Сотиб олинаётган моддий-техника ва ёқилғи-энергетика ресурсларига қишлоқ хўжалигининг харажатлари ортиб бораётганлиги муносабати билан ҳамда овқатбоп қишлоқ хўжалик маҳсулотлари етиштиришни кўпайтиришда жамоа хўжаликлари, давлат хўжаликларини, ижара, фермер ва бошқа хўжаликларни рағбатлантириш мақсадида Вазирлар Маҳкамаси қарор қилади:

1. 1993 йилнинг 20 апрелидан бошлаб чорва ва сутнинг чегараланган харид нархларини 1-иловага мувофиқ, картошка ва мева-сабзавот маҳсулотлари асосий турларининг чегараланган харид нархларини 2-иловага мувофиқ ошириш ҳамда қуруқ мева ва майизнинг харид нархларини шартномавий (эркин) нархлар тоифасига ўтказиш тўғрисида Ўзбекистон Республикаси Қишлоқ хўжалик вазирлигининг Молия вазирлиги билан келишилган таклифи қабул қилинсин.

2. Қишлоқ хўжалик маҳсулотларини республикадан ташқарига олиб чиқиб кетишнинг Вазирлар Маҳкамаси 1992 йил 21 январда 23-сон қарори билан тасдиқлаган тартиби асосан сақлаб қолинсин.

1993 йил 20 апрелдан бошлаб корхоналар, хўжаликлар, тайёрлов ташкилотлари, кооперативлар деҳқон (фермер) хўжаликлари, ижарачилар, шахсий ёрдамчи хўжаликларнинг эгалари ва фуқаролар учун республикадан ташқарига олиб чиқиб кетадиган қишлоқ хўжалик маҳсулотларидан олинадиган бож миқдорлари 3-иловага мувофиқ тасдиқлансин.

«Картошка, мева-сабзавот маҳсулотлари ва қуруқ меванинг харид нархларини ўзгартириш тўғрисида» Вазирлар Маҳкамаси 1992 йил 14 апрелда қабул қилган 188-сон қарори 2-бандининг учинчи хатбошиси амал қилиши сақлаб қолинсин. Унда ҳукуматлараро битимлар ва тўғридан-тўғри хўжалик алоқалари бўйича республикадан ташқарига мева-сабзавот маҳсулотлари етказиб берувчи корхоналар, хўжаликлар ва ташкилотлар бож тўлашдан озод қилиниши белгиланган.

3. 1993 йил 20 апрелдан бошлаб айрим озиқ-овқат моллари чегараланган чакана нархларининг янги даражаси 4-иловага мувофиқ белгилансин.

4. Ўзбекистон Республикасининг Молия вазирлиги:

ушбу қарорга берилган иловаларга мувофиқ янги харид нархлари ва чакана нархлар, шунингдек қайтадан баҳолаш тўғрисидаги кўрсатмалар манфаатдор вазирликларга, идоралар, корхоналар ва ташкилотларга, Қорақалпоғистон Республикасининг Вазирлар Кенгашига, вилоятлар ва Тошкент шаҳар ҳокимликларига ўз вақтида етказилишини таъминласин;

«Ўзгўштсутсаноат» уюшмаси билан биргаликда чорва ва сутнинг ушбу қарорда белгиланган янги чегараланган харид нархлари асосида чегараланган чакана нархларда сотиладиган гўшт, қаймоғи олинмаган сут ва болалар овқатининг улгуржи нархларини бир ҳафта муддат ичида қайта кўриб чиқсин.

5. Барча мулкчилик шаклидаги корхоналар ва ташкилотлар ушбу қарорнинг 4-иловасидаги рўйхат бўйича маҳсулотнинг қолдиқларини 1993 йил 20 апрелгача бўлган ҳолатига кўра қайтадан баҳолаб, қўшимча нархлар суммасини тенг улушларда бюджетдан ташқари 746-ҳисоб рақамига ва ўзларининг муомаладаги маблағларини тўлдиришга ўтказсинлар.

6. Вазирлар Маҳкамасининг 1993 йил 16 январдаги 34-сон қарори, 1992 йил 3 августдаги 358-сон қарори, Вазирлар Маҳкамасининг 1993 йил 5 февралдаги 62-сон қарорига берилган иловадаги гўшт чакана нархларининг чегараланган миқдорлари ҳамда Вазирлар Маҳкамасининг 1992 йил 16 октябрдаги 475-сон қарори 1-иловасидаги макарон маҳсулотлари, ўсимлик ёғи ва қаймоғи олинмаган сут чакана нархларининг чегараланган миқдорлари ўз кучини йўқотган деб топилсин.