Oʻzbekiston Respublikasi Prezidentining 2019-yil 5-fevraldagi PF-5656-son “Alkogol va tamaki mahsulotlarini ishlab chiqarish va ularning aylanmasini davlat tomonidan tartibga solishni takomillashtirish hamda uzumchilik va vinochilikni rivojlantirishga doir chora-tadbirlar toʻgʻrisida”gi Farmonining ijrosini taʼminlash maqsadida:

6. Oʻzbekiston Respublikasi Vazirlar Mahkamasi bir oy muddatda:

Oʻzbekiston Respublikasi Qishloq xoʻjaligi vazirligi huzuridagi Uzumchilik va vinochilikni rivojlantirish agentligi toʻgʻrisidagi nizomni;

Oʻzbekiston Respublikasi Qishloq xoʻjaligi vazirligi huzuridagi Uzumchilik va vinochilikni rivojlantirish agentligining Uzum yetishtiruvchilar va vino tayyorlovchilarni qoʻllab-quvvatlash jamgʻarmasi toʻgʻrisidagi nizomni tasdiqlasin.

7. Oʻzbekiston Respublikasi Qishloq xoʻjaligi vazirligi bir oy muddatda Agentlikni unga yuklatilgan vazifalarni bajarish uchun zarur nazariy bilimlar va amaliy koʻnikmalarga ega yuqori malakali mutaxassislar bilan taʼminlasin.

10. Uzum yetishtiruvchilarni Alkogol va tamaki bozorini tartibga solish hamda vinochilikni rivojlantirish agentligining Vinochilikni rivojlantirish jamgʻarmasi, shuningdek, Bogʻdorchilik va issiqxona xoʻjaligini rivojlantirish agentligining Bogʻdorchilik va issiqxona xoʻjaligini rivojlantirish jamgʻarmasi mablagʻlari hisobidan qoʻllab-quvvatlashning shunday tartibi oʻrnatilsinki, unga muvofiq yangi uzum plantatsiyalarini yaratish uchun subsidiyalar:

tomchilatib sugʻorish texnologiyasini joriy etishga qonun hujjatlarida belgilangan miqdorda;

35 gektardan ziyod uzum plantatsiyalarida suv chiqarish uchun burgʻilangan quduqlarni, shuningdek daryolar, kanallar va boshqa suv havzalaridan suv tortish uchun nasos stansiyalarini qurishga har 35 gektar uchun 120 million soʻmdan oshmaydigan miqdorda beriladi.

Bunda:

subsidiyalar texnik navli uzum plantatsiyalari uchun Jamgʻarma hamda xoʻraki va kishmishbop uzum plantatsiyalari uchun Bogʻdorchilik va issiqxona xoʻjaligini rivojlantirish agentligining Bogʻdorchilik va issiqxona xoʻjaligini rivojlantirish jamgʻarmasi mablagʻlari hisobidan ajratiladi;

Oʻzbekiston Respublikasi Vazirlar Mahkamasining qarori bilan subsidiyalarning boshqa summalari va uzum yetishtiruvchilarni moliyalashtirishning qoʻshimcha yoʻnalishlari belgilanishi mumkin.

Suvdan foydalanish maqsadida tutash hududlarda joylashgan har birining umumiy maydoni 35 gektardan oshmaydigan bir necha fermer va qishloq xoʻjaligi korxonalarining oʻzaro kelishuvi asosida suv chiqarish uchun burgʻilangan quduqni, shuningdek daryolar, kanallar hamda boshqa suv havzalaridan suvni tortishga nasos stansiyasini qurish uchun suvdan maxsus foydalanish yoki suvni maxsus isteʼmol qilish boʻyicha vakolatli organlar tomonidan beriladigan tegishli ruxsatnomaga asosan har 35 gektar maydonga 120 million soʻmdan oshmaydigan miqdorda subsidiya ajratilishi belgilansin.

11. Uzum yetishtiruvchilarga Oʻzbekiston Respublikasi Prezidentining “Paxta xom ashyosini yetishtirishda tomchilatib sugʻorish texnologiyalaridan keng foydalanish uchun qulay shart-sharoitlar yaratishga oid kechiktirib boʻlmaydigan chora-tadbirlar toʻgʻrisida” 2018-yil 27-dekabrdagi PQ-4087-son qarori 3-bandining “g” kichik bandi tatbiq etilsin.

12. Investitsiyalar va tashqi savdo vazirligi Tashqi ishlar vazirligi va Agentlik bilan birgalikda ikki oy muddatda Oʻzbekiston Respublikasi Vazirlar Mahkamasiga mahalliy vino mahsulotlarini xorijiy mamlakatlardagi anʼanaviy bozorlar hududida, shu jumladan import bojxona bojlarini kamaytirish (bekor qilish) va tartibga solishning tarifsiz choralarini soddalashtirish orqali ilgari surish boʻyicha takliflar kiritsin.

13. Toshkent kimyo-texnologiya instituti va “Enologiya laboratoriyasi” DUKga Toshkent shahri, Sergeli tumani, 2-daha, Lutfikor koʻchasi, 64a-uy manzilida joylashgan Sergeli sanoat kasb-hunar kollejining bino va inshootlari, shuningdek unga tutash hududni “Vinochilik texnologiyasi va sanoat uzumchiligi” fakulteti, Toshkent kimyo-texnologiya instituti qoshidagi Vinochilik sohasida mutaxassislarning malakasini oshirish va ularni qayta tayyorlash markazi va “Enologiya laboratoriyasi” DUKni joylashtirish uchun berilsin.

15. Agentlik ikki oy muddatda Oʻzbekiston Respublikasi Vazirlar Mahkamasiga:

“Oʻzstandart” agentligi va Oʻzbekiston Respublikasi Sogʻliqni saqlash vazirligi bilan birgalikda xorijiy davlatlar tajribasini chuqur oʻrgangan holda alkogol mahsulotlarining organoleptik xususiyatlarini aniqlash boʻyicha degustatsiya komissiyasi faoliyatini tashkil etish toʻgʻrisida takliflarni;

qonun hujjatlariga mazkur qarordan kelib chiqadigan oʻzgartirish va qoʻshimchalar toʻgʻrisida takliflarni;

vinochilik korxonalarining uzumni birlamchi qayta ishlash boʻyicha mavjud shoxobchalarini modernizatsiya qilish dasturini kiritsin.

Oʻzbekiston Respublikasi Investitsiyalar va tashqi savdo vazirligi mazkur dasturga kiritilgan loyihalarni moliyalashtirish imkoniyatini nazarda tutgan holda xalqaro moliya institutlari va xorijiy banklarning kamida 7 yil muddatga imtiyozli kredit liniyalarini jalb etish, shuningdek jalb etilgan mablagʻlardan mahalliy xaridlar uchun foydalanishni taʼminlasin.

16. Quyidagilarga:

Oʻzbekiston Respublikasi qishloq xoʻjaligi vaziri J.A. Xodjayevga — Agentlik faoliyatini samarali tashkil etish boʻyicha masalalarni, tashkiliy-texnik, moliyaviy, huquqiy va boshqa tadbirlarni amalga oshirish, shuningdek uzum plantatsiyalari va vinochilik sohasini rivojlantirishga qaratilgan maqsadli dasturlarni ishlab chiqish va amalga oshirish yuzasidan;

Oʻzbekiston Respublikasi investitsiyalar va tashqi savdo vaziri S.U. Umurzakovga — yangi sotuv bozorlariga chiqish hamda tayyor alkogol va tamaki mahsulotlari eksporti hajmlarini oshirishga har tomonlama koʻmaklashish yuzasidan shaxsiy javobgarlik yuklansin.

17. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Prezidenti Administratsiyasi rahbari Z.Sh. Nizomiddinov va Oʻzbekiston Respublikasi Prezidenti maslahatchisining birinchi oʻrinbosari B.M. Mavlonov zimmasiga yuklansin.