|
Hujjat kuchini yo‘qotgan " " 17.04.2017
|
Oʻzbekiston Respublikasi Vazirlar Mahkamasining
qarori
Oldingi tahrirga qarang.
AHOLINI ISh BILAN TAʼMINLASh TOʻGʻRISIDAGI QONUN HUJJATLARINI BUZGANLIK UChUN JARIMALAR SOLISh TARTIBI TOʻGʻRISIDAGI NIZOMNI TASDIQLASh HAQIDA
(qaror nomi Oʻzbekiston Respublikasi Vazirlar Mahkamasining 2008-yil 20-avgustdagi 186-sonli qarori tahririda — OʻR QHT, 2008-y., 34-son, 333-modda)
LexUZ sharhiMazkur qaror Oʻzbekiston Respublikasi Vazirlar Mahkamasining 2017-yil 13-martdagi 130-sonli “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasi Prezidentining “Aholining hojatmand qatlamlarini ijtimoiy qoʻllab-quvvatlash hamda tibbiy-ijtimoiy yordam koʻrsatish tizimini yanada takomillashtirish chora-tadbirlari toʻgʻrisida” 2016-yil 22-fevraldagi PF–4782-son Farmoni hamda Oʻzbekiston Respublikasi Prezidentining “Oʻzbekiston Respublikasi Mehnat vazirligi faoliyatini tashkil etishni takomillashtirish chora-tadbirlari toʻgʻrisida” 2016-yil 24-fevraldagi PQ–2498-son qarori”gi qaroriga asosan oʻz kuchini yoʻqotgan.
Oʻzbekiston Respublikasi Oliy Majlisining “Yangi tahrirdagi “Aholini ish bilan taʼminlash toʻgʻrisida”gi Oʻzbekiston Respublikasi Qonunini amalga kiritish haqida” 1998-yil 1-maydagi qaroriga muvofiq Vazirlar Mahkamasi qaror qiladi:
1. Quyidagilar:
Oldingi tahrirga qarang.
(1-bandning ikkinchi xatboshi Oʻzbekiston Respublikasi Vazirlar Mahkamasining 2008-yil 20-avgustdagi 186-sonli qarori bilan oʻz kuchini yoʻqotgan — OʻR QHT, 2008-y., 34-son, 333-modda)
Aholini ish bilan taʼminlash toʻgʻrisidagi qonun hujjatlarini buzganlik uchun jarima solish tartibi toʻgʻrisidagi nizom (2-ilova) tasdiqlansin.
2. Vazirlar Mahkamasining “Aholini ish bilan taʼminlash toʻgʻrisida”gi Oʻzbekiston Respublikasi Qonunini amalga oshirish chora-tadbirlari toʻgʻrisida” 1992-yil 13-maydagi 235-son qaroriga 3-ilova (Oʻzbekiston Respublikasi QT, 1992-y., 5-son, 18-modda) va Vazirlar Mahkamasining 1998-yil 23-iyuldagi 310-son qarori bilan tasdiqlangan oʻzgartirish va qoʻshimchalar 1-bandining “d” kichik bandi oʻz kuchini yoʻqotgan deb hisoblansin.
Oʻzbekiston Respublikasining Bosh vaziri Oʻ. SULTONOV
Toshkent sh.,
1998-yil 1-dekabr,
504-son
Oldingi tahrirga qarang.
(1-ilova Oʻzbekiston Respublikasi Vazirlar Mahkamasining 2008-yil 20-avgustdagi 186-sonli qarori bilan oʻz kuchini yoʻqotgan — OʻR QHT, 2008-y., 34-son, 333-modda)
Aholini ish bilan taʼminlash toʻgʻrisidagi qonun hujjatlarini buzganlik uchun jarimalar solish tartibi toʻgʻrisida
NIZOM
1. Mazkur Nizom Oʻzbekiston Respublikasi Vazirlar Mahkamasining “Oila manfaatlarini taʼminlash borasida 1998-yilda amalga oshiriladigan tadbirlar Davlat dasturi toʻgʻrisida” 1998-yil 27-yanvardagi 45-son qaroriga muvofiq va “Aholini ish bilan taʼminlash toʻgʻrisida”gi Qonun talablari ijrosini taʼminlash maqsadida ishlab chiqilgan.
2. Nizom aholini ish bilan taʼminlash toʻgʻrisidagi qonun hujjatlarini buzganlik uchun mansabdor shaxslarga jarimalar solish tartibini belgilaydi.
3. “Aholini ish bilan taʼminlash toʻgʻrisida”gi Qonun talablarini buzganlik uchun, idoraviy boʻysunishi, mulkchilik va xoʻjalik yuritish shakllaridan qatʼi nazar, barcha ish beruvchilar belgilangan tartibda javobgarlikka tortiladilar.
4. Aholini ish bilan taʼminlash toʻgʻrisidagi qonun hujjatlariga rioya qilinishi ustidan nazorat va ularning bajarilishini huquqiy vositalar bilan taʼminlash Oʻzbekiston Respublikasi Mehnat va aholini ijtimoiy muhofaza qilish vazirligi, Qoraqalpogʻiston Respublikasi Mehnat va aholini ijtimoiy muhofaza qilish vazirligi, viloyatlar va Toshkent shahar mehnat, aholini ijtimoiy muhofaza qilish bosh boshqarmalari, Bandlikka koʻmaklashish va aholini ijtimoiy muhofaza qilish tuman (shahar) markazlari davlat mehnat huquq inspektorlari tomonidan amalga oshiriladi.
(4-band Oʻzbekiston Respublikasi Vazirlar Mahkamasining 2010-yil 24-martdagi 52-sonli qarori tahririda — OʻR QHT, 2010-y., 13-son, 96-modda)
5. Davlat mehnat huquq inspektorlari oʻz vakolatlari doirasida quyidagi huquqlarga ega:
a) Oʻzbekiston Respublikasi nazorat organlari faoliyatini muvofiqlashtiruvchi Respublika kengashi tomonidan tasdiqlangan muvofiqlashtirish rejalari asosida soliq (moliya) organlari oʻtkazadigan ayni bir vaqtdagi rejali kompleks tekshirishlar davomida, qoidaga koʻra, “Aholini ish bilan taʼminlash toʻgʻrisida”gi Qonunning bajarilishini tekshirish;
b) qonun hujjatlarida nazarda tutilgan xollarda, nazorat organlari faoliyatini muvofiqlashtiruvchi Respublika kengashi yoki uning hududiy komissiyalari bilan kelishilgan tartibda va muddatlarda nazorat tekshirishlarini amalga oshirish;
v) tekshirilayotgan xoʻjalik yurituvchi subyektlardan tekshirish oʻtkazish bilan bevosita bogʻliq boʻlgan zarur hujjatlarni va boshqa axborotlarni olish;
g) yoʻl qoʻyilgan qonun buzilishlarini bartaraf etish vakolatiga ega boʻlgan mansabdor shaxslar bajarishi majburiy boʻlgan yozma koʻrsatmalar berish;
d) aholini ish bilan taʼminlash toʻgʻrisidagi qonun hujjatlarining buzilishida aybdor boʻlgan mansabdor shaxslarga qonun hujjatlarida belgilangan miqdorda jarimalar solish.
(5-bandning “d” kichik bandi Oʻzbekiston Respublikasi Vazirlar Mahkamasining 2011-yil 5-yanvardagi 1-sonli qarori tahririda — OʻR QHT, 2011-y., 1-2-son, 4-modda)
6. Aholini ish bilan taʼminlash toʻgʻrisidagi qonun hujjatlari talablarini buzganlik uchun Maʼmuriy javobgarlik toʻgʻrisidagi kodeksning 50, 51 va 229-moddalariga muvofiq mansabdor shaxslarga quyidagi hollarda va quyidagi miqdorlarda jarima solinadi:
a) Bandlikka koʻmaklashish va aholini ijtimoiy muhofaza qilish markazi tomonidan korxonalar, muassasalar va tashkilotlarga ishga yuborilgan fuqarolarni u yerda boʻsh ish joylari (boʻsh lavozimlar) boʻlgani holda ishga olishdan asossiz bosh tortganlik uchun — eng kam oylik ish haqining besh baravaridan yetti baravarigacha miqdorda;
b) mehnatga biron-bir shaklda maʼmuriy tarzda majbur qilganlik uchun, qonun hujjatlarida nazarda tutilgan hollar bundan mustasno, — eng kam oylik ish haqining bir baravaridan uch baravarigacha miqdorda;
v) boʻsh ish joylari (boʻsh lavozimlar)ni yashirganlik uchun — eng kam oylik ish haqining uch baravaridan besh baravarigacha miqdorda;
g) har bir xodimning oʻrni boʻshayotganligi toʻgʻrisidagi (uning kasbi, mutaxassisligi, malakasi va mehnat haqi miqdorini koʻrsatgan holda) axborotlarni oʻz vaqtida Bandlikka koʻmaklashish va aholini ijtimoiy muhofaza qilish markaziga taqdim etmaganlik uchun — eng kam oylik ish haqining uch baravaridan besh baravarigacha miqdorda;
d) Oʻzbekiston Respublikasining Bandlikka koʻmaklashish davlat jamgʻarmasiga ajratmalarni toʻlashdan boʻyin tovlaganlik uchun — eng kam oylik ish haqining uch baravaridan besh baravarigacha miqdorda.
(6-bandning “d” kichik bandi Oʻzbekiston Respublikasi Vazirlar Mahkamasining 2016-yil 26-apreldagi 122-sonli qarori tahririda — OʻR QHT, 2016-y., 17-son, 176-modda)
7. Ushbu Nizomning 6-bandida koʻrsatilgan undirilgan jarimalar summasi quyidagi tartibda taqsimlanadi:
jarimalar summasining 20 foizi — Oʻzbekiston Respublikasi respublika budjetiga;
(7-bandning ikkinchi xatboshisi Oʻzbekiston Respublikasi Vazirlar Mahkamasining 2016-yil 26-apreldagi 122-sonli qarori tahririda — OʻR QHT, 2016-y., 17-son, 176-modda)
80 foizi — Oʻzbekiston Respublikasi Bandlikka koʻmaklashish davlat jamgʻarmasiga.
(7-bandning uchinchi xatboshisi Oʻzbekiston Respublikasi Vazirlar Mahkamasining 2016-yil 26-apreldagi 122-sonli qarori tahririda — OʻR QHT, 2016-y., 17-son, 176-modda)
(7-band Oʻzbekiston Respublikasi Vazirlar Mahkamasining 2010-yil 2-apreldagi 62-sonli qarori tahririda — OʻR QHT, 2010-y., 14-15-son, 106-modda)
8. Davlat mehnat huquq inspektorlari “Aholini ish bilan taʼminlash toʻgʻrisida”gi Qonun talablarini buzganlik uchun mansabdor shaxslarga jarima solishda quyidagi harakatlarni amalga oshiradilar:
a) qonun buzilganligi haqida bayonnoma tuzadilar. Bayonnomada uning tuzilgan sanasi va joyi, davlat mehnat huquq inspektorining familiyasi, ismi, otasining ismi va lavozimi, ish joyining nomi, qonun buzilishi holatlarining mazmuni, bunga aybdor boʻlgan shaxslarning tushuntirishlari va ushbu tushuntirishlarni koʻrib chiqish natijalari, tekshirish davomida oʻrganilgan hujjatlar, aybdor shaxs qabul qilingan qaror bilan tanishtirilganligi haqidagi maʼlumotlar hamda unga qaror ustidan shikoyat qilish tartibi toʻgʻrisida tushuntirish berilganligi koʻrsatiladi. Bayonnoma davlat mehnat huquq inspektori tomonidan imzolanadi;
b) qonunni buzganlik uchun jarima solish toʻgʻrisida qaror qabul qiladilar. Qarorda u qabul qilingan sana, qonun buzilishi sodir etilgan korxona (tashkilot, muassasa)ning nomi hamda ish beruvchining familiyasi, ismi va otasining ismi, qonun talablari buzilgan holatlar, jarima solish uchun asos boʻlgan qonun va meʼyoriy hujjat nomi, jarima solinayotgan mansabdor shaxsning familiyasi, ismi, otasining ismi va lavozimi, solinayotgan jarima miqdori, jarima oʻtkazilishi lozim boʻlgan bank muassasasi va hisob raqami, qaror bajarilganligi toʻgʻrisida Davlat mehnat huquq inspeksiyasiga maʼlumot berish lozimligi koʻrsatiladi. Qaror davlat mehnat huquq inspektori tomonidan imzolanadi.
9. Qonun buzilganligi haqida bayonnoma va jarima solish toʻgʻrisidagi qaror uch nusxada tuziladi. Ularning birinchi nusxalari —jarima solingan shaxsga, ikkinchi nusxalari — ish beruvchiga, agar jarima ish beruvchiga solinayotgan boʻlsa — u boʻysunadigan yuqori tashkilotga beriladi. Uchinchi nusxalari davlat mehnat huquq inspektorida qoladi.
10. Jarima solish jarayonida paydo boʻladigan huquqiy munosabatlar, shu jumladan jarima solish toʻgʻrisidagi qaror ustidan shikoyat qilish (protest berish), shikoyat (protest)ni koʻrib chiqish, chiqarilgan qaror ijrosini toʻxtatib turish, qaror ijrosi boʻyicha ish yuritish va boshqalar Oʻzbekiston Respublikasining Maʼmuriy javobgarlik toʻgʻrisidagi kodeksida belgilangan tartibda amalga oshiriladi.
