Ўзбекистон Республикаси Солиқ кодекси, Ўзбекистон Республикаси «Давлат солиқ хизмати тўғрисида»ги Қонунининг 7-моддаси, Ўзбекистон Республикаси «Давлат божхона хизмати тўғрисида»ги Қонунининг 7-моддаси ва Ўзбекистон Республикаси Президентининг 2008 йил 28 майдаги «2008––2010 йилларда саноат кооперацияси асосида тайёр маҳсулотлар, бутловчи буюмлар ва материаллар ишлаб чиқаришни маҳаллийлаштириш дастури тўғрисида»ги ПҚ-879-сон қарорига (Ўзбекистон Республикаси қонун ҳужжатлари тўплами, 2008 й., 22-23-сон, 198-модда) мувофиқ қарор қиламиз:

1. Илова қилинаётган Тасдиқланган маҳаллийлаштириш Дастури лойиҳалари амалга оширилаётган корхоналар томонидан солиқ ва божхона имтиёзларини қўллаш тартиби тўғрисидаги низом тасдиқлансин.

2. Ўзбекистон Республикаси Молия вазирлиги, Давлат солиқ қўмитаси ва Давлат божхона қўмитасининг 2006 йил 18 августда 75, 2006-36, 01-02/8-16-сон билан тасдиқланган «Тасдиқланган маҳаллийлаштириш Дастури лойиҳалари амалга оширилаётган корхоналар томонидан солиқ ва божхона имтиёзларини қўллаш тартиби тўғрисидаги низомни тасдиқлаш ҳақида»ги қарори (2006 йил 24 август, рўйхат рақами 1619 — Ўзбекистон Республикаси қонун ҳужжатлари тўплами, 2006 йил, 34-35-сон, 353-модда) ўз кучини йўқотган деб топилсин.

3. Мазкур қарор Ўзбекистон Республикаси Адлия вазирлигида давлат рўйхатига олинган кундан бошлаб ўн кун ўтгач кучга киради.

Ушбу Низом Ўзбекистон Республикаси Солиқ кодекси, Ўзбекистон Республикаси «Давлат солиқ хизмати тўғрисида»ги Қонунининг 7-моддаси, Ўзбекистон Республикаси «Давлат божхона хизмати тўғрисида»ги Қонунининг 7-моддаси ва Ўзбекистон Республикаси Президентининг 2008 йил 28 майдаги «2008-2010 йилларда саноат кооперацияси асосида тайёр маҳсулотлар, бутловчи буюмлар ва материаллар ишлаб чиқаришни маҳаллийлаштириш Дастури тўғрисида»ги ПҚ-879-сон қарорига (Ўзбекистон Республикаси қонун ҳужжатлари тўплами, 2008 й., 22-23-сон, 198-модда) мувофиқ ишлаб чиқилган ҳамда тасдиқланган маҳаллийлаштириш Дастури лойиҳалари амалга оширилаётган корхоналар томонидан солиқ ва божхона имтиёзларини қўллаш ҳамда улар томонидан даромадларни алоҳида-алоҳида ҳисоб юритиш тартибини белгилайди.

1. Ўзбекистон Республикаси Президентининг 2008 йил 28 майдаги ПҚ-879-сон қарорининг 2 ва 3-иловаларга кўрсатилган қарорни қабул қилинган санасида киритилган корхоналар 2008 йил 28 майдан 2011 йил 1 январгача қуйидагиларни тўлашдан озод этиладилар:

четдан келтириладиган технологик асбоб-ускуналар ва улар учун эҳтиёт қисмлар, шунингдек маҳаллийлаштириладиган маҳсулотлар ишлаб чиқаришда технологик жараёнда фойдаланиладиган, республикада ишлаб чиқарилмайдиган компонентлар учун божхона тўловларидан (божхонада расмийлаштириш йиғимларидан ташқари);

маҳаллийлаштириш лойиҳалари бўйича ишлаб чиқарилган маҳсулотлар бўйича фойда солиғидан, ягона солиқ тўловидан (солиқ солишнинг соддалаштирилган тизимини қўллайдиган субъектлар учун);

маҳаллийлаштириладиган маҳсулотлар ишлаб чиқариш учун фойдаланиладиган асосий ишлаб чиқариш фондлари бўйича мулк солиғидан.

2. Ўзбекистон Республикаси Президентининг 2008 йил 28 майдаги ПҚ-879-сон қарорининг 2 ва 3-иловаларига уни қабул қилинганидан (2008 йил 28 майдан) сўнг киритилаётган янги корхоналар учун ушбу Низомнинг 1-бандида кўрсатилган солиқ ва божхона имтиёзлари Ўзбекистон Республикаси Вазирлар Маҳкамасининг тасдиқланган маҳаллийлаштириш Дастурига янги лойиҳаларни киритиш тўғрисидаги қарори қабул қилинган санасидан бошлаб, агар қарорнинг ўзида кечроқ муддат кўрсатилмаган бўлса, татбиқ этилади.

3. Ушбу Низомнинг 1-бандида кўрсатилган солиқ ва божхона имтиёзлари юқорида кўрсатилган қарорнинг 2а, 3а ва 4-сон иловаларига киритилган корхоналар учун 2008 йил 28 майдан 2009 йил 1 январгача берилади.

4. Ушбу Низомда назарда тутилган солиқ ва божхона имтиёзлари берилиши муносабати билан бўшаб қоладиган маблағлар янги ишлаб чиқаришларни ташкил этишга, шунингдек фаолият кўрсатаётган ишлаб чиқаришларни кенгайтиришга, реконструкция қилишга, модернизациялашга, техник ва технологик жиҳатдан қайта жиҳозлашга, маҳаллийлаштириладиган маҳсулотлар ишлаб чиқариш учун зарур бўлган хом ашё ва материаллар сотиб олишга, Маҳаллийлаштириш дастурини амалга оширишга жалб қилинган корхоналарнинг муҳандис-техник ходимларини рағбатлантиришга йўналтирилади.

5. Ушбу Низомнинг 1-бандида кўрсатилган солиқ ва божхона имтиёзларини расмийлаштириш ва бухгалтерлик ҳисобида акс эттириш тартиби Юридик шахсларга солиқлар, божхона ва мажбурий тўловларни бюджетга тўлаш бўйича берилган имтиёзларни расмийлаштириш ва бухгалтерлик ҳисобида акс эттириш тартиби тўғрисидаги низом (2005 йил 2 апрель, рўйхат рақами 1463 — Ўзбекистон Республикаси қонун ҳужжатлари тўплами, 2005 й., 14-сон, 105-модда) билан тартибга солинади.

6. Солиқлар ва божхона тўловларини тўлашдан озод этиш натижасида бўшаган маблағлар мақсадга мувофиқ фойдаланилмаган тақдирда, бу маблағлар жарима жазосини, шу жумладан пеняни ҳисоблаган ҳолда, қонун ҳужжатларига мувофиқ бюджетга тўлиқ ундирилади.

7. Маҳаллийлаштириш лойиҳалари бўйича ишлаб чиқарилган маҳсулотни реализация қилишдан олинган даромадни фойда солиғидан озод қилиш кўринишидаги имтиёзни қўллаш учун корхоналар маҳаллийлаштириш лойиҳалари бўйича ишлаб чиқарилган маҳсулотни реализация қилишдан олинган даромадлар (харажатлар) бўйича алоҳида-алоҳида ҳисоб юритишлари керак.

8. Фойда солиғи ҳисоб-китоби Ўзбекистон Республикаси Молия вазирлиги ва Давлат солиқ қўмитасининг 2007 йил 29 декабрдаги «Солиқ ҳисоботининг шаклларини тасдиқлаш тўғрисида»ги 111, 2007-66-сон қарори (2008 йил 21 январь, рўйхат рақами 1760 — Ўзбекистон Республикаси қонун ҳужжатлари тўплами, 2008 й., 3-4-сон, 15-модда) билан тасдиқланган Юридик шахслардан олинадиган фойда солиғи бўйича солиқ ҳисоботи шакллари асосида амалга оширилади.

9. Ягона солиқ тўлови тўловчиси ҳисобланган микрофирмалар ва кичик корхоналарга солиқ солиш хусусиятларини ҳисобга олиб, ягона солиқ тўлови бўйича назарда тутилган имтиёз маҳаллийлаштириш лойиҳалари бўйича ишлаб чиқарилган маҳсулотни реализация қилишдан олинган тушум суммасига қўлланади. Айтиб ўтилган имтиёзни қўллаш учун корхоналар маҳаллийлаштириш лойиҳалари бўйича ишлаб чиқарилган маҳсулотни реализация қилишдан олинган тушум бўйича алоҳида-алоҳида ҳисоб юритишлари керак.

10. Ягона солиқ тўлови ҳисоб-китоби Ўзбекистон Республикаси Молия вазирлиги ва Давлат солиқ қўмитасининг 2007 йил 29 декабрдаги «Солиқ ҳисоботининг шаклларини тасдиқлаш тўғрисида»ги 111, 2007-66-сон қарори (2008 йил 21 январь, рўйхат рақами 1760 —Ўзбекистон Республикаси қонун ҳужжатлари тўплами, 2008 й., 3-4-сон, 15-модда) билан тасдиқланган Ягона солиқ тўлови бўйича солиқ ҳисоботи шакллари асосида амалга оширилади.

11. Маҳаллийлаштирилаётган маҳсулот ишлаб чиқариш учун ишлатиладиган асосий ишлаб чиқариш фондларини мол-мулк солиғидан озод қилиш кўринишидаги имтиёзни қўллаш учун корхоналар маҳаллийлаштирилаётган маҳсулот ишлаб чиқариш учун ишлатиладиган асосий ишлаб чиқариш фондлари бўйича солиқ солиш базасини алоҳида-алоҳида ҳисобини юритишлари керак.

12. Мол-мулк солиғи бўйича имтиёз маҳаллийлаштирилаётган маҳсулотни ишлаб чиқариш учун четдан олиб келинган, бироқ норматив муддатларда ўрнатилмаган асосий фондлар учун қўлланилмайди. Бундай мол-мулк бўйича солиқ Ўзбекистон Республикаси Солиқ кодексига мувофиқ ҳисобланади ва тўланади.

13. Мол-мулк солиғи ҳисоб-китоби Ўзбекистон Республикаси Молия вазирлиги ва Давлат солиқ қўмитасининг 2007 йил 29 декабрдаги «Солиқ ҳисоботининг шаклларини тасдиқлаш тўғрисида»ги 111, 2007-66-сон қарори (2008 йил 21 январь, рўйхат рақами 1760 — Ўзбекистон Республикаси қонун ҳужжатлари тўплами, 2008 й., 3-4-сон, 15-модда) билан тасдиқланган Юридик шахсларнинг мол-мулкига солинадиган солиқ бўйича солиқ ҳисоботи шакллари асосида амалга оширилади.

14. Агар асосий ишлаб чиқариш фондларидан фақат маҳаллийлаштирилаётган маҳсулот ишлаб чиқариш учун фойдаланилмаса, имтиёз реализация қилишдан олинган соф тушумда маҳаллийлаштирилаётган маҳсулотнинг салмоғидан келиб чиқиб, Ўзбекистон Республикаси Молия вазирлиги ва Давлат солиқ қўмитасининг 2007 йил 29 декабрдаги «Солиқ ҳисоботининг шаклларини тасдиқлаш тўғрисида»ги 111, 2007-66-сон қарори (2008 йил 21 январь, рўйхат рақами 1760 — Ўзбекистон Республикаси қонун ҳужжатлари тўплами, 2008 й., 3-4-сон, 15-модда) билан тасдиқланган Юридик шахсларни мол-мулк солиғи бўйича солиқ ҳисоботи шаклларининг 5-сон иловасида кўрсатилган маълумотлар асосида тақдим этилади.

Масалан, агар асосий ишлаб чиқариш фондларининг қолдиқ қиймати корхона бўйича умуман 1500 млн.сўмни, реализация қилишдан олинган соф тушумда маҳаллийлаштирилаётган маҳсулотнинг салмоғи 25 фоизни ташкил этса, солиқ солинмайдиган асосий ишлаб чиқариш фондларининг қиймати 375 млн.сўмни (1500 х 25/100) ташкил этади.

15. Четдан келтириладиган технологик асбоб-ускуналар ва улар учун эҳтиёт қисмлар, шунингдек республикада ишлаб чиқарилмайдиган ва маҳаллийлаштирилаётган маҳсулот ишлаб чиқариш чоғида технологик жараёнда ишлатиладиган компонентларни божхона тўловларидан (божхона расмийлаштируви учун йиғимлар бундан мустасно) озод этиш бўйича имтиёз эркин муомалага чиқариш режимига ўтказиш божхона расмийлаштируви пайтида ва Ташқи иқтисодий алоқалар, инвестициялар ва савдо вазирлигининг белгиланган тартибда бериладиган хулосаси асосида тақдим этилади.

Бунда четдан олиб келинадиган эҳтиёт қисмларга (четдан олиб келинадиган технологик асбоб-ускуналар қийматида ҳисобга олинмайдиган), солиқ солинадиган оборот, шу жумладан ноль ставка бўйича оборот учун ишлатиладиган компонентларга ҳисоблаб ёзилган қўшилган қиймат солиғи суммаси тайёр маҳсулот бўйича бюджетга тўланадиган қўшилган қиймат солиғини ҳисоблаб чиқариш чоғида камайтирилади (ҳисобга олинади).

16. Ҳудудий давлат божхона хизмати органлари божхона тўловларини тўламасдан четдан товар олиб келган юридик шахслар реестрлари ва тақдим этилган имтиёзлар ҳисобини юритадилар.

17. Товар эркин муомалага чиқарилганидан кейин ҳудудий давлат божхона хизмати органлари ҳар чоракда, ҳисобот давридан кейинги ойнинг 10-кунига қадар (юридик шахснинг тегишлилиги бўйича) Қорақалпоғистон Республикаси, вилоятлар ёки Тошкент шаҳар давлат солиқ бошқармаларига Четдан келтириладиган технологик асбоб-ускуналар ва улар учун эҳтиёт қисмлар, шунингдек республикада ишлаб чиқарилмайдиган ва маҳаллийлаштирилаётган маҳсулот ишлаб чиқариш чоғида технологик жараёнда ишлатиладиган компонентлар тўғрисидаги маълумотни ушбу Низомнинг иловасига биноан тақдим этишлари керак. Давлат солиқ органлари маълумот олинган санадан эътиборан уч кун ичида юридик шахс рўйхатдан ўтган жойдаги туман давлат солиқ инспекциясига мазкур маълумотни юборадилар.

18. Давлат солиқ хизмати органларига юбориладиган ахборотда қуйидагилар мажбурий тартибда кўрсатилади:

ўз эҳтиёжлари учун товарлар импорт қилувчи, божхона тўловларини тўлашдан озод қилинган юридик шахснинг номи ва СТИРи;

чет эллик товар етказиб берувчининг номи, контракт рақами ва унинг контрактни божхона органида ҳисобга қўйиш чоғида берилган рўйхат рақами;

товарлар номи, уларнинг сони ва тақдим этилган имтиёзлар суммаси.

19. Имтиёзни қўллаган ҳолда четдан олиб келинган технологик асбоб-ускуналар ва уларнинг эҳтиёт қисмлари, шунингдек компонентларидан мақсадга кўра фойдаланмаслик ҳолатлари аниқланганда давлат солиқ хизмати органи аниқланган ҳолат тўғрисида ҳужжатларни тузади, улар уч иш куни мобайнида тегишли давлат божхона хизмати органига юборилади. Мақсадга кўра фойдаланилмаган технологик асбоб-ускуналар ва уларнинг эҳтиёт қисмлари, шунингдек компонентларига тўғри келадиган божхона тўловлари бўйича имтиёзлар суммаси жарима жазосини, шу жумладан пеняни ҳисоблаган ҳолда, Юридик шахсларга солиқлар, божхона ва мажбурий тўловларни бюджетга тўлаш бўйича берилган имтиёзларни расмийлаштириш ва бухгалтерлик ҳисобида акс эттириш тартиби тўғрисида низомда (2005 йил 2 апрель, рўйхат рақами 1463 –– Ўзбекистон Республикаси қонун ҳужжатлари тўплами, 2005 й., 14-сон, 105-модда) назарда тутилган тартибда бюджетга ундирилади.

20. Лойиҳа Маҳаллийлаштириш Дастуридан чиқарилганда лойиҳани амалга оширувчи корхона Ўзбекистон Республикаси Вазирлар Маҳкамасининг лойиҳани маҳаллийлаштириш Дастуридан чиқариш тўғрисидаги қарори кучга кирган пайтдан бошлаб мазкур Низомнинг 1-бандида келтирилган солиқ ва божхона имтиёзларидан маҳрум этилади.

21. Маҳаллийлаштириш Дастурида назарда тутилган мажбуриятларни бажаришни таъминламаган ва шу асосда маҳаллийлаштириш Дастуридан чиқарилган корхоналар:

а) маҳаллийлаштирилаётган маҳсулотни ишлаб чиқариш учун илгари четдан олиб кирилган товарларнинг (компонентларнинг) қолдиқ қисмида божхона тўловлари бўйича бюджет билан қайта ҳисоб-китобларни амалга оширишлари шарт. Қайта ҳисоб-китоблар жарима жазоси қўлланилмаган ҳолда амалга оширилади;

б) ушбу банднинг «а» кичик бандида назарда тутилган тартибда қайта ҳисобланган божхона тўловлари бўйича тўланган маблағларни чегирган ҳолда 8840 «Мақсадли ишлатиладиган солиқ имтиёзлари» ҳисобварағида (маҳаллийлаштириладиган маҳсулот қисмида) акс эттириладиган ишлатилмаган маблағларнинг қолдиғини маҳаллийлаштириш Дастуридан чиқариш тўғрисидаги қарор кучга кирган кундан бошлаб уч кун мобайнида бюджетга ўтказиб беришлари шарт.

Мазкур маблағлар ўз вақтида ўтказиб берилмаган ҳолларда амалдаги қонун ҳужжатларига мувофиқ пеня ҳисобланади.

Ушбу банднинг қоидалари имтиёз даври тугагандан сўнг, яъни маҳаллийлаштириш Дастурида белгиланган муддатлар тугагандан сўнг фойдаланилмаган маблағлар қолдиғига ҳам татбиқ этилади.

22. Йил якуни бўйича маҳаллийлаштириш Дастурида назарда тутилган мажбуриятларни тўлиқ бажаришни таъминламаган, бироқ маҳаллийлаштириш Дастуридан чиқарилмаган корхоналар бўйича маҳаллийлаштириладиган маҳсулотни ишлаб чиқариш учун ишлатиладиган компонентлар бўйича хулоса бериш Саноат кооперацияси асосида тайёр маҳсулотлар, бутловчи буюмлар ва материаллар ишлаб чиқаришни маҳаллийлаштириш дастурининг амалга оширилишини таъминлаш бўйича Махсус комиссиянинг қарори бўйича ўтган йилда имтиёзларни қўллаган ҳолда четдан олиб кирилган компонентларнинг қолдиғини ҳисобга олган ҳолда амалга оширилади.

23. Корхоналар тақдим этилган солиқ ва божхона имтиёзларини ҳисобга олган ҳолда солиқлар ва бошқа мажбурий тўловларни тўғри ҳисоблаб чиқариш ҳамда мазкур Низом ва амалдаги қонун ҳужжатларига мувофиқ ўз вақтида тўлаш ва ҳисоб-китоблар тақдим этиш учун жавобгар бўладилар.

24. Солиқ ва божхона имтиёзларининг тўғри қўлланиши устидан назорат Ўзбекистон Республикаси давлат солиқ ва божхона хизмати органлари томонидан Ўзбекистон Республикасининг Солиқ ва Божхона кодексларига мувофиқ амалга оширилади.

25. Мазкур Низом Ўзбекистон Республикаси Иқтисодиёт вазирлиги ва Ташқи иқтисодий алоқалар, инвестициялар ва савдо вазирлиги билан келишилган.