Hujjat kuchini yo‘qotgan " " 13.08.2020

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Jismoniy tarbiya va sport vazirligi huzuridagi Jismoniy tarbiya va sportni rivojlantirish jamgʻarmasi faoliyatini tashkil etish toʻgʻrisida

LexUZ sharhi

Mazkur qaror Oʻzbekistan Respublikasi Vazirlar Mahkamasining 2020-yil 12-avgustdagi 481-sonli “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek, baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Jismoniy tarbiya va sport obyektlarini qurish, rekonstruksiya qilish, kapital taʼmirlash va jihozlash ishlarini moliyalashtirish tartibini yanada takomillashtirish chora-tadbirlari toʻgʻrisida” 2019-yil 26-avgustdagi PF-5787-son Farmoni)”gi qaroriga asosan oʻz kuchini yoʻqotgan.

Mamlakatimizda jismoniy tarbiya va sportni qoʻllab-quvvatlash tizimini samarali shakllantirish, zamonaviy sport infratuzilmasini yaratish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Jismoniy tarbiya va sport sohasida davlat boshqaruvi tizimini tubdan takomillashtirish chora-tadbirlari toʻgʻrisida” 2018-yil 5-martdagi PF-5368-son Farmoni bilan Oʻzbekiston Respublikasi Jismoniy tarbiya va sport davlat qoʻmitasi huzuridagi Bolalar sportini rivojlantirish jamgʻarmasi va uning Qoraqalpogʻiston Respublikasi, viloyatlar va Toshkent shahridagi hududiy boʻlinmalari negizida Oʻzbekiston Respublikasi Jismoniy tarbiya va sport vazirligi huzuridagi Jismoniy tarbiya va sportni rivojlantirish jamgʻarmasi (keyingi oʻrinlarda Jamgʻarma deb ataladi) hamda uning Qoraqalpogʻiston Respublikasi, viloyatlar va Toshkent shahrida hududiy boʻlinmalari tashkil etilgani;

Oʻzbekiston Respublikasi Prezidentining “Oʻzbekiston Respublikasi Jismoniy tarbiya va sport vazirligini tashkil etish toʻgʻrisida” 2018-yil 5-martdagi PQ-3583-son qarori bilan trenerlik faoliyati bilan shugʻullanish uchun attestatsiyadan oʻtkazish va ruxsatnomalar berish, shuningdek, jismoniy tarbiya-sogʻlomlashtirish va sport inshootlarini pasportlashtirish hisobidan tushadigan mablagʻlarning bir qismi Oʻzbekiston Respublikasi Jismoniy tarbiya va sport vazirligi huzuridagi Jismoniy tarbiya va sportni rivojlantirish jamgʻarmasi mablagʻlarini shakllantirish manbalaridan biri hisoblanishi maʼlumot uchun qabul qilinsin.

2. Quyidagilar Oʻzbekiston Respublikasi Jismoniy tarbiya va sport vazirligi huzuridagi Jismoniy tarbiya va sportni rivojlantirish jamgʻarmasining asosiy vazifalari etib belgilansin:

jismoniy tarbiya va sportni rivojlantirishning moddiy bazasini shakllantirish uchun zarur mablagʻlar va moddiy vositalarni jamlash;

jismoniy tarbiya va sportni rivojlantirish tadbirlarini, shuningdek, jismoniy tarbiya-sogʻlomlashtirish hamda sport inshootlarini qurish, rekonstruksiya qilish va kapital taʼmirlashni, jumladan, ushbu maqsadlarda tijorat banklari tomonidan beriladigan kreditlar qoplanishini kafolatlash yoʻli bilan moliyalashtirish;

tumanlar (shaharlar) jismoniy tarbiya va sport boʻlimlari faoliyatini moliyalashtirish;

oʻziga yuklangan vazifalarni bajarish uchun tadbirkorlik subyektlari, nodavlat notijorat va boshqa tashkilotlar, investorlar, homiylar va donorlarning, shu jumladan chet ellik homiylar va donorlar mablagʻlarini jalb qilish;

sportchilar, trenyerlar va sport sohasining boshqa mutaxassislari ishtirok etadigan sport tadbirlarini moliyalashtirish;

sport taʼlim muassasalari va tashkilotlarini jahon standartlari hamda xalqaro sport tashkilotlari talablariga javob beradigan professional sport anjomlari va uskunalari, shuningdek, sport ekipirovkasi va kiyim-bosh bilan taʼminlash;

sport taʼlim muassasalari va tashkilotlarini, boshqa taʼlim muassasalarini sport anjomlari va uskunalari bilan jihozlash hamda qoʻshimcha jihozlash ishlarini tashkil etish;

isteʼdodli yosh sportchilarni, trenyerlar va sport sohasidagi boshqa mutaxassislarni qoʻllab-quvvatlash hamda ragʻbatlantirish;

qonunchilikda belgilangan tartibda fuqarolar yigʻinlari raislarining oʻrinbosarlari — yoshlar masalalari boʻyicha maslahatchilarini moddiy ragʻbatlantirish bilan bogʻliq xarajatlarni moliyalashtirishda ishtirok etish;

Jismoniy tarbiya va sportni rivojlantirish jamgʻarmasi mablagʻlari hisobidan sport obyektlarini qurishda rivojlangan xorijiy davlatlar tajribasini oʻrganish va respublika hududlarida quriladigan obyektlar loyihalariga tatbiq etish, shuningdek, sport obyektlaridan samarali foydalanishni tashkil etish maqsadida Jamgʻarma hamda qurilish va loyiha tashkilotlarining malakali mutaxassislarini xorijiy davlatlarga yuborishni hamda tajriba almashish uchun xorijdan mutaxassislarni jalb etishni tashkil etish;

sport taʼlim muassasalari va tashkilotlari, boshqa taʼlim muassasalarining moddiy-texnika bazasini mustahkamlash uchun Jamgʻarma mablagʻlarini yoʻnaltirish;

(2-band Oʻzbekiston Respublikasi Vazirlar Mahkamasining 2019-yil 15-yanvardagi 32-sonli qaroriga asosan oʻn birinchi va oʻn ikkinchi xatboshilar bilan toʻldirilgan — Qonun hujjatlari maʼlumotlari milliy bazasi, 16.01.2019-y., 09/19/32/2481-son)

jismoniy tarbiya va sport sohasini rivojlantirish, sport kadrlarini tayyorlashning oʻquv-mashgʻulot jarayonini takomillashtirish masalalarida xalqaro hamkorlikni yoʻlga qoʻyish maqsadida mutaxassislarning (trenyerlar, olimlar, oʻqituvchilar, shifokorlar, fiziologlar, diyetologlar va sport sohasidagi boshqa mutaxassislar) xorijiy davlatlarga tashriflarini tashkil etishga koʻmaklashish;

Oʻzbekiston futbol assotsiatsiyasining faoliyatini va unga yuklangan vazifalarni amalga oshirishda ishtirok etish;

Oʻzbekiston Respublikasi Jismoniy tarbiya va sport vazirligi markaziy apparatining moddiy-texnika bazasini mustahkamlash hamda xodimlarini moddiy ragʻbatlantirish bilan bogʻliq xarajatlarni moliyalashtirishga mablagʻlarni maqsadli ajratish.

3. Quyidagilar:

Oʻzbekiston Respublikasi Jismoniy tarbiya va sport vazirligi huzuridagi Jismoniy tarbiya va sportni rivojlantirish jamgʻarmasi toʻgʻrisidagi nizom 1-ilovaga muvofiq;

Oʻzbekiston Respublikasi Jismoniy tarbiya va sport vazirligi huzuridagi Jismoniy tarbiya va sportni rivojlantirish jamgʻarmasi Kuzatuv kengashining tarkibi 2-ilovaga muvofiq;

Oʻzbekiston Respublikasi Jismoniy tarbiya va sport vazirligi huzuridagi Jismoniy tarbiya va sportni rivojlantirish jamgʻarmasi Ijro etuvchi direksiyasining boshqaruv xodimlari cheklangan soni 20 nafar boʻlgan tuzilmasi 3-ilovaga muvofiq;

Oʻzbekiston Respublikasi Jismoniy tarbiya va sport vazirligi huzuridagi Jismoniy tarbiya va sportni rivojlantirish jamgʻarmasi hududiy boʻlinmalarining namunaviy tuzilmasi 4-ilovaga muvofiq;

jismoniy tarbiya-sogʻlomlashtirish va sport inshootlari pasportini rasmiylashtirish va berish uchun arizani koʻrib chiqish, shuningdek, jismoniy tarbiya-sogʻlomlashtirish va sport inshootlari pasportini rasmiylashtirish va berish uchun toʻlovlar miqdorlari 5 va 5a-ilovalarga muvofiq tasdiqlansin.

Oʻzbekiston Respublikasi Jismoniy tarbiya va sport vaziriga Jamgʻarmaning Ijro etuvchi direksiyasi tuzilmasiga boshqaruv xodimlari cheklangan soni doirasida oʻzgartirishlar kiritish huquqi berilsin.

4. Belgilansinki:

budjet tashkilotlari va budjet mablagʻlarini oluvchi tashkilotlarning jismoniy tarbiya-sogʻlomlashtirish yoki sport inshootlari pasportini berish uchun arizasini koʻrib chiqish, ushbu pasportni rasmiylashtirish va berish 100 foiz oldindan toʻlash sharti bilan amalga oshiriladi;

Oʻzbekiston Respublikasi Jismoniy tarbiya va sport davlat qoʻmitasi huzuridagi qayta tashkil etilayotgan Bolalar sportini rivojlantirish jamgʻarmasi va uning Qoraqalpogʻiston Respublikasi, viloyatlar hamda Toshkent shahridagi hududiy boʻlinmalarining barcha mol-mulki, shu jumladan mablagʻlari tegishli ravishda Jamgʻarma va uning hududiy boʻlinmalariga oʻtkaziladi;

Jamgʻarma Oʻzbekiston Respublikasi Jismoniy tarbiya va sport vazirligi bilan birgalikda ajratilayotgan mablagʻlardan samarali va maqsadli foydalanish boʻyicha nazoratni taʼminlaydi;

Oʻzbekiston Respublikasi Jismoniy tarbiya va sport vazirligi Jamgʻarmaning va uning hududiy boʻlinmalari faoliyatining samaradorligi yuzasidan doimiy monitoring olib boradi.

5. Oʻzbekiston Respublikasi Qurilish vazirligi Jamgʻarma mablagʻlari hisobidan quriladigan obyektlarda amalga oshiriladigan qurilish-montaj ishlarining sifati boʻyicha davlat arxitektura-qurilish nazoratini oʻrnatsin.

Qoraqalpogʻiston Respublikasi Vazirlar Kengashi Raisi hamda viloyatlar va Toshkent shahar hokimlariga ushbu obyektlarni oʻz vaqtida foydalanishga topshirish yuzasidan shaxsiy javobgarlik yuklatilsin.

(5-band Oʻzbekiston Respublikasi Vazirlar Mahkamasining 2019-yil 15-yanvardagi 32-sonli qarori tahririda — Qonun hujjatlari maʼlumotlari milliy bazasi, 16.01.2019-y., 09/19/32/2481-son)

6. Jamgʻarma Kuzatuv kengashi Oʻzbekiston Respublikasi Jismoniy tarbiya va sport vazirligi bilan birgalikda bir oy muddatda Jamgʻarmaning Ijro etuvchi direksiyasi hamda hududiy boʻlinmalarini malakali mutaxassislar bilan toʻldirishni, shuningdek, Jamgʻarma faoliyatini tashkil etish bilan bogʻliq boshqa masalalar hal etilishi taʼminlansin.

7. Jamgʻarma Toshkent shahri, A. Qodiriy koʻchasi, 2-uyda joylashtirilsin.

8. Oʻzbekiston Respublikasi Jismoniy tarbiya va sport vazirligi boshqa manfaatdor idoralar bilan birgalikda bir oy muddatda:

qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida takliflar kiritsin;

oʻzlari qabul qilgan normativ-huquqiy hujjatlarning mazkur qarorga muvofiqlashtirilishini taʼminlasin.

9. Oʻzbekiston Respublikasi Hukumatining 6-ilovaga muvofiq ayrim qarorlari oʻz kuchini yoʻqotgan deb hisoblansin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.A. Abduhakimov va Oʻzbekiston Respublikasi Jismoniy tarbiya va sport vaziri Sh.X. Isroilov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2018-yil 5-iyul,

507-son

Vazirlar Mahkamasining 2018-yil 5-iyuldagi 507-son qaroriga
1-ILOVA

Oʻzbekiston Respublikasi Jismoniy tarbiya va sport vazirligi huzuridagi Jismoniy tarbiya va sportni rivojlantirish jamgʻarmasi toʻgʻrisida

NIZOM

1-bob. Umumiy qoidalar

1. Ushbu Nizom Oʻzbekiston Respublikasi Jismoniy tarbiya va sport vazirligi huzuridagi Jismoniy tarbiya va sportni rivojlantirish jamgʻarmasining (keyingi oʻrinlarda Jamgʻarma deb ataladi) huquqiy maqomi, asosiy vazifalari, huquq va majburiyatlarini, faoliyatini tashkil etish, shuningdek, uning mablagʻlarini shakllantirish va ulardan foydalanishi tartibini belgilaydi.

2. Jamgʻarma oʻz faoliyatida Oʻzbekiston Respublikasi Konstitutsiyasi, Oʻzbekiston Respublikasi qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlariga, boshqa qonun hujjatlariga, Jamgʻarma Kuzatuv kengashi qarorlariga, shuningdek, ushbu Nizomga amal qiladi.

3. Jamgʻarma davlat muassasasi shaklidagi yuridik shaxs hisoblanadi, oʻzining mustaqil balansiga, Oʻzbekiston Respublikasi Moliya vazirligi Gʻaznachiligida gʻaznachilik hisob raqamlariga, shuningdek, tijorat banklarida hisob raqamlariga, shu jumladan xorijiy valyutadagi hisob raqamlariga, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga ega.

2-bob. Jamgʻarmaning asosiy vazifalari

4. Quyidagilar Jamgʻarmaning asosiy vazifalari hisoblanadi:

jismoniy tarbiya va sportni rivojlantirishning moddiy bazasini shakllantirish uchun zarur mablagʻlar va moddiy vositalarni jamlash;

tumanlar (shaharlar) jismoniy tarbiya va sport boʻlimlari faoliyatini moliyalashtirish;

sportchilar, trenyerlar va sport sohasining boshqa mutaxassislari ishtirok etadigan sport tadbirlarini moliyalashtirish;

sport taʼlim muassasalari va tashkilotlari, boshqa taʼlim muassasalarining moddiy-texnika bazasini mustahkamlash uchun Jamgʻarma mablagʻlarini yoʻnaltirish;

(4-band Oʻzbekiston Respublikasi Vazirlar Mahkamasining 2019-yil 15-yanvardagi 32-sonli qaroriga asosan sakkizinchi va toʻqqizinchi xatboshilar bilan toʻldirilgan — Qonun hujjatlari maʼlumotlari milliy bazasi, 16.01.2019-y., 09/19/32/2481-son)

sport taʼlim muassasalari va tashkilotlarini, boshqa taʼlim muassasalarini sport anjomlari va uskunalari bilan jihozlash hamda qoʻshimcha jihozlash ishlarini tashkil etish;

isteʼdodli yosh sportchilarni, trenyerlar va sport sohasidagi boshqa mutaxassislarni qoʻllab-quvvatlash hamda ragʻbatlantirish;

Oʻzbekiston futbol assotsiatsiyasining faoliyatini va unga yuklangan vazifalarni amalga oshirishda ishtirok etish;

3-bob. Jamgʻarma faoliyatini tashkil etish tartibi

5. Jamgʻarma Kuzatuv kengashi Jamgʻarmaning yuqori organi hisoblanadi va uning shaxsiy tarkibi Oʻzbekiston Respublikasi Vazirlar Mahkamasi tomonidan tasdiqlanadi.

Qoraqalpogʻiston Respublikasi, viloyatlar va Toshkent shahrida Jamgʻarma hududiy boʻlinmalarining hududiy Jamoat kengashlari tuziladi va ularning shaxsiy tarkibi tegishli ravishda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan tasdiqlanadi.

Oʻzbekiston Respublikasi Bosh vaziri Jamgʻarma Kuzatuv kengashining raisi, Qoraqalpogʻiston Respublikasi Vazirlar Kengashining Raisi hamda viloyatlar va Toshkent shahar hokimlari tegishli ravishda Jamgʻarma hududiy boʻlinmalarining hududiy Jamoat kengashlari raislari hisoblanadilar.

(5-band Oʻzbekiston Respublikasi Vazirlar Mahkamasining 2019-yil 15-yanvardagi 32-sonli qaroriga asosan ikkinchi va uchinchi xatboshilar bilan toʻldirilgan — Qonun hujjatlari maʼlumotlari milliy bazasi, 16.01.2019-y., 09/19/32/2481-son)

6. Jamgʻarma Kuzatuv kengashi:

Jamgʻarmaning daromad va xarajatlar smetasini belgilangan tartibda tasdiqlaydi;

chorak yakunlari boʻyicha Jamgʻarmaning daromadlari va mablagʻlari sarflanishi toʻgʻrisidagi hisobotlarni koʻrib chiqadi va tasdiqlaydi;

Oʻzbekiston Respublikasi Jismoniy tarbiya va sport vazirligi bilan kelishilgan holda, trenerlik faoliyati bilan shugʻullanish uchun attestatsiyadan oʻtkazish va ruxsatnomalar berish, shuningdek, jismoniy tarbiya-sogʻlomlashtirish va sport inshootlarini pasportlashtirish uchun tushadigan va moliyaviy-xoʻjalik faoliyati yakunlariga koʻra Jamgʻarmaga oʻtkaziladigan mablagʻlar hajmini belgilaydi;

Jamgʻarma mablagʻlaridan maqsadli va samarali foydalanilishini nazorat qiladi;

Jamgʻarma Ijro etuvchi direksiyasi xodimlarining mehnatga haq toʻlash shartlarini va Jamgʻarmani saqlash uchun mablagʻlarni cheklangan miqdorini belgilaydi;

qonunchilikda belgilangan boshqa vakolatlarni amalga oshiradi.

7. Jamgʻarma Kuzatuv kengashi Jamgʻarma ijro etuvchi direktori taqdimnomasiga asosan daromadlar va xarajatlar smetasiga oʻzgartirishlar kiritishi mumkin.

8. Jamgʻarma faoliyatini Jamgʻarmaning ijro etuvchi direktor boshqaradi.

Jamgʻarmaning ijro etuvchi direktori Oʻzbekiston Respublikasi jismoniy tarbiya va sport vaziri tomonidan, Kuzatuv kengashi raisi bilan kelishilgan holda lavozimga tayinlanadi va lavozimdan ozod etiladi.

(8-bandning ikkinchi xatboshisi Oʻzbekiston Respublikasi Vazirlar Mahkamasining 2019-yil 15-yanvardagi 32-sonli qarori tahririda — Qonun hujjatlari maʼlumotlari milliy bazasi, 16.01.2019-y., 09/19/32/2481-son)

9. Jamgʻarmaning ijro etuvchi direktori:

Oʻzbekiston Respublikasi Jismoniy tarbiya va sport vazirligi bilan kelishilgan holda, Jamgʻarma daromadlari va xarajatlari smetasini tayyorlaydi va tasdiqlash uchun Jamgʻarma Kuzatuv kengashiga taqdim etadi;

qonun hujjatlari va mazkur Nizom talablariga muvofiq Jamgʻarma faoliyatini tashkil etadi, xodimlarning cheklangan umumiy soni doirasida Ijro etuvchi direksiya shtatlar jadvalini shakllantiradi, Jamgʻarma nomidan shartnoma va boshqa hujjatlarni imzolaydi;

Oʻzbekiston Respublikasi Jismoniy tarbiya va sport vazirligi bilan birgalikda Jamgʻarma mablagʻlaridan maqsadli va samarali foydalanilishini tekshirishni tashkil etish hamda aniqlangan kamchiliklarni bartaraf etish boʻyicha zarur choralar koʻradi;

har chorakda Jamgʻarma Kuzatuv kengashiga Jamgʻarma mablagʻlarining sarflanishi haqida hisobot taqdim etadi;

Jamgʻarma mablagʻlari tushumlarini koʻpaytirish va ulardan samarali foydalanish boʻyicha takliflar tayyorlaydi;

Jamgʻarmaning hududiy boʻlinmalari bilan birgalikda Jamgʻarmaga yuklangan vazifalar va funksiyalar sifatli hamda oʻz vaqtida bajarilishini taʼminlash uchun javob beradi;

Jamgʻarmaning hududiy boʻlinmalarning shtatlar jadvali va xarajatlar smetasini tasdiqlaydi;

(9-band Oʻzbekiston Respublikasi Vazirlar Mahkamasining 2019-yil 15-yanvardagi 32-sonli qaroriga asosan sakkizinchi xatboshi bilan toʻldirilgan — Qonun hujjatlari maʼlumotlari milliy bazasi, 16.01.2019-y., 09/19/32/2481-son)

qonunchilikka muvofiq boshqa vakolatlarni ham amalga oshiradi.

10. Jamgʻarma Ijro etuvchi direksiyasi Jamgʻarma Kuzatuv kengashiga va Oʻzbekiston Respublikasi Jismoniy tarbiya va sport vazirligiga hisobot beradi.

Jamgʻarmaning Qoraqalpogʻiston Respublikasi, viloyatlar va Toshkent shahridagi hududiy boʻlinmalari ikki tomonlama boʻysunadi — Jamgʻarmaning Ijro etuvchi direksiyasiga va Qoraqalpogʻiston Respublikasi Jismoniy tarbiya va sport vazirligi, viloyatlar va Toshkent shahar jismoniy tarbiya va sport boshqarmalariga.

(10-bandning ikkinchi xatboshisi Oʻzbekiston Respublikasi Vazirlar Mahkamasining 2019-yil 15-yanvardagi 32-sonli qarori tahririda — Qonun hujjatlari maʼlumotlari milliy bazasi, 16.01.2019-y., 09/19/32/2481-son)

Jamgʻarmaning hududiy boʻlinmalari rahbarligiga nomzodlar Qoraqalpogʻiston Respublikasi jismoniy tarbiya va sport vaziri, viloyatlar va Toshkent shahar jismoniy tarbiya va sport boshqarmalari boshliqlari tomonidan tavsiya etiladi va Jamgʻarmaning ijro etuvchi direktori tomonidan lavozimga tayinlanadi.

(10-bandning uchinchi xatboshisi Oʻzbekiston Respublikasi Vazirlar Mahkamasining 2019-yil 15-yanvardagi 32-sonli qarori tahririda — Qonun hujjatlari maʼlumotlari milliy bazasi, 16.01.2019-y., 09/19/32/2481-son)

4-bob. Jamgʻarma mablagʻlarini shakllantirish tartibi

11. Quyidagilar Jamgʻarma mablagʻlarini shakllantirish manbalari hisoblanadi:

xayriya tashkilotlari, xususiy tadbirkorlar, jismoniy va yuridik shaxslar, shu jumladan Oʻzbekiston Respublikasi norezidentlari tomonidan oʻtkaziladigan homiylik oʻtkazmalari;

Oʻzbekiston Respublikasi Davlat budjeti mablagʻlari;

moliya-xoʻjalik faoliyat natijalariga koʻra 2018-yil 1-iyundan boshlab, trenerlik faoliyati bilan shugʻullanish uchun attestatsiyadan oʻtkazish va ruxsatnomalar berish, shuningdek, jismoniy tarbiya-sogʻlomlashtirish va sport inshootlarini pasportlashtirish hisobidan tushadigan mablagʻlarning bir qismi;

qonun hujjatlarida taqiqlanmagan boshqa tushumlar.

12. Jamgʻarmaning kelgusi yilda rejalashtirilayotgan chora-tadbirlar boʻyicha daromadlari va xarajatlari smetasi Oʻzbekiston Respublikasi Jismoniy tarbiya va sport vazirligi bilan kelishilgan holda, Jamgʻarma ijro etuvchi direktori taqdimnomasiga binoan Jamgʻarma Kuzatuv kengashi tomonidan joriy yilning 25-dekabriga qadar tasdiqlanadi.

5-bob. Jamgʻarma mablagʻlaridan foydalanish tartibi

13. Jamgʻarma ijro etuvchi direktori Jamgʻarma mablagʻlari tasarruf etuvchi hisoblanadi.

14. Jamgʻarma mablagʻlaridan Jamgʻarma Kuzatuv kengashi tomonidan tasdiqlangan Jamgʻarma daromadlari va xarajatlari smetasiga muvofiq foydalaniladi.

Bunda Oʻzbekiston Respublikasining davlat rivojlanish dasturlariga kiritilgan obyektlarni qurish, rekonstruksiya qilish va kapital taʼmirlash ishlari Oʻzbekiston Respublikasi Vazirlar Mahkamasi huzuridagi Oʻzbekiston Respublikasini rivojlantirish davlat dasturlarini moliyalashtirish jamgʻarmasi orqali moliyalashtiriladi.

15. Jamgʻarma mablagʻlaridan jismoniy tarbiya va sportni rivojlantirish sohasidagi dasturlar va loyihalarni moliyalashtirish (birgalikda moliyalashtirish) uchun foydalanilishi mumkin.

Jamgʻarmaning hududiy boʻlinmalari tomonidan rejadan ortiq yigʻilgan mablagʻlar, boʻsh mablagʻlarni depozit hisob raqamlariga joylashtirishdan olingan daromad va boshqa mablagʻlar Jamgʻarma bilan kelishilgan holda ishlatiladi.

(15-band Oʻzbekiston Respublikasi Vazirlar Mahkamasining 2019-yil 15-yanvardagi 32-sonli qaroriga asosan ikkinchi xatboshi bilan toʻldirilgan — Qonun hujjatlari maʼlumotlari milliy bazasi, 16.01.2019-y., 09/19/32/2481-son)

6-bob. Jamgʻarmaning huquqlari va majburiyatlari

16. Jamgʻarma oʻziga yuklangan vazifalarni bajarish uchun quyidagi huquqlarga ega:

davlat boshqaruvi organlari va mahalliy ijro etuvchi hokimiyati organlaridan Jamgʻarma vakolatlariga kiruvchi masalalarni hal etish uchun zarur axborotlarni belgilangan tartibda soʻrash va olish;

oʻz gʻaznachilik hisob raqamlarida, shuningdek, tijorat banklaridagi hisob raqamlarida ushbu Nizomning 10-bandida belgilangan manbalardan kelib tushadigan mablagʻlarni jamgʻarish;

Jamgʻarma tomonidan ajratiladigan mablagʻlardan maqsadli foydalanilishini nazorat qilish, qoidabuzarliklar aniqlangan taqdirda moliyalashtirishni toʻxtatish yoki ajratilgan mablagʻlarni qaytarib olish;

vaqtinchalik boʻsh mablagʻlarni likvidli moliyaviy vositalarga (depozitlar, qimmatli qogʻozlar, obligatsiyalar va shu kabilarga) joylashtirish;

jismoniy tarbiya va sportni rivojlantirish sohasidagi aniq loyihalar uchun mablagʻlar ajratilishida shartlarni belgilash;

oldiga qoʻyilgan vazifalarni amalga oshirish uchun shartnomalarni, shu jumladan xorijiy hamkorlar bilan tuzish;

jismoniy tarbiya va sportni rivojlantirishning dolzarb masalalari boʻyicha tashabbuslarni Oʻzbekiston Respublikasi Jismoniy tarbiya va sport vazirligiga belgilangan tartibda kiritish;

Jamgʻarma vakolatiga kiruvchi masalalar boʻyicha xalqaro hamkorlikni amalga oshirish.

Jamgʻarma qonunchilikka muvofiq boshqa huquqlarga ham ega boʻlishi mumkin.

17. Jamgʻarma quyidagilarga majbur:

qonun hujjatlarida va mazkur Nizomda belgilangan vazifalarni bajarilishini taʼminlash;

oʻz faoliyati toʻgʻrisida, shu jumladan ommaviy axborot vositalari orqali xabardor qilish;

Jamgʻarma mablagʻlaridan maqsadli va samarali foydalanishini nazorat qilish;

Jamgʻarma daromadlarining istiqbolli koʻrsatkichlarini bajarish samaradorligini tahlil qilish, aniqlangan kamchiliklarni bartaraf etish boʻyicha tegishli choralar koʻrish.

Jamgʻarma qonunchilikda belgilangan boshqa majburiyatlarga ham ega boʻlishi mumkin.

7-bob. Hisobga olish, hisobot va nazorat

18. Jamgʻarma har yili qonunchilikka muvofiq moliyaviy hisobot tayyorlaydi. Jamgʻarmaning moliyaviy hisoboti moliyaviy yil yakunlangandan soʻng auditorlik tashkilotlari tomonidan majburiy tartibda tekshiriladi. Moliyaviy hisobot, auditorlik xulosasi va rahbariyatga xat har yili 1-maydan kech boʻlmagan muddatda Jamgʻarma kuzatuv Kengashiga taqdim etiladi. Jamgʻarmaning moliyaviy hisoboti va auditorlik xulosasi Jamgʻarma kuzatuv Kengashi tomonidan tasdiqlanganidan soʻng Jamgʻarmaning rasmiy veb-saytida joylashtiriladi.

Oʻzbekiston Respublikasi Jismoniy tarbiya va sport vazirligi Jamgʻarma rahbariyati va uning hududiy boʻlinmalarining oʻzlariga yuklangan vazifalarni samarali bajarish boʻyicha faoliyatining doimiy monitoringini olib boradi.

Jamgʻarma mablagʻlaridan maqsadli foydalanish qonunchilikka va mazkur Nizomga muvofiq nazorat qilinadi.

8-bob. Yakunlovchi qoidalar

19. Jamgʻarma qonunchilikda belgilangan tartibda qayta tashkil etiladi va tugatiladi.

20. Mazkur Nizom talablari buzilishida aybdor boʻlgan shaxslar qonunchilikka muvofiq javob beradilar.

Vazirlar Mahkamasining 2018-yil 5-iyuldagi 507-son qaroriga
2-ILOVA

Oʻzbekiston Respublikasi Jismoniy tarbiya va sport vazirligi huzuridagi Jismoniy tarbiya va sportni rivojlantirish jamgʻarmasi Kuzatuv kengashining

TARKIBI

1. A. Aripov	—	Oʻzbekiston Respublikasining Bosh vaziri, Kengash raisi
2. A. Abduxakimov	—	Oʻzbekiston Respublikasi Bosh vazirining oʻrinbosari, Kengash raisi oʻrinbosari
3. D. Nabiyev	—	Oʻzbekiston Respublikasi jismoniy tarbiya va sport vaziri
4. U. Axmadjonov	—	Milliy olimpiya qoʻmitasi raisi
5. B. Xodjayev	—	Oʻzbekiston Respublikasi iqtisodiyot vaziri
6. A. Haydarov	—	Oʻzbekiston Respublikasi moliya vazirining birinchi oʻrinbosari
7. A. Tuxtayev	—	Oʻzbekiston Respublikasi qurilish vaziri
8. S. Bekenov	—	Oʻzbekiston Respublikasi Investitsiyalar boʻyicha davlat qoʻmitasi raisining birinchi oʻrinbosari
9. Lavozimiga koʻra	—	Oʻzbekiston Respublikasi Jismoniy tarbiya va sport vazirligi huzuridagi Jismoniy tarbiya va sportni rivojlantirish jamgʻarmasining ijro etuvchi direktori, Kengash kotibi

Izoh: Kengash aʼzolari boshqa ishga oʻtgan taqdirda, uning tarkibiga ushbu lavozimlarga yangidan tayinlangan shaxslar yoxud zimmasiga tegishli funksiyalarni bajarish yuklangan shaxslar kiritiladi.

Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari tegishli ravishda hududiy boʻlinmalarning Kuzatuv kengashi raislari hisoblanadi va hududiy Kuzatuv kengashi aʼzolari tarkibini tasdiqlaydi.

(2-ilovaning matni Oʻzbekiston Respublikasi Vazirlar Mahkamasining 2019-yil 15-yanvardagi 32-sonli qarori tahririda — Qonun hujjatlari maʼlumotlari milliy bazasi, 16.01.2019-y., 09/19/32/2481-son)

Vazirlar Mahkamasining 2018-yil 5-iyuldagi 507-son qaroriga
3-ILOVA

Oʻzbekiston Respublikasi Jismoniy tarbiya va sport vazirligi huzuridagi Jismoniy tarbiya va sportni rivojlantirish jamgʻarmasi Ijro etuvchi direksiyasining

TUZILMASI

Boshqaruv xodimlarining cheklangan umumiy soni — 20 nafar.

Texnik va xizmat koʻrsatuvchi xodimlar shtat birliklari soni belgilangan meʼyorlar asosida belgilanadi.

Vazirlar Mahkamasining 2018-yil 5-iyuldagi 507-son qaroriga
4-ILOVA

Oʻzbekiston Respublikasi Jismoniy tarbiya va sport vazirligi huzuridagi Jismoniy tarbiya va sportni rivojlantirish jamgʻarmasi hududiy boʻlinmalarining

NAMUNAVIY TUZILMASI

Boshqaruv xodimlarining cheklangan umumiy soni — 7 nafar.

Texnik va xizmat koʻrsatuvchi xodimlar shtat birliklari soni belgilangan meʼyorlar asosida belgilanadi.

Vazirlar Mahkamasining 2018-yil 5-iyuldagi 507-son qaroriga
5-ILOVA

Jismoniy tarbiya-sogʻlomlashtirish va sport inshootlari pasportini rasmiylashtirish va berish uchun arizani koʻrib chiqish boʻyicha

YIGʻIM MIQDORI

Xizmat nomi	Bazaviy hisoblash miqdorlarida yigʻim miqdori
Arizani koʻrib chiqish	1

Izoh: Oʻzbekiston Respublikasi Yagona interaktiv davlat xizmatlari portali orqali murojaat qilinganda belgilangan summaning 90 foizi miqdorida yigʻim undiriladi.

Oʻzbekiston Respublikasi Yagona interaktiv davlat xizmatlari portali orqali murojaat qilinganda yigʻimning 11,25 foizi — “Oʻzbekiston Respublikasi Prezidenti huzuridagi Loyiha boshqaruvi milliy agentligi qoshidagi Elektron hukumat va raqamli iqtisodiyot loyihalarini boshqarish markazi” DUKning vakolatli bankdagi maxsus hisob raqamiga oʻtkaziladi, yigʻimning 10 foizi — Oʻzbekiston Respublikasi Adliya vazirligi huzuridagi Davlat xizmatlari agentligining budjetdan tashqari jamgʻarmasining shaxsiy hisob raqamiga oʻtkaziladi.

Davlat xizmatlari markazlariga murojaat qilinganda yigʻimning 20 foizi Oʻzbekiston Respublikasi Adliya vazirligi huzuridagi Davlat xizmatlari agentligining budjetdan tashqari jamgʻarmasining shaxsiy hisob raqamiga oʻtkaziladi.

(izoh Oʻzbekiston Respublikasi Vazirlar Mahkamasining 2020-yil 14-yanvardagi 24-sonli qarori tahririda — Qonun hujjatlari maʼlumotlari milliy bazasi, 15.01.2020-y., 09/20/24/0053-son)

Vazirlar Mahkamasining 2018-yil 5-iyuldagi 507-son qaroriga
5a-ILOVA

Jismoniy tarbiya-sogʻlomlashtirish va sport inshootlari pasportini rasmiylashtirish va berish uchun

YIGʻIMLAR MIQDORI

Inshoot toifasi	Bazaviy hisoblash miqdorlarida yigʻim miqdori
Oliy	36
Birinchi	30
Ikkinchi	15
Uchinchi	12
Toʻrtinchi	6 (2*)
Beshinchi	12

* Oʻzbekiston Respublikasi Jismoniy tarbiya va sport vazirligi, Xalq taʼlimi vazirligi, Oliy va oʻrta maxsus taʼlimi vazirligi hamda respublika oliy taʼlim muassasalarining sport inshootlari uchun.

(5a-ilova Oʻzbekiston Respublikasi Vazirlar Mahkamasining 2019-yil 28-dekabrdagi 1046-sonli qarori tahririda — Qonun hujjatlari maʼlumotlari milliy bazasi, 29.12.2019-y., 09/19/1046/4242-son)

Vazirlar Mahkamasining 2018-yil 5-iyuldagi 507-son qaroriga
6-ILOVA

Oʻzbekiston Respublikasi Hukumatining oʻz kuchini yoʻqotgan deb hisoblanayotgan ayrim qarorlari

ROʻYXATI

1. Vazirlar Mahkamasining “Oʻzbekiston Respublikasi Jismoniy tarbiya va sport davlat qoʻmitasi huzuridagi bolalar sportini rivojlantirish jamgʻarmasi faoliyatini tashkil etish toʻgʻrisida” 2004-yil 29-avgustdagi 410-son qarori (Oʻzbekiston Respublikasi QT, 2004-y., 8-son, 88-modda).

2. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida” 2005-yil 6-iyuldagi 156-son qaroriga (Oʻzbekiston Respublikasi QT, 2005-y., 6-7-son, 35-modda) ilovaning 27-bandi.

3. Vazirlar Mahkamasining “Oʻzbekiston Respublikasi Xalq taʼlimi vazirligi huzurida Multimedia umumtaʼlim dasturlarini rivojlantirish markazini tashkil etish chora-tadbirlari toʻgʻrisida” 2006-yil 7-iyundagi 110-son qarorining (Oʻzbekiston Respublikasi QHT, 2006-y., 23-son, 208-modda) 8-bandi.

4. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida” (Oʻzbekiston Respublikasi Prezidentining “Fan va texnologiyalar rivojlanishini muvofiqlashtirish va boshqarishni takomillashtirish chora-tadbirlari toʻgʻrisida” 2006-yil 7-avgustdagi PQ-436-son qarori) 2006-yil 2-oktabrdagi 207-son qaroriga (Oʻzbekiston Respublikasi QT, 2006-y., 10-son, 73-modda) 1-ilovaning 21-bandi.

5. Vazirlar Mahkamasining “Oʻzbekiston Respublikasi Hukumatining vazirliklar, davlat qoʻmitalari va idoralar toʻgʻrisidagi nizomlarni tasdiqlash boʻyicha ayrim qarorlariga oʻzgartirish va qoʻshimchalar kiritish haqida” 2010-yil 5-iyundagi 108-son qaroriga (Oʻzbekiston Respublikasi QHT, 2010-y., 6-son, 27-modda) ilovaning 53-bandi.

6. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida” (Vazirlar Mahkamasining “Maktabdan tashqari taʼlim tizimini yanada takomillashtirish chora-tadbirlari toʻgʻrisida” 2011-yil 28-fevraldagi 50-son hamda “Xalq taʼlimi hududiy organlari tuzilmasini takomillashtirish toʻgʻrisida” 2011-yil 1-martdagi 52-son qarorlari)” 2011-yil 20-iyundagi 183-son qaroriga (Oʻzbekiston Respublikasi QT, 2011-y., 6-son, 55-modda) ilovaning 8-bandi.

7. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasining “Jismoniy tarbiya va sport davlat qoʻmitasi faoliyatini tashkil etish toʻgʻrisida” 2017-yil 15-fevraldagi PQ-2779-son qarori)” 2017-yil 16-maydagi 288-son qaroriga (Oʻzbekiston Respublikasi QHT, 2017-y., 20-son, 367-modda) ilovaning 7-bandi.

8. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasi Prezidentining “Oʻzbekiston Respublikasi Jismoniy tarbiya va sport davlat qoʻmitasining markaziy apparati tuzilmasiga oʻzgartirishlar kiritish toʻgʻrisida” 2017-yil 29-iyuldagi PQ-3162-son qarori)” 2017-yil 13-sentabrdagi 720-son qaroriga (Oʻzbekiston Respublikasi QHT, 2017-y., 37-son 1002-modda) ilovaning 1-bandi.

9. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish, shuningdek, baʼzi qarorlarini oʻz kuchini yoʻqotgan deb hisoblash toʻgʻrisida” (Oʻzbekiston Respublikasi Prezidentining “Toʻqimachilik va tikuv-trikotaj sanoatini jadal rivojlantirish chora-tadbirlari toʻgʻrisida” 2017-yil 14-dekabrdagi PF-5285-son Farmoni)” 2018-yil 2-martdagi 164-son qaroriga (Oʻzbekiston Respublikasi QT, 2018-y., 3-son, 49-modda) 1-ilovaning 2-bandi.

(Qonun hujjatlari maʼlumotlari milliy bazasi, 06.07.2018-y., 09/18/507/1465-son; 16.01.2019-y., 09/19/32/2481-son; 29.12.2019-y., 09/19/1046/4242-son; 15.01.2020-y., 09/20/24/0053-son)