O‘zbekiston Respublikasi Oliy Majlisining “Arxivlar to‘g‘risida”gi O‘zbekiston Respublikasi Qonunini amalga kiritish haqida” 1999-yil 15-apreldagi 769-I-son qarorini bajarish maqsadida Vazirlar Mahkamasi qaror qiladi:

1. Quyidagilar:

O‘zbekiston Respublikasi Milliy arxiv fondi to‘g‘risida Nizom 1-ilovaga muvofiq;

O‘zbekiston Respublikasi Milliy arxiv fondi hujjatlarini davlat ro‘yxatidan o‘tkazish Tartibi 2-ilovaga muvofiq;

O‘zbekiston Respublikasi davlat hokimiyati va boshqaruvi organlari, korxonalar, muassasalar va tashkilotlardagi idoraviy arxiv to‘g‘risida Namunaviy nizom 4-ilovaga muvofiq tasdiqlansin.

2. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, vazirliklar va idoralar, davlat qo‘mitalari, korporatsiyalar, konsernlar, uyushmalar, kompaniyalar o‘z me’yoriy hujjatlarini “Arxiv to‘g‘risida”gi O‘zbekiston Respublikasi Qonuniga va mazkur qaror bilan tasdiqlangan arxiv ishi bo‘yicha me’yoriy hujjatlarga muvofiqlashtirsinlar.

3. Quyidagilar:

O‘zbekiston SSR Ministrlar Sovetining “Respublikada arxiv ishini boshqarish sxemasi to‘g‘risida” 1988-yil 31-oktabrdagi 389-son qarorining 1-bandi;

O‘zbekiston Respublikasi Vazirlar Mahkamasining “O‘zbekiston Respublikasi Vazirlar Mahkamasi huzuridagi Bosh arxiv boshqarmasi (“O‘zbosharxiv”) to‘g‘risidagi Nizom va respublika markaziy davlat arxivlari tarmog‘ini tasdiqlash haqida” 1992-yil 19-iyundagi 296-son qarori o‘z kuchini yo‘qotgan deb hisoblansin.

4. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari H.S. Karomatov zimmasiga yuklansin.

1. Mazkur Nizom “Arxiv ishi to‘g‘risida”gi O‘zbekiston Respublikasi Qonuniga muvofiq O‘zbekiston hududida mavjud bo‘lgan barcha arxiv hujjatlarining to‘liq qamrab olinishini ta’minlashga, O‘zbekiston Respublikasi Milliy arxiv fondining yaxlitligini saqlab qolishga va fuqarolar, jamiyat va davlatning ijtimoiy, madaniy, ilmiy va boshqa ehtiyojlarini qondirish maqsadida arxiv hujjatlarini ro‘yxatdan o‘tkazish, jamlash, ekspertizadan o‘tkazish, hisobga olish, saqlash hamda ulardan foydalanishning yagona tartibini belgilashga qaratilgandir.

O‘zbekiston Respublikasi Milliy arxiv fondi — O‘zbekiston xalqining moddiy va ma’naviy hayotini aks ettirgan, tarixiy, ilmiy, ijtimoiy, iqtisodiy, siyosiy va madaniy ahamiyatga ega bo‘lgan arxiv hujjatlarining tarixan tarkib topgan va doimo boyitib boriladigan majmui.

Milliy arxiv fondi Milliy arxiv fondining davlatga tegishli qismi va davlatga tegishli bo‘lmagan qismidan iborat.

2. Milliy arxiv fondining davlatga tegishli qismini quyidagilar tashkil etadi:

2.1 O‘zbekiston Respublikasi tarkibiga kiruvchi hududdagi mavjud va o‘zining barcha tarixi davomida mavjud bo‘lgan davlat yuridik shaxslari:

— davlat hokimiyati va boshqaruvining oliy, respublika va mahalliy, fuqarolarning o‘zini o‘zi boshqarish organlari, prokuraturalar, sudlar, banklarning;

— sanoat, transport, aloqa, kapital qurilish, qishloq xo‘jaligi va xalq xo‘jaligining boshqa tarmoqlari, fan, xalq ta’limi, madaniyat sohasidagi davlat korxonalari, muassasalari, tashkilotlar va birlashmalarning;

— ustav kapitalida davlat mulki bo‘lgan aralash mulkchilik shakllaridagi korxonalar, tashkilotlar va birlashmalarning;

— vatanimizning chet elda bo‘lgan va (yoki) chet eldagi davlat korxonalari, muassasalari, tashkilotlari va birlashmalarining faoliyatida paydo bo‘lgan arxiv hujjatlari;

2.2. Kasaba uyushmalari, siyosiy tashkilotlar, ijodiy va boshqa jamoat tashkilotlari, birlashmalarning O‘zbekiston Respublikasi qonunchiligiga muvofiq ro‘yxatdan o‘tgunga qadar o‘z faoliyatlarida paydo bo‘lgan hujjatlari, din davlatdan ajratilgungacha bo‘lgan davrga tegishli diniy muassasalarning arxiv hujjatlari;

2.3 O‘zbekiston Respublikasi hududida harakatda bo‘lgan barcha darajadagi harbiy qismlar boshqarmalari va shtablari, qo‘shilmalar va birlashmalar, o‘quv muassasalari va boshqa milliy muhofaza qilish va xavfsizlik muassasalari, tashkilotlari, armiya, chegara va ichki qo‘shinlarning arxiv hujjatlari;

2.4. Qonuniy asosda davlat mulkiga, shu jumladan, chet ellardan kelib tushgan yoki ularga berilgan yuridik va jismoniy shaxslarning arxiv hujjatlari;

2.5. Arxiv hujjatlarining asl nusxasi, shuningdek, davlat mulkiga chet ellardan qonuniy asosda kelib tushgan arxiv hujjatlari nusxalari.

3. Milliy arxiv fondining davlatga tegishli qismi tarkibiga qonun hujjatlari, boshqaruv, loyiha, konstruktorlik, maxsus hujjatlar, shuningdek ularning boshqa moddiy jismlardagi yozuvlari, dasturlar, algoritmlar va mashina yo‘naltirilgan (mexanografik) hujjatlar, kinofotofono hujjatlar, videofonogrammalar, ilmiy, adabiy, badiiy, musiqiy qo‘lyozmalar va boshqa qo‘lyozmalar, rasmlar, kundaliklar, xotiranomalar, yozishmalar hamda fuqarolar, jamiyat va davlat uchun ahamiyatli bo‘lganligi uchun saqlanishi kerak bo‘lgan, kimning tasarrufida ekanligidan qat’i nazar, davlat mulki bo‘lgan hujjatlarning boshqa toifalari kiradi.

4. Davlat korxonalari, muassasalari va tashkilotlarining hujjatlari Vazirlar Mahkamasi tomonidan belgilanadigan tartibda O‘zbekiston Respublikasi Adliya vazirligi huzuridagi “O‘zarxiv” agentligi va uning Qoraqalpog‘iston Respublikasi, viloyatlar va Toshkent shahridagi arxiv ishi bo‘yicha hududiy boshqarmalari, shuningdek ularga idoraviy mansub davlat arxivlari tomonidan Milliy arxiv fondining davlatga tegishli qismi tarkibiga kiritiladi. O‘zbekiston Respublikasi Adliya vazirligi huzuridagi “O‘zarxiv” agentligi davlat tomonidan saqlanishi kerak bo‘lgan hujjatlarning namunaviy ro‘yxatlarini, shu jumladan saqlash muddatlarini ko‘rsatgan holda tasdiqlaydi.

5. Quyidagilar Milliy arxiv fondining davlatga tegishli qismi hujjatlarini doimiy saqlaydilar:

5.1 O‘zbekiston Respublikasining davlat arxivlari — tegishli yo‘nalishdagi hujjatlar bilan ishlash bo‘yicha respublika ilmiy-uslubiy markazlar, jumladan: O‘zbekiston Milliy arxivi, O‘zbekiston Ilmiy-texnika va tibbiyot hujjatlari milliy arxivi va O‘zbekiston Kinofotofono hujjatlari milliy arxivi — davlat hokimiyati va boshqaruvi respublika organlari, O‘zbekiston Respublikasi Prokuraturasi, sudlari, Markaziy banki va respublikaning boshqa banklari, korxonalari, muassasalari, tashkilotlari va birlashmalarining hujjatlari, shuningdek, saqlash uchun ilgari qabul qilingan arxiv fondlari va arxiv hujjatlari;

5.2 Qoraqalpog‘iston Respublikasi va Toshkent shahar markaziy davlat arxivlari, viloyatlar, shaharlar, tumanlar davlat arxivlari va ularning filiallari — mahalliy davlat hokimiyati va boshqaruvi organlari, Qoraqalpog‘iston Respublikasi, viloyatlar, shaharlar, tumanlar prokuraturalari va sudlari, ularning hududlaridagi korxonalar, muassasalar, tashkilotlar va birlashmalarning arxiv hujjatlari, shuningdek, saqlash uchun ilgari qabul qilingan arxiv fondlari va arxiv hujjatlari;

5.3. Milliy arxiv fondining davlatga tegishli qismi tarkibiga kiritilgan arxiv hujjatlarini doimiy (muddatsiz) saqlashni amalga oshiradigan vazirliklar va idoralarning (ilovaga muvofiq) — tegishli ixtisosdagi arxiv fondlari va arxiv hujjatlari;

5.4. Davlat muzeylari va kutubxonalari — qonuniy asosda davlat mulkiga kiruvchi yuridik va jismoniy shaxslarning arxiv hujjatlari, shuningdek davlat tomonidan saqlash uchun ilgari qabul qilingan arxiv fondlari va arxiv hujjatlari.

6. O‘zbekiston milliy arxivlari O‘zbekiston Respublikasi Prezidenti tomonidan, markaziy davlat arxivlari tegishli ravishda O‘zbekiston Respublikasi Vazirlar Mahkamasi va Qoraqalpog‘iston Respublikasi Vazirlar Kengashi tomonidan tuziladi.

Viloyatlar, shaharlar, tumanlar davlat arxivlari va ularning filiallari tegishli ravishda Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlarining qarori bilan tuziladi.

7. Qoraqalpog‘iston Respublikasi, viloyatlar va Toshkent shahar arxiv ishi hududiy boshqarmalari to‘g‘risidagi nizomlar Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlari bilan kelishgan holda, O‘zbekiston Respublikasi Adliya vazirligi huzuridagi “O‘zarxiv” agentligi direktori tomonidan tasdiqlanadi. O‘zbekiston milliy arxivlari to‘g‘risidagi nizomlar Adliya vazirligi huzuridagi “O‘zarxiv” agentligi direktori tomonidan tasdiqlanadi.

Qoraqalpog‘iston Respublikasi Markaziy davlat arxivi, Toshkent shahar markaziy davlat arxivi hamda viloyatlar, shaharlar, tumanlar davlat arxivlari va ularning filiallari, shuningdek, shaxsiy tarkib hujjatlari davlat arxivlari to‘g‘risidagi nizomlar Adliya vazirligi huzuridagi “O‘zarxiv” agentligi tomonidan tasdiqlanadigan namunaviy nizom asosida ishlab chiqiladi hamda tegishli mahalliy ijro etuvchi hokimiyat organlari bilan kelishgan holda, Qoraqalpog‘iston Respublikasi, viloyatlar va Toshkent shahar arxiv ishi hududiy boshqarmalari tomonidan tasdiqlanadi.

Milliy arxiv fondining davlatga tegishli qismi tarkibiga kiritilgan arxiv hujjatlarini doimiy (muddatsiz) saqlashni amalga oshiradigan vazirliklar va idoralarning arxivlari to‘g‘risidagi nizomlar O‘zbekiston Respublikasi Vazirlar Mahkamasi tomonidan tasdiqlangan Idoraviy arxiv to‘g‘risidagi Namunaviy nizomga asosan ishlab chiqiladi va O‘zbekiston Respublikasi Adliya vazirligi huzuridagi “O‘zarxiv” agentligi bilan kelishilgan holda ularning rahbarlari tomonidan tasdiqlanadi.

8. Milliy arxiv fondining davlatga tegishli qismi hujjatlarini vaqtincha saqlashni davlat hokimiyati va boshqaruvi organlari, fuqarolarning o‘zini o‘zi boshqarish organlari, qo‘shma (davlat ishtirokidagi) korxonalar, davlat korxonalari, muassasalari, tashkilotlari va birlashmalari, ular tomonidan tashkil etiladigan idoraviy, birlashgan idoraviy, idoralararo arxivlar quyidagi muddatlarda amalga oshiradilar:

— davlat hokimiyati va boshqaruv organlari, O‘zbekiston Respublikasi Hukumati tomonidan tashkil etiladigan xo‘jalik boshqaruvi organlari, O‘zbekiston Respublikasi prokuraturasi, sudlari, banklari, respublikaga bo‘ysunuvchi davlat korxonalari, muassasalari, tashkilotlari va birlashmalarining arxiv hujjatlari — 15 yil mobaynida;

— mahalliy davlat hokimiyati organlari va Qoraqalpog‘iston Respublikasi, viloyatlar, shaharlar va tumanlar davlat boshqaruvi organlari, prokuraturasi, sudlari, banklarining tegishli hududiy bo‘linmalari va viloyatga bo‘ysunuvchi korxonalar, muassasalar, tashkilotlar va birlashmalarning arxiv hujjatlari — 10 yil mobaynida;

— tuman va shaharga bo‘ysunuvchi davlat korxonalari, muassasalari va tashkilotlarining arxiv hujjatlari — 5 yil mobaynida;

— fuqarolik holati dalolatnomalari yozuvlari, shaxsiy tarkib bo‘yicha hujjatlar, notarial harakatlar yozuvlari, sud ishlari, xo‘jalik kitoblari — 75 yil mobaynida, agar qonunchilikda o‘zgacha hol nazarda tutilmagan bo‘lsa;

— qo‘shma (davlat ishtirokidagi) korxonalar, tashkilotlar va mulkchilikning aralash shakllaridagi birlashmalar faoliyatini amalga oshirishda paydo bo‘lgan arxiv hujjatlari — 10 yil mobaynida;

— ilmiy, texnologik, konstruktorlik va patent hujjatlari — 20 yil mobaynida;

— kapital qurilish bo‘yicha loyiha hujjatlari — 25 yil mobaynida;

— telemetrik hujjatlar — 5 yil mobaynida;

— ovozli yozuvlar, videoyozuvlar, kinolentalar, fotosuratlar, fotografiya plyonkalari tayyorlangan vaqtdan boshlab — ko‘pi bilan 3 yil;

— mashinada o‘qiladigan hujjatlar — 5 yil mobaynida;

— maxfiy hujjatlar — 30 yil mobaynida.

Idoraviy saqlov muddati tugagan maxfiy hujjatlar maxfiylikdan chiqarish nuqtai nazaridan ko‘rib chiqilgandan so‘ng davlat arxivi saqloviga belgilangan tartibda topshiriladi.

Boshqaruv hujjati tarkibiga kiruvchi fotosuratlar, ovoz yozilgan lentalar ushbu hujjatlarni saqlash uchun nazarda tutilgan muddatlar mobaynida saqlanadi.

Ilmiy-texnika hujjatlari tarkibiga kiradigan kino va suratovozli hujjatlar, ovozli va video yozuvlar, mashina omilidagi hujjatlar ilmiy-texnika hujjatlarini saqlash uchun nazarda tutilgan muddatlar mobaynida saqlanadi.

Fuqarolar va jamiyat (davlat) o‘rtasida xizmat, mehnat va ijtimoiy-huquqiy munosabatlar to‘g‘risidagi shaxsiy tarkib bo‘yicha hujjatlar saqlanishini ta’minlash maqsadida tegishli hokimliklar tomonidan shaxsiy tarkib hujjatlari davlat arxivlari tuziladi.

Idoraviy arxivlarda vaqtincha saqlanayotgan O‘zbekiston Respublikasi Milliy arxiv fondi hujjatlarini ro‘yxatdan o‘tkazishni O‘zbekiston Respublikasi Vazirlar Mahkamasi tomonidan tasdiqlangan tartibga muvofiq davlat arxivlari amalga oshiradilar.

9. Milliy arxiv fondining davlatga tegishli qismi tarkibiga kiritilgan arxiv hujjatlarini doimiy (muddatsiz) saqlashni amalga oshiradigan vazirliklar va idoralar (ilovaga muvofiq) O‘zbekiston Respublikasi Milliy arxiv fondi hujjatlarini O‘zbekiston Respublikasi Adliya vazirligi huzuridagi “O‘zarxiv” agentligida ro‘yxatdan o‘tkazadilar, O‘zbekiston Respublikasi Adliya vazirligi huzuridagi “O‘zarxiv” agentligi bilan kelishib olingan idoraviy me’yoriy hujjatlar asosida arxiv hujjatlarini jamlash, hisobga olish, saqlash va ulardan foydalanishni amalga oshiradilar.

10. O‘zbekiston Respublikasi, Qoraqalpog‘iston Respublikasi, viloyatlar, shaharlar, tumanlar davlat hokimiyati va boshqaruvi, prokuraturalar, sudlar, banklar, fuqarolarning o‘zini o‘zi boshqarish organlari, davlat, qo‘shma (davlat ishtirokidagi) korxonalar, muassasalar, tashkilotlar va birlashmalar O‘zbekiston Respublikasi Adliya vazirligi huzuridagi “O‘zarxiv” agentligi arxiv ishi hududiy boshqarmalari, O‘zbekiston milliy arxivlari va davlat arxivlari qoidalari va yo‘riqnomalariga muvofiq doimiy saqlashga berish uchun Milliy arxiv fondining davlatga tegishli qismi hujjatlari jamlanishini, hisobga olinishini, saqlanishini, tanlanishini va tayyorlanishini ta’minlaydilar, O‘zbekiston Respublikasi Adliya vazirligi huzuridagi “O‘zarxiv” agentligi arxiv ishi hududiy boshqarmalari, O‘zbekiston milliy arxivlari va davlat arxivlari bilan kelishgan holda ish yuritish xizmatlari va idoraviy arxivlar ishini belgilovchi me’yoriy-uslubiy hujjatlarni ishlab chiqadilar va tasdiqlaydilar; arxiv hujjatlari saqlanishi uchun javob beradilar.

11. Vaqtincha saqlashning oxirgi muddatlari tugashi bilan Milliy arxiv fondining davlatga tegishli qismi hujjatlari tartibga solingan va ishlov berilgan holda tegishli ilmiy-ma’lumot apparati va elektron nusxalari, alohida qimmatli va noyob hujjatlarga sug‘urta nusxalari bilan doimiy saqlash uchun tegishli davlat arxivlariga beriladi.

Hujjatlarni tayyorlash va doimiy saqlashga berish, shuningdek, sug‘urta nusxalarini tartibga keltirish va doimiy saqlashga topshirish, shuningdek, elektron hamda sug‘urta nusxalarini tayyorlash, hujjatlarni tashish bilan bog‘liq barcha ishlar topshiruvchi va O‘zbekiston Respublikasi, Qoraqalpog‘iston Respublikasi, viloyatlar, shaharlar va tumanlar davlat hokimiyati va boshqaruvi, prokuraturalar, sudlar, banklar, fuqarolarning o‘zini o‘zi boshqarish organlari, davlat, qo‘shma (davlat ishtirokidagi) korxonalar, muassasalar, tashkilotlar va birlashmalar mablag‘lari hisobiga bajariladi.

Tegishli hududiy boshqarma yoki davlat arxivi tomonidan doimiy saqlanadigan yig‘majildlar uchun ro‘yxatlar tasdiqlangandan va shaxsiy tarkib bo‘yicha yig‘majildlar uchun ro‘yxatlar kelishib olingandan so‘ng saqlash muddati tugagan hujjatlar ularning elektron shakllari davlat arxiviga qabul qilingach, Adliya vazirligi huzuridagi “O‘zarxiv” agentligi tomonidan belgilangan tartibda yo‘q qilinadi.

12. O‘zbekiston Respublikasi, Qoraqalpog‘iston Respublikasi, viloyatlar, shaharlar va tumanlar davlat hokimiyati va boshqaruvi organlari, prokuraturalar, sudlar, banklar, fuqarolarning o‘zini o‘zi boshqarish organlari, davlat, qo‘shma (davlat ishtirokidagi) korxonalar, muassasalar va tashkilotlar qayta tashkil etilganda, shuningdek ularning mulkchilik shakllari o‘zgargan hollarda ular o‘z faoliyatlarini amalga oshirishda paydo bo‘lgan arxiv hujjatlari tartibga keltirilgan holatda tegishli davlat arxivlari bilan kelishgan holda ko‘rsatib o‘tilgan hujjatlarga davlat mulk egaligi saqlangan holda huquqiy vorislarga beriladi.

Korxonalar, muassasalar va tashkilotlar tugatilgan taqdirda ularning arxiv hujjatlari qonunchilikda belgilangan tartibda tegishli davlat arxivlariga beriladi.

Hujjatlarning saqlanishini ta’minlash maqsadida va ularning bundan buyon saqlash joyi to‘g‘risidagi masalani hal etish uchun yig‘majildlar va mulklarni berish uchun tuzilgan komissiyalar tarkibiga O‘zbekiston Respublikasi Adliya vazirligi huzuridagi “O‘zarxiv” agentligi hududiy boshqarmalari va davlat arxivlarining vakillari kiritiladi.

13. Milliy arxiv fondining davlatga tegishli qismi hujjatlari davlat tasarrufidan chiqarish, xususiylashtirish, oldi-sotdi yoki boshqa xil bitishuvlar obyekti bo‘lolmaydi.

Davlat korxonalari, muassasalari va tashkilotlari davlat tasarrufidan chiqarilgan va xususiylashtirilgan taqdirda ularning arxiv hujjatlari, shu jumladan shaxsiy tarkib bo‘yicha hujjatlar davlat mulk egaligida qoladi va belgilangan tartibda davlat arxivlariga beriladi.

14. Milliy arxiv fondining davlatga tegishli qismi hujjatlari, saqlanish joyi, manba turi, axborotni mustahkamlash texnikasi va usulidan qat’i nazar, davlat hisobida turishi shart. Ushbu hujjatlarni davlat hisobiga olish tartibi O‘zbekiston Respublikasi Vazirlar Mahkamasi tomonidan belgilanadi.

O‘zbekiston Respublikasi, Qoraqalpog‘iston Respublikasi, viloyatlar, shaharlar va tumanlar davlat hokimiyati va boshqaruvi, prokuraturalar, sudlar, banklar, fuqarolarning o‘zini o‘zi boshqarish organlari, davlat, qo‘shma (davlat ishtirokidagi) korxonalar, muassasalar, tashkilotlar va birlashmalar O‘zbekiston Respublikasi Milliy arxiv fondi hujjatlarining to‘liqligi, ishonchliligi va hisob bo‘yicha ma’lumotlarni taqdim etish muddatlariga rioya qilinishi uchun belgilangan tartibda javob beradilar.

15. Milliy arxiv fondining davlatga tegishli qismi hujjatlari O‘zbekiston Respublikasi Adliya vazirligi huzuridagi “O‘zarxiv” agentligi davlat arxivlarida, davlat muzeylarida, kutubxonalarida, idoraviy arxivlarda fondlar, kolleksiyalar, saqlash birliklari (yig‘majildlar) bo‘yicha saqlanadi va hisobga olinadi.

16. Milliy arxiv fondining davlatga tegishli qismi hujjatlari foydalanish uchun barcha yuridik va jismoniy shaxslarga beriladi.

Davlat va idoraviy arxivlar yuridik va jismoniy shaxslarga quyidagi xizmat turlarini ko‘rsatadilar: saqlanayotgan arxiv fondlari va arxiv hujjatlari to‘g‘risida axborot berish, arxivlar o‘quv zallarida ishlayotgan tadqiqotchilarga xizmat ko‘rsatish, hujjatlardan belgilangan tartibda tasdiqlangan nusxalar va ko‘chirmalar tayyorlash, ijtimoiy-huquqiy tusdagi ma’lumotnomalarni belgilangan tartibda berish, ko‘rgazmalar, ekskursiyalar tashkil etish, hujjatlarning ro‘yxatini tuzish, arxiv yig‘majildlarni vaqtinchalik foydalanish uchun yuridik shaxslarga berish.

Xizmatlar ko‘rsatish yuridik yoki jismoniy shaxslarning yozma so‘rovlari asosida amalga oshiriladi va ish yuritish yo‘riqnomasiga muvofiq jurnallarda ro‘yxatdan o‘tkaziladi.

Arxiv yig‘majildlari va hujjatlar faqat arxiv rahbarining yozma ruxsatnomasiga asosan ko‘rsatiladi. Sud tomonidan muomala layoqati cheklangan yoki muomalaga layoqatsiz deb topilgan shaxslarga arxiv hujjatlaridan foydalanishga ruxsat berilmaydi. Shaxsning sud tomonidan muomala layoqati cheklangan yoki muomalaga layoqatsiz deb topilganligi davlat arxivlari tomonidan idoralararo elektron tizimlar orqali aniqlanadi. Voyaga yetmaganlar davlat arxivlari o‘quv zallariga ota-onalari yoki tartibga rioya etishga mas’ul boshqa qonuniy vakillari bilan kiritiladi.

Arxivlar tomonidan pulli xizmatlar ham ko‘rsatiladi. Pulli xizmatlar ko‘rsatish tartibi O‘zbekiston Respublikasi Vazirlar Mahkamasi tomonidan tasdiqlanadi.

Pulli xizmatlar shartnomalarga muvofiq ko‘rsatiladi, ularda xizmatlarning hajmi va turi, bajarish muddati va to‘lov tartibi kelishib olinadi.

Xizmatlar preyskurantlari belgilangan tartibda tegishli vazirliklar va idoralar bilan kelishilgan holda Adliya vazirligi huzuridagi “O‘zarxiv” agentligi tomonidan ishlab chiqiladi va tasdiqlanadi.

17. Davlat siri va qonun bilan muhofaza qilinadigan boshqa sirlarni, shuningdek, fuqarolarning huquqlari va qonuniy manfaatlarini himoya qilish bilan bog‘liq Milliy arxiv fondining davlatga tegishli qismi hujjatlaridan foydalanishni cheklash O‘zbekiston Respublikasining amaldagi qonunchiligi bilan belgilanadi.

Alohida qimmatli va noyob hujjatlardan, shuningdek, jismoniy holati qoniqarsiz bo‘lgan hujjatlardan foydalanishni cheklashga yo‘l qo‘yiladi. Bunday hollarda O‘zbekiston Respublikasi Adliya vazirligi huzuridagi “O‘zarxiv” agentligi muassasalari, davlat muzeylari va kutubxonalari, idoraviy arxivlar ko‘rsatib o‘tilgan hujjatlardan foydalanish fondini tuzadilar.

18. Sir saqlash muddati tugashi munosabati bilan yoki O‘zbekiston Respublikasining qonun hujjatlariga muvofiq sirli xususiyatini yo‘qotgan Milliy arxiv fondining davlatga tegishli qismi hujjatlarini oshkor qilish O‘zbekiston Respublikasi Adliya vazirligi huzuridagi “O‘zarxiv” agentligi muassasalari, davlat muzeylari va kutubxonalari, idoraviy arxivlar tomonidan fond tashkil etuvchi muassasalar mutaxassislari yoki ularning merosxo‘rlari bilan birgalikda amalga oshiriladi.

19. Milliy arxiv fondining davlatga tegishli bo‘lmagan qismini nodavlat korxonalar, muassasalar va tashkilotlar faoliyati natijasida tashkil etilgan arxiv hujjatlari, shuningdek jismoniy shaxslarning shaxsiy arxiv hujjatlari tashkil etadi.

O‘zbekiston Respublikasining jamoat tashkilotlari to‘g‘risidagi qonunchiligiga muvofiq ro‘yxatdan o‘tkazilgan paytdan boshlab jamoat birlashmalari va tashkilotlaridagi yuridik va jismoniy shaxslarning, shu jumladan, kasaba uyushmalari, xayriya jamg‘armalari va boshqa jamg‘armalar, siyosiy partiyalar va harakatlar, diniy birlashmalar va tashkilotlarning;

nodavlat birlashmalari (kompaniyalar, korporatsiyalar, konsernlar, uyushmalar, aksiyadorlik jamiyatlari)dagi sanoat korxonalari, muassasalari va tashkilotlari, qishloq xo‘jaligi va iqtisodiyotning boshqa tarmoqlari, fan, madaniyat, ta’lim, ijtimoiy soha, ommaviy axborot vositalarining;

jismoniy shaxslardagi (shaxsiy hujjatlar, oilaviy arxivlar, hujjatlar kolleksiyasi va boshqalar) nodavlat yuridik va jismoniy shaxslarning arxiv fondlari va arxiv hujjatlaridan tashkil topadi.

20. Hujjatlarni O‘zbekiston Respublikasi Milliy arxiv fondining davlatga tegishli bo‘lmagan qismi tarkibiga o‘tkazish yoki hujjatlarni undan chiqarish O‘zbekiston Respublikasi Adliya vazirligi huzuridagi “O‘zarxiv” agentligi organlari va muassasalari tomonidan nodavlat yuridik va jismoniy shaxslar bilan birgalikda ularning hujjatlari qimmati ekspertiza qilingandan so‘ng amalga oshiriladi.

Ekspert-tekshirish komissiyasining hujjatlarni O‘zbekiston Respublikasi Milliy arxiv fondining davlatga tegishli bo‘lmagan qismiga o‘tkazish to‘g‘risidagi qarori tasdiqlangandan so‘ng ko‘rsatilgan qarorni tasdiqlagan O‘zbekiston Respublikasi Adliya vazirligi huzuridagi “O‘zarxiv” agentligi organi yoki muassasasi O‘zbekiston Respublikasi Milliy arxiv fondi hujjatlarini davlat ro‘yxatidan o‘tkazish to‘g‘risidagi tartibga muvofiq ro‘yxatdan o‘tkazish guvohnomasini rasmiylashtiradi.

21. O‘zbekiston Respublikasi Milliy arxiv fondining davlatga tegishli bo‘lmagan qismi hujjatlarini saqlovchi nodavlat yuridik va jismoniy shaxslar O‘zbekiston Respublikasi Adliya vazirligi huzuridagi “O‘zarxiv” agentligi organlari va muassasalari so‘rovlariga ko‘ra ularni davlat hisobiga qo‘yish maqsadida o‘zlarining arxiv fondlari va arxiv hujjatlari to‘g‘risidagi ma’lumotlarni taqdim etadilar.

Milliy arxiv fondining davlatga tegishli bo‘lmagan qismi hujjatlari egalari va (yoki) saqlash joyi almashganda nodavlat yuridik va jismoniy shaxslar O‘zbekiston Respublikasi Adliya vazirligi huzuridagi “O‘zarxiv” agentligi organi va muassasasini ushbu hujjatlarning yangi egasi va ularning bundan keyingi saqlanish joyi to‘g‘risida xabardor qiladilar.

22. Milliy arxiv fondining davlatga tegishli bo‘lmagan qismiga tegishli deb topilgan hujjatlarning egalari bo‘lgan nodavlat yuridik va jismoniy shaxslar ushbu hujjatlar shu maqsadlarda tashkil etiladigan arxivlar yoki idoraviy arxivlarda, shuningdek jismoniy shaxslarning shaxsiy arxiv hujjatlari tarkibida doimiy saqlanishini ta’minlaydilar.

Doimiy muddatda saqlanadigan hujjatlar yo‘q qilinmaydi. Shaxsiy tarkib bo‘yicha hujjatlar (ish staji, ish haqi, o‘qish, mukofotlash to‘g‘risidagi hujjatlar va boshqa hujjatlar) O‘zbekiston Respublikasi Adliya vazirligi huzuridagi “O‘zarxiv” agentligi organlari va muassasalari bilan kelishilmasdan nodavlat yuridik va jismoniy shaxslar tomonidan yo‘q qilinishi mumkin emas.

23. Nodavlat yuridik va jismoniy shaxslar o‘z hujjatlarini davlat mulki qilib-davlat arxivlari, muzeylar va kutubxonalarda saqlashga berishlari mumkin. Bunday ishlar bitim (shartnoma) bilan, zarur hollarda hujjatlarni saqlash va ulardan foydalanish shartlari aniqlangan holda, rasmiylashtiriladi.

Nodavlat korxonalar, muassasalar, tashkilotlar va birlashmalar tugatilganda yoki shaxsiy arxiv hujjatlari egasi vafot etganda, vorislar va qonuniy merosxo‘rlar bo‘lmaganda ularning hujjatlari davlat mulkiga o‘tkazilib, doimiy saqlash uchun davlat arxivlariga topshiriladi.

Nodavlat yuridik shaxslarni davlat ro‘yxatidan o‘tkazuvchi organlar qonunchilikka muvofiq talab qilinadigan boshqa hujjatlarga qo‘shimcha ravishda ularning arxiv fondi O‘zbekiston Respublikasi Adliya vazirligi huzuridagi “O‘zarxiv” agentligi muassasalariga o‘tkazilganligini tasdiqlovchi hujjat mavjud bo‘lgan taqdirda ularni davlat ro‘yxatidan chiqarish to‘g‘risida qaror qabul qiladilar.

24. Nodavlat yuridik va jismoniy shaxslar Milliy arxiv fondining davlatga tegishli bo‘lmagan qismi hujjatlarini vaqtinchalik, shu jumladan, depozitar saqlashga davlat arxivlariga, muzeylarga va kutubxonalarga berishlari mumkin.

Milliy arxiv fondining davlatga tegishli bo‘lmagan qismi hujjatlarini vaqtincha, shu jumladan, depozitar saqlashga berish shartlari va tartibi hujjat egalari bilan davlat arxivlari, muzeylar va kutubxonalar o‘rtasida tuzilgan bitimlar (shartnomalar)da belgilanadi.

25. Milliy arxiv fondining davlatga tegishli bo‘lmagan qismi sotiladigan hollarda davlat arxivlari ularni sotib olish uchun imtiyozli huquqqa ega bo‘ladi. Hujjat egalari, kimoshdi savdosi tashkilotchilari, savdo-vositachilik tashkilotlari bo‘lajak sotishgacha kechi bilan bir oy oldin u to‘g‘risida aniq sotish vaqti va joyi ko‘rsatilgan holda O‘zbekiston Respublikasi Adliya vazirligi huzuridagi “O‘zarxiv” agentligi organlari va muassasalariga xabar berishlari zarur.

26. O‘zbekiston Respublikasi Adliya vazirligi huzuridagi “O‘zarxiv” agentligi organlari va muassasalari nodavlat yuridik va jismoniy shaxslarning iltimosiga ko‘ra ularning arxiv hujjatlarini jamlashda, hisobga olishda, saqlashda va ulardan foydalanishda uslubiy yordam ko‘rsatadilar. Nodavlat yuridik va jismoniy shaxslar bilan kelishilganiga ko‘ra O‘zbekiston Respublikasi Adliya vazirligi huzuridagi “O‘zarxiv” agentligi muassasalari ularning arxivlariga hujjatlarni ilmiy-texnik ishlov berish, ish yuritish bo‘yicha me’yoriy hujjatlarni ishlab chiqish, yig‘majildlarni ta’mirlash va muqovalash, arxiv hujjatlaridan foydalanish yuzasidan pulli xizmatlar ko‘rsatishlari, shuningdek, nodavlat arxivlariga boshqacha ko‘maklashishlari mumkin.

27. O‘zbekiston Respublikasi Milliy arxiv fondi to‘g‘risida Nizom talablarini buzgan nodavlat yuridik va jismoniy shaxslar qonun hujjatlarida belgilangan tartibda javob beradilar.

O‘zbekiston Respublikasi Prezidenti Administratsiyasi;

O‘zbekiston Respublikasi Milliy gvardiyasi;

O‘zbekiston Respublikasi Mudofaa vazirligi;

O‘zbekiston Respublikasi Favqulodda vaziyatlar vazirligi;

O‘zbekiston Respublikasi Ichki ishlar vazirligi;

O‘zbekiston Respublikasi Tashqi ishlar vazirligi;

O‘zbekiston Respublikasi Investitsiyalar va tashqi savdo vazirligi;

O‘zbekiston Respublikasi Prezidentining Davlat xavfsizligi xizmati;

O‘zbekiston Respublikasi Davlat xavfsizlik xizmati;

O‘zbekiston Respublikasi Mudofaa vazirligi huzuridagi Mudofaa sanoati agentligi;

O‘zbekiston Respublikasi Davlat bojxona qo‘mitasi;

O‘zbekiston Respublikasi Davlat geologiya va mineral resurslar qo‘mitasining Davlat geologiya fondi;

O‘zbekiston Respublikasi Gidrometeorologiya xizmati markazi;

O‘zbekiston standartlashtirish, metrologiya va sertifikatlashtirish agentligining davlat standartlari tarmoq fondi;

O‘zbekiston Respublikasi Davlat soliq qo‘mitasi huzuridagi Kadastr agentligining kartografiya-geodeziya fondi;

O‘zbekiston Respublikasi Fanlar akademiyasi;

O‘zbekiston Respublikasi Madaniyat vazirligi muzeylari va kutubxonalari;

1. O‘zbekiston Respublikasi Milliy arxiv fondi hujjatlarini davlat ro‘yxatidan o‘tkazish ularni davlat tomonidan hisobga olish va saqlashni nazorat qilishni ta’minlash maqsadida amalga oshiriladi.

2. O‘zbekiston Respublikasi Milliy arxiv fondiga belgilangan tartibda o‘tkazilgan barcha hujjatlar, ular saqlanish joyi va mulkchilik shakllaridan qat’i nazar, davlat ro‘yxatidan o‘tkazilishi kerak.

3. O‘zbekiston Respublikasi Milliy arxiv fondi hujjatlarini davlat ro‘yxatidan o‘tkazishni O‘zbekiston Respublikasi Adliya vazirligi huzuridagi “O‘zarxiv” agentligi (keyingi o‘rinlarda — “O‘zarxiv” agentligi deb ataladi) va u vakolat bergan arxiv muassasalari amalga oshiradi.

4. O‘zbekiston Respublikasi Milliy arxiv fondi hujjatlari egasiga (keyingi o‘rinlarda — egasiga deyiladi) hujjatlar davlat ro‘yxatidan o‘tkazilgandan so‘ng yagona namunadagi O‘zbekiston Respublikasi Milliy arxiv fondi hujjatlarini davlat ro‘yxatidan o‘tkazish guvohnomasi beriladi (1-ilova). Ro‘yxatdan o‘tkazish guvohnomalari blanklarini hisobga olish, saqlash va ulardan foydalanganlik to‘g‘risida hisobot berish tartibi “O‘zarxiv” agentligi tomonidan belgilanadi.

Ro‘yxatdan o‘tkazish guvohnomasi ham alohida hujjatga, ham hujjatlar majmuiga (saqlash birligiga (yig‘majild), kolleksiya, fond, fondlar guruhi, arxiv va boshqalar)ga rasmiylashtirilishi mumkin.

Ro‘yxatdan o‘tkazish guvohnomasi berilganligi to‘g‘risida O‘zbekiston Respublikasi Milliy arxiv fondi hujjatlarini davlat ro‘yxatidan o‘tkazish daftariga yozib qo‘yiladi (2-ilova). Ushbu daftarni yuritish tartibi “O‘zarxiv” agentligi tomonidan belgilanadi.

5. Quyidagilar ro‘yxatdan o‘tkazish guvohnomasi berish uchun asos hisoblanadi:

O‘zbekiston Respublikasining 1999-yil 15-aprelda qabul qilingan “Arxivlar to‘g‘risida”gi 768-I-sonli Qonuni amalga kiritilishi vaqtida hujjatlarning O‘zbekiston Respublikasi Adliya vazirligi huzuridagi “O‘zarxiv” agentligining Milliy arxiv fondi Davlat katalogida davlat hisobida turishi;

— qonunchilikka muvofiq tashkil etilgan ekspert-tekshirish komissiyasi qarori;

— hujjatlarni idoraviy saqlashni tashkil etish to‘g‘risidagi ro‘yxatdan o‘tkazish yilining 1-yanvarigacha bo‘lgan statistika hisobotining mavjudligi;

— hujjatlarga mulkka egalik huquqining boshqa shaxslarga o‘tkazilishida ularning sobiq egasida ro‘yxatdan o‘tkazish guvohnomasi mavjudligi.

6. Quyidagi hollarda ro‘yxatdan o‘tkazish guvohnomasi bekor qilinadi yoki qayta rasmiylashtiriladi:

— ro‘yxatdan o‘tkazilgan hujjatlarning egasi ularga berilgan mulkka egalik huquqini boshqa shaxsga bersa yoki sud qaroriga ko‘ra ushbu hujjatlarga mulkka egalik huquqidan mahrum etilsa;

— “O‘zarxiv” agentligi organlari va muassasalari ekspert-tekshirish komissiyalari qaroriga ko‘ra fuqaroning mulki hisoblanadigan hujjatlar yoki ro‘yxatdan o‘tkazilgan hujjatlarning bir qismi O‘zbekiston Respublikasi Milliy arxiv fondidan chiqarilsa va davlat hisobidan olib tashlansa.

7. O‘zbekiston Respublikasining 1999-yil 15-aprelda qabul qilingan “Arxivlar to‘g‘risida”gi 768-I-sonli Qonuni amalga kiritilishi vaqtida O‘zbekiston Respublikasi Milliy arxiv fondining hujjatlari davlat hisobida va arxiv hujjatlarini doimiy saqlash huquqi berilgan respublika davlat arxivlarida, vazirliklar, idoralar, tarmoq davlat fondlari va tashkilotlar boshqa davlat saqlash joylarida bo‘lgan bo‘lsa, ularni davlat ro‘yxatidan o‘tkazish har bir arxiv bo‘yicha Milliy arxiv fondining Davlat katalogi davlat hisobi ma’lumotlari asosida “O‘zarxiv” agentligi tomonidan amalga oshiriladi. Bunda ro‘yxatdan o‘tkazish guvohnomasida davlatga tegishli hujjatlarning umumiy soni ko‘rsatib qo‘yiladi.

8. O‘zbekiston Respublikasi, Qoraqalpog‘iston Respublikasi, viloyatlar, shaharlar, tumanlarning ishlab turgan davlat hokimiyati va boshqaruvi, fuqarolarning o‘zini o‘zi boshqarish organlari, korxonalar, muassasalar, tashkilotlarning arxiv hujjatlari O‘zbekiston Respublikasining 1999-yil 15-aprelda qabul qilingan “Arxivlar to‘g‘risida”gi 768-I-sonli Qonuni amalga kiritilishi vaqtida davlat hisobida turgan bo‘lsa, ularni davlat ro‘yxatidan o‘tkazish, ushbu hujjatlar saqlanayotgan har bir arxiv (arxiv filiallari) bo‘yicha umumiy belgilangan hisobga olish ma’lumotlari (idoraviy saqlashni tashkil etish to‘g‘risidagi statistika hisobotlari) asosida “O‘zarxiv” agentligi organlari va muassasalari tomonidan amalga oshiriladi.

9. Agar O‘zbekiston Respublikasining 1999-yil 15-aprelda qabul qilingan “Arxivlar to‘g‘risida”gi 768-I-sonli Qonuni amalga kiritilishi vaqtida davlatga tegishli bo‘lmagan hujjatlar davlat hisobida turgan bo‘lsa, ularga ro‘yxatdan o‘tkazish guvohnomasi, hujjatlarning turgan joyidan qat’i nazar, ushbu hujjatlar egasiga yoki uning qonuniy vakiliga beriladi.

10. Arxiv muassasalarida saqlanayotgan hujjatlarga rasmiylashtirilgan ro‘yxatdan o‘tkazish guvohnomasi (hujjatlarni saqlashga rejali ravishda har yili kelib tushishi, hujjatlar qimmatini ekspertiza qilish xulosasi asosida O‘zbekiston Respublikasi Milliy arxiv fondidan hujjatlarning bir qismi chiqarib tashlanishi, ular yig‘majildlarining bir qismi boshqa arxiv muassasalariga berilishi natijasida) ko‘rsatib o‘tilgan hujjatlar soni o‘zgarganda qayta rasmiylashtirilmaydi. Ro‘yxatdan o‘tkazish guvohnomasining amalda bo‘lishi arxiv muassasasida saqlanayotgan va davlat hisobida turgan barcha hujjatlarga joriy etiladi.

11. Ekspert-tekshirish komissiyasining hujjatlarni O‘zbekiston Respublikasi Milliy arxiv fondiga o‘tkazish to‘g‘risidagi qarori tasdiqlangandan so‘ng “O‘zarxiv” agentligining ko‘rsatib o‘tilgan qarorni tasdiqlagan organi yoki muassasasi ushbu hujjatlarga ro‘yxatdan o‘tkazish guvohnomasini rasmiylashtiradi. Guvohnoma hujjat egasiga yoki uning qonuniy vakiliga doimiy saqlanadigan tasdiqlangan hujjatlar ro‘yxatining nusxasi bilan birga beriladi.

O‘zarxiv hujjatlarini doimiy (muddatsiz) saqlaydigan vazirliklar va idoralar ro‘yxatiga kiritilgan davlat boshqaruv organlari O‘zbekiston Respublikasi Milliy arxiv fondi hujjatlarini bir vaqtning o‘zida fond kartochkalarini “O‘zarxiv” agentligining Milliy arxiv fondi Davlat katalogi va hujjatlar ro‘yxatdan o‘tkazish yilining 1-yanvariga idoraviy saqlanishini tashkil etish to‘g‘risidagi statistika hisoboti uchun taqdim etgan holda ro‘yxatdan o‘tkazadilar.

12. Ro‘yxatdan o‘tkazib bo‘lingan hujjatlarni saqlayotgan davlat arxiviga, muzeyga, kutubxonaga saqlash uchun tushayotgan O‘zbekiston Respublikasi Milliy arxiv fondi hujjatlariga takroriy guvohnoma berilmaydi. Bunday hollarda ularga hujjatlar davlat hisobiga qabul qilingan paytdan boshlab ilgari berilgan ro‘yxatdan o‘tkazish guvohnomasining amal qilishi tatbiq etiladi.

13. O‘zbekiston Respublikasi Milliy arxiv fondiga kiruvchi hujjatlarning egasi ro‘yxatdan o‘tkazish guvohnomasini ushbu guvohnomani rasmiylashtirgan arxiv muassasasiga:

— hujjatlarga egalik huquqining boshqa shaxslarga o‘tkazilishida yoki egalik huquqidan mahrum qilinganda;

— hujjatlarni saqlash joyi va sharoitlari o‘zgarganda;

— hujjatlar noyob hujjat yodgorliklariga o‘tkazilganda;

— foydalanish fondi nusxalari tayyorlanganda, hujjatlardan foydalanishga cheklashlar belgilanganda va hujjatlardan foydalanish shartlariga boshqacha o‘zgartirishlar bo‘lganda;

— takomillashtirilgan va ularga ilmiy-ma’lumotnoma apparati yaratilganda;

— ro‘yxatdan o‘tkazilgan hujjatlarning nusxalari xorijga olib chiqilganda;

— o‘z mulkidagi hujjatlar O‘zbekiston Respublikasi Milliy arxiv fondidan chiqarib tashlanganda;

— guvohnomalarni rasmiylashtirishda xatolar aniqlanganda yoki ular foydalanish uchun yaroqsiz bo‘lib qolgan hollarda taqdim etishi kerak.

14. Ro‘yxatdan o‘tkazilgan guvohnomalar:

— yo‘qotib qo‘yilganda;

— unga qo‘shimcha yozuvlar, tuzatishlar kiritilganda yoki yaroqsiz bo‘lib qolganda haqiqiy emas deb hisoblanadi.

15. Arxiv muassasasi egasi murojaat qilganda murojaat qilingan kunda, ma’lumotlarni tekshirish yoki aniqlash zarur bo‘lganda esa — uch kun muddatda ro‘yxatdan o‘tkazish guvohnomasiga o‘zgartirish kiritilishi, qayta rasmiylashtirilishi yoki u bekor qilinishi kerak.

Zarurat bo‘lganda arxiv muassasasi hujjat egasidan uning shaxsini yoki vakilning vakolatini tasdiqlovchi hujjatlarni, shuningdek, ro‘yxatdan o‘tkazish guvohnomasiga o‘zgartirishlar kiritish uchun asos bo‘lib hisoblanadigan boshqa hujjatlarni talab qilishga haqlidir.

16. Ro‘yxatdan o‘tkazish guvohnomasi yo‘qotib qo‘yilgan yoki u tuzatib bo‘lmaydigan darajada yaroqsiz bo‘lib qolgan hollarda tegishli arxiv muassasasi uning egasi arizasiga ko‘ra yoki o‘z tashabbusi bilan mazkur qoidaga muvofiq takroriy guvohnoma (dublikat) beradi.

17. O‘zbekiston Respublikasi Milliy arxiv fondi hujjatlarini davlat ro‘yxatidan o‘tkazish masalalariga doir arxiv muassasalari va hujjatlar egalari orasidagi nizolar “O‘zarxiv” agentligi tomonidan ko‘rib chiqiladi. “O‘zarxiv” agentligining ushbu masalalar bo‘yicha qarori ustidan sudga arz qilinishi mumkin.

1. “Arxiv ishi to‘g‘risida”gi O‘zbekiston Respublikasi Qonuniga muvofiq hujjatlar saqlanishini ta’minlash, hisobini olish, ulardan ilmiy va amaliy maqsadlarda foydalanish uchun respublika davlat hokimiyati va boshqaruvi organlari, korxonalar, muassasalar va tashkilotlarda* idoraviy arxivlar tuziladi.

2. Idoraviy arxiv yetakchi (bosh) bo‘lgan tashkilot qoshida tarkibiy bo‘linma sifatida tashkil etiladi, u tashkilot rahbari yoki tashkilot to‘g‘risidagi nizomga muvofiq hujjatlar bilan ishlashni yo‘lga qo‘yish uchun javobgar bo‘lgan tarkibiy bo‘linma rahbariga bo‘ysunadi.

3. Idoraviy arxiv o‘z faoliyatida O‘zbekiston Respublikasi Konstitutsiyasiga, qonunlariga, O‘zbekiston Respublikasi Oliy Majlisining qarorlariga, O‘zbekiston Respublikasi Prezidentining farmonlari va farmoyishlariga, O‘zbekiston Respublikasi Vazirlar Mahkamasining qarorlari va farmoyishlariga, yetakchi (bosh) va o‘z tashkilotining buyruqlari va ko‘rsatmalariga, O‘zbekiston Respublikasi Adliya vazirligi huzuridagi “O‘zarxiv” agentligining qoidalari va yo‘riqnomalariga va mazkur Namunaviy nizomga amal qiladi.

4. Idoraviy arxiv mudiri (yoki arxiv uchun javobgar shaxs) va arxivning shtatdagi boshqa xodimlari tashkilot rahbari tomonidan ishga tayinlanadi va ishdan bo‘shatiladi.

5. Idoraviy arxiv tashkilot rahbariyati tomonidan tasdiqlanadigan rejaga muvofiq ishlaydi va o‘z faoliyati haqida unga hisobot berib turadi.

6. Arxiv xodimlarining xizmat doirasidagi vazifalari tashkilot rahbarlari tomonidan tasdiqlanadigan lavozim yo‘riqnomasi bilan belgilanadi.

7. Ushbu Namunaviy nizomga muvofiq tashkilot o‘zining idoraviy arxivi to‘g‘risidagi nizomini ishlab chiqadi va u O‘zbekiston Respublikasi Adliya vazirligi huzuridagi “O‘zarxiv” agentligining tegishli organi yoki muassasasi bilan kelishgan holda tashkilot rahbari tomonidan tasdiqlanadi.

8. Idoraviy arxiv hujjatlari tarkibiga quyidagilar kiradi:

8.1. Tashkilot tarkibiy bo‘linmalari hamda unga bevosita bo‘ysunadigan bo‘linmalarning (agar ularda amaliy jihatdan arxiv tashkil etishga ehtiyoj bo‘lmasa) ish faoliyati jarayonida vujudga kelgan va ish yuritish davomida tugallangan hujjatlari;

8.3. Mazkur tashkilotda yoki unga qarashli bo‘lgan tashkilotda ishlagan fan, texnika, madaniyat arboblari va ishlab chiqarish novatorlarining shaxsiy fondlari;

8.4. Matbaa hujjatlari, shu jumladan, arxiv hujjatlarini to‘ldiruvchi idoraviy nashrlar hamda arxivning ilmiy-tadqiqot, axborot-ma’lumotnoma va boshqa ishlari uchun zarur bo‘lgan materiallar;

8.5. Arxiv hujjatlari tarkibi va mazmunini ochib beruvchi ilmiy-ma’lumot apparati (hujjatlar ro‘yxati, tarixiy ma’lumotnomalar, kataloglar, ko‘rsatkichlar, sharxlar va hokazo).

10. Idoraviy arxivning asosiy vazifalari: tashkilot hujjatlarini jamlash, hisobga olish, saqlash, ulardan foydalanish va davlat tomonidan saqlashga topshirish uchun tegishli arxivlarga topshirishdan iborat bo‘ladi.

11. Idoraviy arxiv o‘ziga yuklangan vazifalarga muvofiq:

11.1. O‘zbekiston Respublikasi Adliya vazirligi huzuridagi “O‘zarxiv” agentligi organlari va muassasalari bilan kelishilgan me’yoriy-uslubiy hujjatlarga muvofiq tashkilotning tarkibiy bo‘linmalari hamda arxivni butlash manbalari hisoblangan boshqa tashkilotlarning ish yuritish jarayonida tugallangan hamda shaxsiy tarkib hujjatlarini jamlaydi, hisobga oladi va saqlaydi;

11.2. Arxivga qabul qilingan yig‘majildlar va hujjatlarga fond tartib raqamlarini beradi;

11.3. Arxivda saqlanayotgan hujjatlarga ilgari saqlashga topshirilgan hujjatlarning ilmiy-ma’lumot apparati bilan izchilligini hisobga olgan holda ilmiy-ma’lumot apparatini tashkil qiladi va to‘ldirib boradi;

11.4. Arxivda saqlanayotgan hujjatlarning ilmiy va amaliy qimmatini aniqlash uchun ekspertiza qilishni tashkil etadi, ish yuritish jarayonida hujjatlar qimmatini ekspertiza qilishda uslubiy yordam ko‘rsatadi;

11.5. Hujjatlarni topshirish uchun tayyorlaydi va “Arxiv ishi to‘g‘risida”gi O‘zbekiston Respublikasi Qonunida belgilangan muddatlarda topshiradi (O‘zbekiston Respublikasi Vazirlar Mahkamasi tomonidan Milliy arxiv fondining davlatga tegishli qismi tarkibiga kiritilgan arxiv hujjatlarini doimiy (muddatsiz) saqlash huquqi berilgan idoraviy arxivlar bundan mustasno);

11.6.O‘zbekiston Respublikasi Milliy arxiv fondi hujjatlarini ro‘yxatdan o‘tkazish va ularning davlat hisobini yuritishni tashkil etish uchun zarur bo‘lgan hujjatlarni tegishliligi bo‘yicha O‘zbekiston Respublikasi Adliya vazirligi huzuridagi “O‘zarxiv” agentligi organlari va muassasalariga taqdim etadi hamda arxivda saqlanayotgan hujjatlarning idoraviy saqlanishi to‘g‘risida tasdiqlangan statistik shakllar bo‘yicha ma’lumotlar beradi;

Idoraviy arxivlar saqlovidagi Milliy arxiv fondi hujjatlari to‘g‘risidagi ma’lumotlarni Davlat katalogiga belgilangan shaklga muvofiq taqdim etadi

11.7. Tashkilotning ish yuritish xizmati bilan birgalikda tarkibiy bo‘linmalar yig‘majildlarining to‘g‘ri shakllantirilishini va rasmiylashtirilishini nazorat qiladi, yig‘majildlar ro‘yxatini tuzishda ishtirok etadi;

11.8. Quyi tarkibiy bo‘linmalarda idoraviy arxivlarning ahvolini va ish yuritish qanday yo‘lga qo‘yilganligini tekshirishda ishtirok etadi;

11.9. Quyi tashkilotlarda saqlanayotgan hujjatlar hisobini olib boradi;

11.10. Hujjatlardan foydalanishni tashkil qiladi va belgilangan tartibda ham manfaatdor tashkilotlarga, ham fuqarolarga ma’lumotnomalar, hujjatlardan ko‘chirmalar va nusxalar beradi;

11.11. Tizim tashkilotlari idoraviy arxivlarining ish tajribasini o‘rganadi va umumlashtiradi;

11.12. Tashkilotning o‘ziga xosligini hisobga olgan holda arxiv ishi va ish yuritishda hujjatlar bilan ishlash bo‘yicha me’yoriy-uslubiy hujjatlar (yo‘riqnoma, tavsiya, nizom, saqlash muddatlari ko‘rsatilgan hujjatlar ro‘yxati va boshqalar)ni ishlab chiqishda ishtirok etadi, ularni Adliya vazirligi huzuridagi “O‘zarxiv” agentligi organlari va muassasalari bilan kelishib oladi;

11.13. Quyi tashkilotlar xodimlariga hujjatlar bilan ishlashni tashkil qilish va arxiv ishi masalalariga doir maslahatlar beradi;

11.14. Quyi tashkilotlarning ish yuritish xizmati va arxiv xodimlari malakasini oshirish bo‘yicha tadbirlar o‘tkazishda ishtirok etadi.

12. Idoraviy arxivga o‘ziga yuklangan vazifalarni va funksiyalarni bajarish uchun quyidagi huquqlar beriladi:

12.1. Tashkilotning tarkibiy bo‘linmalari va quyi tashkilot arxivlariga o‘z vakolatlariga kiruvchi masalalar bo‘yicha belgilangan tartibda ko‘rsatmalar berish;

12.2. Tashkilotning tarkibiy bo‘linmalari va quyi tashkilot arxivlaridan arxiv ishi uchun zarur bo‘lgan ma’lumotlarni so‘rab olish;

12.3. Zarur hollarda ekspertlar va maslahatchilar sifatida tashkilotning malakali mutaxassislarini jalb etish;

12.4. Idoraviy arxiv huzurida arxiv ishiga ko‘maklashuvchi kengashlar va komissiyalar tashkil etish.