1463-сон 02.04.2005. Юридик шахсларга солиқлар, божхона ва мажбурий тўловларни бюджетга тўлаш бўйича берилган имтиёзларни расмийлаштириш ва бухгалтерия ҳисобида акс эттириш тартиби тўғрисида низомни тасдиқлаш ҳақида

Ҳужжат кучини йўқотган " " 01.01.2025

ЎЗБЕКИСТОН РЕСПУБЛИКАСИ МОЛИЯ ВАЗИРЛИГИ
ЎЗБЕКИСТОН РЕСПУБЛИКАСИ ДАВЛАТ СОЛИҚ ҚЎМИТАСИ
ЎЗБЕКИСТОН РЕСПУБЛИКАСИ ДАВЛАТ БОЖХОНА ҚЎМИТАСИНИНГ

Қарори

ЮРИДИК ШАХСЛАРГА СОЛИҚЛАР, БОЖХОНА ВА МАЖБУРИЙ ТЎЛОВЛАРНИ БЮДЖЕТГА ТЎЛАШ БЎЙИЧА БЕРИЛГАН ИМТИЁЗЛАРНИ РАСМИЙЛАШТИРИШ ВА БУХГАЛТЕРИЯ ҲИСОБИДА АКС ЭТТИРИШ ТАРТИБИ ТЎҒРИСИДА НИЗОМНИ ТАСДИҚЛАШ ҲАҚИДА

[Ўзбекистон Республикаси Адлия вазирлиги томонидан 2005 йил 2 апрелда 1463-сон билан давлат рўйхатидан ўтказилди]

LexUZ шарҳи

Мазкур қарор Ўзбекистон Республикаси Иқтисодиёт ва молия вазирлигининг 2024 йил 29 ноябрдаги 196-сон ва Солиқ қўмитасининг 2024 йил 28 ноябрдаги 2024-22-сонли «Юридик шахсларга солиқлар, божхона тўловлари ва йиғимлар бўйича берилган имтиёзларни бухгалтерия ҳисобида акс эттириш тартиби тўғрисидаги низомни тасдиқлаш ҳақида»ги қарорига (рўйхат рақами 3590, 25.12.2024 й.) асосан 2025 йил 1 январдан ўз кучини йўқотади.

«Бухгалтерия ҳисоби тўғрисида»ги Ўзбекистон Республикаси Қонунининг 5-моддасига, «Давлат солиқ хизмати тўғрисида»ги Ўзбекистон Республикаси Қонунининг 7-моддасига, «Давлат божхона хизмати тўғрисида»ги Ўзбекистон Республикаси Қонунининг 7-моддасига, «Норматив-ҳуқуқий ҳужжатлар тўғрисида»ги Ўзбекистон Республикаси Қонунининг 23-моддасига мувофиқ Ўзбекистон Республикаси Молия вазирлиги, Давлат солиқ қўмитаси ва Давлат божхона қўмитаси қарор қилади:

1. Юридик шахсларга солиқлар, божхона ва мажбурий тўловларни бюджетга тўлаш бўйича берилган имтиёзларни расмийлаштириш ва бухгалтерия ҳисобида акс эттириш тартиби тўғрисида низом (янги таҳрирда) иловага мувофиқ тасдиқлансин.

2. 2002 йил 19 апрелдаги Ўзбекистон Республикаси Молия вазирлигининг 52-сонли, Ўзбекистон Республикаси Давлат солиқ қўмитасининг 2002-21-сонли, Ўзбекистон Республикаси Давлат божхона қўмитасининг 02/8-6-сонли «Бюджетга солиқлар, божхона ва мажбурий тўловлар бўйича юридик шахсларга берилган имтиёзларни бухгалтерия ҳисобида акс эттириш ва расмийлаштириш тартиби тўғрисидаги низомни тасдиқлаш ҳақида»ги қарори (2002 йил 25 июнь, рўйхат рақами 1155 — Меъёрий ҳужжатлар ахборотномаси, 2002 й., 11-сон) кучини йўқотган деб ҳисоблансин.

3. Мазкур қарор Ўзбекистон Республикаси Адлия вазирлигида давлат рўйхатидан ўтказилган кундан бошлаб ўн кун ўтгандан кейин кучга киради.

Молия вазири С. РАҲИМОВ

Тошкент ш.,

2005 йил 24 февраль,

29-сон

Давлат солиқ қўмитаси раиси Б. ПАРПИЕВ

Тошкент ш.,

2005 йил 24 февраль,

2005-25-сон

Давлат божхона қўмитаси раиси Б. МАТЛЮБОВ

Тошкент ш.,

2005 йил 24 февраль,

01-02/8-3-сон

Ўзбекистон Республикаси Молия вазирлиги, Давлат солиқ қўмитаси ва Давлат божхона қўмитаси томонидан 2005 йил 24 февралда, 29, 2005-25, 01-02/8-3-сон қарор билан
«ТАСДИҚЛАНГАН»

Юридик шахсларга солиқлар, божхона ва мажбурий тўловларни бюджетга тўлаш бўйича берилган имтиёзларни расмийлаштириш ва бухгалтерия ҳисобида акс эттириш тартиби тўғрисида

Низом

(янги таҳрири)

Мазкур Низом «Бухгалтерия ҳисоби тўғрисида» ги Ўзбекистон Республикаси Қонунининг 5-моддасига, «Давлат солиқ хизмати тўғрисида»ги Ўзбекистон Республикаси Қонунининг 7-моддасига, «Давлат божхона хизмати тўғрисида»ги Ўзбекистон Республикаси Қонунининг 7-моддасига, «Норматив-ҳуқуқий ҳужжатлар тўғрисида»ги Ўзбекистон Республикаси Қонунининг 23-моддасига мувофиқ ва юридик шахслар томонидан бюджетга тўланадиган солиқлар, божхона ва мажбурий тўловларни тўлаш бўйича берилган имтиёзларни (кейинги ўринларда — солиқлар ва божхона имтиёзлари) расмийлаштириш ва бухгалтерия ҳисобида акс эттиришнинг ягона тартибини белгилаш мақсадида ишлаб чиқилган.

1-§. Умумий қоидалар

1. Мазкур Низомнинг амал қилиши қонунчилик ҳужжатларига мувофиқ солиқлар ва божхона имтиёзлари берилган, мулкчилик шаклидан, фаолият туридан, идоравий мансублигидан қатъи назар, Ўзбекистон Республикаси ҳудудидаги барча бирлашмалар, корхоналар, ташкилотлар, муассасаларга (кейинги ўринларда — хўжалик юритувчи субъектлар) тааллуқлидир.

(1-банд Ўзбекистон Республикаси адлия вазирининг 2021 йил 30 ноябрдаги 20-мҳ-сонли буйруғи (рўйхат рақами 3338, 30.11.2021 й.) таҳририда — Қонунчилик маълумотлари миллий базаси, 30.11.2021 й., 10/21/3338/1117-сон)

2. Хўжалик юритувчи субъектларга солиқлар ва божхона имтиёзлари:

а) бўшаётган маблағларни мақсадли вазифаларни бажариш учун йўналтириш шарти билан;

б) бўшаётган маблағларни мақсадли ишлатиш назарда тутилмаган ҳолда берилади.

3. Бўшаётган маблағларни мақсадли ишлатиш назарда тутилмаган солиқлар ва божхона имтиёзлари берилганда бюджетга тўланадиган солиқлар, божхона ва мажбурий тўловлар ҳисобланмайди ва маҳсулот (товарлар, ишлар, хизматлар) ҳамда бошқа хил мол-мулкнинг сотиш (харид) қийматига киритилмайди.

4. Солиқлар ва божхона имтиёзлари бўшаётган маблағларни мақсадли вазифаларни бажариш учун йўналтириш шарти билан берилганда солиқлар, божхона ва мажбурий тўловларни бюджетга ҳисоблаш қонунчилик ҳужжатларига мувофиқ умумбелгиланган тартибда амалга оширилади.

(4-банднинг биринчи хатбошиси Ўзбекистон Республикаси адлия вазирининг 2021 йил 30 ноябрдаги 20-мҳ-сонли буйруғи (рўйхат рақами 3338, 30.11.2021 й.) таҳририда — Қонунчилик маълумотлари миллий базаси, 30.11.2021 й., 10/21/3338/1117-сон)

Бунда:

а) божхона божи, акциз солиғи, ҚҚС ва ҳоказо турлари бўйича ҳисобланган божхона тўловлари суммалари, улар имтиёз берилганлиги сабабли бюджетга тўланмайди деган белги қўйилган ҳолда божхона юк декларациясининг 47- ва «В» устунларида кўрсатилади;

б) солиқ имтиёзлари берилган, бюджетга ҳисобланган солиқлар ва мажбурий тўловлар бўйича ҳисоб-китоблар, тўловчи рўйхатга олинган жойдаги солиқ органларига белгиланган шакллар ва муддатларга мувофиқ тақдим этилади. Маҳсулот (товар, ишлар, хизматлар) ва бошқа активлар реализация қилинаётганда солиқ солинадиган айланмага ҳисобланган ҚҚС (ҚҚС тўловчилар учун) ва акциз солиғи (акцизли товарлар (маҳсулотлар) сотилганда) суммаси ажратилган ҳолда счёт-фактура ёзилади.

5. Бўшаётган маблағларни мақсадли вазифаларни бажаришга йўналтириш шарти билан солиқ ва божхона имтиёзлари берилганда ҳисоблаган божхона тўловлари, солиқлар (мазкур солиқ тўловчилари учун ҚҚС, шунингдек қонунчилик ҳужжатларига мувофиқ ҳисобга қабул қилинадиган акциз солиғидан ташқари) ва бюджетга мажбурий тўловлар қонунчилик ҳужжатларига мувофиқ умумбелгиланган тартибда маҳсулот (товарлар, ишлар, хизматлар) ҳамда бошқа хил мол-мулкнинг сотиш (харид) қийматига киритилади.

(5-банднинг биринчи хатбошиси Ўзбекистон Республикаси адлия вазирининг 2021 йил 30 ноябрдаги 20-мҳ-сонли буйруғи (рўйхат рақами 3338, 30.11.2021 й.) таҳририда — Қонунчилик маълумотлари миллий базаси, 30.11.2021 й., 10/21/3338/1117-сон)

ҚҚС тўловчиси ҳисобланган ва ҚҚС бўйича имтиёзга эга бўлган корхоналар харид қилинадиган (шу жумладан импорт қилинадиган) товар-моддий захиралар (товарлар) бўйича ҚҚС суммасини харид қийматига киритмайдилар, балки умумбелгиланган тартибда бюджетга тўланадиган ҚҚСни аниқлашда қоплашга қабул қиладилар.

Ўз эҳтиёжлари учун фойдаланиладиган асосий воситалар ва номоддий активлар ҳисобда харид қилиш қиймати бўйича ҚҚС ва акциз солиғи суммаси қўшилган ҳолда акс эттирилади.

Акциз солиғи бўйича имтиёз берилаётганида қонунчилик ҳужжатларига мувофиқ қоплашга қабул қилинадиган акциз солиғи тўловчилари ҳисобланган корхоналар харид қилинган (шу жумладан импорт қилинаётган) товар-моддий захиралар (товарлар) бўйича акциз солиғи суммасини уларнинг харид қийматига киритмайдилар, балки умумбелгиланган тартибда бюджетга тўланадиган акциз солиғини аниқлашда қоплашга қабул қиладилар.

(5-банднинг тўртинчи хатбошиси Ўзбекистон Республикаси адлия вазирининг 2021 йил 30 ноябрдаги 20-мҳ-сонли буйруғи (рўйхат рақами 3338, 30.11.2021 й.) таҳририда — Қонунчилик маълумотлари миллий базаси, 30.11.2021 й., 10/21/3338/1117-сон)

6. Солиқ ва божхона имтиёзлари миқдори белгиланган тартибда бюджетга ҳисобланган солиқлар, божхона ва мажбурий тўловлардан келиб чиққан ҳолда аниқланади.

2-§. Бўшаётган маблағларни мақсадли вазифаларни бажаришга йўналтириш шарти билан солиқ ва божхона имтиёзларини бухгалтерия ҳисобида акс эттириш тартиби

7. Бўшаётган маблағларни мақсадли вазифаларни бажаришга йўналтириш шарти билан солиқ ва божхона имтиёзларининг бухгалтерия ҳисоби 8840 «Мақсадли фойдаланиладиган солиқ имтиёзлари» счётида, берилган солиқлар ва божхона имтиёзларининг турлари бўйича юритилади.

Солиқ ва божхона имтиёзларини ҳисоблаётганда батафсил ҳисобга олиш мақсадида хўжалик юритувчи субъектларнинг ишчи счётлар режасида қуйидаги счётлар очилади:

а) бюджетга бўнак тўловларини ҳисобга олувчи счётлар (4400) гуруҳида «Бюджетга солиқлар ва йиғимлар бўйича бўнак тўловлари — солиқ ва божхона имтиёзлари (турлари бўйича)» счёти;

б) бюджетга тўловлар бўйича қарзни ҳисобга олувчи счётлар (6400) гуруҳида «Бюджетга тўловлар бўйича қарз — солиқ ва божхона имтиёзлари (турлари бўйича)» счёти;

в) суғурта бўйича ва давлат мақсадли жамғармаларига тўловлар бўйича қарзларни ҳисобга олувчи счётлар (6500) гуруҳида «Давлат мақсадли жамғармаларига тўловлар — солиқ имтиёзлари (турлари бўйича)» счёти;

г) турли кредиторлардан қарзни ҳисобга олувчи счётлар (6900) гуруҳида «Импортда ҚҚС ва акцизлар бўйича ҳисобланган солиқ имтиёзлари (турлари бўйича)» счёти.

8. Солиқ ва божхона имтиёзлари бухгалтерия ҳисобида қуйидаги тартибда акс эттирилади:

а) қонунчилик ҳужжатларига мувофиқ товар-моддий захиралар, асосий воситалар, номоддий активлар ва ўрнатиладиган асбоб-ускуналарни, шу жумладан импорт қилинадиганлари харид қилинаётганда харид қийматига киритиладиган, умумбелгиланган тартибда ҳисобланган солиқлар ва божхона тўловлари суммасига (мазкур солиқ тўловчилари учун ҚҚС, шунингдек қонунчилик ҳужжатларига мувофиқ қоплашга қабул қилинадиган акциз солиғидан ташқари):

(8-банднинг «а» кичик банди Ўзбекистон Республикаси адлия вазирининг 2021 йил 30 ноябрдаги 20-мҳ-сонли буйруғи (рўйхат рақами 3338, 30.11.2021 й.) таҳририда — Қонунчилик маълумотлари миллий базаси, 30.11.2021 й., 10/21/3338/1117-сон)

дебет капитал қўйилмаларни ҳисобга олувчи счётлар (0800), ўрнатиладиган асбоб-ускуналарни ҳисобга олувчи счётлар (0700), товар-моддий захираларни ҳисобга олувчи счётлар (1000 — 2900);

кредит «Бюджетга тўловлар бўйича қарз — солиқ ва божхона имтиёзлари (турлари бўйича)» счёти;

б) Ўзбекистон Республикаси ҳудудида товар-моддий захираларни сотиб олганда ушбу солиқни тўловчилар учун ҚҚСдан, шунингдек қонунчиликда ўрнатилган тартибда қоплашга қабул қилинадиган акциз солиғи суммасига:

дебет «Бюджетга солиқлар ва йиғимлар бўйича бўнак тўловлари — солиқ ва божхона имтиёзлари (турлари бўйича)» счёти;

кредит 6010 «Мол етказиб берувчилар ва пудратчиларга тўланадиган счётлар» ёки 6120 «Шуъба ва қарам хўжалик жамиятларига тўланадиган счётлар» счётлари ёки турли кредиторларга бўлган қарзларни ҳисобга олувчи счётлар (6900) ёки бошқа тегишли счётлар;

в) импорт бўйича товар-моддий захираларни сотиб олганда ушбу солиқни тўловчилар учун ҚҚСдан, шунингдек қонунчиликда ўрнатилган тартибда қоплашга қабул қилинадиган акциз солиғи суммасига:

кредит «Импортда ҚҚС ва акциз бўйича ҳисобланган солиқ имтиёзлари (турлари бўйича)» счёти;

г) товар-моддий захираларини импортидаги ҚҚС ва акциз солиғини тўлашдан озод қилиниши натижасида бўшаётган маблағлар суммасига:

дебет «Импортда ҚҚС ва акциз бўйича ҳисобланган солиқ имтиёзлари (турлари бўйича)» счёти;

кредит 8840 «Мақсадли фойдаланадиган солиқ имтиёзлари» счёти;

д) маҳсулот (иш, хизмат)ларни сотганда ҳисобланган ҚҚС, акциз солиғи суммасига:

дебет 4010 «Харидорлар ва буюртмачилардан олинадиган счётлар», 4120 «Шуъба ва қарам хўжалик жамиятларидан олинадиган счётлар» счётлари;

кредит «Бюджетга тўловлар бўйича қарз — солиқ ва божхона имтиёзлари (турлари бўйича)» счёти;

е) олдин ҳисобланган ҚҚС ва қонунчиликка мувофиқ қоплашга қабул қилинадиган акциз солиғини қоплашга қабул қилиш:

дебет «Бюджетга тўловлар бўйича қарз — солиқ ва божхона имтиёзлари (турлари бўйича)» счёти;

кредит «Бюджетга солиқлар ва йиғимлар бўйича бўнак тўловлари — солиқ ва божхона имтиёзлари (турлари бўйича)» счёти;

ж) маҳсулот (иш, хизмат) ларни сотишдаги ҚҚС ва акциз солиғини тўлашдан озод қилиниши натижасида бўшаётган маблағлар суммасига:

дебет «Бюджетга тўловлар бўйича қарз — солиқ ва божхона имтиёзлари (турлари бўйича)» счёти;

кредит 8840 «Мақсадли фойдаланадиган солиқ имтиёзлари» счёти;

з) асосий воситалар ва бошқа активларнинг чиқиб кетишида ҳисобланган ҚҚС суммасига:

дебет асосий воситалар ва бошқа активларнинг чиқиб кетишини ҳисобга олувчи счётлар (9200);

кредит «Бюджетга тўловлар бўйича қарз — солиқ ва божхона имтиёзлари (турлари бўйича)» счёти;

и) қонунчиликка мувофиқ давр харажатларига олиб бориладиган умумўрнатилган тартибда ҳисобланган солиқ ва бюджетга мажбурий тўловлар суммасига:

дебет 9430 «Бошқа операцион харажатлар» счёти;

кредит «Бюджетга тўловлар бўйича қарз — солиқ ва божхона имтиёзлари (турлари бўйича)» счёти;

кредит «Мақсадли давлат жамғармаларига тўловлар — солиқ имтиёзлари (турлари бўйича)» счёти;

к) хўжалик юритувчи субъектларнинг фойдаси ҳисобига олиб бориладиган умумўрнатилган тартибда ҳисобланган солиқ ва бюджетга мажбурий тўловлар суммасига:

дебет солиқлар ва йиғимларни тўлаш учун фойданинг ишлатилишини ҳисобга олувчи счётлар (9800);

кредит «Бюджетга тўловлар бўйича қарз — солиқ ва божхона имтиёзлари (турлари бўйича)» счёти;

л) солиқлар, божхона ва бюджетга мажбурий тўловларни тўлашдан озод қилиниши натижасида бўшаётган маблағлар суммасига:

дебет «Бюджетга тўловлар бўйича қарз — солиқ ва божхона имтиёзлари (турлари бўйича)» счёти;

дебет «Мақсадли давлат жамғармаларига тўловлар — солиқ имтиёзлари (турлари бўйича)» счёти;

кредит 8840 «Мақсадли фойдаланиладиган солиқ имтиёзлари» счёти.

9. 8840 «Мақсадли фойдаланиладиган солиқ имтиёзлари» счётида ҳисобга олинган солиқ ва божхона имтиёзлари натижасида бўшаётган маблағларни суммаси қуйидаги тартибда ҳисобдан чиқарилади:

а) асосий воситалар, номоддий активлар, товар-моддий қийматликларни сотиб олишга, кредит ва қарзларни қоплашга, асосий воситаларни реконструкция ва модернизация қилишга йўналтирилганда, имтиёзли давр кўрсатилган ҳолларда — муддатларнинг энг ками бўйича: имтиёзли давр тугаганда ёки ҳақиқатдан фойдаланилганда, имтиёзли давр кўрсатилмаган ҳолларда эса — ҳар йили:

дебет 8840 «Мақсадли фойдаланиладиган солиқ имтиёзлари» счёти;

кредит «Солиқ ва божхона имтиёзлари»ни ажратган ҳолда 8530 «Текинга олинган мулк» счёти;

б) жорий мажбуриятларни вужудга келишига олиб келадиган жорий харажатларни қоплашга йўналтирилганда (масалан: иш ҳақи, ижара, мақсадли давлат жамғармаларига ажратмалар ҳисобланганда ва бошқалар):

дебет 8840 «Мақсадли фойдаланиладиган солиқ имтиёзлари» счёти;

кредит 6010 «Мол етказиб берувчилар ва пудратчиларга тўланадиган счётлар» ёки 6120 «Шуъба ва қарам хўжалик жамиятларига тўланадиган счётлар» ёки 6710 «Меҳнат ҳақи бўйича ходим билан ҳисоблашишлар» счётлари ёки турли кредиторларга бўлган қарзларни ҳисобга олувчи счётлар (6900) ёки бошқа тегишли счётлар.

3-§. Бўшаётган маблағлардан мақсадли фойдаланиш назарда тутилмаганда солиқ ва божхона имтиёзларини бухгалтерия ҳисобида акс эттириш тартиби

10. Солиқ ва божхона имтиёзлари берилганда бўшаётган маблағлар суммалари, агар улардан мақсадли фойдаланиш назарда тутилмаган бўлса, бухгалтерия ҳисобининг баланс счётларида акс эттирилмайди ва шу муносабат билан Молиявий натижалар тўғрисидаги ҳисоботда (2-сон шакл) акс эттирилмайди ва, тегишлича, молиявий натижаларни шакллантиришга таъсир қилмайди.

11. Вақтинчалик солиқ ва божхона имтиёзларида бўшаётган маблағларнинг лозим даражадаги бухгалтерия ҳисобини таъминлаш мақсадида, агар уларни мақсадли ишлатиш назарда тутилмаган бўлса, бюджетга тўланадиган ҳар бир солиқ тури, божхона ва мажбурий тўловлар бўйича «Вақтинчалик солиқ ва божхона имтиёзлари» алоҳида балансдан ташқари счёти очилади.

Бюджетга тўланадиган ҳар бир солиқ тури, божхона ва мажбурий тўловлар бўйича ҳисобланган, бўшаган маблағлар суммаси умумбелгиланган тартибда мазкур счётлар дебети бўйича акс эттирилади.

12. Имтиёз берилган давр тугаганидан сўнг «Вақтинчалик солиқ ва божхона имтиёзлари» балансдан ташқари счётлари дебетида ҳисобга олинадиган бўшаган маблағлар суммаси ушбу счётлар кредитига ҳисобдан чиқарилади.

13. Доимий солиқ ва божхона имтиёзларида бўшаётган маблағлар, агар уларни мақсадли ишлатиш назарда тутилмаган бўлса, бюджетга тўланадиган ҳар бир солиқ тури, божхона ва мажбурий тўлов бўйича молиявий ҳисоботга тушунтириш хатида ёритиб берилади.

4-§. Ҳисоб-китобларни тақдим қилиш муддатлари ва хўжалик юритувчи субъектларнинг жавобгарлиги

14. Солиқ ва божхона имтиёзлари берилиши натижасида бўшаган маблағлардан мақсадли фойдаланганлигини тасдиқлаш учун хўжалик юритувчи субъектлар ҳар йили йиллик молиявий ҳисоботга қўшиб давлат солиқ хизмати органларига мазкур низомга 1-сон иловага мувофиқ шаклда улардан фойдаланиш тўғрисидаги ҳисоб-китобни тақдим қиладилар.

15. Маблағлардан мақсадга мувофиқ фойдаланилмаганлиги ва солиқ ва божхона имтиёзлари натижасида бўшаган маблағлар ҳисобига харид қилинган активларнинг имтиёзли давр тугашига қадар бошқаларга берилиши (сотилиши) далиллари аниқланганда ушбу маблағлар жарима жазосини қўллаб, қонунчилик ҳужжатларига мувофиқ пеня ҳисобга олинган ҳолда бюджетга ундирилади.

(15-банд Ўзбекистон Республикаси адлия вазирининг 2021 йил 30 ноябрдаги 20-мҳ-сонли буйруғи (рўйхат рақами 3338, 30.11.2021 й.) таҳририда — Қонунчилик маълумотлари миллий базаси, 30.11.2021 й., 10/21/3338/1117-сон)

16. Хўжалик юритувчи субъектлар ҳисоб-китоблар тўғри бўлиши ва ўз вақтида тақдим этилиши учун жавобгардир.

Ҳисоб-китоблар тақдим этилмаган ёки ўз вақтида тақдим этилмаган тақдирда хўжалик юритувчи субъектларга нисбатан қонунчилик ҳужжатларига мувофиқ молиявий жазо қўлланади.

(16-банднинг иккинчи хатбошиси Ўзбекистон Республикаси адлия вазирининг 2021 йил 30 ноябрдаги 20-мҳ-сонли буйруғи (рўйхат рақами 3338, 30.11.2021 й.) таҳририда — Қонунчилик маълумотлари миллий базаси, 30.11.2021 й., 10/21/3338/1117-сон)

5-§. Давлат божхона ва солиқ хизматлари органлари томонидан назорат қилиш

17. Ҳудудий солиқ органлари тақдим этилган ҳисоб-китоблар асосида бўшаётган маблағларни мақсадли вазифаларни бажаришга йўналтириш шарти билан солиқ имтиёзлари берилган, шунингдек бўшаётган маблағлардан мақсадли фойдаланишни назарда тутмайдиган солиқ имтиёзлари бўйича хўжалик юритувчи субъектларнинг реестрини юритадилар.

18. Ўзбекистон Республикаси Иқтисодиёт ва молия вазирлиги ҳузуридаги Божхона қўмитасининг ҳудудий бошқармалари расмийлаштирилган БЮДлар асосида бўшаётган маблағларни мақсадли вазифаларни бажаришга йўналтириш шарти билан божхона имтиёзлари берилган, шунингдек бўшаётган маблағлардан мақсадли фойдаланишни назарда тутмайдиган божхона имтиёзлари бўйича хўжалик юритувчи субъектларнинг реестрини юритадилар.

(18-банд Ўзбекистон Республикаси иқтисодиёт ва молия вазирининг 2023 йил 6 июлдаги 52-сонли буйруғи (рўйхат рақами 3448, 25.07.2023 й.) таҳририда — Қонунчилик маълумотлари миллий базаси, 26.07.2023 й., 10/23/3448/0539-сон)

19. Ўзбекистон Республикаси Иқтисодиёт ва молия вазирлиги ҳузуридаги Божхона қўмитасининг ҳудудий бошқармалари ҳар ойда, ҳисобот ойидан кейинги ойнинг 20-кунигача, маълумот учун Иқтисодиёт ва молия вазирлиги ҳузуридаги Солиқ қўмитасининг ҳудудий бошқармаларига (импорт қилувчиларнинг юридик манзиллари бўйича) мазкур Низомга 2 ва 3-сон иловаларга кўра шакл бўйича божхона имтиёзлари берилган хўжалик юритувчи субъектларнинг реестрини юборадилар.

(19-банднинг биринчи хатбошиси Ўзбекистон Республикаси иқтисодиёт ва молия вазирининг 2023 йил 6 июлдаги 52-сонли буйруғи (рўйхат рақами 3448, 25.07.2023 й.) таҳририда — Қонунчилик маълумотлари миллий базаси, 26.07.2023 й., 10/23/3448/0539-сон)

Реестрда хўжалик юритувчи субъектнинг СТИРи, КТУТ коди, номи ва юридик манзили, божхона имтиёзлари берилишига асос бўлган меъёрий-ҳуқуқий ҳужжатнинг номи, рақами ва санаси, божхона юк декларациясининг рақами, товар тури, мақсадли вазифаларни бажаришга йўналтирилган, шунингдек бўшаётган маблағлардан мақсадли фойдаланишни назарда тутмайдиган божхона тўловлари турлари бўйича берилган божхона имтиёзлари суммаси кўрсатилади.

20. Ўзбекистон Республикаси Иқтисодиёт ва молия вазирлиги ҳузуридаги Солиқ қўмитаси, давлат мақсадли жамғармалари ҳар чоракда, ҳисобот ойидан кейинги ойнинг 25-кунига қадар Ўзбекистон Республикаси Иқтисодиёт ва молия вазирлигига бюджетга ва давлат мақсадли жамғармаларига тўланадиган, уларга доир имтиёзлар бериладиган, ҳисоблаб ёзилган солиқлар, мажбурий тўловлар суммаси тўғрисида маълумотларни тақдим этадилар.

(20-банд Ўзбекистон Республикаси иқтисодиёт ва молия вазирининг 2023 йил 6 июлдаги 52-сонли буйруғи (рўйхат рақами 3448, 25.07.2023 й.) таҳририда — Қонунчилик маълумотлари миллий базаси, 26.07.2023 й., 10/23/3448/0539-сон)

21. Ўзбекистон Республикаси Иқтисодиёт ва молия вазирлиги ҳузуридаги Божхона қўмитаси ҳар ойда, ҳисобот ойидан кейинги ойнинг 20-кунига қадар, Ўзбекистон Республикаси Иқтисодиёт ва молия вазирлигига вилоятлар бўйича божхона тўловлари турларига доир берилган имтиёзлар тўғрисида, шунингдек ҳар чоракда — божхона имтиёзлари берилган хўжалик юритувчи субъектлар бўйича божхона тўловлари турларига доир маълумотларни юборади.

(21-банд Ўзбекистон Республикаси иқтисодиёт ва молия вазирининг 2023 йил 6 июлдаги 52-сонли буйруғи (рўйхат рақами 3448, 25.07.2023 й.) таҳририда — Қонунчилик маълумотлари миллий базаси, 26.07.2023 й., 10/23/3448/0539-сон)

__________________________________ ‎(ҳисоб-китоб қабул қиладиган идоранинг номи) ‎‎ ‎‎‎__________________________________ ‎(корхонанинг тўлиқ номи) ‎ ‎________________________________________________ ‎‎(‎Жавобгар (ижрочи) шахс фамилияси)‎ ‎ ‎Тел.: _____________ факс: ___________ ‎					Қабул қилган идора муҳри ёки белгиси ‎‎Олинди ‎20 __ й. «___» __________ ‎‎
‎Солиқ, божхона ва мажбурий тўловларни бюджетга тўлашдан озод этиш натижасида бўшаган маблағлардан фойдаланиш тўғрисидаги ҳисоб-китоб‎
______________________________ ‎(ҳисобот даври) ‎
‎	‎	‎	‎	‎	‎	‎	‎	‎	‎
Т/р‎	Тўловларнинг номи ‎‎				Сумма‎‎‎		Асос, имтиёз даври‎‎
1‎.	‎‎				‎‎		‎‎
2‎.	‎‎				‎‎‎		‎‎
‎	Жами суммага‎‎				‎‎‎		‎‎
‎	Белгиланган мақсадларга йўналтирилган маблағлар жами‎‎				‎‎		‎‎
‎	Шу жумладан, қуйидаги мақсадларга:‎‎				‎‎‎		‎‎
‎	‎‎				‎‎		‎‎
‎	‎	‎	‎	‎	‎	‎	‎	‎	‎
‎	‎‎20___ й. «____» _______________ ‎(тақдим қилинган сана )				‎	‎	‎	‎	‎
‎	Раҳбар ‎Бош бухгалтер ‎‎				(имзо) ‎(имзо)‎	‎	‎М.Ў. ‎	‎	‎
‎	‎	‎	‎	‎	‎	‎	‎	‎	‎

Бўшаган маблағларни мақсадли фойдаланиш назарда тутилган божхона имтиёзлари берилган хўжалик юритувчи субъектларнинг

реестри

Т/р	СТИР	КТУТ бўйича коди	Хўжалик юритувчи субъектнинг номи ва юридик манзили	Имтиёз беришга асос бўлган меъёрий ҳужжатнинг номи, тартиб рақами ва санаси	БЮД т/р	Товар номи ва ТИФ ТН бўйича коди	Божхона тўловларининг турлари бўйича берилган имтиёзлар суммаси (сумда)
Т/р	СТИР	КТУТ бўйича коди	Хўжалик юритувчи субъектнинг номи ва юридик манзили		БЮД т/р	Товар номи ва ТИФ ТН бўйича коди	божхона божи	акциз	ҚҚС	божхона йиғими	жами

Бўшаган маблағларни мақсадли фойдаланиш назарда тутилмаган божхона имтиёзлари берилган хўжалик юритувчи субъектларнинг

реестри

Т/р	СТИР	КТУТ бўйича коди	Хўжалик юритувчи субъектнинг номи ва юридик манзили	Имтиёз беришга асос бўлган меъёрий ҳужжатнинг номи, тартиб рақами ва санаси	БЮД т/р	Товар номи ва ТИФ ТН бўйича коди	Божхона тўловларининг турлари бўйича берилган имтиёзлар суммаси (сумда)
Т/р	СТИР	КТУТ бўйича коди	Хўжалик юритувчи субъектнинг номи ва юридик манзили		БЮД т/р	Товар номи ва ТИФ ТН бўйича коди	божхона божи	акциз	ҚҚС	божхона йиғими	жами

(Ўзбекистон Республикаси қонун ҳужжатлари тўплами, 2005 й., 14-сон, 105-модда; Қонунчилик маълумотлари миллий базаси, 30.11.2021 й., 10/21/3338/1117-сон; 26.07.2023 й., 10/23/3448/0539-сон)