Qonunchilikka oʻzgartirishlar va qoʻshimchalar kiritilganligi munosabati bilan, shuningdek, moddiy va protsessual huquq normalarini bir xilda qoʻllash maqsadida “Sudlar toʻgʻrisida”gi Qonunning 22-moddasiga asosan, Oʻzbekiston Respublikasi Oliy sudi Plenumi qaror qiladi:

Oʻzbekiston Respublikasi Oliy sudi Plenumining fuqarolik ishlari boʻyicha quyidagi qarorlariga oʻzgartish va qoʻshimchalar kiritilsin:

1. Oʻzbekiston Respublikasi Oliy sudi Plenumining “Sud amaliyotida fuqaro va tashkilotlarning shaʼni, qadr-qimmati va ishchanlik obroʻsini himoya qilish haqidagi qonunlarni qoʻllash toʻgʻrisida” 1992-yil 19-iyundagi 5-sonli qarori:

1-bandi quyidagi tahrirda bayon etilsin:

“1. Oʻzbekiston Respublikasi Konstitutsiyasining 31-moddasi, Fuqarolik kodeksining 100-moddasi va “Ommaviy axborot vositalari toʻgʻrisida”gi Qonunining 34-moddasiga muvofiq har bir inson shaxsiy hayotining daxlsizligi, shaxsiy va oilaviy sirga ega boʻlish, oʻz shaʼni va qadr-qimmatini himoya qilish huquqiga ega ekanligi, har kim oʻz shaxsiga doir maʼlumotlarning himoya qilinishi huquqiga, shuningdek, notoʻgʻri maʼlumotlarning tuzatilishini, oʻzi toʻgʻrisida qonunga xilof yoʻl bilan toʻplangan yoki huquqiy asoslarga ega boʻlmay qolgan maʼlumotlarning yoʻq qilinishini talab qilish huquqiga ega ekanligi, shuningdek, yuridik va jismoniy shaxs ommaviy axborot vositasida eʼlon qilingan, haqiqatga toʻgʻri kelmaydigan va oʻzining shaʼni hamda qadr-qimmatiga dogʻ tushiradigan maʼlumotlar boʻyicha raddiya berishni tahririyatdan talab qilishga haqli ekanligiga sudlarning eʼtibori qaratilsin”;

2-bandining birinchi xatboshisi quyidagi tahrirda bayon etilsin:

“2. Qonunlarni toʻgʻri tatbiq etish, fuqarolarning Oʻzbekiston Respublikasi Konstitutsiyasining 26-moddasida insonning shaʼni va qadr-qimmati daxlsiz ekanligi, hech narsa ularni kamsitish uchun asos boʻlishi mumkin emasligi kafolatlanganligi, ularning huquqlarini amalga oshirishlariga yordam berishini hisobga olib, shaʼn, qadr-qimmat va ishchanlik obroʻsini himoya qilish haqidagi ishlarni sudlar sinchiklab, puxta qurishlari zarur”;

3-bandi:

ikkinchi xatboshi bilan toʻldirilsin:

“Tele-, radio-, video, kinoxronikal dasturlar va ommaviy axborotni davriy tarqatishning boshqa elektron shakllari tahririyati tomonidan olingan raddiya yoki javob aynan oʻsha dastur yoki turkumda, kelgan kunidan eʼtiboran bir oydan kechiktirmay efirga beriladi.”;

ikkinchi xatboshisi uchinchi xatboshi deb hisoblansin;

uchinchi xatboshisi quyidagi tahrirda bayon etilsin:

“Ommaviy axborot vositasi raddiyani, javobni eʼlon qilishdan boʻyin tovlasa yoxud ularni eʼlon qilish uchun belgilab qoʻyilgan muddatni buzsa, yuridik yoki jismoniy shaxs daʼvo arizasi bilan sudga murojaat qilishga haqlidir.”.

8-bandining uchinchi xatboshisi quyidagi tahrirda bayon etilsin:

“Oʻzining shaʼniga haqoratlovchi maʼlumotlar aytilgan, shuningdek, tuhmat qilingan, yolgʻon axborotlar tarqatilgan fuqaro bunday maʼlumotlarni tarqatgan shaxsni Oʻzbekiston Respublikasi Jinoyat kodeksining 139, 140 va 141³-moddalariga koʻra, jinoiy javobgarlikka yoki Oʻzbekiston Respublikasining Maʼmuriy javobgarlik toʻgʻrisidagi kodeksining 40, 41 va 202²-moddalariga koʻra, maʼmuriy javobgarlikka tortish haqida tegishli organlarga murojaat qilishga haqli.”.

2. Oʻzbekiston Respublikasi Oliy sudi Plenumining “Taqdim etuvchiga deb berilgan hujjatlar yoʻqolgan taqdirda ularga boʻlgan huquqlarni tiklash (chaqirib ish yurgizish) haqidagi arizalarning sudlar tomonidan koʻrilishi toʻgʻrisida” 1992-yil 13-noyabrdagi 5b-sonli qarori:

2-bandining uchinchi xatboshisidagi “eng kam ish haqining” jumlasi “bazaviy hisoblash miqdorining” jumlasiga oʻzgartirilsin.

3. Oʻzbekiston Respublikasi Oliy sudi Plenumining “Bolalar tarbiyasi bilan bogʻliq nizolarni hal qilishda sudlar tomonidan qonunlarni qoʻllash amaliyoti toʻgʻrisida” 1998-yil 11-sentabrdagi 23-sonli qarori:

kirish qismining birinchi xatboshisidagi “Oʻzbekiston Respublikasi Konstitutsiyasining 63-moddasiga koʻra” jumlasi “Oʻzbekiston Respublikasi Konstitutsiyasining 76-moddasiga koʻra” jumlasiga oʻzgartirilsin;

9-bandi:

birinchi xatboshisidagi “voyaga yetmaganlar ishlari bilan shugʻullanuvchi komissiyalar” jumlasi “bolalar masalalari boʻyicha komissiyalar” jumlasiga oʻzgartirilsin;

toʻrtinchi xatboshisidagi “voyaga yetmaganlarning ishlari bilan shugʻullanuvchi komissiyalarga” jumlasi “bolalar masalalari boʻyicha komissiyalarga” jumlasiga oʻzgartirilsin;

26-bandi:

birinchi xatboshisidagi “xalq taʼlimi muassasalari faoliyatini metodik taʼminlash va tashkil etish tuman (shahar) boʻlimi” jumlasi “tumanlar (shaharlar) hokimliklarining bolalarni himoya qilish shuʼbalari” jumlasiga oʻzgartirilsin;

ikkinchi xatboshisidagi “Xalq taʼlimi muassasalari faoliyatini metodik taʼminlash va tashkil etish tuman (shahar) boʻlimining” jumlasi “Tumanlar (shaharlar) hokimliklarining bolalarni himoya qilish shuʼbalarining” jumlasiga oʻzgartirilsin;

27-bandidagi “tuman (shahar) xalq taʼlimi muassasalari faoliyatini metodik taʼminlash va tashkil etish tuman (shahar) boʻlimining” jumlasi “tumanlar (shaharlar) hokimliklarining bolalarni himoya qilish shuʼbalarining” jumlasiga oʻzgartirilsin;

28-bandidagi “xalq taʼlimi muassasalari faoliyatini metodik taʼminlash va tashkil etish tuman (shahar) boʻlimi” jumlasi “tumanlar (shaharlar) hokimliklarining bolalarni himoya qilish shuʼbalari” jumlasiga oʻzgartirilsin;

31-bandi:

uchinchi xatboshisidagi “voyaga yetmaganlarning ishlari bilan shugʻullanuvchi komissiya va inspeksiyalarning” jumlasi “bolalar masalalari boʻyicha komissiyaning” jumlasiga oʻzgartirilsin;

toʻrtinchi xatboshisidagi “voyaga yetmaganlarning ishlari bilan shugʻullanuvchi komissiyaga” jumlasi “bolalar masalalari boʻyicha komissiyaga” jumlasiga oʻzgartirilsin.

4. Oʻzbekiston Respublikasi Oliy sudi Plenumining “Fuqarolik kodeksini tatbiq qilishda sud amaliyotida vujudga keladigan ayrim masalalar toʻgʻrisida” 1999-yil 24-sentabrdagi 16-sonli qarori:

oʻzbek tilidagi tahririning 20-bandi birinchi xatboshisi birinchi gapi quyidagi tahrirda bayon etilsin:

“Agar qonunda boshqacha tartib belgilab qoʻyilgan boʻlmasa, undiruv garovga oluvchiga topshirilgan garov narsasiga garov toʻgʻrisidagi shartnomada belgilangan tartibda qaratilishi mumkin.”.

21-bandining birinchi xatboshisidagi “eng kam ish haqining” jumlasi “bazaviy hisoblash miqdorining” jumlasiga oʻzgartirilsin.

5. Oʻzbekiston Respublikasi Oliy sudi Plenumining “Maʼnaviy zararni qoplash haqidagi qonunlarni qoʻllashning ayrim masalalari toʻgʻrisida” 2000-yil 28-apreldagi 7-sonli qarori:

1-bandining birinchi xatboshisi quyidagi tahrirda bayon etilsin:

“1. Maʼnaviy zararni qoplash masalalari Oʻzbekiston Respublikasi Konstitutsiyasining 55-moddasi, Mehnat kodeksining 4, 21, 120, 150, 154, 174, 319, 355, 527, 565, 568-moddalari, 1996-yil 26-apreldagi “Isteʼmolchilarning huquqlarini himoya qilish toʻgʻrisida”gi Qonunining 22-moddasi, 2014-yil 6-maydagi “Aksiyadorlik jamiyatlari va aksiyadorlarning huquqlarini himoya qilish toʻgʻrisida”gi Qonunining 113-moddasi, 2012-yil 2-maydagi “Tadbirkorlik faoliyati erkinligining kafolatlari toʻgʻrisida”gi Qonunining 38-moddasi, Fuqarolik kodeksining 11, 99, 100, 163, 1021 va 1022-moddalari, 1998-yil 29-avgustdagi “Avtomobil transporti toʻgʻrisida”gi Qonunining 19-moddasi va boshqa qonun hujjatlari bilan tartibga solinishiga eʼtibor qaratilsin”;

6-bandining birinchi xatboshisi quyidagi tahrirda bayon etilsin:

“6. Mehnat kodeksining 4, 120, 150, 154, 174, 568-moddalariga binoan sud mehnat va (yoki) mashgʻulotlar sohasida kamsitishlar, ishga qabul qilishni qonunga xilof ravishda rad etilishi, mehnat shartnomasini qonunga xilof ravishda oʻzgartirishi, ishdan qonunga xilof ravishda chetlashtirishi, mehnat shartnomasi qonunga xilof ravishda bekor qilinishi yoki mehnat shartnomasini bekor qilish asoslarining taʼrifini qonunga xilof ravishda oʻzgartirish oqibatida xodimga yetkazilgan maʼnaviy azoblarni kompensatsiya qilish majburiyatini ish beruvchiga yuklashi mumkin.”.

6. Oʻzbekiston Respublikasi Oliy sudi Plenumining “Uy-joy nizolari boʻyicha sud amaliyoti haqida” 2001-yil 14-sentabrdagi 22-sonli qarori:

1-bandi quyidagi tahrirda bayon etilsin:

“1. Oʻzbekiston Respublikasi Konstitutsiyasining 47-moddasiga koʻra, har kim uy-joyli boʻlish huquqiga ega ekanligi, hech kim sudning qarorisiz va qonunga zid tarzda uy-joyidan mahrum etilishi mumkin emasligi, uy-joyidan mahrum etilgan mulkdorga uy-joyning qiymati hamda u koʻrgan zararlarning oʻrni qonunda nazarda tutilgan hollarda va tartibda oldindan hamda teng qiymatda qoplanishi taʼminlanishi belgilanganligi, uy-joy qonunchiligi normalariga rioya qilish fuqarolar, shuningdek, uy-joy fondini hisobga olish, saqlash, foydalanish va taʼmirlashni taʼminlash vakolati yuklatilgan davlat organlari, korxonalar, muassasa va tashkilotlarning uy-joyga boʻlgan huquq va manfaatlarini himoya qilishning muhim shartlaridan biri hisoblanadi. Shuning uchun sudlar bunday toifadagi ishlarni hal etishda masʼuliyatni yanada oshirishlari, nizolarning qonuniy koʻrilishini toʻliq taʼminlashlari lozim.”;

8-bandi quyidagi tahrirda bayon etilsin:

“8. Yer uchastkalari davlat yoki jamiyat ehtiyojlari uchun olib quyilishi munosabati bilan fuqarolar mulkida boʻlgan uylar (kvartiralar) buzilgan taqdirda, mulkdorlarga ularning tanlovi boʻyicha va taraflar kelishuviga koʻra, uy-joy maydonining ijtimoiy normasidan kam boʻlmagan sahndagi, barcha qulayliklari boʻlgan, avvalgisiga teng qimmatli boshqa turar joy mulk qilib beriladi hamda dov-daraxtlarning bozor qiymati toʻlanadi yoxud buzilayotgan uy (kvartira), boshqa imoratlar, inshootlar va dov-daraxtlarning bozor qiymati, shuningdek, yer uchastkasiga boʻlgan huquqning bozor qiymati toʻliq hajmda toʻlanadi. Buzilayotgan uyning (kvartiraning) yoki yer uchastkasiga boʻlgan huquqning bozor qiymati berilayotgan uy-joyning yoki yer uchastkasiga boʻlgan huquqning bozor qiymatidan ortiq boʻlgan taqdirda, bu farq mulkdorga kompensatsiya qilinishi lozim, berilayotgan uy-joyning yoki yer uchastkasiga boʻlgan huquqning bozor qiymati buzilayotgan uyning (kvartiraning) yoki yer uchastkasiga boʻlgan huquqning bozor qiymatidan ortiq boʻlgan taqdirda esa, ushbu farq mulkdor tomonidan qaytarilishi talab etilmaydi.”.

7. Oʻzbekiston Respublikasi Oliy sudi Plenumining “Mehnat vazifalarini bajarishi munosabati bilan xodimning hayoti va sogʻligʻiga yetkazilgan zararni qoplashga oid nizolar boʻyicha sud amaliyoti haqida” 2003-yil 19-dekabrdagi 18-sonli qarori:

11-bandining uchinchi xatboshisidagi “eng kam ish haqi miqdorining” jumlasi “bazaviy hisoblash miqdorining” jumlasiga oʻzgartirilsin.

8. Oʻzbekiston Respublikasi Oliy sudi Plenumining “Sudlar tomonidan nikohdan ajratishga oid ishlar boʻyicha qonunchilikni qoʻllash amaliyoti toʻgʻrisida” 2011-yil 20-iyuldagi 06-sonli qarori:

1-bandi:

birinchi xatboshisi quyidagi tahrirda bayon etilsin:

“1. Sudlarning eʼtibori shunga qaratilsinki, Oʻzbekiston Respublikasining Konstitutsiyasi 76-moddasida oila jamiyatning asosiy boʻgʻini hamda u jamiyat va davlat muhofazasida ekanligi, nikoh Oʻzbekiston xalqining anʼanaviy oilaviy qadriyatlariga, nikohlanuvchilarning ixtiyoriy roziligiga va teng huquqliligiga asoslanishi, davlat oilaning toʻlaqonli rivojlanishi uchun ijtimoiy, iqtisodiy, huquqiy va boshqa shart-sharoitlar yaratishi kafolatlanganligi bois nikoh-oilaviy munosabatlardan kelib chiqadigan ishlarni koʻrishda sudlar zimmasiga katta masʼuliyat yuklaydi.”;

quyidagi mazmundagi uchinchi xatboshi bilan toʻldirilsin:

“Nikohdan ajratish haqidagi daʼvo arizalar sudga kelib tushganda sudya har bir daʼvo ariza boʻyicha taraflar bilan mediatsiya koʻrinishidagi suhbat oʻtkazishi kerakligiga sudyalarning eʼtibori qaratilsin. Bunda sudya muayyan ishning holatlarini muhokama qilmasdan, nikohdan ajratishning salbiy oqibatlarini, jumladan, farzandlarning tarbiyasiga taʼsirini, moddiy va huquqiy holatlarni tushuntirishi, er va xotinni yarashtirish choralarini koʻrishi lozim.”.

9. Oʻzbekiston Respublikasi Oliy sudi Plenumining “Sudlar tomonidan farzandlikka olish haqidagi ishlar boʻyicha qonunchilikni qoʻllash amaliyoti toʻgʻrisida” 2013-yil 11-dekabrdagi 21-sonli qarori:

5-bandining uchinchi xatboshisidagi “oʻn sakkiz yoshga toʻlmagan shaxslarga nisbatan vasiylik va homiylik funksiyalarining amalga oshirilishi xalq taʼlimi muassasalari vasiylik va homiylik boʻlimlari zimmasiga” jumlasi “voyaga yetmaganlarga nisbatan vasiylik va homiylik funksiyalarining amalga oshirilishi tumanlar (shaharlar) hokimliklarining bolalarni himoya qilish shuʼbalariga” jumlasiga oʻzgartirilsin;

oʻzbek tilidagi tahririning 18-bandi birinchi xatboshisidagi “ushbu Kodeks” jumlasi “Oila Kodeksi” jumlasiga oʻzgartirilsin;

32-bandining ikkinchi xatboshisidagi “voyaga yetmaganlar ishi bilan shugʻullanuvchi komissiyalar” jumlasi “bolalar masalalari boʻyicha komissiyalar” jumlasiga oʻzgartirilsin;

33-bandning uchinchi xatboshisidagi “Oʻzbekiston Respublikasi Vazirlar Mahkamasining 2016-yil 14-noyabrdagi 387-sonli qarori” jumlasi “Oʻzbekiston Respublikasi Vazirlar Mahkamasining 2023-yil 20-oktabrdagi 550-sonli qarori” jumlasiga oʻzgartirilsin.

10. Oʻzbekiston Respublikasi Oliy sudi Plenumining “Birinchi instansiya sudi tomonidan fuqarolik protsessual qonun normalarini qoʻllashning ayrim masalalari toʻgʻrisida” 2018-yil 19-maydagi 14-sonli qarori:

3-bandi:

birinchi xatboshisi quyidagicha mazmundagi birinchi va toʻrtinchi xatboshilari bilan almashtirilsin:

“3. Sudya arizani ish yuritishga qabul qilish toʻgʻrisidagi, qabul qilishni rad etish yoki qaytarish yoxud sudga taalluqliligiga koʻra boshqa sudga oʻtkazish haqidagi masalani ariza sudga kelib tushgan kundan eʼtiboran oʻn kundan kechiktirmay yakka tartibda hal etadi. Arizani ish yuritishga qabul qilish, qabul qilishni rad etish yoki qaytarish yoxud arizani sudga taalluqliligiga koʻra, boshqa sudga oʻtkazish toʻgʻrisida ajrim chiqariladi. Arizani ish yuritishga qabul qilishni rad etish yoki qaytarish, shuningdek, arizani taalluqliligiga koʻra, boshqa sudga oʻtkazish toʻgʻrisidagi ajrimning koʻchirma nusxasi ariza va unga ilova qilingan hujjatlar bilan birga arizachiga ajrim chiqarilgandan keyingi kundan kechiktirmay yuboriladi.

Iqtisodiy yoki maʼmuriy suddan ariza yoki ish materiallari sudga taalluqliligiga koʻra, kelib tushganda sudya ariza FPKning 189, 190 va 191-moddalarida koʻrsatilgan talablarga muvofiq emasligini aniqlagach, ariza sudga kelib tushgan kundan eʼtiboran oʻn kundan kechiktirmay daʼvogarni (arizachini) kamchiliklarni bartaraf etish zarurligi toʻgʻrisida xabardor qiladi va unga buning uchun oʻn kundan oshmaydigan muddat beradi.

Tushuntirilsinki, iqtisodiy yoki maʼmuriy suddan kelib tushgan ariza yoki ish materiallaridagi kamchiliklarni bartaraf etish toʻgʻrisidagi xabarnoma sudyaning kamchiliklarni bartaraf etish toʻgʻrisidagi ajrimi bilan rasmiylashtiriladi va ajrimda bu kamchiliklarni bartaraf etish muddati koʻrsatiladi. Mazkur ajrim daʼvogar (arizachi)ga FPK 273-moddasida nazarda tutilgan tartibda yuboriladi.

Kamchiliklar bartaraf etilmagan taqdirda daʼvo ariza (ariza) FPK 195-moddasi, 1-qismining 4¹-bandiga asosan qaytariladi.”;

uchinchi xatboshisidagi “yoki qaytarish” degan soʻzlari “yoki qaytarish yoxud arizani sudga taalluqliligiga koʻra, boshqa sudga oʻtkazishga” degan jumla bilan almashtirilsin;

ikkinchi, uchinchi, toʻrtinchi xatboshilari tegishincha, beshinchi, oltinchi, yettinchi xatboshilari deb hisoblansin.

4-bandining birinchi xatboshisi quyidagi tahrirda bayon etilsin:

“4. Arizani qabul qilishni rad etish yoki qaytarish haqidagi ajrimning koʻchirma nusxasi ariza va unga ilova qilingan hujjatlar bilan birga, arizani yoki ishni sudga taalluqliligiga koʻra, boshqa sudga oʻtkazish haqidagi ajrim nusxasi esa arizachiga ajrim chiqarilgandan keyingi kundan kechiktirmay yuboriladi”.

11. Oʻzbekiston Respublikasi Oliy sudi Plenumining “Fuqarolik ishlari boʻyicha birinchi instansiya sudining ajrimlari toʻgʻrisida” 2019-yil 25-oktabrdagi 19-sonli qarori:

3-bandi:

oʻninchi xatboshi quyidagi tahrirda bayon etilsin:

“ishga daxldor boʻlmagan javobgarni almashtirish yoki shaxsni sherik javobgar sifatida ishga jalb qilish toʻgʻrisida”;

rus tilidagi tahririning yigirma beshinchi xatboshisi chiqarilsin;

oʻzbek tilidagi tahriri quyidagi mazmundagi oʻttiz birinchi xatboshi bilan toʻldirilsin:

“darhol ijro etishga qaratilmagan hal qiluv qarorining ijrosini taʼminlash haqida;”

quyidagi mazmundagi qirqinchi-qirq birinchi xatboshilari bilan toʻldirilsin:

“daʼvo ariza (ariza)ni sudga taalluqliligiga koʻra, iqtisodiy sudga yoki maʼmuriy sudga koʻrib chiqish uchun oʻtkazish toʻgʻrisida;

fuqarolik ishlari boʻyicha sud ish materiallarini sudga taalluqliligiga koʻra, iqtisodiy sudga yoki maʼmuriy sudga koʻrib chiqish uchun oʻtkazish va fuqarolik sud ishini yuritishni tugatish toʻgʻrisida.”;

rus tilidagi tahririning yigirma olti — qirqinchi xatboshilari tegishincha yigirma beshinchi — oʻttiz toʻqqizinchi xatboshilari deb hisoblansin;

oʻzbek tilidagi tahririning oʻttiz birinchi — oʻttiz sakkizinchi xatboshilari tegishincha oʻttiz ikkinchi — oʻttiz toʻqqizinchi xatboshilari deb hisoblansin;

oʻzbek tilidagi tahririning oʻttiz toʻqqizinchi xatboshisi qirq ikkinchi xatboshi deb hisoblansin;

rus tilidagi tahririning qirq birinchi xatboshisi qirq ikkinchi xatboshi deb hisoblansin;

9-bandining uchinchi xatboshi “Arz qilingan talab” degan soʻzlardan keyin “fuqarolik ishlari boʻyicha sudga, iqtisodiy sudga yoki maʼmuriy sudga” degan soʻzlar bilan toʻldirilsin;

11-bandining toʻrtinchi xatboshisi quyidagi tahrirda bayon etilsin:

“ish fuqarolik ishlari boʻyicha sudga, iqtisodiy sudga yoki maʼmuriy sudga taalluqli boʻlmaganligi sababli ish yuritishni tugatish haqida”;

15-bandi:

oʻn sakkizinchi xatboshisi quyidagi tahrirda bayon etilsin:

“Sud buyrugʻini bekor qilish haqidagi va bekor qilishni rad etish toʻgʻrisidagi.”.

quyidagi mazmundagi yigirma olti va yigirma yettinchi xatboshilari bilan toʻldirilsin:

“daʼvo ariza (ariza)ni sudga taalluqliligiga koʻra, iqtisodiy sudga yoki maʼmuriy sudga koʻrib chiqish uchun oʻtkazish toʻgʻrisida;

fuqarolik ishlari boʻyicha sud ish materiallarini sudga taalluqliligiga koʻra, iqtisodiy sudga yoki maʼmuriy sudga koʻrib chiqish uchun oʻtkazish va fuqarolik sud ishini yuritishni tugatish toʻgʻrisida”.

yigirma oltinchi xatboshi yigirma sakkizinchi xatboshi deb hisoblansin.