Oʻzbekiston Respublikasi Oliy Majlisi Qonunchilik palatasi Kengashining
qarori
Oʻzbekiston Respublikasi Oliy Majlisi Qonunchilik palatasida ommaviy axborot vositalari vakillarining faoliyatini tashkil qilishga doir chora-tadbirlar toʻgʻrisida
Oʻzbekiston Respublikasi Oliy Majlisi Qonunchilik palatasi faoliyatini oʻz vaqtida va xolisona yoritish uchun ommaviy axborot vositalari vakillariga shart-sharoitlar yaratish maqsadida Oʻzbekiston Respublikasi Oliy Majlisi Qonunchilik palatasining Kengashi qaror qiladi:
1. Ommaviy axborot vositalari vakillarini Oʻzbekiston Respublikasi Oliy Majlisi Qonunchilik palatasi huzurida akkreditatsiya qilish tartibi 1-ilovaga muvofiq tasdiqlansin.
2. Oʻzbekiston Respublikasi Oliy Majlisi Qonunchilik palatasida oʻtkaziladigan tadbirlarni yoritishlari uchun ommaviy axborot vositalari vakillariga zarur shart-sharoitlar yaratish boʻyicha yoʻriqnoma 2-ilovaga muvofiq tasdiqlansin.
3. Oʻzbekiston Respublikasi Oliy Majlisi Qonunchilik palatasi Devoni (M. Miralimov) akkreditatsiya qilinadigan ommaviy axborot vositalari vakillariga doir maʼlumotlarni taqdim etish yuzasidan ommaviy axborot vositalari tahririyatlariga 2021-yil 20-aprelga qadar xat yuborish hamda ularning vakillarini belgilangan tartib va muddatlarda akkreditatsiya qilish choralarini koʻrsin.
4. Ushbu Qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining oʻrinbosari O. Tadjiyev zimmasiga yuklatilsin.
5. Ushbu Qaror 2021-yil 1-maydan eʼtiboran kuchga kiradi.
Oʻzbekiston Respublikasi Oliy Majlisi Qonunchilik palatasining Spikeri N. ISMOILOV
Toshkent sh.,
2021-yil 5-aprel,
837-IV-son
Oʻzbekiston Respublikasi Oliy Majlisi Qonunchilik palatasi Kengashining 2021-yil 5-aprelda qabul qilingan 837-IV-sonli Qaroriga
1-ILOVA
1-ILOVA
Ommaviy axborot vositalari vakillarini Oʻzbekiston Respublikasi Oliy Majlisi Qonunchilik palatasi huzurida akkreditatsiya qilish
TARTIBI
I. Umumiy qoidalar
1. Ommaviy axborot vositalari (bundan buyon matnda OAV deb yuritiladi) jurnalistlarini Oʻzbekiston Respublikasi Oliy Majlisi Qonunchilik palatasi (bundan buyon matnda Qonunchilik palatasi deb yuritiladi) huzurida akkreditatsiya qilish Qonunchilik palatasida oʻtkaziladigan tadbirlar haqidagi axborotlarning tezkor, ochiq, keng va xolis yoritilishini tashkil etish maqsadida amalga oshiriladi.
2. Akkreditatsiya “Jurnalistlik faoliyatini himoya qilish toʻgʻrisida”gi, “Ommaviy axborot vositalari toʻgʻrisida”gi, “Axborot erkinligi prinsiplari va kafolatlari toʻgʻrisida”gi Oʻzbekiston Respublikasi qonunlariga va ushbu Tartibga muvofiq amalga oshiriladi.
3. Mazkur Tartibda quyidagi tushunchalardan foydalaniladi:
jurnalist — mehnatga oid yoki boshqa shartnomaviy munosabatlar asosida ommaviy axborot vositalari uchun xabarlar va materiallarni toʻplash, tahlil etish, tahrir qilish, tayyorlash hamda tarqatishga doir faoliyatni amalga oshiruvchi shaxs;
texnik va xizmat koʻrsatuvchi xodim — OAVning tahririyati tomonidan jurnalist(lar)ga biriktirilgan multimedia mutaxassisi, teleoperatorlar, fotojurnalistlar, tele-, kino- va videoapparatlarga, aloqa va boshqa texnik vositalarga xizmat koʻrsatuvchi mutaxassis, tarjimon, pardozchi;
akkreditatsiya — tegishli OAV tahririyatining buyurtmanomasi asosida jurnalistning vakolatlarini Qonunchilik palatasi tomonidan eʼtirof etish tartiboti boʻlib, Qonunchilik palatasi faoliyatini OAVda yoritish uchun jurnalistning roʻyxatga olinganligini tasdiqlovchi guvohnomani berish bilan bogʻliq jarayon.
4. Akkreditatsiya qilinadigan jurnalistlar soni Qonunchilik palatasi tomonidan OAV tahririyatlari bilan kelishilgan holda ushbu Tartibning 1-ilovasida koʻrsatilgan miqdor doirasida belgilanadi.
II. Akkreditatsiya qilishni tashkil etish
5. Akkreditatsiya qilish uchun OAV tahririyati tomonidan tahririyatning rasmiy blankasida yozilgan, ushbu Tartibning 2-ilovasida keltirilgan shakldagi buyurtmanoma Qonunchilik palatasining Matbuot xizmatiga (bundan buyon matnda Matbuot xizmati deb yuritiladi) taqdim etiladi. Buyurtmanoma OAV birinchi rahbari yoki uning vazifasini bajaruvchi shaxs tomonidan imzolanishi lozim.
6. Buyurtmanomaga OAVning davlat roʻyxatidan oʻtkazilganligi toʻgʻrisidagi guvohnoma nusxasi, akkreditatsiya qilish uchun tavsiya etilayotgan OAV jurnalisti, OAV tahririyatining guvohnoma beriladigan texnik va xizmat koʻrsatuvchi xodimlarining fotosurati ilova qilinishi lozim.
7. Akkreditatsiya qilish uchun buyurtmanoma yozma yoki elektron shaklda (Qonunchilik palatasining rasmiy veb-sayti orqali) taqdim etiladi.
8. Buyurtmanomani koʻrib chiqish hamda jurnalistlarni akkreditatsiyadan oʻtkazish Matbuot xizmati tomonidan buyurtmanoma olingan sanadan eʼtiboran oʻn ish kuni ichida amalga oshiriladi.
9. OAV jurnalisti bir yil muddatga akkreditatsiya qilinadi.
Akkreditatsiya qilingan OAV jurnalistlariga Matbuot xizmati tomonidan ushbu Tartibning 3-ilovasiga muvofiq shakldagi “Akkreditatsiya guvohnomasi” beriladi.
“Akkreditatsiya guvohnomasi” Qonunchilik palatasi Devonining Tashkiliy ishlar va kadrlar boʻlimi tomonidan tayyorlanadi.
Guvohnoma Matbuot xizmatining rahbari tomonidan imzolanadi va unga Qonunchilik palatasining muhri qoʻyiladi.
III. Akkreditatsiya qilishni rad etish yoki akkreditatsiyani bekor qilish
10. Quyidagi hollarda jurnalistni akkreditatsiya qilish rad etilishi mumkin:
buyurtmanoma mazkur Tartib talablariga mos boʻlmaganda;
reklama xususiyatiga ega boʻlgan ommaviy axborot vositalari (reklama tarqatishga ixtisoslashgan gazetalar, jurnallar, tele-, radio kanallar va boshqalar).
11. Jurnalistning akkreditatsiya qilinganligi yoki uni akkreditatsiya qilish rad etilganligi haqida OAV tahririyatiga maʼlum qilinadi.
12. Quyidagi hollarda jurnalistning akkreditatsiyasi muddatidan oldin bekor qilinishi mumkin:
jurnalisti akkreditatsiya qilingan OAV faoliyati tugatilgan yoki toʻxtatib qoʻyilganda;
belgilangan tartibda jurnalist tomonidan Jurnalistlarning kasbga oid odob-axloq qoidalari buzilgan deb topilgan taqdirda;
jurnalist bilan OAV tahririyati oʻrtasida tuzilgan mehnat shartnomasi bekor qilinganda;
jurnalistning akkreditatsiyasini bekor qilishni soʻrab OAV tahririyati tomonidan Qonunchilik palatasiga yozma murojaat yoʻllangan taqdirda.
13. Akkreditatsiya qilingan jurnalist ishdan boʻshatilgan taqdirda OAV tahririyati bu haqda darhol Matbuot xizmatini xabardor qiladi.
14. Jurnalistning akkreditatsiyasi bekor qilingan taqdirda OAV tahririyati “Akkreditatsiya guvohnomasi”ni bir ish kuni ichida Matbuot xizmatiga qaytaradi.
Jurnalistning akkreditatsiyasi ushbu Tartib 12-bandining uchinchi — beshinchi xatboshilariga muvofiq bekor qilinganda OAV tahririyati akkreditatsiyasi bekor qilingan jurnalistning “Akkreditatsiya guvohnomasi”ni Matbuot xizmatiga qaytargach, uning oʻrniga boshqa jurnalistni akkreditatsiya qilishni soʻrab ushbu Tartibga muvofiq buyurtmanoma taqdim etishga haqlidir.
15. “Akkreditatsiya guvohnomasi”ning amal qilish muddati tugagan, guvohnomadagi maʼlumotlar oʻzgartirilgan yoki guvohnomaga shikast yetgan boʻlsa yoxud jurnalistning akkreditatsiyasi bekor qilingan boʻlsa, jurnalist Qonunchilik palatasi binosiga kiritilmasligi mumkin.
IV. Akkreditatsiya muddatini uzaytirish
16. Akkreditatsiya muddati tugagan jurnalistning akkreditatsiyasi uzaytirilishi mumkin.
Bunda OAV tahririyati jurnalistning akkreditatsiya muddati tugashidan kamida oʻn kun oldin Qonunchilik palatasiga yangi muddatga akkreditatsiya qilish toʻgʻrisidagi buyurtmanomani taqdim etadi.
17. Quyidagi hollarda akkreditatsiya muddatini uzaytirish rad etilishi mumkin:
buyurtmanoma mazkur Tartib talablariga mos boʻlmaganda;
jurnalisti akkreditatsiya qilingan OAV tahririyati keyinchalik oʻz yoʻnalishini (ixtisosligi) oʻzgartirgan va parlament faoliyatini yoritish bilan bogʻliq boʻlmagan sohalarnigina yoritayotgan boʻlsa;
akkreditatsiya qilingan jurnalist akkreditatsiya muddati tugagunga qadar Qonunchilik palatasining faoliyatini yoritish bilan shugʻullanmagan taqdirda.
18. Akkreditatsiya muddati uzaytirilgan taqdirda jurnalistga ushbu Tartibning 9-bandiga muvofiq “Akkreditatsiya guvohnomasi” beriladi.
V. Bir martalik akkreditatsiya qilish
19. Qonunchilik palatasi tomonidan oʻtkaziladigan muhim tadbirlarni, shu jumladan xalqaro tadbirlarni kengroq yoritish uchun boshqa jurnalistlar ham ishtirok etishi kerak boʻlgan hollarda jurnalistlar Qonunchilik palatasi huzurida bir martalik akkreditatsiya qilinishi mumkin.
20. Jurnalistlarni bir martalik akkreditatsiya qilish Matbuot xizmatining OAV tahririyatlariga yoʻllagan taklifiga asosan amalga oshiriladi.
OAV tahririyatlari jurnalistni bir martalik akkreditatsiya qilish uchun OAVning toʻliq nomi, manzili, telefon raqami, elektron manzili, akkreditatsiya qilinadigan jurnalistlarning familiyasi, ismi, otasining ismi, telefon raqamiga doir maʼlumotlarni Matbuot xizmatiga yozma yoki elektron shaklda, tahririyat rahbari yoki uning vazifasini bajaruvchi shaxs tomonidan imzolangan holda taqdim etadi.
21. Bir martalik akkreditatsiyadan oʻtgan jurnalistlar Matbuot xizmati rahbari tasdiqlaydigan roʻyxat asosida Qonunchilik palatasi binosiga kiritiladi.
VI. Texnik va xizmat koʻrsatuvchi xodimlar
22. Qonunchilik palatasida oʻtkaziladigan tadbirlarda akkreditatsiya qilingan jurnalistlar bilan birga texnik va xizmat koʻrsatuvchi xodimlar ishtirok etishi mumkin.
23. Akkreditatsiya qilinadigan jurnalistlar bilan birga jalb etiladigan texnik va xizmat koʻrsatuvchi xodimlarga doir maʼlumot OAV tahririyati tomonidan ushbu Tartibning 2-ilovasiga asosan taqdim etiladigan buyurtmanomada koʻrsatiladi.
Qonunchilik palatasida oʻtkaziladigan tadbirlarda texnik va xizmat koʻrsatuvchi xodimlar bir martalik akkreditatsiya qilinadigan jurnalist bilan birga jalb etiladigan hollarda OAV tahririyati ushbu xodimlarning familiyasi, ismi, otasining ismi, telefon raqamiga doir maʼlumotlarni Matbuot xizmatiga yozma yoki elektron shaklda, tahririyat rahbari yoki uning vazifasini bajaruvchi shaxs tomonidan imzolangan holda taqdim etadi.
24. Bir yil muddatga akkreditatsiya qilingan jurnalistlarga biriktirilgan texnik va xizmat koʻrsatuvchi xodimlarga ushbu Tartibning 4-ilovasiga muvofiq shakldagi amal qilish muddati bir yil boʻlgan guvohnoma beriladi.
Guvohnoma Qonunchilik palatasi Devonining Tashkiliy ishlar va kadrlar boʻlimi tomonidan tayyorlanadi.
Guvohnoma Qonunchilik palatasi Matbuot xizmati rahbari tomonidan imzolanadi va unga Qonunchilik palatasi muhri qoʻyiladi.
25. Bir martalik akkreditatsiya qilingan jurnalistlarga biriktirilgan texnik va xizmat koʻrsatuvchi xodimlar Matbuot xizmati rahbari tasdiqlaydigan roʻyxat asosida Qonunchilik palatasi binosiga kiritiladi.
VII. Yakunlovchi qoidalar
26. “Akkreditatsiya guvohnomasi”, texnik va xizmat koʻrsatuvchi xodimlarga berilgan guvohnoma yoʻqotilgan yoki yaroqsiz holga kelgan hollarda OAV tahririyatining murojaatiga asosan guvohnomaning dublikati beriladi.
27. Matbuot xizmati akkreditatsiya qilingan jurnalistlarga ularning Qonunchilik palatasida oʻtkaziladigan tadbirlarni yoritish bilan bogʻliq faoliyatiga uslubiy va maslahat jihatdan yordam koʻrsatadi, jurnalistlarga hamda texnik va xizmat koʻrsatuvchi xodimlarga Qonunchilik palatasi binosida tegishli shart-sharoitlar yaratilishi hamda jurnalistlarni ushbu Tartibga rioya etishlari uchun masʼul hisoblanadi.
Ommaviy axborot vositalarining vakillarini Oʻzbekiston Respublikasi Oliy Majlisi Qonunchilik palatasi huzurida akkreditatsiya qilish tartibiga
1-ILOVA
1-ILOVA
Oʻzbekiston Respublikasi Oliy Majlisi Qonunchilik palatasi huzurida akkreditatsiya qilinadigan ommaviy axborot vositalari jurnalistlari
miqdori
|
OAV turi |
Akkreditatsiya qilinadigan jurnalistlar soni |
|
Telekanallar |
3 |
|
Axborot agentliklari |
2 |
|
Gazetalar va jurnallar |
2 |
|
Ommaviy axborot vositasi hisoblanadigan veb-saytlar |
2 |
|
Radiokanallar |
2 |
Izoh: Texnik va xizmat koʻrsatuvchi xodimlar soni OAV tahririyatlarining takliflariga asosan Matbuot xizmati tomonidan belgilanadi.
Ommaviy axborot vositalarining vakillarini Oʻzbekiston Respublikasi Oliy Majlisi Qonunchilik palatasi huzurida akkreditatsiya qilish tartibiga
2-ILOVA
2-ILOVA
| | | | | | | | | | | |
Oʻzbekiston Respublikasi | ||||||||
| | | | | | | | | | | | | ||||||||
|
_____________________________________________________ning vakillarini | |||||||||||||||||||
|
(OAV nomi) |
| | | | |||||||||||||||
|
Oʻzbekiston Respublikasi Oliy Majlisi Qonunchilik palatasi | |||||||||||||||||||
| | | | | | | | | | | | | | | | | | | | |
| OAV ning toʻliq nomi va turi | |||||||||||||||||||
| OAV ning ixtisoslashuvi | |||||||||||||||||||
| Ommaviy axborotning tarqatish shakli | |||||||||||||||||||
| OAV tahririyati joylashgan pochta manzili, indeksi | |||||||||||||||||||
| OAV chiqishlarining davriyligi | |||||||||||||||||||
| OAV ning internetdagi veb-sayti | |||||||||||||||||||
|
OAV ning ijtimoiy tarmoqlardagi rasmiy sahifalari |
|||||||||||||||||||
|
OAV tahririyatining telefon va faks raqamlari, elektron pochta manzili |
|||||||||||||||||||
| | | | | | | | | | | | | | | | | | | | |
|
Akkreditatsiya qilinadigan OAV jurnalistlari, guvohnoma | |||||||||||||||||||
| | | | | | | | | | | | | | | | | | | | |
|
Familiyasi, |
Lavozimi |
Pasport maʼlumotlari (seriyasi, raqami, tugʻilgan joyi va sanasi, doimiy yashash joyi boʻyicha roʻyxatga olingan manzili) |
Telefon raqami, elektron pochta manzili, ijtimoiy tarmoqlardagi sahifalari | ||||||||||||||||
|
|||||||||||||||||||
| | | | | | | | | | | | | | | | | | | | |
|
______________________ |
_______________ |
_________________________ | |||||||||||||||||
|
(lavozimi) |
(imzo) |
(ismi-sharifi) | |||||||||||||||||
| | | | |||||||||||||||||
|
Ijrochining FIO va telefon raqami | |||||||||||||||||||
| | | | | | | | | | | | | | | | | | | | |
Ommaviy axborot vositalarining vakillarini Oʻzbekiston Respublikasi Oliy Majlisi Qonunchilik palatasi huzurida akkreditatsiya qilish tartibiga
3-ILOVA
3-ILOVA
|
FOTO |
Jurnalistni Oʻzbekiston Respublikasi Oliy Majlisi Qonunchilik palatasi huzurida akkreditatsiya qilish toʻgʻrisida F.I.O. OAV ning nomi Tarqatish shakli Ixtisoslashuvi Tahririyat manzili Amal qilish muddati Berilgan sanasi |
|
Qonunchilik palatasi | |
Ommaviy axborot vositalarining vakillarini Oʻzbekiston Respublikasi Oliy Majlisi Qonunchilik palatasi huzurida akkreditatsiya qilish tartibiga
4-ILOVA
4-ILOVA
|
FOTO |
Oʻzbekiston Respublikasi Oliy Majlisi Ommaviy axborot vositasi texnik va xizmat koʻrsatuvchi xodimlarining F.I.O. OAV ning nomi OAV ning nomi Xodimning faoliyat yoʻnalishi Tahririyat manzili Amal qilish muddati Berilgan sanasi |
|
Qonunchilik palatasi | |
Oʻzbekiston Respublikasi Oliy Majlisi Qonunchilik palatasi Kengashining 2021-yil 5-aprelda qabul qilingan 837-IV-sonli Qaroriga
2-ILOVA
2-ILOVA
Oʻzbekiston Respublikasi Oliy Majlisi Qonunchilik palatasida oʻtkaziladigan tadbirlarni yoritishlari uchun ommaviy axborot vositalari vakillariga zarur shart-sharoitlar yaratish boʻyicha
YOʻRIQNOMA
1. Ushbu Yoʻriqnoma ommaviy axborot vositalarining (bundan buyon matnda OAV deb yuritiladi) vakillari Oʻzbekiston Respublikasi Oliy Majlisi Qonunchilik palatasida (bundan buyon matnda Qonunchilik palatasi deb yuritiladi) oʻtkaziladigan tadbirlarni keng, ochiq va xolis yoritishlari uchun ularga zarur shart-sharoitlar yaratish maqsadida ishlab chiqilgan.
2. Qonunchilik palatasi huzurida akkreditatsiya qilingan jurnalistlar Qonunchilik palatasi Matbuot xizmatining (bundan buyon matnda Matbuot xizmati deb yuritiladi) taklifi asosida Qonunchilik palatasida oʻtkaziladigan tadbirlarda ishtirok etadi.
3. Chet davlatlar OAVning Oʻzbekiston Respublikasi Tashqi ishlar vazirligida akkreditatsiya qilingan jurnalistlari Matbuot xizmatining mazkur OAV tahririyatlariga (jurnalistlariga) yoʻllagan taklifiga asosan Qonunchilik palatasida oʻtkaziladigan tadbirlarda ishtirok etishi mumkin.
Bunday hollarda OAV toʻliq nomi, manzili, telefon raqami, elektron manzili, akkreditatsiya qilinadigan jurnalistlarning, shuningdek jurnalistga biriktirilgan texnik va xizmat koʻrsatuvchi xodimlarning familiyasi, ismi, otasining ismi, telefon raqamiga doir maʼlumotlar Matbuot xizmatiga taqdim etiladi.
4. Chet davlatlar OAVning Oʻzbekiston Respublikasi Tashqi ishlar vazirligida akkreditatsiya qilingan jurnalistlari hamda ularga biriktirilgan texnik va xizmat koʻrsatuvchi xodimlar Matbuot xizmati rahbari tasdiqlaydigan roʻyxat asosida Qonunchilik palatasi binosiga kiritiladi.
5. OAV vakillari Qonunchilik palatasida samarali faoliyat yuritishi uchun zarur shart-sharoitlarga (axborot-kommunikatsiya texnologiyalari, multimedia jihozlari, kanselyariya tovarlari va boshqalar) ega alohida xona ajratiladi.
Muayyan tadbir boʻlib oʻtayotgan zalda bevosita ishtirok etmaydigan OAV vakillariga qulaylik yaratish maqsadida alohida xonaga ekran oʻrnatiladi va tadbir onlayn tarzda namoyish qilinishi taʼminlanadi.
6. Qonunchilik palatasi tomonidan qabul qilinayotgan qonunlar, koʻrib chiqilayotgan boshqa dolzarb masalalarga doir axborotlarni keng jamoatchilikka tezkor va tushunarli ravishda yetkazish maqsadida Matbuot xizmati tomonidan Qonunchilik palatasining majlisi tugaganidan keyin OAV vakillari uchun Qonunchilik palatasidagi siyosiy partiyalar fraksiyalari vakillari ishtirokida brifinglar tashkil etish choralari koʻriladi.
7. OAVning jurnalistlari Qonunchilik palatasida:
oʻtkaziladigan majlislar va boshqa tadbirlar toʻgʻrisida oldindan axborot olishlari;
tahririyat bilan bogʻlanish va xabarlarni yetkazish uchun maxsus ajratilgan joydagi telefon aloqasi, internet tarmogʻi hamda boshqa texnika vositalaridan foydalanishlari;
oʻtkaziladigan tadbirga doir matbuot xabarnomalari va boshqa zarur axborotlarni Matbuot xizmatidan olishlari mumkin.
OAVning akkreditatsiya qilingan jurnalistlari qonunchilik hujjatlarida nazarda tutilgan boshqa huquqlardan ham foydalanadi.
8. OAVning vakillari (jurnalistlar, texnik va xizmat koʻrsatuvchi xodimlar):
Qonunchilik palatasi majlisi paytida ish jarayoniga xalaqit bermasliklari;
Qonunchilik palatasi binosiga kirish va undan chiqish vaqtida belgilangan talablarga rioya etishlari lozim.
OAV jurnalistlari Jurnalistlarning kasbga oid odob-axloq qoidalariga qatʼiy rioya etgan holda faoliyat koʻrsatadi.
9. Qonunchilik palatasida tadbirlar oʻtkaziladigan vaqtida OAV vakillari oʻzlari uchun ajratilgan maxsus joylarda faoliyat olib borishi tavsiya etiladi.
Qonunchilik palatasi katta majlislar zalining markaziy (doirasimon) qismida operator va fotomuxbirlar faoliyati operativ ravishda amalga oshirilishiga ruxsat etiladi.
10. Matbuot xizmati Qonunchilik palatasining foyesida OAV vakillari intervyu olishlari uchun zarur shart-sharoit yaratilishini taʼminlaydi, shuningdek Qonunchilik palatasining deputatlari va boshqa shaxslarni intervyu berish uchun jalb qilishga koʻmaklashadi.
Intervyular Qonunchilik palatasining maxsus bannyerlari (press wall) fonida yozib olinishi tavsiya etiladi.
11. Qonunchilik palatasi tadbirlari jarayonidan jonli efirlar tashkil etish Matbuot xizmati bilan kelishilgan holda amalga oshiriladi.
