Oʻzbekiston Respublikasi Prezidentining “Oʻzbekiston Respublikasi sogʻliqni saqlash tizimini tubdan takomillashtirish boʻyicha kompleks chora-tadbirlar toʻgʻrisida” 2018-yil 7-dekabrdagi PF-5590-son Farmoni ijrosini taʼminlash hamda sogʻliqni saqlash sohasini boshqarishga yuqori malakali xorijiy mutaxassislarni keng jalb qilish maqsadida:

1. Oʻzbekiston Respublikasi Vazirlar Mahkamasi, Sogʻliqni saqlash vazirligi va Moliya vazirligining sogʻliqni saqlash sohasiga ilgʻor xorijiy tajribani joriy etish boʻyicha takliflar tayyorlash va islohotlarni ekspert jihatdan qoʻllab-quvvatlash, shu jumladan quyidagilar uchun masʼul boʻlgan Oʻzbekiston Respublikasi sogʻliqni saqlash vaziri oʻrinbosari (keyingi oʻrinlarda — sogʻliqni saqlash vaziri oʻrinbosari) lavozimini joriy etish toʻgʻrisidagi taklifi maʼqullansin:

xalqaro standartlar va Jahon sogʻliqni saqlash tashkilotining tavsiyalarini implementatsiya qilgan holda sogʻliqni saqlash sohasini kompleks huquqiy tartibga solish;

sogʻliqni saqlashni moliyalashtirish va tashkil etish tizimini takomillashtirish;

majburiy tibbiy sugʻurtani joriy etish;

davlat-xususiy sheriklik va tibbiy turizmdan foydalanishning eng yaxshi amaliyotlarini tatbiq qilish;

sogʻliqni saqlash sohasiga investitsiyalarni keng jalb etish uchun qulay shart-sharoitlar yaratish va raqobat muhiti yaxshilash;

“elektron sogʻliqni saqlash” tizimlarini keng joriy etish.

2. Belgilansinki:

sogʻliqni saqlash vazirining oʻrinbosari lavozimiga Oʻzbekiston Respublikasi Prezidenti tomonidan lavozimga tayinlanadigan va lavozimidan ozod etiladigan sogʻliqni saqlash sohasidagi yuqori malakali xorijiy mutaxassis jalb etiladi;

sogʻliqni saqlash vazirining oʻrinbosari bir vaqtda Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari maslahatchisi hisoblanadi;

sogʻliqni saqlash vaziri oʻrinbosarining faoliyati Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari tomonidan muvofiqlashtiriladi;

sogʻliqni saqlash vaziri oʻrinbosariga shaxsiy tarjimon, yordamchi, xizmat avtotransporti, xizmat turar joyi beriladi hamda doimiy yashash mamlakatiga borib-kelish uchun xalqaro parvozlarda aviachiptalar qiymati qoplanadi;

Rivojlantirish va sogʻliqni saqlashni boshqarish organlari xodimlarini moddiy ragʻbatlantirish jamgʻarmasi mablagʻlari sogʻliqni saqlash vaziri oʻrinbosarining ish haqini toʻlash, hududlar boʻylab safarlarda transport va xizmat safari, tarjimon, yordamchi yollash, xizmat turar joyi, shuningdek doimiy yashash mamlakatiga borib-kelish uchun xalqaro parvozlarda aviachiptalar xarajatlarini qoplash manbalari hisoblanadi.

3. Sogʻliqni saqlash vaziri oʻrinbosariga ikki nafar yuqori malakali xorijiy mutaxassislardan iborat boʻlgan guruh biriktirilishi, ularning taʼminoti oʻzlarining mablagʻlari hisobiga amalga oshirilishi maʼlumot uchun qabul qilinsin.

4. Oʻzbekiston Respublikasi Vazirlar Mahkamasi bir oy muddatda sogʻliqni saqlash vazirining oʻrinbosari bilan tomonlarning huquqlari, majburiyatlari va masʼuliyatini, maqsadli indikatorlarni, shartnomaning boshqa muhim shartlarini, shuningdek ushbu qarorning 1-bandini amalga oshirishning batafsil mexanizmlarini belgilab beradigan shartnoma tuzsin.

5. Oʻzbekiston Respublikasi sogʻliqni saqlash vaziri A.K. Shadmanovga sogʻliqni saqlash vaziri oʻrinbosarining Oʻzbekiston Respublikasi Sogʻliqni saqlash vazirligi tashkiliy tuzilmasiga kiruvchi tarkibiy boʻlinmalar va muassasalar bilan oʻzaro samarali hamkorligini tashkil etish uchun shaxsan masʼul ekanligi koʻrsatib oʻtilsin.

6. Oʻzbekiston Respublikasi Tashqi ishlar vazirligi Sogʻliqni saqlash vazirligining buyurtmanomalari boʻyicha sogʻliqni saqlash vazirining oʻrinbosariga va unga biriktirilgan xorijiy mutaxassislarga hamda ularning oila aʼzolariga koʻp martalik kirish vizalari konsullik yigʻimlari va boshqa yigʻimlar undirilmasdan belgilangan tartibda rasmiylashtirilishini taʼminlasin.

7. Oʻzbekiston Respublikasi Ichki ishlar vazirligi Sogʻliqni saqlash vazirligining buyurtmanomalari boʻyicha sogʻliqni saqlash vazirining oʻrinbosariga va unga biriktirilgan xorijiy mutaxassislarga hamda ularning oila aʼzolariga davlat boji undirilmasdan koʻp martalik vizalar belgilangan tartibda berilishi va uzaytirilishini, vaqtincha turgan joyi boʻyicha roʻyxatga olinishini taʼminlasin.

8. Oʻzbekiston Respublikasi Prezidentining “Oʻzbekiston Respublikasi Sogʻliqni saqlash vazirligi faoliyatini tashkil etish chora-tadbirlari toʻgʻrisida” 2018-yil 7-dekabrdagi PQ-4055-son qaroriga ilovaga muvofiq oʻzgartirish kiritilsin.

9. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari A.A. Abduxakimov, Oʻzbekiston Respublikasi Prezidentining maslahatchisi A.A. Abduvaxitov va Oʻzbekiston Respublikasi Prezidenti maslahatchisining birinchi oʻrinbosari B.M. Mavlonov zimmasiga yuklansin.

Oʻzbekiston Respublikasi Prezidentining “Oʻzbekiston Respublikasi Sogʻliqni saqlash vazirligi faoliyatini tashkil etish chora-tadbirlari toʻgʻrisida” 2018-yil 7-dekabrdagi PQ-4055-son qarorida:

a) 7-bandning beshinchi xatboshisi quyidagi tahrirda bayon qilinsin:

“Oʻzbekiston Respublikasi Davlat budjeti hisobidan moliyalashtiriladigan Vazirlikning markaziy apparati boshqaruv xodimlarining cheklangan soni 127 nafar, sogʻliqni saqlash hududiy boshqaruv organlari xodimlarining cheklangan soni — 391 nafar etib belgilansin”;

b) 2-ilova matni quyidagi tahrirda bayon etilsin: