Oʻzbekiston Respublikasi Vazirlar Mahkamasining

qarori

Butunjahon Internet tarmogʻida axborot xavfsizligini yanada takomillashtirish chora-tadbirlari toʻgʻrisida

“Axborotlashtirish toʻgʻrisida”gi Oʻzbekiston Respublikasi Qonuniga muvofiq, shuningdek, butunjahon Internet tarmogʻida (keyingi oʻrinlarda Internet tarmogʻi deb ataladi) axborot xavfsizligini taʼminlash tizimini yanada takomillashtirish, axborot sohasida shaxs, jamiyat va davlat manfaatlarini muhofaza qilish maqsadida Vazirlar Mahkamasi qaror qiladi:

1. “Axborotlashtirish toʻgʻrisida”gi Oʻzbekiston Respublikasi Qonuni 12¹-moddasiga muvofiq veb-saytdan va (yoki) veb-saytlardan va (yoki) sahifalaridan foydalanish maxsus vakolatli organ — Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi tomonidan quyidagi hollarda cheklanishi mumkinligi maʼlumot uchun qabul qilinsin:

Oʻzbekiston Respublikasining mavjud konstitutsiyaviy tuzumini, hududiy yaxlitligini zoʻrlik bilan oʻzgartirishga daʼvat etish;

urush, zoʻravonlik va terrorizmni, shuningdek, diniy ekstremizm, separatizm va fundamentalizm gʻoyalarini targʻib qilish;

davlat siri boʻlgan maʼlumotlarni yoki qonun bilan qoʻriqlanadigan boshqa sirni oshkor etish;

milliy, irqiy, etnik yoki diniy adovat qoʻzgʻatuvchi, shuningdek, fuqarolarning shaʼni va qadr-qimmatiga yoki ishchanlik obroʻsiga putur yetkazuvchi, ularning shaxsiy hayotiga aralashishga yoʻl qoʻyuvchi axborotni tarqatish;

Oldingi tahrirga qarang.

giyohvandlik vositalari, ularning analoglari psixotrop moddalar va prekursorlarni targʻib qilish;

(1-bandning oltinchi xatboshisi Oʻzbekiston Respublikasi Vazirlar Mahkamasining 2019-yil 15-yanvardagi 34-sonli qarori tahririda — Qonun hujjatlari maʼlumotlari milliy bazasi, 16.01.2019-y., 09/19/34/2486-son)

pornografiyani targʻib qilish;

qonunga muvofiq jinoiy va boshqa javobgarlikka sabab boʻladigan boshqa harakatlarni sodir etish.

2. Quyidagilar:

Oʻzbekiston Respublikasi qonunchiligi bilan tarqatilishi taqiqlangan axborot mavjud boʻlgan Internet tarmogʻi veb-saytidan va (yoki) veb-sayt sahifalaridan foydalanishni cheklash tartibi toʻgʻrisida nizom 1-ilovaga muvofiq;

Oldingi tahrirga qarang.

Oʻzbekiston Respublikasi fuqarolarining shaxsga doir maʼlumotlariga ishlov berishning alohida shartlariga rioya etilishi ustidan davlat nazoratini amalga oshirish tartibi toʻgʻrisidagi nizom 3-ilovaga muvofiq tasdiqlansin.

(2-bandning uchinchi xatboshisi Oʻzbekiston Respublikasi Vazirlar Mahkamasining 2021-yil 29-apreldagi 255-sonli qarori tahririda — Qonunchilik maʼlumotlari milliy bazasi, 30.04.2021-y., 09/21/255/0402-son)

Oldingi tahrirga qarang.

3. Axborot va ommaviy kommunikatsiyalar agentligining Ommaviy kommunikatsiyalar masalalari boʻyicha markazi Oʻzbekiston Respublikasi qonunchiligi bilan tarqatilishi taqiqlangan axborot mavjud boʻlgan Internet tarmogʻi Reyestrini (keyingi oʻrinlarda Reyestr deb ataladi) shakllantiruvchi va yurituvchi vakolatli organ etib belgilansin.

(3-band Oʻzbekiston Respublikasi Vazirlar Mahkamasining 2019-yil 3-iyundagi 457-sonli qarori tahririda — Qonun hujjatlari maʼlumotlari milliy bazasi, 04.06.2019-y., 09/19/457/3235-son)

4. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi:

Reyestrga kiritilgan Internet tarmogʻi resurslaridan foydalanishni cheklash boʻyicha tashkiliy va texnik chora-tadbirlar koʻrsin;

Reyestrni yuritish boʻyicha idoralararo axborot almashinish va Reyestrga kiritilgan Internet tarmogʻi resurslaridan foydalanishni cheklash boʻyicha tezkor choralar koʻrishni taʼminlovchi axborot tizimini uch oy muddatda ishlab chiqsin va joriy etsin.

Oldingi tahrirga qarang.

4^1. Belgilansinki, ushbu qarorning 1-bandida keltirilgan holatlar veb-sayt va (yoki) veb-sayt sahifasida joylashtirilgan axborotga ushbu veb-sayt foydalanuvchilari tomonidan qoldirilgan sharhlar matnida, shuningdek ijtimoiy tarmoqlar yoki messenjerlarda aniqlansa, Oʻzbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligining Ommaviy kommunikatsiyalar masalalari boʻyicha markazi tomonidan veb-sayt, veb-sayt va (yoki) messenjer sahifasi egasi, shuningdek blogerga Oʻzbekiston Respublikasi qonunchiligi bilan tarqatilishi taqiqlangan axborotlarni olib tashlash toʻgʻrisida xabarnoma yuboriladi.

(4¹-band Oʻzbekiston Respublikasi Vazirlar Mahkamasining 2020-yil 23-dekabrdagi 807-sonli qaroriga asosan kiritilgan — Qonun hujjatlari maʼlumotlari milliy bazasi, 24.12.2020-y., 09/20/807/1665-son)

Oldingi tahrirga qarang.

4^2. Veb-sayt, veb-sayt va (yoki) messenjer sahifasi egasi, shuningdek blogerga Oʻzbekiston Respublikasi qonunchiligi bilan tarqatilishi taqiqlangan axborotlarni olib tashlash toʻgʻrisida xabarnoma yuborish tartibi 2¹-ilovaga muvofiq tasdiqlansin.

(4²-band Oʻzbekiston Respublikasi Vazirlar Mahkamasining 2020-yil 23-dekabrdagi 807-sonli qaroriga asosan kiritilgan — Qonun hujjatlari maʼlumotlari milliy bazasi, 24.12.2020-y., 09/20/807/1665-son)

5. Oʻzbekiston Respublikasi Hukumatining 3-ilovaga muvofiq ayrim qarorlariga oʻzgartirish va qoʻshimchalar kiritilsin.

6. Mazkur qarorning bajarilishini nazorat qilish Oʻzbekiston Respublikasi axborot texnologiyalari va kommunikatsiyalarini rivojlantirish vaziri Sh.M. Sadikov hamda Oʻzbekiston matbuot va axborot agentligi bosh direktori L.X. Tangriyev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2018-yil 5-sentabr,

707-son

Vazirlar Mahkamasining 2018-yil 5-sentabrdagi 707-son qaroriga
1-ILOVA

NIZOM

1-bob. Umumiy qoidalar

1. Ushbu Nizom Oʻzbekiston Respublikasi qonunchiligi bilan tarqatilishi taqiqlangan axborotga (keyingi oʻrinlarda taqiqlangan axborot deb ataladi) ega butunjahon Internet tarmogʻi veb-saytidan va (yoki) veb-sayt sahifalaridan (keyingi oʻrinlarda Internet tarmogʻi axborot resurslari deb ataladi) foydalanishni cheklash tartibini belgilaydi.

2. Ushbu Nizomning amal qilishi Oʻzbekiston Respublikasi hududida foydalanish mumkin boʻlgan barcha Internet tarmogʻi axborot resurslariga tatbiq etiladi.

3. Ushbu Nizomda quyidagi asosiy tushunchalardan foydalaniladi:

Internet tarmogʻi barcha axborot resurslari identifikatsiya maʼlumotlari — noyob domen nomlari, Internet axborot tarmogʻida identifikatsiyalashga imkon beradigan veb-sayt sahifalari koʻrsatkichlari va tarmoq manzillari;

foydalanishni cheklash — foydalanuvchining Oʻzbekiston Respublikasi hududida muayyan Internet tarmogʻi axborot resursidan foydalanishini toʻxtatishga doir tashkiliy va dasturiy-texnik chora-tadbirlar majmuasi;

taqiqlangan axborot mavjud boʻlgan butunjahon Internet tarmogʻi axborot resurslari Reyestri (keyingi oʻrinlarda Reyestr deb ataladi) — taqiqlangan axborot mavjud boʻlgan Internet tarmogʻi axborot resurslari roʻyxati.

4. Internet tarmogʻi axborot resurslaridan foydalanishni cheklash quyidagi tartibda amalga oshiriladi:

taqiqlangan axborot mavjud boʻlgan Internet tarmogʻi axborot resurslarini aniqlash;

taqiqlangan axborot mavjud boʻlgan Internet tarmogʻi axborot resursi identifikatsiya maʼlumotlarini Reyestrga kiritish;

Internet tarmogʻi axborot resursidan foydalanishni cheklash.

2-bob. Taqiqlangan axborot mavjud boʻlgan Internet tarmogʻi axborot resurslarini aniqlash

Oldingi tahrirga qarang.

5. Taqiqlangan axborot mavjud boʻlgan Internet tarmogʻi axborot resurslarini aniqlash maqsadida Axborot va ommaviy kommunikatsiyalar agentligining Ommaviy kommunikatsiyalar masalalari boʻyicha markazi tomonidan qonunchilikda belgilangan tartibda Internet tarmogʻi resurslarining monitoringi yuritiladi.

(5-band Oʻzbekiston Respublikasi Vazirlar Mahkamasining 2019-yil 3-iyundagi 457-sonli qarori tahririda — Qonun hujjatlari maʼlumotlari milliy bazasi, 04.06.2019-y., 09/19/457/3235-son)

LexUZ sharhi

Qarang: Vazirlar Mahkamasining 2018-yil 5-sentabrdagi 707-sonli “Butunjahon Internet tarmogʻida axborot xavfsizligini yanada takomillashtirish chora-tadbirlari toʻgʻrisida”gi qarori.

6. Internet tarmogʻi resurslarining monitoringi, shuningdek, Markazga belgilangan tartibda kelib tushgan yuridik va jismoniy shaxslarning murojaatlari asosida ham olib boriladi.

LexUZ sharhi

Qarang: Oʻzbekiston Respublikasining “Jismoniy va yuridik shaxslarning murojaatlari toʻgʻrisida”gi Qonuni.

7. Monitoring natijasida taqiqlangan axborot mavjud boʻlgan Internet tarmogʻi axborot resursi aniqlangan taqdirda Markaz tomonidan bir ish kuni mobaynida Internet tarmogʻi axborot resursida taqiqlangan axborot mavjudligi yuzasidan xulosa tayyorlanadi.

8. Markaz xulosasida quyidagilar aks etgan boʻlishi kerak:

xulosa qabul qilingan sana;

monitoring oʻtkazish uchun asos;

oʻrganish predmeti (taqiqlangan axborot aniqlangan axborot resurslari roʻyxati);

oʻtkazilgan monitoring natijalari.

9. Monitoring natijalarini ekspertizadan oʻtkazish uchun Markaz Vazirlar Mahkamasining 2011-yil 5-avgustdagi 228-son qarori bilan tashkil etilgan Ommaviy kommunikatsiyalar sohasidagi ekspert komissiyasiga (keyingi oʻrinlarda Ekspert komissiyasi deb ataladi) murojaat qilishga haqli.

10. Internet tarmogʻi axborot resursining identifikatsiya maʼlumotlari Reyestrga kiritilishiga asos boʻlgan Markaz xulosasi yoki Ekspert komissiyasi qarori yuzasidan sudga murojaat qilinishi mumkin.

3-bob. Internet tarmogʻi axborot resursi identifikatsiya maʼlumotlarini Reyestrga kiritish tartibi

11. Reyestrni shakllantirish va yuritish Markaz tomonidan elektron shaklda amalga oshiriladi.

12. Taqiqlangan axborot mavjud boʻlgan Internet tarmogʻi axborot resursi identifikatsiya maʼlumotlarini Reyestrga kiritish uchun quyidagilar asos boʻladi:

Internet tarmogʻi axborot resursida taqiqlangan axborot mavjudligi yuzasidan Markaz xulosasi;

butunjahon Internet tarmogʻida tarqatilayotgan axborotni taqiqlangan deb eʼtirof etish toʻgʻrisida Ekspert komissiyasining qarori.

13. Xulosa tayyorlangandan keyin yoki Ekspert komissiyasining tegishli qarorini olgandan keyin Markaz kechiktirmay taqiqlangan axborot mavjud boʻlgan Internet tarmogʻi axborot resursi identifikatsiya maʼlumotlarini Reyestrga kiritadi. Bunda tegishli asos — xulosa (qaror) koʻrsatilishi shart.

14. Reyestrga kiritilgan Internet tarmogʻi axborot resursi identifikatsiya maʼlumotlari oʻzgargan taqdirda, Markazning oldingi xulosasi yoki Ekspert komissiyasi qarori yangi aniqlangan oʻzgargan maʼlumotlarni Reyestrga kiritish uchun asos boʻladi.

4-bob. Internet tarmogʻi axborot resurslaridan foydalanishni cheklash

15. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi Internet tarmogʻi axborot resurslaridan foydalanishni cheklash boʻyicha maxsus vakolatli organ (keyingi oʻrinlarda maxsus vakolatli organ deb ataladi) hisoblanadi.

16. Maxsus vakolatli organ Reyestrga kiritilgan Internet tarmogʻi axborot resurslaridan foydalanishni cheklashga doir tashkiliy va dasturiy-texnik chora-tadbirlar koʻradi.

17. Foydalanishni cheklash faqat identifikatsiya maʼlumotlari Reyestrga kiritilgan Internet tarmogʻi axborot resurslariga nisbatan tatbiq etiladi.

18. Foydalanishni cheklash choralarini koʻrish Internet tarmogʻi axborot resurslari identifikatsiya maʼlumotlari Reyestrga kiritilgandan keyin oʻn ikki soat mobaynida amalga oshiriladi.

19. Oʻzbekiston Respublikasi hududida foydalanilishi cheklangan Internet tarmogʻi axborot resurslari Oʻzbekiston Respublikasi foydalanuvchilari murojaatlariga javoban maxsus vakolatli organ quyidagi maʼlumotlar berilishini taʼminlaydi:

taqiqlangan axborot mavjud boʻlgan Internet tarmogʻi axborot resursi identifikatsiya maʼlumotlarining Reyestrga kiritilgani haqida xabar;

murojaat uchun bogʻlanish maʼlumotlari.

5-bob. Taqiqlangan axborot mavjud boʻlgan Internet tarmogʻi axborot resursi identifikatsiya maʼlumotlarini reyestrdan chiqarish tartibi

20. Quyidagilar Markaz tomonidan taqiqlangan axborot mavjud Internet tarmogʻi axborot resursi identifikatsiya maʼlumotlarining bir sutka davomida Reyestrdan chiqarilishi uchun asos boʻladi:

Internet tarmogʻi axborot resursi egasining taqiqlangan axborotni Internet tarmogʻi resursidan oʻchirilgani toʻgʻrisida yozma (elektron) murojaati;

taqiqlangan axborot mavjud boʻlgan Internet tarmogʻi axborot resursi identifikatsiya maʼlumotlarining Reyestrga kiritilishi uchun asos boʻlgan Markaz xulosasi yoki Ekspert komissiyasi qarorini asossiz deb hisoblash yoki bekor qilish toʻgʻrisida sud qarorining qonuniy kuchga kirishi.

Shu bilan birga Reyestrda tegishli maʼlumotlar va ularning oʻzgarishi tarixi saqlanadi.

21. Internet tarmogʻi axborot resursi egasining taqiqlangan axborotning Internet tarmogʻi resursidan oʻchirilgani toʻgʻrisida yozma (elektron) murojaati olingach Markaz bir sutka mobaynida holatni tekshiradi va Internet tarmogʻi axborot resursi tegishli identifikatsiya maʼlumotlarini Reyestrdan chiqaradi.

22. Internet tarmogʻi axborot resursi identifikatsiya maʼlumotlari Reyestrdan chiqarilgach, maxsus vakolatli organ foydalanishni cheklovchi toʻsiqlarni bir sutka mobaynida oladi.

6-bob. Reyestr maʼlumotlaridan foydalanish

23. Davlat hokimiyati va boshqaruvi organlariga ularning vakolatlari doirasida, shuningdek, Internet tarmogʻi axborot resursi egasi boʻlgan yuridik va jismoniy shaxslarga ularning murojaatlariga koʻra Reyestr maʼlumotlaridan foydalanishga ruxsat etiladi.

Oldingi tahrirga qarang.

24. Reyestr maʼlumotlaridan foydalanishga ruxsat berish tartibi Axborot va ommaviy kommunikatsiyalar agentligi tomonidan belgilanadi.

(24-band Oʻzbekiston Respublikasi Vazirlar Mahkamasining 2019-yil 3-iyundagi 457-sonli qarori tahririda — Qonun hujjatlari maʼlumotlari milliy bazasi, 04.06.2019-y., 09/19/457/3235-son)

7-bob. Yakunlovchi qoida

Oldingi tahrirga qarang.

25. Mazkur Nizom talablarining buzilishida aybdor boʻlgan shaxslar qonunchilikda belgilangan tartibda javob beradilar.

(25-band Oʻzbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik maʼlumotlari milliy bazasi, 05.04.2022-y., 09/22/153/0266-son)

Vazirlar Mahkamasining 2018-yil 5-sentabrdagi 707-son qaroriga
2-ILOVA

Oʻzbekiston Respublikasi qonunchiligi bilan tarqatilishi taqiqlangan axborot mavjud boʻlgan Internet tarmogʻi veb-saytidan va (yoki) veb-sayt sahifalaridan foydalanishni cheklash

SXEMASI

Oldingi tahrirga qarang.

(2-ilova Oʻzbekiston Respublikasi Vazirlar Mahkamasining 2019-yil 3-iyundagi 457-sonli qarori tahririda — Qonun hujjatlari maʼlumotlari milliy bazasi, 04.06.2019-y., 09/19/457/3235-son)

Oldingi tahrirga qarang.

Vazirlar Mahkamasining 2018-yil 5-sentabrdagi 707-son qaroriga
2¹-ILOVA

Veb-sayt, veb-sayt va (yoki) messenjer sahifasi egasi, shuningdek blogerga Oʻzbekiston Respublikasi qonunchiligi bilan tarqatilishi taqiqlangan axborotni olib tashlash toʻgʻrisida xabarnoma yuborish

TARTIBI

1. Mazkur Tartib veb-sayt va (yoki) veb-sayt sahifasida joylashtirilgan axborotga ushbu veb-sayt foydalanuvchilari tomonidan qoldirilgan sharhlar matnida, shuningdek ijtimoiy tarmoqlar yoki messenjerlarda (keyingi oʻrinlarda axborot resurslari deb ataladi) Oʻzbekiston Respublikasi qonunchiligi bilan tarqatilishi taqiqlangan axborotlar aniqlangan holatda veb-sayt, veb-sayt va (yoki) messenjer sahifasi egasi, shuningdek blogerga ushbu axborotlarni olib tashlash toʻgʻrisida xabarnoma yuborish tartibini belgilaydi.

2. Ushbu Tartibning amal qilishi Oʻzbekiston Respublikasi hududida foydalanish imkoni mavjud boʻlgan axborot resurslariga nisbatan tatbiq etiladi.

3. Ushbu Tartibda quyidagi asosiy tushunchalar qoʻllaniladi:

messenjer — foydalanuvchilarning onlayn rejimda Internet jahon axborot tarmogʻi orqali matn, audio, audiovizual va boshqa xabarlar va materiallar, boshqa maʼlumotlar orqali darhol almashish, tarqatish va uzatish, shuningdek ular oʻrtasidagi masofadan muloqot uchun moʻljallangan dastur, mobil ilova yoki veb-xizmat;

veb-sayt va (yoki) messenjerning sahifasi — veb-sayt va (yoki) messenjerning Internet jahon axborot tarmogʻidagi bir qismi (guruhlar, kanallar va boshqalar), unga kirish domen nomi va belgilaridan tashkil topgan koʻrsatkich boʻyicha, shuningdek nomi orqali amalga oshiriladi.

4. Oʻzbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligining Ommaviy kommunikatsiyalar masalalari boʻyicha markazi (keyingi oʻrinlarda — Markaz) tomonidan axborot resurslarida Oʻzbekiston Respublikasi qonunchiligi bilan tarqatilishi taqiqlangan axborotlar aniqlanganda Markaz tomonidan 24 soatdan kechiktirmasdan axborot resurslari egasi, shuningdek blogerga Oʻzbekiston Respublikasi qonunchiligi bilan tarqatilishi taqiqlangan axborotlarni olib tashlash toʻgʻrisida xabarnoma (keyingi oʻrinlarda xabarnoma deb ataladi) yuboriladi.

5. Xabarnoma Markazning rasmiy axborot resurslari (elektron pochta, ijtimoiy tarmoqlar yoki messenjerlardagi rasmiy sahifa) orqali elektron shaklda yuboriladi.

6. Xabarnomada Oʻzbekiston Respublikasi qonunchiligi bilan tarqatilishi taqiqlangan axborot joylashtirilgan axborot resursining nomi, axborot joylashtirilgan sana koʻrsatiladi, taqiqlangan axborotga havola va uning ekrandagi tasviri nusxasi ilova qilinadi, shuningdek qoʻshimcha ravishda ushbu axborotni tarqatish uchun qonunchilikda belgilangan javobgarlik toʻgʻrisida maʼlumotlar keltirilishi mumkin.

7. Axborot resursi egasi, shuningdek bloger xabarnomani olgan vaqtdan boshlab 24 soatdan kechiktirmasdan Oʻzbekiston Respublikasi qonunchiligi bilan tarqatilishi taqiqlangan axborotni olib tashlashi, shuningdek bu toʻgʻrida Markazni uning rasmiy axborot resurslari orqali elektron shaklda yoki qogʻoz shaklida xabardor qilishi lozim.

8. Agar Oʻzbekiston Respublikasi qonunchiligi bilan tarqatilishi taqiqlangan axborot ushbu Tartibning 6-bandida koʻrsatilgan muddatda axborot resursi egasi, shuningdek bloger tomonidan olib tashlanmasa, u holda Oʻzbekiston Respublikasi Prezident Administratsiyasi huzuridagi Axborot va ommaviy kommunikatsiyalar agentligi yoki Markaz tomonidan ushbu axborotni olib tashlash boʻyicha Oʻzbekiston Respublikasi qonunchiligi bilan tarqatilishi taqiqlangan axborot joylashtirilgan ijtimoiy tarmoq yoki messenjer maʼmuriga yoki daʼvo arizasi bilan sudga murojaat qilinishi mumkin.

(2¹-ilova Oʻzbekiston Respublikasi Vazirlar Mahkamasining 2020-yil 23-dekabrdagi 807-sonli qaroriga asosan kiritilgan — Qonun hujjatlari maʼlumotlari milliy bazasi, 24.12.2020-y., 09/20/807/1665-son)

Vazirlar Mahkamasining 2018-yil 5-sentabrdagi 707-son qaroriga
3-ILOVA

Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar

Oldingi tahrirga qarang.

(1-band Oʻzbekiston Respublikasi Vazirlar Mahkamasining 2025-yil 15-dekabrdagi 791-sonli qaroriga asosan oʻz kuchini yoʻqotgan — Qonunchilik maʼlumotlari milliy bazasi, 16.12.2025-y., 09/25/791/1167-son)

2. Vazirlar Mahkamasining “Ommaviy kommunikatsiyalar sohasida monitoring tizimini takomillashtirishga doir qoʻshimcha chora-tadbirlar toʻgʻrisida” 2011-yil 5-avgustdagi 228-son qarorida (Oʻzbekiston Respublikasi QT, 2011-y., 8-son, 70-modda):

a) 1-ilovadan oʻninchi xatboshi chiqarib tashlansin;

b) 2-ilovada:

5-bandda:

quyidagi mazmundagi sakkizinchi xatboshi qoʻshilsin:

“ekspert xulosalarini oʻrganadi hamda xalqaro Internet tarmogʻi axborot resurslarining identifikatsiya maʼlumotlarini Oʻzbekiston Respublikasi qonunchiligi bilan tarqatilishi taqiqlangan axborot mavjud boʻlgan Internet tarmogʻi Reyestriga kiritish yuzasidan qaror qabul qiladi”

sakkizinchi xatboshi toʻqqizinchi xatboshi deb hisoblansin;

6-bandga quyidagi mazmundagi xatboshi qoʻshilsin:

“materiallarni koʻrib chiqish hamda xalqaro Internet tarmogʻi axborot resurslarining identifikatsiya maʼlumotlarini Oʻzbekiston Respublikasi qonunchiligi bilan tarqatilishi taqiqlangan axborot mavjud boʻlgan Internet tarmogʻi Reyestriga kiritish yuzasidan qaror qabul qilish”;

9-bandning beshinchi xatboshi quyidagi tahrirda bayon etilsin:

“materiallarni ekspertizadan oʻtkazish va zarur hollarda ekspertiza xulosalarini sudda himoya qilish uchun ekspert (ekspertlar) belgilash”;

11-bandda:

uchinchi xatboshiga “Komissiya tomonidan belgilangan tartibda, shu jumladan elektron koʻrinishda majlis natijalarini roʻyxatga olish va oʻtkazish” soʻzlari qoʻshilsin;

beshinchi va oltinchi xatboshilar chiqarib tashlansin;

12-bandda:

uchinchi xatboshiga “shu jumladan, Komissiya tomonidan belgilangan tartibda elektron hujjat aylanishi tartibida” soʻzlari qoʻshilsin;

quyidagi mazmundagi xatboshi qoʻshilsin:

“zarur materiallarni oʻz vaqtida tayyorlashni taʼminlaydi hamda materiallar Ishchi organga tushgan sanadan boshlab 15 kun muddatda ekspertiza oʻtkazadi”;

13-bandning sakkizinchi xatboshiga “shu jumladan, Komissiya tomonidan belgilangan tartibda elektron hujjat aylanishi yoʻli bilan” soʻzlari qoʻshilsin;

14 — 16-bandlar quyidagi tahrirda bayon etilsin:

“14. Komissiya raisi jismoniy va yuridik shaxslarning har bir aniq murojaati yuzasidan materiallar olingan sanadan boshlab uch ish kuni mobaynida Komissiya ishchi organi taklifi bilan jalb etilgan ekspertlardan ekspertni (ekspertlarni) tasdiqlaydi.

15. Ekspertiza materiallar olingan sanadan boshlab 15 kun mobaynida oʻtkaziladi.

16. Ekspert (ekspertlar) taqdim etilgan materiallarni besh kun muddatda oʻrganib chiqadi va ekspert xulosasi beradi”;

18 va 19-bandlar quyidagi tahrirda bayon etilsin:

“18. Zarurat boʻlganda Komissiya bajarilgan ishlar yuzasidan Ishchi organning amalga oshirilgan ishlar toʻgʻrisidagi hisobotini koʻrib chiqadi.

19. Komissiya qarori majlisda ishtirok etgan barcha Komissiya aʼzolari tomonidan imzolangan bayonnoma asosida, shu jumladan Komissiya tomonidan belgilangan tartibda elektron hujjat almashinuvi vositasida rasmiylashtiriladi”;

20-banddagi “Komissiya” soʻzi “ekspert (ekspertlar)” soʻzlari bilan almashtirilsin;

21-banddagi “materiallar ekspertizaga tushishiga” soʻzlari “zaruratga” soʻzi bilan almashtirilsin;

30-band quyidagi tahrirda bayon etilsin:

“30. Komissiya faoliyatini taʼminlash boʻyicha tashkiliy masalalarni hal etish hamda ekspertizalar oʻtkazish Komissiyaning ishchi organi tomonidan, shu jumladan Komissiya tomonidan belgilangan tartibda elektron hujjat almashinuvi yoʻli bilan amalga oshiriladi”.

Oldingi tahrirga qarang.

Vazirlar Mahkamasining 2018-yil 5-sentabrdagi 707-son qaroriga
3-ILOVA

Oʻzbekiston Respublikasi fuqarolarining shaxsga doir maʼlumotlariga ishlov berishning alohida shartlariga rioya etilishi ustidan davlat nazoratini amalga oshirish tartibi toʻgʻrisida

NIZOM

1-bob. Umumiy qoidalar

1. Ushbu Nizom mulkdor va (yoki) operatorlar tomonidan Oʻzbekiston Respublikasi fuqarolarining shaxsga doir maʼlumotlariga axborot texnologiyalaridan foydalangan holda ishlov berishda, shu jumladan Internet jahon axborot tarmogʻida ishlov berishda ularning jisman Oʻzbekiston Respublikasi hududida joylashgan texnik vositalarda hamda belgilangan tartibda Shaxsga doir maʼlumotlar bazalarining davlat reyestrida roʻyxatdan oʻtkazilgan shaxsga doir maʼlumotlar bazalarida yigʻilishi, tizimlashtirilishi va saqlanishiga oid qonunchilik hujjatlari talablarini bajarilishi ustidan davlat nazoratini amalga oshirish tartibini belgilaydi.

LexUZ sharhi

Qarang: Vazirlar Mahkamasining 2020-yil 8-fevraldagi 71-sonli qarori bilan tasdiqlangan Shaxsga doir maʼlumotlar bazalarining davlat reyestri toʻgʻrisidagi nizom.

2. Ushbu Nizomda quyidagi asosiy tushunchalardan foydalaniladi:

Oʻzbekiston Respublikasi fuqarolarining shaxsga doir maʼlumotlariga ishlov berishning alohida shartlari — Oʻzbekiston Respublikasi fuqarolarining shaxsga doir maʼlumotlariga axborot texnologiyalaridan foydalangan holda ishlov berishda, shu jumladan Internet jahon axborot tarmogʻida ishlov berishda ularning jisman Oʻzbekiston Respublikasi hududida joylashgan texnik vositalarda hamda belgilangan tartibda Shaxsga doir maʼlumotlar bazalarining davlat reyestrida roʻyxatdan oʻtkazilgan shaxsga doir maʼlumotlar bazalarida yigʻilishi, tizimlashtirilish va saqlanishiga oid shartlar;

LexUZ sharhi

Qarang: Vazirlar Mahkamasining 2020-yil 8-fevraldagi 71-sonli qarori bilan tasdiqlangan Shaxsga doir maʼlumotlar bazalarining davlat reyestri toʻgʻrisidagi nizom.

foydalanishni cheklash — mulkdor va (yoki) operatorlarning Oʻzbekiston Respublikasi hududida Internet jahon axborot tarmogʻidagi resursdan foydalanishini toʻxtatishga yoki tezlikni kamaytirishga doir tashkiliy va dasturiy-texnik chora-tadbirlar majmuasi;

shaxsga doir maʼlumotlar — muayyan jismoniy shaxsga taalluqli boʻlgan yoki uni identifikatsiya qilish imkonini beradigan, elektron tarzda, qogʻozda va (yoki) boshqa moddiy jismda qayd etilgan axborot;

shaxsga doir maʼlumotlar bazasi — tarkibida shaxsga doir maʼlumotlar mavjud boʻlgan axborot tizimi tarzidagi maʼlumotlar bazasi;

shaxsga doir maʼlumotlar bazasining mulkdori (keyingi oʻrinlarda — mulkdor) — shaxsga doir maʼlumotlar bazasiga egalik qilish, undan foydalanish va uni tasarruf etish huquqiga ega boʻlgan davlat organi, jismoniy va (yoki) yuridik shaxs;

shaxsga doir maʼlumotlar bazasining operatori (keyingi oʻrinlarda — operator) — shaxsga doir maʼlumotlarga ishlov berishni amalga oshiruvchi davlat organi, jismoniy va (yoki) yuridik shaxs;

Oldingi tahrirga qarang.

shaxsga doir maʼlumotlar sohasidagi vakolatli davlat organi — Oʻzbekiston Respublikasi Adliya vazirligi huzuridagi Personallashtirish agentligi;

(2-bandning sakkizinchi xatboshisi Oʻzbekiston Respublikasi Vazirlar Mahkamasining 2025-yil 1-martdagi 135-sonli qarori tahririda — Qonunchilik maʼlumotlari milliy bazasi, 03.03.2025-y., 09/25/135/0208-son)

shaxsga doir maʼlumotlar subyekti (keyingi oʻrinlarda — subyekt) — shaxsga doir maʼlumotlar oʻziga taalluqli boʻlgan jismoniy shaxs;

Shaxsga doir maʼlumotlar subyektlari huquqlarini buzuvchilar reyestri — Oʻzbekiston Respublikasi fuqarolarining shaxsga doir maʼlumotlariga ishlov berishning alohida shartlariga rioya etmagan shaxsga doir maʼlumotlar bazasining mulkdorlari va (yoki) operatorlarining roʻyxati;

shaxsga doir maʼlumotlarga ishlov berish — shaxsga doir maʼlumotlarni yigʻish, tizimlashtirish, saqlash, oʻzgartirish, toʻldirish, ulardan foydalanish, ularni berish, tarqatish, uzatish, egasizlantirish va yoʻq qilish boʻyicha bir harakatni yoki harakatlar majmuini amalga oshirish.

3. Oʻzbekiston Respublikasi fuqarolarining shaxsga doir maʼlumotlariga ishlov berishning alohida shartlariga rioya etilishi ustidan davlat nazorati Shaxsga doir maʼlumotlar subyektlari huquqlarini buzuvchilar reyestrini (keyingi oʻrinlarda — Reyestr) yuritish orqali amalga oshiriladi.

4. Oʻzbekiston Respublikasi fuqarolarining shaxsga doir maʼlumotlariga axborot texnologiyalaridan foydalangan holda, shu jumladan Internet jahon axborot tarmogʻida ishlov berishning alohida shartlariga rioya etilishi ustidan davlat nazorati Oʻzbekiston Respublikasi Axborotlashtirish va telekommunikatsiyalar sohasida nazorat boʻyicha davlat inspeksiyasi (keyingi oʻrinlarda — “Oʻzkomnazorat” davlat inspeksiyasi) tomonidan amalga oshiriladi.

5. “Oʻzkomnazorat” davlat inspeksiyasi:

mulkdor va (yoki) operatorlarning Oʻzbekiston Respublikasi fuqarolarining shaxsga doir maʼlumotlariga ishlov berishning alohida shartlariga rioya etishini oʻrganish va tekshirish hamda monitoring va tahlil qilish ishlarini amalga oshiradi;

Oʻzbekiston Respublikasi fuqarolarining shaxsga doir maʼlumotlariga axborot texnologiyalaridan foydalangan holda, shu jumladan Internet jahon axborot tarmogʻida ishlov berishning alohida shartlari buzilgan taqdirda ushbu qonun buzilish holatini bartaraf etish yuzasidan davlat organi, jismoniy va (yoki) yuridik shaxslar tomonidan ijro etilishi majburiy boʻlgan koʻrsatmalar beradi;

fuqarolarning shaxsga doir maʼlumotlariga axborot texnologiyalaridan foydalangan holda, shu jumladan Internet jahon axborot tarmogʻida ishlov beruvchi mulkdor va (yoki) operatorlarga nisbatan Oʻzbekiston Respublikasi fuqarolarining shaxsga doir maʼlumotlariga ishlov berishning alohida shartlarini buzganliklari yuzasidan maʼmuriy huquqbuzarlik toʻgʻrisida bayonnomalarni tuzadi va koʻrib chiqish uchun sudga yuboradi;

mulkdor va (yoki) operatorlarning axborot texnologiyalaridan foydalangan holda, shu jumladan Internet jahon axborot tarmogʻida shaxsga doir maʼlumotlarga ishlov berish faoliyatlari yuzasidan Oʻzbekiston Respublikasi Vazirlar Mahkamasiga axborot kiritib boradi;

Reyestrni yuritadi hamda xorijiy davlatlarning vakolatli organlari va xalqaro tashkilotlar bilan shaxsga doir maʼlumotlar sohasida hamkorlikni amalga oshiradi.

2-bob. Oʻzbekiston Respublikasi fuqarolarining shaxsga doir maʼlumotlariga ishlov berishning alohida shartlarini buzgan mulkdor va (yoki) operatorlarni Reyestrga kiritish tartibi

6. Oʻzbekiston Respublikasi fuqarolarining shaxsga doir maʼlumotlariga ishlov berishning alohida shartlarini buzgan mulkdor va (yoki) operatorlarni Reyestrga kiritish va Reyestrdan chiqarish ushbu Nizomga sxemaga muvofiq amalga oshiriladi.

7. Oʻzbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligining Ommaviy kommunikatsiyalar masalalari boʻyicha markazi (keyingi oʻrinlarda — Markaz) Oʻzbekiston Respublikasi Prezidentining “Axborot sohasi va ommaviy kommunikatsiyalarni yanada rivojlantirishga oid qoʻshimcha chora-tadbirlar toʻgʻrisida” 2019-yil 2-fevraldagi PF-5653-son Farmoniga asosan oʻz zimmasiga yuklatilgan vazifalar doirasida Oʻzbekiston Respublikasi fuqarolarining shaxsga doir maʼlumotlariga axborot texnologiyalaridan foydalangan holda, shu jumladan Internet jahon axborot tarmogʻida ishlov berishning alohida shartlari buzilish holatlarini aniqlash maqsadida Internet jahon axborot tarmogʻida shaxsga doir maʼlumotlarga ishlov beruvchi mulkdor va (yoki) operatorlar faoliyati monitoringini amalga oshiradi.

8. Markaz tomonidan Internet jahon axborot tarmogʻida shaxsga doir maʼlumotlarga ishlov beruvchi mulkdor va (yoki) operatorlar tomonidan Oʻzbekiston Respublikasi fuqarolarining shaxsga doir maʼlumotlariga ishlov berishning alohida shartlari buzilganligi holatlari aniqlanganda, bu haqda, 24 soat davomida shaxsga doir maʼlumotlar sohasidagi vakolatli davlat organiga xulosa berish uchun maʼlumot kiritadi.

9. Shaxsga doir maʼlumotlar sohasidagi vakolatli davlat organi Markaz tomonidan taqdim etilgan maʼlumotni olgandan soʻng 24 soat ichida “Oʻzkomnazorat” davlat inspeksiyasiga shaxsga doir maʼlumotlarga axborot texnologiyalaridan foydalangan holda, shu jumladan Internet jahon axborot tarmogʻida ishlov beruvchi mulkdor va (yoki) operatorlar tomonidan Oʻzbekiston Respublikasi fuqarolarining shaxsga doir maʼlumotlariga ishlov berishning alohida shartlari buzilganligi yuzasidan xulosa taqdim etadi.

10. Shaxsga doir maʼlumotlar sohasidagi vakolatli davlat organi xulosasida quyidagilar aks etgan boʻlishi kerak:

xulosa qabul qilingan sana;

oʻrganish predmeti (Oʻzbekiston Respublikasi fuqarolarining shaxsga doir maʼlumotlariga ishlov berishning alohida shartlarini buzgan mulkdor va (yoki) operatorlar resurslari roʻyxati);

oʻtkazilgan monitoring natijalari (buzilgan qonunchilik hujjatlari bandlari koʻrsatilgan holda);

Reyestrga kiritish va shaxsga doir maʼlumotlar bazasining mulkdorlari va (yoki) operatorlariga nisbatan choralar koʻrish yuzasidan takliflar.

11. “Oʻzkomnazorat” davlat inspeksiyasi taqdim etilgan xulosa kelib tushgan kundan boshlab bir kun muddatda aniqlangan kamchiliklarni bartaraf etish yuzasidan shaxsga doir maʼlumotlar bazasi mulkdori yoki operatoriga aniq muddat belgilagan holda tegishli koʻrsatma beradi.

12. Shaxsga doir maʼlumotlar bazasi mulkdori yoki operatori koʻrsatmada keltirilgan kamchiliklarni bartaraf etish chorasini koʻrishi va “Oʻzkomnazorat” davlat inspeksiyasiga oʻz vaqtida maʼlumot kiritishi lozim.

13. “Oʻzkomnazorat” davlat inspeksiyasi koʻrsatmasida belgilangan muddat ichida koʻrsatmada nazarda tutilgan qonun buzilishi holatlari bartaraf etilmagan taqdirda, mulkdor va (yoki) operator toʻgʻrisidagi maʼlumotlar Reyestrga kiritiladi.

14. Oʻzbekiston Respublikasi fuqarolarining shaxsga doir maʼlumotlariga axborot texnologiyalaridan foydalangan holda, shu jumladan Internet jahon axborot tarmogʻida ishlov berishning alohida shartlarini buzgan mulkdor va (yoki) operatorlarni Reyestrga kiritilishiga asos boʻlgan shaxsga doir maʼlumotlar sohasidagi vakolatli davlat organ xulosasi ustidan sudga shikoyat qilishga haqli.

3-bob. Shaxsga doir maʼlumotlar subyektlari huquqlarini buzgan mulkdor va (yoki) operatorlarni faoliyatini Internet jahon axborot tarmogʻi milliy segmentida cheklash

15. Oʻzbekiston Respublikasi fuqarolarining shaxsga doir maʼlumotlariga axborot texnologiyalaridan foydalangan holda, shu jumladan Internet jahon axborot tarmogʻida ishlov berishning alohida shartlarini buzgan mulkdor va (yoki) operatorlar faoliyatini Internet jahon axborot tarmogʻi milliy segmentida cheklash Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi (keyingi oʻrinlarda — Vazirlik) tomonidan amalga oshiriladi.

16. Foydalanishni cheklash identifikatsiya maʼlumotlari Reyestrga kiritilgan shaxsga doir maʼlumotlar bazasining mulkdori va (yoki) operatorining Internet jahon axborot tarmogʻi axborot resurslariga nisbatan tatbiq etiladi.

17. “Oʻzkomnazorat” davlat inspeksiyasi Reyestrga kiritilgandan soʻng 12 soat davomida shaxsga doir maʼlumotlar bazasi mulkdori yoki operatorining Internet jahon axborot tarmogʻi axborot resurslaridan foydalanishini cheklash boʻyicha Vazirlikka taqdimnoma beradi.

18. Vazirlik Reyestrga kiritilgandan soʻng 12 soat davomida shaxsga doir maʼlumotlar bazasi mulkdori yoki operatorining Internet jahon axborot tarmogʻi resurslaridan foydalanishini cheklashni amalga oshiradi.

4-bob. Shaxsga doir maʼlumotlar bazasining mulkdor va (yoki) operatorni Reyestrdan chiqarish tartibi

19. “Oʻzkomnazorat” davlat inspeksiyasi tomonidan shaxsga doir maʼlumotlar bazasining mulkdorini va (yoki) operatorini Reyestrdan chiqarilishi uchun quyidagilar asos boʻladi:

Markaz maʼlumotiga asosan shaxsga doir maʼlumotlar sohasidagi vakolatli davlat organining mulkdor va (yoki) operator tomonidan Internet jahon axborot tarmogʻi resursida kamchiliklar bartaraf etilganligi yuzasidan xulosasi;

Oʻzbekiston Respublikasi fuqarolarining shaxsga doir maʼlumotlariga axborot texnologiyalaridan foydalangan holda, shu jumladan Internet jahon axborot tarmogʻida ishlov berishning alohida shartlarini buzgan mulkdor va (yoki) operatorlarni Reyestrga kiritilishi uchun asos boʻlgan shaxsga doir maʼlumotlar sohasidagi vakolatli davlat organi xulosasini bekor qilish toʻgʻrisida sud qarorining qonuniy kuchga kirishi.

20. “Oʻzkomnazorat” davlat inspeksiyasi Internet jahon axborot tarmogʻi resursi egasining Internet jahon axborot tarmogʻi resursida kamchiliklar bartaraf etilganligi yuzasidan bildirgan yozma (elektron) murojaatini oʻrganib, bir kun muddatda shaxsga doir maʼlumotlar sohasidagi vakolatli davlat organiga xulosa berish uchun taqdim etadi.

21. Shaxsga doir maʼlumotlar sohasidagi vakolatli davlat organi Markaz bilan birgalikda mulkdor va (yoki) operator tomonidan Internet jahon axborot tarmogʻi resursida kamchiliklar bartaraf etilganligi yuzasidan maʼlumotini 24 soat davomida oʻrganib chiqadi va “Oʻzkomnazorat” davlat inspeksiyasiga xulosa beradi.

22. “Oʻzkomnazorat” davlat inspeksiyasi mazkur Nizomning 16-bandida keltirilgan holatlar asosida 24 soat davomida shaxsga doir maʼlumotlar bazasining mulkdorini va (yoki) operatorini (yoki axborot resursi identifikatsiya maʼlumotlarini) Reyestrdan chiqaradi.

23. Shaxsga doir maʼlumotlar bazasining mulkdorini va (yoki) operatorini (yoki axborot resursi identifikatsiya maʼlumotlarini) Reyestrdan chiqarilgach, Vazirlik “Oʻzkomnazorat” davlat inspeksiyasi taqdimnomasi asosida foydalanishni cheklovchi toʻsiqlarni 12 soat davomida oladi.

24. Reyestrda qayd etilgan, ishlov berilgan va boshqa amalga oshirilgan maʼlumotlar hamda ularning oʻzgarish tarixi oʻrnatilgan tartibda saqlanadi.

7-bob. Yakunlovchi qoida

25. Mazkur Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Oʻzbekiston Respublikasi fuqarolarining shaxsga doir maʼlumotlariga ishlov berishning alohida shartlarini buzgan mulkdor va (yoki) operatorlarni Shaxsga doir maʼlumotlar subyektlari huquqlarini buzuvchilar reyestriga kiritish va undan chiqarish tartibi

SXEMASI

Bosqich	Subyekt	Tadbirlar	Ijro muddati
1-bosqich	Ommaviy kommunikatsiyalar masalalari boʻyicha Markaz va shaxsga doir maʼlumotlar sohasidagi vakolatli davlat organi	Oʻzbekiston Respublikasi fuqarolarining shaxsga doir maʼlumotlariga ishlov berishning alohida shartlari buzilish holatlarini aniqlash maqsadida Internet jahon axborot tarmogʻida shaxsga doir maʼlumotlarga ishlov beruvchi mulkdor va (yoki) operatorlar faoliyati monitoringini amalga oshiradi.	Doimiy ravishda
	Yuridik yoki jismoniy shaxslar	Markazga oʻrnatilgan tartibda, shu jumladan, Oʻzbekiston Respublikasi qonunchiligi bilan shaxsga doir maʼlumotlariga ishlov berishning alohida shartlari buzilishi mavjud Internet tarmogʻi veb-saytidan va (yoki) veb-sayt sahifalari hamda resurslarida shaxsga doir maʼlumotlarga ishlov beruvchi tashkilotlar haqida murojaat qilish orqali maʼlumot berish.	Doimiy ravishda
2-bosqich	Ommaviy kommunikatsiyalar masalalari boʻyicha Markaz	Internet jahon axborot tarmogʻida shaxsga doir maʼlumotlarga ishlov beruvchi mulkdor va (yoki) operatorlar tomonidan Oʻzbekiston Respublikasi fuqarolarining shaxsga doir maʼlumotlariga axborot texnologiyalaridan foydalangan holda, shu jumladan Internet jahon axborot tarmogʻida ishlov berishning alohida shartlari buzilganligi holatlari aniqlanganda, bu haqida shaxsga doir maʼlumotlar sohasidagi vakolatli davlat organiga xulosa berish uchun maʼlumot kiritadi.	Aniqlangan muddatdan boshlab 24 soat davomida
2-bosqich	Shaxsga doir maʼlumotlar sohasidagi vakolatli davlat organi	Shaxsga doir maʼlumotlar sohasidagi vakolatli davlat organi Markaz tomonidan taqdim egilgan maʼlumotni olgandan soʻng “Oʻzkomnazorat” davlat inspeksiyasiga shaxsga doir maʼlumotlarga ishlov beruvchi mulkdor va (yoki) operatorlar tomonidan Oʻzbekiston Respublikasi fuqarolarining shaxsga doir maʼlumotlariga ishlov berishning alohida shartlari buzilganligi yuzasidan xulosa taqdim etadi.	Aniqlangan muddatdan boshlab 24 soat davomida
3-bosqich	“Oʻzkomnazorat” davlat inspeksiyasi	Taqdim etilgan xulosa asosida aniqlangan kamchiliklarni bartaraf etish yuzasidan shaxsga doir maʼlumotlar bazasi mulkdori yoki operatoriga aniq muddat belgilagan holda tegishli koʻrsatma beradi.	Xulosa kelib tushgan kundan boshlab bir kun muddatda
3-bosqich	Shaxsga doir maʼlumotlar bazasi mulkdor yoki operator	Shaxsga doir maʼlumotlar bazasi mulkdori yoki operatori koʻrsatmada keltirilgan kamchiliklarni bartaraf etish chorasini koʻradi va “Oʻzkomnazorat” davlat inspeksiyasiga oʻz vaqtida maʼlumot kiritadi.	Taqdimnomada belgilangan muddatlarda
4-bosqich	“Oʻzkomnazorat” davlat inspeksiyasi	Koʻrsatmada belgilangan muddat ichida koʻrsatmada nazarda tutilgan qonun buzilishi holatlari bartaraf etilmagan taqdirda, shaxsga doir maʼlumotlar bazasi mulkdor va (yoki) operator toʻgʻrisidagi maʼlumotlar “Shaxsga doir maʼlumotlar subyektlari huquqlarini buzuvchilar reyestri”ga kiritiladi.	Koʻrsatmadagi muddatdan soʻng
5-bosqich	“Oʻzkomnazorat” davlat inspeksiyasi	“Shaxsga doir maʼlumotlar subyektlari huquqlarini buzuvchilar Reyestri”ga kiritilgandan soʻng shaxsga doir maʼlumotlar bazasi mulkdori yoki operatorining Internet tarmogʻi axborot resurslaridan foydalanishini cheklash boʻyicha Axborot texnologiyalari va kommunikatsiyalarini rivojlantirish vazirligiga taqdimnoma beradi.	12 soat davomida
5-bosqich	Axborot texnologiyalari va kommunikatsiyalarini rivojlantirish vazirligi	“Shaxsga doir maʼlumotlar subyektlari huquqlarini buzuvchilar Reyestri”ga kiritilgandan soʻng shaxsga doir maʼlumotlar bazasi mulkdori yoki operatorining Internet tarmogʻi axborot resurslaridan foydalanishini cheklashni amalga oshiradi.	12 soat davomida
6-bosqich	Ommaviy kommunikatsiyalar masalalari boʻyicha Markaz va shaxsga doir maʼlumotlar sohasidagi vakolatli davlat organi	Shaxsga doir maʼlumotlar sohasidagi vakolatli davlat organ Markaz bilan hamkorlikda mulkdor va (yoki) operator tomonidan Internet tarmogʻi axborot resursida kamchiliklar bartaraf etilganligi yuzasidan maʼlumotini oʻrganib chiqadi va “Oʻzkomnazorat” davlat inspeksiyasiga xulosa beradi.	24 soat davomida
	“Oʻzkomnazorat” davlat inspeksiyasi	Shaxsga doir maʼlumotlar sohasidagi vakolatli davlat organi xulosasiga asosan Internet tarmogʻi axborot resursini “Shaxsga doir maʼlumotlar subyektlari huquqlarini buzuvchilar reyestri”dan chiqaradi va Axborot texnologiyalari va kommunikatsiyalarini rivojlantirish vazirligiga taqdimnoma beradi.	24 soat davomida
	Axborot texnologiyalari va kommunikatsiyalarini rivojlantirish vazirligi	Shaxsga doir maʼlumotlar bazasining mulkdorini va (yoki) operatorini (yoki axborot resursi identifikatsiya maʼlumotlarini) “Shaxsga doir maʼlumotlar subyektlari huquqlarini buzuvchilar Reyestri”dan chiqarilgach, Davlat nazoratini amalga oshiruvchi organ taqdimnomasi asosida foydalanishni cheklovchi toʻsiqlarni oladi.	12 soat davomida

(3-ilova Oʻzbekiston Respublikasi Vazirlar Mahkamasining 2021-yil 29-apreldagi 255-sonli qaroriga asosan kiritilgan — Qonunchilik maʼlumotlari milliy bazasi, 30.04.2021-y., 09/21/255/0402-son)

(Qonun hujjatlari maʼlumotlari milliy bazasi, 06.09.2018-y., 09/18/707/1839-son; 16.01.2019-y., 09/19/34/2486-son, 04.06.2019-y., 09/19/457/3235-son; 24.12.2020-y., 09/20/807/1665-son; Qonunchilik maʼlumotlari milliy bazasi, 30.04.2021-y., 09/21/255/0402-son; 05.04.2022-y., 09/22/153/0266-son; 03.03.2025-y., 09/25/135/0208-son; 16.12.2025-y., 09/25/791/1167-son)