Oʻzbekiston Respublikasining “Aksiyadorlik jamiyatlari va aksiyadorlarning huquqlarini himoya qilish toʻgʻrisida”gi Qonuni va Oʻzbekiston Respublikasi Vazirlar Mahkamasining 2019-yil 7-avgustdagi 650-son “Oʻzbekiston Respublikasi Kapital bozorini rivojlantirish agentligi va Oʻzbekiston Respublikasi Kapital bozorini rivojlantirish agentligi huzuridagi Kapital bozorini rivojlantirishga koʻmaklashish jamgʻarmasi toʻgʻrisidagi nizomlarni tasdiqlash haqida”gi qarorga muvofiq buyuraman:

1. Aksiyadorlik jamiyatida minoritar aksiyadorlar qoʻmitasining faoliyat koʻrsatishi tartibi toʻgʻrisidagi nizom ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran uch oydan keyin kuchga kiradi.

Mazkur Nizom Oʻzbekiston Respublikasining “Aksiyadorlik jamiyatlari va aksiyadorlarning huquqlarini himoya qilish toʻgʻrisida”gi Qonuniga va Oʻzbekiston Respublikasi Vazirlar Mahkamasining 2019-yil 7-avgustdagi 650-son “Oʻzbekiston Respublikasi Kapital bozorini rivojlantirish agentligi va Oʻzbekiston Respublikasi Kapital bozorini rivojlantirish agentligi huzuridagi Kapital bozorini rivojlantirishga koʻmaklashish jamgʻarmasi toʻgʻrisidagi nizomlarni tasdiqlash haqida”gi qarorga muvofiq aksiyadorlik jamiyatida minoritar aksiyadorlar qoʻmitasi (bundan buyon matnda qoʻmita deb yuritiladi) faoliyati tartibini belgilaydi.

1. Mazkur Nizomda quyidagi asosiy tushunchalardan foydalaniladi:

Aksiyadorlik jamiyati (bundan buyon matnda jamiyat deb yuritiladi) — ustav fondi (ustav kapitali) aksiyadorlarning aksiyadorlik jamiyatiga nisbatan huquqlarini tasdiqlovchi muayyan miqdordagi aksiyalarga taqsimlangan tijorat tashkiloti;

Aksiyador — aksiyalar mulk huquqi yoki boshqa ashyoviy huquq asosida tegishli boʻlgan yuridik yoxud jismoniy shaxs;

minoritar aksiyadorlar — aksiyadorlarning umumiy yigʻilishida ishtirok etishi va ovoz berishi yigʻilish kun tartibidagi masalalar boʻyicha ovoz berish natijalariga taʼsir oʻtkazmaydigan aksiyalar egalari;

kuzatuv kengashi — qonun va aksiyadorlik jamiyati ustavi bilan aksiyadorlar umumiy yigʻilishining vakolati doirasiga kiritilgan masalalardan tashqari aksiyadorlik jamiyati faoliyatiga umumiy rahbarlikni amalga oshiruvchi boshqaruv organi;

qimmatli qogʻozlar bozorini tartibga solish boʻyicha vakolatli davlat organi — Oʻzbekiston Respublikasi Istiqbolli loyihalar milliy agentligi.

2. Qoʻmitaning qarorlari jamiyatning boshqaruv va nazorat organlari tomonidan bajarilishi majburiy emas, ushbu Nizomda nazarda tutilgan tartibda tegishli hujjatlarni taqdim etish toʻgʻrisidagi qarorlari bundan mustasno.

Jamiyatning aksiyadorlariga tegishli boʻlgan dividendlar toʻlanmagan taqdirda qimmatli qogʻozlar bozorini tartibga solish boʻyicha vakolatli davlat organi mazkur jamiyat aksiyadorining yoki qoʻmitaning murojaati asosida sudga jamiyatning zimmasiga ushbu jamiyat barcha aksiyadorlariga dividendlar toʻlash majburiyatini yuklatish toʻgʻrisida daʼvo taqdim etishga haqli. Bunday daʼvoni taqdim etish va koʻrib chiqish tartibi qonunchilik hujjatlarida belgilanadi.

3. Minoritar aksiyadorlarning huquqlari va qonuniy manfaatlarini himoya qilish maqsadida jamiyatda ularning orasidan qoʻmita tashkil etilishi mumkin.

4. Qoʻmitani tashkil etish mumkinligi jamiyatning ustavida nazarda tutilgan boʻlishi lozim.

5. Aksiyadorlar (aksiyador) jamiyatning moliya yili tugaganidan keyin oʻttiz kundan kechiktirmay, agar jamiyat ustavida bundan kechroq muddat belgilanmagan boʻlsa, aksiyadorlarning yillik umumiy yigʻilishi kun tartibiga qoʻmita tarkibiga nomzodlar boʻyicha takliflar koʻrsatishga haqli.

6. Aksiyadorlar (aksiyador) qoʻmitaga oʻzlari koʻrsatgan nomzodlar roʻyxatiga aksiyadorlarning yillik umumiy yigʻilishi oʻtkazilishi toʻgʻrisidagi xabar eʼlon qilingan sanadan eʼtiboran uch ish kunidan kechiktirmay oʻzgartishlar kiritishga haqli.

7. Qoʻmita aʼzolarini saylash toʻgʻrisidagi qaror aksiyadorlarning umumiy yigʻilishi tomonidan bir yil muddatga qabul qilinadi.

Qoʻmita tarkibiga saylangan shaxslar cheklanmagan tarzda qayta saylanishi mumkin.

8. Qoʻmitaning aʼzolarini saylashda aksiyadorlarning umumiy yigʻilishida hozir boʻlgan va jamiyat kuzatuv kengashiga nomzodlar koʻrsatmagan yoxud aksiyadorlarning oʻtkazilayotgan umumiy yigʻilishida kuzatuv kengashiga nomzodlari saylanmagan aksiyadorlar ishtirok etadi.

9. Jamiyat boshqaruvi aʼzolari va direktori, shuningdek jamiyat kuzatuv kengashi hamda, taftish komissiyasi aʼzolari (taftishchisi) jamiyatning qoʻmita aʼzolari tarkibiga kiritilishi mumkin emas.

10. Qoʻmita aʼzolarining soni jamiyat ustavi bilan belgilanib, uch kishidan kam boʻlmasligi, shuningdek umumiy soni toq sondan iborat boʻlishi lozim.

11. Qoʻmitaning raisi ushbu qoʻmita tarkibidan uning aʼzolari tomonidan koʻpchilik ovoz bilan saylanadi.

12. Qoʻmita faoliyatini tashkil etish maqsadida jamiyat ijroiya organi rahbari qoʻmita aʼzolariga ish joyini, kompyuter uskunasini, seyfni, telefon yoki faksimil aloqasini ajratgan tarzda zarur mehnat sharoitini yaratib berishi shart.

13. Qoʻmitaning vakolatiga quyidagilar kiradi:

aksiyadorlarning umumiy yigʻilishi yoki jamiyatning kuzatuv kengashi koʻrib chiqishi uchun kiritilayotgan yirik bitimlar va affillangan shaxslar bilan bitimlar tuzishga oid masalalar boʻyicha takliflar tayyorlashda ishtirok etish;

minoritar aksiyadorlarning oʻz huquqlari va qonuniy manfaatlarini himoya qilish bilan bogʻliq murojaatlarini koʻrib chiqish;

qimmatli qogʻozlar bozorini tartibga solish boʻyicha vakolatli davlat organiga minoritar aksiyadorlarning huquqlari va qonuniy manfaatlarini himoya qilish toʻgʻrisida murojaatlar kiritish;

qonunchilik hujjatlariga va jamiyat ustaviga muvofiq boshqa masalalarni koʻrib chiqish.

14. Qoʻmitaning majlislari muntazam ravishda oʻtkaziladi va qoʻmitaning tarkibiga saylangan shaxslarning kamida toʻrtdan uch qismi hozir boʻlganda vakolatlidir.

Qoʻmita raisi qoʻmita qarorida kuni va vaqtini belgilagan tarzda minoritar aksiyadorlarni xaftalik qabulini tashkil etishi lozim.

15. Qoʻmita qarorlari oddiy koʻpchilik ovozi bilan qabul qilinadi va yigʻilishda ishtirok etuvchi barcha qoʻmita aʼzolari tomonidan imzolanadigan bayonnoma bilan rasmiylashtiriladi.

16. Qoʻmitaning bir aʼzosi oʻz ovozini shu qoʻmitaning boshqa bir aʼzosiga berishiga yoʻl qoʻyilmaydi.

17. Qoʻmita raisi qoʻmitaning vakolati doirasiga kiritilgan barcha masalalar boʻyicha jamiyatning maʼlumot va hujjatlaridan, shu jumladan jamiyat taftish komissiyasining (taftishchisining), auditorlik tashkilotining xulosalari va hisobotlari, nazorat qiluvchi davlat organlarining tekshirish dalolatnomalari, jamiyatga va uning mansabdor shaxslariga nisbatan chiqarilgan sud qarorlaridan, shuningdek affillangan shaxslar bilan nazarda tutilgan bitimlarni jamiyatning ijroiya organi va ichki audit xizmati tomonidan oʻrganish boʻyicha bayonnomalaridan erkin foydalanish huquqiga ega.

18. Qoʻmita vakolatiga kiradigan masalalar boʻyicha hujjatlarni olish toʻgʻrisidagi qoʻmita raisining soʻrovnomalari yozma ravishda rasmiylashtirilgan holda jamiyat ijroiya organiga taqdim etiladi.

19. Jamiyatning ijroiya organi qoʻmita raisi tomonidan soʻralgan hujjatlarni yoki ularning nusxalarini 10 kun ichida yoxud soʻrovnomada koʻrsatilgan muddatdan kechiktirmagan tarzda taqdim etishi shart.

20. Qabul qilinib olingan hujjatlar qoʻmita raisi va aʼzolari tomonidan faqatgina xizmat maqsadlarida foydalanilishi mumkin.

Qoʻmita aʼzolari jamiyat yoki uning faoliyati toʻgʻrisidagi xizmat, tijorat sirini yoki qonun bilan qoʻriqlanadigan boshqa sirni tashkil etuvchi axborotni oshkor qilishga haqli emas.

21. Qoʻmita oʻzining vakolatiga kirgan masalalar boʻyicha qabul qilingan qarorlar toʻgʻrisida har yili aksiyadorlarning umumiy yigʻilishida hisobot beradi.

22. Qoʻmita jamiyatning xoʻjalik faoliyatiga aralashishga haqli emas.

23. Qoʻmitaning faoliyatiga jamiyat kuzatuv kengashining yoki ijroiya organining aralashuviga yoʻl qoʻyilmaydi.

24. Mazkur Nizomning talablarini buzganlikda aybdor shaxslar qonunchilik hujjatlarida belgilangan tartibda javobgar boʻladi.