Hujjat kuchini yo‘qotgan " " 01.07.2023
Oʻzbekiston Respublikasi Vazirlar Mahkamasining
qarori
Advokatlik guvohnomasini berish tartibi toʻgʻrisidagi nizomni tasdiqlash haqida
 LexUZ sharhi
Mazkur qaror Oʻzbekistan Respublikasi Vazirlar Mahkamasining 2023-yil 1-iyundagi 226-sonli “Advokatlik guvohnomasini berish tartibi toʻgʻrisidagi nizomni tasdiqlash haqida”gi qaroriga asosan 2023-yil 1-iyuldan oʻz kuchini yoʻqotadi.
Oʻzbekiston Respublikasi Prezidentining “Davlat xizmatlari koʻrsatish milliy tizimini yanada kompleks rivojlantirish choralari haqida” 2019-yil 15-fevraldagi PQ-4193-son qarori ijrosi yuzasidan Vazirlar Mahkamasi qaror qiladi:
1. Advokatlik guvohnomasini berish tartibi toʻgʻrisida nizom ilovaga muvofiq tasdiqlansin.
2. Oʻzbekiston Respublikasi Adliya vazirligi manfaatdor vazirlik va idoralar bilan birgalikda bir oy muddatda oʻzlari qabul qilgan normativ-huquqiy hujjatlarni ushbu qarorga muvofiqlashtirsin.
3. Mazkur qarorning ijrosini nazorat qilish Oʻzbekiston Respublikasi adliya vaziri R.K. Davletov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2019-yil 24-sentabr,
807-son
Vazirlar Mahkamasining 2019-yil 24-sentabrdagi 807-son qaroriga
ILOVA
Advokatlik guvohnomasini berish tartibi toʻgʻrisida
NIZOM
1-bob. Umumiy qoidalar
1. Mazkur Nizom advokatlik guvohnomasini berish tartibini belgilaydi.
2. Advokatlik guvohnomasi advokat maqomini tasdiqlovchi hujjat hisoblanadi.
3. Advokat advokatlik faoliyatini amalga oshiradigan advokatlik tuzilmasi davlat roʻyxatidan oʻtkazilgan (hisobga olingan) joyda Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari (keyingi oʻrinlarda hududiy adliya organlari deb ataladi) tomonidan advokatlik guvohnomasi beriladi.
Advokatlik guvohnomasi Oʻzbekiston Respublikasining butun hududida amal qiladi va uning amal qilish muddati cheklanmaydi.
2-bob. Advokatlik guvohnomasining shakli va uni berish tartibi
4. Advokatlik guvohnomasi mazkur Nizomning 1-ilovasiga muvofiq shaklda beriladi.
5. Advokatlik guvohnomasini berish ushbu Nizomga 2-ilovaga muvofiq sxema boʻyicha amalga oshiriladi.
6. Advokatlik guvohnomasi (keyingi oʻrinlarda guvohnoma deb ataladi) “Advokatura toʻgʻrisida”gi Oʻzbekiston Respublikasi Qonunining 31-moddasiga muvofiq advokat maqomiga ega boʻlishga talabgor boʻlgan shaxsga (keyingi oʻrinlarda talabgor deb ataladi) advokatlik tuzilmasi roʻyxatdan oʻtkazilgan yoki talabgorning faoliyat koʻrsatayotgan advokatlik tuzilmasiga kirganligini tasdiqlovchi hujjatlar hududiy adliya organi tomonidan olingan paytdan eʼtiboran uch ish kuni ichida beriladi.
7. Talabgor unga advokatlik guvohnomasi berilgan kundan eʼtiboran advokat maqomini oladi, bu hol hududiy adliya organi rahbarining advokat maqomini va advokatlik guvohnomasini berish toʻgʻrisidagi buyrugʻi bilan rasmiylashtiriladi.
Bu haqda hududiy adliya organi uch kunlik muddatda berilgan guvohnomaning rekvizitlarini koʻrsatgan holda Oʻzbekiston Respublikasi Advokatlar palatasining tegishli hududiy boshqarmasini (keyingi oʻrinlarda hududiy boshqarma deb ataladi) yozma ravishda xabardor qiladi. Shunday xabarnoma olingan paytdan eʼtiboran advokat Oʻzbekiston Respublikasi Advokatlar palatasining aʼzosi boʻladi.
Advokat advokatlik tuzilmasini tashkil qilgan yoki boshqa advokatlik tuzilmasiga kirgan holda, ushbu advokatlik tuzilmasi roʻyxatdan oʻtkazilgan (hisobga olingan) joydagi hududiy adliya organi tomonidan unga yangi guvohnoma beriladi.
8. Advokatlik byurosi, advokatlik firmasi yoxud advokatlar hayʼatini tashkil qilgan talabgor va (yoki) advokat hududiy adliya organi tomonidan advokatlik tuzilmalarining roʻyxatdan oʻtkazilganligi toʻgʻrisida guvohnoma berilgan kunning ertasidan kechiktirmay ana shu hududiy adliya organiga soʻnggi 12 oy mobaynida qilingan 3 x 4 sm oʻlchamida rangli fotosuratidan 2 donadan taqdim etadi.
Advokatlik firmasi, advokatlar hayʼati, hududiy boshqarma talabgor va (yoki) advokat tegishli advokatlik tuzilmasiga (advokatlik firmasi, advokatlar hayʼati, yuridik maslahatxona) kirgan kunning ertasidan kechiktirmay tashkilotning muhri bilan tasdiqlangan ishga qabul qilish toʻgʻrisidagi buyruqning, advokatlik faoliyati bilan shugʻullanish huquqini beruvchi litsenziyaning nusxasini, soʻnggi 12 oy mobaynida qilingan 3 x 4 sm oʻlchamdagi rangli fotosuratdan 2 donadan, shuningdek malaka komissiyasining talabgor tomonidan advokat qasamyodini qabul qilganligini tasdiqlash toʻgʻrisidagi qarorining nusxasini hududiy adliya organiga taqdim etadi.
Guvohnomani rasmiylashtirish va berish hududiy adliya organi tomonidan ikki kunlik muddatda amalga oshiriladi. Guvohnoma hududiy adliya organining rahbari tomonidan imzolanadi.
9. Guvohnomaning raqami mazkur Nizomning 12-bandida nazarda tutilgan tartibda rasmiylashtirilgan guvohnomalar berishni hisobga olish daftaridagi tartib raqamiga mos boʻladi.
10. Guvohnomaning ichki tomoni kompyuter texnikasi yordamida toʻldiriladi.
11. Lozim tarzda rasmiylashtirilmagan, dogʻ tushirilgan va yozuvlari oʻchirilgan guvohnomalar haqiqiy emas deb hisoblanadi.
12. Guvohnomalar blankalarining kirimi va chiqimi mazkur Nizomning 3-ilovasiga muvofiq shakllarda hisobga olish daftarlarida qayd etiladi.
Hisobga olish daftarlari tikilgan, ularning varaqlari raqamlangan, hududiy adliya organining rahbari imzosi va muhri bilan tasdiqlangan boʻlishi hamda yonmaydigan yoki maxsus jihozlangan shkaflarda saqlanishi kerak.
Rasmiylashtirilgan advokatlik guvohnomalarini berishni hisobga olish daftari mazkur Nizomning 4-ilovasiga muvofiq elektron shaklda yuritiladi. Bunda rasmiylashtirilgan advokatlik guvohnomalarini berishni hisobga olish daftaridagi tegishli buyruqlarning rekvizitlarida buyruqning sanasi va raqami koʻrsatilishi kerak.
13. Guvohnoma talabgor yoki advokat tomonidan shaxsini tasdiqlovchi hujjat (Oʻzbekiston Respublikasining fuqarolik pasporti) koʻrsatilganidan keyin shaxsan oʻziga beriladi.
Agar advokatga boshqa advokatlik tuzilmasi tuzganligi yoki advokatlik tuzilmasiga kirganligi munosabati bilan yangi guvohnoma berilayotgan boʻlsa, u oʻziga yangi guvohnoma berilgan paytdan eʼtiboran amal qilishi tugatilgan deb hisoblanadigan avval unga berilgan guvohnomani hududiy adliya organiga qaytarishi kerak. Agar advokat qaytargan guvohnoma avval boshqa hududiy adliya organi tomonidan berilgan boʻlsa, hududiy adliya organi bu guvohnomani yangi guvohnomaning rekvizitlarini koʻrsatgan holda tegishli hududiy adliya organiga yuboradi.
Guvohnoma berilayotganda guvohnomaning qay darajada toʻgʻri toʻldirilganligi talabgor yoki advokatning shaxsini tasdiqlovchi hujjat (Oʻzbekiston Respublikasining fuqarolik pasporti) dagi maʼlumotlar bilan solishtiriladi. Guvohnoma talabgor yoki advokatga guvohnoma olganligi toʻgʻrisida tilxat orqali beriladi.
14. Advokatning ixtisosligi oʻzgarganda, advokatlik faoliyati bilan shugʻullanish huquqini beruvchi litsenziya (keyingi oʻrinlarda litsenziya deb ataladi) qayta rasmiylashtirilganda yoki dublikati berilganda advokat litsenziyani (litsenziya dublikatini) olgan kundan eʼtiboran uch kunlik muddat ichida guvohnoma bergan hududiy adliya organiga litsenziyaning (litsenziya dublikatining) nusxasini va soʻnggi 12 oy mobaynida tushgan 3 x 4 sm oʻlchamdagi rangli fotosuratidan 2 donasini ilova qilgan holda yangi guvohnoma berish toʻgʻrisida ariza taqdim etishi shart.
Yangi guvohnomani berish hududiy adliya organi tomonidan ikki kunlik muddat ichida amalga oshiriladi. Bunda advokat yangi guvohnomani olgan paytidan eʼtiboran amal qilishi tugatilgan deb hisoblangan avvalgi guvohnomani qaytarishi kerak.
Yangi guvohnoma berilgunga qadar, advokat advokatlik faoliyatini avval berilgan guvohnoma asosida amalga oshiradi.
Advokatlik faoliyatini mazkur bandning birinchi xatboshisi talablarini buzgan holda amalga oshirish qonunchilik hujjatlariga muvofiq advokatning javobgarligiga sabab boʻladi.
(14-bandning toʻrtinchi xatboshisi Oʻzbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik maʼlumotlari milliy bazasi, 05.04.2022-y., 09/22/153/0266-son)
15. Advokatning arizasiga binoan yoʻqotilgan yoki yaroqsiz holga kelgan guvohnoma oʻrniga yangi guvohnoma berilishi mumkin.
Yoʻqotilgan yoki yaroqsiz holga kelgan guvohnoma oʻrniga yangi guvohnoma olish uchun advokat guvohnoma bergan hududiy adliya organiga guvohnomaning yoʻqotilganligi yoki yaroqsiz holga kelganligi holatlarini koʻrsatgan holda yangi guvohnoma berish toʻgʻrisida ariza taqdim etadi.
Guvohnoma yoʻqotilganligi munosabati bilan yangi guvohnoma berish toʻgʻrisidagi arizaga ommaviy axborot vositalarida guvohnoma yoʻqotilganligi va u haqiqiy emas deb topilishi haqida xabar eʼlon qilinganligini tasdiqlovchi hujjat ilova qilinadi. Guvohnoma yaroqsiz holga kelganligi tufayli yangi guvohnoma berish toʻgʻrisidagi arizaga yaroqsiz holga kelgan guvohnoma ilova qilinadi.
Yoʻqotilgan guvohnoma advokat tomonidan ommaviy axborot vositalarida xabar eʼlon qilingan kundan eʼtiboran haqiqiy emas deb topiladi. Bu haqda hududiy adliya organi sud-tergov organlariga maʼlum qiladi.
Hududiy adliya organi guvohnoma yoʻqotilganligi yoki yaroqsiz holga kelganligi fakti boʻyicha zarur boʻlganda, tegishli hududiy boshqarmani jalb qilib, tekshiruv oʻtkazadi, uning natijalari boʻyicha advokat intizomiy javobgarlikka tortilishi mumkin. Koʻrsatilgan tekshiruv natijalariga qarab, advokat maqomini toʻxtatib turish va tugatish uchun asoslar mavjud boʻlmagan taqdirda, yangi guvohnoma beriladi.
Yangi guvohnoma berilgan kundan eʼtiboran yaroqsiz holga kelgan guvohnomaning amal qilishi tugatilgan deb hisoblanadi.
16. Mazkur Nizomda nazarda tutilgan hollarda yangi guvohnoma berish hududiy adliya organi rahbarining buyrugʻi bilan rasmiylashtiriladi. Hududiy adliya organi yangi guvohnoma berilganligi toʻgʻrisida uch kunlik muddat ichida berilgan guvohnomaning rekvizitlarini koʻrsatgan holda tegishli hududiy boshqarmani yozma shaklda xabardor qiladi.
17. Advokat advokatlik tuzilmasidan chiqqanida (advokat bilan mehnat shartnomasi (kontrakt) bekor qilinganda) tegishli advokatlik byurosi, advokatlik firmasi, advokatlar hayʼati va hududiy boshqarma bu haqda shu kunning ertasidan kechiktirmay guvohnoma bergan hududiy adliya organiga maʼlum qilishi kerak.
Agar advokatlik tuzilmasidan chiqish advokatlik faoliyatini davom ettirish uchun advokatlik tuzilmasi tashkil etish yoki boshqa advokatlik tuzilmasiga kirish bilan bogʻliq boʻlmasa, advokat chiqayotgan tegishli advokatlik tuzilmasi yoki hududiy boshqarmaning rahbari hududiy adliya organining koʻrsatmasiga binoan advokatdan guvohnomani olib qoʻyishi va guvohnoma olib qoʻyilgan kunning ertasidan kechiktirmay uni hududiy adliya organiga qaytarishi, ayni bir vaqtda mehnat shartnomasi (kontrakt) bekor qilinganligi toʻgʻrisidagi buyruqdan nusxa taqdim etishi kerak.
18. Advokat maqomini toʻxtatib turish “Advokatura toʻgʻrisida”gi Oʻzbekiston Respublikasi Qonunida nazarda tutilgan hollarda malaka komissiyasi qarori bilan amalga oshiriladi.
Ushbu qaror asosida tegishli hududiy adliya organi rahbarining advokat maqomini toʻxtatib turish toʻgʻrisidagi buyrugʻi rasmiylashtiriladi, bu esa, guvohnomaning amal qilishini toʻxtatib turishga olib keladi.
Agar advokat maqomini toʻxtatib turish litsenziya amal qilishini toʻxtatib turish oqibati boʻlsa, buyruqda bir vaqtning oʻzida litsenziyaning amal qilishini va advokat maqomini toʻxtatib turish koʻrsatiladi. Malaka komissiyasining advokatlik maqomini toʻxtatib turish haqidagi qarori qabul qilingan kundan eʼtiboran advokat maqomi toʻxtatilgan hisoblanadi.
Hududiy adliya organi uch kunlik muddat ichida advokatning guvohnomasini olib qoʻyadi, bundan advokat bedarak yoʻqolgan deb topilgan hol mustasno, va tegishli hududiy boshqarmaga advokat maqomi toʻxtatilganligi yoki tugatilganligi haqida xabar beradi.
19. “Advokatura toʻgʻrisida”gi Oʻzbekiston Respublikasi Qonunining 131-moddasiga muvofiq advokat maqomi toʻxtatib turilgan shaxs advokat maqomini toʻxtatib turish uchun asos boʻlgan hollar tugatilganidan keyin uch oy ichida advokatlik faoliyatiga kirishishi kerak.
Advokat maqomi toʻxtatib turilgan shaxs mazkur bandning birinchi xatboshisida koʻrsatilgan muddat oʻtishiga kamida oʻn kun oldin tegishli malaka komissiyasiga advokat maqomini tiklash toʻgʻrisidagi ariza bilan murojaat qiladi.
Arizaga advokat maqomini toʻxtatib turish uchun asos boʻlgan holatlar bartaraf etilganligini tasdiqlovchi hujjatlar ilova qilinadi. Malaka komissiyasi koʻrsatilgan muddatda arizani koʻrib chiqadi va tegishli qaror qabul qiladi.
Malaka komissiyasining advokat maqomini tiklash haqidagi qarori asosida hududiy adliya organi rahbarining advokat maqomini tiklash va guvohnomani qaytarish toʻgʻrisidagi buyrugʻi rasmiylashtiriladi.
20. Advokat maqomi “Advokatura toʻgʻrisida”gi Oʻzbekiston Respublikasining Qonunida nazarda tutilgan hollarda litsenziyaning amal qilishini tugatilishi munosabati bilan tugatiladi. Advokat maqomini tugatish toʻgʻrisida hududiy adliya organi rahbarining buyrugʻi rasmiylashtiriladi.
21. Hududiy adliya organi tegishli buyruqni chiqargan sana guvohnoma berilgan, uning amal qilishi toʻxtatib turilgan va tugatilgan sana hisoblanadi.
22. Amal qilishi tugatilgan guvohnomalar, shuningdek mazkur Nizomda nazarda tutilgan hollarda oʻrniga yangi guvohnomalar berilgan guvohnomalar hududiy adliya organlari tomonidan yoʻq qilinishi va bu haqda dalolatnoma tuzilishi kerak. Mazkur Nizomning 10-bandida nazarda tutilgan guvohnomalar ham shunday tartibda yoʻq qilinadi.
23. Hududiy adliya organlari advokat maqomi toʻxtatib turilganligi, tiklanganligi va tugatilganligi toʻgʻrisidagi xabarni ommaviy axborot vositalarida eʼlon qiladilar.
Oʻzbekiston Respublikasi Soliq kodeksining 84-moddasiga muvofiq advokatga guvohnoma bergan hududiy adliya organlari guvohnoma berilgan faktlar haqida tegishli davlat soliq xizmati organlariga, shuningdek, mazkur guvohnomaning amal qilishi toʻxtatib turilganligi yoki tugatilganligi toʻgʻrisida maʼlumot berishi shart.
24. Advokat maqomi bilan bogʻliq maʼlumotlar hududiy adliya organlari tomonidan advokatlarning davlat reyestrlariga kiritiladi.
Advokatlarning davlat reyestrlarini yuritish tartibi Oʻzbekiston Respublikasi Adliya vazirligi tomonidan belgilanadi.
3-bob. Yakuniy qoidalar
25. Advokat guvohnoma saqlanishi uchun shaxsan javobgardir. Guvohnomani boshqa shaxslarga berish taqiqlanadi.
26. Mazkur Nizom talablarini buzganlikda aybdor boʻlgan shaxslar qonunchilik hujjatlariga muvofiq javobgarlikka tortiladilar.
(26-band Oʻzbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik maʼlumotlari milliy bazasi, 05.04.2022-y., 09/22/153/0266-son)
Advokatlik guvohnomasi shakli va uni berish tartibi toʻgʻrisida nizomga
1-ILOVA
Advokatlik guvohnomasi shakli va uni berish tartibi toʻgʻrisida nizomga
2-ILOVA
Advokatlik guvohnomasini berish
SXEMASI

Bosqichlar

Subyektlar

Tadbirlar

Bajarish muddatlari


1-bosqich

Talabgor

Advokat

Advokatlik guvohnomasini olish uchun hududiy adliya organiga shaxsan murojaat qiladi.

Advokatlik �uzilmasining roʻyxatdan oʻtkazilganligi toʻgʻrisida guvohnoma berilgan yoki tegishli advokatlik tuzilmasiga kirgan kunning ertasidan kechiktirmay


2-bosqich

Hududiy

adliya organi

1. Ariza va unga ilovalarning qonunchilik hujjatlari talablariga muvofiqligini oʻrganadi.

2. Talabgor yoki advokatning advokatlik guvohnomasini rasmiylashtiradi.

2 ish kunida


3-bosqich

Hududiy

adliya organi

1. Advokatlik guvohnomasini talabgor yoki advokatga guvohnoma olganligi toʻgʻrisida tilxat orqali beradi.

2. Berilgan advokatlik guvohnomasining rekvizitlarini koʻrsatgan holda Oʻzbekiston Respublikasi Advokatlar palatasining tegishli hududiy boshqarmasini yozma ravishda xabardor qiladi.

1 ish kunida


3 ish kunida

(2-ilova Oʻzbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik maʼlumotlari milliy bazasi, 05.04.2022-y., 09/22/153/0266-son)
Advokatlik guvohnomasi shakli va uni berish tartibi toʻgʻrisida nizomga
3-ILOVA

GUVOHNOMALAR BLANKALARINING KIRIMINI HISOBGA OLISh DAFTARI

____________________________________________________________________
(Hududiy adliya organining nomi)

Blanka nomi

(guvohnomaning muqovasi va ichki tomoni)

Blankalarning kirimini

roʻyxatga olish sanasi

Olingan blankalar soni

Yuk xatining

raqami va sanasi

1

2

3

4




GUVOHNOMALAR BLANKALARINING ChIQIMINI HISOBGA OLISh DAFTARI

_______________________________________________________________________
(Hududiy adliya organining nomi)

Blanka nomi

(guvohnomaning muqovasi va ichki tomoni)

Berilgan blankalar soni

Blankalarni olgan masʼul shaxsning

F.I.O. va imzosi

Olingan sana

1

2

3

4

Advokatlik guvohnomasi shakli va uni berish tartibi toʻgʻrisida nizomga
4-ILOVA
RASMIYLAShTIRILGAN ADVOKATLIK GUVOHNOMALARI BERIShNI HISOBGA OLISh
DAFTARI

_________________________________________________________________________________________________
(Hududiy adliya organining nomi)


Tartib raqami —guvohnomaning raqami

Advokatning F.I.O.

Litsenziyaning raqami va berilgan sanasi

Ruxsat berilgan ixtisoslik

Advokatlik tuzilmasining nomi va joylashgan eri (pochta manzili)

Advokatlik guvohnomasining berilgan sanasi

Quyidagi munosabat bilan guvohnomani berish toʻgʻrisidagi

buyruqning rekvizitlari:

Advokat maqomini berish

Advokatlik tuzilmasini tuzish yoki boshqa advokatlik tuzilmasiga kirish

Ixtisoslikni oʻzgarishi

Litsenziyani qayta rasmiylashtirish yoki dublikatini berish

Guvohnomani yoʻqotish yoki yaroqsiz holga kelishi

1

2

3

4

5

6

7

8

9

10

11


davomi

Advokat maqomi toʻxtatib turilganligi toʻgʻrisidagi buyruqning rekvizitlari

Advokat maqomi toʻxtatib turilganligi munosabati bilan guvohnoma olib qoʻyilgan sana

Advokat maqomini tiklanganligi toʻgʻrisidagi buyruqning rekvizitlari

Advokat maqomi toʻxtatib turilganda olib qoʻyilgan guvohnomaning qaytarilgan sanasi

Advokat maqomi tugatilganligi toʻgʻrisidagi buyruqning rekvizitlari

Advokat maqomi tugatilganligi munosabati bilan guvohnomaning olib qoʻyilgan sanasi

Guvohnoma yoʻq qilinganligi toʻgʻrisidagi maʼlumotlar

(sana, asos va b.)

12

13

14

15

16

17

18


(Qonun hujjatlari maʼlumotlari milliy bazasi, 25.09.2019-y., 09/19/807/3802-son; Qonunchilik maʼlumotlari milliy bazasi, 05.04.2022-y., 09/22/153/0266-son)