Hujjat kuchini yo‘qotgan " " 01.04.2025
Oʻzbekiston Respublikasi Bandlik va mehnat munosabatlari vazirligi
Oʻzbekiston Respublikasi Moliya vazirligining
Qarori
Uchquduq, Zarafshon, Nurobod shaharlari va shahar tipidagi Zafarobod posyolkasining budjet tashkilotlari va muassasalari xodimlariga muayyan davr ishlaganlik uchun oylik toʻlovlar toʻlash tartibi toʻgʻrisidagi nizomga oʻzgartirishlar kiritish haqida
[Oʻzbekiston Respublikasi Adliya vazirligi tomonidan 2022-yil 10-noyabrda roʻyxatdan oʻtkazildi, roʻyxat raqami 1026-2]
 LexUZ sharhi
Mazkur qaror Oʻzbekiston Respublikasi adliya vazirining 2024-yil 26-dekabrdagi 33-mh-sonli “Ayrim idoraviy normativ-huquqiy hujjatlarni Idoraviy normativ-huquqiy hujjatlarning davlat reyestridan chiqarish toʻgʻrisida”gi buyrugʻiga (roʻyxat raqami 3594, 27.12.2024-y.) asosan 2025-yil 1-apreldan davlat reyestridan chiqariladi.
Oʻzbekiston Respublikasining Budjet kodeksi hamda “Normativ-huquqiy hujjatlar toʻgʻrisida”gi Qonuniga muvofiq, shuningdek Uchquduq, Zarafshon, Nurobod shaharlari va shahar tipidagi Zafarobod posyolkasining budjet tashkilotlari xodimlariga muayyan davr ishlaganlik uchun oylik toʻlovlar olish huquqini beradigan ish stajini hisoblab chiqishni tartibga solish maqsadida Oʻzbekiston Respublikasi Bandlik va mehnat munosabatlari vazirligi va Oʻzbekiston Respublikasi Moliya vazirligi qaror qiladi:
1. Mehnat va aholini ijtimoiy muhofaza qilish vazirligi va Moliya vazirligining 2001-yil 5-apreldagi 2 va 33-son qarori (roʻyxat raqami 1026, 2001-yil 13-aprel) (Oʻzbekiston Respublikasi vazirliklari, davlat qoʻmitalari va idoralari normativ hujjatlari byulleteni, 2001-yil, 7-son) bilan tasdiqlangan Uchquduq, Zarafshon, Nurobod shaharlari va shahar tipidagi Zafarobod posyolkasining budjet tashkilotlari xodimlariga muayyan davr ishlaganlik uchun oylik toʻlovlar toʻlash tartibi toʻgʻrisidagi nizomga ilovaga muvofiq oʻzgartirishlar kiritilsin.
2. Ushbu qaror rasmiy eʼlon qilingan kundan eʼtiboran kuchga kiradi.
Bandlik va mehnat munosabatlari vaziri N. XUSANOV
Toshkent sh.,
2022-yil 20-oktabr,
31-2022/QQ-son
Moliya vaziri T. ISHMETOV
Toshkent sh.,
2022-yil 20-oktabr,
57-son
Oʻzbekiston Respublikasi Bandlik va mehnat munosabatlari vazirligining 2022-yil 20-oktabrdagi 31-2022/QQ-son va Moliya vazirligining 2022-yil 20-oktabrdagi 57-son qaroriga
ILOVA
Uchquduq, Zarafshon, Nurobod shaharlari va shahar tipidagi Zafarobod posyolkasining budjet tashkilotlari va muassasalari xodimlariga muayyan davr ishlaganlik uchun oylik toʻlovlar toʻlash tartibi toʻgʻrisidagi nizomga kiritilayotgan oʻzgartirishlar
1. 31-band quyidagi tahrirda bayon etilsin:
“31. Mulkchilik shaklidan qatʼi nazar boshqa tashkilotdan Uchquduq, Zarafshon, Nurobod shaharlari va shahar tipidagi Zafarobod posyolkasidagi budjet tashkilotlariga ishga kirganda, ish staji saqlanib qolinadi.
Bunda, mulkchilik shaklidan qatʼi nazar boshqa tashkilotdagi (Uchquduq, Zarafshon, Nurobod shaharlari va shahar tipidagi Zafarobod posyolkasidagi budjet tashkilotlari, shuningdek Vazirlar Mahkamasining 2020-yil 8-yanvardagi 5-F-son farmoyishiga asosan “Navoiy kon-metallurgiya kombinati” davlat korxonasi tizimidan Maktabgacha taʼlim vazirligi tizimiga oʻtkazilgan maktabgacha taʼlim tashkilotlaridan tashqari) ish staji, budjet tashkilotlari xodimlariga muayyan davr ishlaganlik uchun oylik toʻlovlar toʻlanishi huquqini beradigan ish stajiga kiritilmaydi.”.
2. 4-bandning birinchi xatboshisi quyidagi tahrirda bayon etilsin:
“4. “Yagona milliy mehnat tizimi” idoralararo dasturiy-apparat kompleksida avtomatik tarzda shakllantiriladigan, QR-kod bilan tasdiqlangan elektron mehnat daftari xodimning mehnat stajini tasdiqlovchi asosiy hujjat hisoblanadi.”.
(Qonunchilik maʼlumotlari milliy bazasi, 10.11.2022-y., 10/22/1026-2/1009-son)