Hujjat kuchini yo‘qotgan " " 23.10.2023
Oʻzbekiston Respublikasi Vazirlar Mahkamasining
qarori
Oʻlimni qayd qilish bilan bogʻliq kompozit davlat xizmatlarini koʻrsatishning maʼmuriy reglamentini tasdiqlash toʻgʻrisida
 LexUZ sharhi
Mazkur qaror Oʻzbekistan Respublikasi Vazirlar Mahkamasining 2023-yil 20-oktabrdagi 550-sonli “Nikoh, oila va fuqarolik holati dalolatnomalarini qayd etish sohasidagi normativ-huquqiy hujjatlarni tizimlashtirish toʻgʻrisida”gi qaroriga asosan oʻz kuchini yoʻqotadi.
Oʻzbekiston Respublikasi Prezidentining “Davlat xizmatlari koʻrsatish infratuzilmasini takomillashtirish va aholining davlat xizmatlaridan foydalanish imkoniyatlarini kengaytirish chora-tadbirlari toʻgʻrisida” 2021-yil 24-iyuldagi PF-6269-son Farmoniga muvofiq aholiga oʻzaro bogʻliq davlat xizmatlaridan kompozit tarzda foydalanish imkoniyatini yaratish maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “Davlat xizmatlari koʻrsatish infratuzilmasini takomillashtirish va aholining davlat xizmatlaridan foydalanish imkoniyatlarini kengaytirish chora-tadbirlari toʻgʻrisida” 2021-yil 24-iyuldagi PF-6269-son Farmoniga muvofiq 2022-yil 1-yanvardan Toshkent shahrida, 2022-yil 1-iyuldan esa butun respublika hududida oʻlimni qayd qilish boʻyicha quyidagilardan iborat kompozit xizmat koʻrsatish tizimi yoʻlga qoʻyilishi belgilanganligi maʼlumot uchun qabul qilinsin:
tibbiyot muassasasi xodimi vafot etganlik toʻgʻrisidagi maʼlumotnomani rasmiylashtirib, “Tugʻilish va oʻlimni, shu jumladan perinatal oʻlimni elektron roʻyxatga olish” avtomatlashtirilgan axborot tizimi orqali elektron shaklda fuqarolik holati dalolatnomalarini yozish (keyingi oʻrinlarda — FHDY) organiga yuboradi. Bunda, vafot etganlik toʻgʻrisidagi tibbiyot maʼlumotnomasi vafot etgan shaxsning yaqin qarindoshlari arizasiga asosan ularga qogʻoz shaklida berilishi va ular toʻgʻridan-toʻgʻri FHDY organiga murojaat qilishi ham mumkin;
FHDY organi maʼlumotnoma kelib tushgandan soʻng bir ish kuni mobaynida shaxsning oʻlimini “FHDY yagona elektron arxivi” axborot tizimida qayd qilib, QR-kod orqali tasdiqlaydi;
FHDY organi vafot etgan shaxsning yaqin qarindoshlari arizasiga asosan ularga vafot etganlik haqidagi dalolatnoma yozuvini gerbli guvohnomada eksterritorial tamoyil asosida rasmiylashtirib beradi yoki pochta aloqasi orqali arizada koʻrsatilgan manzilga yuboradi.
2. Oʻlimni qayd etish bilan bogʻliq kompozit davlat xizmatlarini koʻrsatishning maʼmuriy reglamenti 1-ilovaga muvofiq tasdiqlansin.
3. Belgilansinki:
2022-yil 1-apreldan Toshkent shahrida, 2022-yil 1-iyuldan esa butun respublika hududida tibbiyot muassasalari tomonidan oʻlim haqida tibbiy guvohnoma berish tartibi bekor qilinib, faqat elektron tizim orqali oʻlim haqida tibbiy maʼlumotnoma shakllantirish tartibi joriy etiladi;
oʻlim holati fuqarolik holati dalolatnomalarini yozish organlarida qayd qilinganligi haqida tibbiyot muassasalari tomonidan berilgan QR-kod (matrik shtrixli kod) tasviri tushirilgan maʼlumotnoma oʻlim haqidagi gerbli guvohnomaga tenglashtiriladi hamda davlat organlari va tashkilotlar tomonidan qabul qilishni rad etish qatʼiyan taqiqlanadi.
4. Adliya vazirligi huzuridagi Davlat xizmatlari agentligi Axborot texnologiyalari va kommunikatsiyalarini rivojlantirish vazirligi bilan birgalikda ikki hafta muddatda tegishli vazirlik va idoralarda davlat xizmatini oʻz vaqtida va sifatli koʻrsatilishini taʼminlash maqsadida axborot tizimlarini oʻzaro integratsiya qilish choralarini koʻrsin.
5. Sogʻliqni saqlash vazirligi, Ichki ishlar vazirligi va Tibbiy-ijtimoiy xizmatlarni rivojlantirish agentligi oʻzlarining budjetdan tashqari mablagʻlari hisobidan bir oy muddatda oʻlim haqida tibbiy maʼlumotnoma berish vakolatiga ega boʻlgan tibbiyot muassasalari, mahkumlar uchun ixtisoslashgan kasalxonalar va tibbiy-ijtimoiy muassasalar (Nogironligi boʻlgan shaxslarni reabilitatsiya qilish va protezlash milliy markazi va uning hududiy reabilitatsiya markazlari, Urush va mehnat faxriylari uchun respublika pansionati hamda Nogironligi boʻlgan shaxslar va keksalar uchun “Muruvvat” va “Saxovat” internat-uylari) zarur kompyuter texnikalari bilan jihozlanishini, yuqori tezlikdagi Internet jahon axborot tarmogʻi hamda “Tugʻilish va oʻlimni, shu jumladan perinatal oʻlimni elektron roʻyxatga olish” avtomatlashtirilgan axborot tizimiga ulanishini taʼminlasin.
6. Oʻzbekiston Respublikasi Hukumatining 2-ilovaga muvofiq ayrim qarorlari 2022-yil 1-iyuldan boshlab oʻz kuchini yoʻqotgan deb hisoblansin.
7. Adliya vazirligi manfaatdor vazirliklar va idoralar bilan birgalikda uch oy muddatda oʻzlari qabul qilgan normativ-huquqiy hujjatlarni ushbu qarorga muvofiqlashtirsin.
8. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari, Oʻzbekiston Respublikasi sogʻliqni saqlash vaziri B.A. Musayev, ichki ishlar vaziri P.R. Bobojonov va adliya vaziri R.Q. Davletov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 25-fevral,
89-son
Vazirlar Mahkamasining 2022-yil 25-fevraldagi 89-son qaroriga
1-ILOVA
Oʻlimni qayd qilish bilan bogʻliq kompozit davlat xizmatlarini koʻrsatishning
MAʼMURIY REGLAMENTI
1-bob. Umumiy qoidalar
1. Ushbu Reglament vafot etgan shaxsning eri (xotini), ota-onasi, farzandlari va boshqa qarindoshlariga yoki qonuniy vakiliga, ular boʻlmaganda esa dafn etishni amalga oshirish majburiyatini oʻz zimmasiga olgan boshqa shaxsga (keyingi oʻrinlarda — ariza beruvchilar) oʻlim haqida tibbiy maʼlumotnoma berish, oʻlimni qayd qilish, vafot etgan shaxsni dafn qilish uchun qabristonga maʼlumotnoma berish va dafn etish uchun nafaqa berish boʻyicha kompozit davlat xizmatlari (keyingi oʻrinlarda — davlat xizmatlari) koʻrsatish tartibini belgilaydi.
2. Davlat xizmatini koʻrsatishda quyidagilar ishtirok etadi:
a) tibbiyot muassasalari, mahkumlar uchun ixtisoslashgan kasalxonalar va tibbiy-ijtimoiy muassasalar (keyingi oʻrinlarda — tibbiyot muassasalari) vafot etgan shaxs haqidagi maʼlumotlarni oʻlim haqidagi elektron tibbiy maʼlumotnomani shakllantirish uchun maxsus elektron blankaga kiritadi va avtomatik ravishda oʻlim haqida dalolatnoma yozuvini qayd qilish uchun tibbiyot muassasasi joylashgan joydagi fuqarolik holati dalolatnomalarini yozish boʻlimiga (keyingi oʻrinlarda — FHDY boʻlimi) “Tugʻilish va oʻlimni, shu jumladan perinatal oʻlimni elektron roʻyxatga olish” avtomatlashtirilgan axborot tizimi (keyingi oʻrinlarda — avtomatlashtirilgan axborot tizimi) orqali yuboradi.
Bunda, elektron tizim orqali shakllantirilgan oʻlim haqidagi tibbiy maʼlumotnoma ariza beruvchilarning talabiga asosan ularga qogʻoz shaklida berilishi va ular toʻgʻridan-toʻgʻri FHDY boʻlimiga murojaat qilishi ham mumkin;
b) FHDY boʻlimi:
tibbiyot muassasasidan oʻlim haqidagi tibbiy maʼlumotnoma kelib tushishi bilan “FHDYning yagona elektron arxivi” axborot tizimi orqali oʻlim haqida dalolatnoma yozuvini avtomatik ravishda qayd etadi va oʻlim haqidagi maʼlumotnomani tibbiyot muassasasiga hamda Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi (keyingi oʻrinlarda — Pensiya jamgʻarmasi)ning axborot tizimiga elektron shaklda yuboradi;
vafot etgan shaxsning yaqin qarindoshlari va merosxoʻrlarining istalgan vaqtdagi talabiga asosan ularga oʻlim haqidagi maʼlumotnomani gerbli guvohnomada eksterritorial tamoyil asosida rasmiylashtirib beradi yoki pochta aloqasi orqali arizada koʻrsatilgan manzilga yuboradi;
v) tibbiyot muassasasi “FHDYning yagona elektron arxivi” axborot tizimi orqali avtomatik ravishda olingan QR-kod (matrik shtrixli kod) qoʻyilgan oʻlim haqidagi maʼlumotnomani ariza beruvchilarga ikki nusxada chop etib beradi;
g) Pensiya jamgʻarmasi har oyning 5-sanasiga qadar oʻtgan oyda ushbu hududda toʻlangan dafn etish uchun nafaqalarning umumiy miqdoridan kam boʻlmagan miqdordagi mablagʻlarni tender asosida tanlangan tijorat banki yoki boshqa ixtisoslashgan tashkilot (keyingi oʻrinlarda — tijorat banki) hisobvaragʻiga moliyalashtiradi;
d) tijorat banki dafn etish uchun nafaqa toʻlovini tibbiyot muassasasi tomonidan berilgan QR-kod (matrik shtrixli kod) qoʻyilgan oʻlim haqidagi maʼlumotnoma asosida Pensiya jamgʻarmasiga elektron soʻrov yuborish orqali murojaat qilgan fuqaroning nafaqaga boʻlgan huquqini tasdiqlagan holda amalga oshiradi.
3. Ushbu Reglament talablari:
voyaga yetmagan vafot etgan shaxsga nisbatan FHDY boʻlimida tugʻilganlik haqida dalolatnoma yozuvi qayd etilmaganda;
oʻlim holatini sudning fuqaroni vafot etgan deb eʼlon qilish toʻgʻrisidagi hal qiluv qaroriga asosan qayd qilishda;
oʻlimi qonunchilikda belgilangan muddatlarda qayd etilmagan shaxslarning oʻlimini qayd etishda;
shaxsi aniqlanmaganlarning oʻlimini qayd etishda;
Oʻzbekiston Respublikasi qonunchiligiga muvofiq jismoniy shaxsning shaxsiy identifikatsiya raqami boʻlmagan chet el fuqarolari va fuqaroligi boʻlmagan shaxslarning oʻlimini qayd etishda tatbiq etilmaydi.
Ushbu bandda koʻrsatilgan toifadagi shaxslarning oʻlimini qayd etish Vazirlar Mahkamasining 2016-yil 14-noyabrdagi 387-son qarori bilan tasdiqlangan Fuqarolik holati dalolatnomalarini qayd etish qoidalarida belgilangan umumiy tartibda amalga oshiriladi.
4. Tibbiyot muassasasi, FHDY boʻlimi, Pensiya jamgʻarmasi va tijorat banki (keyingi oʻrinlarda — vakolatli organlar) oʻrtasidagi axborot almashinuvi faqat idoralararo elektron oʻzaro bogʻlanish yordamida amalga oshiriladi.
Mazkur davlat xizmatlarini koʻrsatganlik uchun toʻlov undirilmaydi.
5. Davlat xizmatini koʻrsatish mazkur Reglamentning 1-ilovasiga muvofiq sxema asosida amalga oshiriladi.
2-bob. Davlat xizmatini koʻrsatish tartibi
6. Shaxsning biologik oʻlim holati belgilangan tartibda (patologoanatomik, sud-tibbiy ekspertiza va boshqalar) tasdiqlanganidan soʻng tibbiyot muassasasi xodimi bir soat ichida oʻlim haqidagi elektron tibbiy maʼlumotnomani shakllantirish uchun vafot etgan shaxs haqidagi maʼlumotlarni ushbu Reglamentga 2-ilovaga muvofiq soʻrovnoma shaklida avtomatlashtirilgan axborot tizimiga kiritadi va avtomatik ravishda oʻlim haqida dalolatnoma yozuvini qayd qilish uchun tibbiyot muassasasi joylashgan joydagi FHDY boʻlimiga yuboradi.
Bunda, vafot etgan shaxsga tegishli maʼlumotlar uning shaxsini tasdiqlovchi hujjatlari asosida kiritiladi.
Oʻlim haqidagi tibbiy maʼlumotnoma avtomatik ravishda “FHDYning yagona elektron arxivi” axborot tizimiga yuboriladi.
Oʻlim haqidagi tibbiy maʼlumotnoma ariza beruvchilarning talabiga asosan ularga QR-kod (matrik shtrixli kod) qoʻyilgan holda berilishi va ular toʻgʻridan-toʻgʻri FHDY boʻlimiga murojaat qilishi ham mumkin.
7. FHDY boʻlimi:
tibbiyot muassasasidan oʻlim haqidagi tibbiy maʼlumotnoma kelib tushishi bilan “FHDYning yagona elektron arxivi” axborot tizimi orqali oʻlim haqida dalolatnoma yozuvini avtomatik ravishda qayd etadi va oʻlim haqidagi maʼlumotnomani ushbu Reglamentga 3-ilovaga muvofiq shaklda tibbiyot muassasasiga hamda Pensiya jamgʻarmasining axborot tizimiga elektron shaklda yuboradi;
vafot etgan shaxsning yaqin qarindoshlari va merosxoʻrlarining istalgan vaqtdagi talabiga asosan ularga oʻlim haqidagi maʼlumotnomani gerbli guvohnomada eksterritorial tamoyil asosida rasmiylashtirib beradi yoki pochta aloqasi orqali arizada koʻrsatilgan manzilga yuboradi.
8. Tibbiyot muassasasi QR-kod (matrik shtrixli kod) qoʻyilgan oʻlim haqidagi maʼlumotnomani ariza beruvchilarga ikki nusxada, shu jumladan qabristonga taqdim etish uchun chop etib beradi.
9. Pensiya jamgʻarmasi:
“FHDYning yagona elektron arxivi” axborot tizimi orqali kelib tushgan maʼlumot asosida vafot etgan shaxsga tayinlangan pensiya va/yoki nafaqa toʻlovini axborot tizimida avtomatik ravishda toʻxtatadi;
tijorat bankining elektron maʼlumotiga asosan axborot tizimida dafn etish uchun toʻlangan nafaqalar roʻyxatini shakllantiradi va hisobini yuritadi;
har oyning 5-sanasiga qadar oʻtgan oyda ushbu hududda toʻlangan dafn etish uchun nafaqalarning umumiy miqdoridan kam boʻlmagan miqdordagi mablagʻlarni tijorat bankining hisobvaragʻiga moliyalashtiradi.
Bunda, moliyalashtirishning soʻnggi kuni dam olish yoki bayram (ish kuni boʻlmagan) kunlariga toʻgʻri kelgan hollarda keyingi ish kuni muddatning soʻnggi kuni hisoblanadi.
Ariza beruvchilar FHDY boʻlimi tomonidan oʻlim haqidagi gerbli guvohnoma yoki tibbiyot muassasasi tomonidan berilgan QR-kod (matrik shtrixli kod) qoʻyilgan oʻlim haqidagi maʼlumotnoma va shaxsini tasdiqlovchi hujjatlarini koʻrsatgan holda, oʻlim holati qayd qilingandan boshlab 60 kun muddat ichida dafn etish uchun nafaqa pulini olish maqsadida tijorat bankining istalgan filialiga murojaat qilishi mumkin.
10. Tijorat banki dafn etish uchun nafaqa toʻlovini olish maqsadida murojaat qilgan fuqaroning nafaqaga boʻlgan huquqini FHDY boʻlimi tomonidan oʻlim haqidagi gerbli guvohnoma yoki tibbiyot muassasasi tomonidan berilgan QR-kod (matrik shtrixli kod) qoʻyilgan oʻlim haqidagi maʼlumotnoma asosida Pensiya jamgʻarmasiga elektron soʻrov yuborish orqali tasdiqlaydi hamda oldindan moliyalashtirilgan mablagʻlar hisobidan nafaqa toʻlovini amalga oshiradi.
Dafn etish uchun nafaqa FHDY boʻlimi tomonidan oʻlim haqidagi gerbli guvohnoma yoki tibbiyot muassasasi tomonidan QR-kod (matrik shtrixli kod) qoʻyilgan oʻlim haqidagi maʼlumotnoma berilgan jismoniy shaxslarga toʻlanadi.
Dafn etish uchun nafaqa qonunchilik hujjatlarida belgilangan tartibda ishonchnoma orqali toʻlanishi mumkin.
Dafn etish uchun nafaqa pensiyani hisoblashning bazaviy miqdorining toʻrt baravari miqdorida Oʻzbekiston Respublikasi Davlat budjeti mablagʻlari hisobidan moliyalashtiradi.
Dafn etish uchun nafaqa toʻlovi miqdori oʻlim sodir boʻlgan kundagi, asosli sabablarga koʻra (marhumni qidirish, jasadni xorijiy davlat hududidan olib kelish va boshqalar) marhum oʻlim aniqlangan kundan kech dafn etilgan hollarda ushbu holatni tasdiqlaydigan hujjatlar asosida dafn etish kunida belgilangan pensiyani hisoblashning bazaviy miqdoridan kelib chiqib belgilanadi.
Dafn etish nafaqasini olish uchun murojaat qilgan shaxs bunga huquqi boʻlmasa, sud tomonidan muomalaga layoqatsiz deb topilgan boʻlsa, nafaqani olish uchun fuqaroning oʻlimi qayd qilingandan boshlab 60 kundan keyin murojaat qilsa dafn etish uchun nafaqa toʻlash rad etiladi.
3-bob. Yakunlovchi qoidalar
11. Vakolatli organlar oʻz faoliyatini amalga oshirishi natijasida olingan ariza beruvchilar haqidagi maʼlumotlarning sir saqlanishini taʼminlashi kerak.
12. Oʻzbekiston Respublikasi Adliya vazirligi, Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari ushbu Reglament talablari ijrosi boʻyicha davlat organlari va boshqa tashkilotlarning faoliyati ustidan doimiy nazoratni (monitoring) amalga oshiradilar.
(12-band Oʻzbekiston Respublikasi Vazirlar Mahkamasining 2022-yil 13-iyuldagi 385-sonli qarori tahririda — Qonunchilik maʼlumotlari milliy bazasi, 14.07.2022-y., 09/22/385/0643-son)
13. Ariza beruvchi davlat organlari va boshqa tashkilotlar xodimlarining xatti-harakatlari yuzasidan qonunchilik hujjatlarida belgilangan tartibda shikoyat qilishi mumkin.
14. Ushbu Reglament talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.
Oʻlimni qayd etish bilan bogʻliq kompozit davlat xizmatlarini koʻrsatishning maʼmuriy reglamentiga
1-ILOVA
Oʻlimni qayd qilish bilan bogʻliq kompozit davlat xizmatlarini koʻrsatish
SXEMASI

Bosqichlar

Subyektlar

Tadbirlar

Bajarish muddati

1-bosqich

Tibbiyot muassasasi xodimi

Oʻlim holati belgilangan tartibda tasdiqlangandan soʻng, vafot etgan shaxs haqidagi maʼlumotlarni elektron tibbiy maʼlumotnomani shakllantirish uchun maxsus elektron blankaga kiritish va avtomatik ravishda oʻlim haqida dalolatnoma yozuvini qayd qilish uchun FHDY boʻlimiga “Tugʻilish va oʻlimni, shu jumladan perinatal oʻlimni elektron roʻyxatga olish” avtomatlashtirilgan axborot tizimi orqali yuborish.

Oʻlim holati belgilangan tartibda (pa�ologoanatomik, sud-tibbiy ekspertiza va boshqa) tasdiqlangandan soʻng bir soat ichida

2-bosqich

FHDY boʻlimi

1. “FHDYning yagona elektron arxivi” axborot tizimi orqali avtomatik ravishda oʻlim haqidagi dalolatnoma yozuvini qayd etish va bu haqdagi maʼlumotnomani tibbiyot muassasasi va Pensiya jamgʻarmasiga elektron shaklda yuborish.

Maʼlumotlar kelib tushgandan soʻng avtomatik ravishda

2. Vafot etgan shaxsning yaqin qarindoshlari va merosxoʻrlarining istalgan vaqtdagi talabiga asosan eksterritorial tamoyil asosida oʻlim haqidagi gerbli guvohnomani chop etib berish yoki pochta aloqasi orqali arizada koʻrsatilgan manzilga yuborish.

Ariza beruvchilar, vafot etgan shaxsning yaqin qarindoshlari yoki merosxoʻrlari tomonidan murojaat qilinganda

3-bosqich

Tibbiyot muassasasi xodimi

QR-kod tasviri tushirilgan oʻlim haqidagi maʼlumotnomani ariza beruvchilarga ikki nusxada chop etib berish.

Maʼlumotnoma kelib tushgandan soʻng darhol

4-bosqich

Pensiya jamgʻarmasi boʻlimi

1. “FHDYning yagona elektron arxivi” axborot tizimi orqali kelib tushgan maʼlumot asosida vafot etgan shaxsga tayinlangan pensiya va/yoki nafaqa toʻlovini axborot tizimida avtomatik ravishda toʻxtatish.

Avtomatik ravishda

Pensiya jamgʻarmasi hududiy boshqarmasi

2. Har oyning 5-sanasiga qadar oʻtgan oyda ushbu hududda toʻlangan dafn etish uchun nafaqalarning umumiy miqdoridan kam boʻlmagan miqdordagi mablagʻlarni Tijorat bankining hisobvaragʻiga moliyalashtirish.

Har oyning 5 sanasiga qadar

5-bosqich

Tijorat banki

Dafn etish uchun nafaqa toʻlovini olish maqsadida murojaat qilgan fuqaroning nafaqaga boʻlgan huquqini FHDY boʻlimi tomonidan oʻlim haqidagi gerbli guvohnoma yoki tibbiyot muassasasi tomonidan berilgan QR-kod tushirilgan oʻlim haqidagi maʼlumotnoma asosida Pensiya jamgʻarmasiga elektron soʻrov yuborish orqali tasdiqlash hamda oldindan moliyalashtirilgan mablagʻlar hisobidan nafaqa toʻlovini amalga oshi�ish.

Murojaat qilgan vaqtda

Oʻlimni qayd qilish bilan bogʻliq kompozit davlat xizmatlarini koʻrsatishning maʼmuriy reglamentiga
2-ILOVA

_______________________

(sana)

_____________________

(raqam)

Oʻlimni qayd qilish bilan bogʻliq kompozit davlat xizmatlarid�n

foydalanish uchun

SOʻROVNOMA

I. Ariza beruvchi haqida maʼlumot:

1. F.I.O.:

2. Jismoniy shaxsning shaxsiy identifikatsiya raqami (JSh ShIR):

3. Telefon raqami va elektron pochta manzili:

4. Yashash joyi:

II. Vafot etgan shaxs haqidagi maʼlumotlar

(maʼlumotlar toʻliq yozilishi shart):

1. Vafot etgan shaxsning F.I.O.:

2. Jismoniy shaxsning shaxsiy identifikatsiya raqami (JSh ShIR):

3. Millati:

4. Fuqaroligi:

5. Jinsi:

6. Vafot etgan vaqti:

7. Vafot etgan joyi:

8. Oʻlimning sababi:

9. Tugʻilgan sanasi va joyi:

10. Yashagan joyi (manzili) va shaxsini tasdiqlovchi maʼlumotlar:

11. Yoshi:

III. Dafn etish uchun nafaqa olish

1. Dafn etish uchun nafaqa olish:

ha

yoʻq

2. Gerbli guvohnomani pochta aloqasi orqali yetkazib berish:

ha

yoʻq

Oʻlimni qayd qilish bilan bogʻliq kompozit davlat xizmatlarini koʻrsatishning maʼmuriy reglamentiga
3-ILOVA

Oʻlim haqida dalolatnoma yozuvi qayd qilinganligi toʻgʻrisida

MAʼLUMOTNOMA
№ _______
_____

1. Fuqaroning F.I.O.

2. Vafot etgan sanasi:

3. Oʻlim haqida dalolatnoma yozuvi qayd qilingan sana:

4. Dalolatnoma raqami:

5. Oʻlim sababi:

6. Qayd qilgan FHDY boʻlimi:

7. Tugʻilgan vaqti va yoshi:

8. Vafot etgan joyi:

9. Maʼlumotnoma berilgan sana:

10. Vafot etg�n shaxsning JShShIR:

11. Tibbiyot muassasasi:


Hujjatning haqiqiyligini tasdiqlovchi QR-kod

Vazirlar Mahkamasining 2022-yil 25-fevraldagi 89-son qaroriga
2-ILOVA
Oʻzbekiston Respublikasi Hukumatining oʻz kuchini yoʻqotgan deb hisoblanayotgan ayrim qarorlari
ROʻYXATI
1. Vazirlar Mahkamasining “Dafn etishga nafaqa tayinlash va toʻlash tartibi toʻgʻrisidagi nizomni tasdiqlash haqida” 2011-yil 14-iyundagi 174-son qarori.
2. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasining “Soliq va budjet siyosatining 2015-yilga moʻljallangan asosiy yoʻnalishlari qabul qilinganligi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida” 2014-yil 4-dekabrdagi OʻRQ-379-son Qonuni)” 2014-yil 31-dekabrdagi 372-son qaroriga ilovaning 3-bandi.
3. Vazirlar Mahkamasining “Fuqarolarning davlat pensiya taʼminoti tizimi yanada takomillashtirilishi munosabati bilan Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida” 2018-yil 25-sentabrdagi 766-son qaroriga ilovaning 4-bandi.
4. Vazirlar Mahkamasining “Fuqarolarning oʻzini oʻzi boshqarish organlari tomonidan beriladigan tasdiqlovchi hujjatlar turlarini tubdan qisqartirish boʻyicha chora-tadbirlar toʻgʻrisida” 2018-yil 3-oktabrdagi 789-son qaroriga ilovaning 6-bandi.
5. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida (Oʻzbekiston Respublikasi Prezidentining “Mehnatga haq toʻlash, pensiyalar va boshqa toʻlovlar miqdorlarini aniqlash tartibini takomillashtirish toʻgʻrisida” 2019-yil 21-maydagi PF-5723-son Farmoni) 2019-yil 28-dekabrdagi 1046-son qaroriga ilovaning 105-bandi.
6. Vazirlar Mahkamasining “Aholini ijtimoiy himoya qilish sohasida davlat xizmatlari koʻrsatishning ayrim maʼmuriy reglamentlarini tasdiqlash toʻgʻrisida” 2020-yil 23-maydagi 327-son qarori 1-bandi uchinchi xatboshisi, 5-bandi, shuningdek unga 2 va 5-ilovalar.
7. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Byurokratik toʻsiqlarni yanada qisqartirish hamda davlat organlari va tashkilotlari faoliyatiga zamonaviy boshqaruv tamoyillarini joriy qilish chora-tadbirlari toʻgʻrisida” 2019-yil 9-dekabrdagi PQ-4546-son qarori) 2020-yil 7-iyuldagi 429-son qaroriga 1-ilovaning 9-bandi.

(Qonunchilik maʼlumotlari milliy bazasi, 25.02.2022-y., 09/22/89/0164-son; 14.07.2022-y., 09/22/385/0643-son)