Xalq xoʻjaligida toʻlov intizomini taʼminlash, korxonalar aylanma mablagʻlarini saqlash va toʻldirish maqsadida Vazirlar Mahkamasi qaror qiladi:

1. 1-ilovaga muvofiq vazirliklar va idoralar korxonalarning aylanma mablagʻlarini (ishlab chiqarish zaxiralarini, tayyor mahsulotlari va yarim tayyor mahsulotlari qoldiqlarini hamda tugallanmagan ishlab chiqarishlarini) va oʻrnatilmagan asbob-uskunalarini 1998-yil 1-oktabrdagi holatiga koʻra qayta roʻyxatdan oʻtkazsinlar, uning natijalarini 1998-yilning 9 oyi boʻyicha buxgalteriya hisobotida albatta aks ettirsinlar.

Tasarruflaridagi xoʻjalik yurituvchi subyektlar boʻyicha qayta roʻyxatdan oʻtkazishning oʻz vaqtida va toʻliq amalga oshirilishi yuzasidan shaxsiy javobgarlik yuqorida qayd etilgan vazirliklar, idoralar, tarmoq konsernlari, korporatsiyalari, uyushmalari va xolding kompaniyalari rahbarlari zimmasiga yuklansin.

Aylanma mablagʻlar va oʻrnatilmagan asbob-uskunalarni qayta roʻyxatdan oʻtkazish boʻyicha ishlarni muvofiqlashtirish 2-ilovaga* muvofiq tarmoq ekspert komissiyalariga yuklansin.

2. Tarmoq ekspert komissiyalari 1-ilovaga muvofiq vazirliklar va idoralar boʻyicha aylanma mablagʻlarni qayta roʻyxatdan oʻtkazish natijalarini 1998-yil 1-dekabrgacha umumlashtirsinlar hamda aylanma mablagʻlarning haqiqiy ahvoli toʻgʻrisidagi takliflarni, ularni toʻldirish manbalari, shu jumladan, budjetdan qarzlar boʻyicha penyalarni va korxonalarga bogʻliq boʻlmagan sabablar tufayli vujudga kelgan bank kreditlari uchun toʻlov muddati oʻtkazib yuborilgan foizlarni hisobdan chiqarish hisobiga toʻldirish haqidagi takliflar bilan birga, Hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasiga taqdim etsinlar.

3. Xoʻjalik yurituvchi subyektlar qayta roʻyxatdan oʻtkazish davomida aniqlangan ishlab chiqarishda foydalanilmagan yoki ortiqcha ishlab chiqarish zaxiralarini, yarim tayyor mahsulotlarni, oʻrnatilmagan asbob-uskunalarni sotsinlar, sotishdan olingan tushumni aylanma mablagʻlarni toʻldirishga maqsadli yoʻnaltirsinlar. Nazarda tutilsinki, koʻrsatib oʻtilgan resurslarni sotish pulini 100 foiz oldindan toʻlatish yoki kreditorlik qarzlarni toʻlash, qoʻshilgan qiymat soligʻini hisoblamaslik, tushumni daromad (foyda) soligʻi toʻlashdan ozod qilish shartlari bilan sotiladi. Koʻrsatib oʻtilgan soliq imtiyozlari 1998-yil 31-dekabrgacha qoʻllaniladi.

4. Joriy yilda, Hukumatning ilgari qabul qilingan qarorlariga binoan “Oʻzbekneftgaz” milliy korporatsiyasi, Energetika va elektrlashtirish vazirligi, “Oʻzkimyosanoat”, “Oʻzbekyengilsanoat” uyushmalari, “Oʻzqishloqxoʻjaliktaʼminot-tuzatish” davlat-kooperativ qoʻmitasi va “Oʻzqishloqxoʻjalikmash-xolding” kompaniyasi tizimidagi korxonalar aylanma mablagʻlari respublika budjetidan toʻldirilganligi, shuningdek boshqa bir qator idoralarning korxonalariga moliyaviy yordam koʻrsatilganligi maʼlumot uchun qabul qilinsin.

5. Oʻzbekiston Respublikasi Moliya vazirligining:

Kommunal xizmat koʻrsatish vazirligi tizimidagi issiqlik bilan taʼminlash korxonalariga oʻzaro qarzlarni hisoblash yoʻli bilan 3,5 mlrd soʻm miqdorida aylanma mablagʻlar berish;

“Oʻzdonmahsulot” davlat korporatsiyasi tizimidagi korxonalarga don narxlaridagi tafovut hamda oʻzaro qarzlarni hisoblash hisobiga 7,5 mlrd soʻm miqdorida aylanma mablagʻlar berish toʻgʻrisidagi taklifi qabul qilinsin.

7. Adliya vazirligi, Moliya vazirligi va Davlat soliq qoʻmitasi Oʻzbekiston Respublikasining Maʼmuriy javobgarlik toʻgʻrisidagi kodeksiga va Oʻzbekiston Respublikasining Jinoyat kodeksiga aylanma mablagʻlarni saqlamaganlik, toʻlov muddati oʻtgan debitorlik va kreditorlik qarzlar mavjudligi, buxgalteriya hisobi qonunlarini buzganlik uchun javobgarlikni kuchaytirish boʻyicha tuzatishlar kiritish toʻgʻrisida belgilangan tartibda takliflar kiritsinlar, shuningdek ushbu qonun buzishlar muntazam ravishda sodir etilgan taqdirda jinoiy javobgarlik choralari koʻrilishini nazarda tutsinlar.

8. Belgilab qoʻyilsinki, quyi soliq organlari rahbarlari korxonalar tomonidan mahsulotni pulini oldindan toʻlatmasdan yoxud toʻlov muddati oʻtgan debitorlik qarzlar mavjud boʻlgani holda sotganlik (ishlarni bajarganlik, xizmatlar koʻrsatganlik) yuzasidan jazolar qoʻllamaganlik, huquqni muhofaza qilish organlariga berish uchun tegishli materiallarni rasmiylashtirmaganlik uchun egallab turgan lavozimidan ozod qilishgacha boʻlgan darajada javob beradilar.

9. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.

1. Energetika vazirligi

2. “Oʻzbekneftegaz” milliy korporatsiyasi

3. “Oʻzavtosanoat” uyushmasi

4. “Oʻzqishloqxoʻjalikmash-xolding” kompaniyasi

5. “Oʻzmashsanoat” uyushmasi

6. “Oʻzqishloqxoʻjaliktaʼminottuzatish” davlat qoʻmitasi

7. “Oʻzsuvqurilish” davlat konserni

8. “Oʻzmevasabzavotuzumsanoat-xolding” kompaniyasi

9. “Oziqovqatsanoat” uyushmasi

10. “Egʻmoytamakisanoat” uyushmasi

11. “Oʻzbekmebel” davlat-aksionerlik birlashmasi

12. “Oʻzbekyengilsanoat” davlat uyushmasi

13. “Oʻzqurilishmateriallari” aksiyadorlik kompaniyasi

14. “Toshkentuyjoyinvestqurilish” korporatsiyasi

15. Kommunal xizmat koʻrsatish vazirligi

16. Qishloq va suv xoʻjaligi vazirligi

17. “Oʻzkimyosanoat” uyushmasi

18. “Oʻzavtotrans” davlat korporatsiyasi

19. “Oʻzbekiston temir yoʻllari” davlat-aksionerlik kompaniyasi

20. “Chkalov nomidagi Toshkent aviatsiya ishlab chiqarish birlashmasi” davlat-aksionerlik jamiyati