Таълим жараёнига ўқитишнинг замонавий услубларини жорий этиш, ўқувчиларда мустақил билим олиш кўникмаларини ривожлантириш ҳамда Ўзбекистон Республикаси Президентининг «Ўзбекистон Республикасининг 2012 йилги асосий макроиқтисодий кўрсаткичлари прогнози ва Давлат бюджети параметрлари тўғрисида» 2011 йил 30 декабрдаги ПҚ-1675-сон қарорини бажариш мақсадида Вазирлар Маҳкамаси қарор қилади:

1. Вазирлар Маҳкамасининг 1999 йил 16 августдаги 390-сон қарори билан тасдиқланган Умумий ўрта таълимнинг давлат таълим стандартига иловага мувофиқ ўзгартиришлар киритилсин.

2. Мазкур қарор билан киритилаётган ўзгартиришлар 2012 йил 2 сентябрдан бошлаб кучга киради.

3. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, тасарруфида умумий ўрта таълим мактаблари бўлган вазирликлар ва идоралар 2012/2013 ўқув йилидан бошлаб синф (аудитория) машғулотлари ўртача 5 фоизга камайтирилиши ҳисобига бўшайдиган маблағларнинг ўқув жараёнига ахборот ва бошқа замонавий педагогик технологияларни татбиқ этишни кенгайтириш, компьютер, ўқув-лаборатория синфлари ва ўқув устахоналари учун сарфланадиган материаллар ва бутловчи буюмлар билан таъминлаш бўйича дастурларни, шунингдек умумтаълим мактаблари биноларини жорий таъмирлашни молиялаштиришга йўналтирилишини таъминласинлар.

4. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А.Н. Арипов зиммасига юклансин.

«Умумий ўрта таълим давлат таълим стандартининг таянч ўқув режаси» бўлими ва унга илова қилинган 1-ва 2-жадваллар қуйидаги таҳрирда баён қилинсин:

Умумий ўрта таълим мактаблари учун таянч ўқув режаси давлат таълим стандартининг таркибий қисми бўлиб, таълим соҳаларини меъёрлашга асос бўладиган давлат ҳужжатидир (жадвал). Таянч ўқув режаси ўқув фани бўйича бериладиган таълим мазмунини ўқувчига етказиш учун ажратилган ўқув соатларининг энг кам ҳажмдаги миқдорини ифодалайди. У ҳар бир синфда муайян ўқув фани бўйича давлат стандартларига мувофиқ бериладиган таълим мазмунини аниқлашга асос бўлади: