Sogʻliqni saqlashda xususiy sektorni qoʻllab-quvvatlash boʻyicha qabul qilingan kompleks chora-tadbirlar natijasida nodavlat tibbiyot muassasalari sonini yanada koʻpaytirish hamda ular tomonidan koʻrsatilayotgan tibbiy xizmatlar turlarini kengaytirish uchun zarur shart-sharoitlar yaratildi.

Shu bilan birga, xususiy tibbiyot muassasalarining aholi sogʻligʻini muhofaza qilishdagi hissasini oshirish, sogʻliqni saqlash sohasida davlat-xususiy sheriklikni joriy etishning institutsional va huquqiy mexanizmlarini yaratish masalasi hali-hamon dolzarb boʻlib qolmoqda.

Xususiy sogʻliqni saqlashni yanada rivojlantirish, ushbu sohada davlat-xususiy sheriklikning huquqiy asoslarini yaratish, investitsiyalarni, ayniqsa, chet el investitsiyalarini jalb etishni kengaytirish, shuningdek, aholining yuqori texnologik tibbiy xizmatlar va uskunalardan foydalanish imkoniyatlarini oshirishda nodavlat sektori ishtirokini ragʻbatlantirish maqsadida:

1. Sogʻliqni saqlash sohasida davlat-xususiy sheriklik toʻgʻrisidagi nizom 1-ilovaga muvofiq tasdiqlansin.

2. Belgilansinki:

a) sogʻliqni saqlash sohasida davlat-xususiy sheriklik loyihalari davlat va xususiy sherik oʻrtasida quyidagi bir yoki bir necha shakllarni birlashtirish orqali amalga oshiriladi:

sogʻliqni saqlash sohasida jamoat infratuzilmasini loyihalashtirish, qurish, rekonstruksiya qilish, yaratish, jihozlash, modernizatsiya qilish, moliyalashtirish, foydalanish va xizmat koʻrsatish;

sogʻliqni saqlash sohasida tovarlarni yetkazish, ishlarni bajarish va xizmatlar koʻrsatish;

b) Oʻzbekiston Respublikasi Prezidenti va Vazirlar Mahkamasining qarorlarida nazarda tutilgan hollardan tashqari xususiy sherikni tanlab olish tender asosida yoki toʻgʻridan-toʻgʻri muzokaralar oʻtkazish orqali amalga oshiriladi;

v) bitimning amal qilish muddati davlat va xususiy sherik tomonidan belgilanadi. Bunda u uch yildan kam boʻlmasligi va 49 yildan oshmasligi kerak;

g) davlat-xususiy sheriklik loyihalarini amalga oshirishda xususiy sherikka ajratilgan yer uchastkalari, sotib olingan tibbiy va boshqa uskunalar, shuningdek, ular tomonidan qurilgan obyektlar bitimning amal qilish muddati tugagandan soʻng davlat sherigiga topshiriladi.

3. Oʻzbekiston Respublikasi Investitsiyalar va tashqi savdo vazirligi, Moliya vazirligi, Sogʻliqni saqlash vazirligi hamda Tiklanish va taraqqiyot jamgʻarmasining (keyingi oʻrinlarda — Jamgʻarma) davlat-xususiy sheriklik loyihalarini amalga oshirish doirasida sogʻliqni saqlash sohasiga investitsiya kiritadigan investorlarni davlat tomonidan qoʻllab-quvvatlash maqsadida jamgʻarma mablagʻlari hisobidan imtiyozli kreditlash (keyingi oʻrinlarda — imtiyozli kreditlash) toʻgʻrisidagi taklifiga rozilik berilsin.

Jamgʻarma davlat-xususiy sheriklik shartlari asosida tashkil qilinadigan tibbiyot muassasalarining moddiy-texnik bazasini mustahkamlash uchun Oʻzbekiston Respublikasi Prezidentining 2017-yil 6-yanvardagi “Oziq-ovqat, charm-poyabzal va farmatsevtika sanoatida investitsiya loyihalarini moliyalashtirish manbalarini kengaytirish chora-tadbirlari toʻgʻrisida”gi PQ-2718-son qaroriga asosan ochilgan kredit liniyalarining tanlanmagan mablagʻlari hisobidan vakolatli tijorat banklariga 10 yil muddatgacha, shu jumladan 3 yillik imtiyozli davrni oʻz ichiga olgan, yillik foiz stavkasi 6 oylik LIBOR plyus 2 foizga teng, umumiy miqdori 150 mln AQSH dollarigacha boʻlgan kredit liniyalarini ochsin.

4. Belgilab qoʻyilsinki, sogʻliqni saqlash sohasida davlat-xususiy sheriklik loyihalarini amalga oshirish doirasida imtiyozli kreditlash tijorat banklari tomonidan:

faqatgina import qilinadigan zamonaviy tibbiy uskunalar va inventarlarni sotib olish uchun — chet el valyutasida kiritiladigan investitsiya umumiy hajmining 20 foizidan koʻp boʻlmagan miqdorda;

3 yillik imtiyozli davrni oʻz ichiga olgan holda, 8 yilgacha boʻlgan muddatga qayta moliyalashtiruvchi bankning marjasi bilan birga yillik 1,0 foiz miqdorida;

investor tomonidan kiritiladigan investitsiyalar umumiy hajmining 80 foizidan kam boʻlmagan miqdorida xususiy, shu jumladan xorijiy investitsiya kiritish sharti bilan amalga oshiriladi.

5. Oʻzbekiston Respublikasi Sogʻliqni saqlash vazirligi, Moliya vazirligi huzuridagi Davlat-xususiy sheriklikni rivojlantirish agentligi va Adliya vazirligi:

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari hamda respublika ixtisoslashtirilgan ilmiy-amaliy tibbiyot markazlari bilan birgalikda bir oy muddatda va keyinchalik har yili davlat-xususiy sheriklik shartlari asosida loyihalarni amalga oshirish maqsadida davlat tibbiyot muassasalarining yer uchastkalari, binolari yoki ularning qismlari va xonalari, shuningdek, samarasiz faoliyat koʻrsatayotgan davlat tibbiyot muassasalari hamda sogʻliqni saqlash sohasida ustuvor yoʻnalishga ega boʻlgan tibbiy va qoʻshimcha xizmatlar roʻyxatini shakllantirsin va ular toʻgʻrisidagi maʼlumotlarni tegishli ixtisoslashgan veb-saytlarga joylashtirsin;

ikki oy muddatda ilgʻor xalqaro tajribani inobatga olgan holda, sogʻliqni saqlash sohasida davlat-xususiy sheriklik bitimlarining namunaviy shakllarini ishlab chiqsin va tasdiqlasin;

uch oy muddatda sogʻliqni saqlash sohasida, shu jumladan respublika ixtisoslashtirilgan ilmiy-amaliy tibbiyot markazlari ishtirokida amalga oshiriladigan birlamchi ahamiyatga ega boʻlgan davlat-xususiy sheriklik loyihalarining konsepsiyasini ishlab chiqsin va belgilangan tartibda tasdiqlasin;

2019-yil 15-avgustga qadar davlat-xususiy sheriklik bitimlarini tuzish huquqini beruvchi tender eʼlon qilsin.

6. Oʻzbekiston Respublikasi Sogʻliqni saqlash vazirligi:

Oʻzbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligi va respublika ixtisoslashtirilgan ilmiy-amaliy tibbiyot markazlari bilan birgalikda, shu jumladan Sogʻliqni saqlash vazirligi va respublika ixtisoslashtirilgan ilmiy-amaliy tibbiyot markazlarining budjetdan tashqari mablagʻlari, texnik koʻmak mablagʻlari va qonunchilikda taqiqlanmagan boshqa manbalar hisobidan ekspertlar va konsultantlarni jalb etgan holda davlat-xususiy sheriklik aniq loyihalarining konsepsiyalari, bitimlari hamda tender hujjatlarining ishlab chiqilishini taʼminlasin;

Oʻzbekiston Respublikasi Investitsiyalar va tashqi savdo vazirligi bilan birgalikda xorijiy investorlarga davlat-xususiy sheriklik loyihalari toʻgʻrisida maʼlumot yetkazilishini, shu jumladan Sogʻliqni saqlash vazirligining rasmiy veb-saytida va “Investitsiya portali”da eʼlon berish orqali taʼminlasin;

Oʻzbekiston Respublikasi Prezidenti huzuridagi Davlat boshqaruvi akademiyasi, boshqa taʼlim va ilmiy-tadqiqot muassasalari bilan birgalikda bir oy muddatda Toshkent vrachlar malakasini oshirish instituti negizida davlat tibbiyot muassasalari rahbarlari uchun xorijiy investorlarni jalb etish va sogʻliqni saqlash sohasida investitsion faoliyatni boshqarish masalalari boʻyicha mazkur tibbiyot muassasalarining budjetdan tashqari mablagʻlari hisobidan shartnoma asosida qisqa muddatli malaka oshirish kurslarini tashkil qilsin;

ikki oy muddatda qonun hujjatlariga mazkur qarordan kelib chiqadigan oʻzgartirish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.

7. Quyidagilarga:

Oʻzbekiston Respublikasi Bosh vazirining oʻrinbosari A.A. Abduhakimovga — sogʻliqni saqlash sohasida davlat-xususiy sheriklik loyihalarini tayyorlash va amalga oshirish doirasida vazirlik va idoralar faoliyatini samarali muvofiqlashtirish, shuningdek, mazkur qarorning amalga oshirilishini muntazam muhokama qilish;

Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorovga — sogʻliqni saqlash sohasida davlat-xususiy sheriklik loyihalarini amalga oshirish uchun zarur boʻladigan budjet mablagʻlarining hajmini oʻz vaqtida aniqlash;

Oʻzbekiston Respublikasi sogʻliqni saqlash vaziri A.K. Shodmonovga — sogʻliqni saqlash sohasida davlat-xususiy sheriklik loyihalarini oʻz vaqtida va sifatli tayyorlash hamda ularni amalga oshirish, loyihalar tashabbuskorlariga zarur boʻladigan moliyaviy-iqtisodiy hisob-kitoblar, statistik va boshqa maʼlumotlarni olishda koʻmaklashish;

Oʻzbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligi direktori G.A. Xoljigitovga — Sogʻliqni saqlash vazirligiga davlat-xususiy sheriklik loyihalarini amalga oshirishda, shu jumladan aniq loyihalarning konsepsiyalari, bitimlari hamda tender hujjatlarini ishlab chiqishda koʻmaklashish yuzasidan shaxsiy javobgarlik belgilansin.

8. Oʻzbekiston Respublikasi Prezidentining ayrim hujjatlariga 2-ilovaga muvofiq oʻzgartirish va qoʻshimchalar kiritilsin.

9. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosarlari A.A. Abduhakimov, E.M. Gʻaniyev va Oʻzbekiston Respublikasi Prezidentining maslahatchisi A.A. Abduvaxitov zimmasiga yuklansin.

1. Ushbu Nizom sogʻliqni saqlash sohasidagi davlat-xususiy sheriklikni amalga oshirish tartibini belgilaydi.

Davlat xaridlari toʻgʻrisidagi qonunchilik mazkur Nizom qoʻllaniladigan sohaga kiruvchi munosabatlarga tatbiq etilmaydi.

2. Ushbu Nizomda quyidagi tushunchalardan foydalaniladi:

sogʻliqni saqlash sohasida davlat-xususiy sheriklik — oʻzaro tuzilgan davlat-xususiy sheriklik toʻgʻrisidagi bitimi asosida xususiy investitsiyalar va (yoki) boshqaruv tajribasini jalb qilish hamda xatarlar va majburiyatlarni boʻlishish va (yoki) taqsimlash maqsadida, tibbiy xizmatlar sifatini yaxshilashga, shuningdek, sogʻliqni saqlash sohasida ijtimoiy va infratuzilmaviy muammolarni hal etishga qaratilgan davlat sherigi va xususiy sherik oʻrtasida muayyan muddatga huquqiy rasmiylashtirilgan oʻzaro manfaatli hamkorlik;

imtiyozli toifadagi shaxslar — I va II guruh nogironligi boʻlgan shaxslar, bolalikdan nogironligi boʻlgan shaxslar, 1941 — 1945-yillardagi urush oqibatida nogiron boʻlgan shaxslar va uning qatnashchilari, shuningdek, ularga tenglashtirilgan shaxslar, Chernobil AES falokati oqibatlarini tugatishda ishtirok etgan nogironligi boʻlgan shaxslar, 1941 — 1945-yillardagi urush davridagi mehnat fronti qatnashchilari, baynalmilalchi-jangchilar, chin yetimlar, yolgʻiz pensionerlar va vakolatli organlarda roʻyxatda turuvchi kam taʼminlangan oilalar, Sogʻliqni saqlash vazirligi tomonidan tasdiqlangan roʻyxatga asosan patologiyasi mavjud boʻlgan 18 yoshga toʻlmagan bolalar hamda ijtimoiy ahamiyatga molik kasalliklarga chalingan shaxslar;

jamoat infratuzilmasi — koʻchar va koʻchmas mulk, intellektual faoliyatning muhofaza qilinadigan natijalari, intellektual huquqlar yoki ushbu obyektlarning jamlanmasi;

davlat-xususiy sheriklik toʻgʻrisidagi bitim obyekti — sogʻliqni saqlash sohasida davlat-xususiy sheriklik loyihasini amalga oshirish doirasida jamoat infratuzilmasi, loyihalashtirish, qurish, rekonstruksiya qilish, tashkil etish, jihozlash, modernizatsiya qilish, moliyalashtirish, foydalanish va xizmat koʻrsatish hamda sogʻliqni saqlash sohasida davlat-xususiy sheriklik loyihasini amalga oshirish davomida taqdim etiladigan tovarlar, bajariladigan ishlar, koʻrsatiladigan xizmatlar, shuningdek, tatbiq etiladigan innovatsiyalar;

davlat-xususiy sheriklik toʻgʻrisidagi bitim boʻyicha toʻlovlar — davlat-xususiy sheriklik toʻgʻrisidagi bitimiga muvofiq davlat sherigi xususiy sherikka toʻlaydigan va (yoki) xususiy sherik davlat sherigiga toʻlaydigan toʻlovlar;

gʻolib — boshqa talabgorlarning tender takliflariga nisbatan eng yaxshi shartlarni taklif etgan va tender komissiyasi tomonidan tender gʻolibi deb topilgan talabgor;

aralashish huquqi — davlat-xususiy sheriklik toʻgʻrisidagi bitim va (yoki) aralashish huquqi toʻgʻrisidagi shartnomada belgilangan muayyan holatlar yuzaga kelganda, davlat sherigi va kreditorning xususiy sherik huquqini olish yoki qabul qilish, xususiy sherik yoki xususiy sherik rahbariyatini oʻzgartirish huquqi;

talabgor — davlat-xususiy sheriklik loyihasini amalga oshirish boʻyicha qiziqish bildirgan va (yoki) tenderda ishtirok etish uchun ariza (tender arizasi, tender taklifi) taqdim etgan xususiy tadbirkor yoki yuridik shaxs, shu jumladan chet ellik yoki shaxslar guruhi, shu jumladan chet ellik shaxslar guruhi;

zaxiradagi gʻolib — tender komissiyasining qaroriga asosan tender gʻolibining tender taklifidan soʻng eng yaxshi tender taklifini bergan deb eʼtirof etilgan talabgor;

davlat-xususiy sheriklik loyihasi — sogʻliqni saqlash sohasida davlat va ijtimoiy ahamiyatga ega masalalarni yechish maqsadida, investitsiyalar kiritilishini, tovarlar taqdim etilishini, ishlar bajarilishini va xizmatlar koʻrsatilishini nazarda tutuvchi, davlat sherigi va xususiy sherik tomonidan amalga oshirilishi rejalashtirilgan yoki amalga oshirilayotgan loyiha;

davlat-xususiy sheriklik toʻgʻrisidagi bitim — davlat sherigi va xususiy sherik oʻrtasida tuzilgan, tomonlarning huquqlari, majburiyatlari va javobgarligini, xavf-xatar taqsimlanishini, shuningdek, davlat-xususiy sheriklik loyihasini amalga oshirishning boshqa shartlarini belgilovchi yozma shartnoma;

aralashish huquqi toʻgʻrisidagi bitim — maʼlum hollarda va shartlarda davlat sherigi, xususiy sherik va (yoki) kreditor (kreditorlar) aralashish huquqini amalga oshirishi mumkinligini belgilovchi davlat sherigi, xususiy sherik va kreditor (kreditorlar) oʻrtasida tuzilgan bitim;

davlat-xususiy sheriklik toʻgʻrisidagi bitim tomonlari (keyingi oʻrinlarda — tomonlar) — davlat sherigi va xususiy sherik;

tender komissiyasi — sogʻliqni saqlash sohasida davlat-xususiy sheriklik toʻgʻrisidagi shartnomani tuzish huquqi uchun tender oʻtkazish maqsadida tashkil qilingan komissiya;

xususiy sherik — davlat sherigi davlat-xususiy sheriklik toʻgʻrisidagi bitimni imzolaydigan shaxs yoki shaxslar guruhi, shu jumladan chet ellik hamda gʻolib tomonidan tashkil etilgan maxsus loyiha kompaniyasi.

3. Sogʻliqni saqlash sohasida davlat-xususiy sheriklik quyidagi prinsiplarga asoslanadi:

jamoat manfaatlarining ustuvorligi;

qonuniylik;

davlat-xususiy sheriklik haqidagi maʼlumotlarning ochiqligi va oshkoraligi, davlat siri va qonun bilan muhofaza qilinadigan boshqa sirlarni tashkil etadigan maʼlumotlar bundan mustasno;

kamsitmaslik, davlat-xususiy sheriklik toʻgʻrisidagi bitim tomonlarining teng huquqliligi;

davlat-xususiy sheriklik toʻgʻrisidagi bitim boʻyicha majburiyatlarning tomonlar tomonidan vijdonan bajarilishi;

xavf-xatar va majburiyatlarning davlat-xususiy sheriklik toʻgʻrisidagi bitim tomonlari oʻrtasida adolatli taqsimlanishi;

davlat-xususiy sheriklik tomonlari oʻzaro munosabatlarining tortishuv va shartnomaga asoslanishi.

4. Sogʻliqni saqlash sohasida davlat-xususiy sheriklik loyihalari davlat va xususiy sherik oʻrtasida shartnoma asosida quyidagi shakllardan birini yoki bir nechtasini tanlash orqali amalga oshiriladi:

sogʻliqni saqlash sohasida jamoat infratuzilmasini loyihalashtirish, qurish, rekonstruksiya qilish, tashkil etish, jihozlash, modernizatsiyalash, moliyalashtirish, foydalanish va unga xizmat koʻrsatish;

sogʻliqni saqlash sohasida ishlarni amalga oshirish, xizmatlar koʻrsatish va tovarlar bilan taʼminlash.

5. Davlat-xususiy sheriklik shartlaridagi tibbiy faoliyat xususiy sherik tomonidan qonun hujjatlarida belgilangan tartibda berilgan litsenziya asosida amalga oshiriladi.

6. Xususiy sherikni tanlab olish tender asosida yoki toʻgʻridan-toʻgʻri muzokaralar oʻtkazish orqali amalga oshiriladi, Oʻzbekiston Respublikasi Prezidentining va Oʻzbekiston Respublikasi Vazirlar Mahkamasining qarorlarida nazarda tutilgan hollar bundan mustasno.

7. Tender oʻtkazish uchun davlat sherigi tomonidan tanlov komissiyasi tuziladi, bunda tanlov komissiyasi tarkibiga Oʻzbekiston Respublikasi Sogʻliqni saqlash vazirligi, Moliya vazirligi, Iqtisodiyot va sanoat vazirligi, Investitsiyalar va tashqi savdo vazirligi, Davlat aktivlarini boshqarish agentligi, Moliya vazirligi huzuridagi Davlat-xususiy sheriklikni rivojlantirish agentligi, shuningdek, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining vakillari kiradi.

8. Tender komissiyasi aʼzolari soni toq boʻlishi va kamida yetti kishidan iborat boʻlishi kerak.

Oʻzbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligining vakili tender komissiyasi tarkibida maslahat ovozi bilan qatnashadi.

9. Tender komissiyasi, agar majlisda tender komissiya aʼzolari umumiy sonining kamida yetmish besh foizi qatnashsa, qaror qabul qilish huquqiga ega boʻladi, bunda tender komissiyasining har bir aʼzosi faqat bitta ovozga ega boʻladi.

Tender komissiyasining qarorlari tender komissiyasining ovoz bergan aʼzolari umumiy sonining oddiy koʻpchiligi tomonidan qabul qilinadi. Ovozlar teng boʻlib qolgan taqdirda, tender komissiyasi raisining ovozi hal qiluvchi ovoz hisoblanadi. Tender komissiyasining qarorlari bayonnomalar bilan rasmiylashtiriladi va uni tender komissiyasining barcha aʼzolari imzolaydilar.

10. Oʻzbekiston Respublikasi sogʻliqni saqlash vaziri tender komissiyasining raisi hisoblanadi.

11. Tender komissiyasini faoliyatini tashkil qilish, uning tarkibi, tender komissiyasi aʼzolariga qoʻyiladigan talablar tender komissiyasining reglamentiga asosan belgilanadi.

Tender komissiyasining reglamenti Oʻzbekiston Respublikasi Sogʻliqni saqlash vazirligi tomonidan tasdiqlanadi.

12. Sogʻliqni saqlash sohasida davlat-xususiy sheriklik loyihasi davlat sherigi va (yoki) xususiy tashabbuskor tashabbusi asosida amalga oshirilishi mumkin.

13. Sogʻliqni saqlash sohasida davlat-xususiy sheriklik loyihasini tayyorlash uchun davlat sherigi va (yoki) xususiy tashabbuskor tomonidan davlat-xususiy sheriklik loyihasi konsepsiyasi ishlab chiqiladi.

14. Davlat-xususiy sheriklik loyihasi konsepsiyasida quyidagi maʼlumotlar koʻrsatilgan boʻlishi lozim:

loyihaning nomi;

mazkur Nizomning 4-bandiga muvofiq loyihani amalga oshirish shakli;

loyihaning yakuniy natijalarini eʼtiborga olgan holda asoslanishi;

loyihaning amalga oshiriladigan manzili;

loyihani amalga oshirish uchun zarur boʻlgan, loyiha qamrab oladigan tibbiy muassasalar, shuningdek yer uchastkalari, bino va inshootlar yoki ularning qismlari, davlat tibbiyot muassasalari binolari (xonalari) toʻgʻrisidagi maʼlumotlar;

loyihani amalga oshirishning taxminiy reja-jadvali va muddatlari;

jamoat infratuzilmasining texnik-iqtisodiy koʻrsatkichlari;

rejalashtirilayotgan investitsiyalar hajmi;

loyihaning daromad manbalari;

loyihani amalga oshirishning asosiy xatarlari taqsimlanishi.

15. Davlat-xususiy sheriklik loyihasi konsepsiyasini tasdiqlash quyidagi tartibda amalga oshiriladi:

loyiha qiymati ekvivalentda 1 million AQSH dollarigacha boʻlganda — davlat sherigi tomonidan;

loyiha qiymati ekvivalentda 1 million AQSH dollaridan yuqori va 10 million AQSH dollarigacha boʻlganda — Moliya vazirligi huzuridagi Davlat-xususiy sheriklikni rivojlantirish agentligining roziligi asosida davlat sherigi tomonidan;

loyiha qiymati ekvivalentda 10 million AQSH dollaridan yuqori boʻlganda — Oʻzbekiston Respublikasi Vazirlar Mahkamasi tomonidan.

16. Xususiy tashabbus davlat sherigiga davlat-xususiy sheriklik loyihasi konsepsiyasi bilan birga taqdim etiladi.

Xususiy tashabbusni olgan davlat sherigi, oʻttiz kunda xususiy tashabbusni maʼqullash yoki rad etish toʻgʻrisida qaror qabul qiladi.

Xususiy tashabbusni amalga oshirishni rad etish uchun quyidagilar asos boʻladi:

xususiy tashabbuskorning mazkur Nizom bilan belgilangan talabgorlarga nisbatan qoʻyilgan talablarga mos kelmasligi;

davlat-xususiy sheriklik toʻgʻrisidagi bitim obyektiga davlat sherigining mulkka egalik, xoʻjalik yuritish yoki operativ boshqaruv huquqi boʻlmasligi;

davlat-xususiy sheriklik toʻgʻrisidagi bitim obyektini loyihalash, qurish, rekonstruksiya qilish, yaratish, jihozlash, modernizatsiyalash, moliyalashtirish, foydalanish va xizmat koʻrsatish zaruriyati boʻlmasligi.

17. Xususiy tashabbus maʼqullangan taqdirda, davlat sherigi davlat-xususiy sheriklik loyihasi konsepsiyasini besh kunda oʻzining rasmiy veb-saytida va boshqa maxsus veb-saytlarda davlat-xususiy sheriklik loyihasi konsepsiyasini va boshqa talabgorlarga davlat-xususiy sheriklik loyihasini amalga oshirishga oʻz qiziqishlarini maʼlum qilishlari toʻgʻrisida taklifini eʼlon qiladi.

Agar:

qirq besh kun davomida biror-bir talabgor sogʻliqni saqlash sohasida davlat-xususiy sheriklik loyihasini amalga oshirishga qiziqishini maʼlum qilmagan taqdirda, davlat sherigi tender oʻtkazmasdan toʻgʻridan-toʻgʻri va yakuniy muzokaralar oʻtkazadi, Oʻzbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligi bilan davlat-xususiy sheriklik toʻgʻrisidagi bitim loyihasini kelishadi va xususiy tashabbuskor bilan davlat-xususiy sheriklik toʻgʻrisidagi bitimni tuzadi;

talabgor sogʻliqni saqlash sohasida davlat-xususiy sheriklik loyihasini amalga oshirishga oʻz qiziqishini bildirgan taqdirda, davlat sherigi tender oʻtkazishga kirishadi.

Tender hujjatlarida xususiy tashabbuskorga gʻolib yoki zaxiradagi gʻolib hisobidan sogʻliqni saqlash sohasida davlat-xususiy sheriklik loyihasi boʻyicha hujjatlarni tayyorlash xarajatlarini qoplash huquqi berilishi mumkin.

Xususiy tashabbuskorning sogʻliqni saqlash sohasida davlat-xususiy sheriklik loyihasi boʻyicha hujjatlarni tayyorlash xarajatlarini qoplash, tender hujjatlarida koʻrsatilgan loyiha umumiy qiymatining bir foizidan oshmagan holda, asoslangan va belgilangan tartibda hujjatlashtirilgan xarajatlari asosida amalga oshiriladi.

18. Davlat sherigi tashabbusi asosida davlat-xususiy sheriklik loyihasi konsepsiyasi tasdiqlangan va belgilangan tartibda davlat-xususiy sheriklik loyihalari reyestriga kiritilgandan soʻng, davlat sherigi oʻttiz kun davomida sogʻliqni saqlash sohasida davlat-xususiy sheriklik loyihasini tayyorlash toʻgʻrisida qaror qabul qiladi.

Sogʻliqni saqlash sohasida davlat-xususiy sheriklik loyihasini tayyorlash toʻgʻrisidagi qarorda quyidagi maʼlumotlar boʻlishi shart:

loyihani davlat-xususiy sheriklik shartlarida amalga oshirish asosi;

sogʻliqni saqlash sohasida davlat-xususiy sheriklik loyihasining moliyaviy-iqtisodiy samaradorligi koʻrsatkichlari;

davlat-xususiy sheriklik toʻgʻrisidagi bitimga muvofiq xususiy sherik tomonidan loyihalashtirilayotgan, yaratilayotgan, rekonstruksiya qilinayotgan, moliyalashtirilayotgan, foydalanilayotgan yoki xizmat koʻrsatilayotgan jamoat infratuzilmasining tarkibi va parametrlari;

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan kelishilgan (xususiy sherikka yer uchastkasi ajratilishi koʻzda tutilgan davlat-xususiy sheriklik loyihasi boʻyicha) vakolatli organlar va tashkilotlarning yer uchastkasi tanlash boʻyicha hujjatlari va xulosalari, yer uchastkasining maydoni va joylashgan joyi;

xususiy sherik tomonidan kiritilishi kutilayotgan investitsiyalar hajmi va Oʻzbekiston Respublikasi budjet tizimi budjetidan taxminiy moliyalashtirish hajmi;

davlat va xususiy sheriklar majburiyatlari;

xususiy sherikka taqdim etiladigan davlat yordami;

yakuniy muzokaralar oʻtkazish muddatlari;

davlat-xususiy sheriklik toʻgʻrisida bitim obyektidan foydalangan holda taqdim etiladigan xizmatlardan yakuniy isteʼmolchilarning foydalanish shartlari.

19. Sogʻliqni saqlash sohasida davlat-xususiy sheriklik loyihalari toʻgʻrisida maʼlumot, shu jumladan konsepsiyalar, xususiy sheriklarni tanlash mezonlari toʻgʻrisida maʼlumot, davlat-xususiy sheriklik toʻgʻrisidagi bitimning asosiy qoidalari, sogʻliqni saqlash sohasida davlat-xususiy sheriklik loyihalarini tayyorlash va amalga oshirish jarayonlari toʻgʻrisida maʼlumotlar davlat sherigi va Oʻzbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligining veb-saytlarida eʼlon qilinishi shart.

20. Sogʻliqni saqlash sohasida davlat-xususiy sheriklik loyihalarini amalga oshirish uchun ochiq va yopiq tender oʻtkazilishi mumkin. Yopiq tender, davlat-xususiy sheriklik toʻgʻrisidagi bitim, davlat sirlari hisoblangan, shuningdek, davlatning mudofaa qobiliyati va xavfsizligini taʼminlashda strategik ahamiyatga ega boʻlgan obyektga nisbatan tuziladigan holatlarda oʻtkaziladi.

Yopiq tender oʻtkaziladigan holda, tender eʼlon berilmasdan oʻtkaziladi, tender qatnashchilariga esa davlat sherigi tomonidan yozma xabarnoma yuboriladi. Davlat sherigi yozma xabarnoma yuborilmagan boshqa shaxslardan takliflarni rad etadi.

Yopiq tender oʻtkazish tartibi Oʻzbekiston Respublikasi Vazirlar Mahkamasi tomonidan belgilanadi.

21. Davlat sherigi davlat-xususiy sheriklik toʻgʻrisidagi bitimni tuzish huquqi uchun tenderni oʻtkazish reglamentini belgilovchi tender hujjatlarini tayyorlaydi, Oʻzbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligi bilan kelishadi va tasdiqlaydi.

22. Tender hujjatlarida quyidagilar aks ettirilishi lozim:

talabgorlarning malaka talablariga muvofiqligini tasdiqlovchi hujjatlarga talablar;

davlat-xususiy sheriklik toʻgʻrisidagi bitim obyektining joylashgan manzili;

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan kelishilgan (xususiy sherikka yer uchastkasi ajratilishi koʻzda tutilgan davlat-xususiy sheriklik loyihasi boʻyicha) vakolatli organlar va tashkilotlarning yer uchastkasi tanlash boʻyicha hujjatlari va xulosalari, yer uchastkasining maydoni va joylashgan manzili;

davlat-xususiy sheriklik toʻgʻrisidagi bitim obyektining texnik-iqtisodiy koʻrsatkichlari;

davlat-xususiy sheriklik toʻgʻrisidagi bitim obyektini loyihalashtirish, qurish, rekonstruksiya qilish, tashkil etish, jihozlash, modernizatsiyalash, moliyalashtirish, foydalanish va xizmat koʻrsatish muddatlari;

davlat-xususiy sheriklik toʻgʻrisidagi bitim loyihasi;

davlat-xususiy sheriklik toʻgʻrisidagi bitim obyekti va xususiy sherik tomonidan koʻrsatiladigan xizmatlar sifat koʻrsatkichlari va ularga qoʻyiladigan minimal talablar;

davlat-xususiy sheriklik toʻgʻrisidagi bitim ijrosini taʼminlash maqsadida, davlat sherigi tomonidan taqdim etiladigan moliyalashtirish hajmi, mulklar roʻyxati yoki mulk huquqi;

davlat-xususiy sheriklik toʻgʻrisidagi bitim tomonlarining oʻz zimmalariga oladigan xavf-xatarlari;

davlat-xususiy sheriklik loyihalari parametrlari aks etadigan valyutani va ularni taqqoslash va baholash maqsadida yagona valyutaga keltirib, hisob-kitoblarda foydalaniladigan valyuta kursini koʻrsatish;

tender mezonlari bayoni;

tender soʻrovlari (takliflari)ni taqdim etish tiliga talab;

tender soʻrovlari (takliflari)ning mazmuni, usuli, manzili, tender soʻrovlari (takliflari)ni taqdim etish va amal qilish muddatlari;

tender soʻrovlari (takliflari) boʻyicha taʼminotni kiritish shartlari;

tender soʻrovlari (takliflari) boʻlgan konvertlarni ochish jarayoni, manzili, sanasi va vaqti.

23. Davlat sherigi Oʻzbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligi bilan kelishgan holda, tender hujjatlariga oʻzgartirish va qoʻshimchalar kiritish huquqiga ega. Davlat sherigi tender hujjatlariga oʻzgartirish va (yoki) qoʻshimchalar kiritish toʻgʻrisida qaror qabul qilingan kundan boshlab, besh ish kunidan kechiktirmasdan barcha talabgorlarga tender hujjatlariga kiritilgan oʻzgartirish va (yoki) qoʻshimchalar matnini taqdim etadi. Bunda tender soʻrovlari (takliflari)ni taqdim etishning soʻnggi muddati davlat sherigi tomonidan talabgorlar tender soʻrovlari va tender takliflaridagi ana shu oʻzgartish va (yoki) qoʻshimchalarni hisobga olishlari uchun kamida oʻttiz kunga choʻziladi.

24. Tender hujjatlari ular asosida xususiy sherik tanlab olinadigan tender mezonlarini, shu jumladan talablarni oʻz ichiga oladi.

Tender mezonlari turlicha talqin etilmasligi va ularda kamsituvchi qoidalar boʻlmasligi, shuningdek davlat-xususiy sheriklik toʻgʻrisidagi bitim predmeti bilan bogʻlangan boʻlishi kerak. Tenderda, dastlabki malakaviy tanlov bosqichidagi toʻgʻridan-toʻgʻri muzokaralarda ishtirok etish uchun, sogʻliqni saqlash sohasida davlat-xususiy sheriklik loyihalarini amalga oshirishdagi qiziqishini maʼlum qilishi uchun talabgor quyidagi mezonlarga mos kelishi shart:

huquqiy layoqatga ega boʻlish;

toʻlov qobiliyatiga ega boʻlish;

davlat-xususiy sheriklik toʻgʻrisidagi bitim boʻyicha majburiyatlarni bajarish uchun moliyaviy va (yoki) moddiy, texnik va (yoki) malakali mehnat resurslariga ega boʻlish;

davlat sherigi bilan manfaatlar toʻqnashuviga olib keluvchi bevosita yoki bilvosita aloqalarda boʻlmaslik.

25. Qayta tashkil etish, tugatish va (yoki) toʻlovga qobiliyatsizlik tartib-taomili joriy etilgan, shuningdek mulkiga taqiq qoʻyilgan talabgorlarni tenderda ishtirok etishiga yoʻl qoʻyilmaydi.

26. Gʻolibni tanlab olish bosqichida foydalaniladigan mezonlar, shu jumladan:

xususiy sherik tomonidan davlat sherigiga toʻlanadigan toʻlov hajmi;

cheklangan narxlar va tariflar;

davlat sherigi, yakuniy isteʼmolchi tomonidan toʻlanadigan toʻlov hajmi;

davlat-xususiy sheriklik toʻgʻrisidagi bitimni bajarishga jalb qilinadigan xususiy sherikning mablagʻ hajmi;

davlat tomonidan xususiy sherikka koʻrsatiladigan yordam hajmi;

jamoat infratuzilmasini loyihalashtirish, qurish, rekonstruksiya qilish, tashkil etish, jihozlash, modernizatsiyalash, moliyalashtirish, foydalanish va xizmat koʻrsatish muddatlari;

davlat-xususiy sheriklik toʻgʻrisidagi bitimning amal qilish muddatlari;

davlat-xususiy sheriklik toʻgʻrisidagi bitimning texnik va texnologik afzalliklari, funksional va innovatsion xarakteristikasi.

27. Tender bir bosqichli yoki ikki bosqichli boʻlishi mumkin. Tenderning bosqichlari tender hujjatlarida belgilanadi.

28. Umumiy qiymati ekvivalentda 1 mln. AQSH dollarigacha boʻlgan davlat-xususiy sheriklik loyihalari uchun bir bosqichli tender oʻtkaziladi.

Bir bosqichli tender jarayoni oʻz ichiga quyidagilarni oladi:

tender oʻtkazish toʻgʻrisida ommaviy axborot vositalarida hamda davlat sherigi va Moliya vazirligi huzuridagi Davlat-xususiy sheriklikni rivojlantirish agentligining rasmiy veb-saytlarida eʼlon qilish;

davlat sherigi tomonidan tender takliflari soʻrovini yuborish;

talabgorlar tomonidan tender takliflarini taqdim etish;

talabgorlarning tender takliflari boʻyicha konvertlarini ochish;

tender takliflarini baholash;

gʻolibni aniqlash;

gʻolib bilan yakuniy muzokaralar oʻtkazish;

xususiy sherik bilan davlat-xususiy sheriklik toʻgʻrisidagi bitimni imzolash.

29. Ikki bosqichli tender jarayoni oʻz ichiga quyidagilarni oladi:

1) dastlabki saralash:

tender oʻtkazish toʻgʻrisida ommaviy axborot vositalarida hamda davlat sherigi va Moliya vazirligi huzuridagi Davlat-xususiy sheriklikni rivojlantirish agentligining rasmiy veb-saytlarida eʼlon qilish;

davlat sherigi tomonidan dastlabki saralashda qatnashish uchun taklifnoma yuborish;

tender arizalarini yigʻish va baholash, shu jumladan, talabgorning malakasini tasdiqlovchi hujjatlarni yigʻish;

dastlabki saralashdan oʻtgan talabgorlar roʻyxatini shakllantirish.

2) gʻolibni tanlash:

davlat sherigi tomonidan tender takliflari soʻrovini yuborish;

talabgorlar tomonidan tender takliflarini taqdim etish;

talabgorlarning tender takliflari boʻyicha konvertlarini ochish;

tender takliflarini baholash;

gʻolibni aniqlash;

gʻolib bilan yakuniy muzokaralar oʻtkazish;

xususiy sherik bilan davlat-xususiy sheriklik toʻgʻrisidagi bitimni imzolash.

30. Dastlabki saralashda qatnashish uchun arizalarni yigʻish muddati eʼlon chop etilgan sanadan soʻng oʻttiz kundan kam boʻlmasligi kerak.

31. Dastlabki saralashda talabgorlar soni ikkitadan kam boʻlmasligi lozim.

32. Gʻolibni aniqlash bosqichida davlat sherigi dastlabki saralashdan oʻtgan talabgorlarga tender takliflari va davlat-sheriklik toʻgʻrisidagi bitim loyihasini taqdim etish boʻyicha soʻrovnoma yuboradi.

Tender takliflarini taqdim etishning soʻnggi muddati soʻrovnomada koʻrsatiladi hamda u dastlabki saralashdan oʻtgan talabgorlarga tender takliflari va davlat-xususiy sheriklik toʻgʻrisidagi bitim loyihasini taqdim etish boʻyicha soʻrovnoma yuborilgan sanadan boshlab kamida qirq besh kun boʻlishi lozim.

33. Bitta tender taklifi mavjud boʻlganda va tender komissiyasi tender taklifini tender takliflarini taqdim etish toʻgʻrisidagi soʻrovnomaga mos deb topganda tender oʻtkazilgan deb topiladi.

34. Talabgor tender takliflari soʻrovida belgilangan shartlarda tender taklifining kafolat taʼminotini taqdim etishi lozim.

35. Talabgorlar tomonidan taqdim etilgan barcha tender takliflari soʻrovnoma talablariga mos kelmaganda tender komissiyasi tender oʻtkazilmagan deb topadi va qaytadan tender eʼlon qilishga haqli.

36. Tender komissiyasi gʻolib toʻgʻrisidagi maʼlumotni davlat sherigi va Moliya vazirligi huzuridagi Davlat-xususiy sheriklikni rivojlantirish agentligining rasmiy veb-saytlarida eʼlon qiladi.

37. Talabgorlarning tenderda qatnashish uchun qilgan xarajatlari, tender natijalaridan qatʼi nazar qoplanmaydi, mazkur Nizomning 17-bandida koʻrsatilgan hollar bundan mustasno.

38. Agar tender komissiyasi gʻolib tomonidan taqdim etilgan maʼlumotlarda nomuvofiqlikni aniqlasa, tender komissiyasi gʻolibni tenderdan chetlatish toʻgʻrisida qaror qabul qiladi. Gʻolib tenderdan chetlatilgan taqdirda, tender komissiyasi tender gʻolibi sifatida zaxiradagi gʻolibni tayinlaydi.

39. Hech bir talabgor bittadan ortiq tender taklifini berish huquqiga ega emas. Talabgor tender takliflarini taqdim etishning soʻnggi muddatiga qadar xohlagan vaqtda tender taklifini oʻzgartirishi yoki qaytarib olishi mumkin.

40. Davlat sherigi gʻolib bilan tender hujjatlarida bayon qilingan tartib qoidalarda, shartlarda va muddatlarda davlat-xususiy sheriklik toʻgʻrisidagi bitimni tuzadi.

41. Agar tanlov hujjatlarida koʻrsatilgan muddat tugagandan soʻng, gʻolib davlat-xususiy sheriklik toʻgʻrisida bitimni imzolamasa, tender komissiyasi uni tenderdan chetlatish toʻgʻrisida qaror qabul qiladi. Zaxiradagi gʻolibni gʻolib deb eʼlon qiladi va gʻolibni tenderdan chetlatish toʻgʻrisidagi qaror qabul qilingan kundan boshlab 10 kun ichida uni tenderdan chetlatilgan gʻolibga qoʻyilgan shartlar asosida davlat-xususiy sheriklik toʻgʻrisida bitim tuzishga taklif qiladi. Agar tender komissiyasi davlat-xususiy sheriklik toʻgʻrisida bitim tuzish taklif yuborilgan sanadan boshlab 30 kun ichida zaxiradagi gʻolibdan ijobiy javob olmasa, tenderni oʻtkazilmagan deb tan oladi va takroriy tender eʼlon qiladi.

42. Tenderdan chetlatilgan gʻolib tenderda qatnashganligi uchun xarajatlari qoplab berilishini talab qilishga haqli emas.

43. Davlat sherigi xususiy tashabbuskor bilan mazkur nizomning 17-bandida koʻrsatilgan holatda davlat-xususiy sheriklik toʻgʻrisidagi bitim loyihasi Oʻzbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligi bilan kelishilgan sanadan boshlab oltmish kun ichida tender oʻtkazmasdan davlat-xususiy sheriklik toʻgʻrisida bitim tuzadi.

44. Tomonlar tender oʻtkazmasdan toʻgʻridan-toʻgʻri muzokaralar oʻtkazish yoʻli bilan davlat-xususiy sheriklik toʻgʻrisida bitimni quyidagi hollarda tuzadi:

davlatning mudofaa va xavfsizligini taʼminlash maqsadlarida;

davlat-xususiy sheriklik loyihasini amalga oshirishning zaruriy sharti boʻlgan intellektual faoliyat natijalarining mutloq huquqlari hamda yer uchastkalari, boshqa koʻchmas mulk va mol-mulklarga boʻlgan mutloq huquqlar maʼlum bir shaxsga tegishli boʻlgan taqdirda;

Oʻzbekiston Respublikasi Prezidenti va Oʻzbekiston Respublikasi Vazirlar Mahkamasining qarorlarida nazarda tutilgan boshqa hollarda.

45. Davlat-xususiy sheriklik toʻgʻrisidagi bitim quyidagi asosiy shartlarni oʻz ichiga olishi lozim:

davlat-xususiy sheriklik toʻgʻrisidagi bitimning tomonlari;

davlat-xususiy sheriklik toʻgʻrisidagi bitimning predmeti;

tomonlarning majburiyatlari va javobgarligi;

xatarlarning davlat va xususiy sherik oʻrtasida taqsimlanishi;

davlat-xususiy sheriklik toʻgʻrisidagi bitimga muvofiq jamoat infratuzilmasining texnik-iqtisodiy koʻrsatkichlari, shu jumladan loyihalashtirish, qurilish, rekonstruksiya qilish, tashkil etish, jihozlash, modernizatsiya qilish, moliyalashtirish, foydalanish va xizmat koʻrsatish uchun berilgan yoki talab etiladigan obyektlar boʻyicha maʼlumotlar, ulardan foydalanish maqsadi va muddatlari;

davlat-xususiy sheriklik loyihasi bilan bogʻliq boʻlgan ishlar (xizmatlar koʻrsatish) tartibi va muddatlari;

tomonlarning tegishli infratuzilma va davlat-xususiy sheriklik loyihasi boʻyicha huquqlari, shuningdek, ularni oʻtkazish tartibi;

davlat-xususiy sheriklik loyihasini amalga oshirish uchun zarur boʻlgan yer uchastkalarini berish tartibi, yer uchastkalariga taalluqli boshqa shartlar;

tibbiy faoliyatni litsenziyalash tartibi;

xususiy sherik tomonidan taqdim etiladigan tovarlar, ishlar, xizmatlar uchun tariflar, narxlar belgilash va ularni oʻzgartirish shartlari;

tomonlarning oʻz majburiyatlarini bajarish usullari, miqdori va muddatlari;

davlat-xususiy sheriklik toʻgʻrisidagi bitimning muddatlari va uni belgilash tartibi;

davlat-xususiy sheriklik toʻgʻrisidagi bitim boʻyicha toʻlov shakllari, miqdorlari, muddatlari va shartlari, shu jumladan davlat-xususiy sheriklik loyihasini amalga oshirish munosabati bilan daromadlarni taqsimlash tartibi;

davlat-xususiy sheriklik toʻgʻrisidagi bitimga oʻzgartirish va qoʻshimchalar kiritish tartibi;

davlat-xususiy sheriklik toʻgʻrisidagi bitimning bekor qilinishi boʻyicha asoslar, tartibi va shartlari, muddatidan avval toʻxtatilganda toʻlanadigan toʻlov miqdorlari va tartibi;

aralashish huquqi;

davlat-xususiy sheriklik loyihasining amalga oshirish jarayonini nazorat va monitoring qilish tartibi;

sugʻurta majburiyatlari;

loyiha hujjatlarini ishlab chiqish boʻyicha majburiyatlar;

taraflarning davlat-xususiy sheriklik toʻgʻrisidagi bitim boʻyicha majburiyatlarni buzganlik uchun javobgarligi;

nizolarni hal qilish tartibi;

Oʻzbekiston Respublikasida xodimlarni tanlash va ularning mehnatidan foydalanishda qoʻllaniladigan shartlar;

kafillik va kafolatlar;

xususiy sherikning ulushiga egalik huquqi hamda xususiy sherik va uning affillangan shaxslari mulkiga nisbatan boshqa mulkiy huquqlar boʻyicha talablar;

maxfiylik;

atamalar va ularning talqini;

qonun hujjatlarida nazarda tutilgan boshqa shartlar.

46. Davlat-xususiy sheriklik toʻgʻrisidagi bitim, agar boshqa tartib koʻzda tutilmagan boʻlsa, imzolangan vaqtdan boshlab kuchga kiradi.

47. Agar, qonun hujjatlarida yoki davlat-xususiy sheriklik toʻgʻrisidagi bitimda boshqa tartib koʻzda tutilmagan boʻlsa, davlat-xususiy sheriklik toʻgʻrisidagi bitim taraflarning kelishuviga koʻra oʻzgartirilishi yoki bekor qilinishi mumkin.

48. Agar quyidagi holatlardan biri sodir boʻlsa, davlat-xususiy sheriklik toʻgʻrisidagi bitim bir tarafning talabiga koʻra sudning qarori bilan oʻzgartirilishi yoki bekor qilinishi mumkin:

tomonlardan birining davlat-xususiy sheriklik toʻgʻrisidagi bitimni sezilarli darajada buzishi va ushbu holatning davlat-xususiy sheriklik toʻgʻrisidagi bitimda koʻrsatilgan shartlarda va muddatlarda bartaraf etilmasligi;

davlat-xususiy sheriklik toʻgʻrisidagi bitim tuzilayotgan paytda tomonlar uchun asos boʻlgan holatlar sezilarli darajada oʻzgargan taqdirda;

qonunchilikda va davlat-xususiy sheriklik toʻgʻrisidagi bitimda koʻzda tutilgan boshqa holatlarda.

49. Davlat-xususiy sheriklik toʻgʻrisidagi bitimda bir tomonlama sudga murojaat qilmasdan bitimni bekor qilish holatlari koʻzda tutilishi mumkin.

50. Davlat-xususiy sheriklik toʻgʻrisidagi bitim uning amal qilish muddati tugaganda toʻxtatiladi. Bitimni muddatidan avval bekor qilishga davlat-xususiy sheriklik toʻgʻrisidagi bitimda koʻzda tutilgan hollarda ruxsat etiladi.

Davlat-xususiy sheriklik toʻgʻrisidagi bitimda koʻzda tutilgan hollarda va tartibda bitim amal qilish muddatidan ilgari bekor qilingan taqdirda tomonlar, kreditor(lar) ikkinchi tomondan kompensatsiya puli olishga haqli.

51. Xususiy sherik quyidagi huquqlarga ega:

sogʻliqni saqlash sohasida davlat-xususiy sheriklik loyihasini amalga oshirish uchun kerakli maʼlumotlarni davlat sherigidan olish;

davlat-xususiy sheriklik toʻgʻrisidagi bitim shartlarini oʻzgartirish toʻgʻrisida takliflar kiritish;

sogʻliqni saqlash sohasida davlat-xususiy sheriklik loyihasi boʻyicha davlat sherigi aybi bilan koʻrilgan zararni qoplab berishni talab qilish;

bitim shartlari davlat sherigi tomonidan buzilgan taqdirda bitimni sud tartibida bekor qilishni talab qilish.

Xususiy sherik Oʻzbekiston Respublikasi qonun hujjatlariga va davlat-xususiy sheriklik toʻgʻrisidagi bitim shartlariga muvofiq boshqa huquqlarga ham ega boʻlishi mumkin.

52. Xususiy sherik quyidagi majburiyatlarni bajaradi:

davlat-xususiy sheriklik toʻgʻrisidagi bitim talablariga va Oʻzbekiston Respublikasi qonunchiligi talablariga qatʼiy rioya qilish;

qonun hujjatlarida va davlat-xususiy sheriklik toʻgʻrisidagi bitimda nazarda tutilgan javobgarlikni oʻz zimmasiga olish.

Xususiy sherik unga davlat-xususiy sheriklik shartlarida berilgan yer uchastkasini boshqa shaxslarga oʻtkazish huquqiga ega emas.

Xususiy sherik Oʻzbekiston Respublikasi qonun hujjatlariga va davlat-xususiy sheriklik toʻgʻrisidagi bitimga muvofiq boshqa majburiyatlarga ham ega boʻlishi mumkin.

53. Davlat sherigi quyidagi huquqlarga ega:

sogʻliqni saqlash sohasida davlat-xususiy sheriklik loyihalarini tayyorlash uchun tashqi maslahatchilarni jalb etish;

davlat-xususiy sheriklik toʻgʻrisidagi bitim shartlari bajarilishi toʻgʻrisidagi hisobotni xususiy sherikdan har chorakda olish;

davlat-xususiy sheriklik toʻgʻrisidagi bitim shartlari bajarilishi monitoringini olib borish va sogʻliqni saqlash sohasida davlat-xususiy sheriklik loyihalarini amalga oshirish natijalarini baholash;

Oʻzbekiston Respublikasi qonun hujjatlariga va davlat-xususiy sheriklik toʻgʻrisidagi bitim shartlariga rioya etish monitoringini olib borish doirasida aniqlangan qoida buzishlar bartaraf etilishini talab qilish;

xususiy sherikning aybi bilan yuzaga kelgan davlat-xususiy sheriklik toʻgʻrisidagi bitim obyekti boʻyicha zararlar qoplanishini talab qilish;

davlat-xususiy sheriklik toʻgʻrisidagi bitim shartlari xususiy sherik tomonidan buzilgan taqdirda bitimni sud tartibida bekor qilishni talab qilish.

Davlat sherigi qonun hujjatlariga va davlat-xususiy sheriklik toʻgʻrisidagi bitimga muvofiq boshqa huquqlarga ham ega boʻlishi mumkin.

54. Davlat sherigi quyidagi majburiyatlarni bajaradi:

tanlov oʻtkazish bilan bogʻliq hujjatlarni tanlov ishtirokchilariga taqdim etish;

davlat-xususiy sheriklik loyihasini amalga oshirish moʻljallanayotgan joy va obyekt bilan tanishish uchun tanlov ishtirokchilariga zarur shart-sharoitlarni taʼminlash;

agar davlat-xususiy sheriklik toʻgʻrisidagi bitimda nazarda tutilgan boʻlsa, faoliyatni amalga oshirish uchun moʻljallangan mol-mulkni unga egalik qilish va foydalanish uchun xususiy sherikka berish;

davlat-xususiy sheriklik toʻgʻrisidagi bitimni amalga oshirishi uchun zarur boʻlgan litsenziya va ruxsatnomalarni olishda xususiy sherikka koʻmaklashish;

xususiy sherikni davlat-xususiy sheriklik toʻgʻrisidagi bitimda koʻzda tutilgan oʻz investitsiyalari va daromadlarini erkin boshqarish va tasarruf etish yoki aktivlarini va amalga oshiradigan faoliyatini boshqarish va nazorat qilish huquqlarini chegaralamaslik;

xususiy sherikning xoʻjalik faoliyatiga aralashmaslik.

Davlat sherigi qonun hujjatlariga va davlat-xususiy sheriklik toʻgʻrisidagi bitimga muvofiq boshqa majburiyatlarga ham ega boʻlishi mumkin.

55. Davlat sherigi davlat-xususiy sheriklik toʻgʻrisidagi bitimda koʻrsatilgan shartlarda imtiyozli toifadagi va ijtimoiy koʻmakka muhtoj boʻlgan shaxslarni imtiyozli toʻlov shartlari yoki bepul asosda davolanish uchun xususiy sherikka yuboradi.

56 Davlat-xususiy sheriklik toʻgʻrisidagi bitimda nazarda tutilgan davlat-xususiy sheriklik toʻgʻrisidagi bitim obyekti joylashgan va (yoki) faoliyatni amalga oshirish uchun zarur boʻlgan yer uchastkasi, davlat-xususiy sheriklik toʻgʻrisidagi bitimida belgilanadigan hamda bitimning amal qilish muddatidan oshmaydigan muddatlarga xususiy sherikka ijaraga taqdim etiladi.

57. Davlat-xususiy sheriklik toʻgʻrisidagi bitim tuzilgan kundan boshlab bir kun muddatda davlat sherigi vakolatli organ va tashkilotlarning yer uchastkasini tanlash boʻyicha maʼlumot va xulosalarini Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga yer uchastkasini davlat sherigiga doimiy foydalanish uchun ajratish toʻgʻrisida qaror qabul qilish uchun yuboradi.

58. Qoraqalpogʻiston Respublikasi Vazirlar Kengashi, Toshkent shahar va viloyatlar hokimliklari 3 kun muddatda davlat sherigiga yer uchastkasini ajratish toʻgʻrisida qaror qabul qiladi va qarorni Qoraqalpogʻiston Respublikasi, Toshkent shahar va viloyatlar yer resurslari va koʻchmas mulk kadastri davlat korxonasining tegishli tuman (shahar) filialiga yuboradi hamda bu haqda davlat sherigini xabardor qiladi.

58¹. Davlat sherigi unga yer uchastkasi ajratilgan kundan boshlab bir kun ichida yer uchastkasini davlat-xususiy sheriklik bitimi doirasida xususiy sherikka ijaraga berish boʻyicha ijara shartnomasi imzolanishini taʼminlaydi.

60. Yer uchastkalarini tanlash va taqdim etishga oid hujjatlarni tayyorlash va kelishish bilan bogʻliq xarajatlar yer uchastkasiga doimiy foydalanish huquqi qayd qilinganidan soʻng kelishuv asosida davlat yoki xususiy sherik tomonidan qoplanadi.

61. Davlat-xususiy sheriklik toʻgʻrisidagi bitimning amal qilish muddati tugashi bilan yoki bitim muddatidan oldin bekor qilinganda, xususiy sherik davlat sherigiga davlat-xususiy sheriklik toʻgʻrisidagi bitim shartlariga muvofiq yer uchastkasini qaytarishi shart.

62. Davlat sherigi uzoq muddatga maqsadli foydalanish uchun davlat tibbiyot muassasalarining bino va inshootlarini yoki ularning qismlarini, xonalarini berish nazarda tutilgan davlat-xususiy sheriklik toʻgʻrisidagi bitim tuzilgan kundan boshlab 1 ish kunida, uni davlat roʻyxatidan oʻtkazish uchun Davlat aktivlarini boshqarish agentligining Qoraqalpogʻiston Respublikasi, Toshkent shahar va viloyatlar hududiy boshqarmalari qoshidagi Davlat mulkini ijaraga berish markaziga, shuningdek, obyektni balansida saqlovchiga yuboradi.

63. Davlat-xususiy sheriklik toʻgʻrisida tuzilgan bitim shartlariga muvofiq, balansda saqlovchi 10 kun muddatda davlat tibbiyot muassasalarining bino va inshootlarini yoki ularning qismlarini, xonalarini xususiy sherikka taqdim etadi, xususiy sherik esa bitimning amal qilish muddati tugashi bilan yoki bitim muddatidan oldin bekor qilinganda, balansda saqlovchiga mazkur obyektlarni davlat-xususiy sheriklik toʻgʻrisidagi bitim shartlariga mos holda qaytarishi shart.

64. Davlat tibbiyot muassasalarining bino va inshootlari yoki ularning qismlari, xonalari davlat-xususiy sheriklik toʻgʻrisidagi bitim shartlariga muvofiq xususiy sherikka barcha tegishli jihozlari, tibbiy asbob-uskunalari va texnikalari, shuningdek, texnik hujjatlari bilan beriladi hamda qaytariladi.

65. Davlat-xususiy sheriklik toʻgʻrisidagi bitimda xususiy sherik tomonidan davlat tibbiyot muassasalarini tibbiy asbob-uskuna va texnikalar bilan jihozlash nazarda tutilishi mumkin.

Xususiy sherik tomonidan xarid qilingan tibbiy asbob-uskuna va texnikalar davlat-xususiy sheriklik toʻgʻrisidagi bitimda belgilangan muddatlarda davlat sherigiga foydalanish uchun taqdim etiladi.

66. Davlat tibbiyot muassasalarini jihozlash quyidagi maqsadlarga erishishni taʼminlashi lozim:

davlat tibbiyot muassasasining yuqori texnologiyali tibbiy xizmatlarni joriy etishi uchun investitsiyalarga boʻlgan ehtiyojini kamaytirish;

yangi turdagi tibbiy xizmat turlarini yoʻlga qoʻyish;

tibbiy xizmatlar sifatini oshirish.

67. Xususiy sherik xarid qilingan tibbiy asbob-uskuna va texnikalarga texnik xizmat koʻrsatish, ularni sarflash materiallari bilan uzluksiz taʼminlash hamda ularning lozim darajada ishlashi uchun boshqa vazifalarni bajarish boʻyicha davlat-xususiy sheriklik toʻgʻrisidagi bitimda belgilangan majburiyatlarni oladi.

68. Davlat sherigi xususiy sherikka tibbiy asbob-uskuna va texnikalardan foydalanganlik uchun toʻlovni davlat-xususiy sheriklik toʻgʻrisidagi bitimda belgilangan shartlarda toʻlash majburiyatini oladi.

69. Davlat tibbiyot tashkilotlari jamoat infratuzilmasi sifatida davlat-xususiy sheriklik toʻgʻrisidagi bitimda koʻzda tutilgan muddatlarda ishonchli boshqaruvga berilishi mumkin.

Bunda, davlat tibbiyot tashkilotining mulki xususiy sherikka vaqtincha egalik qilish va foydalanishga davlat tibbiyot tashkilotining mazkur mulkka nisbatan xoʻjalik yuritish va operativ boshqaruv huquqi bekor qilingan holda beriladi.

70. Xususiy sherik davlat-xususiy sheriklik toʻgʻrisidagi bitim asosida davlat tibbiyot muassasasining ishonchli boshqaruvni amalga oshirganligi uchun haq olish va (yoki) xarajatlarini undirish huquqiga ega.

71. Xususiy sherik tibbiyot xodimlarining belgilangan shtat birliklari sonini amaldagi normativlarga muvofiq miqdorda saqlashi va ishonchli boshqaruvga berilgan davlat tibbiyot tashkilotining faoliyat oʻzgartirmasligi shart.

Davlat sherigi davlat tibbiyot muassasasini, shu jumladan, tibbiy va texnik xodimlarini saqlab turish uchun har yili ajratiladigan mablagʻlarni davlat-xususiy sheriklik toʻgʻrisidagi bitimda belgilangan tartibda xususiy sherikka oʻtkazib berilishini taʼminlaydi.

72. Davlat tibbiyot muassasasi davlat-xususiy sheriklik toʻgʻrisidagi bitim asosida ishonchli boshqaruvga berilganda, mulkka nisbatan ishonchli boshqaruv shartnomasini tuzish talab etilmaydi.

73. Davlat-xususiy sheriklik toʻgʻrisidagi bitim davlat-xususiy sheriklik loyihasi doirasida loyihalashtirilgan, yaratilgan, rekonstruksiya qilingan, moliyalashtirilgan, foydalanilgan va xizmat koʻrsatilgan jamoat infratuzilmasiga nisbatan mulk huquqini davlat sherigi yoki Oʻzbekiston Respublikasi davlat aktivlarini boshqarish organiga oʻtkazish tartibini belgilaydi.

Davlat-xususiy sheriklik toʻgʻrisidagi bitimda jamoat infratuzilmasiga nisbatan mulk huquqi qaysi vaqtda oʻtkazilishi koʻrsatilgan boʻlishi shart:

foydalanishga topshirilgandan keyin;

davlat-xususiy sheriklik toʻgʻrisidagi bitimning amal qilish muddati yakunida;

davlat-xususiy sheriklik toʻgʻrisidagi bitimda koʻrsatilgan boshqa vaqtda.

74. Oʻzbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligi va davlat sherigi davlat-xususiy sheriklik toʻgʻrisidagi bitim shartlarini bajarilishi boʻyicha sogʻliqni saqlash sohasida davlat-xususiy sheriklik loyihalarining amalga oshirilishi ustidan monitoringni amalga oshiradi. Xususiy sherik monitoring olib borish maqsadida jamoat infratuzilmasiga kirish va tegishli hujjatlarni koʻrish uchun imkoniyat yaratib berishga majbur.

75. Davlat sherigi har olti oyda Oʻzbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligiga davlat-xususiy sheriklik, shu jumladan aralashish huquqi toʻgʻrisidagi bitimning barcha taraflari tomonidan imzolangan davlat-xususiy sheriklik loyihasini amalga oshirish toʻgʻrisidagi hisobotni taqdim etadi.

Davlat-xususiy sheriklik loyihasini amalga oshirish toʻgʻrisidagi hisobot shakli va taqdim etish tartibi Vazirlar Mahkamasi tomonidan tasdiqlanadi.

76. Davlat sherigi zarur hollarda davlat-xususiy sheriklik toʻgʻrisidagi bitimga xususiy sherik bilan kelishgan holda xususiy sherik tomonidan imtiyozli narxlarda (yoki bepul) davolanishi shart boʻlgan imtiyozli qatlam va ijtimoiy yordamga muhtoj shaxslar sonini oshirish boʻyicha oʻzgartirishlar kiritish huquqiga ega.

77. Bitimning amal qilish davrida davlat sherigi bilan kelishmasdan turib xususiy sherikka ajratilgan tibbiyot muassasasi faoliyati ixtisosligini oʻzgartirish taqiqlanadi.

78. Davlat-xususiy sheriklik toʻgʻrisidagi bitim, agar unda boshqacha tartib belgilanmagan boʻlsa, Oʻzbekiston Respublikasi qonunchiligi bilan tartibga solinadi.

Oʻzbekiston Respublikasi qonunchiligida boshqacha tartib koʻzda tutilmagan boʻlsa, xususiy sherik sogʻliqni saqlash sohasida davlat-xususiy sheriklik loyihasini amalga oshirish bilan bogʻliq boshqa bitimlarga, shu jumladan aralashish huquqi toʻgʻrisidagi bitimga nisbatan qoʻllaniladigan huquqlar tanlovida erkin hisoblanadi.

79. Davlat-xususiy sheriklik toʻgʻrisidagi bitim, aralashish toʻgʻrisidagi bitim yoki davlat-xususiy sheriklik bilan bogʻliq har qanday boshqa bitim yoki shartnomadan kelib chiqadigan har qanday kelishmovchiliklar tegishli bitim taraflari kelishgan nizolarni hal qilish jarayoni orqali hal etiladi.

80. Davlat-xususiy sheriklik toʻgʻrisidagi bitimning taraflari qoʻllaniladigan huquqqa muvofiq nizolarni hal qilish mexanizmini, shuningdek, nizoni hal etish uchun tartib-taomil qoidalarni erkin tanlashi mumkin.

81. Ushbu nizom talablarini buzganlikda aybdor shaxslar belgilangan tartibda javobgar boʻladi.

2. Oʻzbekiston Respublikasi Prezidentining 2017-yil 1-apreldagi “Sogʻliqni saqlash sohasida xususiy sektorni yanada rivojlantirish chora-tadbirlari toʻgʻrisida”gi PQ-2863-son qarorida:

a) 8-band quyidagi tahrirda bayon etilsin:

“8. Quyidagilar 2022-yil 1-yanvargacha:

a) aholiga pullik tibbiy xizmatlar koʻrsatadigan (stomatologiya va kosmetologiya xizmatlaridan tashqari) xususiy tibbiyot muassasalari, jumladan, xorijiy investorlar ishtirokidagi xususiy tibbiyot muassasalari tibbiy xizmatlar qismida, boʻshaydigan mablagʻlarni xususiy tibbiyot muassasalarini zamonaviy tibbiy, muhandislik-texnik uskunalar bilan jihozlash va ularga servis-texnik xizmat koʻrsatish, tibbiyot maqsadlari uchun ehtiyot qismlar, sarflash materiallari, inventar va boshqa buyumlar xarid qilish, tibbiy xizmatlar koʻrsatish uchun yangi binolar qurish, mavjud bino va inshootlarni rekonstruksiya qilish va kapital taʼmirlash, shuningdek, aholining ijtimoiy himoyaga muhtoj qatlamlariga bepul tibbiy xizmatlar koʻrsatishga maqsadli yoʻnaltirgan holda, barcha turdagi soliqlar va davlat maqsadli jamgʻarmalariga majburiy ajratmalar toʻlashdan;

b) belgilangan tartibda shakllantiriladigan roʻyxat boʻyicha yuridik shaxslar tomonidan, shu jumladan lizing shartnomasi asosida olib kelinadigan yangi tibbiyot asbob-uskunalari, butlovchi buyumlar va ularning ehtiyot qismlari hamda sarflash materiallari (stomatologiya va kosmetologiya asbob-uskunalaridan tashqari) bojxona toʻlovlaridan (bojxona rasmiylashtiruvi yigʻimlari bundan mustasno) ozod etilsin.

Ushbu bandning “a” kichik bandida koʻrsatilgan soliq imtiyozlarini qoʻllash maqsadida, hisobot davri yakunlari boʻyicha tibbiy xizmatlar (stomatologiya va kosmetologiya xizmatlari bundan mustasno) koʻrsatish asosiy faoliyat turi hisoblangan yuridik shaxslar xususiy tibbiyot muassasalariga kiradi. Bunda tibbiy xizmatlar koʻrsatish asosiy faoliyat turi hisoblanganda, yuqorida koʻrsatib oʻtilgan imtiyozlar boshqa daromadlarga ham joriy etiladi.

Oʻzbekiston Respublikasi Sogʻliqni saqlash vazirligi Moliya vazirligi, Oʻzbekiston xususiy amaliyot vrachlari uyushmasi bilan birgalikda bir oy muddatda yuqorida qayd etilgan soliq imtiyozlari taqdim etilishi natijasida boʻshaydigan mablagʻlar hisobidan xususiy tibbiyot muassasalari tomonidan aholining ijtimoiy himoyaga muhtoj qatlamlariga bepul tibbiy xizmatlar koʻrsatish tartibi toʻgʻrisidagi nizomni ishlab chiqsin va tasdiqlasin”;

b) 1-ilovaning 5-bandi oʻz kuchini yoʻqotgan deb hisoblansin.

3. Oʻzbekiston Respublikasi Prezidentining 2017-yil 20-iyundagi PQ-3071-son qarori bilan tasdiqlangan Respublika ixtisoslashtirilgan ilmiy-amaliy tibbiyot markazlari — tibbiy xizmatlar koʻrsatishning tegishli ixtisoslashtirilgan yoʻnalishlari boʻyicha respublikaning bosh tibbiyot tashkilotlari roʻyxati quyidagi mazmundagi 14 — 16 bandlar bilan toʻldirilsin:

“14. Respublika ilmiy-ixtisoslashtirilgan allergologiya markazi.

15. Respublika ixtisoslashtirilgan nefrologiya va buyrak transplantatsiyasi ilmiy-amaliy tibbiyot markazi.

16. Respublika ixtisoslashtirilgan nevrologiya va insult ilmiy-amaliy tibbiyot markazi”.