПҚ-299-сон қарорида:

(а) 6-илованинг 18-позицияси «Маълумот/база тақдим этувчи идора» устунидаги «Ўзбекистон Республикаси Президенти ҳузуридаги Статистика агентлиги» сўзлари «Ўзбекистон Республикаси Миллий статистика қўмитаси» сўзлари билан алмаштирилсин;

(б) 7-илованинг 5-позицияси «Масъул ижрочилар» устунидаги «Статистика агентлиги» сўзлари «Миллий статистика қўмитаси» сўзлари билан алмаштирилсин.

23. Ўзбекистон Республикаси Президентининг 2023 йил 14 сентябрдаги «Бирлашган Миллатлар Ташкилотининг «Электрон ҳукумат тадқиқоти» ҳисоботида Ўзбекистон Республикасининг рейтингини яхшилашга доир қўшимча чора-тадбирлар тўғрисида»ги ПҚ-308-сон қарорида:

(а) 4-илованинг 4-бандидаги «З. Зияев — Ўзбекистон Республикаси Президенти ҳузуридаги Статистика агентлиги директори ўринбосари» сўзлари «З. Зияев — Ўзбекистон Республикаси Миллий статистика қўмитаси раиси ўринбосари» сўзлари билан алмаштирилсин;

(б) 5-илованинг 4-бандидаги «З. Зияев — Ўзбекистон Республикаси Президенти ҳузуридаги Статистика агентлиги директори ўринбосари» сўзлари «З. Зияев — Ўзбекистон Республикаси Миллий статистика қўмитаси раиси ўринбосари» сўзлари билан алмаштирилсин.

24. Ўзбекистон Республикаси Президентининг 2024 йил 9 январдаги «Тадбиркорлик субъектлари томонидан давлат органларига ҳисобот ва статистик маълумотларни тақдим этиш жараёнларини янада соддалаштириш чора-тадбирлари тўғрисида»ги ПҚ-8-сон қарорида:

(а) 1-банднинг биринчи хатбошисидаги «Статистика агентлигининг» сўзлари «Миллий статистика қўмитасининг» сўзлари билан алмаштирилсин;

(б) 2-бандда:

(i) «б» кичик банддаги «Статистика агентлигига» сўзлари «Миллий статистика қўмитасига» сўзлари билан алмаштирилсин;

(ii) «в» кичик банддаги «Статистика агентлиги» сўзлари «Миллий статистика қўмитаси» сўзлари билан алмаштирилсин;

(в) 5-банддаги «Статистика агентлиги» сўзлари «Миллий статистика қўмитаси» сўзлари билан алмаштирилсин;

(г) 2-илованинг матни қуйидаги таҳрирда баён этилсин:

«Тадбиркорлик субъектлари томонидан давлат органларига тақдим этиладиган ҳисобот ва статистик маълумотларнинг

ЯГОНА РЎЙХАТИ

Т/р	Ҳисобот тури	Ҳисобот тақдим этувчи субъект	Ҳисоботни қабул қилувчи орган	Ҳисоботни тақдим этиш даврийлиги
1.	Тижорат банкининг бухгалтерия баланси тўғрисида молиявий ҳисоботи	Тижорат банклари	Солиқ органлари	Чораклик ва йиллик
2.	Тижорат банкининг фойда ва зарарлар тўғрисида молиявий ҳисоботи	Тижорат банклари	Солиқ органлари	Чораклик ва йиллик
3.	Қўшилган қиймат солиғи бўйича ҳисобот	Тадбиркорлик субъектлари	Солиқ органлари	Ойлик
4.	Акциз солиғи бўйича ҳисобот	Тадбиркорлик субъектлари	Солиқ органлари	Ойлик
5.	Фойда солиғи бўйича ҳисобот	Тадбиркорлик субъектлари	Солиқ органлари	Ойлик ва чораклик
6.	Жисмоний шахслардан олинадиган даромад солиғи, қатъий белгиланган миқдорлардаги солиқ суммалари ва ижтимоий солиқ бўйича ҳисобот	Тадбиркорлик субъектлари	Солиқ органлари	Ойлик
7.	Ер қаъридан фойдаланганлик учун солиқ бўйича ҳисобот	Тадбиркорлик субъектлари	Солиқ органлари	Ойлик
8.	Сув ресурсларидан фойдаланганлик учун солиқ бўйича ҳисобот	Тадбиркорлик субъектлари	Солиқ органлари	Йиллик
9.	Юридик шахсларнинг мол-мулкига солинадиган солиқ бўйича ҳисобот	Тадбиркорлик субъектлари	Солиқ органлари	Йиллик
10.	Юридик шахслардан олинадиган ер солиғи бўйича ҳисобот	Тадбиркорлик субъектлари	Солиқ органлари	Йиллик
11.	Айланмадан олинадиган солиқ бўйича ҳисобот	Тадбиркорлик субъектлари	Солиқ органлари	Ойлик
12.	Олинган мақсадли маблағлардан фойдаланганлик бўйича ҳисобот	Тадбиркорлик субъектлари	Солиқ органлари	Йиллик
13.	Давлат божи ва йиғимлар бўйича ҳисобот	Тадбиркорлик субъектлари	Солиқ органлари	Чораклик
14.	Молиявий ҳисоботнинг халқаро стандартларга ўтган юридик шахсларнинг солиқларини ҳисоблаб чиқиш учун зарур бўлган кўрсаткичлар бўйича ҳисобот	Тадбиркорлик субъектлари	Солиқ органлари	Йиллик
15.	Фойдали қазилмаларни қазиб олганлик учун махсус рента солиғи бўйича ҳисобот	Тадбиркорлик субъектлари	Солиқ органлари	Чораклик
16.	Молиявий ҳолат тўғрисида ҳисобот (МҲХС асосида)	Акциядорлик жамиятлари, тижорат банклари, суғурта ташкилотлари ва йирик солиқ тўловчилар	Солиқ органлари	Йиллик
17.	Молиявий ҳисоботлар бўйича изоҳлар (МҲХС асосида)	Акциядорлик жамиятлари, тижорат банклари, суғурта ташкилотлари ва йирик солиқ тўловчилар	Солиқ органлари	Йиллик
18.	Фойда ёки зарар ва бошқа умумлашган даромад тўғрисида ҳисобот (МҲХС асосида)	Акциядорлик жамиятлари, тижорат банклари, суғурта ташкилотлари ва йирик солиқ тўловчилар	Солиқ органлари	Йиллик
19.	Хусусий капиталдаги ўзгаришлар тўғрисида ҳисобот (МҲХС асосида)	Акциядорлик жамиятлари, тижорат банклари, суғурта ташкилотлари ва йирик солиқ тўловчилар	Солиқ органлари	Йиллик
20.	Пул маблағлари ҳаракати тўғрисида ҳисобот (МҲХС асосида)	Акциядорлик жамиятлари, тижорат банклари, суғурта ташкилотлари ва йирик солиқ тўловчилар	Солиқ органлари	Йиллик
21.	Изоҳлар, ҳисоб-китоблар ва тушунтиришлар	Тадбиркорлик субъектлари	Солиқ органлари	Йиллик
22.	Бухгалтерия баланси — 1-сонли шакл	Тадбиркорлик субъектлари	Солиқ органлари	Йиллик
23.	Молиявий натижалар тўғрисидаги ҳисобот — 2-сонли шакл	Тадбиркорлик субъектлари	Солиқ органлари	Йиллик
24.	Пул оқимлари тўғрисидаги ҳисобот — 4-сонли шакл	Тадбиркорлик субъектлари	Солиқ органлари	Йиллик
25.	Хусусий капитал тўғрисидаги ҳисобот — 5-сонли шакл	Тадбиркорлик субъектлари	Солиқ органлари	Йиллик
26.	Инвестиция фаолияти, бино ва иншоотларни фойдаланишга топшириш тўғрисидаги статистика ҳисоботи	Юридик шахслар ва уларнинг алоҳида бўлинмалари	Статистика органлари	Йиллик
27.	Инвестиция фаолияти, бино ва иншоотларни фойдаланишга топшириш тўғрисидаги статистика ҳисоботи	Юридик шахслар ва уларнинг алоҳида бўлинмалари	Статистика органлари	Чораклик
28.	Ўзбекистон Республикасига чет элдан киритилган инвестициялар ва Ўзбекистон Республикасидан чет элга йўналтирилган инвестициялар тўғрисидаги статистика ҳисоботи	Юридик шахслар ва уларнинг алоҳида бўлинмалари	Статистика органлари	Чораклик
29.	Деҳқон бозорлари, савдо мажмуалари ва ихтисослашган бозорлардаги савдо жойлари тўғрисидаги статистика ҳисоботи	Юридик шахслар ва уларнинг алоҳида бўлинмалари	Статистика органлари	Йиллик
30.	Маҳсулотлар ва материаллар ишлаб чиқаришни маҳаллийлаштириш чора-тадбирини амалга ошириш тўғрисидаги статистика ҳисоботи	Юридик шахслар ва уларнинг алоҳида бўлинмалари	Статистика органлари	Йиллик
31.	Ёқилғи етказиш ва унинг келиб тушиш манбалари тўғрисидаги статистика ҳисоботи	Юридик шахслар ва уларнинг алоҳида бўлинмалари	Статистика органлари	Йиллик
32.	Ёқилғи ва энергия келиб тушиши, сарфи ва қолдиқлари тўғрисидаги статистика ҳисоботи	Юридик шахслар ва уларнинг алоҳида бўлинмалари	Статистика органлари	Йиллик
33.	Электр энергия манбалари ва тақсимоти тўғрисидаги статистика ҳисоботи (ишлаб чиқариш)	Юридик шахслар ва уларнинг алоҳида бўлинмалари	Статистика органлари	Йиллик
34.	Электр энергия манбалари ва тақсимоти тўғрисидаги статистика ҳисоботи (тармоқ)	Юридик шахслар ва уларнинг алоҳида бўлинмалари	Статистика органлари	Йиллик
35.	Пилла хариди тўғрисидаги статистика ҳисоботи	Юридик шахслар ва уларнинг алоҳида бўлинмалари	Статистика органлари	мавсумий
36.	Қишлоқ хўжалиги фаолияти тўғрисида статистика ҳисоботи	Юридик шахслар ва уларнинг алоҳида бўлинмалари	Статистика органлари	Йиллик
37.	Фермер хўжалиги фаолияти тўғрисидаги статистика ҳисоботи	Фермер хўжаликлари	Статистика органлари	Йиллик
38.	Фермер хўжалиги фаолияти тўғрисидаги статистика ҳисоботи	Фермер хўжаликлари	Статистика органлари	Чораклик
39.	Меҳнат ҳисоботи	Юридик шахслар ва уларнинг алоҳида бўлинмалари	Статистика органлари	Чораклик
40.	Касб ва лавозимлар бўйича ходимларнинг иш ҳақи тўғрисидаги статистика ҳисоботи	Юридик шахслар ва уларнинг алоҳида бўлинмалари	Статистика органлари	Йиллик
41.	Кўп квартирали уйларни бошқариш органлари фаолияти тўғрисида ҳисобот	Юридик шахслар ва уларнинг алоҳида бўлинмалари	Статистика органлари	Йиллик
42.	Автомобиль, электр (трамвай, метрополитен, троллейбус) транспорти иши тўғрисидаги статистика ҳисоботи	Юридик шахслар ва уларнинг алоҳида бўлинмалари	Статистика органлари	Чораклик
43.	Умумий фойдаланилмайдиган темир йўл транспорти тўғрисидаги статистика ҳисоботи	Юридик шахслар ва уларнинг алоҳида бўлинмалари	Статистика органлари	Йиллик
44.	Умумий фойдаланишдаги ҳаво транспорти хизматлари тўғрисидаги статистика ҳисоботи	Юридик шахслар ва уларнинг алоҳида бўлинмалари	Статистика органлари	Йиллик
45.	Ахборотлаштириш воситалари ва ахборот-коммуникация технологияларидан фойдаланиш тўғрисидаги статистика ҳисоботи	Юридик шахслар ва уларнинг алоҳида бўлинмалари	Статистика органлари	Йиллик
46.	Мактабдан ташқари таълим ташкилотининг статистика ҳисоботи	Юридик шахслар ва уларнинг алоҳида бўлинмалари	Статистика органлари	Йиллик
47.	Ташриф буюрувчиларга хизмат кўрсатиш ва жойлаштириш тўғрисидаги статистика ҳисоботи	Юридик шахслар ва уларнинг алоҳида бўлинмалари	Статистика органлари	Йиллик
48.	Ташкилот хўжалик фаолиятининг асосий кўрсаткичлари тўғрисидаги статистика ҳисоботи	Юридик шахслар ва уларнинг алоҳида бўлинмалари	Статистика органлари	Йиллик
49.	Асосий воситаларнинг мавжудлиги ва ҳаракати ҳамда бошқа номолиявий активлар тўғрисидаги статистика ҳисоботи	Юридик шахслар ва уларнинг алоҳида бўлинмалари	Статистика органлари	Йиллик
50.	Ташкилотнинг молиявий аҳволи тўғрисидаги статистика ҳисоботи	Юридик шахслар ва уларнинг алоҳида бўлинмалари	Статистика органлари	Чораклик
51.	Ташкилот фаолияти тўғрисида статистика ҳисоботи	Юридик шахслар ва уларнинг алоҳида бўлинмалари	Статистика органлари	Ойлик
52.	Махсус иқтисодий зона, кичик саноат зона, технопарк иштирокчиси бўлган ташкилотлар ва кластерлар фаолияти тўғрисида статистика ҳисоботи	Юридик шахслар ва уларнинг алоҳида бўлинмалари	Статистика органлари	Чораклик
53.	Аҳолига тиббий ёрдам кўрсатувчи муассасалар фаолияти тўғрисидаги статистика ҳисоботи	Юридик шахслар ва уларнинг алоҳида бўлинмалари	Статистика органлари	Йиллик
54.	Инсонпарварлик ёрдамининг келиб тушиши ва уларнинг ўзлаштирилиши тўғрисида ҳисобот	Юридик шахслар	Иқтисодиёт ва молия вазирлиги	Чораклик
55.	Техник кўмаклашиш воситаларининг келиб тушиши ва уларнинг ўзлаштирилиши тўғрисида ҳисобот	Юридик шахслар	Инвестициялар, саноат ва савдо вазирлиги	Чораклик
56.	Ўз маблағлари ва инвестиция активларининг ўртача йиллик қиймати тўғрисида ҳисобот	Қимматли қоғозлар бозорининг профессионал иштирокчиси	Истиқболли лойиҳалар миллий агентлиги	Чораклик
57.	Тўлов қобилияти маржасининг етарлилиги нормативи ҳисоб-китоблари (умумий, ҳаёт ёки фақат қайта суғурта бўйича)	Суғурта ташкилотлари	Истиқболли лойиҳалар миллий агентлиги	Чораклик ва йиллик
58.	Алоҳида таваккалчиликлар бўйича мажбуриятларнинг йўл қўйиладиган энг кўп миқдори ва мажбуриятлар жамининг йўл қўйиладиган энг кўп миқдори нормативларига риоя қилганлиги ҳамда суғурталовчи (қайта суғурталовчи) активларини жойлаштиришга оид талабларга риоя қилинганлиги тўғрисида маълумотлар	Суғурта ташкилотлари	Истиқболли лойиҳалар миллий агентлиги	Чораклик ва йиллик
59.	Ҳар қандай битта юридик шахснинг устав капиталида иштирок этиш улуши ҳисоб-китоби	Суғурта ташкилотлари	Истиқболли лойиҳалар миллий агентлиги	Чораклик ва йиллик
60.	Битта боғлиқ шахс ёки барча боғлиқ шахсларда жойлаштирилган активлари суммаси ҳисоб-китоби	Суғурта ташкилотлари	Истиқболли лойиҳалар миллий агентлиги	Чораклик ва йиллик
61.	Қайта суғурта операцияларига оид талабларга риоя қилганлиги тўғрисида маълумотлар	Суғурта ташкилотлари	Истиқболли лойиҳалар миллий агентлиги	Чораклик ва йиллик
62.	Транспорт воситалари эгаларининг фуқаролик жавобгарлигини мажбурий суғурта қилиш бўйича барқарорлаштириш захираси бўйича маълумотлар (1, 2-жадваллар)	Суғурта ташкилотлари	Истиқболли лойиҳалар миллий агентлиги	Чораклик ва йиллик
63.	Иш берувчининг фуқаролик жавобгарлигини мажбурий суғурта қилиш бўйича барқарорлаштириш захираси бўйича маълумотлар (1, 2-жадваллар)	Суғурта ташкилотлари	Истиқболли лойиҳалар миллий агентлиги	Чораклик ва йиллик
64.	Ташувчининг фуқаролик жавобгарлигини мажбурий суғурта қилиш бўйича барқарорлаштириш захираси бўйича маълумотлар (1, 2-жадваллар)	Суғурта ташкилотлари	Истиқболли лойиҳалар миллий агентлиги	Чораклик ва йиллик тарзда
65.	Суғурта захираларининг умумий миқдори	Суғурта ташкилотлари	Истиқболли лойиҳалар миллий агентлиги	Чораклик ва йиллик тарзда
66.	Активлар таркиби тўғрисида маълумот	Суғурта ташкилотлари	Истиқболли лойиҳалар миллий агентлиги	Чораклик ва йиллик тарзда
67.	Давлат улушларини бошқариш бўйича ҳисобот	Устав фондидаги давлат улуши давлатнинг ишончли вакилларига ишончли бошқарувга берилган хўжалик жамиятлари	Давлат активларини бошқариш агентлиги	Чораклик
68.	Бизнес-режанинг бажарилиши тўғрисида ташкилотнинг ижро этувчи органи ҳисоботи	Устав капиталида давлат улуши мавжуд хўжалик жамиятлар	Давлат активларини бошқариш агентлиги	Чораклик
69.	Самарадорликнинг муҳим кўрсаткичлари (СМК) бажарилиши тўғрисида ҳисобот	Устав капиталида давлат улуши мавжуд хўжалик жамиятлар	Давлат активларини бошқариш агентлиги	Чораклик
70.	Инвестиция мажбуриятларининг бажарилиши тўғрисида ҳисобот	Инвестиция мажбуриятлари билан давлат активини сотиб олган тадбиркорлик субъектлари	Давлат активларини бошқариш агентлиги	Олди-сотди шартномасига мувофиқ
71.	Давлат унитар корхоналарининг мол-мулклари ҳамда уларни реализация қилишдан олинган тушумлар бўйича ҳисобот (ҳар бирини алоҳида шаклда)	Давлат унитар корхоналари	Давлат активларини бошқариш агентлиги	Чораклик
72.	Товар, молия ва рақамли бозорлар тўғрисида ҳисобот	Таҳлил қилинаётган бозор иштирокчилари	Рақобатни ривожлантириш ва истеъмолчилар ҳуқуқларини ҳимоя қилиш қўмитаси	Заруратга кўра
73.	Ишлаб чиқарувчиларнинг саноат маҳсулотлари миқдори ва нархлари тўғрисида ҳисобот	Фармацевтика фаолиятининг дори воситалари ишлаб чиқариш ҳуқуқига эга лицензиатлар	Соғлиқни сақлаш вазирлиги	Ойлик
74.	Таълим ташкилоти, таълим олувчилар ва педагог ходимлар тўғрисида маълумотлар	Нодавлат олий, профессионал таълим ташкилотлари	Олий таълим, фан ва инновациялар вазирлиги	Чораклик
75.	Телекоммуникация хизматлари сифати тўғрисида ҳисобот	Телекоммуникация ва почта алоқаси хизматларини кўрсатувчи хўжалик юритувчи субъектлар	Рақамли технологиялар вазирлиги	Чораклик
76.	Почта алоқаси ва даврий босма нашрларни тарқатиш хизматларининг сифати тўғрисида ҳисобот	Телекоммуникация ва почта алоқаси хизматларини кўрсатувчи хўжалик юритувчи субъектлар	Рақамли технологиялар вазирлиги	Чораклик
77.	Телевидение, радиоалоқа (мобиль алоқа) ва радиоэшиттириш техник воситаларининг иш сифати тўғрисида ҳисобот	Мобиль алоқа операторлари ва телерадиодастурларни тарқатиш (эфир, кабель, эфир-кабель телевидениеси, радиоэшиттириш) хизматларини кўрсатадиган хўжалик юритувчи субъектлар	Рақамли технологиялар вазирлиги	Чораклик
78.	Шаҳарлараро алоқа линиялари, трактлари ва каналларининг иш сифати тўғрисида ҳисобот	«Ўзбекистон телекоммуникация тармоқларини бошқариш республика маркази» ДУК, «Ўзбектелеком» АК	Рақамли технологиялар вазирлиги	Чораклик
79.	Саноат корхоналарига бириктирилган ҳудудлардаги тупроқ деградацияси ва ифлосланиши тўғрисида маълумот	Табиий ресурсларни қазиб олувчи ва қайта ишловчи йирик саноат корхоналари	Қишлоқ хўжалиги вазирлиги	Чораклик
80.	Бизнес-режа ва битим параметрларига риоя қилиш ҳолати тўғрисида маълумот	Пахта-тўқимачилик кластерлари	Қишлоқ хўжалиги вазирлиги	Йиллик
81.	Ер ости сувларини олиш ва беришда сув миқдори тўғрисида ҳисобот	Ер ости сувларидан фойдаланувчилар	Тоғ-кон саноати ва геология вазирлиги тизимидаги «Ўзбекгидрогеология» ДМ	Йиллик
82.	Фойдали қазилмаларни қазиб олишда фойдали қазилмалар захираси ҳаракати тўғрисидаги ҳисобот	Ер қаъридан фойдаланувчилар	Тоғ-кон саноати ва геология вазирлиги ҳузуридаги «Ер қаъридан фойдаланиш маркази» ДМ	Чораклик
83.	Марказий банк фаолиятининг асосий мақсадларини ҳамда назоратга доир вазифаларини амалга ошириш учун зарур бўлган ахборот ва ҳисоботлар	Марказий банк томонидан фаолияти тартибга солинадиган ва назорати амалга ошириладиган ташкилотлар	Марказий банк	Даврий
84.	Темир йўл транспортига оид ташқи сектор статистикаси бўйича маълумот	«Ўзбекистон темир йўллари» АЖ, ички ва халқаро йўналишларда юк ва йўловчи ташиш фаолияти билан шуғулланувчи ташкилотлар	Марказий банк	Чораклик
85.	Хорижий инвесторлар иштирокидаги ташкилотларнинг капитали, норезидентларнинг улушлари ва уларга тўланган дивидендлар, шунингдек, норезидентларга кўрсатилган хизматлар тўғрисида маълумотлар	Лизинг ташкилотлари ва бошқа нобанк молиявий ташкилотлар	Марказий банк	Чораклик
86.	Норезидентларни ташиш ва норезидентлар билан товар ва хизматлар савдоси тўғрисида маълумотлар	Авиация ва автомобиль йўллари соҳасида фаолият юритувчи ташкилотлар	Марказий банк	Чораклик
87.	Табиий газнинг экспорт ва импорт ҳажмлари тўғрисидаги маълумотлар ҳамда маҳсулот тақсимотига оид битимлар (МТБ) ва инвестиция битимлари асосида фаолият юритувчи ташкилотларнинг ишлаб чиқариш, экспорти ва даромадларини тақсимлаш ҳамда чет эл инвесторларининг инвестициялари тўғрисида маълумотлар	Табиий газ экспорт ва импортини амалга оширувчи ҳамда МТБ ва инвестиция битимлари асосида фаолият юритувчи ташкилотлар	Марказий банк	Чораклик
88.	Нобанк ва бошқа молиявий ташкилотлар шарҳини шакллантириш бўйича статистик ҳисоботлар	Нобанк ва бошқа молиявий ташкилотлар	Марказий банк	Чораклик, йиллик
89.	Ишлаб чиқарилган ва реализация қилинган алкоголь, пиво ва тамаки маҳсулотлари ҳажмлари, шунингдек, уларни сотишдан тушган даромад миқдори ҳақида маълумот	Тадбиркорлик субъектлари	Инвестициялар, саноат ва савдо вазирлиги	Заруратга кўра

Изоҳлар:

1. Ягона рўйхатга ўзгартириш ва қўшимчалар киритиш Вазирлар Маҳкамаси томонидан амалга оширилиши мумкин.

2. «Расмий статистика тўғрисида»ги Қонуннинг 9-моддасига мувофиқ расмий статистика соҳасидаги ваколатли давлат органи ўз ваколатлари доирасида статистика услубиятларини ва халқаро тавсияларга мувофиқ бўлган статистика кузатувларининг шаклларини ишлаб чиқади, тасдиқлайди ҳамда жорий этади.

3. Ягона рўйхатга киритилган ҳисобот ва статистик маълумотлар шакллари қонунчилик ҳужжатларида белгиланган тартибда тегишли ваколатли органлар томонидан тасдиқланади»;

(д) 3-илованинг 2-бандидаги «Б.А. Бегалов — Статистика агентлиги директори» сўзлари «Б.С. Ҳамраев — Миллий статистика қўмитаси раиси» сўзлари билан алмаштирилсин;

(ж) 4-иловада:

(i) 3-позиция «Амалга ошириш механизмлари» устуни 1-бандидаги «Статистика агентлигига» сўзлари «Миллий статистика қўмитасига» сўзлари билан, «Ижро учун масъуллар» устунидаги «Статистика агентлиги (Бегалов)» сўзлари «Миллий статистика қўмитаси (Ҳамраев)» сўзлари билан алмаштирилсин;

(ii) 5 — 7-позициялар «Ижро учун масъуллар» устунидаги «Статистика агентлиги (Бегалов)» сўзлари «Миллий статистика қўмитаси (Ҳамраев)» сўзлари билан алмаштирилсин;

(iii) 6-позиция «Ижро муддатлари» устунидаги «2025 йил апрель» сўзлари «2026 йил апрель» сўзлари билан алмаштирилсин.

25. Ўзбекистон Республикаси Президентининг 2024 йил 1 апрелдаги «Ўзбекистон Республикаси Президентининг қишлоқ хўжалиги ва озиқ-овқат маҳсулотларини етиштирувчи, ишлаб чиқарувчи ва уларни экспорт қилувчи тадбиркорлар билан ўтказилган мулоқотида белгиланган вазифаларни амалга ошириш чора-тадбирлари тўғрисида»ги ПҚ-146-сон қарорига 3-илованинг 25-позицияси «Масъул ижрочилар» устунидаги «Статистика агентлиги» сўзлари «Миллий статистика қўмитаси» сўзлари билан алмаштирилсин.

26. Ўзбекистон Республикаси Президентининг 2024 йил 5 апрелдаги «Ёшларга ер ажратиш орқали уларнинг даромадларини ошириш ва бандлигини таъминлаш, шунингдек, янги ер майдонларини ўзлаштириш чора-тадбирлари тўғрисида»ги ПҚ-153-сон қарорининг 1-банди «а» кичик бандида:

(а) иккинчи хатбоши чиқариб ташлансин;

(б) учинчи хатбоши иккинчи хатбоши деб ҳисоблансин.

27. Ўзбекистон Республикаси Президентининг 2024 йил 29 апрелдаги «Ижтимоий ва ишлаб чиқариш инфратузилмасини ривожлантириш бўйича давлат дастурларини шакллантириш ва амалга ошириш жараёнларини самарали ташкил этишнинг қўшимча чоралари тўғрисида»ги ПҚ-165-сон қарорига 1-илованинг 3-позицияси «Вазирлик ва идоралар номи» устунидаги «Статистика агентлиги» сўзлари «Миллий статистика қўмитаси» сўзлари билан алмаштирилсин.

28. Ўзбекистон Республикаси Президентининг 2024 йил 3 июндаги «Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаменти қошида Алкоголь ва тамаки бозорини тартибга солиш инспекцияси фаолиятини ташкил этиш тўғрисида»ги ПҚ-204-сон қарорининг 11-бандидаги «Статистика агентлиги» сўзлари «Миллий статистика қўмитаси» сўзлари билан алмаштирилсин.

29. Ўзбекистон Республикаси Президентининг 2024 йил 20 июндаги «Қишлоқ хўжалиги ва озиқ-овқат соҳасидаги ислоҳотларни жадаллаштириш бўйича қўшимча чора-тадбирлар тўғрисида»ги ПҚ-227-сон қарорида:

(а) 1-банднинг биринчи хатбошиси қуйидаги таҳрирда баён этилсин:

«1. Қишлоқ хўжалиги ва озиқ-овқат соҳасидаги ислоҳотларни самарали ташкил этишни янада жадаллаштириш мақсадида Қишлоқ хўжалиги вазирлиги ҳузурида давлат муассасаси шаклида «Қишлоқ хўжалиги ва озиқ-овқат соҳасидаги лойиҳалар маркази» лойиҳа офиси (кейинги ўринларда — Лойиҳа офиси) ташкил этилсин»;

(б) 3-банд қуйидаги таҳрирда баён этилсин:

«3. Белгилансинки:

Лойиҳа офиси директори қишлоқ хўжалиги вазири томонидан лавозимга тайинланади ва лавозимидан озод этилади;

Лойиҳа офиси штат бирликлари Қишлоқ хўжалиги вазирлиги, Ветеринария ва чорвачиликни ривожлантириш қўмитаси, Ўсимликлар карантини ва ҳимояси агентлиги, Қишлоқ хўжалигида билим ва инновациялар миллий маркази ҳамда тизим ташкилотларининг амалдаги штатлари доирасида шакллантирилади;

Лойиҳа офиси ҳар ойда қишлоқ хўжалиги ва озиқ-овқат соҳасини ислоҳ қилиш ҳолати, амалга оширилаётган чора-тадбирлар, ислоҳотларни амалга оширишга тўсқинлик қилаётган омиллар ва уларни бартараф этиш йўллари тўғрисида қишлоқ хўжалиги вазирига ахборот киритиб боради;

давлат органлари раҳбарлари Лойиҳа офисига ҳар томонлама кўмаклашади, шу жумладан, унинг сўровига кўра ўз ходимларининг ойлик иш ҳақи ва унга тенглаштирилган тўловларни сақлаб қолган ҳолда эксперт сифатида юборилишини таъминлайди;

Қишлоқ хўжалиги вазирлигининг тизим ташкилотлари ҳамда бошқа давлат органлари Лойиҳа офиси томонидан ишлаб чиқилган таклиф ва тавсияларнинг белгиланган муддатларда сифатли амалга оширилишини таъминлайди»;

(в) 4-банддаги «Ўзбекистон Республикаси Президенти Администрацияси» сўзлари «Қишлоқ хўжалиги вазири» сўзлари билан алмаштирилсин;

(г) 5-банд қуйидаги таҳрирда баён этилсин:

«5. Лойиҳа офисини молиялаштириш манбалари этиб қуйидагилар белгилансин:

2026 йилдан бошлаб Қишлоқ хўжалиги вазирлигига биринчи даражали бюджет маблағлари тақсимловчиси сифатида Давлат бюджетидан ажратиладиган маблағлар;

Лойиҳа офисининг асосланган таклифларига кўра Ўзбекистон Республикаси Президенти ҳузуридаги Стратегик ривожланиш ва ислоҳотлар агентлиги ҳисобидан ажратиладиган маблағлар;

халқаро молия институтлари ва хорижий ҳукумат молия ташкилотлари иштирокидаги лойиҳалар доирасида жалб қилинадиган грант маблағлари;

жисмоний ва юридик шахсларнинг ҳомийлик хайриялари;

қонунчилик ҳужжатларида тақиқланмаган бошқа манбалар»;

(д) 6-банд қуйидаги таҳрирда баён этилсин:

«6. Қишлоқ хўжалиги вазирлиги икки ой муддатда Лойиҳа офисининг низомини, шунингдек, унинг тузилмаси, штат бирликлари сонини тасдиқласин.

Бунда Лойиҳа офиси ходимларига Қишлоқ хўжалиги вазирлиги марказий аппарати ходимлари учун белгиланган меҳнатга ҳақ тўлаш ва моддий рағбатлантириш шартлари татбиқ этилади»;

(ж) 7-банднинг «а» кичик бандида:

(i) иккинчи хатбоши чиқариб ташлансин;

(ii) учинчи — саккизинчи хатбошилар тегишинча иккинчи — еттинчи хатбошилар деб ҳисоблансин;

(з) 10-банднинг иккинчи хатбошиси қуйидаги таҳрирда баён этилсин:

«Лойиҳа офиси унга юклатилган вазифаларни бажариш учун зарур бино билан таъминласин».

30. Ўзбекистон Республикаси Президентининг 2024 йил 15 августдаги «Ҳудудларда саноат салоҳиятини янада ошириш бўйича қўшимча чора-тадбирлар тўғрисида»ги ПҚ-295-сон қарорининг 2-банди «б» кичик бандидаги «Статистика агентлиги» сўзлари «Миллий статистика қўмитаси» сўзлари билан алмаштирилсин.

31. Ўзбекистон Республикаси Президентининг 2024 йил 23 сентябрдаги «Камбағалликдан фаровонлик сари» дастурини амалга ошириш бўйича биринчи навбатдаги чора-тадбирлар тўғрисида»ги ПҚ-330-сон қарорининг 6-бандида:

(а) иккинчи хатбоши «кўзда тутилсин» сўзлари билан тўлдирилсин;

(б) учинчи хатбоши чиқариб ташлансин.

32. Ўзбекистон Республикаси Президентининг 2024 йил 14 октябрдаги «Сунъий интеллект технологияларини 2030 йилга қадар ривожлантириш стратегиясини тасдиқлаш тўғрисида»ги ПҚ-358-сон қарорида:

(а) 1-иловага илованинг 3-4-позициялари «Масъул ижрочилар» устунидаги «Статистика агентлиги» сўзлари «Миллий статистика қўмитаси» сўзлари билан алмаштирилсин;

(б) 3-илованинг 1-позицияси «Масъул ташкилотлар» устунидаги «Статистика агентлиги» сўзлари «Миллий статистика қўмитаси» сўзлари билан алмаштирилсин.

33. Ўзбекистон Республикаси Президентининг 2024 йил 24 декабрдаги «2025 — 2027 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида»ги ПҚ-454-сон қарорида:

(а) 1а-илованинг 17-позицияси «Соҳалар номи» устунидаги «Ўзбекистон Республикаси Президенти ҳузуридаги Статистика агентлиги» сўзлари «Ўзбекистон Республикаси Миллий статистика қўмитаси» сўзлари билан алмаштирилсин;

(б) 16-илованинг 1 ва 76-позициялари «Объект номи ва манзили» устунидаги «Ўзбекистон Республикаси Президенти ҳузуридаги Статистика агентлиги» сўзлари «Ўзбекистон Республикаси Миллий статистика қўмитаси» сўзлари билан алмаштирилсин.

34. Ўзбекистон Республикаси Президентининг 2024 йил 25 декабрдаги «Ўзбекистон Республикасининг «2025 йил учун Ўзбекистон Республикасининг Давлат бюджети тўғрисида»ги Қонуни ижросини таъминлаш чора-тадбирлари тўғрисида»ги ПҚ-455-сон қарорида:

(а) 21-банддаги «Статистика агентлиги» сўзлари «Миллий статистика қўмитаси» сўзлари билан алмаштирилсин;

(б) 7-илованинг 15 ва 15.1 позициялари «Ривожлантириш дастури ва мақсадли индикаторлар номи» устунидаги тегишли келишикдаги «Статистика агентлиги» сўзлари тегишли келишикдаги «Миллий статистика қўмитаси» сўзлари билан алмаштирилсин.

35. Ўзбекистон Республикаси Президентининг 2024 йил 31 декабрдаги «Мамлакатнинг ижтимоий, сиёсий ва иқтисодий ривожланиш соҳаларидаги стратегик таҳлил ва тадқиқот қилиш фаолиятини самарали ташкил этиш чора-тадбирлари тўғрисида»ги ПҚ-467-сон қарорига 2-илованинг 3-бандидаги «Б.А. Бегалов — Ўзбекистон Республикаси Президенти ҳузуридаги Статистика агентлиги директори» сўзлари «Б.С. Ҳамраев — Ўзбекистон Республикаси Миллий статистика қўмитаси раиси» сўзлари билан алмаштирилсин.

36. Ўзбекистон Республикаси Президентининг 2025 йил 24 февралдаги «Ўзбекистон Республикаси Миллий статистика қўмитаси фаолиятини ташкил этиш чора-тадбирлари тўғрисида»ги ПҚ-75-сон қарорида:

(а) 5-банднинг биринчи хатбошисидаги «1 392 та» сўзлари «1 425 та» сўзлари билан алмаштирилсин;

(б) 7-илованинг 7-позицияси «Амалга ошириш муддати» устунидаги «2025 йил 1 сентябрдан бошлаб» сўзлари «2026 йил 1 сентябрдан бошлаб» сўзлари билан алмаштирилсин.

37. Ўзбекистон Республикаси Президентининг 2025 йил 3 ноябрдаги «Қорақалпоғистон Республикасида чорвачилик хўжаликлари озуқа базасини мустаҳкамлаш ва қишлоқ хўжалигидаги мавжуд ресурслардан самарали фойдаланиш чора-тадбирлари тўғрисида»ги ПҚ-334-сон қарорига 3-илованинг 7-позицияси «Амалга ошириш механизми» устуни 2-бандидан «(шу жумладан чорвачилик хўжаликлари ва кооперативлари)» сўзлари чиқариб ташлансин.

38. Вазирлар Маҳкамасининг 2018 йил 28 июндаги 487-сон қарори билан тасдиқланган Ўзбекистон Республикаси Қишлоқ хўжалиги вазирлиги ва унинг таркибига кирувчи ташкилотлар ходимларини моддий рағбатлантириш тартиби тўғрисидаги низомнинг 4-банди «лавозим маошининг» сўзларидан кейин «(рағбатлантирувчи коэффициентни ҳисобга олган ҳолда)» сўзлари билан тўлдирилсин.

(Қонунчилик маълумотлари миллий базаси, 22.11.2025 й., 06/25/223/1076-сон)