Hujjat kuchini yo‘qotgan " " 29.11.2022

Oʻzbekiston Respublikasi Vazirlar Mahkamasining

qarori

Korporativ boshqaruvchi malaka attestatini berish tartibi toʻgʻrisidagi nizomni tasdiqlash haqida

LexUZ sharhi

Mazkur qaror Oʻzbekistan Respublikasi Vazirlar Mahkamasining 2022-yil 29-noyabrdagi 679-sonli “Korporativ boshqaruvchi malaka attestatini berish boʻyicha davlat xizmatlari koʻrsatishning maʼmuriy reglamentini tasdiqlash toʻgʻrisida”gi qaroriga asosan oʻz kuchini yoʻqotgan.

Mamlakatimizda soʻnggi yillarda ilgʻor xorijiy tajriba asosida ustav fondida (ustav kapitalida) davlat ulushi boʻlgan jamiyatlarni transformatsiya qilish, sohaga bozor munosabatlari tamoyillarini joriy etish, raqobat muhitini shakllantirish hamda xususiy sektorni keng jalb qilish borasida tizimli ishlar amalga oshirilmoqda.

Shu bilan birga, ustav fondida (ustav kapitalida) davlat ulushi boʻlgan jamiyatlarga kuzatuv kengashiga aʼzolar korporativ boshqaruv boʻyicha yetarli darajada bilim va koʻnikmalar ega boʻlmagan shaxslar orasidan saylanayotganligi zamonaviy korporativ boshqaruv sohasini isloh qilishga toʻsqinlik qilmoqda.

Oʻzbekiston Respublikasi Prezidentining “Aksiyadorlik jamiyatlarida zamonaviy korporativ boshqaruv uslublarini joriy etish chora-tadbirlari toʻgʻrisida” 2015-yil 24-apreldagi PF-4720-son Farmoni, “Oʻzbekiston Respublikasi Davlat aktivlarini boshqarish agentligi faoliyatini tashkil etish toʻgʻrisida” 2019-yil 14-yanvardagi PQ-4112-son qarori hamda Vazirlar Mahkamasining “Biznes va tadbirkorlik oliy maktabi faoliyatini tashkil etish chora-tadbirlari toʻgʻrisida” 2020-yil 30-iyuldagi 460-son qaroriga muvofiq Vazirlar Mahkamasi qaror qiladi:

1. Oʻzbekiston Respublikasi Prezidentining “Oʻzbekiston Respublikasi Davlat aktivlarini boshqarish agentligi faoliyatini tashkil etish toʻgʻrisida” 2019-yil 14-yanvardagi PQ-4112-son qaroriga muvofiq 2019-yil 1-iyulidan boshlab davlat organlarining rahbarlari yoki rahbar oʻrinbosarlari, ularda korporativ boshqaruv malaka attestati mavjud boʻlganda davlat ishtirokidagi korxonalarning kuzatuv kengashi aʼzoligiga davlat ulushi boʻyicha saylanishlari belgilanganligi maʼlumot uchun qabul qilinsin.

2. Quyidagilarni nazarda tutuvchi Korporativ boshqaruvchi malaka attestatini berish tartibi toʻgʻrisidagi nizom 1-ilovaga muvofiq tasdiqlansin:

korporativ boshqaruvchi malaka attestatini olish talab etiladigan shaxslar doirasi hamda korporativ boshqaruvchi malaka attestatini olish uchun qoʻyiladigan talablar;

korporativ boshqaruvchi malaka attestatini olish uchun maxsus oʻquv kurslarida oʻqish, malaka attestatini olishga daʼvogarlik qilayotgan shaxslar bilan suhbat oʻtkazish tartibi;

korporativ boshqaruvchi malaka attestatini berish, uni qayta rasmiylashtirish tartibi;

korporativ boshqaruvchi malaka attestatiga ega shaxslar reyestrini yuritish tartibi.

3. Belgilansinki:

korporativ boshqaruvchi malaka attestati Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi huzuridagi Biznes va tadbirkorlik oliy maktabi (keyingi oʻrinlarda — Oliy maktab) tomonidan korporativ boshqaruv sohasida malaka mavjudligini tasdiqlash uchun beriladi;

korporativ boshqaruvchi malaka attestatini olishga zamonaviy talablardan kelib chiqqan holda qisqa muddatli, shu jumladan, onlayn, maxsus oʻquv kursini tugatib, kurs yakuni boʻyicha sinovdan muvaffaqiyatli oʻtgan tinglovchilar hamda Oliy maktabning “Biznesni boshqarish” magistratura mutaxassisligi boʻyicha korporativ boshqaruv fanini 86 ball va undan yuqori darajalarda oʻzlashtirgan tinglovchilari talabgor boʻla oladi;

maxsus oʻquv dasturi Oliy maktabning korporativ boshqaruv sohasidagi malakali mutaxassislarni, katta tajribaga ega boʻlgan boshqaruvchilarni hamda xalqaro hamkorlarni jalb qilgan holda doimiy ravishda takomillashtirilib boriladi va yakuniy dastur kurslar boshlanishidan oldin Oliy maktab Ilmiy kengashi tomonidan tasdiqlanadi;

maxsus oʻquv dasturi ilgʻor xorijiy amaliyotni hisobga olgan holda davlat ishtirokidagi korxonalar faoliyatiga kuzatuv kengashlari va nazorat organlari faoliyati samaradorligini oshirishni, korporativ boshqaruvning xalqaro tamoyillarini nazarda tutuvchi korporativ boshqaruvning zamonaviy usullarini joriy etishni qamrab oladi;

korporativ boshqaruvchi malaka attestatini berish maxsus dastur asosida tashkil etiladigan suhbat natijalari boʻyicha amalga oshiriladi.

4. Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi:

ikki hafta muddatda korporativ boshqaruvchi malaka attestati olish uchun suhbat komissiyasi manfaatdor vazirliklar va idoralarning ushbu sohadagi yetuk va malakali mutaxassislari hamda Oliy maktabning professor-oʻqituvchilaridan iborat tarkibda shakllantirilishini taʼminlasin;

suhbat komissiyasi majlisining oʻtkazilishi sanasi va joyi haqidagi maʼlumotlar doimiy ravishda Oliy maktabning veb-saytida belgilangan muddatlarda eʼlon qilib borilishini hamda korporativ boshqaruvchi malaka attestati olish uchun suhbat yuqori saviyada oʻtkazilishini tashkillashtirsin.

5. Oʻzbekiston Respublikasi Hukumatining 2-ilovaga muvofiq ayrim qarorlari oʻz kuchini yoʻqotgan deb hisoblansin.

6. Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — iqtisodiy taraqqiyot va kambagʻallikni qisqartirish vaziri J.A. Qoʻchqorov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2021-yil 26-aprel,

236-son

Vazirlar Mahkamasining
2021-yil 26-apreldagi 236-son qaroriga
1-ILOVA

Korporativ boshqaruvchi malaka attestatini berish tartibi toʻgʻrisida

NIZOM

1-bob. Umumiy qoidalar

1. Mazkur Nizom korporativ boshqaruvchi malaka attestatini berish tartibini belgilaydi.

2. Korporativ boshqaruvchi malaka attestati (keyingi oʻrinlarda — malaka attestati) Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi (keyingi oʻrinlarda — Iqtisodiy taraqqiyot vazirligi) huzuridagi Biznes va tadbirkorlik oliy maktabi (keyingi oʻrinlarda — Oliy maktab) tomonidan korporativ boshqaruv sohasida malaka mavjudligini tasdiqlash uchun beriladi.

3. Ustav fondida (ustav kapitalida) davlat ulushi boʻlgan jamiyatlarning kuzatuv kengashi aʼzolari korporativ boshqaruvchi malaka attestatiga ega boʻlgan shaxslar orasidan saylanishi (tayinlanishi) shart, ushbu bandning ikkinchi xatboshisida nazarda tutilgan holatlar bundan mustasno.

Oʻzbekiston Respublikasi Davlat aktivlarini boshqarish agentligi xodimlari, kuzatuv kengashiga mustaqil aʼzo sifatida ilgari surilgan, tegishli tarmoqda ish tajribasiga ega boʻlgan shaxslar, shu jumladan, xorijiy shaxslar malaka attestatiga ega boʻlmagan holda ustav fondida (ustav kapitalida) davlat ulushi boʻlgan xoʻjalik jamiyatlarining kuzatuv kengashi aʼzolari sifatida saylanishi mumkin.

2-bob. Malaka attestatini olish istagida boʻlgan nomzodlarni oʻqitish

4. Nomzodlarning korporativ boshqaruv sohasidagi bilimlarini oshirish maqsadida Oliy maktab tomonidan mazkur sohadagi soʻnggi zamonaviy bilimlar mujassamlashtirilgan qisqa muddatli (bir haftadan kam boʻlmagan muddatda), shu jumladan, onlayn, maxsus oʻquv dasturi shakllantirilib, doimiy ravishda takomillashtirib boriladi.

Mazkur dastur “Biznesni boshqarish” magistratura mutaxassisiligi boʻyicha korporativ boshqaruv fanida ham oʻqitiladi.

5. Nomzodlar malaka attestatini olish uchun Oliy maktab tomonidan tashkil qilinadigan maxsus oʻquv kurslarida belgilangan muddatlarda oʻqiydi va dastur soʻnggida sinovdan oʻtkaziladi. Oliy maktabning “Biznesni boshqarish” magistratura mutaxassisiligi boʻyicha korporativ boshqaruv fanini 86 ball va undan yuqori darajalarda oʻzlashtirgan tinglovchilari bundan mustasno.

6. Malaka attestatini olish uchun Oliy maktabning korporativ boshqaruvchi maxsus dasturi boʻyicha oʻquv kurslarini tamomlaganlik toʻgʻrisidagi davlat sertifikatiga ega boʻlgan shaxslar va Oliy maktabning “Biznesni boshqarish” magistratura mutaxassisiligi boʻyicha korporativ boshqaruv fanini 86 ball va undan yuqori darajalarda oʻzlashtirgan tinglovchilari daʼvogarlik qilish huquqiga ega.

Bunda arizalar ushbu oʻquv kurslari va magistratura tinglovchilari tomonidan mazkur fan oʻqitilgandan keyin bir yil mobaynida berilishi mumkin.

Nomzodlar oʻquv kursining yakuni boʻyicha test topshirib, umumiy savollarning 55 foiziga javob berganda, tegishli tartibda davlat sertifikatiga ega boʻladi. Mazkur davlat sertifikati malaka attestati olishga daʼvogarlik qilish huquqini beradi. Nomzod testdan oʻta olmagan taqdirda, yakuniy testni yana ikki marta takroran topshirishga haqli.

3-bob. Malaka attestatini olishga nomzodlar bilan suhbat oʻtkazish

7. Malaka attestatini berish tartibi ushbu Nizomga 1-ilovaga muvofiq sxema boʻyicha qonuniylik, oshkoralik, xolislik, adolatlilik, tenglik va shaffoflik prinsiplariga asoslangan suhbat natijalari asosida amalga oshiriladi.

Suhbat Iqtisodiy taraqqiyot vazirligi, Davlat aktivlarini boshqarish agentligining ushbu sohadagi yetuk mutaxassislari va Oliy maktabning shu yoʻnalishdagi professor-oʻqituvchilaridan iborat tarkibdagi komissiya tomonidan oʻtkaziladi.

Komissiya kamida 9 nafar aʼzodan iborat boʻladi. Komissiyaga Oliy maktab direktori yoki shu sohadagi professor-oʻqituvchilardan biri raislik qiladi.

Komissiyaning tarkibi yilda bir marta Oliy maktab direktorining buyrugʻi bilan tasdiqlanadi.

Komissiya korporativ boshqaruv kodeksini muntazam ravishda takomillashtirish boʻyicha ishchi guruh vazifasini ham bajaradi.

Shuningdek, Komissiya ustav fondida (ustav kapitalida) davlat ulushi boʻlgan jamiyatlarida korporativ boshqaruv tizimini baholash boʻyicha maxsus savolnoma tarkibini yangilab boradi.

8. Suhbat savollari roʻyxati maxsus dastur asosida Oliy maktab tomonidan ishlab chiqiladi hamda Oliy maktab veb-saytiga joylashtiriladi. Suhbat savollari roʻyxati sohaga oid qonunchilik hujjatlaridagi oʻzgarishlardan kelib chiqib muntazam takomillashtirilib boriladi.

9. Malaka attestatini olishga daʼvogarlik qilayotgan shaxs (keyingi oʻrinlarda — ariza beruvchi) Oliy maktabga pasport yoki identifikatsiya ID-karta nusxasi, oʻquv kurslarini tamomlaganlik toʻgʻrisidagi davlat sertifikati, korporativ boshqaruv fani boʻyicha reyting baholaridan koʻchirma, aloqa qilish maʼlumotlari va mehnat faoliyatini yuritiyotgan shaxslar qoʻshimcha ravishda ish joyi toʻgʻrisidagi maʼlumotlar koʻrsatilgan arizani taqdim etadi.

Ariza beruvchi tomonidan ushbu bandning birinchi xatboshisida belgilangan hujjatlar toʻliq taqdim etilmasligi yoki notoʻgʻri hujjatlar taqdim etilishi malaka attestatini berish suhbatiga kiritmaslik uchun asos hisoblanadi. Bunda qayd qilingan hujjatlardan tashqari qoʻshimcha maʼlumotlarni talab qilish taqiqlanadi. Malaka attestatini olish uchun ariza topshirishga toʻlov talab etilmaydi.

10. Ariza beruvchi bevosita oʻzi kelib, pochta aloqasi vositalari orqali yoki elektron tarzda mazkur Nizomga 2-ilovada koʻrsatilgan shaklda ariza berishi mumkin.

11. Arizada koʻrsatilgan maʼlumotlarning haqqoniyligi uchun ariza beruvchi javobgar hisoblanadi.

12. Oliy maktab ariza olingan kundan boshlab uch ish kuni mobaynida ariza beruvchini suhbatga kiritish haqida qaror qabul qiladi yoki mazkur Nizomning 6-bandi talablariga rioya etilmagan taqdirda, asoslangan rad javobini yuboradi.

13. Komissiya majlislari arizalar soni 15 va undan ortiq boʻlgan hollarda har juma kuni oʻtkaziladi.

14. Oliy maktab komissiya majlisi oʻtkazilishidan kamida 2 kun oldin majlis oʻtkaziladigan sana va joy haqidagi maʼlumotni oʻz veb-saytida eʼlon qiladi va komissiya aʼzolarini xabardor qiladi.

15. Komissiya yigʻilishi aʼzolarning kamida 75 foizi ishtirok etganida vakolatli hisoblanadi.

16. Suhbat har bir nomzod bilan 20 daqiqa davomida yakka tartibda nomzodning:

korporativ boshqaruv mazmun-mohiyati, uning tamoyillari, korporativ boshqaruvni baholash va diagnostika qilish qobiliyati;

kuzatuv kengashining vakolatlari, vazifalari, majburiyatlari, qarorlar qabul qilishdagi tashabbuskorligi va bu boradagi jahon tajribasi, qonunchilik normalarining talablarini bilishligi darajasini aniqlash maqsadida oʻtkaziladi.

17. Komissiya aʼzolari yakka tartibdagi suhbatga kirgan har bir nomzodga 4 ta savol beradi. Bunda savollar Oliy maktabda oʻtkazilgan oʻquv kursi dasturi yoʻnalishlaridan kelib chiqib beriladi.

18. Suhbat natijalari boʻyicha komissiyaning har bir aʼzosi 0 balldan 100 ballgacha baho qoʻyadi. Qoʻyilgan barcha ballar umumlashtirilib, nomzodning oʻrtacha arifmetik balli aniqlanadi.

19. Suhbat natijalari quyidagi mezonlar boʻyicha baholanadi:

berilgan savolning mazmun-mohiyatini toʻliq ochib beruvchi dalillarga asoslangan javob berilishi;

savollar yuzasidan chuqur va tizimli bilim borligi namoyon etilishi;

korporativ boshqaruv tushunchasi va atamalaridan erkin foydalana olish.

Nomzod qoʻyilgan savollarga asosli va toʻgʻri javob beradigan boʻlsa, har bir toʻgʻri javobga 25 ball qoʻyiladi. Suhbat natijasi boʻyicha eng yuqori ballning kamida 55 foizini toʻplagan nomzodlar suhbatdan oʻtgan hisoblanadi.

20. Suhbat davlat tilida oʻtkaziladi. Suhbat ariza beruvchining soʻroviga asosan Oliy maktabning imkoniyatlaridan kelib chiqib boshqa tillarda ham oʻtkazilishi mumkin.

21. Komissiya qarorlari yigʻilishda ishtirok etayotgan aʼzolarning oddiy koʻpchilik ovozi bilan qabul qilinadi, ovozlar teng boʻlgan taqdirda komissiya raisining ovozi hal qiluvchi hisoblanadi.

22. Oʻtkazilgan suhbat natijalari boʻyicha komissiya tomonidan malaka attestatini berish yoki berishni rad etish toʻgʻrisidagi qaror bayonnoma shaklida rasmiylashtiriladi.

Bayonnoma komissiya aʼzolari tomonidan imzolanadi va rais tomonidan tasdiqlanadi.

23. Nomzod suhbatga kelmaganda yoki undan oʻtmaganda komissiya keyinchalik ariza beruvchini xabardor qilgan holda malaka attestatini berishni rad etish toʻgʻrisida qaror qabul qiladi.

24. Suhbatdan oʻtmagan yoki suhbatga kelmagan shaxs korporativ boshqaruvchi maxsus dasturi boʻyicha oʻquv kurslarini tamomlagan kundan boshlab bir yil mobaynida, shuningdek “Biznesni boshqarish” magistratura mutaxassisligi boʻyicha ikki yil (kunduzgi va sirtqi) oʻqishni tamomlab magistr diplomini olgan kundan boshlab bir yil mobaynida umumiy tartibda komissiyaga uch martadan koʻp boʻlmagan takroriy arizalar berishi mumkin.

25. Suhbat natijalari boʻyicha nomzodlarning shikoyatlari ular natijasi eʼlon qilingan sanadan boshlab uch ish kuni mobaynida komissiya raisiga taqdim etiladi.

Shikoyatni koʻrib chiqadigan apellatsiya komissiyasi Iqtisodiy taraqqiyot vazirligi, Oliy biznes maktabi va Davlat aktivlarini boshqarish agentligi vakillaridan (malaka attestatini beruvchi maxsus komissiyada qatnashmagan ushbu sohadagi oʻqituvchi va mutaxassislar) iborat tarkibda tuziladi.

26. Shikoyatni koʻrib chiqish muddati nomzod tomonidan shikoyat berilgan sanadan boshlab uch ish kunidan oshmasligi lozim.

27. Suhbatdan oʻtgan shaxs komissiyaning malaka attestatini berish toʻgʻrisidagi qarori qabul qilingandan soʻng uch oy muddatda Oliy maktabga bazaviy hisoblash miqdorining 50 foizi miqdorida yigʻim toʻlanganligi toʻgʻrisidagi toʻlov hujjatining nusxasini taqdim etadi.

Toʻlov hujjatining nusxasi taqdim etilgandan soʻng Oliy maktab uch kun muddatda malaka attestatini rasmiylashtiradi.

28. Ariza beruvchi tomonidan uch oy muddatda Oliy maktabga bazaviy hisoblash miqdorining 50 foizi miqdorida toʻlov toʻlanganligi toʻgʻrisidagi toʻlov hujjatining nusxasi taqdim etilmaganda, komissiya qarorining ushbu ariza beruvchiga malaka attestatini berish boʻyicha qismi haqiqiy emas deb hisoblanadi.

29. Malaka attestatining amal qilish muddati 5 yilni tashkil etadi hamda uzaytirilmaydi.

30. Sertifikat va malaka attestati hisobga olish seriyasi, tartib raqami hamda QR kodga ega boʻladi. Malaka attestati Oliy maktabda ushbu Nizomga 3-ilovada koʻrsatilgan shaklda tayyorlanadi hamda QR kod bilan tasdiqlanadi.

4-bob. Yakunlovchi qoidalar

31. Malaka attestatini qayta rasmiylashtirish unda koʻrsatilgan pasport yoki identifikatsiya ID-karta maʼlumotlarining oʻzgarishi munosabati bilan amalga oshiriladi.

Buning uchun malaka attestatining egasi Oliy maktabga quyidagilarni taqdim etadi:

malaka attestatini qayta rasmiylashtirish toʻgʻrisidagi ariza;

qayta rasmiylashtirilishi lozim boʻlgan malaka attestatining asl nusxasi;

pasport yoki identifikatsiya ID-karta maʼlumotlariga kiritilgan oʻzgarishlarni tasdiqlovchi hujjatning nusxasi;

malaka attestatini olishda toʻlanadigan toʻlovning yarmi toʻlanganligi toʻgʻrisidagi toʻlov hujjatining nusxasi.

32. Malaka attestatini qayta rasmiylashtirish mazkur Nizomning 30-bandida koʻrsatilgan hujjatlar taqdim etilgan kundan boshlab 5 kun mobaynida oldin berilgan malaka attestatining qolgan amal qilish muddatiga yangi malaka attestatini berish orqali amalga oshiriladi.

33. Oliy maktab malaka attestatiga ega boʻlgan shaxslar reyestrini yuritadi.

Malaka attestatiga ega boʻlgan shaxslar reyestrida quyidagilar koʻrsatiladi:

malaka attestati berilgan sana va uning raqami;

malaka attestatiga ega boʻlgan shaxslarning pasporti yoki identifikatsiya ID-karta, aloqa qilish maʼlumotlari va ish joyi;

qayta rasmiylashtirilgan malaka attestatlari toʻgʻrisidagi maʼlumotlar.

34. Mazkur Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Korporativ boshqaruvchi malaka
attestatini berish tartibi toʻgʻrisidagi nizomga
1-ILOVA

Korporativ boshqaruvchi malaka attestatini berish tartibi

SXEMASI

Bosqichlar	Subyektlar	Tadbirlar	Bajarish muddatlari

1-bosqich	Malaka attestatini olishga nomzodlar	1. Oliy maktabning korporativ boshqaruvchi maxsus dasturi boʻyicha oʻquv kurslarida ishtirok etadi yoki Oliy maktabning “Biznesni boshqarish” magistratura mutaxassisligi boʻyicha korporativ boshqaruv fanini 86 ball va undan yuqori darajalarda oʻzlashtirishi talab etiladi.	1. Maxsus oʻquv kursi boʻyicha 72 soat yoki magistratura yoʻnalishida 2 yil oʻquv dasturlari mobaynida
1-bosqich	Malaka attestatini olishga nomzodlar	2. Komissiyaga suhbatga kirish uchun Oliy maktabga tegishli maʼlumotlar koʻrsatilgan arizani taqdim etadi.	2. Zaruratga koʻra

2-bosqich	Oliy maktab	Oliy maktab korporativ boshqaruvchi maxsus dasturi boʻyicha oʻquv kurslarini muvaffaqiyatli tamomlagan yoki “Biznesni boshqarish” magistratura mutaxassisligi boʻyicha korporativ boshqaruv fanini 86 ball va undan yuqori darajalarda oʻzlashtirgan ariza beruvchini suhbatga kiritish haqida qaror qabul qiladi yoki mazkur talablar bajarilmagan taqdirda, asoslangan rad javobini beradi.	3 ish kuni mobaynida

3-bosqich	Komissiya*	1. Ariza beruvchilar soni oʻn besh nafardan ortiq boʻlganda ularni malaka attestatini olishga suhbatdan oʻtkazadi hamda suhbat natijalari boʻyicha talabgorni baholaydi.	1. Har hafta juma kuni
3-bosqich	Komissiya*	2. Suhbat natijalari boʻyicha malaka attestatini berish yoki berishni rad etish toʻgʻrisidagi qaror eʼlon qilinadi va bayonnoma bilan rasmiylashtiriladi.	2. Suhbat oʻtkazilgan kunda

4-bosqich	Malaka attestatini olishga talabgorlar	Komissiyaning suhbat natijalari boʻyicha malaka attestatini berish toʻgʻrisida ijobiy qarori eʼlon qilingandan soʻng Oliy maktab hisobvaragʻiga toʻlov (bazaviy hisoblash miqdorining 50 foizi miqdorida) oʻtkazadi.	Suhbat oʻtkazilgan kunda

5-bosqich	Oliy maktab	Malaka attestatini rasmiylashtirib beradi.	3 ish kuni mobaynida

Izoh. Komissiya tarkibi Iqtisodiy taraqqiyot va kambagʻallikni qisqartirish vazirligi, Davlat aktivlarini boshqarish agentligining ushbu sohadagi yetuk mutaxassislari hamda Oliy maktabning mazkur yoʻnalishdagi professor-oʻqituvchilaridan iborat boʻladi.

Korporativ boshqaruvchi malaka
attestatini berish tartibi toʻgʻrisidagi nizomga
2-ILOVA

‎	‎	‎‎Biznes va tadbirkorlik ‎oliy maktabi direktoriga ‎
‎	‎	___________________________‎‎‎
‎	‎	________________________dan‎‎‎
‎	‎	‎	‎
‎	ARIZA‎‎		‎
Menga Korporativ boshqaruvchi malaka attestatini olish uchun tashkil etiladigan suhbatga kirishimga ruxsat berishingizni soʻrayman. ‎‎
_________________________________________________________________________‎‎__________
(ish joyi v� lavozimi)‎‎
‎‎__________________________________________________________________________
‎Pasport yoki identifikatsiya ID-karta raqami:___________________________‎_____________________
Berilgan joyi va sanasi:____________________________________________‎‎____________________
_____________________________________________________________________________________‎‎
‎‎Sertifikat: _______________________________________________________‎____________________
Aloqa qilish uchun telefon:__________________________________________‎‎____________________
‎	‎	‎	___________________
‎	‎	‎	(imzo) ‎
‎	‎	‎	_________________
‎	‎	‎	(sana)‎

Korporativ boshqaruvchi malaka
attestatini berish tartibi
toʻgʻrisidagi nizomga
3-ILOVA

‎OʻZBEKISTON RESPUBLIKASI IQTISODIY TARAQQIYOT VA KAMBAGʼALLIKNI QISQARTIRISN VAZIRLIGI NUZURIDAGI BIZNES VA TADBIRKORLIK OLIY MAKTABI ‎		‎		‎‎GRADUATE SCNOOL OF BUSINESS AND ENTREPRENEURSNIP UNDER TNE MINISTRY OF ECONOMIC DEVELOPMENT AND POVERTY REDUCTION OF TNE REPUBLIC OF UZBEKISTAN ‎
Tartib raqami ________________‎‎‎		‎	‎	‎______________________-son‎
‎	‎‎				‎
‎	‎KORPORATIV BOSNQARUVCNINING MALAKA ATTESTATI‎				‎
‎_____________________________________________________________________________________
(malaka attestati berilgan shaxsning familiyasi, ismi, otasining ismi)‎
‎‎
pasport yoki ID-karta maʼlumotlari:‎‎
_____________________________________________________________________________________‎
20___ yil “_____” ____________dan 20___ yil “_____” ____________gacha amal qiladi.‎
‎‎______________________________‎			‎	‎	‎
‎	‎	‎	‎	‎QR-kod ‎(F.I.O.) ‎

Vazirlar Mahkamasining
2021-yil 26-apreldagi 236-son qaroriga
2-ILOVA

Oʻzbekiston Respublikasi Hukumatining oʻz kuchini yoʻqotgan deb eʼtirof etilayotgan qarorlari

ROʻYXATI

1. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida” 2017-yil 14-iyuldagi 499-son qaroriga (Oʻzbekiston Respublikasi QT, 2017-y., 7-son, 146-modda) ilovaning 42-bandi.

2. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida” 2017-yil 8-noyabrdagi 898-son qaroriga ilovaning 15-bandi.

3. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish, shuningdek, baʼzi qarorlarini oʻz kuchini yoʻqotgan deb hisoblash toʻgʻrisida” 2018-yil 14-fevraldagi 109-son qaroriga ilovaning 9-bandi.

(Qonun hujjatlari maʼlumotlari milliy bazasi, 27.04.2021-y., 09/21/236/0376-son)