1.02.00.00.00 Davlat boshqaruvi asoslari / 02.08.00.00 Iqtisodiyot, ijtimoiy-madaniy qurilish sohasidagi davlat boshqaruvining umumiy masalalari / 02.08.10.00 Iqtisodiy islohotlar sohasida davlat boshqaruvi]
[TSZ:
1.Iqtisodiyot / Umumiy masalalar]
O‘zbekiston Respublikasi Vazirlar Mahkamasining
qarori
Davlat funksiyalarini xususiy sektorga o‘tkazish tizimini joriy qilish bo‘yicha amalga oshiriladigan chora-tadbirlar to‘g‘risida
So‘nggi paytlarda respublikada davlatning iqtisodiyotdagi ishtirokini qisqartirish orqali tadbirkorlarga yanada qulay shart-sharoitlar yaratishga qaratilgan chora-tadbirlar izchil amalga oshirilmoqda.
Shu bilan birga, davlat funksiyalarini xususiy sektorga berish imkoniyatini o‘rganishga hamda mazkur yo‘nalishda tegishli shart-sharoitlarni yaratishga ko‘maklashuvchi tizimning mavjud emasligi bozor sharoitida raqobatni yanada rivojlantirish, tadbirkorlikning yangi yo‘nalishlarini rivojlantirishga qo‘shimcha imkoniyatlar yaratish hamda aholiga xizmat ko‘rsatish tizimini takomillashtirishga to‘sqinlik qilmoqda.
O‘zbekiston Respublikasi Prezidentining “Davlat tomonidan tartibga solinadigan sohalarga xususiy sektorni jalb etish bo‘yicha qo‘shimcha chora-tadbirlar to‘g‘risida” 2020-yil 7-dekabrdagi PQ-4913-son qarorida belgilangan vazifalar ijrosini samarali tashkil etish maqsadida Vazirlar Mahkamasi qaror qiladi:
1. Quyidagilarni nazarda tutuvchi Davlat funksiyalarini xususiy sektorga o‘tkazish tartibi to‘g‘risidagi nizom ilovaga muvofiq tasdiqlansin:
davlat organlarining xususiy sektorga o‘tkazilishi mumkin bo‘lgan davlat funksiyalarini tanlab olish;
xususiy sektorga o‘tkazilishi mumkin bo‘lgan davlat funksiyalarining yagona reyestrini shakllantirish, yuritish va yangilab borish;
davlat funksiyalarini xususiy sektorga o‘tkazish borasida xususiy sektor subyektlarining takliflarini o‘rganish hamda bozor tayyorligini tahlil qilish;
davlat funksiyalarini xususiy sektorga o‘tkazish tartib-taomillari;
xususiy sektorga o‘tkazilgan davlat funksiyalari amalga oshirilishi samaradorligi va sifatini baholash hamda ularni monitoring qilish tartibi;
davlat funksiyalari xususiy sektorga o‘tkazilishi munosabati bilan tegishli davlat organlarining shtat birliklarini maqbullashtirish.
2. Belgilansinki, Iqtisodiy taraqqiyot va kambag‘allikni qisqartirish vazirligi har yili:
15-fevralga qadar manfaatdor vazirliklar va idoralar bilan birgalikda ularning davlat boshqaruvidagi samarasiz hamda eksklyuziv funksiyalarini to‘liq xatlovdan o‘tkazadi;
20-martga qadar Adliya vazirligi, manfaatdor vazirliklar va idoralar bilan birgalikda davlat funksiyalarini xususiy sektorga o‘tkazish imkoniyatini xolisona tahlil qiladi;
20-mayga qadar Moliya vazirligi, Mahallabay ishlash va tadbirkorlikni rivojlantirish agentligi, Monopoliyaga qarshi kurashish qo‘mitasi bilan birgalikda xususiy sektorga o‘tkazish imkoniyati mavjud bo‘lgan davlat funksiyalarining iqtisodiy samaradorligini tahlil qiladi va xususiy sektorga o‘tkazilishi taklif etilayotgan davlat funksiyalarining yakuniy ro‘yxatini shakllantiradi;
(2-bandning to‘rtinchi xatboshisi O‘zbekiston Respublikasi Vazirlar Mahkamasining 2022-yil 19-apreldagi 195-sonli qarori tahririda — Qonunchilik ma’lumotlari milliy bazasi, 19.04.2022-y., 09/22/195/0319-son)
1-iyulga qadar Savdo-sanoat palatasi hamda funksiyalari xususiy sektorga o‘tkazilishi taklif etilayotgan vazirliklar va idoralar bilan birgalikda jamoatchilik muhokamasini o‘tkazadi, shuningdek, ushbu davlat funksiyalariga o‘xshash bo‘lgan faoliyat tajribasiga ega xususiy sektor subyektlarining dastlabki ro‘yxatini shakllantiradi;
1-avgustga qadar xususiy sektor subyektlarida zarur resurslar, infratuzilma va malakali kadrlar mavjudligini, shuningdek, davlat funksiyasini amalga oshirish uchun qilinadigan xarajatlar va tovarlar (ishlar, xizmatlar) qiymati to‘g‘risidagi takliflarni aniqlash maqsadida so‘rovnomalar o‘tkazadi, xususiy sektor va iste’molchilar uchun davlat funksiyalarini amalga oshirish qiymatini belgilagan holda har bir funksiya bo‘yicha bozor tayyorligi xulosasini tayyorlaydi hamda Vazirlar Mahkamasiga kiritadi;
1-oktabrga qadar Vazirlar Mahkamasi tomonidan ma’qullangan davlat funksiyalarini xususiy sektorga o‘tkazish bo‘yicha normativ-huquqiy hujjat loyihasini ishlab chiqadi hamda belgilangan tartibda Vazirlar Mahkamasiga kiritadi.
3. O‘zbekiston Respublikasi Iqtisodiy taraqqiyot va kambag‘allikni qisqartirish vazirligi:
uch oy muddatda loyiha qiymati va tegishli ishlarni moliyalashtirish manbalarini aks ettirgan holda Davlat funksiyalarining yagona reyestrini shakllantirish va yuritib borishga qaratilgan elektron maydonchani (keyingi o‘rinlarda — Elektron maydoncha) yaratish, keyinchalik texnik qo‘llab-quvvatlash va takomillashtirish bo‘yicha loyiha-texnik hujjatlarning ishlab chiqilishini hamda vakolatli organlardan ekspertizadan o‘tkazilishini;
Axborot texnologiyalari va kommunikatsiyalarini rivojlantirish vazirligi bilan birgalikda loyiha-texnik hujjatlar ekspertizadan o‘tkazilgandan boshlab ikki oy muddatda Elektron maydoncha dasturiy mahsulotining ishlab chiqilishi va ishga tushirilishini ta’minlasin.
4. O‘zbekiston Respublikasi Moliya vazirligi:
bir hafta muddatda Elektron maydoncha dasturiy mahsulotining ishlab chiqilishi va ishga tushirilishi bilan bog‘liq barcha xarajatlarni qoplash uchun Vazirlar Mahkamasi zaxira jamg‘armasi hisobidan zarur mablag‘ ajratilishini;
2022-yildan boshlab Elektron maydonchaning uzluksiz ishlashi uchun texnik xizmat ko‘rsatish, shuningdek, uning funksional imkoniyatlarini yanada takomillashtirish bilan bog‘liq barcha xarajatlarni qoplash maqsadida zarur mablag‘lar Iqtisodiy taraqqiyot va kambag‘allikni qisqartirish vazirligi buyurtmasiga asosan O‘zbekiston Respublikasi Davlat budjeti xarajatlari parametrlarida nazarda tutgan holda ajratilishini ta’minlasin.
5. Mazkur qarorning bajarilishini nazorat qilish O‘zbekiston Respublikasi Bosh vazirining moliya-iqtisodiyot va kambag‘allikni qisqartirish masalalari bo‘yicha o‘rinbosari — iqtisodiy taraqqiyot va kambag‘allikni qisqartirish vaziri J.A. Qo‘chqorov zimmasiga yuklansin.
O‘zbekiston Respublikasining Bosh vaziri A. ARIPOV
Toshkent sh.,
2021-yil 23-sentabr,
596-son
Vazirlar Mahkamasining 2021-yil 23-sentabrdagi 596-son qaroriga ILOVA
Davlat funksiyalarini xususiy sektorga o‘tkazish tartibi to‘g‘risida
NIZOM
1-bob. Umumiy qoidalar
1. Mazkur Nizom davlat organlarining xususiy sektorga o‘tkazilishi mumkin bo‘lgan davlat funksiyalarini tanlab olish, ularning yagona reyestrini yuritish, davlat funksiyalarini xususiy sektorga o‘tkazishga bozor tayyorligini tahlil qilish (keyingi o‘rinlarda — bozor tayyorligini tahlil qilish), xususiy sektorga o‘tkazilgan davlat funksiyalari amalga oshirilishi monitoringini olib borish, shuningdek, davlat funksiyalari xususiy sektorga o‘tkazilishi munosabati bilan tegishli davlat organlarining shtat birliklarini maqbullashtirish tartibini belgilaydi.
2. Ushbu Nizomda quyidagi asosiy tushunchalardan foydalaniladi:
akkreditatsiya — yuridik shaxslarning muayyan faoliyat sohasida muvofiqlikni baholashga doir ishlarni bajarishga vakolatli ekanligini Milliy akkreditatsiya organi tomonidan rasman tasdiqlash;
autsorser — autsorsing shartnomasi asosida davlat funksiyalarini amalga oshiruvchi xususiy sektor subyekti;
autsorsing — ayrim davlat funksiyalarini lozim darajada bajarilishi ustidan davlat nazorati mexanizmlarini joriy etgan holda autsorsing shartnomasi asosida xususiy sektorga o‘tkazish;
vakolatli organ — O‘zbekiston Respublikasi Iqtisodiy taraqqiyot va kambag‘allikni qisqartirish vazirligi;
davlat ijtimoiy buyurtmasi — ijtimoiy ahamiyatga molik loyihalarni amalga oshirish uchun davlat organi hamda nodavlat notijorat tashkilotlar o‘rtasida davlat ijtimoiy buyurtmasini amalga oshirish shartnomasini tuzish orqali ishlarni bajarish yoki tadbirlar o‘tkazishga qaratilgan davlat topshirig‘i;
davlat organi — davlat — hokimiyat vakolati doirasida davlat vazifa va funksiyalarini amalga oshiruvchi vazirliklar, davlat qo‘mitalari va boshqa davlat boshqaruvi organlari, shuningdek, mahalliy ijro hokimiyati organlari;
davlat funksiyalari — davlat organlari, ularning quyi bo‘linmalari, shuningdek, bo‘ysunuvida bo‘lgan tashkilotlarga qonunchilik hujjatlariga asosan yuklatilgan vazifani bajarishda muayyan yakuniy natija bilan tavsiflanadigan faoliyat yo‘nalishi;
kraudsorsing — davlat funksiyalarini amalga oshirish jarayoniga keng doiradagi shaxslarni ularning ijodiy qobiliyatlari, bilimlari va tajribasidan foydalanish maqsadida ixtiyoriy asoslarda axborot-kommunikatsiya texnologiyalarini qo‘llagan holda jalb etish;
sertifikatlashtirish — sertifikatlashtirish obyektining normativ hujjatlar talablariga muvofiqligini tasdiqlash bo‘yicha faoliyat;
Xususiy sektorga o‘tkazilishi mumkin bo‘lgan davlat funksiyalarining yagona reyestri (keyingi o‘rinlarda — Yagona reyestr) — vakolatli organ tomonidan shakllantiriladigan va yuritib boriladigan xususiy sektorga o‘tkazilishi mumkin bo‘lgan davlat funksiyalarining ro‘yxati, pasporti, shuningdek, funksiyani amalga oshiruvchilar to‘g‘risidagi ma’lumotlar bazasi;
elektron maydoncha — davlat funksiyalari ro‘yxatini shakllantirish, xususiy sektorga o‘tkazilishi taklif etilayotgan davlat funksiyalari, shuningdek, xususiy sektorning tegishli takliflarini e’lon qilish va muhokamadan o‘tkazish, davlat organlari bo‘yicha xususiy sektorga o‘tkazilishi mumkin bo‘lgan davlat funksiyalarini tahlil etish mexanizmlarini yo‘lga qo‘yishga hamda Davlat funksiyalarining yagona reyestrini shakllantirish va yuritib borishga qaratilgan dasturiy mahsulot.
3. O‘tkazilishi quyidagilarga zarar yetkazish xavfini keltirib chiqaradigan davlat funksiyalarining xususiy sektorga berilishiga yo‘l qo‘yilmaydi:
konstitutsiyaviy tuzumni himoya qilishga;
jamoat tartibini saqlashga;
fuqarolar huquq va erkinliklariga;
jinoyat ishi yuzasidan sudgacha bo‘lgan ishlar holatiga;
tezkor qidiruv faoliyatiga, odil sudlovga;
davlat sirlarini himoya qilish bo‘yicha davlat va axborot xavfsizligiga;
mudofaa tizimiga;
migratsiya holatiga;
milliy statistikani yuritishga;
davlat mulkini tasarruf etishga;
xalqaro majburiyatlarga qaratilgan, strategik, siyosiy, ijtimoiy va davlat manfaatlariga.
4. Davlat funksiyalarini xususiy sektorga o‘tkazishning asosiy maqsadi quyidagilar hisoblanadi:
bozor sharoitida raqobat muhitini rivojlantirish;
tadbirkorlikning yangi yo‘nalishlarini rivojlantirishga qo‘shimcha imkoniyatlar yaratish;
fuqarolarning ishchanlik faolligini oshirish;
aholiga xizmat ko‘rsatish tizimini yanada takomillashtirish;
davlat boshqaruvi tizimi samaradorligini oshirish;
davlat organlarining shtat birliklarini maqbullashtirish.
2-bob. Davlat funksiyalarini xususiy sektorga o‘tkazish uchun tanlab olish
5. Davlat funksiyalarini xususiy sektorga o‘tkazish uchun tanlab olish tartibi mazkur Nizomga 1-ilovaga muvofiq sxema bo‘yicha amalga oshiriladi.
6. Vakolatli organ har yili 15-fevralga qadar davlat organlarining funksiyalarini quyidagi mezonlar asosida elektron maydonchada jamoatchilik muhokamasidan, shuningdek, manfaatdor davlat organlarining asoslangan takliflari, ma’lumotlari asosida xatlovdan o‘tkazadi:
funksiyani amalga oshirishda davlat budjeti mablag‘laridan maqsadsiz va samarasiz foydalanilishi;
amalga oshirilish jarayonida va hisobotlarda shaffoflikning yo‘qligi;
xizmat ko‘rsatishdagi talablarning murakkabligi;
funksiyaning amalga oshirilishida inson resurslariga bo‘lgan doimiy ehtiyojning mavjudligi;
davlat organining asosiy faoliyat yo‘nalishiga salbiy ta’sir ko‘rsatish holatlarining mavjudligi;
byurokratik to‘siqlarning mavjudligi;
korrupsiyaviy huquqbuzarliklar va amaldagi qonunchilikka zid boshqa harakatlar mavjudligi;
ko‘rsatilayotgan xizmat yuzasidan murojaatlar sonida shikoyat va e’tirozlar ulushining yuqoriligi.
Bunda vakolatli organ tomonidan jamoatchilik muhokamasi Internet jahon axborot tarmog‘ining boshqa manbalarida, shu jumladan, rasmiy veb-saytlarda va ijtimoiy tarmoqlarda ham o‘tkazilishi mumkin.
Vakolatli organ samarasiz davlat funksiyalarini xatlovdan o‘tkazish maqsadida manfaatdor davlat organlariga samarasiz davlat funksiyalari to‘g‘risidagi takliflar va ma’lumotlarni taqdim qilish bo‘yicha har yili 1-fevralga qadar so‘rov yuboradi.
Manfaatdor davlat organlari samarasiz davlat funksiyalari to‘g‘risidagi takliflar va ma’lumotlarni vakolatli organning so‘roviga ko‘ra 15 kun muddatda taqdim qiladi.
7. Vakolatli organ O‘zbekiston Respublikasi Adliya vazirligi (keyingi o‘rinlarda — Adliya vazirligi) hamda manfaatdor davlat organlari bilan birgalikda har yili 20-martga qadar aniqlangan samarasiz davlat funksiya va vakolatlarini xususiy sektorga o‘tkazishni imkoniyat mavjudligi nuqtai nazaridan xolisona tahlil qiladi.
Bunda vakolatli organ Adliya vazirligi va manfaatdor davlat organlariga aniqlangan samarasiz davlat funksiya va vakolatlarini o‘tkazish imkoniyati mavjudligi yoki mavjud emasligi nuqtai nazaridan xulosa taqdim qilish bo‘yicha har yili 25-fevralga qadar so‘rov yuboradi.
Adliya vazirligi va manfaatdor davlat organlari vakolatli organning so‘roviga ko‘ra davlat funksiyalarini mazkur Nizomning 3-bandida ko‘rsatilgan funksiyalar toifasiga kirmasligi jihatidan tahlil qiladi hamda so‘rovda ko‘rsatilgan funksiyalarni xususiy sektorga o‘tkazish imkoniyati mavjudligi yoki mavjud emasligi nuqtai nazaridan asoslangan xulosalarni so‘rov tushgan kundan boshlab 15 kun muddatda taqdim etadi.
8. Vakolatli organ xususiy sektorga o‘tkazish imkoniyati mavjud davlat funksiyalarining mazmun-mohiyatini aniqlashtirishga qaratilgan pasportni shakllantirish uchun zarur ma’lumotlarni taqdim qilish bo‘yicha tegishli davlat organlariga har yili 25-martga qadar so‘rov yuboradi.
Bunda tegishli davlat organlari davlat funksiyalari pasportini shakllantirish uchun zarur ma’lumotlarni, shuningdek, davlat funksiyalarini xususiy sektorga o‘tkazish bo‘yicha takliflarni vakolatli organning so‘roviga ko‘ra 20 kun muddatda taqdim etadi.
Xususiy sektorga o‘tkazish imkoniyati mavjud davlat funksiyalarining mazmun-mohiyatini aniqlashtirishga qaratilgan pasport mazkur Nizomga 2-ilovaga muvofiq shaklda vakolatli organ tomonidan har yili 15-aprelga qadar har bir davlat funksiyasi bo‘yicha shakllantiriladi.
9. Vakolatli organ davlat funksiyalarining iqtisodiy samaradorligi yuzasidan tahlil o‘tkazish va xulosa taqdim qilish bo‘yicha O‘zbekiston Respublikasi Moliya vazirligi, Iqtisodiy taraqqiyot va kambag‘allikni qisqartirish vazirligi huzuridagi Mahallabay ishlash va tadbirkorlikni rivojlantirish agentligi, Monopoliyaga qarshi kurashish qo‘mitasiga har yili 20-aprelga qadar so‘rov yuboradi.
(9-bandning birinchi xatboshisi O‘zbekiston Respublikasi Vazirlar Mahkamasining 2022-yil 19-apreldagi 195-sonli qarori tahririda — Qonunchilik ma’lumotlari milliy bazasi, 19.04.2022-y., 09/22/195/0319-son)
Bunda Moliya vazirligi ushbu davlat funksiyalarini xususiy sektorga o‘tkazishning davlat budjeti daromad va xarajatlari ijrosiga ta’siri, Iqtisodiy taraqqiyot va kambag‘allikni qisqartirish vazirligi huzuridagi Mahallabay ishlash va tadbirkorlikni rivojlantirish agentligi — tadbirkorlik muhitiga ta’siri, Monopoliyaga qarshi kurashish qo‘mitasi — bozorda raqobat muhiti rivojlanishi jihatidan asoslangan xulosalarni, shuningdek, xususiy sektorga o‘tkazish usuli bo‘yicha takliflar bilan birgalikda vakolatli organga uning so‘roviga ko‘ra 10 kun muddatda taqdim etadi.
(9-bandning ikkinchi xatboshisi O‘zbekiston Respublikasi Vazirlar Mahkamasining 2022-yil 19-apreldagi 195-sonli qarori tahririda — Qonunchilik ma’lumotlari milliy bazasi, 19.04.2022-y., 09/22/195/0319-son)
Vakolatli organ O‘zbekiston Respublikasi Moliya vazirligi, Iqtisodiy taraqqiyot va kambag‘allikni qisqartirish vazirligi huzuridagi Mahallabay ishlash va tadbirkorlikni rivojlantirish agentligi, Monopoliyaga qarshi kurashish qo‘mitasi xulosa va takliflariga asoslanib har yili 10-mayga qadar davlat funksiyalarining iqtisodiy samaradorligi yuzasidan tahlil o‘tkazadi.
(9-bandning uchinchi xatboshisi O‘zbekiston Respublikasi Vazirlar Mahkamasining 2022-yil 19-apreldagi 195-sonli qarori tahririda — Qonunchilik ma’lumotlari milliy bazasi, 19.04.2022-y., 09/22/195/0319-son)
10. Vakolatli organ har yili 20-mayga qadar iqtisodiy samaradorlik bo‘yicha xulosalarni umumlashtiradi va tahlil qiladi, tahlil natijalariga ko‘ra, shuningdek, tegishli vazirliklar va idoralarning davlat funksiyalarini xususiy sektorga o‘tkazish bo‘yicha takliflariga asosan xususiy sektorga o‘tkazish taklif etilayotgan davlat funksiyalarining yakuniy ro‘yxatini (keyingi o‘rinlarda — yakuniy ro‘yxat) shakllantiradi.
3-bob. Bozor tayyorligini tahlil qilish
11. Bozor tayyorligini tahlil qilish tahlili mazkur Nizomga 3-ilovaga muvofiq sxema asosida amalga oshiriladi.
12. Bozor tayyorligini tahlil qilish vakolatli organ tomonidan O‘zbekiston Respublikasi Savdo-sanoat palatasi (keyingi o‘rinlarda — Savdo-sanoat palatasi) bilan birgalikda xususiy sektorga o‘tkazilishi taklif etilayotgan yakuniy ro‘yxatdagi davlat funksiyalari doirasida mazkur funksiyalarni xususiy sektor tomonidan amalga oshirish istagini o‘rganish, xususiy sektor subyektlarida zarur resurslar va infratuzilma, malakali kadrlar mavjudligini, shuningdek, xususiy sektorning takliflarini aniqlash maqsadida o‘tkaziladi.
13. Yakuniy ro‘yxatdagi davlat funksiyalarini xususiy sektor tomonidan amalga oshirish istagini o‘rganish maqsadida vakolatli organ yakuniy ro‘yxatdagi funksiyalarni ularning pasportlari bilan birgalikda elektron maydonchaga 15 kun muddatga e’lon shaklida joylashtiradi va xususiy sektor subyektlarining takliflarini qabul qiladi.
Vakolatli organ Savdo-sanoat palatasi va tegishli davlat organlari bilan birgalikda muhokamaga keng doiradagi xususiy sektor subyektlari va jamoatchilikning jalb qilinishini ta’minlaydi.
Bunda vakolatli organ muhokamani boshqa ommaviy axborot vositalari orqali ham o‘tkazishi mumkin.
14. Vakolatli organ, Savdo-sanoat palatasi va tegishli davlat organlari jamoatchilik muhokamasi o‘tkazilayotganligi to‘g‘risidagi ma’lumotlarni o‘zlarining rasmiy veb-saytlariga, shuningdek, ijtimoiy tarmoqlardagi sahifalariga joylashtiradi.
Bunda vakolatli organ yakuniy ro‘yxatning elektron maydonchaga joylashtirilishidan kamida 3 ish kuni avval Savdo-sanoat palatasi va tegishli davlat organlariga jamoatchilik muhokamasi o‘tkazilayotganligi to‘g‘risidagi ma’lumotlarni joylashtirish to‘g‘risida elektron xabarnoma yuboradi.
15. Vakolatli organ jamoatchilik muhokamasi natijalariga ko‘ra xususiy sektor subyektlaridan tushgan takliflarga asoslanib davlat funksiyalariga o‘xshash bo‘lgan faoliyat tajribasiga ega xususiy sektor subyektlarining dastlabki ro‘yxatini shakllantiradi.
16. Xususiy sektor subyektlarida zarur resurslar va infratuzilma, malakali kadrlar mavjudligini, shuningdek, davlat funksiyasini amalga oshirish uchun qilinadigan xarajatlar va tovar (ish, xizmat) qiymati bo‘yicha takliflarni aniqlash maqsadida vakolatli organ 20 kun muddatda davlat funksiyalariga o‘xshash bo‘lgan faoliyat tajribasiga ega xususiy sektor subyektlarining dastlabki ro‘yxatidagi xususiy sektor subyektlarida mazkur Nizomga 4-ilovaga muvofiq shaklda so‘rovnomalar o‘tkazadi, so‘rovnomalarni to‘ldirish bo‘yicha tushuntirish ishlarini amalga oshiradi hamda olingan ma’lumotlarni umumlashtiradi.
17. Vakolatli organ so‘rovnomalar natijalariga ko‘ra xususiy sektor va iste’molchilar uchun davlat funksiyalarini amalga oshirish qiymatini belgilaydi.
Bunda davlat organi tomonidan davlat funksiyasini amalga oshirish qiymati hamda xususiy sektor subyektlari tomonidan taklif qilinayotgan eng past qiymat solishtirilganda:
xususiy sektor subyektlari tomonidan taklif qilinayotgan tovar (ish, xizmat) qiymatining eng past narxi mazkur funksiyani amalga oshirish uchun davlat organi qilayotgan xarajat miqdoriga teng yoki xarajat miqdoridan kam bo‘lsa, ushbu funksiyani xususiy sektorga o‘tkazish tavsiya etiladi;
xususiy sektor subyektlari tomonidan taklif qilinayotgan tovar (ish, xizmat) qiymatining eng past narxi mazkur funksiyani amalga oshirish uchun davlat organi qilayotgan xarajat miqdoridan ortiq bo‘lsa, ushbu funksiyani xususiy sektorga o‘tkazish tavsiya etilmaydi.
18. Yakuniy ro‘yxatdagi har bir davlat funksiyasi uchun vakolatli organ tomonidan bozor tayyorligi to‘g‘risida xulosa shakllantiriladi.
Xulosada davlat funksiyasining nomi, davlat funksiyasini amalga oshiruvchi davlat organining nomi, funksiyani amalga oshirish imkoniyatiga ega bo‘lgan xususiy sektor subyektlarining soni va nomlari, xususiy sektor subyektlari tomonidan taklif qilingan tovar (ish, xizmat) qiymatining eng yuqori va eng kam miqdorlari, manfaatdor davlat organlari tomonidan hisoblangan funksiyani amalga oshirish qiymati, funksiyani xususiy sektorga o‘tkazish hududi ko‘rsatiladi.
19. Vakolatli organ har yili 1-avgustga qadar xususiy sektorga o‘tkazish tavsiya etilgan davlat funksiyalari ro‘yxatini tuzadi va tegishli xulosalar bilan birgalikda davlat funksiyalarini xususiy sektorga o‘tkazish bo‘yicha Vazirlar Mahkamasiga taklif kiritadi.
20. Vazirlar Mahkamasi tomonidan ma’qullangan davlat funksiyalarini xususiy sektorga o‘tkazish bo‘yicha tegishli normativ-huquqiy hujjat loyihasi vakolatli organ tomonidan har yili 1-oktabrga qadar ishlab chiqiladi hamda belgilangan tartibda Vazirlar Mahkamasiga kiritiladi.
4-bob. Xususiy sektorga o‘tkazilgan davlat funksiyalari monitoringini yuritish
21. Funksiyasi xususiy sektorga o‘tkazilgan davlat organi vakolatli organ bilan birgalikda davlat funksiyasini xususiy sektorga o‘tkazish to‘g‘risidagi normativ-huquqiy hujjat qabul qilingan kundan boshlab 10 kun muddatda tegishli funksiyaning xususiy sektor subyektlari tomonidan amalga oshirish samaradorligi va sifatini baholash bo‘yicha aniq ko‘rsatkichlarni (KPI) ishlab chiqadi.
Mazkur ko‘rsatkichlar asosida funksiyasi xususiy sektorga o‘tkazilgan davlat organlari muntazam monitoring olib boradi hamda har chorakda tegishli ma’lumotlarni vakolatli organga taqdim etadi.
22. Funksiyasi xususiy sektorga o‘tkazilgan davlat organi, funksiyani xususiy sektor subyektlari tomonidan amalga oshirish samaradorligi va sifatini aniqlashda mijozlar bilan qayta aloqa mexanizmi, ishonch telefonlari, shuningdek, jismoniy va yuridik shaxslarning og‘zaki yoki yozma murojaatlari bilan ishlash tizimlari yo‘lga qo‘yilishini ta’minlaydi.
Bunda ushbu davlat organi har chorakda, keyinchalik davlat funksiyasi xususiy sektorga o‘tkazilganligiga bir yil to‘lganidan so‘ng, har olti oyda qayta aloqa mexanizmi va ishonch telefonlariga, shuningdek, jismoniy va yuridik shaxslarning og‘zaki yoki yozma murojaatlari to‘g‘risidagi tahliliy ma’lumotlarni vakolatli organga taqdim etadi.
23. Vakolatli organ tahliliy ma’lumotlarni o‘rganadi hamda davlat funksiyasi amalga oshirilishining samaradorligi va sifatini har chorakda, funksiya xususiy sektorga o‘tkazilganligiga bir yil to‘lgandan so‘ng esa har olti oyda baholab boradi.
Bunda xususiy sektor subyektlari tomonidan davlat funksiyasi samarasiz yoki sifatsiz amalga oshirilayotganligi aniqlanganda, vakolatli organ kamchiliklarni bartaraf etish va o‘tkazilgan davlat funksiyasini amalga oshirish mexanizmlarini takomillashtirish bo‘yicha funksiyasi xususiy sektorga o‘tkazilgan davlat organlariga ko‘rsatmalar beradi yoki zaruratga ko‘ra davlat funksiyasini hamda maqbullashtirilgan shtat birliklarini tegishli davlat organiga qaytarish bo‘yicha asoslangan takliflarni belgilangan tartibda Vazirlar Mahkamasiga kiritadi.
5-bob. Davlat funksiyalari xususiy sektorga o‘tkazilishi munosabati bilan tegishli davlat organlarining shtat birliklarini maqbullashtirish
24. Davlat funksiyalari xususiy sektorga o‘tkazilishi munosabati bilan tegishli davlat organlarining shtat birliklarini maqbullashtirish faqat monitoring natijalariga ko‘ra vakolatli organning ijobiy xulosasi mavjud bo‘lgan hollarda amalga oshiriladi.
25. Davlat funksiyalari xususiy sektorga o‘tkazilishi munosabati bilan tegishli davlat organlarining shtat birliklarini maqbullashtirish funksiyasi xususiy sektorga o‘tkazilgan davlat organining tegishli hisob-kitoblariga asoslanadi.
26. Funksiyasi xususiy sektorga o‘tkazilgan davlat organlari funksiya o‘tkazilganidan boshlab ikki oy muddatda shtat birliklarini maqbullashtirish bilan bog‘liq hisob-kitoblarni Moliya vazirligi, Bandlik va mehnat munosabatlari vazirligi hamda O‘zbekiston Respublikasi Prezidenti huzuridagi Davlat xizmatini rivojlantirish agentligiga taqdim qiladi.
27. Moliya vazirligi, Bandlik va mehnat munosabatlari vazirligi, O‘zbekiston Respublikasi Prezidenti huzuridagi Davlat xizmatini rivojlantirish agentligi 20 kunlik muddatda hisob-kitoblarni davlat organlarining bo‘linmalari funksional yuklamasi bo‘yicha ko‘rib chiqadi va zarur hollarda aniqliklar kiritadi.
28. Moliya vazirligi, Bandlik va mehnat munosabatlari vazirligi hamda O‘zbekiston Respublikasi Prezidenti huzuridagi Davlat xizmatini rivojlantirish agentligi funksiya xususiy sektorga o‘tkazilgan kundan boshlab 2 oy muddatdan kechiktirmay tegishli davlat organining shtat birliklarini maqbullashtirish bo‘yicha takliflarni ishlab chiqadi va Vazirlar Mahkamasiga kiritadi.
6-bob. Davlat funksiyalarini xususiy sektorga o‘tkazish usullari va mexanizmlari
29. Davlat funksiyalari xususiy sektorga bosqichma-bosqich, muqobil tarzda (davlat ham, tadbirkor ham bajaradi), qisman yoki to‘liq o‘tkaziladi.
30. Davlat funksiyalari autsorsing, kraudsorsing, davlat ijtimoiy buyurtmasi, akkreditatsiya, sertifikatlashtirish hamda boshqa mexanizmlarni qo‘llagan holda xususiy sektorga o‘tkaziladi.
31. Tegishli davlat funksiyalarini xususiy sektorga o‘tkazish usul va mexanizmlari Vazirlar Mahkamasi tomonidan har bir davlat funksiyasining o‘ziga xos xususiyatlarini inobatga olgan holda ushbu funksiyalarni xususiy sektorga o‘tkazish to‘g‘risidagi normativ-huquqiy hujjatda belgilanadi.
32. Davlat funksiyalarini davlat ijtimoiy buyurtmasi asosida xususiy sektorga o‘tkazish qonunchilikda belgilangan talablar asosida amalga oshiriladi.
33. Davlat funksiyalari xususiy sektorga autsorsing asosida o‘tkazilganda, autsorser O‘zbekiston Respublikasining “Davlat xaridlari to‘g‘risida”gi Qonuni va boshqa qonunchilik hujjatlari talablari asosida tanlab olinadi.
34. Davlat funksiyalari akkreditatsiya orqali xususiy sektorga o‘tkazilganda, davlat funksiyalarini amalga oshiruvchi xususiy sektor subyektlari O‘zbekiston Respublikasining “Muvofiqlikni baholash to‘g‘risida”gi Qonuni talablari asosida tanlab olinadi.
35. Davlat funksiyalari sertifikatlashtirish orqali xususiy sektorga o‘tkazilganda, davlat funksiyalarini amalga oshiruvchi xususiy sektor subyektlari O‘zbekiston Respublikasining “Mahsulotlar va xizmatlarni sertifikatlashtirish to‘g‘risida”gi Qonuni talablari asosida tanlab olinadi.
7-bob. Yagona reyestrni shakllantirish va yuritish
36. Yagona reyestrga manfaatdor davlat organlarining davlat funksiyalarini o‘tkazish imkoniyati mavjudligi to‘g‘risidagi xulosalari asosida ushbu funksiyalar nomlari va ularning pasportlari kiritiladi.
37. Yagona reyestrga kiritilgan funksiyalar xususiy sektorga o‘tkazish mumkinligining rasmiy tasdig‘i hisoblanadi.
38. Yagona reyestr vakolatli organning Xususiy sektorni tahlil qilish va rivojlantirish boshqarmasi tomonidan mazkur Nizomga 5-ilovaga muvofiq shaklda elektron maydonchada yuritiladi.
39. Yagona reyestrda quyidagilar ko‘rsatilishi zarur:
funksiyaning tartib raqami;
funksiyaning nomi;
davlat organining nomi;
funksiya yagona reyestrga kiritilgan sana;
funksiya yagona reyestrdan chiqarilgan sana;
funksiya yagona reyestrga kiritilishiga asos bo‘lgan xulosani taqdim etgan davlat organining nomi;
funksiya xususiy sektorga o‘tkazilganligi to‘g‘risida qayd;
funksiya xususiy sektorga o‘tkazilgan bo‘lsa, uni amalga oshiruvchi xususiy sektor subyektlarining nomlari, manzili va ularning aloqa raqamlari;
40. Yagona reyestr zaruratga qarab vakolatli organ tomonidan yangilanib boriladi.
41. Funksiyalari xususiy sektorga o‘tkazilgan davlat organlari funksiyani amalga oshiruvchi xususiy sektor subyektlari to‘g‘risidagi ma’lumotlarni, shuningdek, xususiy subyektlar o‘zgarganda yoki yangi xususiy sektor subyektlari qo‘shilganda tegishli ma’lumotlarni 3 ish kunidan kechiktirmay vakolatli organga taqdim qiladi.
42. Yagona reyestrga davlat funksiyalari va ularning pasportlarini kiritish va yagona reyestrdan funksiya va pasportlarni chiqarish vakolatli organning qarori bilan rasmiylashtiriladi.
43. Yagona reyestrga kiritilgan ma’lumotlar tanishish uchun ochiq hisoblanadi.
8-bob. Yakunlovchi qoida
44. Mazkur Nizom talablari buzilishida aybdor bo‘lgan shaxslar qonunchilik hujjatlarida belgilangan tartibda javob beradilar.
Davlat funksiyalarini xususiy sektorga o‘tkazish tartibi to‘g‘risidagi nizomga 1-ILOVA
Davlat funksiyalarini xususiy sektorga o‘tkazish uchun tanlab olish tartibi
Elektron maydonchada jamoatchilik muhokamasini o‘tkazadi, manfaatdor davlat organlariga samarasiz davlat funksiyalari bo‘yicha ma’lumotlar va xulosa taqdim qilish uchun so‘rov yuboradi.
Har yili 1-fevralga qadar
Manfaatdor davlat organlari
Ma’lumotlar va takliflarni vakolatli organga taqdim qiladi.
Vakolatli organning so‘roviga ko‘ra, 15 kunlik muddatda.
Pasportni shakllantirish uchun zarur ma’lumotlarni taqdim qilish yuzasidan so‘rov yuboradi.
Har yili 25-martga qadar
Manfaatdor davlat organlari
Davlat funksiyalarining pasportlarini shakllantirish uchun zarur bo‘lgan ma’lumotlarni, shuningdek, xususiy sektorga o‘tkazish bo‘yicha takliflarni vakolatli organga taqdim qiladi.
Vakolatli organning so‘roviga ko‘ra, 20 kunlik muddatda
Vakolatli organ o‘tkazish imkoniyati mavjud davlat funksiyalarini ilova qilgan holda iqtisodiy samaradorligi bo‘yicha xulosa taqdim qilish uchun so‘rov yuboradi.
Har yili 20-aprelga qadar
Moliya vazirligi, Mahallabay ishlash va tadbirkorlikni rivojlantirish agentligi, Monopoliyaga qarshi kurashish qo‘mitasi
Tahlillar o‘tkazib iqtisodiy samaradorlik nuqtai nazaridan asoslangan xulosalarni, shuningdek, xususiy sektorga o‘tkazish usuli bo‘yicha takliflarni vakolatli organga taqdim qiladi.
Vakolatli organning so‘roviga ko‘ra, 10 kunlik muddatda
Davlat funksiyalarining iqtisodiy samaradorligi jihatidan ijobiy xulosalarga asoslanib xususiy sektorga o‘tkazilishi taklif etilayotgan davlat funksiyalarining yakuniy ro‘yxatini shakllantiradi.
Har yili 20-mayga qadar
Izoh. O‘zbekiston Respublikasi Prezidentining “Davlat tomonidan tartibga solinadigan sohalarga xususiy sektorni jalb etish bo‘yicha qo‘shimcha chora-tadbirlar to‘g‘risida” 2020-yil 7-dekabrdagi PQ-4913-son qarori bilan Iqtisodiy taraqqiyot va kambag‘allikni qisqartirish vazirligi Vakolatli organ hisoblanadi hamda Vazirlikning markaziy apparatida 8 ta shtat birligidan iborat Xususiy sektorni tahlil qilish va rivojlantirish boshqarmasi tashkil etilgan.
(1-ilova O‘zbekiston Respublikasi Vazirlar Mahkamasining 2022-yil 19-apreldagi 195-sonli qarori tahririda — Qonunchilik ma’lumotlari milliy bazasi, 19.04.2022-y., 09/22/195/0319-son)
Davlat funksiyalarini xususiy sektorga o‘tkazish tartibi to‘g‘risidagi nizomga 2-ILOVA
(funksiyaning nomi to‘liq qonunchilik hujjatiga muvofiq bo‘lishi lozim)
Davlat organining nizomiga asosan
Normativ-huquqiy hujjatlarga asosan (O‘zbekiston Respublikasi Prezidenti Farmoni, qarori hamda Vazirlar Mahkamasi qarori, farmoyishiga asosan)
Agar funksiya Davlat xizmatlari reyestriga kiritilgan bo‘lsa, uchinchi manbada davlat xizmatining nomi va reyestrdagi raqami kiritiladi
Funksiyaning davomiyligi
Vaqtinchalik
Doimiy
Funksiya kim tomonidan amalga oshiriladi?
Davlat organining bo‘linmasi nomi
Shtat birligi (mazkur funksiyani amalga oshiruvchi haqiqiy xodimlar soni)
Shtat birligi (mazkur funksiyani hududiy organlar bilan birgalikda amalga oshiruvchi xodimlar soni)
Shtat birligi (mazkur funksiyani boshqa idora va tashkilotlar bilan birgalikda amalga oshiruvchi xodimlar soni)
Moliyalashtirish manbasi (summasi):
Respublika budjeti
Mahalliy budjet
Funksiyadan foydalanuvchilar hisobiga (xizmat qiymati ko‘rsatilishi kerak)
Boshqa manbalar (qaysi manba ekanligi ko‘rsatilishi kerak)
Funksiya quyi turuvchi organ tomonidan amalga oshirilsa, bir yillik moliyalashtirish summasi
Shundan ish haqi va unga tenglashtirilgan to‘lovlar
Funksiyadan foydalanuvchi
Davlat organi
Davlat organi (quyi organlari) nomi
Jismoniy shaxslar
Tadbirkorlik subyektlari
Tadbirkorlik subyektining tashkiliy-huquqiy shakli
Funksiya xususiyati
Funksiyani amalga oshirish bosqichlari (qisqacha)
Funksiyani amalga oshiruvchilarni nazorat qilish
Nazorat qilish talab qilinadi
Nazorat funksiyasining nomi
Nazorat shakli (tekshiruv, monitoring yoki boshqa shakli)
Javobgarlik ko‘rinishi: intizomiy, ma’muriy yoki jinoiy
Agar funksiya davlat xizmati bo‘lsa, iste’molchilar uchun xizmat narxi
Xizmat shakli (xavf darajasidan kelib chiqib):
Litsenziya
Ruxsatnoma
Xabarnoma
Boshqa
Xizmatni ko‘rsatish shakli:
Elektron
Qog‘ozda
Aralash
Iste’molchilar uchun xizmatni ko‘rsatish muddati (kun)
Xizmatni ko‘rsatish sifatini aniqlash mezoni
(to‘liq va tushunarli yozilishi kerak)
Funksiyani xususiy sektorga o‘tkazish bo‘yicha taklif:
Autsorsing
Kraudsorsing
Davlat ijtimoiy buyurtmasi
Akkreditatsiya
Sertifikatlashtirish
Boshqa usul
Taklif qilinayotgan o‘tkazish jarayoni:
Sinov-tajriba
Bosqichma-bosqich
Qisman o‘tkazish
To‘liq o‘tkazish
Davlat funksiyalarini xususiy sektorga o‘tkazish tartibi to‘g‘risidagi nizomga 3-ILOVA
Davlat funksiyalarini xususiy sektorga o‘tkazishga bozor tayyorligini tahlil qilish
SXEMASI
Bosqichlar
Subyektlar
Tadbirlar
Bajarish muddatlari
1-bosqich
Elektron maydonchada 15 kunlik jamoatchilik muhokamasini o‘tkazish:
Vakolatli organ*
1. Xususiy sektorga o‘tkazilishi taklif etilayotgan davlat funksiyalari yakuniy ro‘yxatini elektron maydonchaga joylashtiradi.
Har yili 1-iyunga qadar
Savdo-sanoat palatasi, funksiyasi xususiy sektorga o‘tkazilishi taklif etilayotgan tegishli davlat organlari
2. Yakuniy ro‘yxat joylashtirilishi kunini ko‘rsatgan holda Savdo-sanoat palatasi va funksiyasi xususiy sektorga o‘tkazilishi taklif etilayotgan tegishli davlat organlariga xabarnoma yuboradi.
Ro‘yxat joylashtirishdan kamida uch ish kuni oldin
3. Jamoat muhokamasi o‘tkazilayotganligi to‘g‘risida ma’lumotlarni o‘zlarining rasmiy veb-saytlarida, shuningdek, ijtimoiy tarmoqlardagi sahifalariga joylashtiradi.
Xabarnoma kelib tushgandan keyin bir kun muddatda
2-bosqich
Vakolatli organ*
Jamoatchilik muhokamasi natijalarini jamlaydi va o‘tkazilayotgan davlat funksiyalariga o‘xshash bo‘lgan faoliyat tajribasiga ega xususiy sektor subyektlarining dastlabki ro‘yxati shakllantiriladi.
Har yili 1-iyulga qadar
Xususiy sektor subyektlarida zarur resurslar va infratuzilma, malakali kadrlar mavjudligini, shuningdek, davlat funksiyasini amalga oshirish uchun qilinadigan xarajatlar va tovar (ish, xizmat) qiymati bo‘yicha takliflarni aniqlash maqsadida Vakolatli organ 20 kunlik muddatda davlat funksiyalariga o‘xshash bo‘lgan faoliyat tajribasiga ega xususiy sektor subyektlarining dastlabki ro‘yxatidagi xususiy sektor subyektlarida so‘rovnomalar o‘tkazadi.
Har yili 20-iyulga qadar
3-bosqich
Vakolatli organ*
So‘rovnomalar natijalariga ko‘ra xususiy sektor va iste’molchilar uchun davlat funksiyalarini amalga oshirish qiymatini belgilaydi.
Bunda davlat organi tomonidan davlat funksiyasini amalga oshirish qiymati hamda xususiy sektor subyektlari tomonidan taklif qilinayotgan eng past qiymat solishtirilganda:
1. Taklif qilinayotgan tovar (ish, xizmat) qiymatining eng past narxi mazkur funksiyani amalga oshirish uchun davlat organi qilayotgan xarajat miqdoriga teng yoki xarajat miqdoridan kam bo‘lsa, ushbu funksiyani xususiy sektorga o‘tkazish tavsiya etiladi;
2. Taklif qilinayotgan tovar (ish, xizmat) qiymatining eng past narxi mazkur funksiyani amalga oshirish uchun davlat organi qilayotgan xarajat miqdoridan ortiq bo‘lsa, ushbu funksiyani xususiy sektorga o‘tkazish tavsiya etilmaydi.
Har yili 25-iyulga qadar
4-bosqich
Vakolatli organ*
Xususiy sektor va iste’molchilar uchun davlat funksiyalarini amalga oshirish qiymati belgilangan holda har bir davlat funksiyalari bo‘yicha bozor tayyorligi xulosasi tayyorlanadi va Vazirlar Mahkamasiga kiritiladi.
Har yili 1-avgustga qadar
5-bosqich
Vazirlar Mahkamasi
Vakolatli organning bozor tayyorligi xulosasini ko‘rib chiqadi.
Har yili 15-avgustga qadar
Vakolatli organ*
Vazirlar Mahkamasi tomonidan ma’qullangan davlat funksiyalarini xususiy sektorga o‘tkazish bo‘yicha normativ-huquqiy hujjat loyihasi ishlab chiqiladi va belgilangan tartibda Vazirlar Mahkamasiga kiritiladi.
Har yili 1-oktabrga qadar
Izoh. O‘zbekiston Respublikasi Prezidentining “Davlat tomonidan tartibga solinadigan sohalarga xususiy sektorni jalb etish bo‘yicha qo‘shimcha chora-tadbirlar to‘g‘risida” 2020-yil 7-dekabrdagi PQ-4913-son qarori bilan Iqtisodiy taraqqiyot va kambag‘allikni qisqartirish vazirligi Vakolatli organ hisoblanadi hamda Vazirlikning markaziy apparatida 8 ta shtat birligidan iborat Xususiy sektorni tahlil qilish va rivojlantirish boshqarmasi tashkil etilgan.
Davlat funksiyalarini xususiy sektorga o‘tkazish tartibi to‘g‘risidagi nizomga 4-ILOVA
Namuna
Xususiy sektor subyektlariga taqdim qilinadigan so‘rovnoma
Tashkilot nomi
Tashkilot nomi to‘liq
(tashkiliy-huquqiy shakli)
1. Umumiy ma’lumot
Joylashgan joyi
Tashkil etilgan vaqti
Xodimlar soni
Moliyaviy holati
(Umumiy kapitali to‘g‘risida ma’lumot)
2. Davlat funksiyasini bajarish istagini bildiruvchining faoliyat sohasi
Faoliyat sohasi
Izoh
3. Davlat funksiyasini bajarish uchun yetarli resurslarga ega ekanligi to‘g‘risida ma’lumotlar
Funksiyani bajarish uchun malakali kadrlar mavjudligi
Zarur infratuzilma bilan ta’minlanganligi
4. Davlat funksiyasini bajarish uchun xizmat haqi to‘g‘risida ma’lumotlar
Funksiyani to‘liq yoki qisman bajarish bo‘yicha qaydlar
Funksiyani bajarish uchun zarur xodimlar soni
Real xarajat
(hisob-kitob ilova qilingan holda)
Tovar (ish, xizmat) qiymati
(narxning asoslantirilishi ilova qilingan holda)
5. Davlat funksiyasini takomillashtirish bo‘yicha takliflar.
Taklif
(Takomillashtirish bo‘yicha takliflar to‘liq, tushunarli yozilishi kerak)
Ijrochi (lavozimi, F.I.O.)
Ijrochi telefoni
Sana
Izoh. Mazkur so‘rovnomaning maqsadi davlat funksiyalarini amalga oshirish istagini bildirgan xususiy sektor subyektlarini birlamchi o‘rganish hisoblanadi.
Ushbu so‘rovnoma tovarlar (ishlar, xizmatlar)ning davlat xaridi to‘g‘risidagi, shuningdek, davlat nazorati va taftishi to‘g‘risidagi so‘rovnoma emas.
So‘rovnoma yakunlariga ko‘ra davlat organlari so‘rovnomada ishtirok etgan xususiy sektor subyektlari bilan shartnoma imzolash majburiyatini olmaydi.
Davlat funksiyalarini xususiy sektorga o‘tkazish tartibi to‘g‘risidagi nizomga 5-ILOVA
Xususiy sektorga o‘tkazilishi mumkin bo‘lgan davlat funksiyalarining
YAGONA REYESTRI
T/r
Nomi
Vazirlik va idora nomi
Yagona reyestrga kiritilgan sana
Yagona reyestrdan chiqarilgan sana
Yagona reyestrga kiritilishiga xulosa bergan davlat organi nomi
Xususiy sektorga o‘tkazilganligi to‘g‘risida qayd
Xususiy sektorga o‘tkazilganda uni amalga oshiruvchi xususiy sektor subyektlarining nomlari, ularning manzili va aloqa qilish raqamlari
1
2
3
4
5
6
7
8
(Qonunchilik ma’lumotlari milliy bazasi, 24.09.2021-y., 09/21/596/0904-son, Qonunchilik ma’lumotlari milliy bazasi, 19.04.2022-y., 09/22/195/0319-son)
