Oʻzbekiston Respublikasi Prezidentining “Ekologiya va atrof muhitni muhofaza qilish sohasida davlat boshqaruvi tizimini takomillashtirish toʻgʻrisida” 2017-yil 21-apreldagi PF-5024-son Farmoniga va Oʻzbekiston Respublikasi Prezidentining “Oʻzbekiston Respublikasi Ekologiya va atrof muhitni muhofaza qilish davlat qoʻmitasi faoliyatini taʼminlash chora-tadbirlari toʻgʻrisida” 2017-yil 21-apreldagi PQ-2915-son qaroriga muvofiq Oʻzbekiston Respublikasi Ekologiya va atrof muhitni muhofaza qilish davlat qoʻmitasining Chiqindilarning hosil boʻlishi, toʻplanishi, saqlanishi, tashilishi, utilizatsiya qilinishi, qayta ishlanishi, koʻmilishi va realizatsiyasini nazorat qilish inspeksiyasi faoliyatining huquqiy asoslarini tashkil etish maqsadida Vazirlar Mahkamasi qaror qiladi:

1. Oʻzbekiston Respublikasi Ekologiya va atrof muhitni muhofaza qilish davlat qoʻmitasining Chiqindilarning hosil boʻlishi, toʻplanishi, saqlanishi, tashilishi, utilizatsiya qilinishi, qayta ishlanishi, koʻmilishi va realizatsiyasini nazorat qilish inspeksiyasi toʻgʻrisidagi Nizom ilovaga muvofiq tasdiqlansin.

2. Oʻzbekiston Respublikasi Ekologiya va atrof muhitni muhofaza qilish davlat qoʻmitasi ikki oy muddatda Chiqindilarning hosil boʻlishi, toʻplanishi, saqlanishi, tashilishi, utilizatsiya qilinishi, qayta ishlanishi, koʻmilishi va realizatsiyasini nazorat qilish inspeksiyasi hamda uning hududiy inspeksiyalari tegishli tajribaga ega boʻlgan malakali mutaxassislar bilan toʻldirilishini taʼminlasin.

3. Mazkur qarorning bajarilishini nazorat qilish Oʻzbekiston Respublikasi Ekologiya va atrof-muhitni muhofaza qilish davlat qoʻmitasi raisi B.T.Qoʻchqorov zimmasiga va Sogʻliqni saqlash, ekologiya, atrof-muhitni muhofaza qilish, jismoniy tarbiya va sport masalalari axborot-tahlil departamentiga yuklansin.

1. Ushbu Nizom Oʻzbekiston Respublikasi Ekologiya va atrof muhitni muhofaza qilish davlat qoʻmitasining Chiqindilarning hosil boʻlishi, toʻplanishi, saqlanishi, tashilishi, utilizatsiya qilinishi, qayta ishlanishi, koʻmilishi va realizatsiyasini nazorat qilish inspeksiyasining (keyingi oʻrinlarda Inspeksiya deb ataladi) maqomi, asosiy vazifalari, funksiyalari, huquqlari va masʼuliyatini belgilaydi.

2. Inspeksiya Oʻzbekiston Respublikasi Ekologiya va atrof muhitni muhofaza qilish davlat qoʻmitasi (keyingi oʻrinlarda — Davlat ekologiya qoʻmitasi deb ataladi) markaziy apparatining tarkibiy boʻlinmasi hisoblanadi.

3. Chiqindilar bilan bogʻliq ishlarni amalga oshirishda qonun hujjatlari talablari bajarilishi yuzasidan Davlat ekologiya qoʻmitasiga yuklangan nazorat vazifalari, Qoraqalpogʻiston Respublikasi Ekologiya va atrof muhitni muhofaza qilish qoʻmitasi, viloyatlar va Toshkent shahar Ekologiya va atrof muhitni muhofaza qilish boshqarmalari apparatlaridagi Inspeksiya xamda hududiy inspeksiyalar (keyingi oʻrinlarda hududiy inspeksiyalar deb ataladi), shuningdek shaharlar va tumanlarga biriktirilgan davlat inspektorlari tomonidan amalga oshiriladi.

4. Inspeksiya oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, ushbu Nizomga, shuningdek boshqa qonun hujjatlariga amal qiladi.

5. Inspeksiya oʻziga yuklatilgan vazifalarga muvofiq chiqindi bilan bogʻliq ishlarni amalga oshirish sohasida maxsus vakolatli davlat organlarining, shuningdek chiqindi bilan bogʻliq ishlarni amalga oshirish sohasida jismoniy va yuridik shaxslarning faoliyatini muvofiqlashtiradi.

6. Inspeksiya oʻz faoliyatini boshqa davlat boshqaruvi organlari, mahalliy davlat hokimiyati organlari, nodavlat notijorat tashkilotlar, boshqa jismoniy va yuridik shaxslar bilan oʻzaro hamkorlikda amalga oshiradi.

7. Quyidagilar Inspeksiyaning asosiy vazifalari hisoblanadi:

davlat va xoʻjalik boshqaruvi organlari, mahalliy ijro etuvchi hokimiyat organlari, shaharlar va tumanlar obodonlashtirish boshqarmalaridagi maxsus sanitariya jihatidan tozalash korxonalari, “Toza hudud”, “Maxsustrans” davlat unitar korxonalari faoliyati yuzasidan, shuningdek jismoniy va yuridik shaxslarning chiqindilar bilan bogʻliq ishlarni amalga oshirish sohasidagi qonun hujjatlariga rioya etish borasidagi faoliyatining davlat nazoratini amalga oshirish;

chiqindilarni yigʻish punktlarini tashkil etish, ularni oʻz vaqtida olib chiqish, ruxsat etilmagan chiqindixonalarning paydo boʻlishiga yoʻl qoʻymaslik, chiqindi poligonlarini boshqarish, ularni utilizatsiya qilish, qayta ishlash, koʻmish va realizatsiya qilishni belgilangan tartibda nazoratga olishni tashkil etish;

chiqindilar bilan bogʻliq ishlarni amalga oshirish, ularni koʻmish va utilizatsiya qilish joylarining davlat kadastrini yuritish bilan bogʻliq maʼlumotlarni toʻplash hamda tahlil qilish;

fuqarolarning oʻzini oʻzi boshqarish organlari va nodavlat notijorat tashkilotlarga jamoatchilik ekologik nazoratini amalga oshirishida yordam koʻrsatish;

chiqindi bilan bogʻliq ishlarni amalga oshirish sohasidagi qonun hujjatlariga rioya etmaganlikda aybdor boʻlgan shaxslarga nisbatan jarima sanksiyalarini qoʻllash orqali maʼmuriy javobgarlikka tortish.

8. Inspeksiya oʻziga yuklangan vazifalardan kelib chiqib quyidagi funksiyalarni amalga oshiradi:

a) davlat va xoʻjalik boshqaruvi organlari, mahalliy ijro etuvchi hokimiyat organlari, shaharlar va tumanlar obodonlashtirish boshqarmalaridagi maxsus sanitariya jihatidan tozalash korxonalari, “Toza hudud”, “Maxsustrans” davlat unitar korxonalari faoliyati yuzasidan, shuningdek jismoniy va yuridik shaxslarning chiqindilar bilan bogʻliq ishlarni amalga oshirish sohasidagi qonun hujjatlariga rioya etish borasidagi faoliyati ustidan davlat nazoratini amalga oshirish sohasida:

chiqindilar hajmlari va hosil boʻlish uchastkalari boʻyicha birlamchi hisobga olish hujjatlarini yuritadi;

foydalanilgan, zararsizlantirilgan, boshqa tashkilotlarga berilgan yoki boshqa tashkilotlardan olingan shuningdek oʻzida yoki chiqindi bilan bogʻliq ishlarni amalga oshirish sohasidagi ixtisoslashtirilgan obyektlarda joylashtirilgan chiqindilar hajmlari hisobini yuritadi;

chiqindilarning atrof muhitga ehtimoliy zararli taʼsiri darajalari boʻyicha ularning xavflilik darajasi toʻgʻri aniqlanganligini baholaydi;

ekologik vaziyat yomonlashuvi, noqonuniy chiqindixonalar yuzaga kelishini oldini olish uchun joylarda sanitariya jihatidan tozalash tashkilotlari tomonidan chiqindilar oʻz vaqtida olib chiqib ketilishi ustidan muntazam ravishda nazorat olib boradi;

chiqindilarni toʻplash, saqlash, tashish, utillashtirish, qayta ishlash, koʻmish va realizatsiya qilishga ixtisoslashgan tashkilotlarning moddiy-texnika taʼminoti, ular malakali kadrlar bilan toʻldirilganligi holati monitoringini olib boradi va tahlil qiladi;

chiqindilarni joylashtirish obyektlarining sanitariya-ekologik holatini oʻrganadi;

chiqindilarning paydo boʻlishi va joylashtirilishining ekologik normativlarini belgilashda qatnashadi, chiqindilarning paydo boʻlishiga belgilanayotgan normativlarga va chiqindilarni joylashtirish obyektlariga rozilik beradi;

chiqindilarni joylashtirish limitlarini tasdiqlaydi;

chiqindi bilan bogʻliq ishlarni amalga oshirish, shu jumladan chiqindilarning ayrim toifalarini (xavflilarini) toʻplash va ularni sanoat chiqindilarining maxsus poligonlariga olib chiqishning tartib va qoidalariga rioya etilishi nazoratini olib boradi;

hisob-kitoblarning haqqoniyligi va toʻgʻriligini tekshiradi, chiqindilarni joylashtirganlik uchun kompensatsiya toʻlovlarining oʻz vaqtida toʻlanishi va undirilishini taʼminlash uchun belgilangan tartibda choralar koʻradi;

kam chiqitli va chiqitsiz texnologik jarayonlarni, chiqindilardan foydalanish, ularni zararsizlantirish va qayta ishlash texnologiyalarini joriy qilishga yoʻnaltirilgan chora-tadbirlar bajarilishining nazoratini olib boradi;

b) chiqindilarni yigʻish shoxobchalarini belgilangan tartibda barpo etish, chiqindilarni oʻz vaqtida olib chiqib ketish, noqonuniy chiqindixonalar yuzaga kelishiga yoʻl qoʻymaslik, poligonlarni boshqarish, shuningdek chiqindi bilan bogʻliq ishlarni amalga oshirish ustidan nazoratni tashkil etish sohasida:

chiqindilarni toʻplash, saqlash, tashish, utillashtirish va qayta ishlashni amalga oshiruvchi jismoniy va yuridik shaxslar faoliyatini muvofiqlashtiradi;

qonun hujjatlarida belgilangan tartibda reyd tartibidagi ekologik nazoratni oʻtkazadi, joylarda noqonuniy chiqindixonalarni aniqlash, ularni bartaraf etish choralarini koʻrgan holda, muntazam ravishda monitoring olib boradi;

kadastr maʼlumotlaridan foydalangan holda, chiqindilarni koʻmish va utillashtirish joylarining inventarizatsiyasi, hisobi va baholanishini oʻtkazadi;

chiqindilarni toʻplash, saqlash, utillashtirish, qayta ishlash, koʻmish joylaridagi, shuningdek ularni tashish yoʻnalishlaridagi atrof muhit holati kuzatuvlarini amalga oshiradi, atrof muhit ifloslanishiga olib kelishi hamda aholining hayoti va sogʻligʻiga tahdid solishi mumkin boʻlgan vaziyatlarni aniqlaydi va bartaraf etadi;

vazirliklar va idoralarga, mahalliy ijro etuvchi hokimiyat organlariga, jismoniy va yuridik shaxslarga chiqindilarni toʻplash, saqlash, tashish, utillashtirish, qayta ishlash, koʻmish va realizatsiya qilish borasida metodik yordam koʻrsatadi;

v) chiqindi bilan bogʻliq ishlarni amalga oshirish, ularni koʻmish va utillashtirish joylari davlat kadastrini yuritish bilan bogʻliq maʼlumotlarni toʻplash va tahlil qilish sohasida:

chiqindilarning inventarizatsiya qilinishini va pasportlashtirilishini oʻtkazadi;

chiqindilar ekologik sertifikatlashtirishini oʻtkazadi;

chiqindilarni koʻmish va utillashtirish joylari toʻgʻrisidagi maʼlumotlarni toʻplash, qayta ishlash, saqlash va tahlil qilishni, chiqindilarni koʻmish va utillashtirish joylarining davlat kadastrini yuritgan holda amalga oshiradi;

tadbirkorlik subyektlari tomonidan, chiqindi bilan bogʻliq ishlarni amalga oshirish sohasida taqdim etiladigan davlat statistika hisobotlarining Oʻzbekiston Respublikasi Davlat statistika qoʻmitasi tomonidan tasdiqlanadigan shaklga muvofiq haqqoniyligini aniqlaydi;

hosil boʻlayotgan chiqindilar miqdori va xavflilik darajasini kamaytirish imkoniyat va usullarini aniqlash maqsadida mavjud texnologiyalar tahlilini amalga oshiradi;

chiqindi bilan bogʻliq ishlarni amalga oshirish sohasidagi normativ-huquqiy hujjatlar, davlat dasturlari va boshqa dasturlarni ishlab chiqishda ishtirok etadi;

mahalliy ijro etuvchi hokimiyat organlariga taqdim etish uchun hududlarning sanitariya-ekologik xavfsizligini taʼminlash hamda chiqindi bilan bogʻliq ishlarni amalga oshirish sohasida qonun hujjatlariga rioya etish yuzasidan takliflar tayyorlashda ishtirok etadi;

aholi punktlarini maxsus sanitariya jihatidan tozalash korxonalari faoliyatlari va shaharlar (tumanlar) hududlarining sanitar-ekologik holati yuzasidan Qoʻmitaning hayʼat yigʻilishlarida koʻrib chiqish uchun masalalar va takliflar kiritadi;

chiqindilarni zararsizlantirish, qayta ishlash va utillashtirishning mavjud va istiqbolli texnologiyalari boʻyicha, chiqindilarni qayta ishlash va utillashtirish, chiqindi bilan bogʻliq ishlarni amalga oshirish sohasida xizmat koʻrsatuvchi tashkilotlar, shuningdek tariflarga oid maʼlumotlarning yagona elektron bazasini yuritadi;

profilaktika va tushuntirish tadbirlari doirasida davlat organlari, nodavlat notijorat tashkilotlar va aholining chiqindi bilan bogʻliq ishlarni amalga oshirish sohasidagi vaziyat haqida xabardorligini taʼminlaydi.

g) fuqarolarning oʻzini oʻzi boshqarish organlari va nodavlat notijorat tashkilotlarga jamoat ekologik nazoratini amalga oshirishda koʻmaklashish sohasida:

chiqindilar bilan bogʻliq ishlarni amalga oshirish masalalari boʻyicha ommaviy axborot vositalari va koʻrgazmaviy targʻibot orqali, seminar, maʼruza va tushuntirish suhbatlarini oʻtkazish orqali profilaktika ishlarini oʻtkazish;

davlat organlari, fuqarolarning oʻzini oʻzi boshqarish organlari, nodavlat notijorat tashkilotlar bilan birgalikda, ommaviy axborot vositalarini jalb qilgan holda aholining chiqindilar bilan bogʻliq ishlarni amalga oshirish masalalaridan xabardorligini oshirish chora-tadbirlarini amalga oshiradi;

joylarda chiqindilar bilan bogʻliq ishlarni amalga oshirish sohasidagi ishlarning ahvolini oʻrganish yuzasidan qonun hujjatlarida belgilangan tartibda qoʻshma sayyor tadbirlar oʻtkazadi;

chiqindi bilan bogʻliq ishlarni amalga oshirish tizimini muvofiqlashtirish va takomillashtirish Respublika komissiyasining qarorlari, koʻrsatmalari va tavsiyalarini bajaradi;

jismoniy va yuridik shaxslarning chiqindi bilan bogʻliq ishlarni amalga oshirish sohasidagi huquqbuzarliklar haqidagi murojaatlarini qonun hujjatlarida belgilangan tartibda koʻrib chiqadi;

d) chiqindi bilan bogʻliq ishlarni amalga oshirishda qonun hujjatlari talablariga rioya etmaganlikda aybdor boʻlgan shaxslarga nisbatan maʼmuriy choralarni qoʻllash sohasida:

aniqlangan huquqbuzarlik holatlari yuzasidan, mahalliy ijro etuvchi hokimiyat organlari, fuqarolarning oʻzini oʻzi boshqarish organlari, sanitariya jihatidan tozalash tashkilotlariga, jismoniy va yuridik shaxslarga ularni bartaraf etishga qaratilgan koʻrsatmalar kiritadi;

qonun hujjatlarida nazarda tutilgan taʼsir choralarini koʻradi, belgilangan tartibda maʼmuriy javobgarlikka tortadi.

9. Inspeksiya oʻziga yuklangan asosiy vazifalar va funksiyalarni bajarish uchun quyidagi huquqlarga ega:

oʻz vakolati doirasida hamda qonun hujjatlarda belgilangan tartibda davlat va xoʻjalik boshqaruvi organlari, shuningdek jismoniy va yuridik shaxslarning chiqindilar bilan bogʻliq ishlarni amalga oshirish masalalaridagi faoliyati ustidan, shu jumladan jamoat joylari, aholi yashash mavzelari va mahallalar, oʻrmon va suv fondi yerlari hududlarida nazoratni amalga oshirish;

ushbu sohada faoliyat yurituvchi tashkilotlar rahbarlarining chiqindilarni toʻplash, saqlash, tashish, utillashtirish, qayta ishlash, koʻmish va realizatsiya qilish masalalari bilan bogʻliq axborot va hisobotlarini eshitish;

chiqindilar bilan bogʻliq ishlarni amalga oshirish masalalari boʻyicha normativ-huquqiy hujjatlarni takomillashtirish yuzasidan takliflar kiritish;

atrof muhit holatini baholash va uni sogʻlomlashtirish chora-tadbirlarini ishlab chiqish uchun, shuningdek chiqindilarni toʻplash, saqlash, tashish, utillashtirish, qayta ishlash va koʻmish joylarida tabiatni muhofaza qilish qonunchiligi buzilganligi natijasida atrof muhitga yetkazilgan zararni aniqlash boʻyicha ilmiy-texnik, ekspertlik guruhlar va komissiyalarni tashkil etish;

chiqindilar bilan bogʻliq ishlarni amalga oshirishga doir normativ-huquqiy hujjatlar, davlat dasturlari va boshqa dasturlar loyihalarini ishlab chiqishga, davlat ekologik ekspertizasini oʻtkazishga, ekologik bilimlarni targʻib qilishga va boshqa masalalarni hal qilishda ilmiy-tadqiqot, loyiha, konstruktorlik tashkilotlari, oliy taʼlim muassasalari, shuningdek alohida olimlar va mutaxassislarni belgilangan tartibda jalb qilish yuzasidan takliflar kiritish;

korxonalar, tashkilotlar, inshootlar va boshqa obyektlar tomonidan, odamlarning sogʻligʻiga yoki yashash sharoitlariga, tabiiy resurslarga, muhofaza etiladigan tabiiy hududlarga zararli taʼsir koʻrsatilgan hollarda yoki bunday taʼsir tahdidi paydo boʻlganda, bunday obyektlar faoliyatini qonun hujjatlarida belgilangan tartibda cheklash, toʻxtatib turish, toʻxtatish va (yoki) sohasini oʻzgartirish choralarini koʻrish;

davlat organlaridan, yuridik va jismoniy shaxslardan chiqindilar bilan bogʻliq ishlarni amalga oshirish masalalariga doir maʼlumotlarni belgilangan tartibda soʻrash va olish;

chiqindilar bilan ifloslanish natijasida atrof muhitga yetkazilgan zararni qoplash yuzasidan yuridik va jismoniy shaxslarga nisbatan belgilangan tartibda daʼvolar qoʻzgʻash;

mahalliy ijro etuvchi hokimiyat organlari, fuqarolarning oʻzini oʻzi boshqarish organlari, tashkilotlar, yuridik va jismoniy shaxslarga, chiqindilar bilan bogʻliq ishlarni amalga oshirish sohasida aniqlangan huquqbuzarliklarni bartaraf etish yuzasidan Qoʻmita nomidan koʻrsatmalar berish.

Inspeksiya qonun hujjatlarga muvofiq boshqa huquqlarga ham ega boʻlishi mumkin.

10. Inspeksiya oʻziga yuklangan vazifalar va funksiyalarning samarali bajarilishi, chiqindilar bilan bogʻliq ishlarni amalga oshirishga doir masalalar xolisona koʻrib chiqilishi uchun masʼuldir.

11. Inspeksiyaga Davlat ekologiya qoʻmitasi raisi tomonidan lavozimga tayinlanadigan va lavozimdan ozod etiladigan boshliq rahbarlik qiladi.

12. Inspeksiya boshligʻi:

Inspeksiya faoliyatiga umumiy rahbarlik qiladi;

oʻz vakolatiga kiradigan masalalar boʻyicha qarorlar qabul qiladi va Inspeksiyaga yuklangan vazifalar va funksiyalarning bajarilishi uchun shaxsan javob beradi;

Inspeksiya xodimlari orasida vazifalarni taqsimlaydi;

hududiy inspeksiyalarga rahbarlik qiladi va ularni metodik taʼminlaydi;

Inspeksiyaning barcha xodimlari tomonidan bajarilishi majburiy boʻlgan koʻrsatmalar beradi va ular ijrosi nazoratini tashkil etadi;

Davlat ekologiya qoʻmitasi raisiga Inspeksiya xodimlarini lavozimga tayinlash va lavozimdan ozod qilish haqida takliflar kiritadi;

qonun hujjatlarga muvofiq boshqa vakolatlarni amalga oshiradi.

13. Hududiy inspeksiyalar haqidagi nizomlar Davlat ekologiya qoʻmitasi tomonidan tasdiqlanadi.

14. Qoraqalpogʻiston Respublikasi Ekologiya va atrof muhitni muhofaza qilish qoʻmitasi apparatidagi, shuningdek viloyatlar va Toshkent shahri Ekologiya va atrof muhitni muhofaza qilish boshqarmalari apparatlaridagi hududiy inspeksiyalar oʻz faoliyatini Qoraqalpogʻiston Respublikasi Ekologiya va atrof muhitni muhofaza qilish qoʻmitasi, viloyatlar va Toshkent shahri Ekologiya va atrof muhitni muhofaza qilish boshqarmalarining rahbarligi ostida amalga oshiradi.

Hududiy inspeksiyalar boshliqlari Davlat ekologiya qoʻmitasi bilan kelishilgan holda Qoraqalpogʻiston Respublikasi Ekologiya va atrof muhitni muhofaza qilish qoʻmitasi, viloyatlar va Toshkent shahri Ekologiya va atrof-muhitni muhofaza qilish boshqarmalari rahbarlarining buyruqlari bilan lavozimga tayinlanadi va lavozimdan ozod etiladi.

15. Davlat ekologiya qoʻmitasi markaziy apparatidagi Inspeksiya, hududiy inspeksiyalar xodimlari ekologiya va atrof muhitni muhofaza qilish davlat inspektorlari boʻlib, quyidagi huquqlarga ega:

qonun hujjatlarida belgilangan tartibda tasdiqlangan yagona namunadagi formali kiyim-bosh kiyish va farqlovchi belgilarga ega boʻlish;

Davlat ekologiya qoʻmitasi nomidan maʼmuriy huquqbuzarlik haqidagi ishlarni koʻrib chiqish va jarimaga tortish kabi maʼmuriy choralarni qoʻllash;

chiqindilar bilan bogʻliq ishlarni amalga oshirish sohasidagi qonun hujjatlariga rioya etish masalalari boʻyicha tadbirkorlik subyektlarining faoliyatini rejali va qisqa muddatli tekshirishda ishtirok etish;

sanitariya jihatidan tozalash korxonalari tomonidan chiqindilar oʻz vaqtida olib chiqib ketilishi jadvaliga rioya etilishi yuzasidan nazoratni amalga oshirish;

chiqindi poligonlari faoliyatini sanitariya-ekologik talablarga muvofiq tashkil etish va bajarilish nazoratini taʼminlash;

fuqarolarning oʻzini oʻzi boshqarish organlari bilan birgalikda aholi va yuridik shaxslar orasida profilaktik va axborot-maʼrifiy ishlarni olib borish;

chiqindi yigʻish punktlari va qattiq maishiy chiqindilar poligonlarini joylashtirish uchun yerlarni tanlash va ajratish boʻyicha komissiyalar ishida ishtirok etish;

tuman (shahar) miqyosida chiqindilar bilan bogʻliq ishlarni amalga oshirishning butun sikli boʻyicha monitoring olib borish;

chiqindilar bilan bogʻliq ishlarni amalga oshirish sohasida huquqbuzarliklarni aniqlash boʻyicha jamoat ekologik nazorati inspektorlari bilan oʻzaro aloqa qilish.