Oʻzbekiston Respublikasi Vazirlar Mahkamasining
qarori
Auditorlik tashkilotining ishi sifatini tashqi nazoratdan oʻtkazish tartibi toʻgʻrisidagi nizomni tasdiqlash haqida
“Auditorlik faoliyati toʻgʻrisida”gi Oʻzbekiston Respublikasining Qonuni va Oʻzbekiston Respublikasi Prezidentining “Auditorlarni sertifikatlashtirish tizimini takomillashtirish boʻyicha qoʻshimcha chora-tadbirlar toʻgʻrisida” 2021-yil 4-avgustdagi PQ-5210-son qarori ijrosini taʼminlash maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining 2021-yil 4-avgustdagi PQ-5210-son qarori bilan tasdiqlangan Respublika hududlarida auditorlik faoliyati sohasida malakali mutaxassislar tayyorlashning ilgʻor usullarini joriy etish va auditorlik faoliyatining normativ-huquqiy bazasini yanada takomillashtirish boʻyicha “yoʻl xaritasi”ning 10-bandiga muvofiq auditorlik tashkiloti faoliyati natijalarini tavakkalchilik tahlili asosida auditorlik tashkiloti ishi sifatini tashqi nazoratdan oʻtkazish tartibini belgilash nazarda tutilganligi maʼlumot uchun qabul qilinsin.
2. Quyidagilarni nazarda tutuvchi Auditorlik tashkilotining ishi sifatini tashqi nazoratdan oʻtkazish tartibi toʻgʻrisidagi nizom 1-ilovaga muvofiq tasdiqlansin:
“Audit” dasturiy majmuasi axborot tizimi va idoralararo axborot hamkorligi doirasida olingan maʼlumotlar asosida auditorlik tashkilotining tavakkalchilik tahlilini amalga oshirish;
tavakkalchilik tahlili natijasi va tavakkalchilik darajasini baholash yakunlari boʻyicha auditorlik tashkilotining ishi sifatini tashqi nazoratdan oʻtkazish;
tashqi sifat nazorati natijasida auditorlik tashkiloti faoliyatida aniqlangan qoidabuzarliklar va koʻrilgan choralar toʻgʻrisidagi maʼlumotlarni Moliya vazirligining rasmiy veb-saytida eʼlon qilish.
3. Moliya vazirligi auditorlik tashkilotlariga mazkur qarorning maqsadi va mazmunini tushuntirish boʻyicha amaliy chora-tadbirlarni tashkil etsin.
4. Oʻzbekiston Respublikasi Hukumatining 2-ilovaga muvofiq ayrim qarorlariga oʻzgartirish va qoʻshimchalar kiritilsin.
5. Ushbu qaror rasmiy eʼlon qilingan kundan eʼtiboran uch oy oʻtgach kuchga kiradi.
6. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — iqtisodiy taraqqiyot va kambagʻallikni qisqartirish vaziri J.A. Qoʻchqorov va Oʻzbekiston Respublikasi moliya vaziri T.A. Ishmetov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 28-sentabr,
538-son
Vazirlar Mahkamasining 2022-yil 28-sentabrdagi 538-son qaroriga
1-ILOVA
Auditorlik tashkilotining ishi sifatini tashqi nazoratdan oʻtkazish tartibi toʻgʻrisida
NIZOM
1-bob. Umumiy qoidalar
1. Mazkur Nizom “Auditorlik faoliyati toʻgʻrisida”gi Oʻzbekiston Respublikasining Qonuniga muvofiq Oʻzbekiston Respublikasi Moliya vazirligi (keyingi oʻrinlarda — Moliya vazirligi) tomonidan auditorlik tashkilotining ishi sifatini tashqi nazoratdan oʻtkazish (keyingi oʻrinlarda — tashqi sifat nazorati) tartibini belgilaydi.
2. Tashqi sifat nazorati oxirgi ikki moliyaviy hisobot davrida majburiy auditorlik tekshiruvini oʻtkazgan auditorlik tashkilotlariga nisbatan qoʻllaniladi.
3. Tijorat banklari moliyaviy hisobotini majburiy auditorlik tekshiruvidan oʻtkazgan auditorlik tashkilotlarini tashqi sifat nazoratidan oʻtkazish Oʻzbekiston Respublikasi Markaziy banki bilan birgalikda amalga oshiriladi.
4. Tashqi sifat nazorati Moliya vazirligi tomonidan auditorlarning respublika jamoat birlashmalari vakil(lar)ini jalb etgan holda amalga oshiriladi.
5. Auditorlik tashkilotlari auditorlarning respublika jamoat birlashmasi tomonidan tashqi sifat nazoratidan ixtiyoriy asosda oʻtishi mumkin. Nazoratning mazkur turi ushbu Nizomga muvofiq Moliya vazirligi tomonidan amalga oshiriladigan tashqi sifat nazoratini oʻtkazish deb hisoblanmaydi.
6. Auditorlik xizmatlarini koʻrsatishda “Auditorlik faoliyati toʻgʻrisida”gi Oʻzbekiston Respublikasining Qonuniga rioya qilinishi lozim boʻlgan auditorlik tashkilotlari faoliyati tashqi sifat nazoratining obyekti hisoblanadi.
Tashqi sifat nazoratini oʻtkazishda auditorlik tashkilotining moliya-xoʻjalik faoliyatiga aralashuvga yoʻl qoʻyilmaydi.
7. Qonuniylik va tashqi sifat nazorati natijalarining oshkoraligi tashqi sifat nazoratining asosiy tamoyillari hisoblanadi.
8. Auditorlik tashkilotining tashqi sifat nazoratidan oʻtkazish uchun zarur boʻlgan axborotlarni taqdim etmasligi uni Auditorlik tashkilotlarining reyestridan chiqarishga asos hisoblanadi.
9. Auditorlik tashkilotining tashqi sifat nazorati mazkur Nizomga ilovada keltirilgan sxemaga muvofiq oʻtkaziladi.
10. Auditorlik tashkilotlarini tashqi sifat nazoratdan oʻtkazish muddati oʻn ish kunidan oshmasligi kerak.
2-bob. Tavakkalchilik tahlili va tashqi sifat nazoratini oʻtkazish tartibi
11. Tashqi sifat nazorati tavakkalchilik tahlili natijasi va auditorlik tashkiloti tomonidan auditorlik faoliyati toʻgʻrisidagi qonunchilik talablarining buzilishi sodir etilishi tavakkalchiligi darajasini (keyingi oʻrinlarda — tavakkalchilik darajasi) baholash yakunlari boʻyicha oʻtkaziladi.
12. Tavakkalchilik darajasi uch toifaga ajratiladi:
qoidabuzarliklar sodir etilishi tavakkalchiligi yuqori boʻlgan auditorlik tashkilotlari;
qoidabuzarliklar sodir etilishi tavakkalchiligi oʻrtacha boʻlgan auditorlik tashkilotlari;
qoidabuzarliklar sodir etilishi tavakkalchiligi past boʻlgan auditorlik tashkilotlari.
13. Eng koʻp sodir etiladigan qoidabuzarliklar roʻyxati Moliya vazirligi tomonidan shakllantiriladi va moliya vazirining buyrugʻi bilan tasdiqlanadi. Davriy yangilangan roʻyxat har yili 1-yanvarga qadar Moliya vazirligining rasmiy veb-saytida eʼlon qilib boriladi.
14. Tavakkalchilik darajasi quyidagi koʻrsatkichlar boʻyicha tahlil qilinadi:
Moliya vazirligi tomonidan oʻtkazilgan oldingi tashqi sifat nazorati natijalari;
auditorlarning respublika jamoat birlashmalari tomonidan oʻtkazilgan tashqi sifat nazorati natijalari (mavjud boʻlganda);
auditorlik tashkilotlarining xalqaro auditorlik tashkilotlariga yoki assotsiatsiyalariga aʼzoligi (mavjud boʻlganda);
auditorlik tashkilotini tashkil etish va auditorlik faoliyatini amalga oshirish boʻyicha majburiy talablarga rioya etish, shuningdek, “Auditorlik faoliyati toʻgʻrisida”gi Oʻzbekiston Respublikasining Qonunida belgilangan majburiyatlarni bajarish;
auditorlik tashkilotining “Auditorlik faoliyati toʻgʻrisida”gi Oʻzbekiston Respublikasining Qonuni talablarini buzadigan harakatlari (harakatsizligi) ustidan jismoniy yoki yuridik shaxslarning murojaatlari mavjudligi;
auditorlik tashkilotining muassislari (ishtirokchilari) tarkibida ilgari auditorlik faoliyati toʻgʻrisidagi qonunchilikni buzganlik uchun faoliyati tugatilgan auditorlik tashkilotining muassisi (ishtirokchisi) boʻlgan jismoniy shaxslarning mavjudligi.
15. Tavakkalchilik tahlili oʻtkazilganda quyidagi maʼlumot manbalaridan foydalaniladi:
“Audit” dasturiy majmuining axborot tizimi (keyingi oʻrinlarda — “Audit” dasturiy majmuasi) orqali tushgan maʼlumotlar;
auditorlarning respublika jamoat birlashmalarida mavjud boʻlgan maʼlumotlar, shuningdek, auditorlik tashkilotining hamda auditorlarning ishchanlik obroʻsi toʻgʻrisidagi axborotlar;
idoralararo axborot hamkorligi doirasida boshqa davlat organlari (Oʻzbekiston Respublikasi Markaziy banki, Davlat soliq qoʻmitasi, Davlat aktivlarini boshqarish agentligi)dan tushgan (olingan) maʼlumotlar;
Moliya vazirligiga tushgan murojaatlar;
foydalanish uchun ochiq boʻlgan boshqa axborotlar.
16. Tavakkalchilik darajasini tahlil qilish Moliya vazirligi tomonidan har yili 1-fevralga qadar amalga oshiriladi, bundan auditorlik tashkiloti yoki auditorning harakatlari (harakatsizligi) ustidan jismoniy yoki yuridik shaxslarning murojaatlari tushgan hollar mustasno.
17. Moliya vazirligi tavakkalchilik tahlili natijalari boʻyicha aniqlangan tavakkalchilik darajasi toʻgʻrisida “Audit” dasturiy majmuasi orqali hisobot yilidan keyingi yilning 10-fevraliga qadar auditorlik tashkilotini xabardor qiladi.
18. Auditorlik tashkiloti uch ish kuni mobaynida aniqlangan qoidabuzarliklarning bartaraf etilganligini tasdiqlovchi asoslantiruvchi maʼlumot va hujjatlarni “Audit” dasturiy majmuasi orqali taqdim etadi.
19. Belgilangan muddatda auditorlik tashkiloti tomonidan qoidabuzarlik holatlari bartaraf etilganligi toʻgʻrisida tegishli hujjatlar taqdim etilmasa, tavakkalchilik darajasi yuqori boʻlgan auditorlik tashkilotlariga Moliya vazirligi tomonidan auditorlik tashkilotini tashqi sifat nazoratidan oʻtkazishni Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil (keyingi oʻrinlarda — vakolatli organ) bilan kelishish boʻyicha buyurtmanoma tayyorlanadi.
Tavakkalchilik darajasi oʻrtacha boʻlganda Moliya vazirligi auditorlik tashkiloti tomonidan qoidabuzarlik holatlarini bir oydan koʻp boʻlmagan muddatda bartaraf etish boʻyicha auditorlik tashkilotlariga ogohlantirish xati yuboradi. Qoidabuzarlik holatlari belgilangan muddatda bartaraf etilmasa, u auditorlik tashkiloti tavakkalchilik darajasi yuqori boʻlgan auditorlik tashkiloti deb hisoblanadi va tavakkalchilik darajasi yuqori boʻlgan auditorlik tashkilotlariga nisbatan qoʻllaniladigan chora-tadbirlar amalga oshiriladi.
Tavakkalchilik darajasi oʻrtacha va past boʻlganda Moliya vazirligi tomonidan vakolatli organga tashqi sifat nazoratini oʻtkazish boʻyicha buyurtmanoma qilinmaydi.
20. Tashqi sifat nazoratini oʻtkazish boʻyicha kelishuv buyurtmanomasi vakolatli organga quyidagilar ilova qilingan holda taqdim etiladi:
tavakkalchilik tahlili natijalari toʻgʻrisida axborot yoki auditorlik tashkiloti yoxud auditorning harakatlari (harakatsizligi) ustidan jismoniy yoki yuridik shaxslarning murojaati nusxasi;
tashqi sifat nazoratini oʻtkazish dasturi (savolnoma).
21. Tashqi sifat nazoratini oʻtkazish vakolatli organ bilan kelishilgan kundan boshlab uch ish kuni mobaynida quyidagi maʼlumotlarni oʻz ichiga oladigan Oʻzbekiston Respublikasi moliya vazirining buyrugʻi chiqariladi:
tashqi sifat nazoratini oʻtkazish uchun asos boʻladigan hujjatning nomi, raqami va sanasi;
auditorlik tashkilotining nomlanishi;
tashqi sifat nazoratini oʻtkazish muddati va davri;
tashqi sifat nazoratini oʻtkazishda ishtirok etadigan shaxslar tarkibi;
tashqi sifat nazoratini oʻtkazish dasturi (savolnoma).
22. Moliya vazirligi “Audit” dasturiy majmuasi orqali tashqi sifat nazoratini oʻtkazishning muddati va predmeti koʻrsatilgan holda tashqi sifat nazoratining boshlanish sanasidan kamida oʻn kun oldin auditorlik tashkilotini xabardor qiladi.
23. Moliya vazirligi zarurat boʻlganda, maxsus bilim va koʻnikmalarga ega auditorlik faoliyati bilan bogʻliq boʻlmagan ekspertlarni tashqi sifat nazoratida qatnashishga jalb qilishi mumkin.
24. Tashqi sifat nazorati boshlanishidan oldin Moliya vazirligining tashqi sifat nazoratini oʻtkazuvchi masʼul vakili quyidagilarni amalga oshirishga majbur:
auditorlik tashkiloti rahbariga oʻz xizmat guvohnomasi va tashqi sifat nazoratini oʻtkazish huquqini beruvchi maxsus guvohnomasini koʻrsatish;
auditorlik tashkiloti rahbarini tashqi sifat nazoratini oʻtkazishning maqsadi va dasturi bilan tanishtirish;
“Tekshiruvlarni roʻyxatga olish kitobi”ni toʻldirish, kitob yoki uning elektron shaklini toʻldirish imkoni mavjud boʻlmagan taqdirda, bu haqida tashqi sifat nazorati dalolatnomasida qayd etish;
tashqi sifat nazoratini oʻtkazish toʻgʻrisidagi buyruqning bir nusxasini auditorlik tashkiloti rahbariga tilxat asosida taqdim etish;
tashqi sifat nazoratini oʻtkazish vakolati va dasturiga (savolnomaga) rioya qilish.
25. Tashqi sifat nazoratini oʻtkazish toʻgʻrisidagi hujjat nusxasi auditorlik tashkilotiga tilxat asosida taqdim etilgan kun tashqi sifat nazoratini oʻtkazish boshlangan kun hisoblanadi.
Auditorlik tashkilotining ushbu hujjatlarni qabul qilishdan bosh tortishi tashqi sifat nazoratini oʻtkazishni toʻxtatishga asos hisoblanmaydi. Bunday holatda dalolatnoma rasmiylashtiriladi va unda keltirilgan sana tashqi sifat nazorati boshlangan kun hisoblanadi.
3-bob. Tashqi sifat nazorati natijalarini rasmiylashtirish tartibi
26. Tashqi sifat nazorati natijalari boʻyicha dalolatnoma tuziladi va unda quyidagi maʼlumotlar aks ettiriladi:
dalolatnoma tuzilgan sana, vaqti, joyi va roʻyxatga olish raqami;
tashqi sifat nazoratini oʻtkazgan vakolatli organlarning masʼul shaxslari familiyasi, ismi, otasining ismi, lavozimi;
tashqi sifat nazorati toʻgʻrisida Oʻzbekiston Respublikasi moliya vazirining buyrugʻi raqami va sana;
auditorlik tashkilotining nomi va joylashgan joyi;
tashqi sifat nazoratini oʻtkazishda ishtirok etish uchun jalb qilingan mutaxassislarning familiyasi, ismi, otasining ismi, lavozimi;
tashqi sifat nazoratini oʻtkazish boshlangan sana va uni tugatish sanasi;
tashqi sifat nazorati natijalari boʻyicha xulosa.
27. Tashqi sifat nazorati natijalari toʻgʻrisidagi dalolatnoma imzolangan sana koʻrsatilgan holda tashqi sifat nazoratida ishtirok etgan barcha shaxslar tomonidan imzolanadi va kamida ikki nusxada tuziladi.
28. Auditorlik tashkilotiga tashqi sifat nazorati natijalari toʻgʻrisidagi dalolatnoma taqdim etilgan sanada tashqi sifat nazoratini oʻtkazish yakunlangan hisoblanadi. Auditorlik tashkiloti tashqi sifat nazorati natijalari toʻgʻrisidagi dalolatnomani olishdan bosh tortsa, bu haqida Moliya vazirligi tomonidan tashqi sifat nazorati natijalari toʻgʻrisidagi dalolatnomaga tegishli yozuv kiritiladi. Bunday holatda tashqi sifat nazorati natijalari toʻgʻrisidagi dalolatnomaning bir nusxasi auditorlik tashkilotiga buyurtma xat qilib pochta orqali yuboriladi.
29. Tashqi sifat nazorati natijalariga koʻra aniqlangan qoidabuzarliklar boʻyicha Moliya vazirligi ularni bartaraf etish majburiyatini auditorlik tashkilotiga yuklaydigan va bunday qoidabuzarliklarni bartaraf etish muddatlarini belgilaydigan bildirishnoma yuboradi. Bildirishnomada qoidabuzarliklarni bartaraf etish muddati bir oydan koʻp boʻlmasligi koʻrsatiladi.
30. Auditorlik tashkiloti bildirishnoma boʻyicha zarur hujjat va maʼlumotlarni taqdim etmagan taqdirda, Moliya vazirligi “Auditorlik faoliyati toʻgʻrisida”gi Oʻzbekiston Respublikasi Qonunining 43-moddasiga muvofiq auditorlik tashkilotini Auditorlik tashkilotlari reyestridan chiqaradi.
31. Moliya vazirligi auditorlik tashkilotining quyidagi qoidabuzarliklari aniqlanganda sudga murojaat qilishga haqli:
auditorlik faoliyatidan tashqari boshqa faoliyat turlari bilan shugʻullanish yoki faoliyat turining oʻzgarishi;
“Auditorlik faoliyati toʻgʻrisida”gi Qonunning 34-moddasida nazarda tutilgan auditorlik tekshiruvini oʻtkazish chogʻida cheklovlarning buzilishi;
bila turib soxta auditorlik xulosasini tuzganlik.
32. Tashqi sifat nazorati natijalari:
aniqlangan qoidabuzarliklar yuzasidan koʻrilgan choralar koʻrsatilgan holda Moliya vazirligining rasmiy veb-saytida eʼlon qilinadi;
tashqi sifat nazorati tugatilganidan keyin uch kun ichida Tekshiruvlarni elektron roʻyxatga olish yagona tizimiga kiritiladi.
33. Tashqi sifat nazorati natijalari toʻgʻrisidagi dalolatnoma kamida besh yil saqlanadi. Tashqi sifat nazorati natijalari toʻgʻrisidagi dalolatnoma manfaatdor shaxslarga faqat taqdim etish toʻgʻrisida qonuniy kuchga kirgan sud qarori asosida taqdim etilishi mumkin.
4-bob. Tashqi sifat nazorati oʻtkaziladigan shaxslarning huquq va majburiyatlari
34. Auditorlik tashkiloti rahbari quyidagi huquqlarga ega:
tashqi sifat nazoratini oʻtkazish jarayonida bevosita qatnashish va tashqi sifat nazoratiga tegishli masalalar boʻyicha tushuntirish berish;
Moliya vazirligining tashqi sifat nazorati bilan bogʻliq masalalarga aloqasi boʻlmagan talablarini bajarmaslik;
tashqi sifat nazorati natijalari bilan tanishish.
35. Auditorlik tashkiloti rahbari quyidagi majburiyatlarni zimmasiga oladi:
tashqi sifat nazoratini oʻtkazish bilan bogʻliq boʻlgan hujjat va axborotlarni, shu jumladan, elektron axborot tizimlarida saqlanadigan hujjat va axborotlarni taqdim etish;
tashqi sifat nazorati natijasida aniqlangan qoidabuzarliklarni bartaraf etish va oldini olishga qaratilgan chora-tadbirlarni amalga oshirish.
5-bob. Yakunlovchi qoidalar
36. Tashqi sifat nazoratini amalga oshirishda yuzaga keladigan nizolar qonunchilikda belgilangan tartibda hal etiladi.
37. Auditorlik tashkiloti davlat organlari va boshqa tashkilotlar xodimlarining harakati (harakatsizligi) yuzasidan qonunchilikda belgilangan tartibda shikoyat qilishi mumkin.
38. Ushbu Nizom talablari buzilishida aybdor boʻlgan shaxslar qonunchilikda belgilangan tartibda javob beradilar.
Auditorlik tashkilotining ishi sifatini tashqi nazoratdan oʻtkazish tartibi toʻgʻrisidagi nizomga
ILOVA
Auditorlik tashkilotining ishi sifatini tashqi nazoratdan oʻtkazish
SXEMASI

Bosqichlar

Subyektlar

Tadbirlar

Ijro muddati

1-bosqich

Auditorlik tashkiloti

Auditorlik faoliyati toʻgʻrisidagi maʼlumotlarni Moliya vazirligiga yozma yoki elektron shaklda taqdim etadi.

Har yili 20-yanvarga qadar

2-bosqich

Moliya vazirligi

Taqdim etilgan maʼlumotlar asosida “Auditorlik faoliyati toʻgʻrisida”gi Oʻzbekiston Respublikasi Qonunining talablari boʻyicha eng koʻp sodir etiladigan qoidabuzarliklarning namunaviy roʻyxatidan kelib chiqib, auditorlik tashkiloti tomonidan qoidabuzarliklar sodir etilishi tavakkalchiligi darajasini aniqlaydi.

Har yili 1-fevralga qadar

3-bosqich

Moliya vazirligi

Aniqlangan tavakkalchilik darajasi va qoidabuzarliklar toʻgʻrisida “Audit” dasturiy majmuasi orqali auditorlik tashkilotini xabardor qiladi.

Har yili 10-fevralga qadar

4-bosqich

Auditorlik tashkiloti

Aniqlangan qoidabuzarliklarning bartaraf etilganligini tasdiqlovchi maʼlumot va hujjatlarni “Audit” dasturiy majmuasi orqali Moliya vazirligiga taqdim etadi.

3 ish kuni ichida

5-bosqich

Moliya vazirligi

Tavakkalchilik darajasi past va oʻrtacha boʻlgan, shuningdek, belgilangan muddatda qoidabuzarliklar bartaraf etilganligi toʻgʻrisida Moliya vazirligiga hujjatlarni taqdim etgan tavakkalchilik darajasi yuqori boʻlgan auditorlik tashkilotlarida tashqi sifat nazoratini oʻtkazmaydi.

Tavakkalchilik darajasi oʻrtacha boʻlganda auditorlik tashkiloti tomonidan qoidabuzarlik holatlarini bir oydan koʻp boʻlmagan muddatda bartaraf etish boʻyicha auditorlik tashkilotlariga ogohlantirish xati yuboriladi.

Tavakkalchilik darajasi yuqori boʻlgan auditorlik tashkilotlari tomonidan qoidabuzarliklar bartaraf etilganligi toʻgʻrisida huj�atlar taqdim etilmasa, Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakilga tashqi sifat nazoratini oʻtkazish toʻgʻrisida buyurtmanoma yuboradi.

Tavakkalchilik tahlili natijalariga koʻra

6-bosqich

Moliya vazirligi

Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil bilan kelishgan holda tashqi sifat nazoratini oʻtkazish haqida buyruq chiqaradi.

7 ish kuni ichida

7-bosqich

Moliya vazirligi

“Audit” dasturiy majmuasi orqali tashqi sifat nazoratini oʻtkazish boʻyicha auditorlik tashkilotini xabardor qiladi.

Tashqi sifat nazoratining boshlanish sanasidan kamida 10 kun oldin

8-bosqich

Auditorlik tashkiloti

Tashqi sifat nazoratini oʻtkazish bilan bogʻliq boʻlgan hujjat va axborotlarni, shu jumladan, elektron axborot tizimlarida saqlanadigan hujjat va axborotlarni taqdim etadi.

Tashqi sifat nazorati boshlangan kunda

9-bosqich

Moliya vazirligi

Tashqi sifat nazoratini oʻtkazadi va uning natijalari boʻyicha dalolatnomani rasmiylashtiradi.

10 kundan oshmagan muddatda

10-bosqich

Moliya vazirligi

Aniqlangan qoidabuzarliklar va koʻrilgan choralar toʻgʻrisida rasmiy veb-saytda eʼlon qiladi.

Tashqi sifat nazorati natijalarini ular tugatilganidan keyin Tekshiruvlarni elektron roʻyxatga olish yagona tizimiga kiritadi.

3 ish kuni ichida

11-bosqich

Moliya vazirligi

Quyidagi taʼsirchan choralardan birini koʻradi:

sudga murojaat qilish;

auditorlik tashkilotini Auditorlik tashkilotlari reyestridan chiqarish.

Qoidabuzarliklar aniqlanganda

Vazirlar Mahkamasining 2022-yil 28-sentabrdagi 538-son qaroriga
2-ILOVA
Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar
1. Vazirlar Mahkamasining 2006-yil 16-oktabrdagi 215-son qarori bilan tasdiqlangan Korxonalardagi ichki audit xizmati toʻgʻrisidagi nizomda:
a) 6-banddagi “auditorning malaka” soʻzlari “auditor” soʻzi bilan almashtirilsin;
b) quyidagi mazmundagi 241-band bilan toʻldirilsin:
“241. Korxonaning kuzatuv kengashi ichki audit xizmati xodimlarini tanlov asosida tayinlaydi, shuningdek, auditorlik yoki nazorat qiluvchi organlar tekshiruvida ichki audit xizmati xodimlarining faoliyati bilan bogʻliq kamchiliklar aniqlangan taqdirda, ularning vakolatini muddatidan oldin tugatadi”.
2. Vazirlar Mahkamasining 2021-yil 26-yanvardagi 38-son qarori bilan tasdiqlangan Moliyaviy hisobotning xalqaro standartlari boʻyicha oʻqitish va buxgalterlarni xalqaro sertifikatlash doirasida imtihonlarni topshirish xarajatlarini qoplash tartibi toʻgʻrisidagi vaqtinchalik nizomda:
a) 16-band quyidagi mazmundagi xatboshilar bilan toʻldirilsin:
“davlat organi xodimi, oliy taʼlim tashkiloti pedagog kadri yoki talabasi ekanligini tasdiqlovchi hujjat nusxasi yoxud maʼlumotnoma;
oliy maʼlumot toʻgʻrisidagi diplom nusxasi (ushbu hujjat faqat oliy taʼlim tashkilotlarining bitiruvchilari uchun taqdim etiladi)”;
b) 28-bandda:
quyidagi mazmundagi yettinchi xatboshi bilan toʻldirilsin:
“davlat organi xodimi, oliy taʼlim tashkiloti pedagog kadri ekanligini tasdiqlovchi hujjat nusxasi yoki maʼlumotnoma”;
yettinchi va sakkizinchi xatboshilar tegishlicha sakkizinchi va toʻqqizinchi xatboshilar deb hisoblansin.
(Qonunchilik maʼlumotlari milliy bazasi, 29.09.2022-y., 09/22/538/0862-son)